కృష్ణ యజుర్వేదీయ తైత్తిరీయ బ్రాహ్మణే తృతీయాష్టకే ప్రథమః ప్రపాఠకః - నఖ్షత్రేష్టీనాం-యాఀజ్యా-ఽనువాక్యా బ్రాహ్మణాని
ఓ-న్నమః పరమాత్మనే, శ్రీ మహాగణపతయే నమః,
శ్రీ గురుభ్యో నమః । హ॒రిః॒ ఓమ్ ॥
అనువాకం 1 - దేవనఖ్షత్రాణాం-యాఀజ్యానువాక్యాః
అ॒గ్నిర్నః॑ పాతు॒ కృత్తి॑కాః । నఖ్ష॑త్ర-న్దే॒వమి॑న్ద్రి॒యమ్ । ఇ॒దమా॑సాం-విఀచఖ్ష॒ణమ్ । హ॒విరా॒స-ఞ్జు॑హోతన ॥ యస్య॒ భాన్తి॑ ర॒శ్మయో॒ యస్య॑ కే॒తవః॑ । యస్యే॒మా విశ్వా॒ భువ॑నాని॒ సర్వా᳚ ।
స కృత్తి॑కాభిర॒భి సం॒వఀసా॑నః । అ॒గ్నిర్నో॑ దే॒వ-స్సు॑వి॒తే ద॑ధాతు ॥ ప్ర॒జాప॑తే రోహి॒ణీ వే॑తు॒ పత్నీ᳚ ।
వి॒శ్వరూ॑పా బృహ॒తీ చి॒త్రభా॑నుః ॥ 1 ॥
సా నో॑ య॒జ్ఞస్య॑ సువి॒తే ద॑ధాతు । యథా॒ జీవే॑మ శ॒రద॒-స్సవీ॑రాః ॥ రో॒హి॒ణీ దే॒వ్యుద॑గా-త్పు॒రస్తా᳚త్ । విశ్వా॑ రూ॒పాణి॑ ప్రతి॒మోద॑మానా । ప్ర॒జాప॑తిగ్ం హ॒విషా॑ వ॒ర్ధయ॑న్తీ । ప్రి॒యా దే॒వానా॒-ముప॑యాతు య॒జ్ఞమ్ ॥ సోమో॒ రాజా॑ మృగశీ॒ర॒.షేణ॒ ఆగన్న్॑ । శి॒వ-న్నఖ్ష॑త్ర-మ్ప్రి॒యమ॑స్య॒ ధామ॑ ।
ఆ॒ప్యాయ॑మానో బహు॒ధా జనే॑షు ।
రేతః॑ ప్ర॒జాం-యఀజ॑మానే దధాతు ॥ 2 ॥
య-త్తే॒ నఖ్ష॑త్ర-మ్మృగశీ॒ర॒.షమస్తి॑ ।
ప్రి॒యగ్ం రా॑జ-న్ప్రి॒యత॑మ-మ్ప్రి॒యాణా᳚మ్ ।
తస్మై॑ తే సోమ హ॒విషా॑ విధేమ ।
శన్న॑ ఏధి ద్వి॒పదే॒ శ-ఞ్చతు॑ష్పదే ॥
ఆ॒ర్ద్రయా॑ రు॒ద్రః ప్రథ॑మాన ఏతి । శ్రేష్ఠో॑ దే॒వానా॒-మ్పతి॑రఘ్ని॒యానా᳚మ్ । నఖ్ష॑త్రమస్య హ॒విషా॑ విధేమ । మా నః॑ ప్ర॒జాగ్ం రీ॑రిష॒-న్మోత వీ॒రాన్ ॥
హే॒తీ రు॒ద్రస్య॒ పరి॑ణో వృణక్తు । ఆ॒ర్ద్రా నఖ్ష॑త్ర-ఞ్జుషతాగ్ం హ॒విర్నః॑ ॥ 3 ॥
ప్ర॒ము॒ఞ్చమా॑నౌ దురి॒తాని॒ విశ్వా᳚ । అపా॒ఘశగ్ం॑ స-న్నుదతా॒మరా॑తిమ్ ॥ పున॑ర్నో దే॒వ్యది॑తి-స్స్పృణోతు । పున॑ర్వసూ నః॒ పున॒రేతాం᳚-యఀ॒జ్ఞమ్ ।
పున॑ర్నో దే॒వా అ॒భియ॑న్తు॒ సర్వే᳚ । పునః॑ పునర్వో హ॒విషా॑ యజామః ॥ ఏ॒వా న దే॒వ్యది॑తిరన॒ర్వా । విశ్వ॑స్య భ॒ర్త్రీ జగ॑తః ప్రతి॒ష్ఠా । పున॑ర్వసూ హ॒విషా॑ వ॒ర్ధయ॑న్తీ । ప్రి॒య-న్దే॒వానా॒-మప్యే॑తు॒ పాథః॑ ॥ 4 ॥
బృహ॒స్పతిః॑ ప్రథ॒మ-ఞ్జాయ॑మానః । తి॒ష్య॑-న్నఖ్ష॑త్రమ॒భి సమ్బ॑భూవ । శ్రేష్ఠో॑ దే॒వానా॒-మ్పృత॑నాసు జి॒ష్ణుః । దిశో-ఽను॒ సర్వా॒ అభ॑యన్నో అస్తు ॥
తి॒ష్యః॑ పు॒రస్తా॑దు॒త మ॑ద్ధ్య॒తో నః॑ । బృహ॒స్పతి॑ ర్నః॒ పరి॑పాతు ప॒శ్చాత్ । బాధే॑తా॒-న్ద్వేషో॒ అభ॑య-ఙ్కృణుతామ్ । సు॒వీర్య॑స్య॒ పత॑య-స్స్యామ ॥
ఇ॒దగ్ం స॒ర్పేభ్యో॑ హ॒విర॑స్తు॒ జుష్ట᳚మ్ ।
ఆ॒శ్రే॒షా యేషా॑-మను॒యన్తి॒ చేతః॑ ॥ 5 ॥
యే అ॒న్తరి॑ఖ్ష-మ్పృథి॒వీ-ఙ్ఖ్షి॒యన్తి॑ । తేన॑-స్స॒ర్పాసో॒ హవ॒మాగ॑మిష్ఠాః ॥ యే రో॑చ॒నే సూర్య॒స్యాపి॑
స॒ర్పాః । యే దివ॑-న్దే॒వీమను॑ స॒ఞ్చర॑న్తి ।
యేషా॑మాశ్రే॒షా అ॑ను॒యన్తి॒ కామ᳚మ్ ।
తేభ్య॑-స్స॒ర్పేభ్యో॒ మధు॑మజ్జుహోమి ॥
ఉప॑హూతాః పి॒తరో॒ యే మ॒ఘాసు॑ । మనో॑జవస-స్సు॒కృత॑-స్సుకృ॒త్యాః । తే నో॒ నఖ్ష॑త్రే॒ హవ॒మాగ॑మిష్ఠాః । స్వ॒ధాభి॑ ర్య॒జ్ఞ-మ్ప్రయ॑త-ఞ్జుషన్తామ్ ॥ 6 ॥
యే అ॑గ్నిద॒గ్ధా యే-ఽన॑గ్ని-దగ్ధాః । యే॑-ఽముం-లోఀ॒క-మ్పి॒తరః॑, ఖ్షి॒యన్తి॑ । యాగ్శ్చ॑ వి॒ద్మయాగ్ం ఉ॑ చ॒ న ప్ర॑వి॒ద్మ । మ॒ఘాసు॑ య॒జ్ఞగ్ం సుకృ॑త-ఞ్జుషన్తామ్ ॥
గవా॒-మ్పతిః॒ ఫల్గు॑నీనామసి॒ త్వమ్ । తద॑ర్యమన్ వరుణ మిత్ర॒ చారు॑ । త-న్త్వా॑ వ॒యగ్ం స॑ని॒తారగ్ం॑ సనీ॒నామ్ । జీ॒వా జీవ॑న్త॒ముప॒ సంవిఀ ॑శేమ ॥
యేనే॒మా విశ్వా॒ భువ॑నాని॒ సఞ్జి॑తా ।
యస్య॑ దే॒వా అ॑ను సం॒యఀన్తి॒ చేతః॑ ॥ 7 ॥
అ॒ర్య॒మా రాజా॒-ఽజర॒స్తువి॑ష్మాన్ । ఫల్గు॑నీనా-మృష॒భో రో॑రవీతి ॥ శ్రేష్ఠో॑ దే॒వానా᳚-మ్భగవో భగాసి । తత్త్వా॑ విదుః॒ ఫల్గు॑నీ॒స్తస్య॑ విత్తాత్ । అ॒స్మభ్య॑-ఙ్ఖ్ష॒త్రమ॒జరగ్ం॑ సు॒వీర్య᳚మ్ । గోమ॒దశ్వ॑-వ॒దుప॒-సన్ను॑దే॒హ ॥ భగో॑ హ దా॒తా భగ॒ ఇ-త్ప్ర॑దా॒తా । భగో॑ దే॒వీః ఫల్గు॑నీ॒రావి॑వేశ । భగ॒స్యేత్త-మ్ప్ర॑స॒వ-ఙ్గ॑మేమ । యత్ర॑ దే॒వై-స్స॑ధ॒మాద॑-మ్మదేమ ॥ 8 ॥
ఆయా॑తు దే॒వ-స్స॑వి॒తోప॑యాతు । హి॒ర॒ణ్యయే॑న సు॒వృతా॒ రథే॑న । వహ॒న్॒. హస్తగ్ం॑ సు॒భగం॑-విఀద్మ॒నాప॑సమ్ । ప్ర॒యచ్ఛ॑న్త॒-మ్పపు॑రి॒-మ్పుణ్య॒మచ్ఛ॑ ॥
హస్తః॒ ప్రయ॑చ్ఛ త్వ॒మృతం॒-వఀసీ॑యః ।
దఖ్షి॑ణేన॒ ప్రతి॑గృభ్ణీమ ఏనత్ ।
దా॒తార॑మ॒ద్య స॑వి॒తా వి॑దేయ ।
యో నో॒ హస్తా॑య ప్రసు॒వాతి॑ య॒జ్ఞమ్ ॥
త్వష్టా॒ నఖ్ష॑త్రమ॒భ్యే॑తి చి॒త్రామ్ ।
