কৃষ্ণ যজুর্বেদীয় তৈত্তিরীয় ব্রাহ্মণে প্রথমাষ্টকে চতুর্থঃ প্রপাঠকঃ - সোমাদিব্রাহ্মণং

ও-ন্নমঃ পরমাত্মনে, শ্রী মহাগণপতয়ে নমঃ,
শ্রী গুরুভ্য়ো নমঃ । হ॒রিঃ॒ ওম্ ॥

অনুবাকং 1 - গ্রহণা গ্রহণম্
উ॒ভয়ে॒ বা এ॒তে প্র॒জাপ॑তে॒রদ্ধ্য়॑-সৃজ্যন্ত । দে॒বাশ্চাসু॑রাশ্চ । তান্ন ব্য়॑জানাত্ । ই॒মে᳚-ঽন্য় ই॒মে᳚-ঽন্য় ইতি॑ । স দে॒বান॒গ্​ম্॒ শূন॑করোত্ । তান॒ভ্য়॑ষুণোত্ । তা-ন্প॒বিত্রে॑ণা-পুনাত্ । তান্-প॒রস্তা᳚ত্-প॒বিত্র॑স্য়॒-ব্য়॑গৃহ্ণাত্ । তে গ্রহা॑ অভবন্ন্ । তদ্গ্রহা॑ণা-ঙ্গ্রহ॒ত্বম্ ॥ 1 ॥

দে॒বতা॒ বা এ॒তা যজ॑মানস্য় গৃ॒হে গৃ॑হ্যন্তে । য-দ্গ্রহাঃ᳚ । বি॒দুরে॑ন-ন্দে॒বাঃ । যস্য়ৈ॒বং-বিঁ॒দুষ॑ এ॒তে গ্রহা॑ গৃ॒হ্যন্তে᳚ ॥ এ॒ষা বৈ সোম॒স্য়াহু॑তিঃ । যদু॑পা॒গ্​ম্॒শুঃ । সোমে॑ন দে॒বাগ্​ স্ত॑র্পয়া॒ণীতি॒ খলু॒ বৈ সোমে॑ন যজতে । যদু॑পা॒গ্​ম্॒শু-ঞ্জু॒হোতি॑ । সোমে॑নৈ॒ব ত-দ্দে॒বাগ্​ স্ত॑র্পযতি ॥ যদ্গ্রহা᳚ঞ্জু॒হোতি॑ ॥ 2 ॥

দে॒বা এ॒ব ত-দ্দে॒বান্-গ॑চ্ছন্তি ॥ যচ্চ॑ম॒সাঞ্জু॒হোতি॑ । তেনৈ॒বানু॑রূপেণ॒ যজ॑মান-স্সুব॒র্গং-লোঁ॒কমে॑তি ॥ কি-ন্ন্বে॑তদগ্র॑ আসী॒দিত্য়া॑হুঃ । য-ত্পাত্রা॒ণীতি॑ । ই॒য়ং-বাঁ এ॒তদগ্র॑ আসীত্ । মৃ॒ন্ময়া॑নি॒ বা এ॒তান্য়া॑সন্ন্ । তৈর্দে॒বা ন ব্য়া॒বৃত॑-মগচ্ছন্ন্ । ত এ॒তানি॑ দারু॒ময়া॑ণি॒ পাত্রা᳚ণ্য়-পশ্যন্ন্ । তান্য়॑কুর্বত ॥ 3 ॥

তৈর্বৈ তে ব্য়া॒বৃত॑-মগচ্ছন্ন্ । য-দ্দা॑রু॒ময়া॑ণি॒ পাত্রা॑ণি॒ ভব॑ন্তি । ব্য়া॒বৃত॑মে॒ব তৈ-র্যজ॑মানো গচ্ছতি ॥ যানি॑ দারু॒ময়া॑ণি॒ পাত্রা॑ণি॒ ভব॑ন্তি । অ॒মুমে॒ব তৈ-র্লো॒ক-ম॒ভিজ॑যতি । যানি॑ মৃ॒ন্ময়া॑নি । ই॒মমে॒ব তৈ-র্লো॒ক-ম॒ভিজ॑যতি ॥ ব্র॒হ্ম॒বা॒দিনো॑ বদন্তি । কাশ্চত॑স্র-স্স্থা॒লীর্বা॑য়॒ব্য়া᳚-স্সোম॒গ্রহ॑ণী॒রিতি॑ । দে॒বা বৈ পৃশ্ঞি॑মদুহ্রন্ন্ ॥ 4 ॥

