kṛṣṇa yajurvēdīya taittirīya āraṇyakē navamaḥ prapāṭhakaḥ - bhṛguvallī
ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥
bhṛgu vallī
sa̠ha nā̍ vavatu । sa̠ha nau̍ bhunaktu । sa̠ha vī̠rya̍-ṅkaravāvahai । tē̠ja̠svinā̠ vadhī̍tamastu̠ mā vi̍dviṣā̠vahai̎ ॥
ōṃ śānti̠-śśānti̠-śśānti̍ḥ ॥
anuvākaṃ 15
bhṛgu̠rvai vā̍ru̠ṇiḥ । varu̍ṇa̠-mpita̍ra̠-mupa̍sasāra । adhī̍hi bhagavō̠ brahmēti̍ ॥ tasmā̍ ē̠ta-tprō̍vācha । anna̍-mprā̠ṇa-ñchakṣu̠-śśrōtra̠-mmanō̠ vācha̠miti̍ ॥
tagṃ hō̍vācha । yatō̠ vā i̠māni̠ bhūtā̍ni̠ jāya̍ntē ।
yēna̠ jātā̍ni̠ jīva̍nti । ya-tpraya̍ntya̠bhi saṃvi̍śanti ।
ta-dviji̍jñāsasva । ta-dbrahmēti̍ ॥
sa tapō̍-'tapyata । sa tapa̍-sta̠ptvā ॥ 35 ॥
anna̠-mbrahmēti̠ vya̍jānāt । a̠nnāddhyē̍va khalvi̠māni̠ bhūtā̍ni̠ jāya̍ntē । annē̍na̠ jātā̍ni̠ jīva̍nti । anna̠-mpraya̍ntya̠bhi-saṃvi̍śa̠ntīti̍ ॥ ta-dvi̠jñāya̍ । puna̍rē̠va varu̍ṇa̠-mpita̍ra̠-mupa̍sasāra । adhī̍hi bhagavō̠ brahmēti̍ । tagṃ hō̍vācha । tapa̍sā̠ brahma̠ viji̍jñāsasva ।
tapō̠ brahmēti̍ । sa tapō̍-'tapyata । sa tapa̍-sta̠ptvā ॥ 36 ॥
prā̠ṇō bra̠hmēti̠ vya̍jānāt । prā̠ṇāddhyē̍va khalvi̠māni̠ bhūtā̍ni̠ jāya̍ntē । prā̠ṇēna̠ jātā̍ni̠ jīva̍nti ।
prā̠ṇa-mpraya̍ntya̠bhi-saṃvi̍śa̠ntīti̍ ॥ ta-dvi̠jñāya̍ ।
puna̍rē̠va varu̍ṇa̠-mpita̍ra̠-mupa̍sasāra । adhī̍hi bhagavō̠ brahmēti̍ । tagṃ hō̍vācha । tapa̍sā̠ brahma̠ viji̍jñāsasva । tapō̠ brahmēti̍ । sa tapō̍-'tapyata । sa tapa̍-sta̠ptvā ॥ 37 ॥
manō̠ brahmēti̠ vya̍jānāt । mana̍sō̠ hyē̍va khalvi̠māni̠ bhūtā̍ni̠ jāya̍ntē । mana̍sā̠ jātā̍ni̠ jīva̍nti । mana̠ḥ praya̍ntya̠bhi-saṃvi̍śa̠ntīti̍ ॥ ta-dvi̠jñāya̍ । puna̍rē̠va varu̍ṇa̠-mpita̍ra̠-mupa̍sasāra । adhī̍hi bhagavō̠ brahmēti̍ । tagṃ hō̍vācha । tapa̍sā̠ brahma̠ viji̍jñāsasva ।
tapō̠ brahmēti̍ । sa tapō̍-'tapyata । sa tapa̍-sta̠ptvā ॥ 38 ॥
vi̠jñāna̠-mbrahmēti̠ vya̍jānāt ।
vi̠jñānā̠-ddhyē̍va khalvi̠māni̠ bhūtā̍ni̠ jāya̍ntē ।
vi̠jñānē̍na̠ jātā̍ni̠ jīva̍nti । vi̠jñāna̠-mpraya̍ntya̠bhi-saṃvi̍śa̠ntīti̍ ॥
ta-dvi̠jñāya̍ । puna̍rē̠va varu̍ṇa̠-mpita̍ra̠-mupa̍sasāra । adhī̍hi bhagavō̠ brahmēti̍ । tagṃ hō̍vācha । tapa̍sā̠ brahma̠ viji̍jñāsasva । tapō̠ brahmēti̍ । sa tapō̍-'tapyata । sa tapa̍-sta̠ptvā ॥ 39 ॥
