কৃষ্ণ যজুর্বেদীয় তৈত্তিরীয় ব্রাহ্মণে তৃতীয়াষ্টকে প্রথমঃ প্রপাঠকঃ - নক্ষত্রেষ্টীনাং-য়াঁজ্য়া-ঽনুবাক্য়া ব্রাহ্মণানি
ও-ন্নমঃ পরমাত্মনে, শ্রী মহাগণপতয়ে নমঃ,
শ্রী গুরুভ্য়ো নমঃ । হ॒রিঃ॒ ওম্ ॥
অনুবাকং 1 - দেবনক্ষত্রাণাং-য়াঁজ্য়ানুবাক্য়াঃ
অ॒গ্নির্নঃ॑ পাতু॒ কৃত্তি॑কাঃ । নক্ষ॑ত্র-ন্দে॒বমি॑ন্দ্রি॒যম্ । ই॒দমা॑সাং-বিঁচক্ষ॒ণম্ । হ॒বিরা॒স-ঞ্জু॑হোতন ॥ যস্য়॒ ভান্তি॑ র॒শ্ময়ো॒ যস্য়॑ কে॒তবঃ॑ । যস্য়ে॒মা বিশ্বা॒ ভুব॑নানি॒ সর্বা᳚ ।
স কৃত্তি॑কাভির॒ভি সং॒বঁসা॑নঃ । অ॒গ্নির্নো॑ দে॒ব-স্সু॑বি॒তে দ॑ধাতু ॥ প্র॒জাপ॑তে রোহি॒ণী বে॑তু॒ পত্নী᳚ ।
বি॒শ্বরূ॑পা বৃহ॒তী চি॒ত্রভা॑নুঃ ॥ 1 ॥
সা নো॑ য॒জ্ঞস্য়॑ সুবি॒তে দ॑ধাতু । যথা॒ জীবে॑ম শ॒রদ॒-স্সবী॑রাঃ ॥ রো॒হি॒ণী দে॒ব্য়ুদ॑গা-ত্পু॒রস্তা᳚ত্ । বিশ্বা॑ রূ॒পাণি॑ প্রতি॒মোদ॑মানা । প্র॒জাপ॑তিগ্ম্ হ॒বিষা॑ ব॒র্ধয়॑ন্তী । প্রি॒য়া দে॒বানা॒-মুপ॑য়াতু য॒জ্ঞম্ ॥ সোমো॒ রাজা॑ মৃগশী॒র॒.ষেণ॒ আগন্ন্॑ । শি॒ব-ন্নক্ষ॑ত্র-ম্প্রি॒যম॑স্য়॒ ধাম॑ ।
আ॒প্য়ায়॑মানো বহু॒ধা জনে॑ষু ।
রেতঃ॑ প্র॒জাং-য়ঁজ॑মানে দধাতু ॥ 2 ॥
য-ত্তে॒ নক্ষ॑ত্র-ম্মৃগশী॒র॒.ষমস্তি॑ ।
প্রি॒য়গ্ম্ রা॑জ-ন্প্রি॒যত॑ম-ম্প্রি॒য়াণা᳚ম্ ।
তস্মৈ॑ তে সোম হ॒বিষা॑ বিধেম ।
শন্ন॑ এধি দ্বি॒পদে॒ শ-ঞ্চতু॑ষ্পদে ॥
আ॒র্দ্রয়া॑ রু॒দ্রঃ প্রথ॑মান এতি । শ্রেষ্ঠো॑ দে॒বানা॒-ম্পতি॑রঘ্নি॒য়ানা᳚ম্ । নক্ষ॑ত্রমস্য় হ॒বিষা॑ বিধেম । মা নঃ॑ প্র॒জাগ্ম্ রী॑রিষ॒-ন্মোত বী॒রান্ ॥
হে॒তী রু॒দ্রস্য়॒ পরি॑ণো বৃণক্তু । আ॒র্দ্রা নক্ষ॑ত্র-ঞ্জুষতাগ্ম্ হ॒বির্নঃ॑ ॥ 3 ॥
প্র॒মু॒ঞ্চমা॑নৌ দুরি॒তানি॒ বিশ্বা᳚ । অপা॒ঘশগ্ম্॑ স-ন্নুদতা॒মরা॑তিম্ ॥ পুন॑র্নো দে॒ব্যদি॑তি-স্স্পৃণোতু । পুন॑র্বসূ নঃ॒ পুন॒রেতাং᳚-য়ঁ॒জ্ঞম্ ।
পুন॑র্নো দে॒বা অ॒ভিয়॑ন্তু॒ সর্বে᳚ । পুনঃ॑ পুনর্বো হ॒বিষা॑ যজামঃ ॥ এ॒বা ন দে॒ব্যদি॑তিরন॒র্বা । বিশ্ব॑স্য় ভ॒র্ত্রী জগ॑তঃ প্রতি॒ষ্ঠা । পুন॑র্বসূ হ॒বিষা॑ ব॒র্ধয়॑ন্তী । প্রি॒য়-ন্দে॒বানা॒-মপ্য়ে॑তু॒ পাথঃ॑ ॥ 4 ॥
বৃহ॒স্পতিঃ॑ প্রথ॒ম-ঞ্জায়॑মানঃ । তি॒ষ্য়॑-ন্নক্ষ॑ত্রম॒ভি সম্ব॑ভূব । শ্রেষ্ঠো॑ দে॒বানা॒-ম্পৃত॑নাসু জি॒ষ্ণুঃ । দিশো-ঽনু॒ সর্বা॒ অভ॑যন্নো অস্তু ॥
তি॒ষ্য়ঃ॑ পু॒রস্তা॑দু॒ত ম॑দ্ধ্য়॒তো নঃ॑ । বৃহ॒স্পতি॑ র্নঃ॒ পরি॑পাতু প॒শ্চাত্ । বাধে॑তা॒-ন্দ্বেষো॒ অভ॑য়-ঙ্কৃণুতাম্ । সু॒বীর্য়॑স্য়॒ পত॑য়-স্স্য়াম ॥
ই॒দগ্ম্ স॒র্পেভ্য়ো॑ হ॒বির॑স্তু॒ জুষ্ট᳚ম্ ।
আ॒শ্রে॒ষা যেষা॑-মনু॒যন্তি॒ চেতঃ॑ ॥ 5 ॥
যে অ॒ন্তরি॑ক্ষ-ম্পৃথি॒বী-ঙ্ক্ষি॒যন্তি॑ । তেন॑-স্স॒র্পাসো॒ হব॒মাগ॑মিষ্ঠাঃ ॥ যে রো॑চ॒নে সূর্য়॒স্য়াপি॑
স॒র্পাঃ । যে দিব॑-ন্দে॒বীমনু॑ স॒ঞ্চর॑ন্তি ।
যেষা॑মাশ্রে॒ষা অ॑নু॒যন্তি॒ কাম᳚ম্ ।
তেভ্য়॑-স্স॒র্পেভ্য়ো॒ মধু॑মজ্জুহোমি ॥
উপ॑হূতাঃ পি॒তরো॒ যে ম॒ঘাসু॑ । মনো॑জবস-স্সু॒কৃত॑-স্সুকৃ॒ত্য়াঃ । তে নো॒ নক্ষ॑ত্রে॒ হব॒মাগ॑মিষ্ঠাঃ । স্ব॒ধাভি॑ র্য়॒জ্ঞ-ম্প্রয়॑ত-ঞ্জুষন্তাম্ ॥ 6 ॥
যে অ॑গ্নিদ॒গ্ধা যে-ঽন॑গ্নি-দগ্ধাঃ । যে॑-ঽমুং-লোঁ॒ক-ম্পি॒তরঃ॑, ক্ষি॒যন্তি॑ । যাগ্শ্চ॑ বি॒দ্ময়াগ্ম্ উ॑ চ॒ ন প্র॑বি॒দ্ম । ম॒ঘাসু॑ য॒জ্ঞগ্ম্ সুকৃ॑ত-ঞ্জুষন্তাম্ ॥
গবা॒-ম্পতিঃ॒ ফল্গু॑নীনামসি॒ ত্বম্ । তদ॑র্যমন্ বরুণ মিত্র॒ চারু॑ । ত-ন্ত্বা॑ ব॒য়গ্ম্ স॑নি॒তারগ্ম্॑ সনী॒নাম্ । জী॒বা জীব॑ন্ত॒মুপ॒ সংবিঁ॑শেম ॥
যেনে॒মা বিশ্বা॒ ভুব॑নানি॒ সঞ্জি॑তা ।
যস্য়॑ দে॒বা অ॑নু সং॒য়ঁন্তি॒ চেতঃ॑ ॥ 7 ॥
অ॒র্য়॒মা রাজা॒-ঽজর॒স্তুবি॑ষ্মান্ । ফল্গু॑নীনা-মৃষ॒ভো রো॑রবীতি ॥ শ্রেষ্ঠো॑ দে॒বানা᳚-ম্ভগবো ভগাসি । তত্ত্বা॑ বিদুঃ॒ ফল্গু॑নী॒স্তস্য়॑ বিত্তাত্ । অ॒স্মভ্য়॑-ঙ্ক্ষ॒ত্রম॒জরগ্ম্॑ সু॒বীর্য়᳚ম্ । গোম॒দশ্ব॑-ব॒দুপ॒-সন্নু॑দে॒হ ॥ ভগো॑ হ দা॒তা ভগ॒ ই-ত্প্র॑দা॒তা । ভগো॑ দে॒বীঃ ফল্গু॑নী॒রাবি॑বেশ । ভগ॒স্য়েত্ত-ম্প্র॑স॒ব-ঙ্গ॑মেম । যত্র॑ দে॒বৈ-স্স॑ধ॒মাদ॑-ম্মদেম ॥ 8 ॥
আয়া॑তু দে॒ব-স্স॑বি॒তোপ॑য়াতু । হি॒র॒ণ্যয়ে॑ন সু॒বৃতা॒ রথে॑ন । বহ॒ন্॒. হস্তগ্ম্॑ সু॒ভগং॑-বিঁদ্ম॒নাপ॑সম্ । প্র॒যচ্ছ॑ন্ত॒-ম্পপু॑রি॒-ম্পুণ্য়॒মচ্ছ॑ ॥
হস্তঃ॒ প্রয়॑চ্ছ ত্ব॒মৃতং॒-বঁসী॑য়ঃ ।
দক্ষি॑ণেন॒ প্রতি॑গৃভ্ণীম এনত্ ।
দা॒তার॑ম॒দ্য় স॑বি॒তা বি॑দেয় ।
যো নো॒ হস্তা॑য় প্রসু॒বাতি॑ য॒জ্ঞম্ ॥
ত্বষ্টা॒ নক্ষ॑ত্রম॒ভ্য়ে॑তি চি॒ত্রাম্ ।
