కృష్ణ యజుర్వేదీయ తైత్తిరీయ ఆరణ్యకే నవమః ప్రపాఠకః - భృగువల్లీ
ఓ-న్నమః పరమాత్మనే, శ్రీ మహాగణపతయే నమః,
శ్రీ గురుభ్యో నమః । హ॒రిః॒ ఓమ్ ॥
భృగు వల్లీ
స॒హ నా॑ వవతు । స॒హ నౌ॑ భునక్తు । స॒హ వీ॒ర్య॑-ఙ్కరవావహై । తే॒జ॒స్వినా॒ వధీ॑తమస్తు॒ మా వి॑ద్విషా॒వహై᳚ ॥
ఓం శాన్తి॒-శ్శాన్తి॒-శ్శాన్తిః॑ ॥
అనువాకం 15
భృగు॒ర్వై వా॑రు॒ణిః । వరు॑ణ॒-మ్పిత॑ర॒-ముప॑ససార । అధీ॑హి భగవో॒ బ్రహ్మేతి॑ ॥ తస్మా॑ ఏ॒త-త్ప్రో॑వాచ । అన్న॑-మ్ప్రా॒ణ-ఞ్చఖ్షు॒-శ్శ్రోత్ర॒-మ్మనో॒ వాచ॒మితి॑ ॥
తగ్ం హో॑వాచ । యతో॒ వా ఇ॒మాని॒ భూతా॑ని॒ జాయ॑న్తే ।
యేన॒ జాతా॑ని॒ జీవ॑న్తి । య-త్ప్రయ॑న్త్య॒భి సంవిఀ ॑శన్తి ।
త-ద్విజి॑జ్ఞాసస్వ । త-ద్బ్రహ్మేతి॑ ॥
స తపో॑-ఽతప్యత । స తప॑-స్త॒ప్త్వా ॥ 35 ॥
అన్న॒-మ్బ్రహ్మేతి॒ వ్య॑జానాత్ । అ॒న్నాద్ధ్యే॑వ ఖల్వి॒మాని॒ భూతా॑ని॒ జాయ॑న్తే । అన్నే॑న॒ జాతా॑ని॒ జీవ॑న్తి । అన్న॒-మ్ప్రయ॑న్త్య॒భి-సంవిఀ ॑శ॒న్తీతి॑ ॥ త-ద్వి॒జ్ఞాయ॑ । పున॑రే॒వ వరు॑ణ॒-మ్పిత॑ర॒-ముప॑ససార । అధీ॑హి భగవో॒ బ్రహ్మేతి॑ । తగ్ం హో॑వాచ । తప॑సా॒ బ్రహ్మ॒ విజి॑జ్ఞాసస్వ ।
తపో॒ బ్రహ్మేతి॑ । స తపో॑-ఽతప్యత । స తప॑-స్త॒ప్త్వా ॥ 36 ॥
ప్రా॒ణో బ్ర॒హ్మేతి॒ వ్య॑జానాత్ । ప్రా॒ణాద్ధ్యే॑వ ఖల్వి॒మాని॒ భూతా॑ని॒ జాయ॑న్తే । ప్రా॒ణేన॒ జాతా॑ని॒ జీవ॑న్తి ।
ప్రా॒ణ-మ్ప్రయ॑న్త్య॒భి-సంవిఀ ॑శ॒న్తీతి॑ ॥ త-ద్వి॒జ్ఞాయ॑ ।
పున॑రే॒వ వరు॑ణ॒-మ్పిత॑ర॒-ముప॑ససార । అధీ॑హి భగవో॒ బ్రహ్మేతి॑ । తగ్ం హో॑వాచ । తప॑సా॒ బ్రహ్మ॒ విజి॑జ్ఞాసస్వ । తపో॒ బ్రహ్మేతి॑ । స తపో॑-ఽతప్యత । స తప॑-స్త॒ప్త్వా ॥ 37 ॥
మనో॒ బ్రహ్మేతి॒ వ్య॑జానాత్ । మన॑సో॒ హ్యే॑వ ఖల్వి॒మాని॒ భూతా॑ని॒ జాయ॑న్తే । మన॑సా॒ జాతా॑ని॒ జీవ॑న్తి । మనః॒ ప్రయ॑న్త్య॒భి-సంవిఀ ॑శ॒న్తీతి॑ ॥ త-ద్వి॒జ్ఞాయ॑ । పున॑రే॒వ వరు॑ణ॒-మ్పిత॑ర॒-ముప॑ససార । అధీ॑హి భగవో॒ బ్రహ్మేతి॑ । తగ్ం హో॑వాచ । తప॑సా॒ బ్రహ్మ॒ విజి॑జ్ఞాసస్వ ।