তস্য়া॑ এ॒তে স্তনা॑ আসন্ন্ । ই॒য়ং-বৈঁ পৃশ্ঞিঃ॑ । তামা॑দি॒ত্য়া আ॑দিত্যস্থা॒ল্য়া চতু॑ষ্পদঃ প॒শূন॑দুহ্রন্ন্ । যদা॑দিত্যস্থা॒লী ভব॑তি । চতু॑ষ্পদ এ॒ব তয়া॑ প॒শূন্. যজ॑মান ই॒মা-ন্দু॑হে । তামিন্দ্র॑ উক্থ্যস্থা॒ল্য়েন্দ্রি॒য়-ম॑দুহত্ । যদু॑ক্থ্যস্থা॒লী ভব॑তি । ই॒ন্দ্রি॒যমে॒ব তয়া॒ যজ॑মান ই॒মা-ন্দু॑হে । তাং-বিঁশ্বে॑ দে॒বা আ᳚গ্রযণস্থা॒ল্য়োর্জ॑-মদুহ্রন্ন্ । যদা᳚গ্রযণস্থা॒লী ভব॑তি ॥ 5 ॥

ঊর্জ॑মে॒ব তয়া॒ যজ॑মান ই॒মা-ন্দু॑হে । তা-ম্ম॑নু॒ষ্য়া᳚-দ্ধ্রুবস্থা॒ল্য়া ঽঽয়ু॑রদুহ্রন্ন্ । যদ্ধ্রু॑বস্থা॒লী ভব॑তি । আয়ু॑রে॒ব তয়া॒ যজ॑মান ই॒মা-ন্দু॑হে । স্থা॒ল্য়া গৃ॒হ্ণাতি॑ । বা॒য়॒ব্য়ে॑ন জুহোতি । তস্মা॑দ॒ন্য়েন॒ পাত্রে॑ণ প॒শূ-ন্দু॒হন্তি॑ । অ॒ন্য়েন॒ প্রতি॑গৃহ্ণন্তি । অথো᳚ ব্য়া॒বৃত॑মে॒ব ত-দ্যজ॑মানো গচ্ছতি ॥ 6 ॥
(গ্র॒হ॒ত্বং - গ্রহা᳚ন্ জু॒হোত্য়॑-কুর্ব-তাদুহ্র-ন্নাগ্রযণস্থা॒লী ভব॑তি॒-+নব॑ চ) (অ. 1)

অনুবাকং 2 - সোত্রামণীশেষা মন্ত্রাঃ
যু॒বগ্​ম্ সু॒রাম॑মশ্বিনা । নমু॑চাবা-ঽসু॒রে সচা᳚ । বি॒পি॒পা॒না শু॑ভস্পতী । ইন্দ্র॒-ঙ্কর্ম॑স্বাবতম্ ॥ পু॒ত্রমি॑ব পি॒তরা॑ব॒শ্বিনো॒ভা । ইন্দ্রাব॑ত॒-ঙ্কর্ম॑ণা দ॒গ্​ম্॒সনা॑ভিঃ । য-থ্সু॒রামং॒-ব্য়ঁপি॑ব॒-শ্শচী॑ভিঃ । সর॑স্বতী ত্বা মঘবন্নভীষ্ণাত্ ॥ অহা᳚ব্যগ্নে হ॒বিরা॒স্য়ে॑ তে । স্রু॒চীব॑ ঘৃ॒ত-ঞ্চ॒মূ ই॑ব॒ সোমঃ॑ ॥ 7 ॥

বা॒জ॒সনিগ্​ম্॑ র॒য়িম॒স্মে সু॒বীর᳚ম্ । প্র॒শ॒স্ত-ন্ধে॑হি য॒শস॑-ম্বৃ॒হন্ত᳚ম্ ॥ যস্মি॒ন্নশ্বা॑স ঋষ॒ভাস॑ উ॒ক্ষণঃ॑ । ব॒শা মে॒ষা অ॑বসৃ॒ষ্টাস॒ আহু॑তাঃ । কী॒লা॒ল॒পে সোম॑পৃষ্ঠায় বে॒ধসে᳚ । হৃ॒দাম॒তি-ঞ্জ॑নয়॒ চারু॑ম॒গ্নয়ে᳚ ॥ নানা॒ হি বা᳚-ন্দে॒বহি॑ত॒গ্​ম্॒ সদো॑ মি॒তম্ । মা সগ্​ম্সৃ॑ক্ষাথা-ম্পর॒মে ব্য়ো॑মন্ন্ । সুরা॒ ত্বমসি॑ শু॒ষ্মিণী॒ সোম॑ এ॒ষঃ । মা মা॑ হিগ্​ম্সী॒-স্স্বাং-য়োঁনি॑মাবি॒শন্ন্ ॥ 8 ॥

যদত্র॑ শি॒ষ্টগ্​ম্ র॒সিন॑-স্সু॒তস্য়॑ । যদিন্দ্রো॒ অপি॑ব॒চ্ছচী॑ভিঃ । অ॒হ-ন্তদ॑স্য়॒ মন॑সা শি॒বেন॑ । সোম॒গ্​ম্॒ রাজা॑নমি॒হ ভ॑ক্ষয়ামি ॥ দ্বে স্রু॒তী অ॑শৃণব-ম্পিতৃ॒ণাম্ । অ॒হ-ন্দে॒বানা॑মু॒ত মর্ত্য়া॑নাম্ । তাভ্য়া॑মি॒দং-বিঁশ্ব॒-ম্ভুব॑ন॒গ্​ম্॒ সমে॑তি । অ॒ন্ত॒রা পূর্ব॒মপ॑র-ঞ্চ কে॒তুম্ ॥ যস্তে॑ দেব বরুণ গায়॒ত্রছ॑ন্দাঃ॒ পাশঃ॑ । ত-ন্ত॑ এ॒তেনাব॑যজে ॥ 9 ॥

