(විෂ්ණුපුරාණාංතර්ගතා; මුඛ්ය ස්තුති ශ්ලෝකාඃ 51-74)
ධ්රුව උවාච ।
භූමිරාපෝऽනලෝ වායුඃ ඛං මනෝ බුද්ධිරේව ච ।
භූතාදිරාදිප්රකෘතිර්යස්ය රූපං නතෝऽස්මි තම් ॥ 51 ॥
ශුද්ධඃ සූක්ෂ්මෝऽඛිලව්යාපී ප්රධානාත්පරතඃ පුමාන් ।
යස්ය රූපං නමස්තස්මෛ පුරුෂාය ගුණාශිනේ ॥ 52 ॥
භූරාදීනාං සමස්තානාං ගංධාදීනාං ච ශාශ්වතඃ ।
බුද්ධ්යාදීනාං ප්රධානස්ය පුරුෂස්ය ච යඃ පරඃ ॥ 53 ॥
තං බ්රහ්මභූතමාත්මානමශේෂජගතඃ පතිම් ।
ප්රපද්යේ ශරණං ශුද්ධං ත්වද්රූපං පරමේශ්වර ॥ 54 ॥
බෘහත්ත්වාද්බෘංහණත්වාච්ච යද්රූපං බ්රහ්මසංජ්ඤිතම් ।
තස්මෛ නමස්තේ සර්වාත්මන්යෝගිචිංත්යාවිකාරිණේ ॥ 55 ॥
සහස්රශීර්ෂා පුරුෂඃ සහස්රාක්ෂඃ සහස්රපාත් ।
සර්වව්යාපී භුවඃ ස්පර්ශාදත්යතිෂ්ඨද්දශාංගුලම් ॥ 56 ॥
යද්භූතං යච්ච වෛ භව්යං පුරුෂෝත්තම තද්භවාන් ।
ත්වත්තෝ විරාට් ස්වරාට් සම්රාට් ත්වත්තශ්චාප්යධිපූරුෂඃ ॥ 57 ॥
අත්යරිච්යත සෝऽධශ්ච තිර්යගූර්ධ්වං ච වෛ භුවඃ ।
ත්වත්තෝ විශ්වමිදං ජාතං ත්වත්තෝ භූතභවිෂ්යතී ॥ 58 ॥
ත්වද්රූපධාරිණශ්චාංතඃ සර්වභූතමිදං ජගත් ।
ත්වත්තෝ යජ්ඤඃ සර්වහුතඃ පෘෂදාජ්යං පශුර්ද්විධා ॥ 59 ॥
ත්වත්ත ඍචෝऽථ සාමානි ත්වත්තශ්ඡංදාංසි ජජ්ඤිරේ ।
ත්වත්තෝ යජූංෂ්යජායංත ත්වත්තෝऽශ්වාශ්චෛකතෝ දතඃ ॥ 60 ॥
ගාවස්ත්වත්තඃ සමුද්භූතාස්ත්වත්තෝऽජා අවයෝ මෘගාඃ ।
ත්වන්මුඛාද්බ්රාහ්මණාස්ත්වත්තෝ බාහෝඃ ක්ෂත්රමජායත ॥ 61 ॥
වෛශ්යාස්තවෝරුජාඃ ශූද්රාස්තව පද්භ්යාං සමුද්ගතාඃ ।
අක්ෂ්ණෝඃ සූර්යෝऽනිලඃ ප්රාණාච්චංද්රමා මනසස්තව ॥ 62 ॥
ප්රාණෝऽංතඃසුෂිරාජ්ජාතෝ මුඛාදග්නිරජායත ।
නාභිතෝ ගගනං ද්යෞශ්ච ශිරසඃ සමවර්තත ॥ 63 ॥
දිශඃ ශ්රෝත්රාත්ක්ෂිතිඃ පද්භ්යාං ත්වත්තඃ සර්වමභූදිදම් ॥ 64 ॥
න්යග්රෝධඃ සුමහානල්පේ යථා බීජේ ව්යවස්ථිතඃ ।
සංයමේ විශ්වමඛිලං බීජභූතේ තථා ත්වයි ॥ 65 ॥
බීජාදංකුරසංභූතෝ න්යග්රෝධඃ ස සමුච්ඡ්රිතඃ ।
විස්තාරං ච යථා යාති ත්වත්තඃ සෘෂ්ටෞ තථා ජගත් ॥ 66 ॥
යථා හි කදලී නාන්යා ත්වක්පත්රාදපි දෘශ්යතේ ।
ඒවං විශ්වස්ය නාන්යස්ත්වං ත්වත්ස්ථායීශ්වර දෘශ්යතේ ॥ 67 ॥
හ්ලාදිනී සංධිනී සංවිත්ත්වය්යේකා සර්වසංස්ථිතෞ ।
හ්ලාදතාපකරී මිශ්රා ත්වයි නෝ ගුණවර්ජිතේ ॥ 68 ॥
පෘථග්භූතෛකභූතාය භූතභූතාය තේ නමඃ ।
ප්රභූතභූතභූතාය තුභ්යං භූතාත්මනේ නමඃ ॥ 69 ॥
ව්යක්තං ප්රධානපුරුෂෞ විරාට් සම්රාට් ස්වරාට් තථා ।
විභාව්යතේऽංතඃකරණේ පුරුෂේෂ්වක්ෂයෝ භවාන් ॥ 70 ॥
සර්වස්මින් සර්වභූතස්ත්වං සර්වඃ සර්වස්වරූපධෘක් ।
සර්වං ත්වත්තස්තතශ්ච ත්වං නමඃ සර්වාත්මනේऽස්තු තේ ॥ 71 ॥
සර්වාත්මකෝऽසි සර්වේශ සර්වභූතස්ථිතෝ යතඃ ।
කථයාමි තතඃ කිං තේ සර්වං වේත්සි හෘදි ස්ථිතම් ॥ 72 ॥
සර්වාත්මන්සර්වභූතේශ සර්වසත්ත්වසමුද්භව ।
සර්වභූතෝ භවාන්වේත්ති සර්වසත්ත්වමනෝරථම් ॥ 73 ॥
යෝ මේ මනෝරථෝ නාථ සඵලඃ ස ත්වයා කෘතඃ ।
තපශ්ච තප්තං සඵලං යද්දෘෂ්ටෝऽසි ජගත්පතේ ॥ 74 ॥