తపో॒ బ్రహ్మేతి॑ । స తపో॑-ఽతప్యత । స తప॑-స్త॒ప్త్వా ॥ 38 ॥
వి॒జ్ఞాన॒-మ్బ్రహ్మేతి॒ వ్య॑జానాత్ ।
వి॒జ్ఞానా॒-ద్ధ్యే॑వ ఖల్వి॒మాని॒ భూతా॑ని॒ జాయ॑న్తే ।
వి॒జ్ఞానే॑న॒ జాతా॑ని॒ జీవ॑న్తి । వి॒జ్ఞాన॒-మ్ప్రయ॑న్త్య॒భి-సంవిఀ ॑శ॒న్తీతి॑ ॥
త-ద్వి॒జ్ఞాయ॑ । పున॑రే॒వ వరు॑ణ॒-మ్పిత॑ర॒-ముప॑ససార । అధీ॑హి భగవో॒ బ్రహ్మేతి॑ । తగ్ం హో॑వాచ । తప॑సా॒ బ్రహ్మ॒ విజి॑జ్ఞాసస్వ । తపో॒ బ్రహ్మేతి॑ । స తపో॑-ఽతప్యత । స తప॑-స్త॒ప్త్వా ॥ 39 ॥
ఆ॒న॒న్దో బ్ర॒హ్మేతి॒ వ్య॑జానాత్ । ఆ॒నన్దా॒-ద్ధ్యే॑వ-ఖల్వి॒మాని॒ భూతా॑ని॒ జాయ॑న్తే ।
ఆ॒న॒న్దేన॒ జాతా॑ని॒ జీవ॑న్తి । ఆ॒న॒న్ద-మ్ప్రయ॑న్త్య॒భి-సంవిఀ ॑శ॒న్తీతి॑ ॥ సైషా భా᳚ర్గ॒వీ వా॑రు॒ణీ వి॒ద్యా । ప॒ర॒మే వ్యో॑మ॒-న్ప్రతి॑ష్ఠితా ॥ య ఏ॒వం-వేఀద॒ ప్రతి॑తిష్ఠతి । అన్న॑వానన్నా॒దో భ॑వతి ।
మ॒హా-న్భ॑వతి ప్ర॒జయా॑ ప॒శుభి॑-ర్బ్రహ్మవర్చ॒సేన॑ ।
మ॒హాన్ కీ॒ర్త్యా ॥ 40 ॥
అన్న॒-న్న ని॑న్ద్యాత్ । త-ద్వ్ర॒తమ్ ॥ ప్రా॒ణో వా అన్న᳚మ్ । శరీ॑రమన్నా॒దమ్ । ప్రా॒ణే శరీ॑ర॒-మ్ప్రతి॑ష్ఠితమ్ । శరీ॑రే ప్రా॒ణః ప్రతి॑ష్ఠితః ।
తదే॒త-దన్న॒-మన్నే॒ ప్రతి॑ష్ఠితమ్ ॥
స య ఏ॒త-దన్న॒-మన్నే॒ ప్రతి॑ష్ఠితం॒-వేఀద॒ ప్రతి॑తిష్ఠతి । అన్న॑వా-నన్నా॒దో భ॑వతి ।
మ॒హా-న్భ॑వతి ప్ర॒జయా॑ ప॒శుభి॑-ర్బ్రహ్మవర్చ॒సేన॑ ।
మ॒హాన్ కీ॒ర్త్యా ॥ 41 ॥
అన్న॒-న్న పరి॑చఖ్షీత । త-ద్వ్ర॒తమ్ । ఆపో॒ వా అన్న᳚మ్ । జ్యోతి॑రన్నా॒దమ్ । అ॒ఫ్సు జ్యోతిః॒ ప్రతి॑ష్ఠితమ్ । జ్యోతి॒ష్యాపః॒ ప్రతి॑ష్ఠితాః ।
తదే॒త-దన్న॒-మన్నే॒ ప్రతి॑ష్ఠితమ్ ॥
స య ఏ॒త-దన్న॒-మన్నే॒ ప్రతి॑ష్ఠితం॒-వేఀద॒ ప్రతి॑తిష్ఠతి । అన్న॑వా-నన్నా॒దో భ॑వతి । మ॒హా-న్భ॑వతి ప్ర॒జయా॑ ప॒శుభి॑-ర్బ్రహ్మవర్చ॒సేన॑ ।