যস্তে॑ দেব বরুণ ত্রি॒ষ্টুপ্ছ॑ন্দাঃ॒ পাশঃ॑ । ত-ন্ত॑ এ॒তেনাব॑যজে । যস্তে॑ দেব বরুণ॒ জগ॑তীছন্দাঃ॒ পাশঃ॑ । ত-ন্ত॑ এ॒তেনাব॑যজে ॥ সোমো॒ বা এ॒তস্য়॑ রা॒জ্যমাদ॑ত্তে । যো রাজা॒ স-ন্রা॒জ্য়ো বা॒ সোমে॑ন॒ যজ॑তে । দে॒ব॒সু॒বামে॒তানি॑ হ॒বীগ্​ম্ষি॑ ভবন্তি । এ॒তাব॑ন্তো॒ বৈ দে॒বানাগ্​ম্॑ স॒বাঃ । ত এ॒বাস্মৈ॑ স॒বা-ন্প্রয়॑চ্ছন্তি । ত এ॑ন॒-ম্পুন॑-স্সুবন্তে রা॒জ্য়ায়॑ । দে॒ব॒সূ রাজা॑ ভবতি ॥ 10 ॥
(সোম॑ - আবি॒শন্. - য॑জে - রা॒জ্য়ায়ৈকং॑ চ) (অ. 2)

অনুবাকং 3 - দোহপ্রাযশ্চিত্তম্, অগ্নিহোত্রে
উদ॑স্থা-দ্দে॒ব্যদি॑তি-র্বিশ্বরূ॒পী । আয়ু॑র্য়॒জ্ঞপ॑তাবধাত্ । ইন্দ্রা॑য় কৃণ্ব॒তী ভা॒গম্ । মি॒ত্রায়॒ বরু॑ণায় চ ॥ ই॒য়ং-বাঁ অ॑গ্নিহো॒ত্রী । ই॒য়ং-বাঁ এ॒তস্য়॒ নিষী॑দতি । যস্য়া᳚গ্নিহো॒ত্রী নি॒ষীদ॑তি । তামুত্থা॑পয়েত্ । উদ॑স্থা-দ্দে॒ব্যদি॑তি॒রিতি॑ । ই॒য়ং-বৈঁ দে॒ব্যদি॑তিঃ ॥ 11 ॥

ই॒মামে॒বাস্মা॒ উত্থা॑পযতি ॥ আয়ু॑র্য়॒জ্ঞপ॑তাবধা॒দিত্য়া॑হ । আয়ু॑রে॒বাস্মি॑-ন্দধাতি ॥ ইন্দ্রা॑য় কৃণ্ব॒তী ভা॒গ-ম্মি॒ত্রায়॒ বরু॑ণায়॒ চেত্য়া॑হ । য॒থা॒ য॒জুরে॒বৈতত্ ॥ অব॑র্তিং॒-বাঁ এ॒ষৈতস্য়॑ পা॒প্মান॑-ম্প্রতি॒খ্য়ায়॒ নিষী॑দতি । যস্য়া᳚-গ্নিহো॒ত্র্য়ুপ॑সৃষ্টা নি॒ষীদ॑তি । তা-ন্দু॒গ্ধ্বা ব্রা᳚হ্ম॒ণায়॑ দদ্য়াত্ । যস্য়ান্ন॒-ন্নাদ্য়াত্ । অব॑র্তিমে॒বাস্মি॑-ন্পা॒প্মান॒-ম্প্রতি॑মুঞ্চতি ॥ 12 ॥

দু॒গ্ধ্বা দ॑দাতি । ন হ্যদৃ॑ষ্টা॒ দক্ষি॑ণা দী॒যতে᳚ ॥ পৃ॒থি॒বীং-বাঁ এ॒তস্য়॒ পয়ঃ॒ প্রবি॑শতি । যস্য়া᳚গ্নিহো॒ত্র-ন্দু॒হ্যমা॑ন॒গ্গ্॒ স্কন্দ॑তি ॥ যদ॒দ্য় দু॒গ্ধ-ম্পৃ॑থি॒বীমস॑ক্ত । যদোষ॑ধী-র॒প্যস॑র॒-দ্যদাপঃ॑ । পয়ো॑ গৃ॒হেষু॒ পয়ো॑ অঘ্নি॒য়াসু॑ । পয়ো॑ ব॒থ্সেষু॒ পয়ো॑ অস্তু॒ তন্ময়ীত্য়া॑হ । পয়॑ এ॒বাত্ম-ন্গৃ॒হেষু॑ প॒শুষু॑ ধত্তে ॥ অ॒প উপ॑সৃজতি ॥ 13 ॥

