KYTB 3.11 Nachiketachayanam - Krishna Yajurveda Taittiriya Brahmana Katha Prashna Patha - Lokosi Svargosi - English

anuvākaṃ 1 - iṣṭakōpadhānamantrāḥ
lō̠kō̍-'si sva̠rgō̍-'si । a̠na̠ntō̎-'sya pā̠rō̍-'si ।
akṣi̍tō-'sya kṣa̠yyō̍-'si । tapa̍saḥ prati̠ṣṭhā । tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam । viśva̍sya bha̠rtā viśva̍sya janayi̠tā । tantvōpa̍dadhē kāma̠dugha̠-makṣi̍tam । pra̠jāpa̍tistvā sādayatu । tayā̍ dē̠vata̍yā-'ṅgira̠sva-ddhru̠vā sī̍da ॥ 1 ॥

tapō̍-'si lō̠kē śri̠tam । tēja̍saḥ prati̠ṣṭhā । tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtṛ viśva̍sya janayi̠tṛ ।
ta-ttvōpa̍dadhē kāma̠dugha̠-makṣi̍tam ।
pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 2 ॥

tējō̍-'si̠ tapa̍si śri̠tam । sa̠mu̠drasya̍ prati̠ṣṭhā ।
tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtṛviśva̍sya janayi̠tṛ ।
ta-ttvōpa̍dadhē kāma̠dugha̠-makṣi̍tam ।
pra̠jāpa̍tistvā sādayatu । tayā̍ dē̠vata̍yā-'ṅgira̠sva-ddhru̠vā sī̍da ॥ 3 ॥

sa̠mu̠drō̍-'si̠ tēja̍si śri̠taḥ । a̠pā-mpra̍ti̠ṣṭhā । tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtā viśva̍sya janayi̠tā ।
ta-ntvōpa̍dadhē kāma̠dugha̠-makṣi̍tam ।
pra̠jāpa̍tistvā sādayatu । tayā̍ dē̠vata̍yā-'ṅgira̠sva-ddhru̠vā sī̍da ॥ 4 ॥

āpa̍-sstha samu̠drē śri̠tāḥ । pṛ̠thi̠vyāḥ pra̍ti̠ṣṭhā yu̠ṣmāsu̍ । i̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam । viśva̍sya bha̠rtryō̍ viśva̍sya janayi̠trya̍ḥ । tā va̠ upa̍dadhē kāma̠dughā̠ akṣi̍tāḥ । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 5 ॥

pṛ̠thi̠vya̍-sya̠phsu śri̠tā । a̠gnēḥ pra̍ti̠ṣṭhā । tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam । viśva̍sya bha̠rtrī viśva̍sya janayi̠trī । tā-ntvōpa̍dadhē kāma̠dughā̠-makṣi̍tām । pra̠jāpa̍tistvā sādayatu । tayā̍ dē̠vata̍yā-'ṅgira̠sva-ddhru̠vā sī̍da ॥ 6 ॥

a̠gnira̍si pṛthi̠vyāg śri̠taḥ । a̠ntari̍kṣasya prati̠ṣṭhā । tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtā viśva̍sya janayi̠tā । ta-ntvōpa̍dadhē kāma̠dugha̠-makṣi̍tam । pra̠jāpa̍tistvā sādayatu । tayā̍ dē̠vata̍yā-'ṅgira̠sva-ddhru̠vā sī̍da ॥ 7 ॥

a̠ntari̍kṣa-masya̠gnau śri̠tam ।
vā̠yōḥ pra̍ti̠ṣṭhā । tvayī̠dama̠ntaḥ ।
viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtṛ viśva̍sya janayi̠tṛ ।
ta-ttvōpa̍dadhē kāma̠dugha̠-makṣi̍tam । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 8 ॥

vā̠yura̍sya̠ntari̍kṣē śri̠taḥ । di̠vaḥ pra̍ti̠ṣṭhā । tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtā viśva̍sya janayi̠tā ।
ta-ntvōpa̍dadhē kāma̠dugha̠-makṣi̍tam । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 9 ॥

dyaura̍si vā̠yau śri̠tā । ā̠di̠tyasya̍ prati̠ṣṭhā । tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtrī viśva̍sya janayi̠trī ।
tā-ntvōpa̍dadhē kāma̠dughā̠-makṣi̍tām । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 10 ॥

ā̠di̠tyō̍-'si di̠vi śri̠taḥ । cha̠ndrama̍saḥ prati̠ṣṭhā । tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtā viśva̍sya janayi̠tā ।
ta-ntvōpa̍dadhē kāma̠dugha̠-makṣi̍tam । pra̠jāpa̍tistvā sādayatu । tayā̍ dē̠vata̍yā-'ṅgira̠sva-ddhru̠vā sī̍da ॥ 11 ॥

cha̠ndramā̍ asyādi̠tyē śri̠taḥ ।
nakṣa̍trāṇā-mprati̠ṣṭhā । tvayī̠dama̠ntaḥ ।
viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam । viśva̍sya bha̠rtā viśva̍sya janayi̠tā । ta-ntvōpa̍dadhē kāma̠dugha̠-makṣi̍tam । pra̠jāpa̍tistvā sādayatu । tayā̍ dē̠vata̍yā-'ṅgira̠sva-ddhru̠vā sī̍da ॥ 12 ॥

nakṣa̍trāṇi stha cha̠ndrama̍si śri̠tāni̍ । sa̠ṃva̠thsa̠rasya̍ prati̠ṣṭhā yu̠ṣmāsu̍ ।
i̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtṝṇi̠ viśva̍sya janayi̠tṝṇi̍ ।
tāni̍ va̠ upa̍dadhē kāma̠dughā̠-nyakṣi̍tāni । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 13 ॥

sa̠ṃva̠thsa̠rō̍-'si̠ nakṣa̍trēṣu śri̠taḥ । ṛ̠tū̠nā-mpra̍ti̠ṣṭhā । tvayī̠dama̠ntaḥ ।
viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam । viśva̍sya bha̠rtā viśva̍sya janayi̠tā । ta-ntvōpa̍dadhē kāma̠dugha̠-makṣi̍tam । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 14 ॥
ṛ̠tava̍-sstha saṃvathsa̠rē śri̠tāḥ ।
māsā̍nā-mprati̠ṣṭhā yu̠ṣmāsu̍ ।
i̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtārō̠ viśva̍sya janayi̠tāra̍ḥ ।
tān. va̠ upa̍dadhē kāma̠dughā̠-nakṣi̍tān । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 15 ॥