సు॒భగ్ం స॑సం-యుఀవ॒తిగ్ం రోచ॑మానామ్ ॥ 9 ॥
ని॒వే॒శయ॑-న్న॒మృతా॒-న్మర్త్యాగ్॑శ్చ ।
రూ॒పాణి॑ పి॒గ్ం॒శ-న్భువ॑నాని॒ విశ్వా᳚ ॥
తన్న॒స్త్వష్టా॒ తదు॑ చి॒త్రా విచ॑ష్టామ్ ।
తన్నఖ్ష॑త్ర-మ్భూరి॒దా అ॑స్తు॒ మహ్య᳚మ్ ।
తన్నః॑ ప్ర॒జాం-వీఀ॒రవ॑తీగ్ం సనోతు ।
గోభి॑ర్నో॒ అశ్వై॒-స్సమ॑నక్తు య॒జ్ఞమ్ ॥
వా॒యుర్నఖ్ష॑త్ర-మ॒భ్యే॑తి॒ నిష్ట్యా᳚మ్ ।
తి॒గ్మశృ॑ఙ్గో వృష॒భో రోరు॑వాణః ।
స॒మీ॒రయ॒-న్భువ॑నా మాత॒రిశ్వా᳚ ।
అప॒ ద్వేషాగ్ం॑సి నుదతా॒మరా॑తీః ॥ 10 ॥
తన్నో॑ వా॒యస్తదు॒ నిష్ట్యా॑ శృణోతు ।
తన్నఖ్ష॑త్ర-మ్భూరి॒దా అ॑స్తు॒ మహ్య᳚మ్ ।
తన్నో॑ దే॒వాసో॒ అను॑ జానన్తు॒ కామ᳚మ్ । యథా॒ తరే॑మ దురి॒తాని॒ విశ్వా᳚ ॥ దూ॒రమ॒స్మచ్ఛత్ర॑వో యన్తు భీ॒తాః । తది॑న్ద్రా॒గ్నీ కృ॑ణుతా॒-న్త-ద్విశా॑ఖే ।
తన్నో॑ దే॒వా అను॑మదన్తు య॒జ్ఞమ్ । ప॒శ్చా-త్పు॒రస్తా॒-దభ॑యన్నో అస్తు ॥ నఖ్ష॑త్రాణా॒-మధి॑పత్నీ॒ విశా॑ఖే ।
శ్రేష్ఠా॑విన్ద్రా॒గ్నీ భువ॑నస్య గో॒పౌ ॥ 11 ॥
విషూ॑చ॒-శ్శత్రూ॑-నప॒బాధ॑మానౌ । అప॒ ఖ్షుధ॑-న్నుదతా॒మరా॑తిమ్ ॥ పూ॒ర్ణా ప॒శ్చాదు॒త పూ॒ర్ణా పు॒రస్తా᳚త్ । ఉన్మ॑ద్ధ్య॒తః పౌ᳚ర్ణమా॒సీ జి॑గాయ ।
తస్యా᳚-న్దే॒వా అధి॑ సం॒వఀస॑న్తః ।
ఉ॒త్త॒మే నాక॑ ఇ॒హ మా॑దయన్తామ్ ॥
పృ॒థ్వీ సు॒వర్చా॑ యువ॒తి-స్స॒జోషాః᳚ । పౌ॒ర్ణ॒మా॒స్యుద॑గా॒-చ్ఛోభ॑మానా ।
ఆ॒ప్యా॒యయ॑న్తీ దురి॒తాని॒ విశ్వా᳚ ।
ఉ॒రు-న్దుహాం॒-యఀజ॑మానాయ య॒జ్ఞమ్ ॥ 12 ॥
(చి॒త్రభా॑ను॒-ర్ యజ॑మానే దధాతు - హ॒విర్నః॒ - పాథ॒ - శ్చేతో॑ - జుషన్తాం॒ - చేతో॑ - మదేమ॒ - రోచ॑మానా॒ - మరా॑తీ--ర్ గో॒పౌ - య॒జ్ఞం) (అ. 1)
అనువాకం 2 - యమనఖ్షత్రాణాం-యాఀజ్యానువాక్యాః
ఋ॒ద్ధ్యాస్మ॑ హ॒వ్యై-ర్నమ॑సోప॒ సద్య॑ ।
మి॒త్ర-న్దే॒వ-మ్మి॑త్ర॒ధేయ॑న్నో అస్తు । అ॒నూ॒రా॒ధాన్. హ॒విషా॑ వ॒ర్ధయ॑న్తః । శ॒త-ఞ్జీ॑వేమ శ॒రద॒-స్సవీ॑రాః ॥ చి॒త్ర-న్నఖ్ష॑త్ర॒-ముద॑గా-త్పు॒రస్తా᳚త్ । అ॒నూ॒రా॒ధాస॒ ఇతి॒ య-ద్వద॑న్తి । తన్మి॒త్ర ఏ॑తి ప॒థిభి॑ ర్దేవ॒యానైః᳚ । హి॒ర॒ణ్యయై॒ ర్విత॑తై-ర॒న్తరి॑ఖ్షే ॥
ఇన్ద్రో᳚ జ్యే॒ష్ఠామను॒ నఖ్ష॑త్రమేతి । యస్మి॑న్ వృ॒త్రం-వృఀ ॑త్ర॒ తూర్యే॑ త॒తార॑ ॥ 13 ॥
తస్మి॑న్ వ॒యమ॒మృత॒-న్దుహా॑నాః । ఖ్షుధ॑-న్తరేమ॒ దురి॑తి॒-న్దురి॑ష్టిమ్ ॥ పు॒ర॒న్ద॒రాయ॑ వృష॒భాయ॑ ధృ॒ష్ణవే᳚ । అషా॑ఢాయ॒ సహ॑మానాయ మీ॒ఢుషే᳚ ।
ఇన్ద్రా॑య జ్యే॒ష్ఠా మధు॑మ॒-ద్దుహా॑నా ।
ఉ॒రు-ఙ్కృ॑ణోతు॒ యజ॑మానాయ లో॒కమ్ ॥
మూల॑-మ్ప్ర॒జాం-వీఀ॒రవ॑తీం-విఀదేయ । పరా᳚చ్యేతు॒ నిర్-ఋ॑తిః పరా॒చా । గోభి॒ ర్నఖ్ష॑త్ర-మ్ప॒శుభి॒-స్సమ॑క్తమ్ । అహ॑ర్భూయా॒-ద్యజ॑మానాయ॒ మహ్య᳚మ్ ॥ 14 ॥
అహ॑ర్నో అ॒ద్య సు॑వి॒తే ద॑ధాతు । మూల॒-న్నఖ్ష॑త్ర॒మితి॒ య-ద్వద॑న్తి । పరా॑చీం-వాఀ॒చా నిర్-ఋ॑తి-న్నుదామి ।
శి॒వ-మ్ప్ర॒జాయై॑ శి॒వమ॑స్తు॒ మహ్య᳚మ్ ॥
యా ది॒వ్యా ఆపః॒ పయ॑సా స-మ్బభూ॒వుః । యా అ॒న్తరి॑ఖ్ష ఉ॒త పార్థి॑వీ॒ర్యాః । యాసా॑మషా॒ఢా అ॑ను॒యన్తి॒
కామ᳚మ్ । తా న॒ ఆప॒-శ్శగ్గ్ స్యో॒నా భ॑వన్తు ॥
యాశ్చ॒ కూప్యా॒ యాశ్చ॑ నా॒ద్యా᳚-స్సము॒ద్రియాః᳚ ।
యాశ్చ॑ వైశ॒న్తీరు॒త ప్రా॑స॒చీర్యాః ॥ 15 ॥
యాసా॑మషా॒ఢా మధు॑ భ॒ఖ్షయ॑న్తి । తా న॒ ఆప॒-శ్శగ్గ్ స్యో॒నా భ॑వన్తు ॥ తన్నో॒ విశ్వే॒ ఉప॑ శృణ్వన్తు దే॒వాః । తద॑షా॒ఢా అ॒భి సంయఀ ॑న్తు య॒జ్ఞమ్ ।
తన్నఖ్ష॑త్ర-మ్ప్రథతా-మ్ప॒శుభ్యః॑ ।
కృ॒షి-ర్వృ॒ష్టి-ర్యజ॑మానాయ కల్పతామ్ ॥
శు॒భ్రాః క॒న్యా॑ యువ॒తయ॑-స్సు॒పేశ॑సః । క॒ర్మ॒కృత॑-స్సు॒కృతో॑ వీ॒ర్యా॑వతీః ।
విశ్వా᳚-న్దే॒వాన్. హ॒విషా॑ వ॒ర్ధయ॑న్తీః ।
అ॒షా॒ఢాః కామ॒ముప॑యాన్తు య॒జ్ఞమ్ ॥ 16 ॥
యస్మి॒-న్బ్రహ్మా॒-ఽభ్యజ॑య॒-థ్సర్వ॑మే॒తత్ ।
అ॒ముఞ్చ॑ లో॒క మి॒దమూ॑చ॒ సర్వ᳚మ్ ।
తన్నో॒ నఖ్ష॑త్రమభి॒జి-ద్వి॒జిత్య॑ । శ్రియ॑-న్దధా॒-త్వహృ॑ణీయమానమ్ ॥ ఉ॒భౌ లో॒కౌ బ్రహ్మ॑ణా॒ సఞ్జి॑తే॒మౌ । తన్నో॒ నఖ్ష॑త్రమభి॒జి-ద్విచ॑ష్టామ్ ।
తస్మి॑న్ వ॒య-మ్పృత॑నా॒-స్స-ఞ్జ॑యేమ ।
తన్నో॑ దే॒వాసో॒ అను॑జానన్తు॒ కామ᳚మ్ ॥
శృ॒ణ్వన్తి॑ శ్రో॒ణా-మ॒మృత॑స్య గో॒పామ్ ।
పుణ్యా॑మస్యా॒ ఉప॑శృణోమి॒ వాచ᳚మ్ ॥ 17 ॥
మ॒హీ-న్దే॒వీం-విఀష్ణు॑పత్నీ-మజూ॒ర్యామ్ । ప్ర॒తీచీ॑మేనాగ్ం హ॒విషా॑ యజామః ॥
త్రే॒ధా విష్ణు॑-రురుగా॒యో విచ॑క్రమే ।
మ॒హీ-న్దివ॑-మ్పృథి॒వీ-మ॒న్తరి॑ఖ్షమ్ ।
తచ్ఛ్రో॒ణైతి॒ శ్రవ॑ ఇ॒చ్ఛమా॑నా ।