অ॒দ্ভিরে॒বৈন॑দাপ্নোতি ॥ যো বৈ য॒জ্ঞস্য়ার্তে॒নানা᳚র্তগ্​ম্ সগ্​ম্ সৃ॒জতি॑ । উ॒ভে বৈ তে তর্​হ্য়ার্চ্ছ॑তঃ । আর্চ্ছ॑তি॒ খলু॒ বা এ॒তদ॑গ্নিহো॒ত্রম্ । য-দ্দু॒হ্যমা॑ন॒গ্গ্॒ স্কন্দ॑তি । যদ॑ভিদু॒হ্য়াত্ । আর্তে॒নানা᳚র্তং-য়ঁ॒জ্ঞস্য়॒ সগ্​ম্সৃ॑জেত্ । তদে॒ব যা॒দৃক্কী॒দৃক্চ॑ হোত॒ব্য়᳚ম্ । অথা॒ন্য়া-ন্দু॒গ্ধ্বা পুন॑র্-হোত॒ব্য়᳚ম্ । অনা᳚র্তেনৈ॒বার্তং॑-য়ঁ॒জ্ঞস্য়॒ নিষ্ক॑রোতি ॥ 14 ॥

য-দ্য়ুদ্দ্রু॑তস্য়॒ স্কন্দে᳚ত্ । য-ত্ততো-ঽহু॑ত্বা॒ পুন॑রে॒য়াত্ । য॒জ্ঞং-বিঁচ্ছি॑ন্দ্য়াত্ । যত্র॒ স্কন্দে᳚ত্ । তন্নি॒ষদ্য়॒ পুন॑র্গৃহ্ণীয়াত্ । যত্রৈ॒ব স্কন্দ॑তি । তত॑ এ॒বৈন॒ত্-পুন॑র্গৃহ্ণাতি । তদে॒ব যা॒দৃক্-কী॒দৃক্চ॑ হোত॒ব্য়᳚ম্ । অথা॒ন্য়া-ন্দু॒গ্ধ্বা পুন॑র্-হোত॒ব্য়᳚ম্ । অনা᳚র্তেনৈ॒বার্তং॑-য়ঁ॒জ্ঞস্য়॒ নিষ্ক॑রোতি ॥ 15 ॥

বি বা এ॒তস্য়॑ য॒জ্ঞশ্ছি॑দ্যতে । যস্য়া᳚গ্নিহো॒ত্রে॑-ঽধিশ্রি॑তে॒ শ্বা-ঽন্ত॒রা ধাব॑তি । রু॒দ্রঃ খলু॒ বা এ॒ষঃ । যদ॒গ্নিঃ । য-দ্গাম॑ন্বত্য়াব॒র্তয়ে᳚ত্ । রু॒দ্রায়॑ প॒শূ-নপি॑দদ্ধ্য়াত্ । অ॒প॒শু-র্যজ॑মান-স্স্য়াত্ । যদ॒পো᳚ ঽন্বতিষি॒ঞ্চেত্ । অ॒না॒দ্য়-ম॒গ্নেরাপঃ॑ । অ॒না॒দ্যমা᳚ভ্য়া॒-মপি॑দদ্ধ্য়াত্ । গার্​হ॑পত্য়া॒-দ্ভস্মা॒দায়॑ । ই॒দং-বিঁষ্ণু॒-র্বিচ॑ক্রম॒ ইতি॑ বৈষ্ণ॒ব্যর্চা ঽঽহ॑ব॒নীয়া᳚দ্ধ্ব॒গ্​ম্॒ সয়॒ন্নুদ্র॑বেত্ । য॒জ্ঞো বৈ বিষ্ণুঃ॑ । য॒জ্ঞেনৈ॒ব য॒জ্ঞগ্​ম্ সন্ত॑নোতি । ভস্ম॑না প॒দমপি॑বপতি॒ শান্ত্য়ৈ᳚ ॥ 16 ॥
(বৈ দে॒ব্যদি॑তি--র্ মুঞ্চতি - সৃজতি - করোতি - করোত্য়া - ভ্য়া॒মপি॑দদ্ধ্য়া॒-ত্পঞ্চ॑ চ) (অ. 3)

অনুবাকং 4 - অগ্নিপ্রাযশ্চিত্তং অগ্নিহোত্রে
নি বা এ॒তস্য়া॑হব॒নীয়ো॒ গার্​হ॑পত্য়-ঙ্কামযতে । নি গার্​হ॑পত্য় আহব॒নীয়᳚ম্ । যস্য়া॒গ্নিমনু॑দ্ধৃত॒গ্​ম্॒ সূর্য়ো॒-ঽভিনি॒ম্রোচ॑তি । দ॒র্ভেণ॒ হির॑ণ্য়-ম্প্র॒বদ্ধ্য়॑ পু॒রস্তা᳚দ্ধরেত্ । অথা॒গ্নিম্ । অথা᳚গ্নিহো॒ত্রম্ । যদ্ধির॑ণ্য়-ম্পু॒রস্তা॒দ্ধর॑তি । জ্য়োতি॒র্বৈ হির॑ণ্যম্ । জ্য়োতি॑রে॒বৈন॒-ম্পশ্য়॒-ন্নুদ্ধ॑রতি । যদ॒গ্নি-ম্পূর্ব॒গ্​ম্॒ হর॒ত্যথা᳚-গ্নিহো॒ত্রম্ ॥ 17 ॥

