కృష్ణ యజుర్వేదీయ తైత్తిరీయ బ్రాహ్మణే ప్రథమాష్టకే ప్రథమః ప్రపాఠకః - అగ్న్యాధేయబ్రాహ్మణం

ఓ-న్నమః పరమాత్మనే, శ్రీ మహాగణపతయే నమః,
శ్రీ గురుభ్యో నమః । హ॒రిః॒ ఓమ్ ॥

బ్రహ్మ॒ సన్ధ॑త్త॒-న్తన్మే॑ జిన్వతమ్ । ఖ్ష॒త్రగ్ం సన్ధ॑త్త॒-న్తన్మే॑ జిన్వతమ్ । ఇష॒గ్ం॒ సన్ధ॑త్త॒-న్తా-మ్మే॑ జిన్వతమ్ । ఊర్జ॒గ్ం॒ సన్ధ॑త్త॒-న్తా-మ్మే॑ జిన్వతమ్ । ర॒యిగ్ం సన్ధ॑త్త॒-న్తా-మ్మే॑ జిన్వతమ్ । పుష్టి॒గ్ం॒ సన్ధ॑త్త॒-న్తా-మ్మే॑ జిన్వతమ్ । ప్ర॒జాగ్ం సన్ధ॑త్త॒-న్తా-మ్మే॑ జిన్వతమ్ । ప॒శూ-న్థ్సన్ధ॑త్త॒-న్తాన్మే॑ జిన్వతమ్ ॥ స్తు॒తో॑-ఽసి॒ జన॑ధాః । దే॒వాస్త్వా॑ శుక్ర॒పాః ప్రణ॑యన్తు ॥ 1 ॥

సు॒వీరాః᳚ ప్ర॒జాః ప్ర॑జ॒నయ॒-న్పరీ॑హి । శు॒క్ర-శ్శు॒క్రశో॑చిషా ॥ స్తు॒తో॑-ఽసి॒ జన॑ధాః । దే॒వాస్త్వా॑ మన్థి॒పాః ప్రణ॑యన్తు ॥ సు॒ప్ర॒జాః ప్ర॒జాః ప్ర॑జ॒నయ॒-న్పరీ॑హి । మ॒న్థీ మ॒న్థిశో॑చిషా ॥స॒జ॒ఙ్గ్మా॒నౌ ది॒వ ఆ పృ॑థి॒వ్యా-ఽఽయుః॑ । సన్ధ॑త్త॒-న్తన్మే॑ జిన్వతమ్ । ప్రా॒ణగ్ం సన్ధ॑త్త॒-న్త-మ్మే॑ జిన్వతమ్ । అ॒పా॒నగ్ం సన్ధ॑త్త॒-న్త-మ్మే॑ జిన్వతమ్ ॥ 2 ॥

వ్యా॒నగ్ం సన్ధ॑త్త॒-న్త-మ్మే॑ జిన్వతమ్ । చఖ్షు॒-స్సన్ధ॑త్త॒-న్తన్మే॑ జిన్వతమ్ । శ్రోత్ర॒గ్ం॒ సన్ధ॑త్త॒-న్తన్మే॑ జిన్వతమ్ । మన॒-స్సన్ధ॑త్త॒-న్తన్మే॑ జిన్వతమ్ । వాచ॒గ్ం॒ సన్ధ॑త్త॒-న్తా-మ్మే॑ జిన్వతమ్ ॥ ఆయు॑-స్స్థ॒ ఆయు॑ర్మే ధత్తమ్ । ఆయు॑-ర్య॒జ్ఞాయ॑ ధత్తమ్ । ఆయు॑-ర్య॒జ్ఞప॑తయే ధత్తమ్ । ప్రా॒ణ-స్స్థః॑ ప్రా॒ణ-మ్మే॑ ధత్తమ్ । ప్రా॒ణం-యఀ॒జ్ఞాయ॑ ధత్తమ్ ॥ 3 ॥

ప్రా॒ణం-యఀ॒జ్ఞప॑తయే ధత్తమ్ । చఖ్షు॑-స్స్థ॒శ్చఖ్షు॑ర్మే ధత్తమ్ । చఖ్షు॑-ర్య॒జ్ఞాయ॑ ధత్తమ్ । చఖ్షు॑-ర్య॒జ్ఞప॑తయే ధత్తమ్ । శ్రోత్రగ్గ్॑ స్థ॒-శ్శ్రోత్ర॑-మ్మే ధత్తమ్ । శ్రోత్రం॑-యఀ॒జ్ఞాయ॑ ధత్తమ్ । శ్రోత్రం॑-యఀ॒జ్ఞప॑తయే ధత్తమ్ । తౌ దే॑వౌ శుక్రామన్థినౌ ।క॒ల్పయ॑త॒-న్దైవీ॒ర్విశః॑ । క॒ల్పయ॑త॒-మ్మాను॑షీః ॥ 4 ॥

ఇష॒-మూర్జ॑మ॒స్మాసు॑ ధత్తమ్ । ప్రా॒ణా-న్ప॒శుషు॑ । ప్ర॒జా-మ్మయి॑ చ॒ యజ॑మానే చ ॥ నిర॑స్త॒-శ్శణ్డః॑ । నిర॑స్తో॒ మర్కః॑ ॥ అప॑నుత్తౌ॒ శణ్డా॒మర్కౌ॑ స॒హామునా᳚ ॥ శు॒క్రస్య॑ స॒మిద॑సి । మ॒న్థిన॑-స్స॒మిద॑సి ॥ స ప్ర॑థ॒మ-స్సఙ్కృ॑తి-ర్వి॒శ్వక॑ర్మా । స ప్ర॑థ॒మో మి॒త్రో వరు॑ణో అ॒గ్నిః । స ప్ర॑థ॒మో బృహ॒స్పతి॑శ్చికి॒త్వాన్ । తస్మా॒ ఇన్ద్రా॑య సు॒తమాజు॑హోమి ॥ 5 ॥
(న॒య॒ - న్త్వ॒పా॒నగ్ం సన్ధ॑త్తం॒ త-మ్మే॑ జిన్వతం - ప్రా॒ణం-యఀ॒జ్ఞాయ॑ ధత్తం॒ - మాను॑షీ--ర్ అ॒గ్ని-ర్ద్వే చ॑) (అ. 1)

బ్రహ్మ॑ ఖ్ష॒త్ర-న్తత్ । ఇష॒మూర్జగ్ం॑ ర॒యి-మ్పుష్టి॑-మ్ప్ర॒జా-న్తామ్ । ప॒శు-న్తాన్ । సన్ధ॑త్త॒-న్తత్ । ప్రా॒ణమ॑పా॒నం-వ్యాఀ॒న-న్తమ్ । చఖ్షు॒-శ్శ్రోత్ర॒-మ్మన॒స్తత్ । వాచ॒-న్తామ్ । ఇ॒షాది॒పఞ్చ॑కే॒ వాచ॒-న్తా-మ్మే᳚ । ప॒శూ-న్థ్సన్ధ॑త్త॒-న్తాన్మే᳚ । ప్రా॒ణాది॒త్రిత॑యే॒ త-మ్మే᳚ । అ॒న్యత్ర॒ తన్మే᳚ । )

కృత్తి॑కా-స్వ॒గ్ని-మాద॑ధీత । ఏ॒తద్వా అ॒గ్నే-ర్నఖ్ష॑త్రమ్ । య-త్కృత్తి॑కాః । స్వాయా॑మే॒వైన॑-న్దే॒వతా॑యామా॒ధాయ॑ । బ్ర॒హ్మ॒వ॒ర్చ॒సీ భ॑వతి ॥ ముఖం॒-వాఀ ఏ॒తన్నఖ్ష॑త్రాణామ్ । య-త్కృత్తి॑కాః । యః కృత్తి॑కా-స్వ॒గ్ని-మా॑ధ॒త్తే । ముఖ్య॑ ఏ॒వ భ॑వతి ॥ అథో॒ ఖలు॑ ॥ 6 ॥

అ॒గ్ని॒-న॒ఖ్ష॒త్రమిత్య-ప॑చాయన్తి । గృ॒హానఃఅ॒ దాహు॑కో భవతి ॥ ప్ర॒జాప॑తీ రోహి॒ణ్యా-మ॒గ్ని-మ॑సృజత । త-న్దే॒వా రో॑హి॒ణ్యా-మాద॑ధత । తతో॒ వై తే సర్వా॒-న్రోహా॑నరోహన్న్ । త-ద్రో॑హి॒ణ్యై రో॑హిణి॒త్వమ్ । యో రో॑హి॒ణ్యా-మ॒గ్నిమా॑ధ॒త్తే । ఋ॒ధ్నోత్యే॒వ । సర్వా॒-న్రోహా᳚న్-రోహతి ॥ దే॒వా వై భ॒ద్రా-స్సన్తో॒-ఽగ్ని-మాధి॑థ్సన్త ॥ 7 ॥

తేషా॒మనా॑హితో॒ ఽగ్నిరాసీ᳚త్ । అథై᳚భ్యో వా॒మం-వఀస్వపా᳚క్రామత్ । తే పున॑ర్వస్వో॒రాద॑ధత । తతో॒ వై తాన్ వా॒మం-వఀసూ॒పావ॑ర్తత । యః పు॒రా భ॒ద్ర-స్సమ్పాపీ॑యా॒-న్థ్స్యాత్ । స పున॑ర్వస్వో-ర॒గ్ని-మాద॑ధీత । పున॑రే॒వైనం॑-వాఀ॒మం-వఀసూ॒పావ॑ర్తతే । భ॒ద్రో భ॑వతి ॥ యః కా॒మయే॑త॒ దాన॑కామా మే ప్ర॒జా-స్స్యు॒రితి॑ । స పూర్వ॑యోః॒ ఫల్గు॑న్యో-ర॒గ్ని-మాద॑ధీత ॥ 8 ॥

అ॒ర్య॒మ్ణో వా ఏ॒తన్నఖ్ష॑త్రమ్ । యత్పూర్వే॒ ఫల్గు॑నీ । అ॒ర్య॒మేతి॒ తమా॑హు॒ర్యో దదా॑తి । దాన॑కామా అస్మై ప్ర॒జా భ॑వన్తి ॥ యః కా॒మయే॑త భ॒గీ స్యా॒మితి॑ । స ఉత్త॑రయోః॒ ఫల్గు॑న్యో-ర॒గ్నిమాద॑ధీత । భగ॑స్య॒ వా ఏ॒తన్నఖ్ష॑త్రమ్ । యదుత్త॑రే॒ ఫల్గు॑నీ । భ॒గ్యే॑వ భ॑వతి ॥ కా॒ల॒క॒ఞ్జా వై నామాసు॑రా ఆసన్న్ ॥ 9 ॥