সু॒ভগ্ম্ স॑সং-য়ুঁব॒তিগ্ম্ রোচ॑মানাম্ ॥ 9 ॥
নি॒বে॒শয়॑-ন্ন॒মৃতা॒-ন্মর্ত্য়াগ্॑শ্চ ।
রূ॒পাণি॑ পি॒গ্ম্॒শ-ন্ভুব॑নানি॒ বিশ্বা᳚ ॥
তন্ন॒স্ত্বষ্টা॒ তদু॑ চি॒ত্রা বিচ॑ষ্টাম্ ।
তন্নক্ষ॑ত্র-ম্ভূরি॒দা অ॑স্তু॒ মহ্য়᳚ম্ ।
তন্নঃ॑ প্র॒জাং-বীঁ॒রব॑তীগ্ম্ সনোতু ।
গোভি॑র্নো॒ অশ্বৈ॒-স্সম॑নক্তু য॒জ্ঞম্ ॥
বা॒য়ুর্নক্ষ॑ত্র-ম॒ভ্য়ে॑তি॒ নিষ্ট্য়া᳚ম্ ।
তি॒গ্মশৃ॑ঙ্গো বৃষ॒ভো রোরু॑বাণঃ ।
স॒মী॒রয়॒-ন্ভুব॑না মাত॒রিশ্বা᳚ ।
অপ॒ দ্বেষাগ্ম্॑সি নুদতা॒মরা॑তীঃ ॥ 10 ॥
তন্নো॑ বা॒যস্তদু॒ নিষ্ট্য়া॑ শৃণোতু ।
তন্নক্ষ॑ত্র-ম্ভূরি॒দা অ॑স্তু॒ মহ্য়᳚ম্ ।
তন্নো॑ দে॒বাসো॒ অনু॑ জানন্তু॒ কাম᳚ম্ । যথা॒ তরে॑ম দুরি॒তানি॒ বিশ্বা᳚ ॥ দূ॒রম॒স্মচ্ছত্র॑বো যন্তু ভী॒তাঃ । তদি॑ন্দ্রা॒গ্নী কৃ॑ণুতা॒-ন্ত-দ্বিশা॑খে ।
তন্নো॑ দে॒বা অনু॑মদন্তু য॒জ্ঞম্ । প॒শ্চা-ত্পু॒রস্তা॒-দভ॑যন্নো অস্তু ॥ নক্ষ॑ত্রাণা॒-মধি॑পত্নী॒ বিশা॑খে ।
শ্রেষ্ঠা॑বিন্দ্রা॒গ্নী ভুব॑নস্য় গো॒পৌ ॥ 11 ॥
বিষূ॑চ॒-শ্শত্রূ॑-নপ॒বাধ॑মানৌ । অপ॒ ক্ষুধ॑-ন্নুদতা॒মরা॑তিম্ ॥ পূ॒র্ণা প॒শ্চাদু॒ত পূ॒র্ণা পু॒রস্তা᳚ত্ । উন্ম॑দ্ধ্য়॒তঃ পৌ᳚র্ণমা॒সী জি॑গায় ।
তস্য়া᳚-ন্দে॒বা অধি॑ সং॒বঁস॑ন্তঃ ।
উ॒ত্ত॒মে নাক॑ ই॒হ মা॑দযন্তাম্ ॥
পৃ॒থ্বী সু॒বর্চা॑ যুব॒তি-স্স॒জোষাঃ᳚ । পৌ॒র্ণ॒মা॒স্য়ুদ॑গা॒-চ্ছোভ॑মানা ।
আ॒প্য়া॒যয়॑ন্তী দুরি॒তানি॒ বিশ্বা᳚ ।
উ॒রু-ন্দুহাং॒-য়ঁজ॑মানায় য॒জ্ঞম্ ॥ 12 ॥
(চি॒ত্রভা॑নু॒-র্ যজ॑মানে দধাতু - হ॒বির্নঃ॒ - পাথ॒ - শ্চেতো॑ - জুষন্তাং॒ - চেতো॑ - মদেম॒ - রোচ॑মানা॒ - মরা॑তী--র্ গো॒পৌ - য॒জ্ঞং) (অ. 1)
অনুবাকং 2 - যমনক্ষত্রাণাং-য়াঁজ্য়ানুবাক্য়াঃ
ঋ॒দ্ধ্য়াস্ম॑ হ॒ব্য়ৈ-র্নম॑সোপ॒ সদ্য়॑ ।
মি॒ত্র-ন্দে॒ব-ম্মি॑ত্র॒ধেয়॑ন্নো অস্তু । অ॒নূ॒রা॒ধান্. হ॒বিষা॑ ব॒র্ধয়॑ন্তঃ । শ॒ত-ঞ্জী॑বেম শ॒রদ॒-স্সবী॑রাঃ ॥ চি॒ত্র-ন্নক্ষ॑ত্র॒-মুদ॑গা-ত্পু॒রস্তা᳚ত্ । অ॒নূ॒রা॒ধাস॒ ইতি॒ য-দ্বদ॑ন্তি । তন্মি॒ত্র এ॑তি প॒থিভি॑ র্দেব॒য়ানৈঃ᳚ । হি॒র॒ণ্যয়ৈ॒ র্বিত॑তৈ-র॒ন্তরি॑ক্ষে ॥
ইন্দ্রো᳚ জ্য়ে॒ষ্ঠামনু॒ নক্ষ॑ত্রমেতি । যস্মি॑ন্ বৃ॒ত্রং-বৃঁ॑ত্র॒ তূর্য়ে॑ ত॒তার॑ ॥ 13 ॥
তস্মি॑ন্ ব॒যম॒মৃত॒-ন্দুহা॑নাঃ । ক্ষুধ॑-ন্তরেম॒ দুরি॑তি॒-ন্দুরি॑ষ্টিম্ ॥ পু॒র॒ন্দ॒রায়॑ বৃষ॒ভায়॑ ধৃ॒ষ্ণবে᳚ । অষা॑ঢায়॒ সহ॑মানায় মী॒ঢুষে᳚ ।
ইন্দ্রা॑য় জ্য়ে॒ষ্ঠা মধু॑ম॒-দ্দুহা॑না ।
উ॒রু-ঙ্কৃ॑ণোতু॒ যজ॑মানায় লো॒কম্ ॥
মূল॑-ম্প্র॒জাং-বীঁ॒রব॑তীং-বিঁদেয় । পরা᳚চ্য়েতু॒ নির্-ঋ॑তিঃ পরা॒চা । গোভি॒ র্নক্ষ॑ত্র-ম্প॒শুভি॒-স্সম॑ক্তম্ । অহ॑র্ভূয়া॒-দ্যজ॑মানায়॒ মহ্য়᳚ম্ ॥ 14 ॥
অহ॑র্নো অ॒দ্য় সু॑বি॒তে দ॑ধাতু । মূল॒-ন্নক্ষ॑ত্র॒মিতি॒ য-দ্বদ॑ন্তি । পরা॑চীং-বাঁ॒চা নির্-ঋ॑তি-ন্নুদামি ।
শি॒ব-ম্প্র॒জায়ৈ॑ শি॒বম॑স্তু॒ মহ্য়᳚ম্ ॥
যা দি॒ব্য়া আপঃ॒ পয়॑সা স-ম্বভূ॒বুঃ । যা অ॒ন্তরি॑ক্ষ উ॒ত পার্থি॑বী॒র্য়াঃ । যাসা॑মষা॒ঢা অ॑নু॒যন্তি॒
কাম᳚ম্ । তা ন॒ আপ॒-শ্শগ্গ্ স্য়ো॒না ভ॑বন্তু ॥
যাশ্চ॒ কূপ্য়া॒ যাশ্চ॑ না॒দ্য়া᳚-স্সমু॒দ্রিয়াঃ᳚ ।
যাশ্চ॑ বৈশ॒ন্তীরু॒ত প্রা॑স॒চীর্য়াঃ ॥ 15 ॥
যাসা॑মষা॒ঢা মধু॑ ভ॒ক্ষয়॑ন্তি । তা ন॒ আপ॒-শ্শগ্গ্ স্য়ো॒না ভ॑বন্তু ॥ তন্নো॒ বিশ্বে॒ উপ॑ শৃণ্বন্তু দে॒বাঃ । তদ॑ষা॒ঢা অ॒ভি সংয়ঁ॑ন্তু য॒জ্ঞম্ ।
তন্নক্ষ॑ত্র-ম্প্রথতা-ম্প॒শুভ্য়ঃ॑ ।
কৃ॒ষি-র্বৃ॒ষ্টি-র্যজ॑মানায় কল্পতাম্ ॥
শু॒ভ্রাঃ ক॒ন্য়া॑ যুব॒তয়॑-স্সু॒পেশ॑সঃ । ক॒র্ম॒কৃত॑-স্সু॒কৃতো॑ বী॒র্য়া॑বতীঃ ।
বিশ্বা᳚-ন্দে॒বান্. হ॒বিষা॑ ব॒র্ধয়॑ন্তীঃ ।
অ॒ষা॒ঢাঃ কাম॒মুপ॑য়ান্তু য॒জ্ঞম্ ॥ 16 ॥
যস্মি॒-ন্ব্রহ্মা॒-ঽভ্যজ॑য়॒-থ্সর্ব॑মে॒তত্ ।
অ॒মুঞ্চ॑ লো॒ক মি॒দমূ॑চ॒ সর্ব᳚ম্ ।
তন্নো॒ নক্ষ॑ত্রমভি॒জি-দ্বি॒জিত্য়॑ । শ্রিয়॑-ন্দধা॒-ত্বহৃ॑ণীযমানম্ ॥ উ॒ভৌ লো॒কৌ ব্রহ্ম॑ণা॒ সঞ্জি॑তে॒মৌ । তন্নো॒ নক্ষ॑ত্রমভি॒জি-দ্বিচ॑ষ্টাম্ ।
তস্মি॑ন্ ব॒য়-ম্পৃত॑না॒-স্স-ঞ্জ॑য়েম ।
তন্নো॑ দে॒বাসো॒ অনু॑জানন্তু॒ কাম᳚ম্ ॥
শৃ॒ণ্বন্তি॑ শ্রো॒ণা-ম॒মৃত॑স্য় গো॒পাম্ ।
পুণ্য়া॑মস্য়া॒ উপ॑শৃণোমি॒ বাচ᳚ম্ ॥ 17 ॥
ম॒হী-ন্দে॒বীং-বিঁষ্ণু॑পত্নী-মজূ॒র্য়াম্ । প্র॒তীচী॑মেনাগ্ম্ হ॒বিষা॑ যজামঃ ॥
ত্রে॒ধা বিষ্ণু॑-রুরুগা॒য়ো বিচ॑ক্রমে ।
ম॒হী-ন্দিব॑-ম্পৃথি॒বী-ম॒ন্তরি॑ক্ষম্ ।
তচ্ছ্রো॒ণৈতি॒ শ্রব॑ ই॒চ্ছমা॑না ।