మ॒హాన్ కీర్త్యా ॥ 42 ॥
అన్న॑-మ్బ॒హు కు॑ర్వీత । త-ద్వ్ర॒తమ్ ॥ పృ॒థి॒వీ వా అన్న᳚మ్ । ఆ॒కా॒శో᳚-ఽన్నా॒దః । పృ॒థి॒వ్యా-మా॑కా॒శః ప్రతి॑ష్ఠితః । ఆ॒కా॒శే పృ॑థి॒వీ ప్రతి॑ష్ఠితా ।
తదే॒త-దన్న॒-మన్నే॒ ప్రతి॑ష్ఠితమ్ ॥
స య ఏ॒త-దన్న॒-మన్నే॒ ప్రతి॑ష్ఠితం॒-వేఀద॒ ప్రతి॑తిష్ఠతి । అన్న॑వానన్నా॒దో భ॑వతి । మ॒హా-న్భ॑వతి ప్ర॒జయా॑ ప॒శుభి॑-ర్బ్రహ్మవర్చ॒సేన॑ ।
మ॒హాన్ కీ॒ర్త్యా ॥ 43 ॥
న కఞ్చన వసతౌ ప్రత్యా॑చఖ్షీ॒త । త-ద్వ్ర॒తమ్ ॥
తస్మాద్యయా కయా చ విధయా బహ్వ॑న్న-మ్ప్రా॒ప్నుయాత్ ॥
అరాద్ధ్యస్మా అన్నమి॑త్యాచ॒ఖ్షతే ॥ ఏతద్వై ముఖతో᳚-ఽన్నగ్ం రా॒ద్ధమ్ ।
ముఖతో-ఽస్మా అ॑న్నగ్ం రా॒ద్ధ్యతే । ఏతద్వై మద్ధ్యతో᳚-ఽన్నగ్ం రా॒ద్ధమ్ ।
మద్ధ్యతో-ఽస్మా అ॑న్నగ్ం రా॒ద్ధ్యతే ।
ఏదద్వా అన్తతో᳚-ఽన్నగ్ం రా॒ద్ధమ్ ।
అన్తతో-ఽస్మా అ॑న్నగ్ం రా॒ద్ధ్యతే । ॥ 44-ఽ ॥
య ఏ॑వం-వేఀ॒ద ॥ ఖ్షేమ ఇ॑తి వా॒చి । యోగఖ్షేమ ఇతి ప్రా॑ణాపా॒నయోః । కర్మే॑తి హ॒స్తయోః । గతి-రి॑తి పా॒దయోః । విముక్తి-రి॑తి పా॒యౌ । ఇతి మానుషీ᳚-స్సమా॒జ్ఞాః ॥ అథ దై॒వీః । తృప్తి-రి॑తి వృ॒ష్టౌ । బల-మి॑తి వి॒ద్యుతి । ॥ 44.బ్ ॥
యశ ఇ॑తి ప॒శుషు । జ్యోతిరితి న॑ఖ్షత్రే॒షు ।
ప్రజాతి-రమృత-మానన్ద ఇ॑త్యుప॒స్థే । సర్వ మి॑త్యాకా॒శే ॥
త-త్ప్రతిష్ఠే-త్యు॑పాసీ॒త । ప్రతిష్ఠా॑వా-న్భ॒వతి । తన్మహ ఇత్యు॑పాసీ॒త । మ॑హా-న్భ॒వతి । తన్మన ఇత్యు॑పాసీ॒త । మాన॑వా-న్భ॒వతి । ॥ 44.చ్ ॥
తన్నమ ఇత్యు॑పాసీ॒త । నమ్యన్తే᳚-ఽస్మై కా॒మాః । తద్బ్రహ్మే-త్యు॑పాసీ॒త । బ్రహ్మ॑వా-న్భ॒వతి । త-ద్బ్రహ్మణః పరిమర ఇత్యు॑పాసీ॒త । పర్యేణ-మ్మ్రియన్తే ద్విషన్త॑-స్సప॒త్నాః । పరి యే᳚-ఽప్రియా᳚ భ్రాతృ॒వ్యాః ॥ స యశ్చా॑య-మ్పు॒రుషే । యశ్చాసా॑-వాది॒త్యే । స ఏకః॑ । ॥ 44.ద్ ॥