తే సు॑వ॒ర్గాయ॑ లో॒కాయా॒గ్ని-మ॑చిన్వత । పురు॑ష॒ ఇష్ట॑కా॒-ముపా॑దధా॒త్-పురు॑ష॒ ఇష్ట॑కామ్ । స ఇన్ద్రో᳚ బ్రాహ్మ॒ణో బ్రువా॑ణ॒ ఇష్ట॑కా॒ముపా॑ధత్త । ఏ॒షా మే॑ చి॒త్రా నామేతి॑ । తే సు॑వ॒ర్గం-లోఀ॒కమాప్రారో॑హన్న్ । స ఇన్ద్ర॒ ఇష్ట॑కా॒మావృ॑హత్ । తే-ఽవా॑కీర్యన్త । యే॑-ఽవాకీ᳚ర్యన్త । త ఊర్ణా॒వభ॑యో-ఽభవన్న్ । ద్వావుద॑పతతామ్ ॥ 10 ॥

తౌ ది॒వ్యౌ శ్వానా॑వభవతామ్ । యో భ్రాతృ॑వ్యవా॒-న్థ్స్యాత్ । స చి॒త్రాయా॑-మ॒గ్ని-మాద॑ధీత । అ॒వ॒కీర్యై॒వ భ్రాతృ॑వ్యాన్ । ఓజో॒ బల॑మిన్ద్రి॒యం-వీఀ॒ర్య॑మా॒త్మన్-ధ॑త్తే ॥ వ॒సన్తా᳚ బ్రాహ్మ॒ణో᳚ ఽగ్నిమాద॑ధీత । వ॒స॒న్తో వై బ్రా᳚హ్మ॒ణస్య॒ర్తుః । స్వ ఏ॒వైన॑-మృ॒తావా॒ధాయ॑ । బ్ర॒హ్మ॒వ॒ర్చ॒సీ భ॑వతి । ముఖం॒-వాఀ ఏ॒తదృ॑తూ॒నామ్ ॥ 11 ॥

య-ద్వ॑స॒న్తః । యో వ॒సన్తా॒-ఽగ్నిమా॑ధ॒త్తే । ముఖ్య॑ ఏ॒వ భ॑వతి । అథో॒ యోని॑మన్తమే॒వైన॒-మ్ప్రజా॑త॒మాధ॑త్తే । గ్రీ॒ష్మే రా॑జ॒న్య॑ ఆద॑ధీత । గ్రీ॒ష్మో వై రా॑జ॒న్య॑స్య॒ర్తుః । స్వ ఏ॒వైన॑మృ॒తావా॒ధాయ॑ । ఇ॒న్ద్రి॒యా॒వీ భ॑వతి । శ॒రది॒ వైశ్య॒ ఆద॑ధీత । శ॒రద్వై వైశ్య॑స్య॒ర్తుః ॥ 12 ॥

స్వ ఏ॒వైన॑మృ॒తావా॒ధాయ॑ । ప॒శు॒మా-న్భ॑వతి ॥ న పూర్వ॑యోః॒ ఫల్గు॑న్యో-ర॒గ్నిమాద॑ధీత । ఏ॒షా వై జ॑ఘ॒న్యా॑ రాత్రి॑-స్సం​వఀథ్స॒రస్య॑ । యత్పూర్వే॒ ఫల్గు॑నీ । పృ॒ష్టి॒త ఏ॒వ సం॑​వఀథ్స॒రస్యా॒-గ్నిమా॒ధాయ॑ । పాపీ॑యాన్-భవతి । ఉత్త॑రయో॒రాద॑ధీత । ఏ॒షా వై ప్ర॑థ॒మా రాత్రి॑-స్సం​వఀథ్స॒రస్య॑ । యదుత్త॑రే॒ ఫల్గు॑నీ । ము॒ఖ॒త ఏ॒వ సం॑​వఀథ్స॒రస్యా॒-గ్నిమా॒ధాయ॑ । వసీ॑యా-న్భవతి ॥ అథో॒ ఖలు॑ । య॒దైవైనం॑-యఀ॒జ్ఞ ఉ॑ప॒నమే᳚త్ । అథాద॑ధీత । సైవాస్యర్ధిః॑ ॥ 13 ॥
(ఖల్వా॑ - ధిథ్సన్త॒ - ఫల్గు॑న్యోర॒గ్నిమాద॑ధీతా - సన్ - నపతతా - మతూ॒నాం - ఀవైశ్య॑స్య॒ర్తు - రుత్త॑రే॒ ఫల్గు॑నీ॒ షట్ చ॑) (అ. 2)

ఉద్ధ॑న్తి । యదే॒వాస్యా॑ అమే॒ద్ధ్యమ్ । తదప॑ హన్తి ॥ అ॒పో-ఽవో᳚ఖ్షతి॒ శాన్త్యై᳚ ॥ సిక॑తా॒ నివ॑పతి । ఏ॒తద్వా అ॒గ్నే-ర్వై᳚శ్వాన॒రస్య॑ రూ॒పమ్ । రూ॒పేణై॒వ వై᳚శ్వాన॒రమవ॑-రున్ధే ॥ ఊషా॒-న్నివ॑పతి । పుష్టి॒ర్వా ఏ॒షా ప్ర॒జన॑నమ్ । యదూషాః᳚ ॥ 14 ॥

పుష్ట్యా॑మే॒వ ప్ర॒జన॑నే॒ ఽగ్నిమాధ॑త్తే । అథో॑ స॒ఞ్జ్ఞాన॑ ఏ॒వ । స॒-ఞ్జ్ఞాన॒గ్గ్॒ హ్యే॑త-త్ప॑శూ॒నామ్ । యదూషాః᳚ ॥ ద్యావా॑పృథి॒వీ స॒హాస్తా᳚మ్ । తే వి॑య॒తీ అ॑బ్రూతామ్ । అస్త్వే॒వ నౌ॑ స॒హ య॒జ్ఞియ॒మితి॑ । యద॒ముష్యా॑ య॒జ్ఞియ॒మాసీ᳚త్ । తద॒స్యా-మ॑దధాత్ । త ఊషా॑ అభవన్న్ ॥ 15 ॥

యద॒స్యా య॒జ్ఞియ॒మాసీ᳚త్ । తద॒ముష్యా॑-మదధాత్ । తద॒దశ్చ॒న్ద్రమ॑సి కృ॒ష్ణమ్ । ఊషా᳚న్ని॒వప॑న్న॒దో ద్ధ్యా॑యేత్ । ద్యావా॑పృథి॒వ్యోరే॒వ య॒జ్ఞియే॒-ఽగ్నిమాధ॑త్తే ॥ అ॒గ్నిర్దే॒వేభ్యో॒ నిలా॑యత । ఆ॒ఖూ రూ॒ప-ఙ్కృ॒త్వా । స పృ॑థి॒వీ-మ్ప్రావి॑శత్ । స ఊ॒తీః కు॑ర్వా॒ణః పృ॑థి॒వీమను॒ సమ॑చరత్ । తదా॑ఖుకరీ॒ష-మ॑భవత్ ॥ 16 ॥

యదా॑ఖుకరీ॒షగ్ం స॑భాం॒రో భవ॑తి । యదే॒వాస్య॒ తత్ర॒ న్య॑క్తమ్ । తదే॒వావ॑రున్ధే ॥ ఊర్జం॒-వాఀ ఏ॒తగ్ం రస॑-మ్పృథి॒వ్యా ఉ॑ప॒దీకా॒ ఉద్ది॑హన్తి । య-ద్వ॒ల్మీక᳚మ్ । య-ద్వ॑ల్మీకవ॒పా స॑భాం॒రో భవ॑తి । ఊర్జ॑మే॒వ రస॑-మ్పృథి॒వ్యా అవ॑రున్ధే । అథో॒ శ్రోత్ర॑మే॒వ । శ్రోత్ర॒గ్గ్॒ హ్యే॑త-త్పృ॑థి॒వ్యాః । య-ద్వ॒ల్మీకః॑ ॥ 17 ॥

అబ॑ధిరో భవతి । య ఏ॒వం-వేఀద॑ ॥ ప్ర॒జాప॑తిః ప్ర॒జా అ॑సృజత । తాసా॒మన్న॒-ముపా᳚ఖ్షీయత । తాభ్య॒-స్సూద॒ముప॒ ప్రాభి॑నత్ । తతో॒ వై తాసా॒మన్న॒-న్నాఖ్షీ॑యత । యస్య॒ సూద॑-స్సమ్భా॒రో భవ॑తి । నాస్య॑ గృ॒హే-ఽన్న॑-ఙ్ఖ్షీయతే ॥ ఆపో॒ వా ఇ॒దమగ్రే॑ సలి॒లమా॑సీత్ । తేన॑ ప్ర॒జాప॑తిరశ్రామ్యత్ ॥ 18 ॥

క॒థమి॒దగ్గ్​ స్యా॒దితి॑ । సో॑-ఽపశ్య-త్పుష్కరప॒ర్ణ-న్తిష్ఠ॑త్ । సో॑-ఽమన్యత । అస్తి॒ వై తత్ । యస్మి॑-న్ని॒దమధి॒ తిష్ఠ॒తీతి॑ । స వ॑రా॒హో రూ॒ప-ఙ్కృ॒త్వోప॒న్య॑మజ్జత్ । స పృ॑థి॒వీమ॒ధ ఆ᳚ర్చ్ఛత్ । తస్యా॑ ఉప॒హత్యోద॑మజ్జత్ । త-త్పు॑ష్కరప॒ర్ణే᳚ ఽప్రథయత్ । యదప్ర॑థయత్ ॥ 19 ॥

త-త్పృ॑థి॒వ్యై పృ॑థివి॒త్వమ్ । అభూ॒ద్వా ఇ॒దమితి॑ । తద్భూమ్యై॑ భూమి॒త్వమ్ । తా-న్దిశో-ఽను॒ వాత॒-స్సమ॑వహత్ । తాగ్ం శర్క॑రాభిరదృగ్ం హత్ । శం-వైఀ నో॑-ఽభూ॒దితి॑ । తచ్ఛర్క॑రాణాగ్ం శర్కర॒త్వమ్ । య-ద్వ॑రా॒హవి॑హతగ్ం సమ్భా॒రో భవ॑తి । అ॒స్యామే॒వా-ఛ॑మ్బట్కారమ॒గ్ని-మాధ॑త్తే । శర్క॑రా భవన్తి॒ ధృత్యై᳚ ॥ 20 ॥