পুণ্য়॒গ্গ্॒ শ্লোকং॒-য়ঁজ॑মানায় কৃণ্ব॒তী ॥
অ॒ষ্টৌ দে॒বা বস॑ব-স্সো॒ম্য়াসঃ॑ ।
চত॑স্রো দে॒বী র॒জরা॒-শ্শ্রবি॑ষ্ঠাঃ ।
তে য॒জ্ঞ-ম্পা᳚ন্তু॒ রজ॑সঃ প॒রস্তা᳚ত্ ।
সং॒বঁ॒থ্স॒রীণ॑-ম॒মৃতগ্গ্॑ স্ব॒স্তি ॥ 18 ॥
য॒জ্ঞ-ন্নঃ॑ পান্তু॒ বস॑বঃ পু॒রস্তা᳚ত্ । দ॒ক্ষি॒ণ॒তো॑-ঽভিয়॑ন্তু॒ শ্রবি॑ষ্ঠাঃ । পুণ্য়॒-ন্নক্ষ॑ত্রম॒ভি সংবিঁ॑শাম । মা নো॒ অরা॑তি-র॒ঘশ॒গ্ম্॒সা গন্ন্॑ ॥
ক্ষ॒ত্রস্য়॒ রাজা॒ বরু॑ণো-ঽধিরা॒জঃ । নক্ষ॑ত্রাণাগ্ম্ শ॒তভি॑ষ॒গ্ বসি॑ষ্ঠঃ । তৌ দে॒বেভ্য়ঃ॑ কৃণুতো দী॒র্ঘমায়ুঃ॑ । শ॒তগ্ম্ স॒হস্রা॑ ভেষ॒জানি॑ ধত্তঃ ॥
য॒জ্ঞন্নো॒ রাজা॒ বরু॑ণ॒ উপ॑য়াতু । তন্নো॒ বিশ্বে॑ অ॒ভি সংয়ঁ॑ন্তু দে॒বাঃ ॥ 19 ॥
তন্নো॒ নক্ষ॑ত্রগ্ম্ শ॒তভি॑ষগ্ জুষা॒ণম্ । দী॒র্ঘমায়ুঃ॒ প্রতি॑র-দ্ভেষ॒জানি॑ ॥ অ॒জ এক॑পা॒দুদ॑গা-ত্পু॒রস্তা᳚ত্ । বিশ্বা॑ ভূ॒তানি॑ প্রতি॒মোদ॑মানঃ । তস্য়॑ দে॒বাঃ প্র॑স॒বং-য়ঁ॑ন্তি॒ সর্বে᳚ । প্রো॒ষ্ঠ॒প॒দাসো॑ অ॒মৃত॑স্য় গো॒পাঃ ॥
বি॒ভ্রাজ॑মান-স্সমিধা॒ন উ॒গ্রঃ । আ-ঽন্তরি॑ক্ষ-মরুহ॒দ-গ॒ন্দ্য়াম্ । তগ্ম্ সূর্য়॑-ন্দে॒ব-ম॒জমেক॑পাদম্ । প্রো॒ষ্ঠ॒প॒দাসো॒ অনু॑যন্তি॒ সর্বে᳚ ॥ 20 ॥
অহি॑-র্বু॒দ্ধ্নিয়ঃ॒ প্রথ॑মান এতি । শ্রেষ্ঠো॑ দে॒বানা॑মু॒ত মানু॑ষাণাম্ । ত-ম্ব্রা᳚হ্ম॒ণা-স্সো॑ম॒পা-স্সো॒ম্য়াসঃ॑ ।
প্রো॒ষ্ঠ॒প॒দাসো॑ অ॒ভি র॑ক্ষন্তি॒ সর্বে᳚ ॥
চ॒ত্বার॒ এক॑ম॒ভি কর্ম॑ দে॒বাঃ ।
প্রো॒ষ্ঠ॒প॒দাস॒ ইতি॒ যান্. বদ॑ন্তি ।
তে বু॒দ্ধনিয়॑-ম্পরি॒ষদ্যগ্গ্॑ স্তু॒বন্তঃ॑ ।
অহিগ্ম্॑ রক্ষন্তি॒ নম॑সোপ॒সদ্য়॑ ॥
পূ॒ষা রে॒বত্যন্বে॑তি॒ পন্থা᳚ম্ । পু॒ষ্টি॒পতী॑ পশু॒পা বাজ॑বস্ত্য়ৌ ॥ 21 ॥
ই॒মানি॑ হ॒ব্য়া প্রয়॑তা জুষা॒ণা ।
সু॒গৈর্নো॒ যানৈ॒রুপ॑য়াতাং-য়ঁ॒জ্ঞম্ ॥
ক্ষু॒দ্রা-ন্প॒শূ-ন্র॑ক্ষতু রে॒বতী॑ নঃ ।
গাবো॑ নো॒ অশ্বা॒গ্ম্॒ অন্বে॑তু পূ॒ষা ।
অন্ন॒গ্ম্॒ রক্ষ॑ন্তৌ বহু॒ধা বিরূ॑পম্ ।
বাজগ্ম্॑ সনুতাং॒-য়ঁজ॑মানায় য॒জ্ঞম্ ॥
তদ॒শ্বিনা॑-বশ্ব॒য়ুজোপ॑য়াতাম্ ।
শুভ॒-ঙ্গমি॑ষ্ঠৌ সু॒যমে॑ভি॒রশ্বৈঃ᳚ ।
স্ব-ন্নক্ষ॑ত্রগ্ম্ হ॒বিষা॒ যজ॑ন্তৌ ।
মদ্ধ্বা॒ সম্পৃ॑ক্তৌ॒ যজু॑ষা॒ সম॑ক্তৌ ॥ 22 ॥
যৌ দে॒বানা᳚-ম্ভি॒ষজৌ॑ হব্যবা॒হৌ । বিশ্ব॑স্য় দূ॒তা-ব॒মৃত॑স্য় গো॒পৌ । তৌ নক্ষ॑ত্র-ঞ্জুজুষা॒ণো-প॑য়াতাম্ । নমো॒-ঽশ্বিভ্য়া᳚-ঙ্কৃণুমো-ঽশ্ব॒য়ুগ্ভ্য়া᳚ম্ ॥
অপ॑ পা॒প্মান॒-ম্ভর॑ণীর্ভরন্তু । ত-দ্য়॒মো রাজা॒ ভগ॑বা॒ন্॒. বিচ॑ষ্টাম্ । লো॒কস্য়॒ রাজা॑ মহ॒তো ম॒হান্. হি । সু॒গ-ন্নঃ॒ পন্থা॒মভ॑য়-ঙ্কৃণোতু ॥
যস্মি॒-ন্নক্ষ॑ত্রে য॒ম এতি॒ রাজা᳚ ।
যস্মি॑-ন্নেনম॒ভ্যষি॑চন্ন্ত দে॒বাঃ ।
তদ॑স্য় চি॒ত্রগ্ম্ হ॒বিষা॑ যজাম ।
অপ॑ পা॒প্মান॒-ম্ভর॑ণী-র্ভরন্তু ॥
নি॒বেশ॑নী স॒ঙ্গম॑নী॒ বসূ॑নাং॒-বিঁশ্বা॑ রূ॒পাণি॒ বসূ᳚ন্য়াবে॒শয়॑ন্তী । স॒হ॒স্র॒পো॒ষগ্ম্ সু॒ভগা॒ ররা॑ণা॒ সা ন॒ আগ॒ন্ বর্চ॑সা সংবিঁদা॒না ॥ যত্তে॑ দে॒বা অদ॑ধু-র্ভাগ॒ধেয়॒মমা॑বাস্য়ে সং॒বঁস॑ন্তো মহি॒ত্বা । সানো॑ য॒জ্ঞ-ম্পি॑পৃহি বিশ্ববারে র॒য়ি-ন্নো॑ ধেহি সুভগে সু॒বীর᳚ম্ ॥ ॥ 23 ॥
(ত॒তার॒ - মহ্য়ং॑ - প্রাস॒চীর্য়া - যা᳚ন্তু য॒জ্ঞং - ঁবাচগ্গ্॑ - স্ব॒স্তি - দে॒বা-অনু॑ যন্তি॒ সর্বে॒-বাজ॑বস্ত্য়ৌ॒-সম॑ক্তৌ-দে॒বা স্ত্রীণি॑ চ) (অ. 2)
অনুবাকং 3 - চান্দ্রমসাদীনাং সপ্তনামিষ্টীনাং-য়াঁজ্য়ানুবাক্য়াঃ
নবো॑নবো ভবতি॒ জায়॑মা॒নো-ঽহ্না᳚-ঙ্কে॒তুরু॒ষসা॑ মে॒ত্যগ্রে᳚ । ভা॒গ-ন্দে॒বেভ্য়ো॒ বিদ॑ধাত্য়া॒য়-ন্প্রচ॒ন্দ্রমা᳚স্তিরতি দী॒র্ঘমায়ুঃ॑ ॥ যমা॑দি॒ত্য়া
অ॒গ্ম্॒শুমা᳚প্য়া॒যয়॑ন্তি যমা॑দি॒ত্য়া অ॒গ্ম্॒শুমা᳚প্য়া॒যয়॑ন্তি॒ যমক্ষি॑ত॒-মক্ষি॑তয়ঃ॒ পিব॑ন্তি । তেন॑ নো॒ রাজা॒ বরু॑ণো॒ বৃহ॒স্পতি॒রা প্য়া॑যযন্তু॒ ভুব॑নস্য় গো॒পাঃ ॥॥ যে বিরূ॑পে॒ সম॑নসা সং॒ব্য়ঁয়॑ন্তী । স॒মা॒ন-ন্তন্তু॑-ম্পরি তাত॒নাতে᳚ । বি॒ভূ প্র॒ভূ অ॑নু॒ভূ বি॒শ্বতো॑ হুবে ।
তে নো॒ নক্ষ॑ত্রে॒ হব॒মাগ॑মেতম্ ॥
ব॒য়-ন্দে॒বী ব্রহ্ম॑ণা সংবিঁদা॒নাঃ ।
সু॒রত্না॑সো দে॒ববী॑তি॒-ন্দধা॑নাঃ ।
অ॒হো॒রা॒ত্রে হ॒বিষা॑ ব॒র্ধয়॑ন্তঃ ।
অতি॑ পা॒প্মান॒-মতি॑মুক্ত্য়া গমেম ॥ প্রত্য়ু॑বদৃশ্য়ায়॒তী ॥ 24 ॥
ব্য়ু॒চ্ছন্তী॑ দুহি॒তা দি॒বঃ । অ॒পো ম॒হী বৃ॑ণুতে॒ চক্ষু॑ষা ॥ তমো॒ জ্য়োতি॑ষ্কৃণোতি সূ॒নরী᳚ । উদু॒স্ত্রিয়া᳚-স্সচতে॒ সূর্য়ঃ॑ । স চা॑ উ॒দ্যন্নক্ষ॑ত্র-মর্চি॒মত্ । তবেদু॑ষো॒ ব্য়ুষি॒ সূর্য়॑স্য় চ ॥