māsā̎-sstha̠rtuṣu̍ śri̠tāḥ । a̠drdha̠mā̠sānā̎-mprati̠ṣṭhā yu̠ṣmāsu̍ । i̠dama̠ntaḥ ।
viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam । viśva̍sya bha̠rtārō̠ viśva̍sya janayi̠tāra̍ḥ । tān. va̠ upa̍dadhē kāma̠dughā̠-nakṣi̍tān । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 16 ॥

a̠drdha̠mā̠sā-sstha̍ mā̠su śri̠tāḥ । a̠hō̠rā̠trayō̎ḥ prati̠ṣṭhā yu̠ṣmāsu̍ ।
i̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtārō̠ viśva̍sya janayi̠tāra̍ḥ ।
tān. va̠ upa̍dadhē kāma̠dughā̠-nakṣi̍tān । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 17 ॥

a̠hō̠rā̠trē sthō̎-'drdhamā̠sēṣu̍ śri̠tē । bhū̠tasya̍ prati̠ṣṭhē bhavya̍sya prati̠ṣṭhē ।
yu̠vayō̍-ri̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtryau̍ viśva̍sya janayi̠tryau̎ । tē vā̠mupa̍dadhē kāma̠dughē̠ akṣi̍tē ।
pra̠jāpa̍tistvā sādayatu । tayā̍ dē̠vata̍yā-'ṅgira̠sva-ddhru̠vā sī̍da ॥ 18 ॥

pau̠rṇa̠mā̠syaṣṭa̍kā 'māvā̠syā̎ । a̠nnā̠dā-ssthā̎nna̠dughō̍ yu̠ṣmāsu̍ ।
i̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtryō̍ viśva̍sya janayi̠trya̍ḥ ।
tā va̠ upa̍dadhē kāma̠dughā̠-akṣi̍tāḥ । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 19 ॥

rāḍa̍si bṛha̠tī śrīra̠sīndra̍patnī̠ dharma̍patnī । viśva̍-mbhū̠tamanu̠ prabhū̍tā ।
tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtrī viśva̍sya janayi̠trī । tā-ntvōpa̍dadhē kāma̠dughā̠-makṣi̍tām ।
pra̠jāpa̍tistvā sādayatu । tayā̍ dē̠vata̍yā-'ṅgira̠sva-ddhru̠vā sī̍da ॥ 20 ॥

ōjō̍-'si̠ sahō̍-'si । bala̍masi̠ bhrājō̍-'si ।
dē̠vānā̠-ndhāmā̠mṛta̎m । ama̍rtya-stapō̠jāḥ । tvayī̠dama̠ntaḥ । viśva̍ṃ ya̠kṣaṃ viśva̍-mbhū̠taṃ viśvagṃ̍ subhū̠tam ।
viśva̍sya bha̠rtā viśva̍sya janayi̠tā ।
ta-ntvōpa̍dadhē kāma̠dugha̠-makṣi̍tam । pra̠jāpa̍tistvā sādayatu ।
tayā̍ dē̠vata̍yā-'ṅgira̠sva-ddhru̠vā sī̍da ॥ 21 ॥
lō̠ka - stapa̠ - stēja̍ḥ - samu̠dra - āpa̍ḥ - pṛthi̠vya̍ - gni - ra̠ntari̍kṣam - vā̠yu--r dyau - rā̍di̠tya - ścha̠ndramā̠ - nakṣa̍trāṇi - saṃvathsa̠ra - ṛ̠tavō̠ - māsā̍ - adrdhamā̠sā - a̍hōrā̠trē - pau̎rṇamā̠sī - rāḍa̠ - syōjō̠-'syēka̍vigṃśatiḥ (a. 1)

lō̠kō̍-'si bha̠rtā tam । tapa̠stējō̍-'si bha̠rtṛ tat ।
sa̠mu̠drō̍-'si bha̠rtā tam । āpa̍-sstha bha̠rtrya̍stā va̍ḥ । pṛ̠thi̠vī bha̠rtrī tām ।
a̠gnira̍si bha̠rtā tam । a̠ntari̍kṣa-mbha̠rtṛ tat । vā̠yura̍si bha̠rtā tam । dyaura̍si bha̠rtrī tām ।
ā̠di̠tyaścha̠ndramā̍ bha̠rtā tam । nakṣa̍trāṇi stha bha̠rtṝṇi̠ tāni̍ vaḥ । sa̠ṃva̠thsa̠rō̍-'si bha̠rtā tam ।
ṛ̠tavō̠ māsā̍ adrdhamā̠sā bha̠rtāra̠stān. va̍ḥ ।
a̠hō̠rā̠trē bha̠rtryau̍ tē vā̎m । pau̠rṇa̠mā̠sī bha̠rtrya̍stā va̍ḥ । rāḍa̍si bha̠rtrī tām । ōjō̍-'si bha̠rtā tamēka̍vigṃśatiḥ ।

anuvākaṃ 2 - chaturbhiranuvākai-śchatasra āhutīrjuhōti
tvama̍gnē ru̠drō asu̍rō ma̠hō di̠vaḥ ।
tvagṃ śardhō̠ māru̍ta-mpṛ̠kṣa ī̍śiṣē ।
tvaṃ vātai̍raru̠ṇairyā̍si śaṅga̠yaḥ ।
tva-mpū̠ṣā vi̍dha̠taḥ pā̍si̠ nu tmanā̎ ।
dēvā̍ dē̠vēṣu̍ śrayaddhvam । pratha̍mā dvi̠tīyē̍ṣu śrayaddhvam ।
dvitī̍yā-stṛ̠tīyē̍ṣu śrayaddhvam ।
tṛtī̍yā-śchatu̠rthēṣu̍ śrayaddhvam ।
cha̠tu̠rthāḥ pa̍ñcha̠mēṣu̍ śrayaddhvam । pa̠ñcha̠mā-ṣṣa̠ṣṭhēṣu̍ śrayaddhvam ॥ 22 ॥