అథో॑ శ॒త్వాం​యఀ ॑ ॥ సరే॑తా అ॒గ్నిరా॒ధేయ॒ ఇత్యా॑హుః । ఆపో॒ వరు॑ణస్య॒ పత్న॑య ఆసన్న్ । తా అ॒గ్నిర॒భ్య॑ద్ధ్యాయత్ । తా-స్సమ॑భవత్ । తస్య॒ రేతః॒ పరా॑-ఽపతత్ । తద్ధిర॑ణ్య-మభవత్ । యద్ధిర॑ణ్య-ము॒పాస్య॑తి । సరే॑తసమే॒వాగ్ని-మాధ॑త్తే ॥ పురు॑ష॒ ఇన్వై స్వా-ద్రేత॑సో బీభథ్సత॒ ఇత్యా॑హుః ॥ 21 ॥

ఉ॒త్త॒ర॒త ఉపా᳚స్య॒త్య-బీ॑భథ్సాయై ॥ అతి॒ ప్రయ॑చ్ఛతి । ఆర్తి॑మే॒వాతి॒ ప్రయ॑చ్ఛతి ॥ అ॒గ్నిర్దే॒వేభ్యో॒ నిలా॑యత । అశ్వో॑ రూ॒ప-ఙ్కృ॒త్వా । సో᳚-ఽశ్వ॒త్థే సం॑​వఀథ్స॒ర-మ॑తిష్ఠత్ । తద॑శ్వ॒త్థస్యా᳚-శ్వత్థ॒త్వమ్ । యదాశ్వ॑త్థ-స్సమ్భా॒రో భవ॑తి । యదే॒వాస్య॒ తత్ర॒ న్య॑క్తమ్ । తదే॒వావ॑-రున్ధే ॥ 22 ॥

దే॒వా వా ఊర్జం॒-వ్యఀ ॑భజన్త । తత॑ ఉదు॒మ్బర॒ ఉద॑తిష్ఠత్ । ఊర్గ్వా ఉ॑దు॒మ్బరః॑ । యదౌదు॑మ్బర-స్సమ్భా॒రో భవ॑తి । ఊర్జ॑మే॒వావ॑-రున్ధే ॥ తృ॒తీయ॑స్యామి॒తో ది॒వి సోమ॑ ఆసీత్ । త-ఙ్గా॑య॒త్ర్యాహ॑రత్ । తస్య॑ ప॒ర్ణమ॑చ్ఛిద్యత । తత్ప॒ర్ణో॑ ఽభవత్ । త-త్ప॒ర్ణస్య॑ పర్ణ॒త్వమ్ ॥ 23 ॥

యస్య॑ పర్ణ॒మయ॑-స్సమ్భా॒రో భవ॑తి । సో॒మ॒పీ॒థమే॒వావ॑ రున్ధే ॥ దే॒వా వై బ్రహ్మ॑న్నవదన్త । త-త్ప॒ర్ణ ఉపా॑శృణోత్ । సు॒శ్రవా॒ వై నామ॑ । య-త్ప॑ర్ణ॒మయ॑-స్సమ్భా॒రో భవ॑తి । బ్ర॒హ్మ॒వ॒ర్చ॒సమే॒వావ॑ రున్ధే ॥ ప్ర॒జాప॑తి-ర॒గ్ని-మ॑సృజత । సో॑-ఽబిభే॒త్ప్ర మా॑ ధఖ్ష్య॒తీతి॑ । తగ్ం శ॒మ్యా॑-ఽశమయత్ ॥ 24 ॥

తచ్ఛ॒మ్యై॑ శమి॒త్వమ్ । యచ్ఛ॑మీ॒మయ॑-స్సమ్భా॒రో భవ॑తి । శాన్త్యా॒ అప్ర॑దాహాయ ॥ అ॒గ్నే-స్సృ॒ష్టస్య॑ య॒తః । విక॑ఙ్కత॒-మ్భా ఆ᳚ర్చ్ఛత్ । య-ద్వైక॑ఙ్కత-స్సమ్భా॒రో భవ॑తి । భా ఏ॒వావ॑రున్ధే ॥ సహృ॑దయో॒ ఽగ్నిరా॒ధేయ॒ ఇత్యా॑హుః । మ॒రుతో॒-ఽద్భిర॒గ్ని-మ॑తమయన్న్ । తస్య॑ తా॒న్తస్య॒ హృద॑య॒మాచ్ఛి॑న్దన్న్ । సా-ఽశని॑రభవత్ । యద॒శని॑హతస్య వృ॒ఖ్షస్య॑ సమ్భా॒రో భవ॑తి ।సహృ॑దయ-మే॒వాగ్ని-మాధ॑త్తే ॥ 25 ॥
(ఊషా॑ - అభవన్ - నభవ-ద్- వ॒ల్మీక్రో᳚ - ఽశ్రామ్య॒ - దప్ర॑థయ॒ - ద్ధృత్యై॑ - బీభథ్సత॒ ఇత్యా॑హు - రున్ధే - పర్ణ॒త్వ - మ॑శమయద - చ్ఛిన్ద॒గ్గ్॒ స్త్రీణి॑ చ) (అ. 3)

ద్వా॒ద॒శసు॑ విక్రా॒మేష్వ॒గ్నిమాద॑ధీత । ద్వాద॑శ॒ మాసా᳚-స్సం​వఀథ్స॒రః । సం॒​వఀ॒థ్స॒రా-దే॒వైన॑-మవ॒రుద్ధ్యా-ధ॑త్తే ॥ య-ద్ద్వా॑ద॒శసు॑ విక్రా॒మే-ష్వా॒దధీ॑త । పరి॑మిత॒మవ॑రున్ధీత । చఖ్షు॑-ర్నిమిత॒ ఆద॑ధీత । ఇయ॒-ద్ద్వాద॑శ విక్రా॒మా(3) ఇతి॑ । పరి॑మిత-ఞ్చై॒వాప॑రిమిత॒-ఞ్చావ॑రున్ధే ॥ అనృ॑తం॒-వైఀ వా॒చా వ॑దతి । అనృ॑త॒-మ్మన॑సా ద్ధ్యాయతి ॥ 26 ॥

చఖ్షు॒-ర్వై స॒త్యమ్ । అద్రా(3)గిత్యా॑హ । అద॑ర్​శ॒మితి॑ । త-థ్స॒త్యమ్ । యశ్చఖ్షు॑-ర్నిమితే॒-ఽగ్ని-మా॑ధ॒త్తే । స॒త్య ఏ॒వైన॒-మాధ॑త్తే ॥ తస్మా॒దాహి॑తాగ్ని॒ర్నానృ॑తం-వఀదేత్ । నాస్య॑ బ్రాహ్మ॒ణో-ఽనా᳚శ్వా-న్గృ॒హే వ॑సేత్ । స॒త్యే హ్య॑స్యా॒గ్నిరాహి॑తః ॥ ఆ॒గ్నే॒యీ వై రాత్రిః॑ ॥ 27 ॥

ఆ॒గ్నే॒యాః ప॒శవః॑ । ఐ॒న్ద్రమహః॑ । నక్త॒-ఙ్గార్​హ॑పత్య॒-మాద॑ధాతి । ప॒శూనే॒వావ॑-రున్ధే । దివా॑-ఽఽహవ॒నీయ᳚మ్ । ఇ॒న్ద్రి॒యమే॒వా-వ॑రున్ధే ॥ అ॒ర్ధోది॑తే॒ సూర్య॑ ఆహవ॒నీయ॒-మాద॑ధాతి । ఏ॒తస్మి॒న్ వై లో॒కే ప్ర॒జాప॑తిః ప్ర॒జా అ॑సృజత । ప్ర॒జా ఏ॒వ త-ద్యజ॑మాన-స్సృజతే । అథో॑ భూ॒త-ఞ్చై॒వ భ॑వి॒ష్యచ్చా-వ॑రున్ధే ॥ 28 ॥

ఇడా॒ వై మా॑న॒వీ య॑జ్ఞానూకా॒శిన్యా॑సీత్ । సా-ఽశృ॑ణోత్ । అసు॑రా అ॒గ్నిమాద॑ధత॒ ఇతి॑ । తద॑గచ్ఛత్ । త ఆ॑హవ॒నీయ॒మగ్ర॒ ఆద॑ధత । అథ॒ గార్​హ॑పత్యమ్ । అథా᳚-న్వాహార్య॒-పచ॑నమ్ । సా ఽబ్ర॑వీత్ । ప్ర॒తీచ్యే॑షా॒గ్॒ శ్రీర॑గాత్ । భ॒ద్రా భూ॒త్వా పరా॑భవిష్య॒న్తీతి॑ ॥ 29 ॥

యస్యై॒వ-మ॒గ్నిరా॑ధీ॒యతే᳚ । ప్ర॒తీచ్య॑స్య॒ శ్రీరే॑తి । భ॒ద్రో భూ॒త్వా పరా॑భవతి ॥ సా-ఽశృ॑ణోత్ । దే॒వా అ॒గ్ని-మాద॑ధత॒ ఇతి॑ । తద॑గచ్ఛత్ । తే᳚-ఽన్వాహార్య॒-పచ॑న॒మగ్ర॒ ఆద॑ధత । అథ॒ గార్​హ॑పత్యమ్ । అథా॑హవ॒నీయ᳚మ్ । సా-ఽబ్ర॑వీత్ ॥ 30 ॥

ప్రాచ్యే॑షా॒గ్॒ శ్రీర॑గాత్ । భ॒ద్రా భూ॒త్వా సు॑వ॒ర్గం-లోఀ॒కమే᳚ష్యన్తి । ప్ర॒జా-న్తు న వే᳚థ్స్యన్త॒ ఇతి॑ । యస్యై॒వమ॒గ్ని-రా॑ధీ॒యతే᳚ । ప్రాచ్య॑స్య॒ శ్రీరే॑తి । భ॒ద్రో భూ॒త్వా సు॑వ॒ర్గం-లోఀ॒కమే॑తి । ప్ర॒జా-న్తు న వి॑న్దతే ॥ సా-ఽబ్ర॑వీ॒దిడా॒ మను᳚మ్ । తథా॒ వా అ॒హ-న్తవా॒గ్ని-మాధా᳚స్యామి । యథా॒ ప్ర ప్ర॒జయా॑ ప॒శుభి॑-ర్మిథు॒నై-ర్జ॑ని॒ష్యసే᳚ ॥ 31 ॥