স-ম্ভ॒ক্তেন॑ গমেমহি । তন্নো॒ নক্ষ॑ত্র-মর্চি॒মত্ । ভা॒নু॒মত্তেজ॑ উ॒চ্চর॑ত্ । উপ॑ য॒জ্ঞ-মি॒হাগ॑মত্ ॥ 25 ॥
প্র নক্ষ॑ত্রায় দে॒বায়॑ । ইন্দ্রা॒য়েন্দুগ্ম্॑ হবামহে ।
স ন॑-স্সবি॒তা সু॑ব-থ্স॒নিম্ । পু॒ষ্টি॒দাং-বীঁ॒রব॑ত্তমম্ ॥ উদু॒ ত্য়-ঞ্জা॒তবে॑দস-ন্দে॒বং-বঁ॑হন্তি কে॒তবঃ॑ । দৃ॒শে বিশ্বা॑য়॒ সূর্য়᳚ম্ ॥ চি॒ত্র-ন্দে॒বানা॒-মুদ॑গা॒দনী॑ক॒-ঞ্চক্ষু॑-র্মি॒ত্রস্য়॒ বরু॑ণস্য়া॒-ঽগ্নেঃ । আ-ঽ প্রা॒ দ্য়াবা॑পৃথি॒বী অ॒ন্তরি॑ক্ষ॒গ্ম্॒ সূর্য়॑ আ॒ত্মা জগ॑তস্ত॒স্থুষ॑শ্চ ॥॥
অদি॑তির্ন উরুষ্য়॒ত্বদি॑তি॒-শ্শর্ম॑ যচ্ছতু । অদি॑তিঃ পা॒ত্বগ্ম্ হ॑সঃ ॥ ম॒হীমূ॒ষু মা॒তরগ্ম্॑ সুব্র॒তানা॑মৃ॒তস্য়॒ পত্নী॒মব॑সে হুবেম । তু॒বি॒ক্ষ॒ত্রাম॒জর॑ন্তীমুরূ॒চীগ্ম্ সু॒শর্মা॑ণ॒মদি॑তিগ্ম্ সু॒প্রণী॑তিম্ ॥ ॥
ই॒দং-বিঁষ্ণু॒-র্বিচ॑ক্রমে ত্রে॒ধা নি দ॑ধে প॒দম্ । স মূ॑ঢমস্য় পাগ্ম্ সু॒রে ॥ প্রত-দ্বিষ্ণু॑-স্স্তবতে বী॒র্য়া॑য় । মৃ॒গো ন ভী॒মঃ কু॑চ॒রো গি॑রি॒ষ্ঠাঃ । যস্য়ো॒রুষু॑ ত্রি॒ষু বি॒ক্রম॑ণেষু । অধি॑ক্ষি॒যন্তি॒ ভুব॑নানি॒ বিশ্বা᳚ ॥ ॥
অ॒গ্নির্মূ॒র্ধা দি॒বঃ ক॒কু-ত্পতিঃ॑ পৃথি॒ব্য়া অ॒যম্ । অ॒পাগ্ম্ রেতাগ্ম্॑সি জিন্বতি ॥ ভুবো॑ য॒জ্ঞস্য়॒ রজ॑সশ্চ নে॒তা যত্রা॑ নি॒য়ুদ্ভি॒-স্সচ॑সে শি॒বাভিঃ॑ । দি॒বি মূ॒র্ধান॑-ন্দধিষে সুব॒র্॒ষা-ঞ্জি॒হ্বাম॑গ্নে চকৃষে হব্য়॒বাহ᳚ম্ ॥ ॥
অনু॑ নো॒-ঽদ্য়া-ঽনু॑মতি-র্য়॒জ্ঞ-ন্দে॒বেষু॑ মন্যতাম্ । অ॒গ্নিশ্চ॑ হব্য়॒বাহ॑নো॒ ভব॑তা-ন্দা॒শুষে॒ ময়ঃ॑ ॥ অন্বিদ॑নুমতে॒ ত্ব-ম্মন্য়া॑সৈ॒ শঞ্চ॑নঃ কৃধি । ক্রত্বে॒ দক্ষা॑য় নো হিনু॒ প্রণ॒ আয়ূগ্ম্॑ষি তারিষঃ ॥ ॥
হ॒ব্য়॒বাহ॑-মভিমাতি॒ষা-ঽহ᳚ম্ । র॒ক্ষো॒হণ॒-ম্পৃত॑নাসু জি॒ষ্ণুম্ । জ্য়োতি॑ষ্মন্ত॒-ন্দীদ্য়॑ত॒-ম্পুর॑ন্ধিম্ । অ॒গ্নিগ্গ্ স্বি॑ষ্ট॒কৃত॒মা হু॑বেম ॥ স্বি॑ষ্টমগ্নে অ॒ভি ত-ত্পৃ॑ণাহি । বিশ্বা॑ দেব॒ পৃত॑না অ॒ভিষ্য় । উ॒রু-ন্নঃ॒ পন্থা᳚-ম্প্রদি॒শন্বি ভা॑হি । জ্য়োতি॑ষ্মদ্ধেহ্য়॒জর॑-ন্ন॒ আয়ুঃ॑ ॥ ॥ 26 ॥
(আ॒য়॒ত্য়॑ - গম॒থ্ - স্বি॑ষ্টম্) (অ. 3)
অনুবাকং 4 - দেব নক্ষত্রেষ্টিব্রাহ্মণম্
অ॒গ্নির্বা অ॑কামযত । অ॒ন্না॒দো দে॒বানাগ্॑ স্য়া॒মিতি॑ ।
স এ॒তম॒গ্নয়ে॒ কৃত্তি॑কাভ্য়ঃ পুরো॒ডাশ॑-ম॒ষ্টাক॑পাল॒-ন্নির॑বপত্ । ততো॒ বৈ সো᳚-ঽন্না॒দো দে॒বানা॑মভবত্ । অ॒গ্নির্বৈ দে॒বানা॑মন্না॒দঃ ॥
যথা॑ হ॒ বা অ॒গ্নি-র্দে॒বনা॑-মন্না॒দঃ ।
এ॒বগ্ম্ হ॒ বা এ॒ষ ম॑নু॒ষ্য়া॑ণা-ম্ভবতি ।
য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ ॥ সো-ঽত্র॑ জুহোতি । অ॒গ্নয়ে॒ স্বাহা॒ কৃত্তি॑কাভ্য়॒-স্স্বাহা᳚ । অ॒ম্বায়ৈ॒ স্বাহা॑ দু॒লায়ৈ॒ স্বাহা᳚ । নি॒ত॒ত্ন্য়ৈ স্বাহা॒ ঽভ্রয়॑ন্ত্য়ৈ॒ স্বাহা᳚ । মে॒ঘয়॑ন্ত্য়ৈ॒ স্বাহা॑ ব॒র॒.ষয়॑ন্ত্য়ৈ॒ স্বাহা᳚ । চু॒পু॒ণীকা॑য়ৈ॒ স্বাহেতি॑ ॥ 27 ॥
প্র॒জাপ॑তিঃ প্র॒জা অ॑সৃজত । তা অ॑স্মা-থ্সৃ॒ষ্টাঃ পরা॑চীরাযন্ন্ । তাসাগ্ম্॑ রোহি॒ণী-ম॒ভ্য়॑দ্ধ্য়াযত্ । সো॑-ঽকামযত । উপ॒ মা-ঽঽব॑র্তেত । সমে॑নয়া গচ্ছে॒য়েতি॑ । স এ॒ত-ম্প্র॒জাপ॑তয়ে রোহি॒ণ্য়ৈ চ॒রু-ন্নির॑বপত্ । ততো॒ বৈ সা তমু॒পাব॑র্তত । সমে॑নয়া ঽগচ্ছত ॥ উপ॑ হ॒ বা এ॑ন-ম্প্রি॒যমাব॑র্ততে ।
স-ম্প্রি॒য়েণ॑ গচ্ছতে । য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ ॥ সো-ঽত্র॑ জুহোতি ।
প্র॒জাপ॑তয়ে॒ স্বাহা॑ রোহি॒ণ্য়ৈ স্বাহা᳚ ।
রোচ॑মানায়ৈ॒ স্বাহা᳚ প্র॒জাভ্য়॒-স্স্বাহেতি॑ ॥ 28 ॥
সোমো॒ বা অ॑কামযত । ওষ॑ধীনাগ্ম্ রা॒জ্য়-ম॒ভিজ॑য়েয়॒মিতি॑ । স এ॒তগ্ম্ সোমা॑য় মৃগশী॒র॒.ষায়॑ শ্য়ামা॒ক-ঞ্চ॒রু-ম্পয়॑সি॒ নির॑বপত্ । ততো॒ বৈ স ওষ॑ধীনাগ্ম্
রা॒জ্যম॒ভ্য়॑জযত্ । স॒মা॒নানাগ্ম্॑ হ॒ বৈ রা॒জ্যম॒ভিজ॑যতি । য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
সোমা॑য়॒ স্বাহা॑ মৃগশী॒র॒.ষায়॒ স্বাহা᳚ ।
ই॒ন্ব॒কাভ্য়॒-স্স্বাহৌষ॑ধীভ্য়॒-স্স্বাহা᳚ ।
রা॒জ্য়ায়॒ স্বাহা॒ ঽভিজি॑ত্য়ৈ॒ স্বাহেতি॑ ॥ 29 ॥
রু॒দ্রো বা অ॑কামযত । প॒শু॒মান্-থ্স্য়া॒মিতি॑ ।
স এ॒তগ্ম্ রু॒দ্রায়া॒র্দ্রায়ৈ॒ প্রৈয়॑ঙ্গব-ঞ্চ॒রু-ম্পয়॑সি॒ নির॑বপত্ । ততো॒ বৈ স প॑শু॒মান॑ভবত্ । প॒শু॒মান্. হ॒ বৈ ভ॑বতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি । রু॒দ্রায়॒ স্বাহা॒ ঽঽর্দ্রায়ৈ॒ স্বাহা᳚ । পিন্ব॑মানায়ৈ॒ স্বাহা॑ প॒শুভ্য়॒-স্স্বাহেতি॑ ॥ 30 ॥