ভা॒গ॒ধেয়ে॑নৈ॒বৈন॒-ম্প্রণ॑যতি ॥ ব্রা॒হ্ম॒ণ আ॑র্​ষে॒য় উদ্ধ॑রেত্ । ব্রা॒হ্ম॒ণো বৈ সর্বা॑ দে॒বতাঃ᳚ । সর্বা॑ভিরে॒বৈন॑-ন্দে॒বতা॑ভি॒রুদ্ধ॑রতি ॥ অ॒গ্নি॒হো॒ত্র-মু॑প॒সা-দ্য়াতমি॑তো-রাসীত । ব্র॒তমে॒ব হ॒তমনু॑ ম্রিযতে ॥ অন্তং॒-বাঁ এ॒ষ আ॒ত্মনো॑ গচ্ছতি । যস্তাম্য়॑তি । অন্ত॑মে॒ষ য॒জ্ঞস্য়॑ গচ্ছতি । যস্য়া॒গ্নিমনু॑দ্ধৃত॒গ্​ম্॒ সূর্য়ো॒-ঽভিনি॒ম্রোচ॑তি ॥ 18 ॥

পুন॑-স্স॒মন্য়॑ জুহোতি । অন্তে॑নৈ॒বান্তং॑-য়ঁ॒জ্ঞস্য়॒ নিষ্ক॑রোতি ॥ বরু॑ণো॒ বা এ॒তস্য়॑ য॒জ্ঞ-ঙ্গৃ॑হ্ণাতি । যস্য়া॒গ্নি-মনু॑দ্ধৃত॒গ্​ম্॒ সূর্য়ো॒-ঽভিনি॒ম্রোচ॑তি । বা॒রু॒ণ-ঞ্চ॒রু-ন্নির্ব॑পেত্ । তেনৈ॒ব য॒জ্ঞ-ন্নিষ্ক্রী॑ণীতে ॥ নি বা এ॒তস্য়া॑হব॒নীয়ো॒ গার্​হ॑পত্য়-ঙ্কামযতে । নি গার্​হ॑পত্য় আহব॒নীয়᳚ম্ । যস্য়া॒গ্নি-মনু॑দ্ধৃত॒গ্​ম্॒ সূর্য়ো॒-ঽভ্য়ু॑দেতি॑ । চ॒তু॒র্গৃ॒হী॒ত-মাজ্য়॑-ম্পু॒রস্তা᳚দ্ধরেত্ ॥ 19 ॥

অথা॒গ্নিম্ । অথা᳚গ্নিহো॒ত্রম্ । যদাজ্য়॑-ম্পু॒রস্তা॒দ্ধর॑তি । এ॒তদ্বা অ॒গ্নেঃ প্রি॒য়-ন্ধাম॑ । যদাজ্য়᳚ম্ । প্রি॒য়েণৈ॒বৈন॒-ন্ধাম্না॒ সম॑র্ধযতি । যদ॒গ্নি-ম্পূর্ব॒গ্​ম্॒ হর॒ত্যথা᳚-গ্নিহো॒ত্রম্ । ভা॒গ॒ধেয়ে॑নৈ॒বৈন॒-ম্প্রণ॑যতি । ব্রা॒হ্ম॒ণ আ॑র্​ষে॒য় উদ্ধ॑রেত্ । ব্রা॒হ্ম॒ণো বৈ সর্বা॑ দে॒বতাঃ᳚ ॥ 20 ॥

সর্বা॑ভিরে॒বৈন॑-ন্দে॒বতা॑ভি॒রুদ্ধ॑রতি ॥ পরা॑চী॒ বা এ॒তস্মৈ᳚ ব্য়ু॒চ্ছন্তী॒ ব্য়ু॑চ্ছতি । যস্য়া॒গ্নি-মনু॑দ্ধৃত॒গ্​ম্॒ সূর্য়ো॒-ঽভ্য়ু॑দেতি॑ । উ॒ষাঃ কে॒তুনা॑ জুষতাম্ । য॒জ্ঞ-ন্দে॒বেভি॑রিন্বি॒তম্ । দে॒বেভ্য়ো॒ মধু॑মত্তম॒গ্গ্॒ স্বাহেতি॑ প্র॒ত্য়ং-নি॒ষদ্য়াজ্য়ে॑ন জুহুয়াত্ । প্র॒তীচী॑মে॒বাস্মৈ॒ বিবা॑সযতি ॥ অ॒গ্নি॒হো॒ত্র-মু॑প॒সাদ্য়াতমি॑তো-রাসীত । ব্র॒তমে॒ব হ॒তমনু॑ ম্রিযতে । অন্তং॒-বাঁ এ॒ষ আ॒ত্মনো॑ গচ্ছতি ॥ 21 ॥