పుణ్య॒గ్గ్॒ శ్లోకం॒-యఀజ॑మానాయ కృణ్వ॒తీ ॥
అ॒ష్టౌ దే॒వా వస॑వ-స్సో॒మ్యాసః॑ ।
చత॑స్రో దే॒వీ ర॒జరా॒-శ్శ్రవి॑ష్ఠాః ।
తే య॒జ్ఞ-మ్పా᳚న్తు॒ రజ॑సః ప॒రస్తా᳚త్ ।
సం॒వఀ॒థ్స॒రీణ॑-మ॒మృతగ్గ్॑ స్వ॒స్తి ॥ 18 ॥
య॒జ్ఞ-న్నః॑ పాన్తు॒ వస॑వః పు॒రస్తా᳚త్ । ద॒ఖ్షి॒ణ॒తో॑-ఽభియ॑న్తు॒ శ్రవి॑ష్ఠాః । పుణ్య॒-న్నఖ్ష॑త్రమ॒భి సంవిఀ ॑శామ । మా నో॒ అరా॑తి-ర॒ఘశ॒గ్ం॒సా గన్న్॑ ॥
ఖ్ష॒త్రస్య॒ రాజా॒ వరు॑ణో-ఽధిరా॒జః । నఖ్ష॑త్రాణాగ్ం శ॒తభి॑ష॒గ్ వసి॑ష్ఠః । తౌ దే॒వేభ్యః॑ కృణుతో దీ॒ర్ఘమాయుః॑ । శ॒తగ్ం స॒హస్రా॑ భేష॒జాని॑ ధత్తః ॥
య॒జ్ఞన్నో॒ రాజా॒ వరు॑ణ॒ ఉప॑యాతు । తన్నో॒ విశ్వే॑ అ॒భి సంయఀ ॑న్తు దే॒వాః ॥ 19 ॥
తన్నో॒ నఖ్ష॑త్రగ్ం శ॒తభి॑షగ్ జుషా॒ణమ్ । దీ॒ర్ఘమాయుః॒ ప్రతి॑ర-ద్భేష॒జాని॑ ॥ అ॒జ ఏక॑పా॒దుద॑గా-త్పు॒రస్తా᳚త్ । విశ్వా॑ భూ॒తాని॑ ప్రతి॒మోద॑మానః । తస్య॑ దే॒వాః ప్ర॑స॒వం-యఀ ॑న్తి॒ సర్వే᳚ । ప్రో॒ష్ఠ॒ప॒దాసో॑ అ॒మృత॑స్య గో॒పాః ॥
వి॒భ్రాజ॑మాన-స్సమిధా॒న ఉ॒గ్రః । ఆ-ఽన్తరి॑ఖ్ష-మరుహ॒ద-గ॒న్ద్యామ్ । తగ్ం సూర్య॑-న్దే॒వ-మ॒జమేక॑పాదమ్ । ప్రో॒ష్ఠ॒ప॒దాసో॒ అను॑యన్తి॒ సర్వే᳚ ॥ 20 ॥
అహి॑-ర్బు॒ద్ధ్నియః॒ ప్రథ॑మాన ఏతి । శ్రేష్ఠో॑ దే॒వానా॑ము॒త మాను॑షాణామ్ । త-మ్బ్రా᳚హ్మ॒ణా-స్సో॑మ॒పా-స్సో॒మ్యాసః॑ ।
ప్రో॒ష్ఠ॒ప॒దాసో॑ అ॒భి ర॑ఖ్షన్తి॒ సర్వే᳚ ॥
చ॒త్వార॒ ఏక॑మ॒భి కర్మ॑ దే॒వాః ।
ప్రో॒ష్ఠ॒ప॒దాస॒ ఇతి॒ యాన్. వద॑న్తి ।
తే బు॒ద్ధనియ॑-మ్పరి॒షద్యగ్గ్॑ స్తు॒వన్తః॑ ।
అహిగ్ం॑ రఖ్షన్తి॒ నమ॑సోప॒సద్య॑ ॥
పూ॒షా రే॒వత్యన్వే॑తి॒ పన్థా᳚మ్ । పు॒ష్టి॒పతీ॑ పశు॒పా వాజ॑బస్త్యౌ ॥ 21 ॥
ఇ॒మాని॑ హ॒వ్యా ప్రయ॑తా జుషా॒ణా ।
సు॒గైర్నో॒ యానై॒రుప॑యాతాం-యఀ॒జ్ఞమ్ ॥
ఖ్షు॒ద్రా-న్ప॒శూ-న్ర॑ఖ్షతు రే॒వతీ॑ నః ।
గావో॑ నో॒ అశ్వా॒గ్ం॒ అన్వే॑తు పూ॒షా ।
అన్న॒గ్ం॒ రఖ్ష॑న్తౌ బహు॒ధా విరూ॑పమ్ ।
వాజగ్ం॑ సనుతాం॒-యఀజ॑మానాయ య॒జ్ఞమ్ ॥
తద॒శ్వినా॑-వశ్వ॒యుజోప॑యాతామ్ ।
శుభ॒-ఙ్గమి॑ష్ఠౌ సు॒యమే॑భి॒రశ్వైః᳚ ।
స్వ-న్నఖ్ష॑త్రగ్ం హ॒విషా॒ యజ॑న్తౌ ।
మద్ధ్వా॒ సమ్పృ॑క్తౌ॒ యజు॑షా॒ సమ॑క్తౌ ॥ 22 ॥
యౌ దే॒వానా᳚-మ్భి॒షజౌ॑ హవ్యవా॒హౌ । విశ్వ॑స్య దూ॒తా-వ॒మృత॑స్య గో॒పౌ । తౌ నఖ్ష॑త్ర-ఞ్జుజుషా॒ణో-ప॑యాతామ్ । నమో॒-ఽశ్విభ్యా᳚-ఙ్కృణుమో-ఽశ్వ॒యుగ్భ్యా᳚మ్ ॥
అప॑ పా॒ప్మాన॒-మ్భర॑ణీర్భరన్తు । త-ద్య॒మో రాజా॒ భగ॑వా॒న్॒. విచ॑ష్టామ్ । లో॒కస్య॒ రాజా॑ మహ॒తో మ॒హాన్. హి । సు॒గ-న్నః॒ పన్థా॒మభ॑య-ఙ్కృణోతు ॥
యస్మి॒-న్నఖ్ష॑త్రే య॒మ ఏతి॒ రాజా᳚ ।
యస్మి॑-న్నేనమ॒భ్యషి॑చన్న్త దే॒వాః ।
తద॑స్య చి॒త్రగ్ం హ॒విషా॑ యజామ ।
అప॑ పా॒ప్మాన॒-మ్భర॑ణీ-ర్భరన్తు ॥
ని॒వేశ॑నీ స॒ఙ్గమ॑నీ॒ వసూ॑నాం॒-విఀశ్వా॑ రూ॒పాణి॒ వసూ᳚న్యావే॒శయ॑న్తీ । స॒హ॒స్ర॒పో॒షగ్ం సు॒భగా॒ రరా॑ణా॒ సా న॒ ఆగ॒న్ వర్చ॑సా సంవిఀదా॒నా ॥ యత్తే॑ దే॒వా అద॑ధు-ర్భాగ॒ధేయ॒మమా॑వాస్యే సం॒వఀస॑న్తో మహి॒త్వా । సానో॑ య॒జ్ఞ-మ్పి॑పృహి విశ్వవారే ర॒యి-న్నో॑ ధేహి సుభగే సు॒వీర᳚మ్ ॥ ॥ 23 ॥
(త॒తార॒ - మహ్యం॑ - ప్రాస॒చీర్యా - యా᳚న్తు య॒జ్ఞం - ఀవాచగ్గ్॑ - స్వ॒స్తి - దే॒వా-అను॑ యన్తి॒ సర్వే॒-వాజ॑బస్త్యౌ॒-సమ॑క్తౌ-దే॒వా స్త్రీణి॑ చ) (అ. 2)
అనువాకం 3 - చాన్ద్రమసాదీనాం సప్తనామిష్టీనాం-యాఀజ్యానువాక్యాః
నవో॑నవో భవతి॒ జాయ॑మా॒నో-ఽహ్నా᳚-ఙ్కే॒తురు॒షసా॑ మే॒త్యగ్రే᳚ । భా॒గ-న్దే॒వేభ్యో॒ విద॑ధాత్యా॒య-న్ప్రచ॒న్ద్రమా᳚స్తిరతి దీ॒ర్ఘమాయుః॑ ॥ యమా॑ది॒త్యా
అ॒గ్ం॒శుమా᳚ప్యా॒యయ॑న్తి యమా॑ది॒త్యా అ॒గ్ం॒శుమా᳚ప్యా॒యయ॑న్తి॒ యమఖ్షి॑త॒-మఖ్షి॑తయః॒ పిబ॑న్తి । తేన॑ నో॒ రాజా॒ వరు॑ణో॒ బృహ॒స్పతి॒రా ప్యా॑యయన్తు॒ భువ॑నస్య గో॒పాః ॥॥ యే విరూ॑పే॒ సమ॑నసా సం॒వ్యఀయ॑న్తీ । స॒మా॒న-న్తన్తు॑-మ్పరి తాత॒నాతే᳚ । వి॒భూ ప్ర॒భూ అ॑ను॒భూ వి॒శ్వతో॑ హువే ।
తే నో॒ నఖ్ష॑త్రే॒ హవ॒మాగ॑మేతమ్ ॥
వ॒య-న్దే॒వీ బ్రహ్మ॑ణా సంవిఀదా॒నాః ।
సు॒రత్నా॑సో దే॒వవీ॑తి॒-న్దధా॑నాః ।
అ॒హో॒రా॒త్రే హ॒విషా॑ వ॒ర్ధయ॑న్తః ।
అతి॑ పా॒ప్మాన॒-మతి॑ముక్త్యా గమేమ ॥ ప్రత్యు॑వదృశ్యాయ॒తీ ॥ 24 ॥
వ్యు॒చ్ఛన్తీ॑ దుహి॒తా ది॒వః । అ॒పో మ॒హీ వృ॑ణుతే॒ చఖ్షు॑షా ॥ తమో॒ జ్యోతి॑ష్కృణోతి సూ॒నరీ᳚ । ఉదు॒స్త్రియా᳚-స్సచతే॒ సూర్యః॑ । స చా॑ ఉ॒ద్యన్నఖ్ష॑త్ర-మర్చి॒మత్ । తవేదు॑షో॒ వ్యుషి॒ సూర్య॑స్య చ ॥
