බ්රහ්මෝවාච ।
නෞමීඩ්ය තේऽභ්රවපුෂේ තඩිදංබරාය
ගුංජාවතංසපරිපිච්ඡලසන්මුඛාය ।
වන්යස්රජේ කවලවේත්රවිෂාණවේණු-
ලක්ෂ්මශ්රියේ මෘදුපදේ පශුපාංගජාය ॥ 1 ॥
අස්යාපි දේව වපුෂෝ මදනුග්රහස්ය
ස්වේච්ඡාමයස්ය න තු භූතමයස්ය කෝऽපි ।
නේශේමහි ත්වවසිතුං මනසාංතරේණ
සාක්ෂාත්තවෛව කිමුතාත්මසුඛානුභූතේඃ ॥ 2 ॥
ජ්ඤානේ ප්රයාසමුදපාස්ය නමංත ඒව
ජීවංති සන්මුඛරිතාං භවදීයවාර්තාම් ।
ස්ථානේ ස්ථිතාඃ ශ්රුතිගතාං තනුවාංමනෝභිඃ
යේ ප්රායශෝऽජිත ජිතෝऽප්යසි තෛස්ත්රිලෝක්යාම් ॥ 3 ॥
ශ්රේයඃස්රුතිං භක්තිමුදස්ය තේ විභෝ ක්ලිශ්යංති යේ කේවලබෝධලබ්ධයේ ।
තේෂාමසෞ ක්ලේශල ඒව ශිෂ්යතේ නාන්යද්යථා ස්ථූලතුෂාවඝාතිනාම් ॥ 4 ॥
පුරේහ භූමන් බහවෝऽපි යෝගිනස්ත්වදර්පිතේහා නිජකර්මලබ්ධයා ।
විබුධ්ය භක්ත්යෛව කථෝපනීතයා ප්රපේදිරේऽංජෝऽච්යුත තේ ගතිං පරාම් ॥ 5 ॥
තථාපි භූමන් මහිමාऽගුණස්ය තේ විබෝද්ධුමර්හත්යමලාංතරාත්මභිඃ ।
අවික්රියාත්ස්වානුභවාදරූපතෝ හ්යනන්යබෝධ්යාත්මතයා න චාන්යථා ॥ 6 ॥
ගුණාත්මනස්තේऽපි ගුණාන් විමාතුං හිතාවතීර්ණස්ය ක ඊශිරේऽස්ය ।
කාලේන යෛර්වා විමිතාඃ සුකල්පෛර්භූපාංසවඃ ඛේ මිහිකා ද්යුභාසඃ ॥ 7 ॥
තත්තේऽනුකංපාං සුසමීක්ෂමාණෝ භුංජාන ඒවාත්මකෘතං විපාකම් ।
හෘද්වාග්වපුර්භිර්විදධන්නමස්තේ ජීවේත යෝ මුක්තිපදේ ස දායභාක් ॥ 8 ॥
පශ්යේශ මේऽනාර්යමනංත ආද්යේ පරාත්මනි ත්වය්යපි මායිමායිනි ।
මායාං විතත්යේක්ෂිතුමාත්මවෛභවං හ්යහං කියානෛච්ඡමිවාර්චිරග්නෞ ॥ 9 ॥
අතඃ ක්ෂමස්වාච්යුත මේ රජෝභුවෝ හ්යජානතස්ත්වත්පෘථගීශමානිනඃ ।
අජාවලේපාංධතමෝऽංධචක්ෂුෂ ඒෂෝऽනුකංප්යෝ මයි නාථවානිති ॥ 10 ॥
ක්වාහං තමෝමහදහංඛචරාග්නිවාර්භූසංවේෂ්ටිතාංඩඝටසප්තවිතස්තකායඃ ।
ක්වේදෘග්විධාවිගණිතාංඩපරාණුචර්යාවාතාධ්වරෝමවිවරස්ය ච තේ මහිත්වම් ॥ 11 ॥
උත්ක්ෂේපණං ගර්භගතස්ය පාදයෝඃ කිං කල්පතේ මාතුරධෝऽක්ෂජාගසේ ।
කිමස්ති නාස්තිව්යපදේශභූෂිතං තවාස්ති කුක්ෂේඃ කියදප්යනංතඃ ॥ 12 ॥
ජගත්ත්රයාංතෝදධිසංප්ලවෝදේ නාරායණස්යෝදරනාභිනාලාත් ।
විනිර්ගතෝऽජස්ත්විති වාංන වෛ මෘෂා කිං ත්වීශ්වරත්වාන්න විනිර්ගතෝऽස්මි . ।