ṣa̠ṣṭhā-ssa̍pta̠mēṣu̍ śrayaddhvam । sa̠pta̠mā a̍ṣṭa̠mēṣu̍ śrayaddhvam ।
a̠ṣṭa̠mā na̍va̠mēṣu̍ śrayaddhvam ।
na̠va̠mā da̍śa̠mēṣu̍ śrayaddhvam ।
da̠śa̠mā ē̍kāda̠śēṣu̍ śrayaddhvam । ē̠ka̠da̠śā dvā̍da̠śēṣu̍ śrayaddhvam ।
dvā̠da̠śā-stra̍yōda̠śēṣu̍ śrayaddhvam ।
tra̠yō̠da̠śā-ścha̍turda̠śēṣu̍ śrayaddhvam । cha̠tu̠rda̠śāḥ pa̍ñchada̠śēṣu̍ śrayaddhvam ।
pa̠ñcha̠da̠śā-ṣṣō̍ḍa̠śēṣu̍ śrayaddhvam ॥ 23 ॥

ṣō̠ḍa̠śā-ssa̍ptada̠śēṣu̍ śrayaddhvam । sa̠pta̠da̠śā a̍ṣṭāda̠śēṣu̍ śrayaddhvam ।
a̠ṣṭā̠da̠śā ē̍kānnavi̠gṃ̠śēṣu̍ śrayaddhvam ।
ē̠kā̠nna̠vi̠gṃ̠śā vi̠gṃ̠śēṣu̍ śrayaddhvam ।
vi̠gṃ̠śā ē̍kavi̠gṃ̠śēṣu̍ śrayaddhvam ।
ē̠ka̠vi̠gṃ̠śā dvā̍vi̠gṃ̠śēṣu̍ śrayaddhvam ।
dvā̠vi̠gṃ̠śā stra̍yōvi̠gṃ̠śēṣu̍ śrayaddhvam ।
tra̠yō̠vi̠gṃ̠śā ścha̍turvi̠gṃ̠śēṣu̍ śrayaddhvam ।
cha̠tu̠rvi̠gṃ̠śāḥ pa̍ñchavi̠gṃ̠śēṣu̍ śrayaddhvam ।
pa̠ñcha̠vi̠gṃ̠śā-ṣṣa̍ḍvi̠gṃ̠śēṣu̍ śrayaddhvam ॥ 24 ॥

ṣa̠ḍvi̠gṃ̠śā-ssa̍ptavi̠gṃ̠śēṣu̍ śrayaddhvam ।
sa̠pta̠vi̠gṃ̠śā a̍ṣṭāvi̠gṃ̠śēṣu̍ śrayaddhvam ।
a̠ṣṭā̠vi̠gṃ̠śā ē̍kānnatri̠gṃ̠śēṣu̍ śrayaddhvam ।
ē̠kā̠nna̠tri̠gṃ̠śā stri̠gṃ̠śēṣu̍ śrayaddhvam ।
tri̠gṃ̠śā ē̍katri̠gṃ̠śēṣu̍ śrayaddhvam ।
ē̠ka̠tri̠gṃ̠śā dvā̎tri̠gṃ̠śēṣu̍ śrayaddhvam ।
dvā̠tri̠gṃ̠śā stra̍yastri̠gṃ̠śēṣu̍
śrayaddhvam ।
dēvā̎strirē-kādaśā̠ stristra̍yastrigṃśāḥ ।
utta̍rē bhavata । utta̍ra vartmāna̠ utta̍ra satvānaḥ ।
yatkā̍ma i̠da-ñju̠hōmi̍ । tanmē̠ samṛ̍ddhyatām ।
va̠yagg syā̍ma̠ pata̍yō rayī̠ṇām । bhūrbhuva̠sva̍-ssvāhā̎ ॥ 25 ॥
(ṣa̠ṣṭhēṣu̍ śrayaddhavagṃ - ṣōḍa̠śēṣu̍ śrayaddhavagṃ - ṣaḍvi̠gṃ̠śēṣu̍ śrayaddhva̠ - mutta̍rasatvānaścha̠tvāri̍ cha) (a. 2)

anuvākaṃ 3 - chaturbhiranuvākai-śchatasra āhutīrjuhōti
agnā̍viṣṇū sa̠jōṣa̍sā । i̠mā va̍rdhantu vā̠ṅgira̍ḥ । dyu̠mnai rvājē̍bhi̠-rāga̍tam । rājñī̍ vi̠rājñī̎ । sa̠mrājñī̎ sva̠rājñī̎ । a̠rchi-śśō̠chiḥ । tapō̠ harō̠ bhāḥ । a̠gni-ssōmō̠ bṛha̠spati̍ḥ ।
viśvē̍ dē̠vā bhuva̍nasya gō̠pāḥ । tē sarvē̍ sa̠ṅgatya̍ । i̠da-mmē̠ prāva̍tā̠ vacha̍ḥ । va̠yagg syā̍ma̠ pata̍yō rayī̠ṇām ।
bhū-rbhuva̠s-sva̍s svāhā̎ ॥ 26 ॥
(sa̠ṅgatya̠ trīṇi̍ cha) (a. 3)

anuvākaṃ 4 - chaturbhiranuvākai-śchatasra āhutīrjuhōti
anna̍pa̠tē 'nna̍sya nō dēhi । a̠na̠mī̠vasya̍ śu̠ṣmiṇa̍ḥ । prapra̍dā̠tāra̍ntāriṣaḥ । ūrja̍-nnō dhēhi dvi̠padē̠ chatu̍ṣpadē । agnē̍ pṛthivīpatē । sōma̍ vīrudhā-mpatē । tvaṣṭa̍-ssamidhā-mpatē ।
viṣṇa̍vāśānā-mpatē । mitra̍ satyānā-mpatē । varu̍ṇa dharmaṇā-mpatē ॥ 27 ॥

ma̠rutō̍ gaṇānā-mpatayaḥ । rudra̍ paśūnā-mpatē । indrau̍jasā-mpatē । bṛha̍spatē brahmaṇaspatē ।
ā ru̠chā rō̍chē̠-'hagg sva̠yam ।
ru̠chā ru̍ruchē̠-rōcha̍mānaḥ । a̠tītyā̠da-ssva̍rābha̍rē̠ha । tasmi̠n̠. yōnau̎ praja̠nau prajā̍yēya । va̠yagg syā̍ma̠ pata̍yō rayī̠ṇām ।
bhūrbhuva̠-ssva̍-ssvāhā̎ ॥ 28 ॥
[varu̍ṇa dharmaṇā-mpatē̠ sva̍ḥ - svāhā̎ ] (a. 4)