స-మ్భ॒క్తేన॑ గమేమహి । తన్నో॒ నఖ్ష॑త్ర-మర్చి॒మత్ । భా॒ను॒మత్తేజ॑ ఉ॒చ్చర॑త్ । ఉప॑ య॒జ్ఞ-మి॒హాగ॑మత్ ॥ 25 ॥
ప్ర నఖ్ష॑త్రాయ దే॒వాయ॑ । ఇన్ద్రా॒యేన్దుగ్ం॑ హవామహే ।
స న॑-స్సవి॒తా సు॑వ-థ్స॒నిమ్ । పు॒ష్టి॒దాం-వీఀ॒రవ॑త్తమమ్ ॥ ఉదు॒ త్య-ఞ్జా॒తవే॑దస-న్దే॒వం-వఀ ॑హన్తి కే॒తవః॑ । దృ॒శే విశ్వా॑య॒ సూర్య᳚మ్ ॥ చి॒త్ర-న్దే॒వానా॒-ముద॑గా॒దనీ॑క॒-ఞ్చఖ్షు॑-ర్మి॒త్రస్య॒ వరు॑ణస్యా॒-ఽగ్నేః । ఆ-ఽ ప్రా॒ ద్యావా॑పృథి॒వీ అ॒న్తరి॑ఖ్ష॒గ్ం॒ సూర్య॑ ఆ॒త్మా జగ॑తస్త॒స్థుష॑శ్చ ॥॥
అది॑తిర్న ఉరుష్య॒త్వది॑తి॒-శ్శర్మ॑ యచ్ఛతు । అది॑తిః పా॒త్వగ్ం హ॑సః ॥ మ॒హీమూ॒షు మా॒తరగ్ం॑ సువ్ర॒తానా॑మృ॒తస్య॒ పత్నీ॒మవ॑సే హువేమ । తు॒వి॒ఖ్ష॒త్రామ॒జర॑న్తీమురూ॒చీగ్ం సు॒శర్మా॑ణ॒మది॑తిగ్ం సు॒ప్రణీ॑తిమ్ ॥ ॥
ఇ॒దం-విఀష్ణు॒-ర్విచ॑క్రమే త్రే॒ధా ని ద॑ధే ప॒దమ్ । స మూ॑ఢమస్య పాగ్ం సు॒రే ॥ ప్రత-ద్విష్ణు॑-స్స్తవతే వీ॒ర్యా॑య । మృ॒గో న భీ॒మః కు॑చ॒రో గి॑రి॒ష్ఠాః । యస్యో॒రుషు॑ త్రి॒షు వి॒క్రమ॑ణేషు । అధి॑ఖ్షి॒యన్తి॒ భువ॑నాని॒ విశ్వా᳚ ॥ ॥
అ॒గ్నిర్మూ॒ర్ధా ది॒వః క॒కు-త్పతిః॑ పృథి॒వ్యా అ॒యమ్ । అ॒పాగ్ం రేతాగ్ం॑సి జిన్వతి ॥ భువో॑ య॒జ్ఞస్య॒ రజ॑సశ్చ నే॒తా యత్రా॑ ని॒యుద్భి॒-స్సచ॑సే శి॒వాభిః॑ । ది॒వి మూ॒ర్ధాన॑-న్దధిషే సువ॒ర్॒షా-ఞ్జి॒హ్వామ॑గ్నే చకృషే హవ్య॒వాహ᳚మ్ ॥ ॥
అను॑ నో॒-ఽద్యా-ఽను॑మతి-ర్య॒జ్ఞ-న్దే॒వేషు॑ మన్యతామ్ । అ॒గ్నిశ్చ॑ హవ్య॒వాహ॑నో॒ భవ॑తా-న్దా॒శుషే॒ మయః॑ ॥ అన్విద॑నుమతే॒ త్వ-మ్మన్యా॑సై॒ శఞ్చ॑నః కృధి । క్రత్వే॒ దఖ్షా॑య నో హిను॒ ప్రణ॒ ఆయూగ్ం॑షి తారిషః ॥ ॥
హ॒వ్య॒వాహ॑-మభిమాతి॒షా-ఽహ᳚మ్ । ర॒ఖ్షో॒హణ॒-మ్పృత॑నాసు జి॒ష్ణుమ్ । జ్యోతి॑ష్మన్త॒-న్దీద్య॑త॒-మ్పుర॑న్ధిమ్ । అ॒గ్నిగ్గ్ స్వి॑ష్ట॒కృత॒మా హు॑వేమ ॥ స్వి॑ష్టమగ్నే అ॒భి త-త్పృ॑ణాహి । విశ్వా॑ దేవ॒ పృత॑నా అ॒భిష్య । ఉ॒రు-న్నః॒ పన్థా᳚-మ్ప్రది॒శన్వి భా॑హి । జ్యోతి॑ష్మద్ధేహ్య॒జర॑-న్న॒ ఆయుః॑ ॥ ॥ 26 ॥
(ఆ॒య॒త్య॑ - గమ॒థ్ - స్వి॑ష్టం) (అ. 3)
అనువాకం 4 - దేవ నఖ్షత్రేష్టిబ్రాహ్మణం
అ॒గ్నిర్వా అ॑కామయత । అ॒న్నా॒దో దే॒వానాగ్॑ స్యా॒మితి॑ ।
స ఏ॒తమ॒గ్నయే॒ కృత్తి॑కాభ్యః పురో॒డాశ॑-మ॒ష్టాక॑పాల॒-న్నిర॑వపత్ । తతో॒ వై సో᳚-ఽన్నా॒దో దే॒వానా॑మభవత్ । అ॒గ్నిర్వై దే॒వానా॑మన్నా॒దః ॥
యథా॑ హ॒ వా అ॒గ్ని-ర్దే॒వనా॑-మన్నా॒దః ।
ఏ॒వగ్ం హ॒ వా ఏ॒ష మ॑ను॒ష్యా॑ణా-మ్భవతి ।
య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ ॥ సో-ఽత్ర॑ జుహోతి । అ॒గ్నయే॒ స్వాహా॒ కృత్తి॑కాభ్య॒-స్స్వాహా᳚ । అ॒మ్బాయై॒ స్వాహా॑ దు॒లాయై॒ స్వాహా᳚ । ని॒త॒త్న్యై స్వాహా॒ ఽభ్రయ॑న్త్యై॒ స్వాహా᳚ । మే॒ఘయ॑న్త్యై॒ స్వాహా॑ వ॒ర॒.షయ॑న్త్యై॒ స్వాహా᳚ । చు॒పు॒ణీకా॑యై॒ స్వాహేతి॑ ॥ 27 ॥
ప్ర॒జాప॑తిః ప్ర॒జా అ॑సృజత । తా అ॑స్మా-థ్సృ॒ష్టాః పరా॑చీరాయన్న్ । తాసాగ్ం॑ రోహి॒ణీ-మ॒భ్య॑ద్ధ్యాయత్ । సో॑-ఽకామయత । ఉప॒ మా-ఽఽవ॑ర్తేత । సమే॑నయా గచ్ఛే॒యేతి॑ । స ఏ॒త-మ్ప్ర॒జాప॑తయే రోహి॒ణ్యై చ॒రు-న్నిర॑వపత్ । తతో॒ వై సా తము॒పావ॑ర్తత । సమే॑నయా ఽగచ్ఛత ॥ ఉప॑ హ॒ వా ఏ॑న-మ్ప్రి॒యమావ॑ర్తతే ।
స-మ్ప్రి॒యేణ॑ గచ్ఛతే । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ ॥ సో-ఽత్ర॑ జుహోతి ।
ప్ర॒జాప॑తయే॒ స్వాహా॑ రోహి॒ణ్యై స్వాహా᳚ ।
రోచ॑మానాయై॒ స్వాహా᳚ ప్ర॒జాభ్య॒-స్స్వాహేతి॑ ॥ 28 ॥
సోమో॒ వా అ॑కామయత । ఓష॑ధీనాగ్ం రా॒జ్య-మ॒భిజ॑యేయ॒మితి॑ । స ఏ॒తగ్ం సోమా॑య మృగశీ॒ర॒.షాయ॑ శ్యామా॒క-ఞ్చ॒రు-మ్పయ॑సి॒ నిర॑వపత్ । తతో॒ వై స ఓష॑ధీనాగ్ం
రా॒జ్యమ॒భ్య॑జయత్ । స॒మా॒నానాగ్ం॑ హ॒ వై రా॒జ్యమ॒భిజ॑యతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి ।
సోమా॑య॒ స్వాహా॑ మృగశీ॒ర॒.షాయ॒ స్వాహా᳚ ।
ఇ॒న్వ॒కాభ్య॒-స్స్వాహౌష॑ధీభ్య॒-స్స్వాహా᳚ ।
రా॒జ్యాయ॒ స్వాహా॒ ఽభిజి॑త్యై॒ స్వాహేతి॑ ॥ 29 ॥
రు॒ద్రో వా అ॑కామయత । ప॒శు॒మాన్-థ్స్యా॒మితి॑ ।
స ఏ॒తగ్ం రు॒ద్రాయా॒ర్ద్రాయై॒ ప్రైయ॑ఙ్గవ-ఞ్చ॒రు-మ్పయ॑సి॒ నిర॑వపత్ । తతో॒ వై స ప॑శు॒మాన॑భవత్ । ప॒శు॒మాన్. హ॒ వై భ॑వతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి । రు॒ద్రాయ॒ స్వాహా॒ ఽఽర్ద్రాయై॒ స్వాహా᳚ । పిన్వ॑మానాయై॒ స్వాహా॑ ప॒శుభ్య॒-స్స్వాహేతి॑ ॥ 30 ॥