නාරායණස්ත්වං න හි සර්වදේහිනාමාත්මාස්යධීශාඛිලලෝකසාක්ෂී ।
නාරායණෝऽංගං නරභූජලායනාත්තච්චාපි සත්යං න තවෛව මායා ॥ 14 ॥
තච්චේජ්ජලස්ථං තව සජ්ජගද්වපුඃ කිං මේ න දෘෂ්ටං භගවංස්තදෛව ।
කිං වා සුදෘෂ්ටං හෘදි මේ තදෛව කිං නෝ සපද්යේව පුනර්ව්යදර්ශි ॥ 15 ॥
අත්රෛව මායාදමනාවතාරේ හ්යස්ය ප්රපංචස්ය බහිඃ ස්ඵුටස්ය ।
කෘත්ස්නස්ය චාංතර්ජඨරේ ජනන්යා මායාත්වමේව ප්රකටීකෘතං තේ ॥ 16 ॥
යස්ය කුක්ෂාවිදං සර්වං සාත්මං භාති යථා තථා ।
තත්ත්වය්යපීහ තත්සර්වං කිමිදං මායයා විනා ॥ 17 ॥
අද්යෛව ත්වදෘතේऽස්ය කිං මම න තේ මායාත්වමාදර්ශිතං
ඒකෝऽසි ප්රථමං තතෝ ව්රජසුහෘද්වත්සාඃ සමස්තා අපි ।
තාවංතෝऽසි චතුර්භුජාස්තදඛිලෛඃ සාකං මයෝපාසිතා-
ස්තාවංත්යේව ජගංත්යභූස්තදමිතං බ්රහ්මාද්වයං ශිෂ්යතේ ॥ 18 ॥
අජානතාං ත්වත්පදවීමනාත්මන්යාත්මාऽත්මනා භාසි විතත්ය මායාම් ।
සෘෂ්ටාවිවාහං ජගතෝ විධාන ඉව ත්වමේෂෝऽංත ඉව ත්රිනේත්රඃ ॥ 19 ॥
සුරේෂ්වෘෂිෂ්වීශ තථෛව නෘෂ්වපි තිර්යක්ෂු යාදඃස්වපි තේऽජනස්ය ।
ජන්මාසතාං දුර්මදනිග්රහාය ප්රභෝ විධාතඃ සදනුග්රහාය ච ॥ 20 ॥
කෝ වේත්ති භූමන් භගවන් පරාත්මන් යෝගේශ්වරෝතීර්භවතස්ත්රිලෝක්යාම් ।
ක්ව වා කථං වා කති වා කදේති විස්තාරයන් ක්රීඩසි යෝගමායාම් ॥ 21 ॥
තස්මාදිදං ජගදශේෂමසත්ස්වරූපං ස්වප්නාභමස්තධිෂණං පුරුදුඃඛදුඃඛම් ।
ත්වය්යේව නිත්යසුඛබෝධතනාවනංතේ මායාත උද්යදපි යත්සදිවාවභාති ॥ 22 ॥
ඒකස්ත්වමාත්මා පුරුෂඃ පුරාණඃ සත්යඃ ස්වයංජ්යෝතිරනංත ආද්යඃ ।
නිත්යෝऽක්ෂරෝऽජස්රසුඛෝ නිරංජනඃ පූර්ණෝऽද්වයෝ මුක්ත උපාධිතෝऽමෘතඃ ॥ 23 ॥
ඒවංවිධං ත්වාං සකලාත්මනාමපි ස්වාත්මානමාත්මාऽත්මතයා විචක්ෂතේ ।
ගුර්වර්කලබ්ධෝපනිෂත්සුචක්ෂුෂා යේ තේ තරංතීව භවානෘතාංබුධිම් ॥ 24 ॥
ආත්මානමේවාත්මතයාऽවිජානතාං තේනෛව ජාතං නිඛිලං ප්රපංචිතම් ।
ජ්ඤානේන භූයෝऽපි ච තත්ප්රලීයතේ රජ්ජ්වාමහේර්භෝගභවාභවෞ යථා ॥ 25 ॥
අජ්ඤානසංජ්ඤෞ භවබංධමෝක්ෂෞ ද්වෞ නාම නාන්යෞ ස්ත ඍතජ්ඤභාවාත් ।
අජස්රචිත්යාऽත්මනි කේවලේ පරේ විචාර්යමාණේ තරණාවිවාහනී ॥ 26 ॥
ත්වාමාත්මානං පරං මත්වා පරමාත්මානමේව ච ।
ආත්මා පුනර්බහිර්මෘග්ය අහෝऽජ්ඤජනතාऽජ්ඤතා ॥ 27 ॥
