(භාගවතපුරාණාංතර්ගතම්)
නමඃ පරායාවිතථානුභූතයේ
ගුණත්රයාභාසනිමිත්තබංධවේ ।
අදෘෂ්ටධාම්නේ ගුණතත්ත්වබුද්ධිභිඃ
නිවෘත්තමානාය දධේ ස්වයංභුවේ ॥ 1 ॥
න යස්ය සඛ්යං පුරුෂෝऽවෛති සඛ්යුඃ
සඛා වසන්සංවසතඃ පුරේऽස්මින් ।
ගුණෝ යථා ගුණිනෝ ව්යක්තදෘෂ්ටේඃ
තස්මෛ මහේශාය නමස්කරෝමි ॥ 2 ॥
දේහෝऽසවෝऽක්ෂා මනවෝ භූතමාත්රා
නාත්මානමන්යං ච විදුඃ පරං යත් ।
සර්වං පුමාන් වේද ගුණාංශ්ච තජ්ජ්ඤෝ
න වේද සර්වජ්ඤමනංතමීඩේ ॥ 3 ॥
යදෝපරාමෝ මනසෝ නාමරූප-
රූපස්ය දෘෂ්ටස්මෘතිසප්රමෝෂාත් ।
ය ඊයතේ කේවලයා ස්වසංස්ථයා
හංසාය තස්මෛ ශුචිසද්මනේ නමඃ ॥ 4 ॥
මනීෂිණෝऽංතර්හදි සන්නිවේශිතං
ස්වශක්තිභිර්නවභිශ්ච ත්රිවෘද්භිඃ ।
වහ්නිං යථා දාරුණි පාංචදශ්යං
මනීෂයා නිෂ්කර්ෂංති ගූඪම් ॥ 5 ॥
ස වෛ මමාශේෂවිශේෂමායා
නිෂේධනිවාණසුඛානුභූතිඃ ।
ස සර්වනාමා ස ච විශ්වරූපඃ
ප්රසීදතාමනිරුක්තාත්මශක්තිඃ ॥ 6 ॥
යද්යන්නිරුක්තං වචසා නිරූපිතං
ධියාऽක්ෂභිර්වා මනසා වෝත යස්ය ।
මා භූත්ස්වරූපං ගුණරූපං හි තත්තත්
ස වෛ ගුණාපායවිසර්ගලක්ෂණඃ ॥ 7 ॥
යස්මින් යතෝ යේන ච යස්ය යස්මෛ
යද්යෝ යථා කුරූතේ කාර්යතේ ච ।
පරාවරේෂාං පරමං ප්රාක් ප්රසිද්ධං
තද්බ්රහ්ම තද්ධේතුරනන්යදේකම් ॥ 8 ॥
යච්ඡක්තයෝ වදතාං වාදිතාං වෛ
විවාදසංවාදභුවෝ භවංති ।
කුර්වංති චෛෂාං මුහුරාත්මමෝහං
තස්මෛ නමෝऽනංතගුණාය භූම්නේ ॥ 9 ॥
අස්තීති නාස්තීති ච වස්තුනිෂ්ඨයෝඃ
ඒකස්ථයෝර්භින්නවිරුද්ධධර්මයෝඃ ।
අවේක්ෂිතං කිං ච න යෝගසාංඛ්යයෝඃ
සමං පරං හ්යනුකූලං බෘහත්තත් ॥ 10 ॥
යෝऽනුගහාර්ථං භජතාං පාදමූලමනාමරූපෝ භගවානනංතඃ ।
නාමානි රූපාණි ච ජන්මකර්මභිර්භේජේ ස මහ්යං පරමඃ ප්රසීදතු ॥ 11 ॥
යඃ ප්රාකෘතෛර්ජ්ඤානපථෛර්ජනානාං
යථාශයං දේහගතෝ විභාති ।
යථානිලඃ පාර්ථිවමාශ්රිතෝ ගුණං
ස ඊශ්වරෝ මේ කුරුතාන්මනෝරථම් ॥ 12 ॥
॥ ඉති හංසගුහ්යස්තෝත්රං සංපූර්ණම් ॥