যস্তাম্য়॑তি । অন্ত॑মে॒ষ য॒জ্ঞস্য়॑ গচ্ছতি । যস্য়া॒গ্নি-মনু॑দ্ধৃত॒গ্​ম্॒ সূর্য়ো॒-ঽভ্য়ু॑দেতি॑ । পুন॑-স্স॒মন্য়॑ জুহোতি । অন্তে॑নৈ॒বান্তং॑-য়ঁ॒জ্ঞস্য়॒ নিষ্ক॑রোতি । মি॒ত্রো বা এ॒তস্য়॑ য॒জ্ঞ-ঙ্গৃ॑হ্ণাতি । যস্য়া॒গ্নি-মনু॑দ্ধৃত॒গ্​ম্॒ সূর্য়ো॒-ঽভ্য়ু॑দেতি॑ । মৈ॒ত্র-ঞ্চ॒রু-ন্নির্ব॑পেত্ । তেনৈ॒ব য॒জ্ঞ-ন্নিষ্ক্রী॑ণীতে ॥ যস্য়া॑-হব॒নীয়ে-ঽনু॑দ্বাতে॒ গার্​হ॑পত্য় উ॒দ্বায়ে᳚ত্ ॥ 22 ॥

যদা॑হব॒নীয়॒-মনু॑দ্বাপ্য়॒ গার্​হ॑পত্য়॒-ম্মন্থে᳚ত্ । বিচ্ছি॑ন্দ্য়াত্ । ভ্রাতৃ॑ব্যমস্মৈ জনয়েত্ । যদ্বৈ য॒জ্ঞস্য়॑ বাস্ত॒ব্য়॑-ঙ্ক্রি॒যতে᳚ । তদনু॑ রু॒দ্রো-ঽব॑চরতি । য-ত্পূর্ব॑-মন্বব॒স্য়েত্ । বা॒স্ত॒ব্য়॑-ম॒গ্নিমুপা॑সীত । রু॒দ্রো᳚-ঽস্য় প॒শূ-ন্ঘাতু॑ক-স্স্য়াত্ । আ॒হ॒ব॒নীয়॑-মু॒দ্বাপ্য়॑ । গার্​হ॑পত্য়-ম্মন্থেত্ ॥ 23 ॥

ই॒তঃ প্র॑থ॒ম-ঞ্জ॑জ্ঞে অ॒গ্নিঃ । স্বাদ্য়োনে॒রধি॑ জা॒তবে॑দাঃ । স গা॑যত্রি॒য়া ত্রি॒ষ্টুভা॒ জগ॑ত্য়া । দে॒বেভ্য়ো॑ হ॒ব্য়ং-বঁ॑হতু প্রজা॒নন্নিতি॑ । ছন্দো॑ভিরে॒বৈন॒গ্গ্॒ স্বাদ্য়োনেঃ॒ প্রজ॑নযতি ॥ গার্​হ॑পত্য়-ম্মন্থতি । গার্​হ॑পত্য়ং॒-বাঁ অন্বাহি॑তাগ্নেঃ প॒শব॒ উপ॑ তিষ্ঠন্তে । স যদু॒দ্বায়॑তি । তদনু॑ প॒শবো-ঽপ॑ক্রামন্তি । ই॒ষে র॒য়্য়ৈ র॑মস্ব ॥ 24 ॥

সহ॑সে দ্য়ু॒ম্নায়॑ । ঊ॒র্জে পত্য়া॒য়েত্য়া॑হ । প॒শবো॒ বৈ র॒য়িঃ । প॒শূনে॒বাস্মৈ॑ রমযতি ॥ সা॒র॒স্ব॒তৌ ত্বোথ্সৌ॒ সমি॑ন্ধাতা॒মিত্য়া॑হ । ঋ॒-খ্সা॒মে বৈ সা॑রস্ব॒তাবুথ্সৌ᳚ । ঋ॒খ্-সা॒মাভ্য়া॑মে॒বৈন॒গ্​ম্॒ সমি॑ন্ধে ॥ স॒ম্রাড॑সি বি॒রাড॒সীত্য়া॑হ । র॒থ॒ন্ত॒রং-বৈঁ স॒ম্রাট্ । বৃ॒হ-দ্বি॒রাট্ ॥ 25 ॥

তাভ্য়া॑মে॒বৈন॒গ্​ম্॒ সমি॑ন্ধে ॥ বজ্রো॒ বৈ চ॒ক্রম্ । বজ্রো॒ বা এ॒তস্য়॑ য॒জ্ঞং-বিঁচ্ছি॑নত্তি । যস্য়ানো॑ বা॒ রথো॑ বা-ঽন্ত॒রা-ঽগ্নী যাতি॑ । আ॒হ॒ব॒নীয়॑-মু॒দ্বাপ্য়॑ । গার্​হ॑পত্য়া॒-দুদ্ধ॑রেত্ । যদ॑গ্নে॒ পূর্ব॒-ম্প্রভৃ॑ত-ম্প॒দগ্​ম্ হি তে᳚ । সূর্য়॑স্য় র॒শ্মীন-ন্বা॑ত॒তান॑ । তত্র॑ রয়ি॒ষ্ঠামনু॒ সম্ভ॑রৈ॒তম্ । স-ন্ন॑-স্সৃজ সুম॒ত্য়া বাজ॑ব॒ত্য়েতি॑ ॥ 26 ॥