స య॑ ఏవం॒-విఀత్ । అస్మాల్-లో॑కా-త్ప్రే॒త్య ।
ఏతమన్నమయ-మాత్మాన-ముప॑సఙ్క్ర॒మ్య ।
ఏత-మ్ప్రాణమయ-మాత్మాన-ముప॑సఙ్క్ర॒మ్య ।
ఏత-మ్మనోమయ-మాత్మాన-ముప॑సఙ్క్ర॒మ్య ।
ఏతం-విఀజ్ఞానమయ-మాత్మాన-ముప॑సఙ్క్ర॒మ్య ।
ఏత మానన్దమయ మాత్మాన ముప॑సఙ్క్ర॒మ్య ।
ఇమాన్ ఀలోకాన్ కామాన్నీ కామ-రూప్య॑నుస॒ఞ్చరన్న్ ।
ఏత-థ్సామ గా॑యన్నా॒స్తే ॥ హా(3) వు॒ హా(3) వు॒ హా(3) వు॑ । ॥ 44ఎ ॥
అ॒హ-మన్న-మ॒హ-మన్న-మ॒హమన్నమ్ ।
అ॒హమన్నా॒దో(2)-ఽహమన్నా॒దో(2) ఽహమన్నా॒దః ।
అ॒హగ్గ్ శ్లోక॒కృ-ద॒హగ్గ్ శ్లోక॒కృ-ద॒హగ్గ్ శ్లోక॒కృత్ । అ॒హమస్మి ప్రథమజా ఋతా(3) స్య॒ ।
పూర్వ-న్దేవేభ్యో అమృతస్య నా(3) భా॒ ఇ॒ ।
యో మా దదాతి స ఇదేవ మా(3)వాః॒ ।
అ॒హ-మన్న॒-మన్న॑-మ॒దన్త॒-మా(3) ద్మి॒ ।
అ॒హం-విఀశ్వ॒-మ్భువ॑న॒-మభ్య॑భ॒వామ్ । సువ॒ర్న జ్యోతీః᳚ ॥ య ఏ॒వం-వేఀద॑ ॥ ఇత్యు॑ప॒నిష॑త్ ॥ 44.f ॥
స॒హ నా॑ వవతు । స॒హ నౌ॑ భునక్తు । స॒హ వీ॒ర్య॑-ఙ్కరవావహై । తే॒జ॒స్వినా॒ వధీ॑తమస్తు॒ మా వి॑ద్విషా॒వహై᳚ ॥ ఓం శాన్తి॒-శ్శాన్తి॒-శ్శాన్తిః॑ ॥
(భృగు॒స్త్రయో॑ద॒శా - న్నం॑ - ప్రా॒ణో - మనో॑ - వి॒జ్ఞాన॒-న్ద్వాద॑శ ద్వాదశా - న॒న్దో దశా - న్న॒-న్న ని॑న్ద్యా॒ - దన్న॒-న్న పరి॑చఖ్షీ॒తా -న్న॑-మ్బ॒హుకు॑ర్వి॒ తైకా॑దశైకాదశ॒ - న కఞ్చ నైక॑షష్టి॒ర్దశ॑ ) (అ. 15)
॥ ఇతి భృగువల్లీ సమాప్తా ॥
(శ-న్నః॒ - శీఖ్షాగ్ం - స॒హ నౌ॒ - య ॑007ఆ;ఛన్ద॑సాం॒ - భూః - స యః - పృ॑థి॒ - వ్యోమి - త్యృత-ఞ్చా॒ - హం - ఀవేదమనుచ్య - శ-న్నః॑ - స॒హ నా॑వవతు - బ్రహ్మ॒వి-ద్- భృగుః॒ పఞ్చ॑దశ)
(శ-న్నో॒ - మహ॒ ఇత్యా॑ది॒త్యో - నో ఇ॑తరా॒ణ్య - స॑న్నే॒వా - న్న॒-న్న ని॑న్ద్యా॒చ్చతు॑శ్చత్వారిగ్ంశత్ )
(శన్న॒ - ఇత్యు॑ప॒నిష॑త్ )
॥ హరిః॑ ఓమ్ ॥
॥ కృష్ణ యజుర్వేదీయ తైత్తిరీయ ఆరణ్యకే నవమః ప్రపాఠక-స్సమాప్తః ॥