anuvākaṃ 5 - chaturbhiranuvākai-śchatasra āhutīrjuhōti
sa̠pta tē̍ agnē sa̠midha̍-ssa̠pta ji̠hvāḥ ।
sa̠ptarṣa̍ya-ssa̠ptadhāma̍ pri̠yāṇi̍ ।
sa̠pta hōtrā̍ anu vi̠dvān ।
sa̠pta yōnī̠-rāpṛ̍ṇasvā ghṛ̠tēna̍ । prāchī̠ dik । a̠gni rdē̠vatā̎ । a̠gnigṃ sa di̠śā-ndē̠va-ndē̠vatā̍nā-mṛchChatu । yō mai̠tasyai̍
di̠śō̍ 'bhi̠dāsa̍ti । da̠kṣi̠ṇā dik । indrō̍ dē̠vatā̎ ॥ 29 ॥

indra̠gṃ̠ sa di̠śā-ndē̠va-ndē̠vatā̍nā-mṛchChatu ।
yō mai̠tasyai̍ di̠śō̍ 'bhi̠dāsa̍ti । pra̠tīchī̠ dik । sōmō̍ dē̠vatā̎ । sōma̠gṃ̠ sa di̠śā-ndē̠va-ndē̠vatā̍nā-mṛchChatu । yō mai̠tasyai̍ di̠śō̍ 'bhi̠dāsa̍ti । udī̍chī̠ dik । mi̠trāvaru̍ṇau dē̠vatā̎ ।
mi̠trāvaru̍ṇau̠ sa di̠śā-ndē̠vau dē̠vatā̍nā-mṛchChatu । yō mai̠tasyai̍ di̠śō̍ 'bhi̠dāsa̍ti ॥ 30 ॥

ū̠drdhvā dik । bṛha̠spati̍ rdē̠vatā̎ ।
bṛha̠spati̠gṃ̠ sa di̠śā-ndē̠va-ndē̠vatā̍nā-mṛchChatu । yō mai̠tasyai̍ di̠śō̍ 'bhi̠dāsa̍ti ।
i̠yandik । adi̍ti rdē̠vatā̎ । adi̍ti̠gṃ ̠ sa di̠śā-ndē̠vī-ndē̠vatā̍nā-mṛchChatu ।
yō mai̠tasyai̍ di̠śō̍ 'bhi̠dāsa̍ti ।
puru̍ṣō̠ dik । puru̍ṣō mē̠ kāmā̠-nthsama̍rdhayatu ॥ 31 ॥

a̠ndhō jāgṛ̍viḥ prāṇa । asā̠vēhi̍ । ba̠dhi̠ra ā̎krandayita-rapāna । asā̠vēhi̍ । u̠ṣasa̍-muṣasa-maśīya । a̠hamasō̠ jyōti̍raśīya ।
a̠hamasō̠ 'pō̍śīya । va̠yagg syā̍ma̠ pata̍yō rayī̠ṇām । bhūrbhuva̠-ssva̍-ssvāhā̎ ॥ 32 ॥
(da̠kṣi̠ṇā digindrō̍ dē̠vatā̍ - mi̠trāvaru̍ṇau̠ sa di̠śā-ndē̠vau dē̠vatā̍nāmṛchChatu̠
yō mai̠tasyai̍ di̠śō̍-'bhi̠dā - sa̍tyadrdhayatu̠ - +nava̍ cha) (a. 5)

anuvākaṃ 6 - upasthānam
yattē-'chi̍ta̠ṃ yadu̍ chi̠tantē̍ agnē । yatta̍ ū̠naṃ yadu̠ tē-'ti̍riktam । ā̠di̠tyāsta-daṅgi̍rasa-śchinvantu । viśvē̍ tē dē̠vāśchiti̠-māpū̍rayantu ।
chi̠taśchāsi̠ sañchi̍taśchā-syagnē । ē̠tāvā̠g̠śchāsi̠ bhūyāg̍śchāsyagnē ॥ lō̠ka-mpṛ̍ṇa chChi̠dra-mpṛ̍ṇa । athō̍ sīda śi̠vā tvam ।
i̠ndrā̠gnī tvā̠ bṛha̠spati̍ḥ । a̠smin. yōnā̍vasīṣadann ॥ 33 ॥

tayā̍ dē̠vata̍yā-'ṅgira̠sva-ddhru̠vā sī̍da ॥
tā a̍sya̠ sūda̍dōhasaḥ ।
sōmagg̍ śrīṇanti̠ pṛśna̍yaḥ ।
janma̍-ndē̠vānā̠ṃ viśa̍ḥ ।
tri̠ṣvā rō̍cha̠nē di̠vaḥ ।
tayā̍ dē̠vata̍yā-'ṅgira̠sva-ddhru̠vā sī̍da ॥
agnē̍ dē̠vāgṃ i̠hāva̍ha । ja̠jñā̠nō vṛ̠kta ba̍rhiṣē । asi̠ hōtā̍ na̠ īḍya̍ḥ ॥
aga̍nma ma̠hā mana̍sā̠ yavi̍ṣṭham ॥ 34 ॥

yō dī̠dāya̠ sami̍ddha̠-ssvē du̍rō̠ṇē । chi̠trabhā̍nū̠ rōda̍sī a̠ntaru̠rvī ।
svā̍hutaṃ vi̠śvata̍ḥ pra̠tyañcha̎m ॥ mē̠dhā̠kā̠raṃ vi̠datha̍sya pra̠sādha̍nam ।
a̠gnigṃ hōtā̍ra-mpari̠bhūta̍ma-mma̠tim । tvāmarbha̍sya ha̠viṣa̍-ssamā̠namit ।
tvā-mma̠hō vṛ̍ṇatē̠ narō̠ nānyan-tvat ॥ ma̠nu̠ṣvattvā̠ nidhī̍mahi ।
ma̠nu̠ṣva-thsami̍dhīmahi ।
agnē̍ manu̠ṣva-da̍ṅgiraḥ ॥ 35 ॥

