ଵ୍ୟାସ ଉଵାଚ ।
ଇତ୍ୟୁକ୍ତେ ତାଭିରାଶ୍ଵାସ୍ୟ କ୍ଲାଂତଦେହୋଽପି ପନ୍ନଗଃ ।
ପ୍ରସୀଦ ଦେଵଦେଵେତି ପ୍ରାହ ଵାକ୍ୟଂ ଶନୈଃ ଶନୈଃ ॥ 43 ॥
କାଲୀୟ ଉଵାଚ ।
ତଵାଷ୍ଟଗୁଣମୈଶ୍ଵର୍ୟଂ ନାଥ ସ୍ଵାଭଵିକଂ ପରମ୍ ।
ନିରସ୍ତାତିଶୟଂ ୟସ୍ୟ ତସ୍ୟ ସ୍ତୋଷ୍ୟାମି କିନ୍ଵହମ୍ ॥ 44 ॥
ତ୍ଵଂ ପରସ୍ତ୍ଵଂ ପରସ୍ୟାଽଦ୍ୟଃ ପରଂ ତ୍ଵଂ ତତ୍ପରାତ୍ମକମ୍ ।
ପରସ୍ମାତ୍ପରମୋ ୟସ୍ତ୍ଵଂ ତସ୍ୟ ସ୍ତୋଷ୍ୟାମି କିଂ ନ୍ଵହମ୍ ॥ 45 ॥
ୟଥାଽହଂ ଭଵତା ସୃଷ୍ଟୋ ଜାତ୍ୟା ରୂପେଣ ଚେଶ୍ଵରଃ ।
ସ୍ଵଭାଵେନ ଚ ସଂୟୁକ୍ତସ୍ତଥେଦଂ ଚେଷ୍ଟିତଂ ମୟା ॥ 46 ॥
ୟଦ୍ୟନ୍ୟଥା ପ୍ରଵର୍ତେୟ ଦେଵଦେଵ ତତୋ ମୟି ।
ନ୍ୟାୟ୍ୟୋ ଦଂଡନିପାତସ୍ତେ ତଵୈଵ ଵଚନଂ ୟଥା ॥ 47 ॥
ତଥାଽପି ୟଂ ଜଗତ୍ସ୍ଵାମୀ ଦଂଡଂ ପାତିତଵାନ୍ମୟି ।
ସ ସୋଢୋଽୟଂ ଵରୋ ଦଂଡସ୍ତ୍ଵତ୍ତୋ ନାନ୍ୟୋଽସ୍ତୁ ମେ ଵରଃ ॥ 48 ॥
ହତଵୀର୍ୟୋ ହତଵିଷୋ ଦମିତୋଽହଂ ତ୍ଵୟାଽଚ୍ୟୁତ ।
ଜୀଵିତଂ ଦୀୟତାମେକମାଜ୍ଞାପୟ କରୋମି କିମ୍ ॥ 49 ॥
ଇତି ବ୍ରହ୍ମପୁରାଣେ ପଂଚାଶୀତ୍ୟଧିକଶତତମାଧ୍ୟାୟାଂତର୍ଗତଂ
କାଲିୟକୃତଂ ଶ୍ରୀକୃଷ୍ଣସ୍ତୋତ୍ରଂ ସମାପ୍ତମ୍ ।
ବ୍ରହ୍ମପୁରାଣ . ଅଧ୍ୟାୟ 185/43-49 . ।