ప్రత్య॒స్మిన్ ఀలో॒కే స్థా॒స్యసి॑ । అ॒భి సు॑వ॒ర్గం-లోఀ॒క-ఞ్జే॒ష్యసీతి॑ । గార్​హ॑పత్య॒మగ్ర॒ ఆద॑ధాత్ । గార్​హ॑పత్యం॒-వాఀ అను॑ ప్ర॒జాః ప॒శవః॒ ప్రజా॑యన్తే । గార్​హ॑పత్యేనై॒వాస్మై᳚ ప్ర॒జా-మ్ప॒శూ-న్ప్రాజ॑నయత్ । అథా᳚-న్వాహార్య॒-పచ॑నమ్ । తి॒ర్యఙ్ఙ్॑వ॒ వా అ॒యం-లోఀ॒కః । అ॒స్మిన్నే॒వ తేన॑ లో॒కే ప్రత్య॑తిష్ఠత్ । అథా॑హవ॒నీయ᳚మ్ । తేనై॒వ సు॑వ॒ర్గం-లోఀ॒క-మ॒భ్య॑జయత్ ॥ 32 ॥

యస్యై॒వమ॒గ్ని-రా॑ధీ॒యతే᳚ । ప్ర ప్ర॒జయా॑ ప॒శుభి॑-ర్మిథు॒నై-ర్జా॑యతే । ప్రత్య॒స్మిన్ ఀలో॒కే తి॑ష్ఠతి । అ॒భి సు॑వ॒ర్గం-లోఀ॒క-ఞ్జ॑యతి ॥ యస్య॒ వా అయ॑థాదేవతమ॒గ్ని-రా॑ధీ॒యతే᳚ । ఆ దే॒వతా᳚భ్యో వృశ్చ్యతే । పాపీ॑యా-న్భవతి । యస్య॑ యథా దేవ॒తమ్ । న దే॒వతా᳚భ్య॒ ఆవృ॑శ్చ్యతే । వసీ॑యా-న్భవతి ॥ 33 ॥

భృగూ॑ణా॒-న్త్వా-ఽఙ్గి॑రసాం-వ్రఀతపతే వ్ర॒తేనా-ద॑ధా॒మీతి॑ భృగ్వఙ్గి॒రసా॒మాద॑ద్ధ్యాత్ । ఆ॒ది॒త్యానా᳚-న్త్వా దే॒వానాం᳚-వ్రఀతపతే వ్ర॒తేనాద॑ధా॒మీత్య॒న్యాసా॒-మ్బ్రాహ్మ॑ణీనా-మ్ప్ర॒జానా᳚మ్ । వరు॑ణస్య త్వా॒ రాజ్ఞో᳚ వ్రతపతే వ్ర॒తేనాద॑ధా॒మీతి॒ రాజ్ఞః॑ । ఇన్ద్ర॑స్య త్వేన్ద్రి॒యేణ॑ వ్రతపతే వ్ర॒తేనాద॑ధా॒మీతి॑ రాజ॒న్య॑స్య । మనో᳚స్త్వా గ్రామ॒ణ్యో᳚ వ్రతపతే వ్ర॒తేనాద॑ధా॒మీతి॒ వైశ్య॑స్య । ఋ॒భూ॒ణా-న్త్వా॑ దే॒వానాం᳚-వ్రఀతపతే వ్ర॒తేనాద॑ధా॒మీతి॑ రథకా॒రస్య॑ । య॒థా॒ దే॒వ॒తమ॒గ్ని-రాధీ॑యతే । న దే॒వతా᳚భ్య॒ ఆ వృ॑శ్చ్యతే । వసీ॑యా-న్భవతి ॥ 34 ॥
(ధ్యా॒య॒తి॒ - వై రాత్రి॒ - శ్చావ॑రున్ధే - భవిష్య॒న్తీత్య॑ - బ్రవీ - జ్జని॒ష్యసే॑ - ఽజయ॒-ద్- వసీ॑యా-న్భవతి॒ - నవ॑ చ) (అ. 4)

అనువాకం 5 - తత్ర పవమానహబీంషి
ప్ర॒జాప॑తి-ర్వా॒చ-స్స॒త్య-మ॑పశ్యత్ । తేనా॒గ్నిమాధ॑త్త । తేన॒ వై స ఆ᳚ర్ధ్నోత్ । భూర్భువ॒-స్సువ॒రిత్యా॑హ । ఏ॒తద్వై వా॒చ-స్స॒త్యమ్ । య ఏ॒తేనా॒గ్ని-మా॑ధ॒త్తే । ఋ॒ద్ధ్నోత్యే॒వ । అథో॑ స॒త్యప్రా॑శూరే॒వ భ॑వతి । అథో॒ య ఏ॒వం-విఀ॒ద్వాన॑భి॒చర॑తి । స్తృ॒ణు॒త ఏ॒వైన᳚మ్ ॥ 35 ॥

భూరిత్యా॑హ । ప్ర॒జా ఏ॒వ త-ద్యజ॑మాన-స్సృజతే । భువ॒ ఇత్యా॑హ । అ॒స్మిన్నే॒వ లో॒కే ప్రతి॑ తిష్ఠతి । సువ॒రిత్యా॑హ । సు॒వ॒ర్గ ఏ॒వ లో॒కే ప్రతి॑ తిష్ఠతి ॥ త్రి॒భిర॒ఖ్షరై॒-ర్గార్​హ॑పత్య॒-మాద॑ధాతి । త్రయ॑ ఇ॒మే లో॒కాః । ఏ॒ష్వే॑వైనం॑-లోఀ॒కేషు॒ ప్రతి॑ష్ఠిత॒-మాధ॑త్తే । సర్వైః᳚ ప॒ఞ్చభి॑-రాహవ॒నీయ᳚మ్ ॥ 36 ॥

సు॒వ॒ర్గాయ॒ వా ఏ॒ష లో॒కాయాధీ॑యతే । యదా॑హవ॒నీయః॑ । సు॒వ॒ర్గ ఏ॒వాస్మై॑ లో॒కే వా॒చ-స్స॒త్యగ్ం సర్వ॑మాప్నోతి ॥ త్రి॒భి-ర్గార్​హ॑పత్య॒-మాద॑ధాతి । ప॒ఞ్చభి॑-రాహవ॒నీయ᳚మ్ । అ॒ష్టౌ సమ్ప॑ద్యన్తే । అ॒ష్టాఖ్ష॑రా గాయ॒త్రీ । గా॒య॒త్రో᳚-ఽగ్నిః । యావా॑నే॒వాగ్నిః । తమాధ॑త్తే ॥ 37 ॥

ప్ర॒జాప॑తిః ప్ర॒జా అ॑సృజత । తా అ॑స్మా-థ్సృ॒ష్టాః పరా॑చీరాయన్న్ । తాభ్యో॒ జ్యోతి॒-రుద॑గృహ్ణాత్ । త-ఞ్జ్యోతిః॒ పశ్య॑న్తీః ప్ర॒జా అ॒భిస॒మావ॑ర్తన్త । ఉ॒పరీ॑వా॒గ్ని-ముద్గృ॑హ్ణీయా-దు॒ద్ధరన్న్॑ । జ్యోతి॑రే॒వ పశ్య॑న్తీః ప్ర॒జా యజ॑మాన-మ॒భి-స॒మావ॑ర్తన్తే ॥ ప్ర॒జాప॑తే॒రఖ్ష్య॑శ్వయత్ । త-త్పరా॑-ఽపతత్ । తదశ్వో॑-ఽభవత్ । తదశ్వ॑స్యా-శ్వ॒త్వమ్ ॥ 38 ॥

ఏ॒ష వై ప్ర॒జాప॑తిః । యద॒గ్నిః । ప్రా॒జా॒ప॒త్యో-ఽశ్వః॑ । యదశ్వ॑-మ్పు॒రస్తా॒న్నయ॑తి । స్వమే॒వ చఖ్షుః॒ పశ్య॑-న్ప్ర॒జాప॑తి॒-రనూదే॑తి ॥ వ॒జ్రీ వా ఏ॒షః । యదశ్వః॑ । యదశ్వ॑-మ్పు॒రస్తా॒న్నయ॑తి । జా॒తానే॒వ భ్రాతృ॑వ్యా॒-న్ప్రణు॑దతే ॥ పున॒రావ॑ర్తయతి ॥ 39 ॥

జ॒ని॒ష్యమా॑ణానే॒వ ప్రతి॑నుదతే ॥ న్యా॑హవ॒నీయో॒ గార్​హ॑పత్య-మకామయత । ని గార్​హ॑పత్య ఆహవ॒నీయ᳚మ్ । తౌ వి॒భాజ॒-న్నాశ॑క్నోత్ । సోశ్వః॑ పూర్వ॒వాడ్-భూ॒త్వా । ప్రాఞ్చ॒-మ్పూర్వ॒ముద॑వహత్ । త-త్పూ᳚ర్వ॒వాహః॑ పూర్వవా॒ట్-త్వమ్ । యదశ్వ॑-మ్పు॒రస్తా॒న్నయ॑తి । విభ॑క్తిరే॒వైన॑యో॒స్సా । అథో॒ నానా॑వీర్యావే॒వైనౌ॑ కురుతే ॥ 40 ॥

యదు॒పర్యు॑పరి॒ శిరో॒ హరే᳚త్ । ప్రా॒ణాన్ విచ్ఛి॑న్ద్యాత్ । అ॒ధో॑-ఽధ॒-శ్శిరో॑ హరతి । ప్రా॒ణానా᳚-ఙ్గోపీ॒థాయ॑ ॥ ఇయ॒త్యగ్రే॑ హరతి । అథేయ॒త్యథేయ॑తి । త్రయ॑ ఇ॒మే లో॒కాః । ఏ॒ష్వే॑వైనం॑-లోఀ॒కేషు॒ ప్రతి॑ష్ఠిత॒మా-ధ॑త్తే ॥ ప్ర॒జాప॑తి-ర॒గ్ని-మ॑సృజత । సో॑-ఽబిభే॒త్ప్ర మా॑ ధఖ్ష్య॒తీతి॑ ॥ 41 ॥