dē̠vā-ndē̍vāya̠tē ya̍ja ॥ a̠gnir-hi vā̠jina̍ṃ vi̠śē । dadā̍ti vi̠śvacha̍rṣaṇiḥ ।
a̠gnī rā̠yē svā̠bhuva̎m । sa prī̠tō yā̍ti̠ vārya̎m । iṣagg̍ stō̠tṛbhya̠ ābha̍ra ॥
pṛ̠ṣṭō di̠vi pṛ̠ṣṭō a̠gniḥ pṛ̍thi̠vyām । pṛ̠ṣṭō viśvā̠ ōṣa̍dhī̠-rāvi̍vēśa ।
vai̠śvā̠na̠ra-ssaha̍sā pṛ̠ṣṭō a̠gniḥ ।
sa nō̠ divā̠ sa ri̠ṣaḥ pā̍tu̠ nakta̎m ॥ 36 ॥
[a̠sī̠ṣa̠da̠n̠. - yavi̍ṣṭha - maṅgirō̠ - nakta̎m ] (a. 6)
anuvākaṃ 7 - nāchikētabrāhmaṇa-ntatra āgnidēvatōpāsanam
a̠yaṃ vāva yaḥ pava̍tē । sō̎-'gni nā̍rchikē̠taḥ ।
sa ya-tprā-mpava̍tē । tada̍sya̠ śira̍ḥ । atha̠ ya-dda̍kṣi̠ṇā । sa dakṣi̍ṇaḥ pa̠kṣaḥ ।
atha̠ ya-tpra̠tyak । ta-tpuchCha̎m । ya dudaṅṅ̍ ।
sa utta̍raḥ pa̠kṣaḥ ॥ 37 ॥

atha̠ ya-thsa̠ṃvāti̍ । tada̍sya sa̠mañcha̍na-ñcha pra̠sāra̍ṇa-ñcha । athō̍ sa̠pandē̠vāsya̠ sā ॥ sagṃ ha̠ vā a̍smai̠ sa kāma̍ḥ padyatē ।
ya-tkā̍mō̠ yaja̍tē । yō̎-'gni-nnā̍chikē̠ta-ñchi̍nu̠tē ।
ya u̍ chaina-mē̠vaṃ vēda̍ ॥ yō ha̠ vā a̠gnē rnā̍chikē̠tasyā̠yata̍na-mprati̠ṣṭhāṃ vēda̍ । ā̠yata̍navā-nbhavati । gachCha̍ti prati̠ṣṭhām ॥ 38 ॥

hira̍ṇya̠ṃ vā a̠gnē rnā̍chikē̠tasyā̠yata̍na-mprati̠ṣṭhā । ya ē̠vaṃ vēda̍ ।
ā̠yata̍navā-nbhavati । gachCha̍ti prati̠ṣṭhām ॥
yō ha̠ vā a̠gnē rnā̍chikē̠tasya̠ śarī̍ra̠ṃ vēda̍ ।
sa śa̍rīra ē̠va sva̠rgaṃ lō̠kamē̍ti ।
hira̍ṇya̠ṃ vā a̠gnē rnā̍chikē̠tasya̠ śarī̍ram ।
ya ē̠vaṃ vēda̍ । sa śa̍rīra ē̠va sva̠rgaṃ lō̠kamē̍ti ॥ athō̠ yathā̍ ru̠kma ut-ta̍ptō
bhā̠yyāt ॥ 39 ॥

ē̠vamē̠va sa tēja̍sā̠ yaśa̍sā ।
a̠smiggścha̍ lō̠kē̍-'muṣmigg̍ścha bhāti ॥
u̠ravō̍ ha̠ vai nāmai̠tē lō̠kāḥ ।
yē-'va̍rēṇādi̠tyam । atha̍ hai̠tē varī̍yāgṃsō lō̠kāḥ । yē parē̍ṇādi̠tyam । anta̍vantagṃ ha̠ vā ē̠ṣa kṣa̠yyaṃ lō̠ka-ñja̍yati ।
yō-'va̍rēṇādi̠tyam ।
atha̍ hai̠ṣō̍-'na̠nta-ma̍pā̠ra-ma̍kṣa̠yyaṃ lō̠ka-ñja̍yati । yaḥ parē̍ṇādi̠tyam ॥ 40 ॥

a̠na̠ntagṃ ha̠ vā a̍pā̠ra-ma̍kṣa̠yyaṃ lō̠ka-ñja̍yati । yō̎-'gni-nnā̍chikē̠ta-ñchi̍nu̠tē ।
ya u̍ chaina-mē̠vaṃ vēda̍ ॥
athō̠ yathā̠ rathē̠ tiṣṭha̠-npakṣa̍sī paryā̠-varta̍mānē pra̠tyapē̎kṣatē ।
ē̠va-ma̍hōrā̠trē pra̠tyapē̎kṣatē ।
nāsyā̍-hōrā̠trē lō̠kamā̎pnutaḥ ।
yō̎-'gni-nnā̍chi̠kēta-ñchi̍nu̠tē ।
ya u̍ chaina-mē̠vaṃ vēda̍ ॥ 41 ॥
(utta̍raḥ pa̠kṣō - gachCha̍ti prati̠ṣṭhāṃ - bhā̠yyā--dyaḥ parē̍ṇādi̠tya - +ma̠ṣṭau cha̍) (a. 7)

anuvākaṃ 8 - nāchikētōpākhyānam
u̠śan. ha̠ vai vā̍jaśrava̠sa-ssa̍rvavēda̠sa-nda̍dau । tasya̍ ha̠ nachi̍kētā̠ nāma̍ pu̠tra ā̍sa । tagṃ ha̍ kumā̠ragṃ santa̎m । dakṣi̍ṇāsu nī̠yamā̍nāsu śra̠ddhā ''vi̍vēśa । sa hō̍vācha ।
tata̠ kasmai̠ mā-ndā̎sya̠sīti̍ । dvi̠tīya̍-ntṛ̠tīya̎m ॥ tagṃ ha̠ parī̍ta uvācha ।
mṛ̠tyavē̎ tvā dadā̠mīti̍ ॥ tagṃ ha̠ smōtthi̍ta̠ṃ vāga̠bhiva̍dati ॥ 42 ॥