ā̠na̠ndō bra̠hmēti̠ vya̍jānāt । ā̠nandā̠-ddhyē̍va-khalvi̠māni̠ bhūtā̍ni̠ jāya̍ntē ।
ā̠na̠ndēna̠ jātā̍ni̠ jīva̍nti । ā̠na̠nda-mpraya̍ntya̠bhi-saṃvi̍śa̠ntīti̍ ॥ saiṣā bhā̎rga̠vī vā̍ru̠ṇī vi̠dyā । pa̠ra̠mē vyō̍ma̠-nprati̍ṣṭhitā ॥ ya ē̠vaṃ vēda̠ prati̍tiṣṭhati । anna̍vānannā̠dō bha̍vati ।
ma̠hā-nbha̍vati pra̠jayā̍ pa̠śubhi̍-rbrahmavarcha̠sēna̍ ।
ma̠hān kī̠rtyā ॥ 40 ॥
anna̠-nna ni̍ndyāt । ta-dvra̠tam ॥ prā̠ṇō vā anna̎m । śarī̍ramannā̠dam । prā̠ṇē śarī̍ra̠-mprati̍ṣṭhitam । śarī̍rē prā̠ṇaḥ prati̍ṣṭhitaḥ ।
tadē̠ta-danna̠-mannē̠ prati̍ṣṭhitam ॥
sa ya ē̠ta-danna̠-mannē̠ prati̍ṣṭhita̠ṃ vēda̠ prati̍tiṣṭhati । anna̍vā-nannā̠dō bha̍vati ।
ma̠hā-nbha̍vati pra̠jayā̍ pa̠śubhi̍-rbrahmavarcha̠sēna̍ ।
ma̠hān kī̠rtyā ॥ 41 ॥
anna̠-nna pari̍chakṣīta । ta-dvra̠tam । āpō̠ vā anna̎m । jyōti̍rannā̠dam । a̠phsu jyōti̠ḥ prati̍ṣṭhitam । jyōti̠ṣyāpa̠ḥ prati̍ṣṭhitāḥ ।
tadē̠ta-danna̠-mannē̠ prati̍ṣṭhitam ॥
sa ya ē̠ta-danna̠-mannē̠ prati̍ṣṭhita̠ṃ vēda̠ prati̍tiṣṭhati । anna̍vā-nannā̠dō bha̍vati । ma̠hā-nbha̍vati pra̠jayā̍ pa̠śubhi̍-rbrahmavarcha̠sēna̍ ।
ma̠hān kīrtyā ॥ 42 ॥
anna̍-mba̠hu ku̍rvīta । ta-dvra̠tam ॥ pṛ̠thi̠vī vā anna̎m । ā̠kā̠śō̎-'nnā̠daḥ । pṛ̠thi̠vyā-mā̍kā̠śaḥ prati̍ṣṭhitaḥ । ā̠kā̠śē pṛ̍thi̠vī prati̍ṣṭhitā ।
tadē̠ta-danna̠-mannē̠ prati̍ṣṭhitam ॥
sa ya ē̠ta-danna̠-mannē̠ prati̍ṣṭhita̠ṃ vēda̠ prati̍tiṣṭhati । anna̍vānannā̠dō bha̍vati । ma̠hā-nbha̍vati pra̠jayā̍ pa̠śubhi̍-rbrahmavarcha̠sēna̍ ।
ma̠hān kī̠rtyā ॥ 43 ॥
na kañchana vasatau pratyā̍chakṣī̠ta । ta-dvra̠tam ॥
tasmādyayā kayā cha vidhayā bahva̍nna-mprā̠pnuyāt ॥
arāddhyasmā annami̍tyācha̠kṣatē ॥ ētadvai mukhatō̎-'nnagṃ rā̠ddham ।
mukhatō-'smā a̍nnagṃ rā̠ddhyatē । ētadvai maddhyatō̎-'nnagṃ rā̠ddham ।
maddhyatō-'smā a̍nnagṃ rā̠ddhyatē ।
ēdadvā antatō̎-'nnagṃ rā̠ddham ।
antatō-'smā a̍nnagṃ rā̠ddhyatē । ॥ 44-' ॥
ya ē̍vaṃ vē̠da ॥ kṣēma i̍ti vā̠chi । yōgakṣēma iti prā̍ṇāpā̠nayōḥ । karmē̍ti ha̠stayōḥ । gati-ri̍ti pā̠dayōḥ । vimukti-ri̍ti pā̠yau । iti mānuṣī̎-ssamā̠jñāḥ ॥ atha dai̠vīḥ । tṛpti-ri̍ti vṛ̠ṣṭau । bala-mi̍ti vi̠dyuti । ॥ 44.b ॥