తస్య॑ త్రే॒ధా మ॑హి॒మానం॒-వ్యౌఀ ॑హత్ । శాన్త్యా॒ అప్ర॑దాహాయ । యత్-త్రే॒ధా-ఽగ్ని-రా॑ధీ॒యతే᳚ । మ॒హి॒మాన॑మే॒వాస్య॒ త-ద్వ్యూ॑హతి । శాన్త్యా॒ అప్ర॑దాహాయ ॥ పున॒రావ॑ర్తయతి । మ॒హి॒మాన॑మే॒వాస్య॒ సన్ద॑ధాతి ॥ ప॒శుర్వా ఏ॒షః । యదశ్వః॑ । ఏ॒ష రు॒ద్రః ॥ 42 ॥

యద॒గ్నిః । యదశ్వ॑స్య ప॒దే᳚-ఽగ్ని-మా॑ద॒ద్ధ్యాత్ । రు॒ద్రాయ॑ ప॒శూ-నపి॑దద్ధ్యాత్ । అ॒ప॒శు-ర్యజ॑మాన-స్స్యాత్ । య-న్నాక్ర॒మయే᳚త్ । అన॑వరుద్ధా అస్య ప॒శవ॑-స్స్యుః । పా॒ర్​శ్వ॒త ఆక్ర॑మయేత్ । యథా ఽఽహి॑తస్యా॒గ్నే-రఙ్గా॑రా అభ్యవ॒వర్తే॑రన్న్ । అవ॑రుద్ధా అస్య ప॒శవో॒ భవ॑న్తి । న రు॒ద్రాయాపి॑దధాతి ॥ 43 ॥

త్రీణి॑ హ॒వీగ్ంషి॒ నిర్వ॑పతి । వి॒రాజ॑ ఏ॒వ విక్రా᳚న్తం॒-యఀజ॑మా॒నో-ఽను॒ విక్ర॑మతే ॥ అ॒గ్నయే॒ పవ॑మానాయ । అ॒గ్నయే॑ పావ॒కాయ॑ । అ॒గ్నయే॒ శుచ॑యే । యద॒గ్నయే॒ పవ॑మానాయ ని॒ర్వప॑తి । పు॒నాత్యే॒వైన᳚మ్ । యద॒గ్నయే॑ పావ॒కాయ॑ । పూ॒త ఏ॒వాస్మి॑-న్న॒న్నాద్య॑-న్దధాతి । యద॒గ్నయే॒ శుచ॑యే । బ్ర॒హ్మ॒వ॒ర్చ॒స-మే॒వాస్మి॑-న్ను॒పరి॑ష్టా-ద్దధాతి ॥ 44 ॥
(ఏ॒న॒ - మా॒హ॒వ॒నీయం॑ - ధత్తే - ఽశ్వ॒త్వం - ఀవ॑ర్తయతి - కురుత॒ - ఇతి॑ -రు॒ద్రో - ద॑ధాతి॒ - యద॒గ్నయే॒ శుచ॑య॒ ఏక॑-ఞ్చ) (అ. 5)

అనువాకం 6 - పవమానహవిర్విస్తారః, హవిరన్తరాణి, దఖ్షిణాశ్చ
దే॒వా॒సు॒రా-స్సం​యఀ ॑త్తా ఆసన్న్ । తే దే॒వా వి॑జ॒య-ము॑ప॒యన్తః॑ । అ॒గ్నౌ వా॒మం-వఀసు॒ స-న్న్య॑దధత । ఇ॒దము॑ నో భవిష్యతి । యది॑ నో జే॒ష్యన్తీతి॑ । తద॒గ్నిర్నో-థ్సహ॑మశక్నోత్ । తత్-త్రే॒ధా విన్య॑దధాత్ । ప॒శుషు॒ తృతీ॑యమ్ । అ॒ఫ్సు తృతీ॑యమ్ । ఆ॒ది॒త్యే తృతీ॑యమ్ ॥ 45 ॥

త-ద్దే॒వా వి॒జిత్య॑ । పున॒రవా॑రురుథ్సన్త । తే᳚-ఽగ్నయే॒ పవ॑మానాయ పురో॒డాశ॑-మ॒ష్టాక॑పాల॒-న్నిర॑వపన్న్ । ప॒శవో॒ వా అ॒గ్నిః పవ॑మానః । యదే॒వ ప॒శుష్వాసీ᳚త్ । తత్-తేనావా॑రున్ధత । తే᳚-ఽగ్నయే॑ పావ॒కాయ॑ । ఆపో॒ వా అ॒గ్నిః పా॑వ॒కః । యదే॒వాఫ్స్వాసీ᳚త్ । తత్-తేనావా॑రున్ధత ॥ 46 ॥

తే᳚-ఽగ్నయే॒ శుచ॑యే । అ॒సౌ వా ఆ॑ది॒త్యో᳚-ఽగ్ని-శ్శుచిః॑ । యదే॒వాది॒త్య ఆసీ᳚త్ । తత్-తేనావా॑రున్ధత ॥ బ్ర॒హ్మ॒వా॒దినో॑ వదన్తి । త॒నువో॒ వావైతా అ॑గ్న్యా॒ధేయ॑స్య । ఆ॒గ్నే॒యో వా అ॒ష్టాక॑పాలో ఽగ్న్యా॒ధేయ॒మితి॑ । యత్త-న్ని॒ర్వపే᳚త్ । నైతాని॑ । యథా॒-ఽఽత్మా స్యాత్ ॥ 47 ॥

నాఙ్గా॑ని । తా॒దృగే॒వ తత్ । యదే॒తాని॑ ని॒ర్వపే᳚త్ । న తమ్ । యథా-ఽఙ్గా॑ని॒ స్యుః । నాత్మా । తా॒దృగే॒వ తత్ । ఉ॒భయా॑ని స॒హని॒రుప్యా॑ణి । య॒జ్ఞస్య॑ సాత్మ॒త్వాయ॑ ॥ ఉ॒భయం॒-వాఀ ఏ॒తస్యే᳚న్ద్రి॒యం-వీఀ॒ర్య॑మాప్యతే ॥ 48 ॥

యో᳚-ఽగ్నిమా॑ధ॒త్తే । ఐ॒న్ద్రా॒గ్న-మేకా॑దశకపాల॒- మను॒ నిర్వ॑పేత్ । ఆ॒ది॒త్య-ఞ్చ॒రుమ్ । ఇ॒న్ద్రా॒గ్నీ వై దే॒వానా॒-మయా॑తయామానౌ । యే ఏ॒వ దే॒వతే॒ అయా॑తయామ్నీ । తాభ్యా॑మే॒వాస్మా॑ ఇన్ద్రి॒యం-వీఀ॒ర్య॑మవ॑- రున్ధే । ఆ॒ది॒త్యో భ॑వతి । ఇ॒యం-వాఀ అది॑తిః । అ॒స్యామే॒వ ప్రతి॑తిష్ఠతి ॥ ధే॒న్వై వా ఏ॒త-ద్రేతః॑ ॥ 49 ॥

యదాజ్య᳚మ్ । అ॒న॒డుహ॑స్తణ్డు॒లాః । మి॒థు॒నమే॒వావ॑-రున్ధే । ఘృ॒తే భ॑వతి । య॒జ్ఞస్యాలూ᳚ఖ్షాన్తత్వాయ ॥ చ॒త్వార॑ ఆర్​షే॒యాః ప్రాశ్ఞ॑న్తి । ది॒శామే॒వ జ్యోతి॑షి జుహోతి ॥ ప॒శవో॒ వా ఏ॒తాని॑ హ॒వీగ్ంషి॑ । ఏ॒ష రు॒ద్రః । యద॒గ్నిః ॥ 50 ॥

యథ్స॒ద్య ఏ॒తాని॑ హ॒వీగ్ంషి॑ ని॒ర్వపే᳚త్ । రు॒ద్రాయ॑ ప॒శూనపి॑ దద్ధ్యాత్ । అ॒ప॒శు-ర్యజ॑మాన-స్స్యాత్ । యన్నాను॑ని॒ర్వపే᳚త్ । అన॑వరుద్ధా అస్య ప॒శవ॑-స్స్యుః । ద్వా॒ద॒శసు॒ రాత్రీ॒ష్వను॒ నిర్వ॑పేత్ । సం॒​వఀ॒థ్స॒ర ప్ర॑తిమా॒ వై ద్వాద॑శ॒ రాత్ర॑యః । సం॒​వఀ॒థ్స॒రేణై॒వాస్మై॑ రు॒ద్రగ్ం శ॑మయి॒త్వా । ప॒శూనవ॑ రున్ధే ॥ యదేక॑-మేకమే॒తాని॑ హ॒వీగ్ంషి॑ ని॒ర్వపే᳚త్ ॥ 51 ॥

యథా॒ త్రీణ్యా॒వప॑నాని పూ॒రయే᳚త్ । తా॒దృక్తత్ । న ప్ర॒జన॑న॒ముచ్ఛిగ్ం॑షేత్ । ఏక॑-న్ని॒రుప్య॑ । ఉత్త॑రే॒ సమ॑స్యేత్ । తృ॒తీయ॑మే॒వాస్మై॑ లో॒కముచ్ఛిగ్ం॑షతి ప్ర॒జన॑నాయ । త-మ్ప్ర॒జయా॑ ప॒శుభి॒రను॒ ప్రజా॑యతే । అథో॑ య॒జ్ఞస్యై॒వైషా-ఽభిక్రా᳚న్తిః ॥ ర॒థ॒చ॒క్ర-మ్ప్రవ॑ర్తయతి । మ॒ను॒ష్య॒ర॒థేనై॒వ దే॑వర॒థ-మ్ప్ర॒త్యవ॑రోహతి ॥ 52 ॥

బ్ర॒హ్మ॒వా॒దినో॑ వదన్తి । హో॒త॒వ్య॑-మగ్నిహో॒త్రాం(3) నహో॑త॒వ్యా(3)మితి॑ । య-ద్యజు॑షా జుహు॒యాత్ । అయ॑థాపూర్వ॒మాహు॑తీ జుహుయాత్ । యన్న జు॑హు॒యాత్ । అ॒గ్నిః పరా॑భవేత్ । తూ॒ష్ణీమే॒వ హో॑త॒వ్య᳚మ్ । య॒థా॒పూ॒ర్వ-మాహు॑తీ జు॒హోతి॑ । నాగ్నిః పరా॑భవతి ॥ అ॒గ్నీధే॑ దదాతి ॥ 53 ॥