ঋ॒ক্ষা বা ই॒যম॑লো॒মকা॑-ঽঽসীত্ । সা-ঽকা॑মযত ।
ওষ॑ধীভি॒-র্বন॒স্পতি॑ভিঃ॒ প্রজা॑য়ে॒য়েতি॑ ।
সৈতমদি॑ত্য়ৈ॒ পুন॑র্বসুভ্য়া-ঞ্চ॒রু-ন্নির॑বপত্ ।
ততো॒ বা ই॒যমোষ॑ধীভি॒-র্বন॒স্পতি॑ভিঃ॒ প্রাজা॑যত ।
প্রজা॑যতে হ॒ বৈ প্র॒জয়া॑ প॒শুভিঃ॑ । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ ।
সো-ঽত্র॑ জুহোতি । অদি॑ত্য়ৈ॒ স্বাহা॒ পুন॑র্বসুভ্য়াম্ ।
স্বাহা-ঽঽভূ᳚ত্য়ৈ॒ স্বাহা॒ প্রজা᳚ত্য়ৈ॒ স্বাহেতি॑ ॥ 31 ॥
বৃহ॒স্পতি॒র্বা অ॑কামযত । ব্র॒হ্ম॒ব॒র্চ॒সী স্য়া॒মিতি॑ ।
স এ॒ত-ম্বৃহ॒স্পত॑য়ে তি॒ষ্য়া॑য় নৈবা॒র-ঞ্চ॒রু-ম্পয়॑সি॒ নির॑বপত্ । ততো॒ বৈ স ব্র॑হ্মবর্চ॒স্য়॑ভবত্ । ব্র॒হ্ম॒ব॒র্চ॒সী হ॒ বৈ ভ॑বতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি ।
বৃহ॒স্পত॑য়ে॒ স্বাহা॑ তি॒ষ্য়া॑য়॒ স্বাহা᳚ । ব্র॒হ্ম॒ব॒র্চ॒সায়॒ স্বাহেতি॑ ॥ 32 ॥
দে॒বা॒সু॒রা-স্সংয়ঁ॑ত্তা আসন্ন্ । তে দে॒বা-স্স॒র্পেভ্য়॑ আশ্রে॒ষাভ্য়॒ আজ্য়ে॑ কর॒ম্ভ-ন্নির॑বপন্ন্ ।
তানে॒তাভি॑রে॒ব দে॒বতা॑-ভি॒রুপা॑নযন্ন্ ।
এ॒তাভি॑র্হ॒ বৈ দে॒বতা॑ভি-র্দ্বি॒ষন্ত॒-ম্ভ্রাতৃ॑ব্য়॒-মুপ॑নযতি । য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
স॒র্পেভ্য়॒-স্স্বাহা᳚-ঽঽশ্রে॒ষাভ্য়॒-স্স্বাহা᳚ । দ॒ন্দ॒শূকে᳚ভ্য়॒-স্স্বাহেতি॑ ॥ 33 ॥
পি॒তরো॒ বা অ॑কামযন্ত । পি॒তৃ॒লো॒ক ঋ॑দ্ধ্নুয়া॒মেতি॑ ।
ত এ॒ত-ম্পি॒তৃভ্য়ো॑ ম॒ঘাভ্য়ঃ॑ পুরো॒ডাশ॒গ্ম্॒ ষট্ক॑পাল॒-ন্নির॑বপন্ন্ । ততো॒ বৈ তে পি॑তৃলো॒ক আ᳚র্ধ্নুবন্ন্ । পি॒তৃ॒লো॒কে হ॒ বা ঋ॑ধ্নোতি ।
য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি । পি॒তৃভ্য়॒-স্স্বাহা॑ ম॒ঘাভ্য়ঃ॑ ।
স্বাহা॑ ঽন॒ঘাভ্য়॒-স্স্বাহা॑ ঽগ॒দাভ্য়ঃ॑ ।
স্বাহা॑ ঽরুন্ধ॒তীভ্য়॒-স্স্বাহেতি॑ ॥ 34 ॥
অ॒র্য়॒মা বা অ॑কামযত । প॒শু॒মান্-থ্স্য়া॒মিতি॑ ।
স এ॒তম॑র্য়॒ম্ণে ফল্গু॑নীভ্য়া-ঞ্চ॒রু-ন্নির॑বপত্ ।
ততো॒ বৈ স প॑শু॒মান॑ভবত্ ।
প॒শু॒মান্. হ॒ বৈ ভ॑বতি । য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি । অ॒র্য়॒ম্ণে স্বাহা॒ ফল্গু॑নীভ্য়া॒গ্॒ স্বাহা᳚ ।
প॒শুভ্য়॒-স্স্বাহেতি॑ ॥ 35 ॥
ভগো॒ বা অ॑কামযত । ভ॒গী শ্রে॒ষ্ঠী দে॒বানাগ্॑ স্য়া॒মিতি॑ । স এ॒ত-ম্ভগা॑য়॒ ফল্গু॑নীভ্য়া-ঞ্চ॒রু-ন্নির॑বপত্ । ততো॒ বৈ স ভ॒গী শ্রে॒ষ্ঠী দে॒বানা॑মভবত্ ।
ভ॒গী হ॒ বৈ শ্রে॒ষ্ঠী স॑মা॒নানা᳚-ম্ভবতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি । ভগা॑য়॒ স্বাহা॒ ফল্গু॑নীভ্য়া॒গ্॒ স্বাহা᳚ । শ্রৈষ্ঠ্য়া॑য়॒ স্বাহেতি॑ ॥ 36 ॥
স॒বি॒তা বা অ॑কামযত । শ্রন্মে॑ দে॒বা দধী॑রন্ন্ । স॒বি॒তা স্য়া॒মিতি॑ । স এ॒তগ্ম্ স॑বি॒ত্রে হস্তা॑য় পুরো॒ডাশ॒-ন্দ্বাদ॑শকপাল॒-ন্নির॑বপদাশূ॒নাং
ঁব্রী॑হী॒ণাম্ । ততো॒ বৈ তস্মৈ॒ শ্রদ্দে॒বা অদ॑ধত । স॒বি॒তা-ঽভ॑বত্ । শ্রদ্ধ॒ বা অ॑স্মৈ মনু॒ষ্য়া॑ দধতে । স॒বি॒তা স॑মা॒নানা᳚-ম্ভবতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি ।
স॒বি॒ত্রে স্বাহা॒ হস্তা॑য় । স্বাহা॑ দদ॒তে স্বাহা॑ পৃণ॒তে । স্বাহা᳚ প্র॒যচ্ছ॑তে॒ স্বাহা᳚ প্রতিগৃভ্ণ॒তে স্বাহেতি॑ ॥ 37 ॥
ত্বষ্টা॒ বা অ॑কামযত । চি॒ত্র-ম্প্র॒জাং-বিঁ॑ন্দে॒য়েতি॑ ।
স এ॒ত-ন্ত্বষ্ট্রে॑ চি॒ত্রায়ৈ॑ পুরো॒ডাশ॑ম॒ষ্টা-ক॑পাল॒-ন্নির॑বপত্ । ততো॒ বৈ স চি॒ত্র-ম্প্র॒জাম॑বিন্দত । চি॒ত্রগ্ম্ হ॒ বৈ প্র॒জাং-বিঁ॑ন্দতে ।
য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
ত্বষ্ট্রে॒ স্বাহা॑ চি॒ত্রায়ৈ॒ স্বাহা᳚ ।
চৈত্রা॑য়॒ স্বাহা᳚ প্র॒জায়ৈ॒ স্বাহেতি॑ ॥ 38 ॥
বা॒য়ুর্বা অ॑কামযত । কা॒ম॒চার॑মে॒ষু লো॒কেষ্ব॒ভিজ॑য়েয়॒মিতি॑ । স এ॒ত-দ্বা॒যবে॒ নিষ্ট্য়া॑য়ৈ গৃ॒ষ্ট্য়ৈ দু॒গ্ধ-ম্পয়ো॒ নির॑বপত্ ।
ততো॒ বৈ স কা॑ম॒চার॑মে॒ষু লো॒কেষ্ব॒ভ্য়॑জযত্ ।
কা॒ম॒চারগ্ম্॑ হ॒ বা এ॒ষু লো॒কেষ্ব॒ভিজ॑যতি ।
য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি । বা॒যবে॒ স্বাহা॒ নিষ্ট্য়া॑য়ৈ॒ স্বাহা᳚ ।
কা॒ম॒চারা॑য়॒ স্বাহা॒-ঽভিজি॑ত্য়ৈ॒ স্বাহেতি॑ ॥ 39 ॥
ই॒ন্দ্রা॒গ্নী বা অ॑কাময়েতাম্ । শ্রৈষ্ঠ্য়॑-ন্দে॒বানা॑-ম॒ভিজ॑য়ে॒বেতি॑ । তাবে॒তমি॑ন্দ্রা॒গ্নিভ্য়াং॒-বিঁশা॑খাভ্য়া-ম্পুরো॒ডাশ॒-মেকা॑দশকপাল॒-ন্নির॑বপতাম্ । ততো॒ বৈ তৌ শ্রৈষ্ঠ্য়॑-ন্দে॒বানা॑-ম॒ভ্য়॑জযতাম্ । শ্রৈষ্ঠ্য়গ্ম্॑ হ॒ বৈ স॑মা॒নানা॑ম॒ভিজ॑যতি । য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