gauta̍ma kumā̠ramiti̍ । sa hō̍vācha । parē̍hi mṛ̠tyō rgṛ̠hān । mṛ̠tyavē̠ vai tvā̍-'dā̠-miti̍ ॥ taṃ vai pra̠vasa̍nta-ṅga̠ntāsīti̍ hōvācha । tasya̍ sma ti̠srō rātrī̠-ranā̎śvā-ngṛ̠hē va̍satāt । sa yadi̍ tvā pṛ̠chChēt । kumā̍ra̠ kati̠ rātrī̍-ravāthsī̠-riti̍ । ti̠sra iti̠ prati̍ brūtāt । ki-mpra̍tha̠māgṃ rātri̍-māśñā̠ iti̍ ॥ 43 ॥

pra̠jā-nta̠ iti̍ । ki-ndvi̠tīyā̠-miti̍ । pa̠śūgsta̠ iti̍ ।
ki-ntṛ̠tīyā̠-miti̍ । sā̠dhu̠kṛ̠tyā-nta̠ iti̍ ॥ taṃ vai pra̠vasa̍nta-ñjagāma । tasya̍ ha ti̠srō rātrī̠-ranā̎śvā-ngṛ̠ha u̍vāsa । tamā̠gatya̍ paprachCha ।
kumā̍ra̠ kati̠ rātrī̍-ravāthsī̠-riti̍ । ti̠sra iti̠ pratyu̍vācha ॥ 44 ॥

ki-mpra̍tha̠māgṃ rātri̍-māśñā̠ iti̍ । pra̠jā-nta̠ iti̍ । ki-ndvi̠tīyā̠-miti̍ । pa̠śūgsta̠ iti̍ । ki-ntṛ̠tīyā̠-miti̍ । sā̠dhu̠kṛ̠tyā-nta̠ iti̍ ॥ nama̍stē astu bhagava̠ iti̍ hōvācha । vara̍ṃ vṛṇī̠ṣvēti̍ ॥ pi̠tara̍mē̠va jīva̍nnayā̠nīti̍ ॥
dvi̠tīya̍ṃ vṛṇī̠ṣvēti̍ ॥ 45 ॥

i̠ṣṭā̠pū̠rtayō̠ rmē 'kṣi̍ti-mbrū̠hīti̍ hōvācha ।
tasmai̍ hai̠tama̠gni-nnā̍chikē̠ta-mu̍vācha ।
tatō̠ vai tasyē̎-ṣṭāpū̠rtē nā kṣī̍yētē ॥
nāsyē̎ṣṭā-pū̠rtē kṣī̍yētē । yō-'̎gni-nnā̍chikē̠ta-ñchi̍nu̠tē । ya u̍ chaina-mē̠vaṃ vēda̍ ॥ tṛ̠tīya̍ṃ vṛṇī̠ṣvēti̍ । pu̠na̠ mṛ̠rtyō rmē 'pa̍jiti-mbrū̠hīti̍ hōvācha । tasmai̍ hai̠tama̠gni-nnā̍chikē̠ta-mu̍vācha । tatō̠ vai sō-'pa̍ puna rmṛ̠tyu-ma̍jayat ॥ 46 ॥

apa̍ puna rmṛ̠tyu-ñja̍yati । yō-'̎gni-nnā̍chikē̠ta-ñchi̍nu̠tē ॥ ya u̍ chaina-mē̠vaṃ vēda̍ ॥ pra̠jāpa̍ti̠ rvai pra̠jākā̍ma̠-stapō̍-'tapyata ।
sa hira̍ṇya̠-mudā̎syat । ta-da̠gnau prāsya̍t ।
ta-da̍smai̠ nāchCha̍dayat । ta-ddvi̠tīya̠-mprāsya̍t । ta-da̍smai̠ nai vāchCha̍dayat । ta-ttṛ̠tīya̠-mprāsya̍t ॥ 47 ॥

ta-da̍smai̠ nai vāchCha̍dayat । ta-dā̠tma-nnē̠va hṛ̍da̠yyē̎-'gnau vai̎śvāna̠rē prāsya̍t ।
ta-da̍smā achChadayat । tasmā̠ddhira̍ṇya̠-ṅkani̍ṣṭha̠-ndhanā̍nām । bhu̠ñja-tpri̠yata̍mam । hṛ̠da̠ya̠jagṃ hi । sa vai tamē̠va nāvi̍ndat ।
yasmai̠ tā-ndakṣi̍ṇā̠-manē̎ṣyat ।
tāg svāyai̠va hastā̍ya̠ dakṣi̍ṇāyānayat ।
tā-mpratya̍gṛhṇāt ॥ 48 ॥

dakṣā̍ya tvā̠ dakṣi̍ṇā̠-mprati̍gṛhṇā̠mīti̍ ।
sō̍ 'dakṣata̠ dakṣi̍ṇā-mprati̠gṛhya̍ ।
dakṣa̍tē ha̠ vai dakṣi̍ṇā-mprati̠gṛhya̍ ।
ya ē̠vaṃ vēda̍ ॥ ē̠taddha̍ sma̠ vai ta-dvi̠dvāgṃsō̍ vājaśrava̠sā gōta̍māḥ ।
apya̍nūdē̠śyā̎-ndakṣi̍ṇā̠-mprati̍gṛhṇanti ।
u̠bhayē̍na va̠ya-nda̍kṣiṣyāmaha ē̠va dakṣi̍ṇā-mprati̠gṛhyēti̍ ।
tē̍ 'dakṣanta̠ dakṣi̍ṇā-mprati̠gṛhya̍ ।
dakṣa̍tē ha̠ vai dakṣi̍ṇā-mprati̠gṛhya̍ ।
ya ē̠vaṃ vēda̍ ।
pra hā̠nyaṃ vlī̍nāti ॥ 49 ॥
(va̠da̠ - tyā̠śnā̠ it - yu̍vācha - dvi̠tīya̍ṃ vṛṇī̠ṣvē - tya̍jayat - tṛ̠tīya̠-mprāsya̍ - dagṛhṇā̠--dya ē̠vaṃ vēdaika̍-ñcha) (a. 8)

anuvākaṃ 9 - chayanaprayōgaḥ
tagṃ hai̠ta-mēkē̍ paśuba̠ndha ē̠vōtta̍ravē̠dyā-ñchi̍nvatē । u̠tta̠ra̠vē̠disa̍mmita ē̠ṣō̎-'gniriti̠ vada̍ntaḥ । tanna tathā̍ ku̠ryāt । ē̠ta-ma̠gni-ṅkāmē̍na̠ vya̍rdhayēt । sa ē̍na̠-ṅkāmē̍na̠ vyṛ̍ddhaḥ । kāmē̍na̠ vya̍rdhayēt ।
sau̠myē vāvai na̍madhva̠rē chi̍nvī̠ta ।
yatra̍ vā̠ bhūyi̍ṣṭhā̠ āhu̍tayō hū̠yērann̍ ।
ē̠ta-ma̠gni-ṅkāmē̍na̠ sama̍rdhayati । sa ē̍na̠-ṅkāmē̍na̠ samṛ̍ddhaḥ ॥ 50 ॥

kāmē̍na̠ sama̍rdhayati ॥ atha̍ haina-mpu̠rarṣa̍yaḥ । u̠tta̠ra̠vē̠dyā-mē̠va sa̠triya̍-machinvata । tatō̠ vai tē-'vi̍ndanta pra̠jām ।
a̠bhi sva̠rgaṃ lō̠ka-ma̍jayann ।
vi̠ndata̍ ē̠va pa̠jām । a̠bhi sva̠rgaṃ lō̠ka-ñja̍yati । yō̎-'gni-nnā̍chikē̠ta-ñchi̍nu̠tē ।
ya u̍ chaina-mē̠vaṃ vēda̍ ॥ atha̍ hainaṃ vā̠yur-ṛddhi̍kāmaḥ ॥ 51 ॥

ya̠thā̠nyu̠pta-mē̠vōpa̍dadhē ।
tatō̠ vai sa ē̠tā-mṛddhi̍-mādrdhnōt ।
yāmi̠daṃ vā̠yur-ṛ̠ddhaḥ ।
ē̠tā-mṛddhi̍-mṛddhnōti ।
yāmi̠daṃ vā̠yur-ṛ̠ddhaḥ ।
yō̎-'gni-nnā̍chikē̠ta-ñchi̍nu̠tē ।
ya u̍ chaina-mē̠vaṃ vēda̍ ॥ atha̍ haina-ṅgōba̠lō vārṣṇa̍ḥ pa̠śukā̍maḥ । pāṅkta̍mē̠va chi̍kyē । pañcha̍ pu̠rastā̎t ॥ 52 ॥

pañcha̍ dakṣiṇa̠taḥ । pañcha̍ pa̠śchāt । pañchō̎ttara̠taḥ । ēkā̠-mmaddhyē̎ ।
tatō̠ vai sa sa̠hasra̍-mpa̠śū-nprāpnō̎t ।
pra sa̠hasra̍-mpa̠śū-nā̎pnōti ।
yō̎-'gni-nnā̍chikē̠ta-ñchi̍nu̠tē । ya u̍ chaina-mē̠vaṃ vēda̍ ॥ atha̍ haina-mpra̠jāpa̍ti̠ rjyaiṣṭhya̍kāmō̠ yaśa̍skāmaḥ pra̠jana̍nakāmaḥ ।
tri̠vṛta̍mē̠va chi̍kyē ॥ 53 ॥

sa̠pta pu̠rastā̎t । ti̠srō da̍kṣiṇa̠taḥ । sa̠pta pa̠śchāt । ti̠sra u̍ttara̠taḥ । ēkā̠-mmaddhyē̎ । tatō̠ vai sa pra yaśō̠ jyaiṣṭhya̍-māpnōt ।
ē̠tā-mprajā̍ti̠-mprājā̍yata । yāmi̠da-mpra̠jāḥ pra̠jāya̍ntē । tri̠vṛ-dvai jyaiṣṭhya̎m । mā̠tā pi̠tā pu̠traḥ ॥ 54 ॥

tri̠vṛ-tpra̠jana̍nam । u̠pasthō̠ yōni̍ rmaddhya̠mā । prayaśō̠ jyaiṣṭhya̍-māpnōti । ē̠tā-mpra̍jāti̠-mprajā̍yatē । yāmi̠da-mpra̠jāḥ pra̠jāya̍ntē । yō̎-'gni-nnā̍chikē̠ta-ñchi̍nu̠tē । ya u̍ chainamē̠vaṃ vēda̍ ॥ atha̍ haina̠-mindrō̠ jyaiṣṭhya̍kāmaḥ ।
ū̠drdhvā ē̠vōpa̍dadhē । tatō̠ vai sa jyaiṣṭhya̍-magachChat ॥ 55 ॥

jyaiṣṭhya̍-ṅgachChati । yō̎-'gni-nnā̍chikē̠ta-ñchi̍nu̠tē । ya u̍ chaina-mē̠vaṃ vēda̍ ॥ atha̍ haina-ma̠sāvā̍di̠tya-ssva̠rgakā̍maḥ ।
prāchī̍rē̠vōpa̍dadhē । tatō̠ vai sō̍-'bhi sva̠rgaṃ lō̠ka-ma̍jayat । a̠bhi sva̠rgaṃ lō̠ka-ñja̍yati । yō̎-'gni-nnā̍chikē̠ta-ñchi̍nu̠tē ।
ya u̍ chaina-mē̠vaṃ vēda̍ ॥ sa yadī̠chChēt ॥ 56 ॥

tē̠ja̠svī ya̍śa̠svī bra̍hmavarcha̠sī syā̠miti̍ । prāṃā hōtu̠rdhiṣṇyā̠-duthsa̍rpēt ।
yēya-mprāgā̠-dyaśa̍svatī । sā mā̠ prōrṇō̍tu ।
tēja̍sā̠ yaśa̍sā brahmavarcha̠sēnēti̍ ।
tē̠ja̠svyē̍va ya̍śa̠svī bra̍hmavarcha̠sī bha̍vati ॥ atha̠ yadī̠chChēt । bhūyi̍ṣṭha-mmē̠ śradda̍dhīrann । bhūyi̍ṣṭhā̠ dakṣi̍ṇā nayēyu̠riti̍ ।
dakṣi̍ṇāsu nī̠yamā̍nāsu̠ prāchyēhi̠ prāchyē̠hīti̠ prāchī̍ juṣā̠ṇā vētvājya̍sya̠ svāhēti̍ sru̠vēṇō̍-pa̠hatyā̍ hava̠nīyē̍ juhuyāt ॥ 57 ॥

bhūyi̍ṣṭha-mē̠vāsmai̠ śradda̍dhatē । bhūyi̍ṣṭhā̠ dakṣi̍ṇā nayanti ॥ purī̍ṣa-mupa̠dhāya̍ । chi̠ti̠-klṛ̠ptibhi̍-rabhi̠mṛśya̍ । a̠gni-mpra̠ṇīyō̍pasamā̠dhāya̍ । chata̍sra ē̠tā āhu̍tī rjuhōti । tvama̍gnē ru̠dra iti̍ śataru̠drīya̍sya rū̠pam ।
agnā̍-viṣṇū̠ iti̍ vasō̠drdhārā̍yāḥ । anna̍pata̠ itya̍nna hō̠maḥ । sa̠pta tē̍ agnē sa̠midha̍-ssa̠pta ji̠hvā iti̍ viśva̠prīḥ ॥ 58 ॥
[samṛ̍ddha̠ - ṛddhi̍kāmaḥ - pa̠rastā̎ch - chikyē - pu̠trō̍ - 'gachCha - di̠chChē - jju̍huyā-d- viśva̠priḥ ] (a. 9)

(purarṣa̍yō vā̠yu-rgō̍ba̠la-ssa̠hasra̍-mpra̠jāpa̍ti stri̠vṛdindrō̠ 'sāvā̍di̠tya-ssa yadī̠chChēt )

anuvākaṃ 10 - tatpraśaṃsā
yā-mpra̍tha̠mā-miṣṭa̍kā-mupa̠dadhā̍ti । i̠ma-ntayā̍ lō̠ka-ma̠bhi ja̍yati ।
athō̠ yā a̠smin ँlō̠kē dē̠vatā̎ḥ ।
tāsā̠gṃ̠ sāyu̍jyagṃ salō̠katā̍-māpnōti । yā-ndvi̠tīyā̍-mupa̠dadhā̍ti ।
a̠nta̠ri̠kṣa̠lō̠ka-ntayā̠-'bhi jaya̍ti । athō̠ yā a̍ntarikṣa lō̠kē dē̠vatā̎ḥ ।
tāsā̠gṃ̠ sāyu̍jyagṃ salō̠katā̍-māpnōti ।
yā-ntṛ̠tīyā̍-mupa̠dadhā̍ti ।
a̠mu-ntayā̍ lō̠ka-ma̠bhija̍yati ॥ 59 ॥

athō̠ yā a̠muṣmi̍n ँlō̠kē dē̠vatā̎ḥ ।
tāsā̠gṃ̠ sāyu̍jyagṃ salō̠katā̍-māpnōti ।
athō̠ yā a̠mūrita̍rā a̠ṣṭāda̍śa ।
ya ē̠vāmī u̠rava̍ścha̠ varī̍yāgṃsaścha lō̠kāḥ ।
tānē̠va tābhi̍-ra̠bhija̍yati ॥ kā̠ma̠chārō̍ ha̠ vā a̍syō̠ruṣu̍ cha̠ varī̍yassu cha lō̠kēṣu̍ bhavati ।
yō̎-'gni-nnā̍chikē̠ta-ñchi̍nu̠tē । ya u̍ chaina-mē̠vaṃ vēda̍ ॥ sa̠ṃva̠thsa̠rō vā a̠gni nā̍rchikē̠taḥ । tasya̍ vasa̠nta-śśira̍ḥ ॥ 60 ॥

grī̠ṣmō dakṣi̍ṇaḥ pa̠kṣaḥ । va̠r̠ṣā utta̍raḥ । śa̠ra-tpuchCha̎m । māsā̎ḥ karmakā̠rāḥ । a̠hō̠rā̠trē śa̍taru̠drīya̎m । pa̠rjanyō̠ vasō̠drdhārā̎ ।
yathā̠ vai pa̠rjanya̠-ssuvṛ̍ṣṭaṃ vṛ̠ṣṭvā ।
pra̠jābhya̠-ssarvā̠n kāmā̎m-thsampū̠raya̍ti ।
ē̠va-mē̠va sa tasya̠ sarvā̠n kāmā̠n-thsampū̍rayati । yō̎-'gni-nnā̍chikē̠ta-ñchi̍nu̠tē ॥ 61 ॥

ya u̍ chaina-mē̠vaṃ vēda̍ ॥ sa̠ṃva̠thsa̠rō vā a̠gni rnā̍chikē̠taḥ । tasya̍ vasa̠nta-śśira̍ḥ । grī̠ṣmō dakṣi̍ṇaḥ pa̠kṣaḥ ।
va̠r̠ṣāḥ puchCha̎m । śa̠radutta̍raḥ pa̠kṣaḥ । hē̠ma̠ntō maddhya̎m ।
pū̠rva̠pa̠kṣāśchita̍yaḥ । a̠pa̠ra̠pa̠kṣāḥ purī̍ṣam । a̠hō̠rā̠trāṇīṣṭa̍kāḥ ।
ē̠ṣa vāva sō̎-'gni-ra̍gni̠maya̍ḥ punarṇa̠vaḥ ।
a̠gni̠mayō̍ ha̠ vai pu̍narṇa̠vō bhū̠tvā । sva̠rgaṃ lō̠ka-mē̍ti । ā̠di̠tyasya̠ sāyu̍jyam । yō̎-'gni-nnā̍chikē̠ta-ñchi̍nu̠tē । ya u̍ chaina-mē̠vaṃ vēda̍ ॥ 62 ॥
a̠mu-ntayā̍ lō̠kama̠bhija̍yati̠ - śira̍ - śchinu̠ta - iṣṭa̍kā̠-ṣṣaṭcha̍) (a. 10)

(lō̠ka - stvama̠gnē - 'gnā̍viṣṇū̠ - anna̍patē - sa̠pta tē̍ agnē̠ - yattē 'chi̍tama̠ - yaṃ vā - vōśan. ha̠ vai - tagṃ hai̠taṃ - ँyā-mpra̍tha̠māmiṣṭa̍kā̠-ndaśa̍)

(lō̠ka - ā̍di̠tya - ōjō̎ - 'syū̠drdhvā diga̍ - na̠ntagṃ ha̠ vai - kāmē̍na - grī̠ṣmō dviṣa̍ṣṭiḥ)

(lō̠kō - vēda̍)

॥ hari̍ḥ ōm ॥

॥ taittarīya yajubrāhmaṇē kāṭhakē dvitīyaḥ praśna-ssamāptaḥ ॥
+++++++++++++++++++++++++++++++++

Browse Related Categories: