ଶ୍ରୀ ଗଣେଶାୟ ନମଃ ।
ଅଵ୍ୟାଦଜୋଽଂଘ୍ରି ମଣିମାଂସ୍ତଵ ଜାନ୍ଵଥୋରୂ
ୟଜ୍ଞୋଽଚ୍ୟୁତଃ କଟିତଟଂ ଜଠରଂ ହୟାସ୍ୟଃ ।
ହୃତ୍କେଶଵସ୍ତ୍ଵଦୁର ଈଶ ଇନସ୍ତୁ କଂଠଂ
ଵିଷ୍ଣୁର୍ଭୁଜଂ ମୁଖମୁରୁକ୍ରମ ଈଶ୍ଵରଃ କମ୍ ॥ 1 ॥
ଚକ୍ର୍ୟଗ୍ରତଃ ସହଗଦୋ ହରିରସ୍ତୁ ପଶ୍ଚାତ୍
ତ୍ଵତ୍ପାର୍ଶ୍ଵୟୋର୍ଧନୁରସୀ ମଧୁହାଜନଶ୍ଚ ।
କୋଣେଷୁ ଶଂଖ ଉରୁଗାୟ ଉପର୍ୟୁପେଂଦ୍ରସ୍
ତାର୍କ୍ଷ୍ୟଃ କ୍ଷିତୌ ହଲଧରଃ ପୁରୁଷଃ ସମଂତାତ୍ ॥ 2 ॥
ଇଂଦ୍ରିୟାଣି ହୃଷୀକେଶଃ ପ୍ରାଣାନ୍ନାରାୟଣୋଽଵତୁ ।
ଶ୍ଵେତଦ୍ଵୀପପତିଶ୍ଚିତ୍ତଂ ମନୋ ୟୋଗେଶ୍ଵରୋଽଵତୁ ॥ 3 ॥
ପୃଶ୍ନିଗର୍ଭସ୍ତୁ ତେ ବୁଦ୍ଧିମାତ୍ମାନଂ ଭଗଵାନ୍ପରଃ ।
କ୍ରୀଡଂତଂ ପାତୁ ଗୋଵିଂଦଃ ଶୟାନଂ ପାତୁ ମାଧଵଃ ॥ 4 ॥
ଵ୍ରଜଂତମଵ୍ୟାଦ୍ଵୈକୁଂଠ ଆସୀନଂ ତ୍ଵାଂ ଶ୍ରିୟଃ ପତିଃ ।
ଭୁଂଜାନଂ ୟଜ୍ଞଭୁକ୍ପାତୁ ସର୍ଵଗ୍ରହଭୟଂକରଃ ॥ 5 ॥
ଡାକିନ୍ୟୋ ୟାତୁଧାନ୍ୟଶ୍ଚ କୁଷ୍ମାଂଡା ୟେଽର୍ଭକଗ୍ରହାଃ ।
ଭୂତପ୍ରେତପିଶାଚାଶ୍ଚ ୟକ୍ଷରକ୍ଷୋଵିନାୟକାଃ ॥ 6 ॥
କୋଟରା ରେଵତୀ ଜ୍ୟେଷ୍ଠା ପୂତନା ମାତୃକାଦୟଃ ।
ଉନ୍ମାଦା ୟେ ହ୍ୟପସ୍ମାରା ଦେହପ୍ରାଣେଂଦ୍ରିୟଦ୍ରୁହଃ ॥ 7 ॥
ସ୍ଵପ୍ନଦୃଷ୍ଟା ମହୋତ୍ପାତା ଵୃଦ୍ଧବାଲଗ୍ରହାଶ୍ଚ ୟେ ।
ସର୍ଵେ ନଶ୍ୟଂତୁ ତେ ଵିଷ୍ଣୋର୍ନାମଗ୍ରହଣଭୀରଵଃ ॥ 8 ॥
॥ ଇତି ଶ୍ରୀମଦ୍ଭାଗଵତେ ଦଶମସ୍କଂଧେ ଗୋପୀକୃତବାଲରକ୍ଷା ସମାପ୍ତା ॥