అ॒గ్నిము॑ఖా-నే॒వర్తూ-న్ప్రీ॑ణాతి । ఉ॒ప॒బర్​హ॑ణ-న్దదాతి । రూ॒పాణా॒మవ॑-రుద్ధ్యై । అశ్వ॑-మ్బ్ర॒హ్మణే᳚ । ఇ॒న్ద్రి॒యమే॒వావ॑-రున్ధే । ధే॒నుగ్ం హోత్రే᳚ । ఆ॒శిష॑ ఏ॒వావ॑రున్ధే । అ॒న॒డ్వాహ॑-మద్ధ్వ॒ర్యవే᳚ । వహ్ని॒ర్వా అ॑న॒డ్వాన్ । వహ్ని॑రద్ధ్వ॒ర్యుః ॥ 54 ॥

వహ్ని॑నై॒వ వహ్ని॑ య॒జ్ఞస్యావ॑-రున్ధే । మి॒థు॒నౌ గావౌ॑ దదాతి । మి॒థు॒నస్యావ॑-రుద్ధ్యై । వాసో॑ దదాతి । స॒ర్వ॒ దే॒వ॒త్యం॑-వైఀ వాసః॑ । సర్వా॑ ఏ॒వ దే॒వతాః᳚ ప్రీణాతి । ఆ ద్వా॑ద॒శభ్యో॑ దదాతి । ద్వాద॑శ॒ మాసా᳚-స్సం​వఀథ్స॒రః । సం॒​వఀ॒థ్స॒ర ఏ॒వ ప్రతి॑ తిష్ఠతి । కామ॑మూ॒ర్ధ్వ-న్దేయ᳚మ్ । అప॑రిమిత॒స్యావ॑-రుద్ధ్యై ॥ 55 ॥
(ఆ॒ది॒త్యే తృతీ॑య - మ॒ఫ్స్వాసీ॒-త్త-త్తేనావా॑రున్ధత॒ - స్యా - దా᳚ప్యతే॒ - రేతో॒ - ఽగ్ని - రేక॑మేక మే॒తాని॑ హ॒విగ్ంషి॑ ని॒ర్వపే᳚త్ - ప్ర॒త్యవ॑రోహతి - దదాత్య - ద్ధ్వ॒ర్యు--ర్ దేయ॒ మేక॑-ఞ్చ) (అ. 6)

అనువాకం 7 - ఆధానమన్త్రాః
ఘ॒ర్మ-శ్శిర॒స్తద॒యమ॒గ్నిః । స-మ్ప్రి॑యః ప॒శుభి॑-ర్భువత్ । ఛ॒ర్దిస్తో॒కాయ॒ తన॑యాయ యచ్ఛ ॥ వాతః॑ ప్రా॒ణస్తద॒యమ॒గ్నిః । స-మ్ప్రి॑యః ప॒శుభి॑-ర్భువత్ । స్వ॒ది॒త-న్తో॒కాయ॒ తన॑యాయ పి॒తు-మ్ప॑చ ॥ ప్రాచీ॒మను॑ ప్ర॒దిశ॒-మ్ప్రేహి॑ వి॒ద్వాన్ । అ॒గ్నేర॑గ్నే పు॒రో అ॑గ్ని-ర్భవే॒హ । విశ్వా॒ ఆశా॒ దీద్యా॑నో॒ విభా॑హి । ఊర్జ॑-న్నో ధేహి ద్వి॒పదే॒ చతు॑ష్పదే ॥ 56 ॥

అ॒ర్కశ్చఖ్షు॒-స్తద॒సౌ సూర్య॒స్తద॒యమ॒గ్నిః । సమ్ప్రి॑యః ప॒శుభి॑-ర్భువత్ । య-త్తే॑ శుక్ర శు॒క్రం-వఀర్చ॑-శ్శు॒క్రా త॒నూః । శు॒క్ర-ఞ్జ్యోతి॒రజ॑స్రమ్ । తేన॑ మే దీదిహి॒ తేన॒ త్వా-ఽఽద॑ధే । అ॒గ్నినా᳚-ఽగ్నే॒ బ్రహ్మ॑ణా ॥ ఆ॒న॒శే వ్యా॑నశే॒ సర్వ॒మాయు॒-ర్వ్యా॑నశే ॥ యే తే॑ అగ్నే శి॒వే త॒నువౌ᳚ । వి॒రాట్ చ॑ స్వ॒రాట్ చ॑ । తే మా వి॑శతా॒-న్తే మా॑ జిన్వతామ్ ॥ 57 ॥

యే తే॑ అగ్నే శి॒వే త॒నువౌ᳚ । స॒మ్రాట్ చా॑భి॒భూశ్చ॑ । తే మా వి॑శతా॒-న్తే మా॑ జిన్వతామ్ । యే తే॑ అగ్నే శి॒వే త॒నువౌ᳚ । వి॒భూశ్చ॑ పరి॒భూశ్చ॑ । తే మా వి॑శతా॒-న్తే మా॑ జిన్వతామ్ । యే తే॑ అగ్నే శి॒వే త॒నువౌ᳚ । ప్ర॒భ్వీ చ॒ ప్రభూ॑తిశ్చ । తే మా వి॑శతా॒-న్తే మా॑ జిన్వతామ్ । యాస్తే॑ అగ్నే శి॒వాస్త॒నువః॑ । తాభి॒స్త్వా ఽఽద॑ధే ॥ యాస్తే॑ అగ్నే ఘో॒రాస్త॒నువః॑ । తాభి॑ర॒ము-ఙ్గ॑చ్ఛ ॥ 58 ॥
(చతు॑ష్పదే - జిన్వతాం - త॒నువ॒ స్త్రీణి॑ చ ) (అ. 7)

అనువాకం 8 - ఏతద్బ్రాహ్మణం
ఇ॒మే వా ఏ॒తే లో॒కా అ॒గ్నయః॑ । తే యదవ్యా॑వృత్తా ఆధీ॒యేరన్న్॑ । శో॒చయే॑యు॒-ర్యజ॑మానమ్ । ఘ॒ర్మ-శ్శిర॒ ఇతి॒ గార్​హ॑పత్య॒-మాద॑ధాతి । వాతః॑ ప్రా॒ణ ఇత్య॑న్వాహార్య॒-పచ॑నమ్ । అ॒ర్క-శ్చఖ్షు॒రిత్యా॑-హవ॒నీయ᳚మ్ । తేనై॒వైనా॒న్ వ్యావ॑ర్తయతి । తథా॒ న శో॑చయన్తి॒ యజ॑మానమ్ ॥ ర॒థ॒న్త॒ర-మ॒భిగా॑యతే॒ గార్​హ॑పత్య ఆధీ॒యమా॑నే । రాథ॑న్తరో॒ వా అ॒యం-లోఀ॒కః ॥ 59 ॥

అ॒స్మిన్నే॒వైనం॑-లోఀ॒కే ప్రతి॑ష్ఠిత॒-మాధ॑త్తే । వా॒మ॒దే॒వ్య-మ॒భిగా॑యత ఉద్ధ్రి॒యమా॑ణే । అ॒న్తరి॑ఖ్షం॒-వైఀ వా॑మదే॒వ్యమ్ । అ॒న్తరి॑ఖ్ష ఏ॒వైన॒-మ్ప్రతి॑ష్ఠిత॒-మాధ॑త్తే । అథో॒ శాన్తి॒-ర్వై వా॑మదే॒వ్యమ్ । శా॒న్తమే॒వైన॑-మ్పశ॒వ్య॑ముద్ధ॑రతే । బృ॒హద॒భిగా॑యత ఆహవ॒నీయ॑ ఆధీ॒యమా॑నే । బార్​హ॑తో॒ వా అ॒సౌ లో॒కః । అ॒ముష్మి॑న్నే॒వైనం॑-లోఀ॒కే ప్రతి॑ష్ఠిత॒-మాధ॑త్తే ॥ ప్ర॒జాప॑తి-ర॒గ్ని-మ॑సృజత ॥ 60 ॥

సో-ఽశ్వో॒ వారో॑ భూ॒త్వా పరాం॑ఐత్ । తం-వాఀ ॑రవ॒న్తీయే॑నావారయత ।త-ద్వా॑రవ॒న్తీయ॑స్య వారవన్తీయ॒త్వమ్ । శ్యై॒తేన॑ శ్యే॒తీ అ॑కురుత ।తచ్ఛ్యై॒తస్య॑ శ్యైత॒త్వమ్ । య-ద్వా॑రవ॒న్తీయ॑-మభి॒గాయ॑తే । వా॒ర॒యి॒త్వైవైన॒-మ్ప్రతి॑ష్ఠిత॒-మాధ॑త్తే । శ్యై॒తేన॑ శ్యే॒తీ కు॑రుతే ॥ ఘ॒ర్మ-శ్శిర॒ ఇతి॒ గార్​హ॑పత్య॒-మాద॑ధాతి । సశీ॑ర్​షాణ-మే॒వైన॒-మాధ॑త్తే ॥ 61 ॥

ఉపై॑న॒ముత్త॑రో య॒జ్ఞో న॑మతి ॥ రు॒ద్రో వా ఏ॒షః । యద॒గ్నిః । స ఆ॑ధీ॒యమా॑న ఈశ్వ॒రో యజ॑మానస్య ప॒శూన్ హిగ్ంసి॑తోః । స-మ్ప్రి॑యః ప॒శుభి॑-ర్భువ॒దిత్యా॑హ । ప॒శుభి॑రే॒వైన॒గ్ం॒ సమ్ప్రి॑య-ఙ్కరోతి । ప॒శూ॒నా-మహిగ్ం॑సాయై ॥ ఛ॒ర్దిస్తో॒కాయ॒ తన॑యాయ య॒చ్ఛేత్యా॑హ ।ఆ॒శిష॑మే॒వైతా-మాశా᳚స్తే ॥ వాతః॑ ప్రా॒ణ ఇత్య॑న్వాహార్య॒-పచ॑నమ్ ॥ 62 ॥

