(bhāgavatapurāṇāntargatam)
namaḥ parāyāvitathānubhūtayē
guṇatrayābhāsanimittabandhavē ।
adṛṣṭadhāmnē guṇatattvabuddhibhiḥ
nivṛttamānāya dadhē svayambhuvē ॥ 1 ॥
na yasya sakhyaṃ puruṣō'vaiti sakhyuḥ
sakhā vasansaṃvasataḥ purē'smin ।
guṇō yathā guṇinō vyaktadṛṣṭēḥ
tasmai mahēśāya namaskarōmi ॥ 2 ॥
dēhō'savō'kṣā manavō bhūtamātrā
nātmānamanyaṃ cha viduḥ paraṃ yat ।
sarvaṃ pumān vēda guṇāṃścha tajjñō
na vēda sarvajñamanantamīḍē ॥ 3 ॥
yadōparāmō manasō nāmarūpa-
rūpasya dṛṣṭasmṛtisapramōṣāt ।
ya īyatē kēvalayā svasaṃsthayā
haṃsāya tasmai śuchisadmanē namaḥ ॥ 4 ॥
manīṣiṇō'ntarhadi sannivēśitaṃ
svaśaktibhirnavabhiścha trivṛdbhiḥ ।
vahniṃ yathā dāruṇi pāñchadaśyaṃ
manīṣayā niṣkarṣanti gūḍham ॥ 5 ॥
sa vai mamāśēṣaviśēṣamāyā
niṣēdhanivāṇasukhānubhūtiḥ ।
sa sarvanāmā sa cha viśvarūpaḥ
prasīdatāmaniruktātmaśaktiḥ ॥ 6 ॥
yadyanniruktaṃ vachasā nirūpitaṃ
dhiyā'kṣabhirvā manasā vōta yasya ।
mā bhūtsvarūpaṃ guṇarūpaṃ hi tattat
sa vai guṇāpāyavisargalakṣaṇaḥ ॥ 7 ॥
yasmin yatō yēna cha yasya yasmai
yadyō yathā kurūtē kāryatē cha ।
parāvarēṣāṃ paramaṃ prāk prasiddhaṃ
tadbrahma taddhēturananyadēkam ॥ 8 ॥
yachChaktayō vadatāṃ vāditāṃ vai
vivādasaṃvādabhuvō bhavanti ।
kurvanti chaiṣāṃ muhurātmamōhaṃ
tasmai namō'nantaguṇāya bhūmnē ॥ 9 ॥
astīti nāstīti cha vastuniṣṭhayōḥ
ēkasthayōrbhinnaviruddhadharmayōḥ ।
avēkṣitaṃ kiṃ cha na yōgasāṅkhyayōḥ
samaṃ paraṃ hyanukūlaṃ bṛhattat ॥ 10 ॥
yō'nugahārthaṃ bhajatāṃ pādamūlamanāmarūpō bhagavānanantaḥ ।
nāmāni rūpāṇi cha janmakarmabhirbhējē sa mahyaṃ paramaḥ prasīdatu ॥ 11 ॥
yaḥ prākṛtairjñānapathairjanānāṃ
yathāśayaṃ dēhagatō vibhāti ।
yathānilaḥ pārthivamāśritō guṇaṃ
sa īśvarō mē kurutānmanōratham ॥ 12 ॥
॥ iti haṃsaguhyastōtraṃ sampūrṇam ॥