ই॒ন্দ্রা॒গ্নিভ্য়া॒গ্॒ স্বাহা॒ বিশা॑খাভ্য়া॒গ্॒ স্বাহা᳚ ।
শ্রৈষ্ঠ্য়া॑য়॒ স্বাহা॒ ঽভিজি॑ত্য়ৈ॒ স্বাহেতি॑ ॥ 40 ॥
অথৈ॒তত্-পৌ᳚র্ণমা॒স্য়া আজ্য়॒-ন্নির্ব॑পতি । কামো॒ বৈ পৌ᳚র্ণমা॒সী । কাম॒ আজ্য়᳚ম্ । কামে॑নৈ॒ব কাম॒গ্ম্॒ সম॑র্ধযতি । ক্ষি॒প্রমে॑ন॒গ্ম্॒ স কাম॒ উপ॑নমতি । যেন॒ কামে॑ন॒ যজ॑তে । সো-ঽত্র॑ জুহোতি ।
পৌ॒র্ণ॒মা॒স্য়ৈ স্বাহা॒ কামা॑য়॒ স্বাহা-ঽঽগ॑ত্য়ৈ॒ স্বাহেতি॑ ॥ 41 ॥
অনুবাকং 5 - যমনক্ষত্রেষ্টিব্রাহ্মণম্
মি॒ত্রো বা অ॑কামযত । মি॒ত্র॒ধেয়॑মে॒ষু লো॒কেষ্ব॒ভি জ॑য়েয়॒মিতি॑ । স এ॒ত-ম্মি॒ত্রায়া॑নূরা॒ধেভ্য়॑শ্চ॒রু-ন্নির॑বপত্ । ততো॒ বৈ স মি॑ত্র॒ধেয়॑মে॒ষু লো॒কেষ্ব॒ভ্য়॑জযত্ । মি॒ত্র॒ধেয়গ্ম্॑ হ॒ বা এ॒ষু লো॒কেষ্ব॒ভিজ॑যতি । য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
মি॒ত্রায়॒ স্বাহা॑ ঽনূরা॒ধেভ্য়॒-স্স্বাহা᳚ ।
মি॒ত্র॒ধেয়া॑য়॒ স্বাহা॒ ঽভিজি॑ত্য়ৈ॒ স্বাহেতি॑ ॥ 42 ॥
ইন্দ্রো॒ বা অ॑কামযত । জ্য়ৈষ্ঠ্য়॑-ন্দে॒বানা॑-ম॒ভিজ॑য়েয়॒মিতি॑ । স এ॒তমিন্দ্রা॑য় জ্য়ে॒ষ্ঠায়ৈ॑ পুরো॒ডাশ॒-মেকা॑দশকপাল॒-ন্নির॑বপ-ন্ম॒হাব্রী॑হীণাম্ । ততো॒ বৈ স জ্য়ৈষ্ঠ্য়॑-ন্দে॒বানা॑ম॒ভ্য়॑জযত্ । জ্য়ৈষ্ঠ্য়গ্ম্॑ হ॒ বৈ স॑মা॒নানা॑-ম॒ভিজ॑যতি । য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি । ইন্দ্রা॑য়॒ স্বাহা᳚ জ্য়ে॒ষ্ঠায়ৈ॒ স্বাহা᳚ ।
জ্য়ৈষ্ঠ্য়া॑য়॒ স্বাহা॒ ঽভিজি॑ত্য়ৈ॒ স্বাহেতি॑ ॥ 43 ॥
প্র॒জাপ॑তি॒র্বা অ॑কামযত । মূল॑-ম্প্র॒জাং-বিঁ॑ন্দে॒য়েতি॑ । স এ॒ত-ম্প্র॒জাপ॑তয়ে॒ মূলা॑য় চ॒রু-ন্নির॑বপত্ । ততো॒ বৈ স মূল॑-ম্প্র॒জাম॑বিন্দত । মূলগ্ম্॑ হ॒ বৈ প্র॒জাং-বিঁ॑ন্দতে । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি । প্র॒জাপ॑তয়ে॒ স্বাহা॒ মূলা॑য়॒ স্বাহা᳚ । প্র॒জায়ৈ॒ স্বাহেতি॑ ॥ 44 ॥
আপো॒ বা অ॑কামযন্ত । স॒মু॒দ্র-ঙ্কাম॑ম॒ ভিজ॑য়ে॒মেতি॑ । তা এ॒তম॒দ্ভ্য়ো॑-ঽষা॒ঢাভ্য়॑শ্চ॒রু-ন্নির॑বপন্ন্ । ততো॒ বৈ তা-স্স॑মু॒দ্র-ঙ্কাম॑ম॒ভ্য়॑জযন্ন্ । স॒মু॒দ্রগ্ম্ হ॒ বৈ কাম॑ম॒ভিজ॑যতি । য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
অ॒দ্ভ্য়-স্স্বাহা॑ ঽষা॒ঢাভ্য়॒-স্স্বাহা᳚ । স॒মু॒দ্রায়॒ স্বাহা॒ কামা॑য়॒ স্বাহা᳚ । অ॒ভিজি॑ত্য়ৈ॒ স্বাহেতি॑ ॥ 45 ॥
বিশ্বে॒ বৈ দে॒বা অ॑কামযন্ত । অ॒ন॒প॒জ॒য়্য়-ঞ্জ॑য়ে॒মেতি॑ । ত এ॒তং-বিঁশ্বে᳚ভ্য়ো দে॒বেভ্য়ো॑-ঽষা॒ঢাভ্য়॑শ্চ॒রু-ন্নির॑বপন্ন্ ।
ততো॒ বৈ তে॑-ঽনপজ॒য়্য়-ম॑জযন্ন্ । অ॒ন॒প॒জ॒য়্য়গ্ম্ হ॒ বৈ জ॑যতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি ।
বিশ্বে᳚ভ্য়ো দে॒বেভ্য়॒-স্স্বাহা॑ ঽষা॒ঢাভ্য়॒-স্স্বাহা᳚ ।
অ॒ন॒প॒জ॒য়্য়ায়॒ স্বাহা॒ জিত্য়ৈ॒ স্বাহেতি॑ ॥ 46 ॥
ব্রহ্ম॒ বা অ॑কামযত । ব্র॒হ্ম॒লো॒কম॒ভিজ॑য়েয়॒মিতি॑ ।
তদে॒ত-ম্ব্রহ্ম॑ণে-ঽভি॒জিতে॑ চ॒রু-ন্নির॑বপত্ ।
ততো॒ বৈ তদ্ব্র॑হ্মলো॒কম॒ভ্য়॑জযত্ । ব্র॒হ্ম॒লো॒কগ্ম্ হ॒ বা অ॒ভিজ॑যতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি । ব্রহ্ম॑ণে॒ স্বাহা॑ ঽভি॒জিতে॒ স্বাহা᳚ । ব্র॒হ্ম॒লো॒কায়॒ স্বাহা॒ ঽভিজি॑ত্য়ৈ॒ স্বাহেতি॑ ॥ 47 ॥
বিষ্ণু॒র্বা অ॑কামযত । পুণ্য়॒গ্গ্॒ শ্লোকগ্ম্॑ শৃণ্বীয় ।
ন মা॑ পা॒পী কী॒র্তিরাগ॑চ্ছে॒দিতি॑ । স এ॒তং-বিঁষ্ণ॑বে শ্রো॒ণায়ৈ॑ পুরো॒ডাশ॑-ন্ত্রিকপা॒ল-ন্নির॑বপত্ ।
ততো॒ বৈ স পুণ্য়॒গ্গ্॒ শ্লোক॑ম শৃণুত । নৈন॑-ম্পা॒পী কী॒র্তিরা- গ॑চ্ছত্ । পুণ্য়গ্ম্॑ হ॒ বৈ শ্লোকগ্ম্॑ শৃণুতে । নৈন॑-ম্পা॒পী কী॒র্তিরাগ॑চ্ছতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি ।
বিষ্ণ॑বে॒ স্বাহা᳚ শ্রো॒ণায়ৈ॒ স্বাহা᳚ ।
শ্লোকা॑য়॒ স্বাহা᳚ শ্রু॒তায়॒ স্বাহেতি॑ ॥ 48 ॥
বস॑বো॒ বা অ॑কামযন্ত । অগ্র॑-ন্দে॒বতা॑না॒-ম্পরী॑য়া॒মেতি॑ । ত এ॒তং-বঁসু॑ভ্য়॒-শ্শ্রবি॑ষ্ঠাভ্য়ঃ পুরো॒ডাশ॑ম॒ষ্টাক॑পাল॒-ন্নির॑বপন্ন্ ।
ততো॒ বৈ তে-ঽগ্র॑-ন্দে॒বতা॑না॒-ম্পর্য়া॑যন্ন্ ।
অগ্রগ্ম্॑ হ॒ বৈ স॑মা॒নানা॒-ম্পর্য়ে॑তি ।
য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি । বসু॑ভ্য়॒-স্স্বাহা॒ শ্রবি॑ষ্ঠাভ্য়॒-স্স্বাহা᳚ । অগ্রা॑য়॒ স্বাহা॒ পরী᳚ত্য়ৈ॒ স্বাহেতি॑ ॥ 49 ॥
ইন্দ্রো॒ বা অ॑কামযত । দৃ॒ঢো ঽশি॑থিল-স্স্য়া॒মিতি॑ ।