পূর্বে॑ণৈ॒বাস্য়॑ য॒জ্ঞেন॑ য॒জ্ঞমনু॒ স-ন্ত॑নোতি ॥ ত্বম॑গ্নে স॒প্রথা॑ অ॒সীত্য়া॑হ । অ॒গ্নি-স্সর্বা॑ দে॒বতাঃ᳚ । দে॒বতা॑ভিরে॒ব য॒জ্ঞগ্​ম্ স-ন্ত॑নোতি ॥ অ॒গ্নয়ে॑ পথি॒কৃতে॑ পুরো॒ডাশ॑ম॒ষ্টাক॑পাল॒-ন্নির্ব॑পেত্ । অ॒গ্নিমে॒ব প॑থি॒কৃত॒গ্গ্॒ স্বেন॑ ভাগ॒ধেয়ে॒নোপ॑ ধাবতি । স এ॒বৈনং॑-য়ঁ॒জ্ঞিয়॒-ম্পন্থা॒মপি॑-নযতি । অ॒ন॒ড্বান্-দক্ষি॑ণা । ব॒হী হ্য়ে॑ষ সমৃ॑দ্ধ্য়ৈ ॥ 27 ॥
(হর॒ত্যথা᳚গ্নিহো॒ত্রং - নি॒ম্রোচ॑তি - হরে-দ্- দে॒বতা॑ - গচ্ছ - ত্য়ু॒দ্বায়ে᳚-ন্মন্থে-দ্রমস্ব-বৃ॒হ-দ্বি॒রাড্-ইতি॒-নব॑ চ) (অ. 4)

(নি বৈ পূর্ব॒-ন্ত্রীণি॑ নি॒ম্রোচ॑তি দ॒র্ভেণ॒ যদ্ধির॑ণ্যমগ্নিহো॒ত্র-ম্পুন॒র্বরু॑ণো
বারু॒ণ-ন্নি বা এ॒তস্য়া॒ভ্য়ু॑দেতি॑ চতুর্গৃহী॒তমাজ্য়ং॒ যদাজ্য়ং॒ পরা᳚চ্য়ু॒ষাঃ পুন॑র্মি॒ত্রো মে॒ত্রং-য়ঁস্য়া॑হব॒নীয়ে-ঽনু॑দ্বাতে॒ গার্​হ॑পত্য়ো॒ যদ্বৈ ম॑ন্থে॒দুদ্ধ॑রেত্)

অনুবাকং 5 - সোমাতিরেকপ্রাযশ্চিত্তম্
যস্য়॑ প্রাতস্সব॒নে সোমো॑-ঽতি॒রিচ্য়॑তে । মাদ্ধ্য়॑ন্দিন॒গ্​ম্॒ সব॑ন-ঙ্কা॒ময়॑মানো॒-ঽভ্যতি॑রিচ্যতে । গৌর্ধ॑যতি ম॒রুতা॒মিতি॒ ধয়॑দ্বতীষু কুর্বন্তি । হি॒নস্তি॒ বৈ স॒ন্ধ্যধী॑তম্ । স॒ন্ধীব॒ খলু॒ বা এ॒তত্ । য-থ্সব॑ন স্য়াতি॒রিচ্য়॑তে । যদ্ধয়॑দ্বতীষু কু॒র্বন্তি॑ । স॒ন্ধে-শ্শান্ত্য়ৈ᳚ ॥ গা॒য়॒ত্রগ্​ম্ সাম॑ ভবতি পঞ্চদ॒শ-স্স্তোমঃ॑ । তেনৈ॒ব প্রা॑তস্সব॒নান্নয়॑ন্তি ॥ 28 ॥

ম॒রুত্ব॑তীষু কুর্বন্তি । তেনৈ॒ব মাদ্ধ্য়॑ন্দিনা॒-থ্সব॑না॒ন্নয়॑ন্তি ॥ হোতু॑শ্চ ম॒সমনূন্ন॑যন্তে । হোতা-ঽনু॑শগ্​ম্সতি । ম॒দ্ধ্য়॒ত এ॒ব য॒জ্ঞগ্​ম্ স॒মাদ॑ধাতি ॥ যস্য়॒ মাদ্ধ্য়॑ন্দিনে॒ সব॑নে॒ সোমো॑-ঽতি॒রিচ্য়॑তে । আ॒দি॒ত্য়-ন্তৃ॑তীযসব॒ন-ঙ্কা॒ময়॑মানো॒-ঽভ্যতি॑রিচ্যতে । গৌ॒রি॒বী॒তগ্​ম্ সাম॑ ভবতি । অতি॑রিক্তং॒-বৈঁ গৌ॑রিবী॒তম্ । অতি॑রিক্তং॒-য়ঁ-থ্সব॑নস্য়া-তি॒রিচ্য়॑তে ॥ 29 ॥

