atha saptamō'dhyāyaḥ ।
jñānavijñānayōgaḥ
śrībhagavānuvācha ।
mayyāsaktamanāḥ pārtha yōgaṃ yuñjanmadāśrayaḥ ।
asaṃśayaṃ samagraṃ māṃ yathā jñāsyasi tachChṛṇu ॥ 1 ॥
jñānaṃ tē'haṃ savijñānamidaṃ vakṣyāmyaśēṣataḥ ।
yajjñātvā nēha bhūyō'nyajjñātavyamavaśiṣyatē ॥ 2 ॥
manuṣyāṇāṃ sahasrēṣu kaśchidyatati siddhayē ।
yatatāmapi siddhānāṃ kaśchinmāṃ vētti tattvataḥ ॥ 3 ॥
bhūmirāpō'nalō vāyuḥ khaṃ manō buddhirēva cha ।
ahaṅkāra itīyaṃ mē bhinnā prakṛtiraṣṭadhā ॥ 4 ॥
aparēyamitastvanyāṃ prakṛtiṃ viddhi mē parām ।
jīvabhūtāṃ mahābāhō yayēdaṃ dhāryatē jagat ॥ 5 ॥
ētadyōnīni bhūtāni sarvāṇītyupadhāraya ।
ahaṃ kṛtsnasya jagataḥ prabhavaḥ pralayastathā ॥ 6 ॥
mattaḥ parataraṃ nānyatkiñchidasti dhanañjaya ।
mayi sarvamidaṃ prōtaṃ sūtrē maṇigaṇā iva ॥ 7 ॥
rasō'hamapsu kauntēya prabhāsmi śaśisūryayōḥ ।
praṇavaḥ sarvavēdēṣu śabdaḥ khē pauruṣaṃ nṛṣu ॥ 8 ॥
puṇyō gandhaḥ pṛthivyāṃ cha tējaśchāsmi vibhāvasau ।
jīvanaṃ sarvabhūtēṣu tapaśchāsmi tapasviṣu ॥ 9 ॥
bījaṃ māṃ sarvabhūtānāṃ viddhi pārtha sanātanam ।
buddhirbuddhimatāmasmi tējastējasvināmaham ॥ 10 ॥
balaṃ balavatāṃ chāhaṃ kāmarāgavivarjitam ।
dharmāviruddhō bhūtēṣu kāmō'smi bharatarṣabha ॥ 11 ॥
yē chaiva sāttvikā bhāvā rājasāstāmasāścha yē ।
matta ēvēti tānviddhi na tvahaṃ tēṣu tē mayi ॥ 12 ॥
tribhirguṇamayairbhāvairēbhiḥ sarvamidaṃ jagat ।
mōhitaṃ nābhijānāti māmēbhyaḥ paramavyayam ॥ 13 ॥
daivī hyēṣā guṇamayī mama māyā duratyayā ।
māmēva yē prapadyantē māyāmētāṃ taranti tē ॥ 14 ॥
na māṃ duṣkṛtinō mūḍhāḥ prapadyantē narādhamāḥ ।
māyayāpahṛtajñānā āsuraṃ bhāvamāśritāḥ ॥ 15 ॥
chaturvidhā bhajantē māṃ janāḥ sukṛtinō'rjuna ।
ārtō jijñāsurarthārthī jñānī cha bharatarṣabha ॥ 16 ॥
tēṣāṃ jñānī nityayukta ēkabhaktirviśiṣyatē ।
priyō hi jñāninō'tyarthamahaṃ sa cha mama priyaḥ ॥ 17 ॥
udārāḥ sarva ēvaitē jñānī tvātmaiva mē matam ।
āsthitaḥ sa hi yuktātmā māmēvānuttamāṃ gatim ॥ 18 ॥
bahūnāṃ janmanāmantē jñānavānmāṃ prapadyatē ।
vāsudēvaḥ sarvamiti sa mahātmā sudurlabhaḥ ॥ 19 ॥
kāmaistaistairhṛtajñānāḥ prapadyantē'nyadēvatāḥ ।
taṃ taṃ niyamamāsthāya prakṛtyā niyatāḥ svayā ॥ 20 ॥
yō yō yāṃ yāṃ tanuṃ bhaktaḥ śraddhayārchitumichChati ।
tasya tasyāchalāṃ śraddhāṃ tāmēva vidadhāmyaham ॥ 21 ॥
sa tayā śraddhayā yuktastasyārādhanamīhatē ।
labhatē cha tataḥ kāmānmayaiva vihitānhi tān ॥ 22 ॥
antavattu phalaṃ tēṣāṃ tadbhavatyalpamēdhasām ।
dēvāndēvayajō yānti madbhaktā yānti māmapi ॥ 23 ॥
avyaktaṃ vyaktimāpannaṃ manyantē māmabuddhayaḥ ।
paraṃ bhāvamajānantō mamāvyayamanuttamam ॥ 24 ॥
nāhaṃ prakāśaḥ sarvasya yōgamāyāsamāvṛtaḥ ।
mūḍhō'yaṃ nābhijānāti lōkō māmajamavyayam ॥ 25 ॥
vēdāhaṃ samatītāni vartamānāni chārjuna ।
bhaviṣyāṇi cha bhūtāni māṃ tu vēda na kaśchana ॥ 26 ॥
ichChādvēṣasamutthēna dvandvamōhēna bhārata ।
sarvabhūtāni sammōhaṃ sargē yānti parantapa ॥ 27 ॥
yēṣāṃ tvantagataṃ pāpaṃ janānāṃ puṇyakarmaṇām ।
tē dvandvamōhanirmuktā bhajantē māṃ dṛḍhavratāḥ ॥ 28 ॥
jarāmaraṇamōkṣāya māmāśritya yatanti yē ।
tē brahma tadviduḥ kṛtsnamadhyātmaṃ karma chākhilam ॥ 29 ॥
sādhibhūtādhidaivaṃ māṃ sādhiyajñaṃ cha yē viduḥ ।
prayāṇakālē'pi cha māṃ tē viduryuktachētasaḥ ॥ 30 ॥
ōṃ tatsaditi śrīmadbhagavadgītāsūpaniṣatsu brahmavidyāyāṃ yōgaśāstrē śrīkṛṣṇārjunasaṃvādē
jñānavijñānayōgō nāma saptamō'dhyāyaḥ ॥7 ॥