ఋ॒ఖ్షా వా ఇ॒యమ॑లో॒మకా॑-ఽఽసీత్ । సా-ఽకా॑మయత ।
ఓష॑ధీభి॒-ర్వన॒స్పతి॑భిః॒ ప్రజా॑యే॒యేతి॑ ।
సైతమది॑త్యై॒ పున॑ర్వసుభ్యా-ఞ్చ॒రు-న్నిర॑వపత్ ।
తతో॒ వా ఇ॒యమోష॑ధీభి॒-ర్వన॒స్పతి॑భిః॒ ప్రాజా॑యత ।
ప్రజా॑యతే హ॒ వై ప్ర॒జయా॑ ప॒శుభిః॑ । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ ।
సో-ఽత్ర॑ జుహోతి । అది॑త్యై॒ స్వాహా॒ పున॑ర్వసుభ్యామ్ ।
స్వాహా-ఽఽభూ᳚త్యై॒ స్వాహా॒ ప్రజా᳚త్యై॒ స్వాహేతి॑ ॥ 31 ॥
బృహ॒స్పతి॒ర్వా అ॑కామయత । బ్ర॒హ్మ॒వ॒ర్చ॒సీ స్యా॒మితి॑ ।
స ఏ॒త-మ్బృహ॒స్పత॑యే తి॒ష్యా॑య నైవా॒ర-ఞ్చ॒రు-మ్పయ॑సి॒ నిర॑వపత్ । తతో॒ వై స బ్ర॑హ్మవర్చ॒స్య॑భవత్ । బ్ర॒హ్మ॒వ॒ర్చ॒సీ హ॒ వై భ॑వతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి ।
బృహ॒స్పత॑యే॒ స్వాహా॑ తి॒ష్యా॑య॒ స్వాహా᳚ । బ్ర॒హ్మ॒వ॒ర్చ॒సాయ॒ స్వాహేతి॑ ॥ 32 ॥
దే॒వా॒సు॒రా-స్సంయఀ ॑త్తా ఆసన్న్ । తే దే॒వా-స్స॒ర్పేభ్య॑ ఆశ్రే॒షాభ్య॒ ఆజ్యే॑ కర॒మ్భ-న్నిర॑వపన్న్ ।
తానే॒తాభి॑రే॒వ దే॒వతా॑-భి॒రుపా॑నయన్న్ ।
ఏ॒తాభి॑ర్హ॒ వై దే॒వతా॑భి-ర్ద్వి॒షన్త॒-మ్భ్రాతృ॑వ్య॒-ముప॑నయతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి ।
స॒ర్పేభ్య॒-స్స్వాహా᳚-ఽఽశ్రే॒షాభ్య॒-స్స్వాహా᳚ । ద॒న్ద॒శూకే᳚భ్య॒-స్స్వాహేతి॑ ॥ 33 ॥
పి॒తరో॒ వా అ॑కామయన్త । పి॒తృ॒లో॒క ఋ॑ద్ధ్నుయా॒మేతి॑ ।
త ఏ॒త-మ్పి॒తృభ్యో॑ మ॒ఘాభ్యః॑ పురో॒డాశ॒గ్ం॒ షట్క॑పాల॒-న్నిర॑వపన్న్ । తతో॒ వై తే పి॑తృలో॒క ఆ᳚ర్ధ్నువన్న్ । పి॒తృ॒లో॒కే హ॒ వా ఋ॑ధ్నోతి ।
య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి । పి॒తృభ్య॒-స్స్వాహా॑ మ॒ఘాభ్యః॑ ।
స్వాహా॑ ఽన॒ఘాభ్య॒-స్స్వాహా॑ ఽగ॒దాభ్యః॑ ।
స్వాహా॑ ఽరున్ధ॒తీభ్య॒-స్స్వాహేతి॑ ॥ 34 ॥
అ॒ర్య॒మా వా అ॑కామయత । ప॒శు॒మాన్-థ్స్యా॒మితి॑ ।
స ఏ॒తమ॑ర్య॒మ్ణే ఫల్గు॑నీభ్యా-ఞ్చ॒రు-న్నిర॑వపత్ ।
తతో॒ వై స ప॑శు॒మాన॑భవత్ ।
ప॒శు॒మాన్. హ॒ వై భ॑వతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి । అ॒ర్య॒మ్ణే స్వాహా॒ ఫల్గు॑నీభ్యా॒గ్॒ స్వాహా᳚ ।
ప॒శుభ్య॒-స్స్వాహేతి॑ ॥ 35 ॥
భగో॒ వా అ॑కామయత । భ॒గీ శ్రే॒ష్ఠీ దే॒వానాగ్॑ స్యా॒మితి॑ । స ఏ॒త-మ్భగా॑య॒ ఫల్గు॑నీభ్యా-ఞ్చ॒రు-న్నిర॑వపత్ । తతో॒ వై స భ॒గీ శ్రే॒ష్ఠీ దే॒వానా॑మభవత్ ।
భ॒గీ హ॒ వై శ్రే॒ష్ఠీ స॑మా॒నానా᳚-మ్భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి । భగా॑య॒ స్వాహా॒ ఫల్గు॑నీభ్యా॒గ్॒ స్వాహా᳚ । శ్రైష్ఠ్యా॑య॒ స్వాహేతి॑ ॥ 36 ॥
స॒వి॒తా వా అ॑కామయత । శ్రన్మే॑ దే॒వా దధీ॑రన్న్ । స॒వి॒తా స్యా॒మితి॑ । స ఏ॒తగ్ం స॑వి॒త్రే హస్తా॑య పురో॒డాశ॒-న్ద్వాద॑శకపాల॒-న్నిర॑వపదాశూ॒నాం
ఀవ్రీ॑హీ॒ణామ్ । తతో॒ వై తస్మై॒ శ్రద్దే॒వా అద॑ధత । స॒వి॒తా-ఽభ॑వత్ । శ్రద్ధ॒ వా అ॑స్మై మను॒ష్యా॑ దధతే । స॒వి॒తా స॑మా॒నానా᳚-మ్భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి ।
స॒వి॒త్రే స్వాహా॒ హస్తా॑య । స్వాహా॑ దద॒తే స్వాహా॑ పృణ॒తే । స్వాహా᳚ ప్ర॒యచ్ఛ॑తే॒ స్వాహా᳚ ప్రతిగృభ్ణ॒తే స్వాహేతి॑ ॥ 37 ॥
త్వష్టా॒ వా అ॑కామయత । చి॒త్ర-మ్ప్ర॒జాం-విఀ ॑న్దే॒యేతి॑ ।
స ఏ॒త-న్త్వష్ట్రే॑ చి॒త్రాయై॑ పురో॒డాశ॑మ॒ష్టా-క॑పాల॒-న్నిర॑వపత్ । తతో॒ వై స చి॒త్ర-మ్ప్ర॒జామ॑విన్దత । చి॒త్రగ్ం హ॒ వై ప్ర॒జాం-విఀ ॑న్దతే ।
య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి ।
త్వష్ట్రే॒ స్వాహా॑ చి॒త్రాయై॒ స్వాహా᳚ ।
చైత్రా॑య॒ స్వాహా᳚ ప్ర॒జాయై॒ స్వాహేతి॑ ॥ 38 ॥
వా॒యుర్వా అ॑కామయత । కా॒మ॒చార॑మే॒షు లో॒కేష్వ॒భిజ॑యేయ॒మితి॑ । స ఏ॒త-ద్వా॒యవే॒ నిష్ట్యా॑యై గృ॒ష్ట్యై దు॒గ్ధ-మ్పయో॒ నిర॑వపత్ ।
తతో॒ వై స కా॑మ॒చార॑మే॒షు లో॒కేష్వ॒భ్య॑జయత్ ।
కా॒మ॒చారగ్ం॑ హ॒ వా ఏ॒షు లో॒కేష్వ॒భిజ॑యతి ।
య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి । వా॒యవే॒ స్వాహా॒ నిష్ట్యా॑యై॒ స్వాహా᳚ ।
కా॒మ॒చారా॑య॒ స్వాహా॒-ఽభిజి॑త్యై॒ స్వాహేతి॑ ॥ 39 ॥
ఇ॒న్ద్రా॒గ్నీ వా అ॑కామయేతామ్ । శ్రైష్ఠ్య॑-న్దే॒వానా॑-మ॒భిజ॑యే॒వేతి॑ । తావే॒తమి॑న్ద్రా॒గ్నిభ్యాం॒-విఀశా॑ఖాభ్యా-మ్పురో॒డాశ॒-మేకా॑దశకపాల॒-న్నిర॑వపతామ్ । తతో॒ వై తౌ శ్రైష్ఠ్య॑-న్దే॒వానా॑-మ॒భ్య॑జయతామ్ । శ్రైష్ఠ్యగ్ం॑ హ॒ వై స॑మా॒నానా॑మ॒భిజ॑యతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి ।
ఇ॒న్ద్రా॒గ్నిభ్యా॒గ్॒ స్వాహా॒ విశా॑ఖాభ్యా॒గ్॒ స్వాహా᳚ ।
శ్రైష్ఠ్యా॑య॒ స్వాహా॒ ఽభిజి॑త్యై॒ స్వాహేతి॑ ॥ 40 ॥
అథై॒తత్-పౌ᳚ర్ణమా॒స్యా ఆజ్య॒-న్నిర్వ॑పతి । కామో॒ వై పౌ᳚ర్ణమా॒సీ । కామ॒ ఆజ్య᳚మ్ । కామే॑నై॒వ కామ॒గ్ం॒ సమ॑ర్ధయతి । ఖ్షి॒ప్రమే॑న॒గ్ం॒ స కామ॒ ఉప॑నమతి । యేన॒ కామే॑న॒ యజ॑తే । సో-ఽత్ర॑ జుహోతి ।
పౌ॒ర్ణ॒మా॒స్యై స్వాహా॒ కామా॑య॒ స్వాహా-ఽఽగ॑త్యై॒ స్వాహేతి॑ ॥ 41 ॥
అనువాకం 5 - యమనఖ్షత్రేష్టిబ్రాహ్మణం
మి॒త్రో వా అ॑కామయత । మి॒త్ర॒ధేయ॑మే॒షు లో॒కేష్వ॒భి జ॑యేయ॒మితి॑ । స ఏ॒త-మ్మి॒త్రాయా॑నూరా॒ధేభ్య॑శ్చ॒రు-న్నిర॑వపత్ । తతో॒ వై స మి॑త్ర॒ధేయ॑మే॒షు లో॒కేష్వ॒భ్య॑జయత్ । మి॒త్ర॒ధేయగ్ం॑ హ॒ వా ఏ॒షు లో॒కేష్వ॒భిజ॑యతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి ।
మి॒త్రాయ॒ స్వాహా॑ ఽనూరా॒ధేభ్య॒-స్స్వాహా᳚ ।
మి॒త్ర॒ధేయా॑య॒ స్వాహా॒ ఽభిజి॑త్యై॒ స్వాహేతి॑ ॥ 42 ॥
ఇన్ద్రో॒ వా అ॑కామయత । జ్యైష్ఠ్య॑-న్దే॒వానా॑-మ॒భిజ॑యేయ॒మితి॑ । స ఏ॒తమిన్ద్రా॑య జ్యే॒ష్ఠాయై॑ పురో॒డాశ॒-మేకా॑దశకపాల॒-న్నిర॑వప-న్మ॒హావ్రీ॑హీణామ్ । తతో॒ వై స జ్యైష్ఠ్య॑-న్దే॒వానా॑మ॒భ్య॑జయత్ । జ్యైష్ఠ్యగ్ం॑ హ॒ వై స॑మా॒నానా॑-మ॒భిజ॑యతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి । ఇన్ద్రా॑య॒ స్వాహా᳚ జ్యే॒ష్ఠాయై॒ స్వాహా᳚ ।
జ్యైష్ఠ్యా॑య॒ స్వాహా॒ ఽభిజి॑త్యై॒ స్వాహేతి॑ ॥ 43 ॥
ప్ర॒జాప॑తి॒ర్వా అ॑కామయత । మూల॑-మ్ప్ర॒జాం-విఀ ॑న్దే॒యేతి॑ । స ఏ॒త-మ్ప్ర॒జాప॑తయే॒ మూలా॑య చ॒రు-న్నిర॑వపత్ । తతో॒ వై స మూల॑-మ్ప్ర॒జామ॑విన్దత । మూలగ్ం॑ హ॒ వై ప్ర॒జాం-విఀ ॑న్దతే । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి । ప్ర॒జాప॑తయే॒ స్వాహా॒ మూలా॑య॒ స్వాహా᳚ । ప్ర॒జాయై॒ స్వాహేతి॑ ॥ 44 ॥
ఆపో॒ వా అ॑కామయన్త । స॒ము॒ద్ర-ఙ్కామ॑మ॒ భిజ॑యే॒మేతి॑ । తా ఏ॒తమ॒ద్భ్యో॑-ఽషా॒ఢాభ్య॑శ్చ॒రు-న్నిర॑వపన్న్ । తతో॒ వై తా-స్స॑ము॒ద్ర-ఙ్కామ॑మ॒భ్య॑జయన్న్ । స॒ము॒ద్రగ్ం హ॒ వై కామ॑మ॒భిజ॑యతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి ।
అ॒ద్భ్య-స్స్వాహా॑ ఽషా॒ఢాభ్య॒-స్స్వాహా᳚ । స॒ము॒ద్రాయ॒ స్వాహా॒ కామా॑య॒ స్వాహా᳚ । అ॒భిజి॑త్యై॒ స్వాహేతి॑ ॥ 45 ॥
విశ్వే॒ వై దే॒వా అ॑కామయన్త । అ॒న॒ప॒జ॒య్య-ఞ్జ॑యే॒మేతి॑ । త ఏ॒తం-విఀశ్వే᳚భ్యో దే॒వేభ్యో॑-ఽషా॒ఢాభ్య॑శ్చ॒రు-న్నిర॑వపన్న్ ।
తతో॒ వై తే॑-ఽనపజ॒య్య-మ॑జయన్న్ । అ॒న॒ప॒జ॒య్యగ్ం హ॒ వై జ॑యతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి ।
విశ్వే᳚భ్యో దే॒వేభ్య॒-స్స్వాహా॑ ఽషా॒ఢాభ్య॒-స్స్వాహా᳚ ।
అ॒న॒ప॒జ॒య్యాయ॒ స్వాహా॒ జిత్యై॒ స్వాహేతి॑ ॥ 46 ॥
బ్రహ్మ॒ వా అ॑కామయత । బ్ర॒హ్మ॒లో॒కమ॒భిజ॑యేయ॒మితి॑ ।
తదే॒త-మ్బ్రహ్మ॑ణే-ఽభి॒జితే॑ చ॒రు-న్నిర॑వపత్ ।
తతో॒ వై తద్బ్ర॑హ్మలో॒కమ॒భ్య॑జయత్ । బ్ర॒హ్మ॒లో॒కగ్ం హ॒ వా అ॒భిజ॑యతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి । బ్రహ్మ॑ణే॒ స్వాహా॑ ఽభి॒జితే॒ స్వాహా᳚ । బ్ర॒హ్మ॒లో॒కాయ॒ స్వాహా॒ ఽభిజి॑త్యై॒ స్వాహేతి॑ ॥ 47 ॥
విష్ణు॒ర్వా అ॑కామయత । పుణ్య॒గ్గ్॒ శ్లోకగ్ం॑ శృణ్వీయ ।
న మా॑ పా॒పీ కీ॒ర్తిరాగ॑చ్ఛే॒దితి॑ । స ఏ॒తం-విఀష్ణ॑వే శ్రో॒ణాయై॑ పురో॒డాశ॑-న్త్రికపా॒ల-న్నిర॑వపత్ ।
తతో॒ వై స పుణ్య॒గ్గ్॒ శ్లోక॑మ శృణుత । నైన॑-మ్పా॒పీ కీ॒ర్తిరా- గ॑చ్ఛత్ । పుణ్యగ్ం॑ హ॒ వై శ్లోకగ్ం॑ శృణుతే । నైన॑-మ్పా॒పీ కీ॒ర్తిరాగ॑చ్ఛతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి ।
విష్ణ॑వే॒ స్వాహా᳚ శ్రో॒ణాయై॒ స్వాహా᳚ ।
శ్లోకా॑య॒ స్వాహా᳚ శ్రు॒తాయ॒ స్వాహేతి॑ ॥ 48 ॥
వస॑వో॒ వా అ॑కామయన్త । అగ్ర॑-న్దే॒వతా॑నా॒-మ్పరీ॑యా॒మేతి॑ । త ఏ॒తం-వఀసు॑భ్య॒-శ్శ్రవి॑ష్ఠాభ్యః పురో॒డాశ॑మ॒ష్టాక॑పాల॒-న్నిర॑వపన్న్ ।
తతో॒ వై తే-ఽగ్ర॑-న్దే॒వతా॑నా॒-మ్పర్యా॑యన్న్ ।
అగ్రగ్ం॑ హ॒ వై స॑మా॒నానా॒-మ్పర్యే॑తి ।
య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి । వసు॑భ్య॒-స్స్వాహా॒ శ్రవి॑ష్ఠాభ్య॒-స్స్వాహా᳚ । అగ్రా॑య॒ స్వాహా॒ పరీ᳚త్యై॒ స్వాహేతి॑ ॥ 49 ॥
ఇన్ద్రో॒ వా అ॑కామయత । దృ॒ఢో ఽశి॑థిల-స్స్యా॒మితి॑ ।