অতি॑রিক্তস্য়॒ শান্ত্য়ৈ᳚ ॥ বণ্ম॒হাগ্​ম্ অ॑সি সূ॒র্য়েতি॑ কুর্বন্তি । যস্য়ৈ॒বাদি॒ত্যস্য়॒ সব॑নস্য়॒ কামে॑নাতি॒রিচ্য়॑তে । তেনৈ॒বৈন॒-ঙ্কামে॑ন॒ সম॑র্ধযন্তি ॥ গৌ॒রি॒বী॒তগ্​ম্ সাম॑ ভবতি । তেনৈ॒ব মাদ্ধ্য়॑ন্দিনা॒-থ্সব॑না॒ন্নয়॑ন্তি ॥ স॒প্ত॒দ॒শ-স্স্তোমঃ॑ । তেনৈ॒ব তৃ॑তীযসব॒নান্নয়॑ন্তি ॥ হোতু॑শ্চম॒সমনূন্ন॑যন্তে । হোতা-ঽনু॑শগ্​ম্ সতি ॥ 30 ॥

ম॒দ্ধ্য়॒ত এ॒ব য॒জ্ঞগ্​ম্ স॒মাদ॑ধাতি ॥ যস্য়॑ তৃতীযসব॒নে সোমো॑-ঽতি॒রিচ্য়ে॑ত । উ॒ক্থ্য়॑-ঙ্কুর্বীত । যস্য়ো॒ক্থ্য়ে॑-ঽতি॒রিচ্য়ে॑ত । অ॒তি॒রা॒ত্র-ঙ্কু॑র্বীত । যস্য়া॑-তিরা॒ত্রে॑-ঽতি॒রিচ্য়॑তে। তত্ত্বৈ দু॑ষ্প্রজ্ঞা॒নম্ । যজ॑মানং॒-বাঁ এ॒ত-ত্প॒শব॑ আ॒সাহ্য়॑ যন্তি । বৃ॒হ-থ্সাম॑ ভবতি । বৃ॒হদ্বা ই॒মাং-লোঁ॒কা-ন্দা॑ধার । বার্​হ॑তাঃ প॒শবঃ॑ । বৃ॒হ॒তৈবাস্মৈ॑ প॒শূ-ন্দা॑ধার ॥ শি॒পি॒বি॒ষ্টব॑তীষু কুর্বন্তি । শি॒পি॒বি॒ষ্টো বৈ দে॒বানা᳚-ম্পু॒ষ্টম্ । পুষ্ট্য়ৈ॒বৈন॒গ্​ম্॒ সম॑র্ধযন্তি ॥ হোতু॑শ্চম॒সমনূন্ন॑যন্তে । হোতা-ঽনু॑শগ্​ম্সতি । ম॒দ্ধ্য়॒ত এ॒ব য॒জ্ঞগ্​ম্ স॒মাদ॑ধাতি ॥ 31 ॥
(য়॒ন্তি॒ - সব॑নস্য়াতি॒রিচ্য়॑তে - শগ্​ম্সতি - দাধারা॒ষ্টৌ চ॑) (অ. 5)

অনুবাকং 6 - সবননিমিত্ত-ম্প্রাযশ্চিত্তম্
একৈ॑কো॒ বৈ জ॒নতা॑য়া॒-মিন্দ্রঃ॑ । একং॒-বাঁ এ॒তাবিন্দ্র॑ম॒ভি সগ্​ম্সু॑নুতঃ । যৌ দ্বৌ সগ্​ম্॑সুনু॒তঃ । প্র॒জাপ॑তি॒র্বা এ॒ষ বিতা॑যতে । য-দ্য়॒জ্ঞঃ । তস্য়॒ গ্রাবা॑ণো॒ দন্তাঃ᳚ । অ॒ন্য়॒ত॒রং-বাঁ এ॒তে সগ্​ম্॑সুন্ব॒তো-র্নির্ব॑ফ্সতি । পূর্বে॑ণোপ॒সৃত্য়া॑ দে॒বতা॒ ইত্য়া॑হুঃ । পূ॒র্বো॒প॒সৃ॒তস্য়॒ বৈ শ্রেয়া᳚-ন্ভবতি । এতি॑ব॒ন্ত্য়াজ্য়া॑নি ভবন্ত্য়॒-ভিজি॑ত্য়ৈ ॥ 32 ॥

ম॒রুত্ব॑তীঃ প্রতি॒পদঃ॑ । ম॒রুতো॒ বৈ দে॒বানা॒-মপ॑রাজিত-মা॒যত॑নম্ । দে॒বানা॑-মে॒বাপ॑রাজিত আ॒যত॑নে যততে ॥উ॒ভে বৃ॑হদ্রথন্ত॒রে ভ॑বতঃ । ই॒য়ং-বাঁব র॑থন্ত॒রম্ । অ॒সৌ বৃ॒হত্ । আ॒ভ্য়ামে॒বