കൃഷ്ണ യജുർവേദീയ തൈത്തിരീയ ആരണ്യകേ നവമഃ പ്രപാഠകഃ - ഭൃഗുവല്ലീ
ഓ-ന്നമഃ പരമാത്മനേ, ശ്രീ മഹാഗണപതയേ നമഃ,
ശ്രീ ഗുരുഭ്യോ നമഃ । ഹ॒രിഃ॒ ഓമ് ॥
ഭൃഗു വല്ലീ
സ॒ഹ നാ॑ വവതു । സ॒ഹ നൌ॑ ഭുനക്തു । സ॒ഹ വീ॒ര്യ॑-ങ്കരവാവഹൈ । തേ॒ജ॒സ്വിനാ॒ വധീ॑തമസ്തു॒ മാ വി॑ദ്വിഷാ॒വഹൈ᳚ ॥
ഓം ശാന്തി॒-ശ്ശാന്തി॒-ശ്ശാന്തിഃ॑ ॥
അനുവാകം 15
ഭൃഗു॒ർവൈ വാ॑രു॒ണിഃ । വരു॑ണ॒-മ്പിത॑ര॒-മുപ॑സസാര । അധീ॑ഹി ഭഗവോ॒ ബ്രഹ്മേതി॑ ॥ തസ്മാ॑ ഏ॒ത-ത്പ്രോ॑വാച । അന്ന॑-മ്പ്രാ॒ണ-ഞ്ചക്ഷു॒-ശ്ശ്രോത്ര॒-മ്മനോ॒ വാച॒മിതി॑ ॥
തഗ്മ് ഹോ॑വാച । യതോ॒ വാ ഇ॒മാനി॒ ഭൂതാ॑നി॒ ജായ॑ന്തേ ।
യേന॒ ജാതാ॑നി॒ ജീവ॑ന്തി । യ-ത്പ്രയ॑ന്ത്യ॒ഭി സംവിഁ ॑ശന്തി ।
ത-ദ്വിജി॑ജ്ഞാസസ്വ । ത-ദ്ബ്രഹ്മേതി॑ ॥
സ തപോ॑-ഽതപ്യത । സ തപ॑-സ്ത॒പ്ത്വാ ॥ 35 ॥
അന്ന॒-മ്ബ്രഹ്മേതി॒ വ്യ॑ജാനാത് । അ॒ന്നാദ്ധ്യേ॑വ ഖല്വി॒മാനി॒ ഭൂതാ॑നി॒ ജായ॑ന്തേ । അന്നേ॑ന॒ ജാതാ॑നി॒ ജീവ॑ന്തി । അന്ന॒-മ്പ്രയ॑ന്ത്യ॒ഭി-സംവിഁ ॑ശ॒ന്തീതി॑ ॥ ത-ദ്വി॒ജ്ഞായ॑ । പുന॑രേ॒വ വരു॑ണ॒-മ്പിത॑ര॒-മുപ॑സസാര । അധീ॑ഹി ഭഗവോ॒ ബ്രഹ്മേതി॑ । തഗ്മ് ഹോ॑വാച । തപ॑സാ॒ ബ്രഹ്മ॒ വിജി॑ജ്ഞാസസ്വ ।
തപോ॒ ബ്രഹ്മേതി॑ । സ തപോ॑-ഽതപ്യത । സ തപ॑-സ്ത॒പ്ത്വാ ॥ 36 ॥
പ്രാ॒ണോ ബ്ര॒ഹ്മേതി॒ വ്യ॑ജാനാത് । പ്രാ॒ണാദ്ധ്യേ॑വ ഖല്വി॒മാനി॒ ഭൂതാ॑നി॒ ജായ॑ന്തേ । പ്രാ॒ണേന॒ ജാതാ॑നി॒ ജീവ॑ന്തി ।
പ്രാ॒ണ-മ്പ്രയ॑ന്ത്യ॒ഭി-സംവിഁ ॑ശ॒ന്തീതി॑ ॥ ത-ദ്വി॒ജ്ഞായ॑ ।
പുന॑രേ॒വ വരു॑ണ॒-മ്പിത॑ര॒-മുപ॑സസാര । അധീ॑ഹി ഭഗവോ॒ ബ്രഹ്മേതി॑ । തഗ്മ് ഹോ॑വാച । തപ॑സാ॒ ബ്രഹ്മ॒ വിജി॑ജ്ഞാസസ്വ । തപോ॒ ബ്രഹ്മേതി॑ । സ തപോ॑-ഽതപ്യത । സ തപ॑-സ്ത॒പ്ത്വാ ॥ 37 ॥
മനോ॒ ബ്രഹ്മേതി॒ വ്യ॑ജാനാത് । മന॑സോ॒ ഹ്യേ॑വ ഖല്വി॒മാനി॒ ഭൂതാ॑നി॒ ജായ॑ന്തേ । മന॑സാ॒ ജാതാ॑നി॒ ജീവ॑ന്തി । മനഃ॒ പ്രയ॑ന്ത്യ॒ഭി-സംവിഁ ॑ശ॒ന്തീതി॑ ॥ ത-ദ്വി॒ജ്ഞായ॑ । പുന॑രേ॒വ വരു॑ണ॒-മ്പിത॑ര॒-മുപ॑സസാര । അധീ॑ഹി ഭഗവോ॒ ബ്രഹ്മേതി॑ । തഗ്മ് ഹോ॑വാച । തപ॑സാ॒ ബ്രഹ്മ॒ വിജി॑ജ്ഞാസസ്വ ।
തപോ॒ ബ്രഹ്മേതി॑ । സ തപോ॑-ഽതപ്യത । സ തപ॑-സ്ത॒പ്ത്വാ ॥ 38 ॥
വി॒ജ്ഞാന॒-മ്ബ്രഹ്മേതി॒ വ്യ॑ജാനാത് ।
വി॒ജ്ഞാനാ॒-ദ്ധ്യേ॑വ ഖല്വി॒മാനി॒ ഭൂതാ॑നി॒ ജായ॑ന്തേ ।
വി॒ജ്ഞാനേ॑ന॒ ജാതാ॑നി॒ ജീവ॑ന്തി । വി॒ജ്ഞാന॒-മ്പ്രയ॑ന്ത്യ॒ഭി-സംവിഁ ॑ശ॒ന്തീതി॑ ॥
ത-ദ്വി॒ജ്ഞായ॑ । പുന॑രേ॒വ വരു॑ണ॒-മ്പിത॑ര॒-മുപ॑സസാര । അധീ॑ഹി ഭഗവോ॒ ബ്രഹ്മേതി॑ । തഗ്മ് ഹോ॑വാച । തപ॑സാ॒ ബ്രഹ്മ॒ വിജി॑ജ്ഞാസസ്വ । തപോ॒ ബ്രഹ്മേതി॑ । സ തപോ॑-ഽതപ്യത । സ തപ॑-സ്ത॒പ്ത്വാ ॥ 39 ॥
ആ॒ന॒ന്ദോ ബ്ര॒ഹ്മേതി॒ വ്യ॑ജാനാത് । ആ॒നന്ദാ॒-ദ്ധ്യേ॑വ-ഖല്വി॒മാനി॒ ഭൂതാ॑നി॒ ജായ॑ന്തേ ।
ആ॒ന॒ന്ദേന॒ ജാതാ॑നി॒ ജീവ॑ന്തി । ആ॒ന॒ന്ദ-മ്പ്രയ॑ന്ത്യ॒ഭി-സംവിഁ ॑ശ॒ന്തീതി॑ ॥ സൈഷാ ഭാ᳚ര്ഗ॒വീ വാ॑രു॒ണീ വി॒ദ്യാ । പ॒ര॒മേ വ്യോ॑മ॒-ന്പ്രതി॑ഷ്ഠിതാ ॥ യ ഏ॒വം-വേഁദ॒ പ്രതി॑തിഷ്ഠതി । അന്ന॑വാനന്നാ॒ദോ ഭ॑വതി ।
മ॒ഹാ-ന്ഭ॑വതി പ്ര॒ജയാ॑ പ॒ശുഭി॑-ര്ബ്രഹ്മവര്ച॒സേന॑ ।
മ॒ഹാന് കീ॒ര്ത്യാ ॥ 40 ॥
അന്ന॒-ന്ന നി॑ന്ദ്യാത് । ത-ദ്വ്ര॒തമ് ॥ പ്രാ॒ണോ വാ അന്ന᳚മ് । ശരീ॑രമന്നാ॒ദമ് । പ്രാ॒ണേ ശരീ॑ര॒-മ്പ്രതി॑ഷ്ഠിതമ് । ശരീ॑രേ പ്രാ॒ണഃ പ്രതി॑ഷ്ഠിതഃ ।
തദേ॒ത-ദന്ന॒-മന്നേ॒ പ്രതി॑ഷ്ഠിതമ് ॥
സ യ ഏ॒ത-ദന്ന॒-മന്നേ॒ പ്രതി॑ഷ്ഠിതം॒-വേഁദ॒ പ്രതി॑തിഷ്ഠതി । അന്ന॑വാ-നന്നാ॒ദോ ഭ॑വതി ।
മ॒ഹാ-ന്ഭ॑വതി പ്ര॒ജയാ॑ പ॒ശുഭി॑-ര്ബ്രഹ്മവര്ച॒സേന॑ ।
മ॒ഹാന് കീ॒ര്ത്യാ ॥ 41 ॥
അന്ന॒-ന്ന പരി॑ചക്ഷീത । ത-ദ്വ്ര॒തമ് । ആപോ॒ വാ അന്ന᳚മ് । ജ്യോതി॑രന്നാ॒ദമ് । അ॒ഫ്സു ജ്യോതിഃ॒ പ്രതി॑ഷ്ഠിതമ് । ജ്യോതി॒ഷ്യാപഃ॒ പ്രതി॑ഷ്ഠിതാഃ ।
തദേ॒ത-ദന്ന॒-മന്നേ॒ പ്രതി॑ഷ്ഠിതമ് ॥
സ യ ഏ॒ത-ദന്ന॒-മന്നേ॒ പ്രതി॑ഷ്ഠിതം॒-വേഁദ॒ പ്രതി॑തിഷ്ഠതി । അന്ന॑വാ-നന്നാ॒ദോ ഭ॑വതി । മ॒ഹാ-ന്ഭ॑വതി പ്ര॒ജയാ॑ പ॒ശുഭി॑-ര്ബ്രഹ്മവര്ച॒സേന॑ ।
മ॒ഹാന് കീര്ത്യാ ॥ 42 ॥
അന്ന॑-മ്ബ॒ഹു കു॑ർവീത । ത-ദ്വ്ര॒തമ് ॥ പൃ॒ഥി॒വീ വാ അന്ന᳚മ് । ആ॒കാ॒ശോ᳚-ഽന്നാ॒ദഃ । പൃ॒ഥി॒വ്യാ-മാ॑കാ॒ശഃ പ്രതി॑ഷ്ഠിതഃ । ആ॒കാ॒ശേ പൃ॑ഥി॒വീ പ്രതി॑ഷ്ഠിതാ ।
തദേ॒ത-ദന്ന॒-മന്നേ॒ പ്രതി॑ഷ്ഠിതമ് ॥
സ യ ഏ॒ത-ദന്ന॒-മന്നേ॒ പ്രതി॑ഷ്ഠിതം॒-വേഁദ॒ പ്രതി॑തിഷ്ഠതി । അന്ന॑വാനന്നാ॒ദോ ഭ॑വതി । മ॒ഹാ-ന്ഭ॑വതി പ്ര॒ജയാ॑ പ॒ശുഭി॑-ര്ബ്രഹ്മവര്ച॒സേന॑ ।
മ॒ഹാന് കീ॒ര്ത്യാ ॥ 43 ॥
ന കഞ്ചന വസതൌ പ്രത്യാ॑ചക്ഷീ॒ത । ത-ദ്വ്ര॒തമ് ॥
തസ്മാദ്യയാ കയാ ച വിധയാ ബഹ്വ॑ന്ന-മ്പ്രാ॒പ്നുയാത് ॥
അരാദ്ധ്യസ്മാ അന്നമി॑ത്യാച॒ക്ഷതേ ॥ ഏതദ്വൈ മുഖതോ᳚-ഽന്നഗ്മ് രാ॒ദ്ധമ് ।
മുഖതോ-ഽസ്മാ അ॑ന്നഗ്മ് രാ॒ദ്ധ്യതേ । ഏതദ്വൈ മദ്ധ്യതോ᳚-ഽന്നഗ്മ് രാ॒ദ്ധമ് ।
മദ്ധ്യതോ-ഽസ്മാ അ॑ന്നഗ്മ് രാ॒ദ്ധ്യതേ ।
ഏദദ്വാ അന്തതോ᳚-ഽന്നഗ്മ് രാ॒ദ്ധമ് ।
അന്തതോ-ഽസ്മാ അ॑ന്നഗ്മ് രാ॒ദ്ധ്യതേ । ॥ 44-ഽ ॥
യ ഏ॑വം-വേഁ॒ദ ॥ ക്ഷേമ ഇ॑തി വാ॒ചി । യോഗക്ഷേമ ഇതി പ്രാ॑ണാപാ॒നയോഃ । കര്മേ॑തി ഹ॒സ്തയോഃ । ഗതി-രി॑തി പാ॒ദയോഃ । വിമുക്തി-രി॑തി പാ॒യൌ । ഇതി മാനുഷീ᳚-സ്സമാ॒ജ്ഞാഃ ॥ അഥ ദൈ॒വീഃ । തൃപ്തി-രി॑തി വൃ॒ഷ്ടൌ । ബല-മി॑തി വി॒ദ്യുതി । ॥ 44.ബ് ॥
യശ ഇ॑തി പ॒ശുഷു । ജ്യോതിരിതി ന॑ക്ഷത്രേ॒ഷു ।
പ്രജാതി-രമൃത-മാനന്ദ ഇ॑ത്യുപ॒സ്ഥേ । സർവ മി॑ത്യാകാ॒ശേ ॥
ത-ത്പ്രതിഷ്ഠേ-ത്യു॑പാസീ॒ത । പ്രതിഷ്ഠാ॑വാ-ന്ഭ॒വതി । തന്മഹ ഇത്യു॑പാസീ॒ത । മ॑ഹാ-ന്ഭ॒വതി । തന്മന ഇത്യു॑പാസീ॒ത । മാന॑വാ-ന്ഭ॒വതി । ॥ 44.ച് ॥
തന്നമ ഇത്യു॑പാസീ॒ത । നമ്യന്തേ᳚-ഽസ്മൈ കാ॒മാഃ । തദ്ബ്രഹ്മേ-ത്യു॑പാസീ॒ത । ബ്രഹ്മ॑വാ-ന്ഭ॒വതി । ത-ദ്ബ്രഹ്മണഃ പരിമര ഇത്യു॑പാസീ॒ത । പര്യേണ-മ്മ്രിയന്തേ ദ്വിഷന്ത॑-സ്സപ॒ത്നാഃ । പരി യേ᳚-ഽപ്രിയാ᳚ ഭ്രാതൃ॒വ്യാഃ ॥ സ യശ്ചാ॑യ-മ്പു॒രുഷേ । യശ്ചാസാ॑-വാദി॒ത്യേ । സ ഏകഃ॑ । ॥ 44.ദ് ॥
സ യ॑ ഏവം॒-വിഁത് । അസ്മാല്-ലോ॑കാ-ത്പ്രേ॒ത്യ ।
ഏതമന്നമയ-മാത്മാന-മുപ॑സങ്ക്ര॒മ്യ ।
ഏത-മ്പ്രാണമയ-മാത്മാന-മുപ॑സങ്ക്ര॒മ്യ ।
ഏത-മ്മനോമയ-മാത്മാന-മുപ॑സങ്ക്ര॒മ്യ ।
ഏതം-വിഁജ്ഞാനമയ-മാത്മാന-മുപ॑സങ്ക്ര॒മ്യ ।
ഏത മാനന്ദമയ മാത്മാന മുപ॑സങ്ക്ര॒മ്യ ।
ഇമാന് ഁലോകാന് കാമാന്നീ കാമ-രൂപ്യ॑നുസ॒ഞ്ചരന്ന് ।
ഏത-ഥ്സാമ ഗാ॑യന്നാ॒സ്തേ ॥ ഹാ(3) വു॒ ഹാ(3) വു॒ ഹാ(3) വു॑ । ॥ 44എ ॥
അ॒ഹ-മന്ന-മ॒ഹ-മന്ന-മ॒ഹമന്നമ് ।
അ॒ഹമന്നാ॒ദോ(2)-ഽഹമന്നാ॒ദോ(2) ഽഹമന്നാ॒ദഃ ।
അ॒ഹഗ്ഗ് ശ്ലോക॒കൃ-ദ॒ഹഗ്ഗ് ശ്ലോക॒കൃ-ദ॒ഹഗ്ഗ് ശ്ലോക॒കൃത് । അ॒ഹമസ്മി പ്രഥമജാ ഋതാ(3) സ്യ॒ ।
പൂർവ-ന്ദേവേഭ്യോ അമൃതസ്യ നാ(3) ഭാ॒ ഇ॒ ।
യോ മാ ദദാതി സ ഇദേവ മാ(3)വാഃ॒ ।
അ॒ഹ-മന്ന॒-മന്ന॑-മ॒ദന്ത॒-മാ(3) ദ്മി॒ ।
അ॒ഹം-വിഁശ്വ॒-മ്ഭുവ॑ന॒-മഭ്യ॑ഭ॒വാമ് । സുവ॒ര്ന ജ്യോതീഃ᳚ ॥ യ ഏ॒വം-വേഁദ॑ ॥ ഇത്യു॑പ॒നിഷ॑ത് ॥ 44.f ॥
സ॒ഹ നാ॑ വവതു । സ॒ഹ നൌ॑ ഭുനക്തു । സ॒ഹ വീ॒ര്യ॑-ങ്കരവാവഹൈ । തേ॒ജ॒സ്വിനാ॒ വധീ॑തമസ്തു॒ മാ വി॑ദ്വിഷാ॒വഹൈ᳚ ॥ ഓം ശാന്തി॒-ശ്ശാന്തി॒-ശ്ശാന്തിഃ॑ ॥
(ഭൃഗു॒സ്ത്രയോ॑ദ॒ശാ - ന്ന॑മ് - പ്രാ॒ണോ - മനോ॑ - വി॒ജ്ഞാന॒-ന്ദ്വാദ॑ശ ദ്വാദശാ - ന॒ന്ദോ ദശാ - ന്ന॒-ന്ന നി॑ന്ദ്യാ॒ - ദന്ന॒-ന്ന പരി॑ചക്ഷീ॒താ -ന്ന॑-മ്ബ॒ഹുകു॑ർവി॒ തൈകാ॑ദശൈകാദശ॒ - ന കഞ്ച നൈക॑ഷഷ്ടി॒ര്ദശ॑ ) (അ. 15)
॥ ഇതി ഭൃഗുവല്ലീ സമാപ്താ ॥
(ശ-ന്നഃ॒ - ശീക്ഷാഗ്മ് - സ॒ഹ നൌ॒ - യ ॑007ആ;ഛന്ദ॑സാ॒മ് - ഭൂഃ - സ യഃ - പൃ॑ഥി॒ - വ്യോമി - ത്യൃത-ഞ്ചാ॒ - ഹമ് - ഁവേദമനുച്യ - ശ-ന്നഃ॑ - സ॒ഹ നാ॑വവതു - ബ്രഹ്മ॒വി-ദ്- ഭൃഗുഃ॒ പഞ്ച॑ദശ)
(ശ-ന്നോ॒ - മഹ॒ ഇത്യാ॑ദി॒ത്യോ - നോ ഇ॑തരാ॒ണ്യ - സ॑ന്നേ॒വാ - ന്ന॒-ന്ന നി॑ന്ദ്യാ॒ച്ചതു॑ശ്ചത്വാരിഗ്മ്ശത് )
(ശന്ന॒ - ഇത്യു॑പ॒നിഷ॑ത് )
॥ ഹരിഃ॑ ഓമ് ॥
॥ കൃഷ്ണ യജുർവേദീയ തൈത്തിരീയ ആരണ്യകേ നവമഃ പ്രപാഠക-സ്സമാപ്തഃ ॥