স এ॒তং-বঁরু॑ণায় শ॒তভি॑ষজে ভেষ॒জেভ্য়ঃ॑ পুরো॒ডাশ॒-ন্দশ॑কপাল॒-ন্নির॑বপত্-কৃ॒ষ্ণানাং᳚-ব্রীঁহী॒ণাম্ । ততো॒ বৈ স দৃ॒ঢো-ঽশি॑থিলো-ঽভবত্ ।
দৃ॒ঢো হ॒ বা অশি॑থিলো ভবতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি ।
বরু॑ণায়॒ স্বাহা॑ শ॒তভি॑ষজে॒ স্বাহা᳚ ।
ভে॒ষ॒জেভ্য়॒-স্স্বাহেতি॑ ॥ 50 ॥
অ॒জো বা এক॑পাদকামযত । তে॒জ॒স্বী ব্র॑হ্মবর্চ॒সী স্য়া॒মিতি॑ । স এ॒তম॒জায়ৈক॑পদে প্রোষ্ঠপ॒দেভ্য়॑-শ্চ॒রু-ন্নির॑বপত্ । ততো॒ বৈ স তে॑জ॒স্বী ব্র॑হ্মবর্চ॒স্য়॑ভবত্ । তে॒জ॒স্বী হ॒ বৈ ব্র॑হ্মবর্চ॒সী ভ॑বতি । য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
অ॒জায়ৈক॑পদে॒ স্বাহা᳚ প্রোষ্ঠপ॒দেভ্য়॒-স্স্বাহা᳚ ।
তেজ॑সে॒ স্বাহা᳚ ব্রহ্মবর্চ॒সায়॒ স্বাহেতি॑ ॥ 51 ॥
অহি॒র্বৈ বু॒দ্ধ্নিয়ো॑-ঽকামযত । ই॒মা-ম্প্র॑তি॒ষ্ঠাং-বিঁ॑ন্দে॒য়েতি॑ । স এ॒তমহ॑য়ে বু॒দ্ধ্নিয়া॑য় প্রোষ্ঠপ॒দেভ্য়ঃ॑ পুরো॒ডাশ॒-ম্ভূমি॑কপাল॒-ন্নির॑বপত্ । ততো॒ বৈ স ই॒মা-ম্প্র॑তি॒ষ্ঠা-ম॑বিন্দত । ই॒মাগ্ম্ হ॒ বৈ প্র॑তি॒ষ্ঠাং-বিঁ॑ন্দতে ।
য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি । অহ॑য়ে বু॒দ্ধ্নিয়া॑য়॒ স্বাহা᳚ প্রোষ্ঠপ॒দেভ্য়॒-স্স্বাহা᳚ ।
প্র॒তি॒ষ্ঠায়ৈ॒ স্বাহেতি॑ ॥ 52 ॥
পূ॒ষা বা অ॑কামযত । প॒শু॒মান্-থ্স্য়া॒মিতি॑ ।
স এ॒ত-ম্পূ॒ষ্ণে রে॒বত্য়ৈ॑ চ॒রু-ন্নির॑বপত্ ।
ততো॒ বৈ স প॑শু॒মান॑ভবত্ ।
প॒শু॒মান্. হ॒ বৈ ভ॑বতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ ।
সো-ঽত্র॑ জুহোতি । পূ॒ষ্ণে স্বাহা॑ রে॒বত্য়ৈ॒ স্বাহা᳚ ।
প॒শুভ্য়॒-স্স্বাহেতি॑ ॥ 53 ॥
অ॒শ্বিনৌ॒ বা অ॑কাময়েতাম্ । শ্রো॒ত্র॒স্বিনা॒বব॑ধিরৌ স্য়া॒বেতি॑ । তাবে॒তম॒শ্বিভ্য়া॑-মশ্ব॒য়ুগ্ভ্য়া᳚-ম্পুরো॒ডাশ॑-ন্দ্বিকপা॒ল-ন্নির॑বপতাম্ ।
ততো॒ বৈ তৌ শ্রো᳚ত্র॒স্বিনা॒বব॑ধিরা-বভবতাম্ ।
শ্রো॒ত্র॒স্বী হ॒ বা অব॑ধিরো ভবতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি ।
অ॒শ্বিভ্য়া॒গ্॒ স্বাহা᳚-ঽশ্ব॒য়ুগ্ভ্য়া॒গ্॒ স্বাহা᳚ ।
শ্রোত্রা॑য়॒ স্বাহা॒ শ্রুত্য়ৈ॒ স্বাহেতি॑ ॥ 54 ॥
য॒মো বা অ॑কামযত ।
পি॒তৃ॒ণাগ্ম্ রা॒জ্য়-ম॒ভিজ॑য়েয়॒মিতি॑ ।
স এ॒তং-য়ঁ॒মায়া॑প॒ভর॑ণীভ্যশ্চ॒রু-ন্নির॑বপত্ ।
ততো॒ বৈ স পি॑তৃ॒ণাগ্ম্ রা॒জ্যম॒ভ্য়॑জযত্ ।
স॒মা॒নানাগ্ম্॑ হ॒ বৈ রা॒জ্যম॒ভিজ॑যতি ।
য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
য॒মায়॒ স্বাহা॑ ঽপ॒ভর॑ণীভ্য়॒-স্স্বাহা᳚ ।
রা॒জ্য়ায়॒ স্বাহা॒ ঽভিজি॑ত্য়ৈ স্বাহেতি॑ ॥ 55 ॥
অথৈ॒তদ॑-মা॒বাস্য়া॑য়া॒ আজ্য়॒-ন্নির্ব॑পতি ।
কামো॒ বা অ॑মাবা॒স্য়া᳚ । কাম॒ আজ্য়᳚ম্ । কামে॑নৈ॒ব কাম॒গ্ম্॒ সম॑র্ধযতি । ক্ষি॒প্রমে॑ন॒গ্ম্॒ স কাম॒ উপ॑নমতি । যেন॒ কামে॑ন॒ যজ॑তে । সো-ঽত্র॑ জুহোতি । অ॒মা॒বা॒স্য়া॑য়ৈ॒ স্বাহা॒ কামা॑য়॒ স্বাহা ঽঽগ॑ত্য়ৈ॒ স্বাহেতি॑ ॥ 56 ॥
বু॒দ্ধ্নিয়ঃ॑ - পু॒ষা - ঽশ্বিনৌ॑ - য॒মো দশ॑দ॒শা - থৈ॒তদ॑ - মাবা॒স্য়া॑য়া অ॒ষ্টৌ পঞ্চ॑দশ ) (অ. 5)
অনুবাকং 6 - চান্দ্রমসাদীষ্টিব্রাহ্মণম্
চ॒ন্দ্রমা॒ বা অ॑কামযত । অ॒হো॒রা॒ত্রা-ন॑র্ধমা॒সা-ন্মাসা॑-নৃ॒তূন্থ্- সং॑বঁথ্স॒র-মা॒প্ত্বা । চ॒ন্দ্রম॑স॒-স্সায়ু॑জ্য়গ্ম্ সলো॒কতা॑-মাপ্নুয়া॒মিতি॑ । স এ॒ত-ঞ্চ॒ন্দ্রম॑সে প্রতী॒দৃশ্য়া॑য়ৈ পুরো॒ডাশ॒-ম্পঞ্চ॑দশকপাল॒-ন্নির॑বপত্ ।
ততো॒ বৈ সো॑-ঽহোরা॒ত্রা-ন॑র্ধমা॒সা-ন্মাসা॑-নৃ॒তূন্-থ্সং॑বঁথ্স॒র-মা॒প্ত্বা ।
চ॒ন্দ্রম॑স॒-স্সায়ু॑জ্য়গ্ম্ সলো॒কতা॑মাপ্নোত্ ।
অ॒হো॒রা॒ত্রান্. হ॒ বা অ॑র্ধমা॒সা-ন্মাসা॑ন্-ঋ॒তূন্-থ্সং॑বঁথ্স॒র-মা॒প্ত্বা । চ॒ন্দ্রম॑স॒-স্সায়ু॑জ্য়গ্ম্ সলো॒কতা॑মাপ্নোতি । য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
চ॒ন্দ্রম॑সে॒ স্বাহা᳚ প্রতী॒দৃশ্য়া॑য়ৈ॒ স্বাহা᳚ ।
অ॒হো॒রা॒ত্রেভ্য়॒-স্স্বাহা᳚ ঽর্ধমা॒সেভ্য়॒-স্স্বাহা᳚ ।
মাসে᳚ভ্য়॒-স্স্বাহ॒র্তুভ্য়॒-স্স্বাহা᳚ । সং॒বঁ॒থ্স॒রায়॒ স্বাহেতি॑ ॥ 57 ॥
অ॒হো॒রা॒ত্রে বা অ॑কাময়েতাম্ । অত্য়॑হোরা॒ত্রে মু॑চ্য়েবহি ।
ন না॑বহোরা॒ত্রে আ᳚প্নুয়াতা॒মিতি॑ । তে এ॒তম॑হো-রা॒ত্রাভ্য়া᳚-ঞ্চ॒রু-ন্নির॑বপতাম্ । দ্ব॒য়ানাং᳚-ব্রীঁহী॒ণাম্ । শু॒ক্লানা᳚-ঞ্চ কৃ॒ষ্ণানা᳚-ঞ্চ । স॒বা॒ত্য়োর্দু॒গ্ধে । শ্বে॒তায়ৈ॑ চ কৃ॒ষ্ণায়ৈ॑ চ ।
ততো॒ বৈ তে অত্য়॑হোরা॒ত্রে অ॑মুচ্য়েতে ।
নৈনে॑ অহোরা॒ত্রে আ᳚প্নুতাম্ । অতি॑ হ॒ বা অ॑হোরা॒ত্রে মু॑চ্যতে । নৈন॑মহোরা॒ত্রে আ᳚প্নুতঃ । য এ॒তেন॑ হ॒বিষা॒ যজ॑তে । য উ॑ চৈনদে॒বংবেঁদ॑ ।