yaśa i̍ti pa̠śuṣu । jyōtiriti na̍kṣatrē̠ṣu ।
prajāti-ramṛta-mānanda i̍tyupa̠sthē । sarva mi̍tyākā̠śē ॥
ta-tpratiṣṭhē-tyu̍pāsī̠ta । pratiṣṭhā̍vā-nbha̠vati । tanmaha ityu̍pāsī̠ta । ma̍hā-nbha̠vati । tanmana ityu̍pāsī̠ta । māna̍vā-nbha̠vati । ॥ 44.ch ॥
tannama ityu̍pāsī̠ta । namyantē̎-'smai kā̠māḥ । tadbrahmē-tyu̍pāsī̠ta । brahma̍vā-nbha̠vati । ta-dbrahmaṇaḥ parimara ityu̍pāsī̠ta । paryēṇa-mmriyantē dviṣanta̍-ssapa̠tnāḥ । pari yē̎-'priyā̎ bhrātṛ̠vyāḥ ॥ sa yaśchā̍ya-mpu̠ruṣē । yaśchāsā̍-vādi̠tyē । sa ēka̍ḥ । ॥ 44.d ॥
sa ya̍ ēva̠ṃ vit । asmāl-lō̍kā-tprē̠tya ।
ētamannamaya-mātmāna-mupa̍saṅkra̠mya ।
ēta-mprāṇamaya-mātmāna-mupa̍saṅkra̠mya ।
ēta-mmanōmaya-mātmāna-mupa̍saṅkra̠mya ।
ētaṃ vijñānamaya-mātmāna-mupa̍saṅkra̠mya ।
ēta mānandamaya mātmāna mupa̍saṅkra̠mya ।
imān ँlōkān kāmānnī kāma-rūpya̍nusa̠ñcharann ।
ēta-thsāma gā̍yannā̠stē ॥ hā(3) vu̠ hā(3) vu̠ hā(3) vu̍ । ॥ 44e ॥
a̠ha-manna-ma̠ha-manna-ma̠hamannam ।
a̠hamannā̠dō(2)-'hamannā̠dō(2) 'hamannā̠daḥ ।
a̠hagg ślōka̠kṛ-da̠hagg ślōka̠kṛ-da̠hagg ślōka̠kṛt । a̠hamasmi prathamajā ṛtā(3) sya̠ ।
pūrva-ndēvēbhyō amṛtasya nā(3) bhā̠ i̠ ।
yō mā dadāti sa idēva mā(3)vā̠ḥ ।
a̠ha-manna̠-manna̍-ma̠danta̠-mā(3) dmi̠ ।
a̠haṃ viśva̠-mbhuva̍na̠-mabhya̍bha̠vām । suva̠rna jyōtī̎ḥ ॥ ya ē̠vaṃ vēda̍ ॥ ityu̍pa̠niṣa̍t ॥ 44.f ॥
sa̠ha nā̍ vavatu । sa̠ha nau̍ bhunaktu । sa̠ha vī̠rya̍-ṅkaravāvahai । tē̠ja̠svinā̠ vadhī̍tamastu̠ mā vi̍dviṣā̠vahai̎ ॥ ōṃ śānti̠-śśānti̠-śśānti̍ḥ ॥
(bhṛgu̠strayō̍da̠śā - nna̍m - prā̠ṇō - manō̍ - vi̠jñāna̠-ndvāda̍śa dvādaśā - na̠ndō daśā - nna̠-nna ni̍ndyā̠ - danna̠-nna pari̍chakṣī̠tā -nna̍-mba̠huku̍rvi̠ taikā̍daśaikādaśa̠ - na kañcha naika̍ṣaṣṭi̠rdaśa̍ ) (a. 15)
॥ iti bhṛguvallī samāptā ॥
(śa-nna̠ḥ - śīkṣāgṃ - sa̠ha nau̠ - ya ̍007ā;Chanda̍sā̠m - bhūḥ - sa yaḥ - pṛ̍thi̠ - vyōmi - tyṛta-ñchā̠ - ham - ँvēdamanuchya - śa-nna̍ḥ - sa̠ha nā̍vavatu - brahma̠vi-d- bhṛgu̠ḥ pañcha̍daśa)
(śa-nnō̠ - maha̠ ityā̍di̠tyō - nō i̍tarā̠ṇya - sa̍nnē̠vā - nna̠-nna ni̍ndyā̠chchatu̍śchatvārigṃśat )
(śanna̠ - ityu̍pa̠niṣa̍t )
॥ hari̍ḥ ōm ॥
॥ kṛṣṇa yajurvēdīya taittirīya āraṇyakē navamaḥ prapāṭhaka-ssamāptaḥ ॥