අංතර්භවේऽනංත භවංතමේව හ්යතත්ත්යජංතෝ මෘගයංති සංතඃ ।
අසංතමප්යංත්යහිමංතරේණ සංතං ගුණං තං කිමු යංති සංතඃ ॥ 28 ॥
අථාපි තේ දේව පදාංබුජද්වයප්රසාදලේශානුගෘහීත ඒව හි ।
ජානාති තත්ත්වං භගවන් මහිම්නෝ න චාන්ය ඒකෝऽපි චිරං විචින්වන් ॥ 29 ॥
තදස්තු මේ නාථ ස භූරිභාගෝ භවේऽත්ර වාන්යත්ර තු වා තිරශ්චාම් ।
යේනාහමේකෝऽපි භවජ්ජනානාං භූත්වා නිෂේවේ තව පාදපල්ලවම් ॥ 30 ॥
අහෝऽතිධන්යා ව්රජගෝරමණ්යඃ ස්තන්යාමෘතං පීතමතීව තේ මුදා ।
යාසාං විභෝ වත්සතරාත්මජාත්මනා යත්තෘප්තයේऽද්යාපි න චාලමධ්වරාඃ ॥ 31 ॥
අහෝ භාග්යමහෝ භාග්යං නංදගෝපව්රජෞකසාම් ।
යන්මිත්රං පරමානංදං පූර්ණං බ්රහ්ම සනාතනම් ॥ 32 ॥
ඒෂාං තු භාග්යමහිමාऽච්යුත තාවදාස්තා-
මේකාදශෛව හි වයං බත භූරිභාගාඃ ।
ඒතද්ධෘෂීකචෂකෛරසකෘත්පිබාමඃ
ශර්වාදයෝऽංඝ්ර්යුදජමධ්වමෘතාසවං තේ ॥ 33 ॥
තද්භූරිභාග්යමිහ ජන්ම කිමප්යටව්යාං
යද්ගෝකුලේऽපි කතමාංඝ්රිරජෝऽභිෂේකම් ।
යජ්ජීවිතං තු නිඛිලං භගවාන් මුකුංද-
ස්ත්වද්යාපි යත්පදරජඃ ශ්රුතිමෘග්යමේව ॥ 34 ॥
ඒෂාං ඝෝෂනිවාසිනාමුත භවාන් කිං දේව රාතේති නඃ
චේතෝ විශ්වඵලාත්ඵලං ත්වදපරං කුත්රාප්යයන් මුහ්යති ।
සද්වේෂාදිව පූතනාऽපි සකුලා ත්වාමේව දේවාපිතා
යද්ධාමාර්ථසුහෘත්ප්රියාත්මතනයප්රාණාශයාස්ත්වත්කෘතේ ॥ 35 ॥
තාවද්රාගාදයඃ ස්තේනාස්තාවත්කාරාගෘහං ගෘහම් ।
තාවන්මෝහෝऽංඝ්රිනිගඩෝ යාවත්කෘෂ්ණ න තේ ජනාඃ ॥ 36 ॥
ප්රපංචං නිෂ්ප්රපංචෝऽපි විඩංබයසි භූතලේ ।
ප්රපන්නජනතානංදසංදෝහං ප්රථිතුං ප්රභෝ ॥ 37 ॥
ජානංත ඒව ජානංතු කිං බහූක්ත්යා න මේ ප්රභෝ ।
මනසෝ වපුෂෝ වාචෝ වෛභවං තව ගෝචරඃ ॥ 38 ॥
අනුජානීහි මාං කෘෂ්ණ සර්වං ත්වං වේත්සි සර්වදෘක් ।
ත්වමේව ජගතාං නාථෝ ජගදේතත්තවාර්පිතම් ॥ 39 ॥
ශ්රීකෘෂ්ණ වෘෂ්ණිකුලපුෂ්කරජෝෂදායින්
ක්ෂ්මානිර්ජරද්විජපශූදධිවෘද්ධිකාරින් ।
උද්ධර්මශාර්වරහර ක්ෂිතිරාක්ෂසධ්රුග්
ආකල්පමාර්කමර්හන් භගවන් නමස්තේ ॥ 40 ॥
ඉති ශ්රීමද්භාගවතමහාපුරාණේ දශමස්කංධේ පූර්වාර්ධේ
චතුර්දශාධ්යායාංතර්ගතං බ්රහ්මකෘතං ශ්රීකෘෂ්ණස්තුතිඃ සමාප්තා ।
භාගවතපුරාණ . අධ්යාය 10/14/1-40 . ।