స ఏ॒తం-వఀరు॑ణాయ శ॒తభి॑షజే భేష॒జేభ్యః॑ పురో॒డాశ॒-న్దశ॑కపాల॒-న్నిర॑వపత్-కృ॒ష్ణానాం᳚-వ్రీఀహీ॒ణామ్ । తతో॒ వై స దృ॒ఢో-ఽశి॑థిలో-ఽభవత్ ।
దృ॒ఢో హ॒ వా అశి॑థిలో భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి ।
వరు॑ణాయ॒ స్వాహా॑ శ॒తభి॑షజే॒ స్వాహా᳚ ।
భే॒ష॒జేభ్య॒-స్స్వాహేతి॑ ॥ 50 ॥
అ॒జో వా ఏక॑పాదకామయత । తే॒జ॒స్వీ బ్ర॑హ్మవర్చ॒సీ స్యా॒మితి॑ । స ఏ॒తమ॒జాయైక॑పదే ప్రోష్ఠప॒దేభ్య॑-శ్చ॒రు-న్నిర॑వపత్ । తతో॒ వై స తే॑జ॒స్వీ బ్ర॑హ్మవర్చ॒స్య॑భవత్ । తే॒జ॒స్వీ హ॒ వై బ్ర॑హ్మవర్చ॒సీ భ॑వతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి ।
అ॒జాయైక॑పదే॒ స్వాహా᳚ ప్రోష్ఠప॒దేభ్య॒-స్స్వాహా᳚ ।
తేజ॑సే॒ స్వాహా᳚ బ్రహ్మవర్చ॒సాయ॒ స్వాహేతి॑ ॥ 51 ॥
అహి॒ర్వై బు॒ద్ధ్నియో॑-ఽకామయత । ఇ॒మా-మ్ప్ర॑తి॒ష్ఠాం-విఀ ॑న్దే॒యేతి॑ । స ఏ॒తమహ॑యే బు॒ద్ధ్నియా॑య ప్రోష్ఠప॒దేభ్యః॑ పురో॒డాశ॒-మ్భూమి॑కపాల॒-న్నిర॑వపత్ । తతో॒ వై స ఇ॒మా-మ్ప్ర॑తి॒ష్ఠా-మ॑విన్దత । ఇ॒మాగ్ం హ॒ వై ప్ర॑తి॒ష్ఠాం-విఀ ॑న్దతే ।
య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి । అహ॑యే బు॒ద్ధ్నియా॑య॒ స్వాహా᳚ ప్రోష్ఠప॒దేభ్య॒-స్స్వాహా᳚ ।
ప్ర॒తి॒ష్ఠాయై॒ స్వాహేతి॑ ॥ 52 ॥
పూ॒షా వా అ॑కామయత । ప॒శు॒మాన్-థ్స్యా॒మితి॑ ।
స ఏ॒త-మ్పూ॒ష్ణే రే॒వత్యై॑ చ॒రు-న్నిర॑వపత్ ।
తతో॒ వై స ప॑శు॒మాన॑భవత్ ।
ప॒శు॒మాన్. హ॒ వై భ॑వతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ ।
సో-ఽత్ర॑ జుహోతి । పూ॒ష్ణే స్వాహా॑ రే॒వత్యై॒ స్వాహా᳚ ।
ప॒శుభ్య॒-స్స్వాహేతి॑ ॥ 53 ॥
అ॒శ్వినౌ॒ వా అ॑కామయేతామ్ । శ్రో॒త్ర॒స్వినా॒వబ॑ధిరౌ స్యా॒వేతి॑ । తావే॒తమ॒శ్విభ్యా॑-మశ్వ॒యుగ్భ్యా᳚-మ్పురో॒డాశ॑-న్ద్వికపా॒ల-న్నిర॑వపతామ్ ।
తతో॒ వై తౌ శ్రో᳚త్ర॒స్వినా॒వబ॑ధిరా-వభవతామ్ ।
శ్రో॒త్ర॒స్వీ హ॒ వా అబ॑ధిరో భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి ।
అ॒శ్విభ్యా॒గ్॒ స్వాహా᳚-ఽశ్వ॒యుగ్భ్యా॒గ్॒ స్వాహా᳚ ।
శ్రోత్రా॑య॒ స్వాహా॒ శ్రుత్యై॒ స్వాహేతి॑ ॥ 54 ॥
య॒మో వా అ॑కామయత ।
పి॒తృ॒ణాగ్ం రా॒జ్య-మ॒భిజ॑యేయ॒మితి॑ ।
స ఏ॒తం-యఀ॒మాయా॑ప॒భర॑ణీభ్యశ్చ॒రు-న్నిర॑వపత్ ।
తతో॒ వై స పి॑తృ॒ణాగ్ం రా॒జ్యమ॒భ్య॑జయత్ ।
స॒మా॒నానాగ్ం॑ హ॒ వై రా॒జ్యమ॒భిజ॑యతి ।
య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి ।
య॒మాయ॒ స్వాహా॑ ఽప॒భర॑ణీభ్య॒-స్స్వాహా᳚ ।
రా॒జ్యాయ॒ స్వాహా॒ ఽభిజి॑త్యై స్వాహేతి॑ ॥ 55 ॥
అథై॒తద॑-మా॒వాస్యా॑యా॒ ఆజ్య॒-న్నిర్వ॑పతి ।
కామో॒ వా అ॑మావా॒స్యా᳚ । కామ॒ ఆజ్య᳚మ్ । కామే॑నై॒వ కామ॒గ్ం॒ సమ॑ర్ధయతి । ఖ్షి॒ప్రమే॑న॒గ్ం॒ స కామ॒ ఉప॑నమతి । యేన॒ కామే॑న॒ యజ॑తే । సో-ఽత్ర॑ జుహోతి । అ॒మా॒వా॒స్యా॑యై॒ స్వాహా॒ కామా॑య॒ స్వాహా ఽఽగ॑త్యై॒ స్వాహేతి॑ ॥ 56 ॥
బు॒ద్ధ్నియః॑ - పు॒షా - ఽశ్వినౌ॑ - య॒మో దశ॑ద॒శా - థై॒తద॑ - మావా॒స్యా॑యా అ॒ష్టౌ పఞ్చ॑దశ ) (అ. 5)
అనువాకం 6 - చాన్ద్రమసాదీష్టిబ్రాహ్మణం
చ॒న్ద్రమా॒ వా అ॑కామయత । అ॒హో॒రా॒త్రా-న॑ర్ధమా॒సా-న్మాసా॑-నృ॒తూన్థ్- సం॑వఀథ్స॒ర-మా॒ప్త్వా । చ॒న్ద్రమ॑స॒-స్సాయు॑జ్యగ్ం సలో॒కతా॑-మాప్నుయా॒మితి॑ । స ఏ॒త-ఞ్చ॒న్ద్రమ॑సే ప్రతీ॒దృశ్యా॑యై పురో॒డాశ॒-మ్పఞ్చ॑దశకపాల॒-న్నిర॑వపత్ ।
తతో॒ వై సో॑-ఽహోరా॒త్రా-న॑ర్ధమా॒సా-న్మాసా॑-నృ॒తూన్-థ్సం॑వఀథ్స॒ర-మా॒ప్త్వా ।
చ॒న్ద్రమ॑స॒-స్సాయు॑జ్యగ్ం సలో॒కతా॑మాప్నోత్ ।
అ॒హో॒రా॒త్రాన్. హ॒ వా అ॑ర్ధమా॒సా-న్మాసా॑న్-ఋ॒తూన్-థ్సం॑వఀథ్స॒ర-మా॒ప్త్వా । చ॒న్ద్రమ॑స॒-స్సాయు॑జ్యగ్ం సలో॒కతా॑మాప్నోతి । య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి ।
చ॒న్ద్రమ॑సే॒ స్వాహా᳚ ప్రతీ॒దృశ్యా॑యై॒ స్వాహా᳚ ।
అ॒హో॒రా॒త్రేభ్య॒-స్స్వాహా᳚ ఽర్ధమా॒సేభ్య॒-స్స్వాహా᳚ ।
మాసే᳚భ్య॒-స్స్వాహ॒ర్తుభ్య॒-స్స్వాహా᳚ । సం॒వఀ॒థ్స॒రాయ॒ స్వాహేతి॑ ॥ 57 ॥
అ॒హో॒రా॒త్రే వా అ॑కామయేతామ్ । అత్య॑హోరా॒త్రే ము॑చ్యేవహి ।
న నా॑వహోరా॒త్రే ఆ᳚ప్నుయాతా॒మితి॑ । తే ఏ॒తమ॑హో-రా॒త్రాభ్యా᳚-ఞ్చ॒రు-న్నిర॑వపతామ్ । ద్వ॒యానాం᳚-వ్రీఀహీ॒ణామ్ । శు॒క్లానా᳚-ఞ్చ కృ॒ష్ణానా᳚-ఞ్చ । స॒వా॒త్యోర్దు॒గ్ధే । శ్వే॒తాయై॑ చ కృ॒ష్ణాయై॑ చ ।
తతో॒ వై తే అత్య॑హోరా॒త్రే అ॑ముచ్యేతే ।
నైనే॑ అహోరా॒త్రే ఆ᳚ప్నుతామ్ । అతి॑ హ॒ వా అ॑హోరా॒త్రే ము॑చ్యతే । నైన॑మహోరా॒త్రే ఆ᳚ప్నుతః । య ఏ॒తేన॑ హ॒విషా॒ యజ॑తే । య ఉ॑ చైనదే॒వంవేఀద॑ ।
సో-ఽత్ర॑ జుహోతి । అహ్నే॒ స్వాహా॒ రాత్రి॑యై॒ స్వాహా᳚ ।
అతి॑ముక్త్యై॒ స్వాహేతి॑ ॥ 58 ॥
ఉ॒షా వా అ॑కామయత । ప్రి॒యా ఽఽది॒త్యస్య॑ సు॒భగా᳚ స్యా॒మితి॑ । సైతము॒షసే॑ చ॒రు-న్నిర॑వపత్ ।
తతో॒ వై సా ప్రి॒యా ఽఽది॒త్యస్య॑ సు॒భగా॑ ఽభవత్ ।
ప్రి॒యో హ॒ వై స॑మా॒నానాగ్ం॑ సు॒భగో॑ భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి । ఉ॒షసే॒ స్వాహా॒ వ్యు॑ష్ట్యై॒ స్వాహా᳚ ।
వ్యూ॒షుష్యై॒ స్వాహా᳚ వ్యు॒చ్ఛన్త్యై॒ స్వాహా᳚ । వ్యు॑ష్టాయై॒ స్వాహేతి॑ ॥ 59 ॥
అథై॒తస్మై॒ నఖ్ష॑త్రాయ చ॒రు-న్నిర్వ॑పతి । యథా॒ త్వ-న్దే॒వానా॒మసి॑ । ఏ॒వమ॒హ-మ్మ॑ను॒ష్యా॑ణా-మ్భూయాస॒మితి॑ । యథా॑ హ॒ వా ఏ॒త-ద్దే॒వానా᳚మ్ ।
ఏ॒వగ్ం హ॒ వా ఏ॒ష మ॑ను॒ష్యా॑ణా-మ్భవతి । య ఏ॒తేన॑ హ॒విషా॒ యజ॑తే । య ఉ॑ చైనదే॒వం-వేఀద॑ । సో-ఽత్ర॑ జుహోతి । నఖ్ష॑త్రాయ॒ స్వాహో॑దేష్య॒తే స్వాహా᳚ ।
ఉ॒ద్య॒తే స్వాహోది॑తాయ॒ స్వాహా᳚ । హర॑సే॒ స్వాహా॒ భర॑సే॒ స్వాహా᳚ । భ్రాజ॑సే॒ స్వాహా॒ తేజ॑సే॒ స్వాహా᳚ ।
తప॑సే॒ స్వాహా᳚ బ్రహ్మవర్చ॒సాయ॒ స్వాహేతి॑ ॥ 60 ॥
సూర్యో॒ వా అ॑కామయత । నఖ్ష॑త్రాణా-మ్ప్రతి॒ష్ఠా స్యా॒మితి॑ । స ఏ॒తగ్ం సూర్యా॑య॒ నఖ్ష॑త్రేభ్యశ్చ॒రు-న్నిర॑వపత్ ।
తతో॒ వై స నఖ్ష॑త్రాణా-మ్ప్రతి॒ష్ఠా ఽభ॑వత్ ।
ప్ర॒తి॒ష్ఠా హ॒ వై స॑మా॒నానా᳚-మ్భవతి ।
య ఏ॒తేన॑ హ॒విషా॒ యజ॑తే ।
య ఉ॑ చైనదే॒వం-వేఀద॑ । సో-ఽత్ర॑ జుహోతి ।
సూర్యా॑య॒ స్వాహా॒ నఖ్ష॑త్రేభ్య॒-స్స్వాహా᳚ । ప్ర॒తి॒ష్ఠాయై॒ స్వాహేతి॑ ॥ 61 ॥
అథై॒తమది॑త్యై చ॒రు-న్నిర్వ॑పతి । ఇ॒యం-వాఀ అది॑తిః ।
అ॒స్యామే॒వ ప్రతి॑ తిష్ఠతి । సో-ఽత్ర॑ జుహోతి ।
అది॑త్యై॒ స్వాహా᳚ ప్రతి॒ష్ఠాయై॒ స్వాహేతి॑ ॥ 62 ॥
అథై॒తం-విఀష్ణ॑వే చ॒రు-న్నిర్వ॑పతి । య॒జ్ఞో వై విష్ణుః॑ । య॒జ్ఞ ఏ॒వాన్త॒తః ప్రతి॑ తిష్ఠతి । సో-ఽత్ర॑ జుహోతి । విష్ణ॑వే॒ స్వాహా॑ య॒జ్ఞాయ॒ స్వాహా᳚ । ప్ర॒తి॒ష్ఠాయై॒ స్వాహేతి॑ ॥ 63 ॥
(చ॒న్ద్రమాః॒ పఞ్చ॑దశా - హోరా॒త్రే స॒ప్తద॑ - శో॒షా ఏకా॑ద॒శా - థై॒తస్మై॒ నఖ్ష॑త్తాయ॒ త్రయో॑దశ॒ - సూర్యో॒ దశా - థై॒తమది॑త్యై॒ పఞ్చా - థై॒తం-విఀష్ణ॑వే॒ షట్-థ్స॒ప్త) (అ. 6)
[స॒వి॒తా-ఽఽశూ॒నాం-వ్రీఀ ॑హీ॒ణామిన్ద్రో॑ మ॒హావ్రీ॑హీణా॒మిన్ద్రః॑ కృ॒ష్ణానోం᳚
ఀవ్రీహీ॒ణామ॑హోరా॒త్రే ద్వ॒యానాం᳚-వ్రీఀహీ॒ణామ్ । పి॒తర॒-ష్షట్క॑పాలగ్ం సవి॒తా ద్వాద॑శకపాలమిన్ద్రా॒గ్నీ ఏకా॑దశకపాల॒మిన్ద్ర॒ ఏకా॑దశకపాల॒మిన్ద్రో॒ దశ॑కపాలం॒-విఀష్ణు॑స్త్రికపా॒లమహి॒-ర్భూమి॑కపాలమ॒శ్వినౌ᳚ ద్వికపా॒ల-ఞ్చ॒న్ద్రమాః॒ పఞ్చ॑దశకపాల-మ॒గ్నిరత్వష్టా॒ వస॑వో॒-ఽష్టాక॑పాలమ॒న్యత్ర॑ చ॒రుమ్ । రు॒ద్రో᳚-ఽర్య॒మా పూ॒షా ప॑శు॒మాన్-థ్స్యా॒గ్ం॒ సోమో॑ రు॒ద్రో బృహ॒స్పతిః॒ పయ॑సి వా॒యుః పయ॒-స్సోమో॑ వా॒యురి॑న్ద్రా॒గ్నీ మి॒త్ర ఇన్ద్ర॒ ఆపో॒ బ్రహ్మ॑ య॒మో॑-ఽభిజి॑త్యై॒ త్వష్టా᳚ ప్ర॒జాప॑తిః ప్ర॒జాయై॑ పౌర్ణమా॒స్యా అ॑మావా॒స్యా॑యా॒ ఆగ॑త్యై॒ విశ్వే॒ జిత్యా॑
అ॒శ్వినౌ॒ శ్రుత్యై᳚ । బ్రహ్మ॒ తదే॒తం-విఀష్ణు॒-స్స ఏ॒తం-వాఀ॒యు-స్స ఏ॒తదాప॒స్తాః । పి॒తరో॒ విశ్వే॒ వస॑వో-ఽకామయన్త॒మేతి॒ త ఏ॒త-న్నిర॑వపన్న్ । ఆపో॑-ఽకామయన్త॒ మేతి॒ తా ఏ॒త-న్నిర॑వపన్న్ । ఇ॒న్ద్రా॒గ్నీ అ॒శ్వినా॑వకామయేతాం॒-వేఀతి॒ తావే॒త-న్నిర॑వపదామ్ । అ॒హో॒రా॒త్రే వా అ॑కామయేతా॒మితి॒ తే ఏ॒త-న్నిర॑వపతామ్ ।
అ॒న్యత్రా॑కామయత॒మితి॒ స ఏ॒త-న్నిర॑వపత్ । ఇ॒న్ద్రా॒గ్నీ శ్రైష్ఠ్య॒మిన్ద్రో॒ జ్యైష్ఠ్య॒మిన్ద్రో॑ దృ॒ఢః ।
ఆహి॒-స్సూర్యో-ఽది॑త్యై॒ విష్ణ॑వే ప్రతి॒ష్ఠాయై᳚ ।
సోమో॑ య॒మ-స్స॑మా॒నానా᳚మ్ । అ॒గ్నిర్నో॑ రీరిషద॒న్యత్ర॑ రీరిషః]
[వి॒దుషో॑ హ॒విషా॒ య ఉ॑ చైనదే॒వం-వేఀద॑ । ఇష్టి॑భి॒ర్య ఉ॑ చైనా ఏ॒వం-వేఀద॑ ।
అ॒న్యత్ర॑ బ్రాహ్మ॒ణే య ఉ॑ చైనమే॒వం-వేఀద॑ ]
ఫ్రపాతక ఖోర్వై వి-థ్స్తర్తిన్గ్ ఫదమ్స్ ఒf 1 తొ 6 ఆనువాకమ్స్ ః-
(అ॒గ్నిర్న॑-ఋ॒ద్ధ్యాస్మ॒-నవో॑నవో॒-ఽగ్ని-ర్మి॒త్ర - శ్చ॒న్ద్రమా॒-ష్షట్)
(అ॒గ్నిర్న॒ - స్తన్నో॑ వా॒యు - రహి॑ర్బూ॒ద్ధ్నియ॑ - ఋ॒ఖ్షా వా ఇ॒య - మథై॒త-త్పౌ᳚ర్ణమా॒స్యా - అ॒జో వా ఏక॑పా॒థ్ - సూర్య॒ స్త్రిష॑ష్టిః)
(అ॒గ్నిర్నః॑ - పాతు ప్రతి॒ష్ఠాయై॒ స్వాహేతి॑ )
॥ హరిః॑ ఓమ్ ॥
॥ కృష్ణ యజుర్వేదీయ తైత్తిరీయ బ్రాహ్మణే తృతీయాష్టకే ప్రథమః ప్రపాఠక-స్సమాప్తః ॥