సప్రా॑ణ-మే॒వైన॒-మాధ॑త్తే ॥ స్వ॒ది॒త-న్తో॒కాయ॒ తన॑యాయ పి॒తు-మ్ప॒చేత్యా॑హ । అన్న॑మే॒వాస్మై᳚ స్వదయతి ॥ ప్రాచీ॒మను॑ ప్ర॒దిశ॒-మ్ప్రేహి॑ వి॒ద్వానిత్యా॑హ । విభ॑క్తిరే॒వైన॑యో॒స్సా । అథో॒ నానా॑ వీర్యావే॒వైనౌ॑ కురుతే ॥ ఊర్జ॑-న్నో ధేహి ద్వి॒పదే॒ చతు॑ష్పద॒ ఇత్యా॑హ । ఆ॒శిష॑మే॒వైతామాశా᳚స్తే ॥ అ॒ర్క-శ్చఖ్షు॒రిత్యా॑-హవ॒నీయ᳚మ్ । అ॒ర్కో వై దే॒వానా॒మన్న᳚మ్ ॥ 63 ॥

అన్న॑మే॒వావ॑ రున్ధే ॥ తేన॑ మే దీది॒హీత్యా॑హ । సమి॑న్ధ ఏ॒వైన᳚మ్ ॥ ఆ॒న॒శే వ్యా॑నశ॒ ఇతి॒ త్రిరుది॑ఙ్గయతి । త్రయ॑ ఇ॒మే లో॒కాః । ఏ॒ష్వే॑వైనం॑-లోఀ॒కేషు॒ ప్రతి॑ష్ఠిత॒-మాధ॑త్తే ॥ తత్-తథా॒ న కా॒ర్య᳚మ్ । వీఙ్గి॑త॒మ ప్ర॑తిష్ఠిత॒-మాద॑ధీత । ఉ॒ద్ధృత్యై॒-వాధాయా॑-భి॒మన్త్రియః॑ । అవీ᳚ఙ్గిత-మే॒వైన॒-మ్ప్రతి॑ష్ఠిత॒-మాధ॑త్తే ॥ వి॒రాట్ చ॑ స్వ॒రాట్ చ॒ యాస్తే॑ అగ్నే శి॒వాస్త॒నువ॒-స్తాభి॒స్త్వా ఽఽద॑ధ॒ ఇత్యా॑హ । ఏ॒తా వా అ॒గ్నే-శ్శి॒వాస్త॒నువః॑ । తాభి॑రే॒వైన॒గ్ం॒ సమ॑ర్ధయతి ॥ యాస్తే॑ అగ్నే ఘో॒రాస్త॒నువ॒ స్తాభి॑ర॒ము-ఙ్గ॒చ్ఛేతి॑ బ్రూయా॒ద్య-న్ద్వి॒ష్యాత్ । తాభి॑రే॒వైన॒-మ్పరా॑భావయతి ॥ 64 ॥
(లో॒కో॑ - ఽసృజతైన॒ - మాధ॑త్తే - ఽన్వాహార్య॒పచ॑నం - దే॒వానా॒మన్న॑ - మేన॒-మ్ప్రతి॑ష్ఠిత॒మాధ॑త్తే॒ పఞ్చ॑ చ) (అ. 8)

అనువాకం 9 - బ్రహ్మౌదనం
శ॒మీ॒గ॒ర్భాద॒గ్ని-మ్మ॑న్థతి । ఏ॒షా వా అ॒గ్నే-ర్య॒జ్ఞియా॑ త॒నూః । తామే॒వాస్మై॑ జనయతి ॥ అది॑తిః పు॒త్రకా॑మా । సా॒ద్ధ్యేభ్యో॑ దే॒వేభ్యో᳚ బ్రహ్మౌద॒న-మ॑పచత్ । తస్యా॑ ఉ॒చ్ఛేష॑ణ-మదదుః । త-త్ప్రాశ్ఞా᳚త్ । సా రేతో॑-ఽధత్త । తస్యై॑ ధా॒తా చా᳚ర్య॒మా చా॑జాయేతామ్ । సా ద్వి॒తీయ॑-మపచత్ ॥ 65 ॥

తస్యా॑ ఉ॒చ్ఛేష॑ణ-మదదుః । త-త్ప్రాశ్ఞా᳚త్ । సా రేతో॑-ఽధత్త । తస్యై॑ మి॒త్రశ్చ॒ వరు॑ణశ్చాజాయేతామ్ । సా తృ॒తీయ॑-మపచత్ । తస్యా॑ ఉ॒చ్ఛేష॑ణ-మదదుః । త-త్ప్రాశ్ఞా᳚త్ । సా రేతో॑-ఽధత్త । తస్యా॒ అగ్ంశ॑శ్చ॒ భగ॑శ్చాజాయేతామ్ । సా చ॑తు॒ర్థ-మ॑పచత్ ॥ 66 ॥

తస్యా॑ ఉ॒చ్ఛేష॑ణ-మదదుః । త-త్ప్రాశ్ఞా᳚త్ । సా రేతో॑-ఽధత్త । తస్యా॒ ఇన్ద్ర॑శ్చ॒ వివ॑స్వాగ్​శ్చా-జాయేతామ్ । బ్ర॒హ్మౌ॒ద॒న-మ్ప॑చతి । రేత॑ ఏ॒వ త-ద్ద॑ధాతి ॥ ప్రాశ్ఞ॑న్తి బ్రాహ్మ॒ణా ఓ॑ద॒నమ్ ॥ యదాజ్య॑-ము॒చ్ఛిష్య॑తే । తేన॑ స॒మిధో॒-ఽభ్యజ్యాద॑ధాతి । ఉ॒చ్ఛేష॑ణా॒ద్వా అది॑తీ॒ రేతో॑-ఽధత్త ॥ 67 ॥

ఉ॒చ్ఛేష॑ణాదే॒వ త-ద్రేతో॑ ధత్తే ॥ అస్థి॒ వా ఏ॒తత్ । య-థ్స॒మిధః॑ । ఏ॒త-ద్రేతః॑ । యదాజ్య᳚మ్ । యదాజ్యే॑న స॒మిధో॒-ఽభ్యజ్యా॒దధా॑తి । అస్థ్యే॒వ త-ద్రేత॑సి దధాతి ॥ తి॒స్ర ఆద॑ధాతి మిథున॒త్వాయ॑ ॥ ఇయ॑తీ-ర్భవన్తి । ప్ర॒జాప॑తినా యజ్ఞము॒ఖేన॒ సమ్మి॑తాః ॥ 68 ॥

ఇయ॑తీ-ర్భవన్తి । య॒జ్ఞ॒ప॒రుషా॒ సమ్మి॑తాః । ఇయ॑తీ-ర్భవన్తి । ఏ॒తావ॒ద్వై పురు॑షే వీ॒ర్య᳚మ్ । వీ॒ర్య॑ సమ్మితాః ॥ ఆ॒ర్ద్రా భ॑వన్తి । ఆ॒ర్ద్రమి॑వ॒ హి రేత॑-స్సి॒చ్యతే᳚ ॥ చిత్రి॑యస్యాశ్వ॒త్థస్యాద॑ధాతి । చి॒త్రమే॒వ భ॑వతి ॥ ఘృ॒తవ॑తీభి॒-రాద॑ధాతి ॥ 69 ॥

ఏ॒తద్వా అ॒గ్నేః ప్రి॒య-న్ధామ॑ । య-ద్ఘృ॒తమ్ । ప్రి॒యేణై॒వైన॒-న్ధామ్నా॒ సమ॑ర్ధయతి । అథో॒ తేజ॑సా ॥ గా॒య॒త్రీభి॑-ర్బ్రాహ్మ॒ణస్యాద॑ద్ధ్యాత్ । గా॒య॒త్రఛ॑న్దా॒ వై బ్రా᳚హ్మ॒ణః । స్వస్య॒ ఛన్ద॑సః ప్రత్యయన॒స్త్వాయ॑ । త్రి॒ష్టుగ్భీ॑-రాజ॒న్య॑స్య । త్రి॒ష్టు-ప్ఛ॑న్దా॒ వై రా॑జ॒న్యః॑ । స్వస్య॒ ఛన్ద॑సః ప్రత్యయన॒స్త్వాయ॑ ॥ 70 ॥

జగ॑తీభి॒-ర్వైశ్య॑స్య । జగ॑తీ ఛన్దా॒ వై వైశ్యః॑ । స్వస్య॒ ఛన్ద॑సః ప్రత్యయన॒స్త్వాయ॑ ॥ తగ్ం సం॑​వఀథ్స॒ర-ఙ్గో॑పాయేత్ । సం॒​వఀ॒థ్స॒రగ్ం హి రేతో॑ హి॒తం-వఀర్ధ॑తే ॥ య-ద్యే॑నగ్ం సం​వఀథ్స॒రే నోప॒నమే᳚త్ । స॒మిధః॒ పున॒రాద॑ద్ధ్యాత్ । రేత॑ ఏ॒వ తద్ధి॒తం-వఀర్ధ॑మానమేతి ॥ న మా॒గ్ం॒స-మ॑శ్ఞీయాత్ । న స్త్రియ॒ముపే॑యాత్ ॥ 71 ॥

య-న్మా॒గ్ం॒స-మ॑శ్ఞీ॒యాత్ । యథ్స్త్రియ॑-ముపే॒యాత్ । నిర్వీ᳚ర్య-స్స్యాత్ । నైన॑మ॒గ్ని-రుప॑నమేత్ ॥ శ్వ ఆ॑ధా॒స్యమా॑నో బ్రహ్మౌద॒న-మ్ప॑చతి । ఆ॒ది॒త్యా వా ఇ॒త ఉ॑త్త॒మా-స్సు॑వ॒ర్గం-లోఀ॒కమా॑యన్న్ । తే వా ఇ॒తో యన్త॒-మ్ప్రతి॑నుదన్తే । ఏ॒తే ఖలు॒ వావాది॒త్యాః । య-ద్బ్రా᳚హ్మ॒ణాః । తైరే॒వ స॒త్వ-ఙ్గ॑చ్ఛతి ॥ 72 ॥

నైన॒-మ్ప్రతి॑నుదన్తే ॥ బ్ర॒హ్మ॒వా॒దినో॑ వదన్తి । క్వా॑ సః । అ॒గ్నిః కా॒ర్యః॑ । యో᳚-ఽస్మై ప్ర॒జా-మ్ప॒శూ-న్ప్ర॑జ॒నయ॒తీతి॑ । శల్కై॒స్తాగ్ం రాత్రి॑మ॒గ్ని-మి॑న్ధీత । తస్మి॑-న్నుపవ్యు॒షమ॒రణీ॒ నిష్ట॑పేత్ । యథ॑ర్​ష॒భాయ॑ వాశి॒తా న్యా॑విచ్ఛా॒యతి॑ । తా॒దృగే॒వ తత్ ॥ అ॒పో॒దూహ్య॒ భస్మా॒గ్ని-మ్మ॑న్థతి ॥ 73 ॥

సైవ సా-ఽగ్నే-స్సన్త॑తిః ॥ త-మ్మ॑థి॒త్వా ప్రాఞ్చ॒ముద్ధ॑రతి । సం॒​వఀ॒థ్స॒రమే॒వ త-ద్రేతో॑ హి॒త-మ్ప్రజ॑నయతి ॥ అనా॑హిత॒-స్తస్యా॒గ్ని-రిత్యా॑హుః । య-స్స॒మిధో-ఽనా॑ధాయా॒గ్ని-మా॑ధ॒త్త ఇతి॑ । తా-స్సం॑​వఀథ్స॒రే పు॒రస్తా॒-దాద॑ద్ధ్యాత్ । సం॒​వఀ॒థ్స॒రాదే॒వైన॑-మవ॒రుద్ధ్యా-ధ॑త్తే ॥ యది॑ సం​వఀథ్స॒రే ఽనాద॒ద్ధ్యాత్ । ద్వా॒ద॒శ్యా᳚-మ్పు॒రస్తా॒-దాద॑ద్ధ్యాత్ । సం॒​వఀ॒థ్స॒ర ప్ర॑తిమా॒ వై ద్వాద॑శ॒ రాత్ర॑యః । సం॒​వఀ॒థ్స॒రమే॒వాస్యాహి॑తా భవన్తి ॥ యది॑ ద్వాద॒శ్యా᳚-న్నాద॒ద్ధ్యాత్ । త్ర్య॒హే పు॒రస్తా॒దాద॑ద్ధ్యాత్ । ఆహి॑తా ఏ॒వాస్య॑ భవన్తి ॥ 74 ॥
(ద్వి॒తీయ॑మపచచ్ - చతు॒ర్థమ॑పచ॒ - దది॑తీ॒ రేతో॑-ఽధత్త॒ - సమ్మి॑తా -
ఘృ॒తవ॑తీభి॒రాద॑ధాతి - రాజ॒న్య॑-స్స్వస్య॒ ఛన్ద॑సః ప్రత్యయన॒స్త్వా - యే॑యా-ద్- గచ్ఛతి - మన్థతి॒ - రాత్ర॑య శ్చ॒త్వారి॑ చ) (అ. 9)

అనువాకం 10 - పఞ్చాగ్న్యాధానం
ప్ర॒జాప॑తిః ప్ర॒జా అ॑సృజత । స రి॑రిచా॒నో॑-ఽమన్యత । స తపో॑-ఽతప్యత । స ఆ॒త్మన్ వీ॒ర్య॑-మపశ్యత్ । తద॑వర్ధత । తద॑స్మా॒-థ్సహ॑సో॒ర్ధ్వ-మ॑సృజ్యత । సా వి॒రాడ॑భవత్ । తా-న్దే॑వాసు॒రా వ్య॑గృహ్ణత । సో᳚-ఽబ్రవీ-త్ప్ర॒జాప॑తిః । మమ॒ వా ఏ॒షా ॥ 75 ॥

దోహా॑ ఏ॒వ యు॒ష్మాక॒మితి॑ ॥ సా తతః॒ ప్రాచ్యుద॑క్రామత్ । త-త్ప్ర॒జాప॑తిః॒ పర్య॑గృహ్ణాత్ । అథ॑ర్వ పి॒తు-మ్మే॑ గోపా॒యేతి॑ । సా ద్వి॒తీయ॒-ముద॑క్రామత్ । త-త్ప్ర॒జాప॑తిః॒ పర్య॑గృహ్ణాత్ । నర్య॑ ప్ర॒జా-మ్మే॑ గోపా॒యేతి॑ । సా తృ॒తీయ॒-ముద॑క్రామత్ । త-త్ప్ర॒జాప॑తిః॒ పర్య॑గృహ్ణాత్ । శగ్గ్​స్య॑ ప॒శూ-న్మే॑ గోపా॒యేతి॑ ॥ 76 ॥

సా చ॑తు॒ర్థ-ముద॑క్రామత్ । త-త్ప్ర॒జాప॑తిః॒ పర్య॑గృహ్ణాత్ । సప్ర॑థ స॒భా-మ్మే॑ గోపా॒యేతి॑ । సా ప॑ఞ్చ॒మ-ముద॑క్రామత్ । త-త్ప్ర॒జాప॑తిః॒ పర్య॑గృహ్ణాత్ । అహే॑ బుద్ధ్నియ॒ మన్త్ర॑-మ్మే గోపా॒యేతి॑ । అ॒గ్నీన్ వావ సా తాన్ వ్య॑క్రమత । తా-న్ప్ర॒జాప॑తిః॒ పర్య॑గృహ్ణాత్ । అథో॑ ప॒ఙ్క్తిమే॒వ ॥ ప॒ఙ్క్తిర్వా ఏ॒షా బ్రా᳚హ్మ॒ణే ప్రవి॑ష్టా ॥ 77 ॥

తామా॒త్మనో-ఽధి॒ నిర్మి॑మీతే । యద॒గ్ని-రా॑ధీ॒యతే᳚ । తస్మా॑-దే॒తావ॑న్తో॒-ఽగ్నయ॒ ఆధీ॑యన్తే । పాఙ్క్తం॒-వాఀ ఇ॒దగ్ం సర్వ᳚మ్ । పాఙ్క్తే॑నై॒వ పాఙ్క్తగ్గ్॑ స్పృణోతి ॥ అథ॑ర్వ పి॒తు-మ్మే॑ గోపా॒యేత్యా॑హ । అన్న॑మే॒వై తేన॑ స్పృణోతి । నర్య॑ ప్ర॒జా-మ్మే॑ గోపా॒యేత్యా॑హ । ప్ర॒జామే॒వైతేన॑ స్పృణోతి । శగ్గ్​స్య॑ ప॒శూ-న్మే॑ గోపా॒యేత్యా॑హ ॥ 78 ॥

ప॒శూనే॒వైతేన॑ స్పృణోతి । సప్ర॑థ స॒భా-మ్మే॑ గోపా॒యేత్యా॑హ । స॒భామే॒వైతేనె᳚న్ద్రి॒యగ్గ్​ స్పృ॑ణోతి । అహే॑ బుద్ధ్నియ॒ మన్త్ర॑-మ్మే గోపా॒యేత్యా॑హ । మన్త్ర॑మే॒వై తేన॒ శ్రియగ్గ్॑ స్పృణోతి ॥ యద॑న్వాహార్య॒-పచ॑నే-ఽన్వాహా॒ర్య॑-మ్పచ॑న్తి । తేన॒ సో᳚-ఽస్యా॒భీష్టః॑ ప్రీ॒తః । య-ద్గార్​హ॑పత్య॒ ఆజ్య॑మధి॒శ్రయ॑న్తి॒ సమ్పత్నీ᳚ర్యా॒జయ॑న్తి । తేన॒ సో᳚-ఽస్యా॒భీష్టః॑ ప్రీ॒తః । యదా॑హవ॒నీయే॒ జుహ్వ॑తి ॥ 79 ॥

తేన॒ సో᳚-ఽస్యా॒భీష్టః॑ ప్రీ॒తః । యథ్స॒భాయాం᳚-విఀ॒జయ॑న్తే । తేన॒ సో᳚-ఽస్యా॒భీష్టః॑ ప్రీ॒తః । యదా॑వస॒థే-ఽన్న॒గ్ం॒ హర॑న్తి । తేన॒ సో᳚-ఽస్యా॒భీష్టః॑ ప్రీ॒తః । తథా᳚-ఽస్య॒ సర్వే᳚ ప్రీ॒తా అ॒భీష్టా॒ ఆధీ॑యన్తే ॥ ప్ర॒వ॒స॒థ-మే॒ష్యన్నే॒వ-ముప॑తిష్ఠే॒-తైక॑మేకమ్ । యథా᳚ బ్రాహ్మ॒ణాయ॑ గృహేవా॒సినే॑ పరి॒దాయ॑ గృ॒హానేతి॑ । తా॒దృగే॒వ తత్ ॥ పున॑రా॒గ-త్యోప॑తిష్ఠతే । సా భా॑గేయమే॒వైషా॒-న్తత్ । సా తత॑ ఊ॒ర్ధ్వా-ఽఽరో॑హత్ । సా రో॑హి॒ణ్య॑భవత్ । త-ద్రో॑హి॒ణ్యై రో॑హిణి॒త్వమ్ । రో॒హి॒ణ్యా-మ॒గ్ని-మాద॑ధీత । స్వ ఏ॒వైనం॒-యోఀనౌ॒ ప్రతి॑ష్ఠిత॒-మాధ॑త్తే । ఋ॒ద్ధ్నోత్యే॑నేన ॥ 80 ॥
(ఏ॒షా - ప॒శూన్మే॑ గోపా॒యేతి॒ - ప్రవి॑ష్టా -
ప॒శూన్మే॑ గోపా॒యేత్యా॑హ॒ - జుహ్వ॑తి - తిష్ఠతే స॒ప్త చ॑) (అ. 10)

(బ్రహ్మ॒ సన్ధ॑త్తం॒ - కృత్తి॑కా॒ - సూద్ధ॑న్తి - ద్వాద॒శసు॑ - ప్ర॒జాప॑తి-ర్వా॒చో - దే॑వాసు॒రాస్తద॒గ్నిర్నో-ద్- ఘ॒ర్మ-శ్శిర॑ - ఇ॒మే వై - శ॑మీగ॒ర్భాత్ - ప్ర॒జాప॑తి॒-స్స రి॑రిచా॒న-స్సతప॒-స్స ఆ॒త్మన్ వీ॒ర్య॑-న్దశ॑ )

(బ్రహ్మ॒ సన్ధ॑త్తం॒ - తౌ ది॒వ్యా - వథో॑ శ॒త్వాం​యఀ॒ - ప్రాచ్యే॑షాం॒ - ఀయదు॒పర్యు॑పరి॒ - య-థ్స॒ద్యః - సో-ఽశ్వో॒ వారో॑ భూ॒త్వా - జగ॑తీభి॒ రశీ॑తిః)

(బ్రహ్మ॒ సన్ధ॑త్త - మృ॒ద్ధ్నోత్యే॑నేన)

॥ హరిః॑ ఓమ్ ॥

॥ కృష్ణ యజుర్వేదీయ తైత్తిరీయ బ్రాహ్మణే ప్రథమాష్టకే ప్రథమః ప్రపాఠక-స్సమాప్తః ॥