সো-ঽত্র॑ জুহোতি । অহ্নে॒ স্বাহা॒ রাত্রি॑য়ৈ॒ স্বাহা᳚ ।
অতি॑মুক্ত্য়ৈ॒ স্বাহেতি॑ ॥ 58 ॥
উ॒ষা বা অ॑কামযত । প্রি॒য়া ঽঽদি॒ত্যস্য়॑ সু॒ভগা᳚ স্য়া॒মিতি॑ । সৈতমু॒ষসে॑ চ॒রু-ন্নির॑বপত্ ।
ততো॒ বৈ সা প্রি॒য়া ঽঽদি॒ত্যস্য়॑ সু॒ভগা॑ ঽভবত্ ।
প্রি॒য়ো হ॒ বৈ স॑মা॒নানাগ্ম্॑ সু॒ভগো॑ ভবতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি । উ॒ষসে॒ স্বাহা॒ ব্য়ু॑ষ্ট্য়ৈ॒ স্বাহা᳚ ।
ব্য়ূ॒ষুষ্য়ৈ॒ স্বাহা᳚ ব্য়ু॒চ্ছন্ত্য়ৈ॒ স্বাহা᳚ । ব্য়ু॑ষ্টায়ৈ॒ স্বাহেতি॑ ॥ 59 ॥
অথৈ॒তস্মৈ॒ নক্ষ॑ত্রায় চ॒রু-ন্নির্ব॑পতি । যথা॒ ত্ব-ন্দে॒বানা॒মসি॑ । এ॒বম॒হ-ম্ম॑নু॒ষ্য়া॑ণা-ম্ভূয়াস॒মিতি॑ । যথা॑ হ॒ বা এ॒ত-দ্দে॒বানা᳚ম্ ।
এ॒বগ্ম্ হ॒ বা এ॒ষ ম॑নু॒ষ্য়া॑ণা-ম্ভবতি । য এ॒তেন॑ হ॒বিষা॒ যজ॑তে । য উ॑ চৈনদে॒বং-বেঁদ॑ । সো-ঽত্র॑ জুহোতি । নক্ষ॑ত্রায়॒ স্বাহো॑দেষ্য়॒তে স্বাহা᳚ ।
উ॒দ্য়॒তে স্বাহোদি॑তায়॒ স্বাহা᳚ । হর॑সে॒ স্বাহা॒ ভর॑সে॒ স্বাহা᳚ । ভ্রাজ॑সে॒ স্বাহা॒ তেজ॑সে॒ স্বাহা᳚ ।
তপ॑সে॒ স্বাহা᳚ ব্রহ্মবর্চ॒সায়॒ স্বাহেতি॑ ॥ 60 ॥
সূর্য়ো॒ বা অ॑কামযত । নক্ষ॑ত্রাণা-ম্প্রতি॒ষ্ঠা স্য়া॒মিতি॑ । স এ॒তগ্ম্ সূর্য়া॑য়॒ নক্ষ॑ত্রেভ্যশ্চ॒রু-ন্নির॑বপত্ ।
ততো॒ বৈ স নক্ষ॑ত্রাণা-ম্প্রতি॒ষ্ঠা ঽভ॑বত্ ।
প্র॒তি॒ষ্ঠা হ॒ বৈ স॑মা॒নানা᳚-ম্ভবতি ।
য এ॒তেন॑ হ॒বিষা॒ যজ॑তে ।
য উ॑ চৈনদে॒বং-বেঁদ॑ । সো-ঽত্র॑ জুহোতি ।
সূর্য়া॑য়॒ স্বাহা॒ নক্ষ॑ত্রেভ্য়॒-স্স্বাহা᳚ । প্র॒তি॒ষ্ঠায়ৈ॒ স্বাহেতি॑ ॥ 61 ॥
অথৈ॒তমদি॑ত্য়ৈ চ॒রু-ন্নির্ব॑পতি । ই॒য়ং-বাঁ অদি॑তিঃ ।
অ॒স্য়ামে॒ব প্রতি॑ তিষ্ঠতি । সো-ঽত্র॑ জুহোতি ।
অদি॑ত্য়ৈ॒ স্বাহা᳚ প্রতি॒ষ্ঠায়ৈ॒ স্বাহেতি॑ ॥ 62 ॥
অথৈ॒তং-বিঁষ্ণ॑বে চ॒রু-ন্নির্ব॑পতি । য॒জ্ঞো বৈ বিষ্ণুঃ॑ । য॒জ্ঞ এ॒বান্ত॒তঃ প্রতি॑ তিষ্ঠতি । সো-ঽত্র॑ জুহোতি । বিষ্ণ॑বে॒ স্বাহা॑ য॒জ্ঞায়॒ স্বাহা᳚ । প্র॒তি॒ষ্ঠায়ৈ॒ স্বাহেতি॑ ॥ 63 ॥
(চ॒ন্দ্রমাঃ॒ পঞ্চ॑দশা - হোরা॒ত্রে স॒প্তদ॑ - শো॒ষা একা॑দ॒শা - থৈ॒তস্মৈ॒ নক্ষ॑ত্তায়॒ ত্রয়ো॑দশ॒ - সূর্য়ো॒ দশা - থৈ॒তমদি॑ত্য়ৈ॒ পঞ্চা - থৈ॒তং-বিঁষ্ণ॑বে॒ ষট্-থ্স॒প্ত) (অ. 6)
[স॒বি॒তা-ঽঽশূ॒নাং-ব্রীঁ॑হী॒ণামিন্দ্রো॑ ম॒হাব্রী॑হীণা॒মিন্দ্রঃ॑ কৃ॒ষ্ণানোং᳚
ঁব্রীহী॒ণাম॑হোরা॒ত্রে দ্ব॒য়ানাং᳚-ব্রীঁহী॒ণাম্ । পি॒তর॒-ষ্ষট্ক॑পালগ্ম্ সবি॒তা দ্বাদ॑শকপালমিন্দ্রা॒গ্নী একা॑দশকপাল॒মিন্দ্র॒ একা॑দশকপাল॒মিন্দ্রো॒ দশ॑কপালং॒-বিঁষ্ণু॑স্ত্রিকপা॒লমহি॒-র্ভূমি॑কপালম॒শ্বিনৌ᳚ দ্বিকপা॒ল-ঞ্চ॒ন্দ্রমাঃ॒ পঞ্চ॑দশকপাল-ম॒গ্নিরত্বষ্টা॒ বস॑বো॒-ঽষ্টাক॑পালম॒ন্যত্র॑ চ॒রুম্ । রু॒দ্রো᳚-ঽর্য়॒মা পূ॒ষা প॑শু॒মান্-থ্স্য়া॒গ্ম্॒ সোমো॑ রু॒দ্রো বৃহ॒স্পতিঃ॒ পয়॑সি বা॒য়ুঃ পয়॒-স্সোমো॑ বা॒য়ুরি॑ন্দ্রা॒গ্নী মি॒ত্র ইন্দ্র॒ আপো॒ ব্রহ্ম॑ য॒মো॑-ঽভিজি॑ত্য়ৈ॒ ত্বষ্টা᳚ প্র॒জাপ॑তিঃ প্র॒জায়ৈ॑ পৌর্ণমা॒স্য়া অ॑মাবা॒স্য়া॑য়া॒ আগ॑ত্য়ৈ॒ বিশ্বে॒ জিত্য়া॑
অ॒শ্বিনৌ॒ শ্রুত্য়ৈ᳚ । ব্রহ্ম॒ তদে॒তং-বিঁষ্ণু॒-স্স এ॒তং-বাঁ॒য়ু-স্স এ॒তদাপ॒স্তাঃ । পি॒তরো॒ বিশ্বে॒ বস॑বো-ঽকামযন্ত॒মেতি॒ ত এ॒ত-ন্নির॑বপন্ন্ । আপো॑-ঽকামযন্ত॒ মেতি॒ তা এ॒ত-ন্নির॑বপন্ন্ । ই॒ন্দ্রা॒গ্নী অ॒শ্বিনা॑বকাময়েতাং॒-বেঁতি॒ তাবে॒ত-ন্নির॑বপদাম্ । অ॒হো॒রা॒ত্রে বা অ॑কাময়েতা॒মিতি॒ তে এ॒ত-ন্নির॑বপতাম্ ।
অ॒ন্যত্রা॑কামযত॒মিতি॒ স এ॒ত-ন্নির॑বপত্ । ই॒ন্দ্রা॒গ্নী শ্রৈষ্ঠ্য়॒মিন্দ্রো॒ জ্য়ৈষ্ঠ্য়॒মিন্দ্রো॑ দৃ॒ঢঃ ।
আহি॒-স্সূর্য়ো-ঽদি॑ত্য়ৈ॒ বিষ্ণ॑বে প্রতি॒ষ্ঠায়ৈ᳚ ।
সোমো॑ য॒ম-স্স॑মা॒নানা᳚ম্ । অ॒গ্নির্নো॑ রীরিষদ॒ন্যত্র॑ রীরিষঃ]
[বি॒দুষো॑ হ॒বিষা॒ য উ॑ চৈনদে॒বং-বেঁদ॑ । ইষ্টি॑ভি॒র্য় উ॑ চৈনা এ॒বং-বেঁদ॑ ।
অ॒ন্যত্র॑ ব্রাহ্ম॒ণে য উ॑ চৈনমে॒বং-বেঁদ॑ ]
ফ্রপাতক খোর্বৈ বি-থ্স্তর্তিন্গ্ ফদম্স্ ওf 1 তো 6 আনুবাকম্স্ ঃ-
(অ॒গ্নির্ন॑-ঋ॒দ্ধ্য়াস্ম॒-নবো॑নবো॒-ঽগ্নি-র্মি॒ত্র - শ্চ॒ন্দ্রমা॒-ষ্ষট্)
(অ॒গ্নির্ন॒ - স্তন্নো॑ বা॒য়ু - রহি॑র্বূ॒দ্ধ্নিয়॑ - ঋ॒ক্ষা বা ই॒য় - মথৈ॒ত-ত্পৌ᳚র্ণমা॒স্য়া - অ॒জো বা এক॑পা॒থ্ - সূর্য়॒ স্ত্রিষ॑ষ্টিঃ)
(অ॒গ্নির্নঃ॑ - পাতু প্রতি॒ষ্ঠায়ৈ॒ স্বাহেতি॑ )
॥ হরিঃ॑ ওম্ ॥
॥ কৃষ্ণ যজুর্বেদীয় তৈত্তিরীয় ব্রাহ্মণে তৃতীয়াষ্টকে প্রথমঃ প্রপাঠক-স্সমাপ্তঃ ॥
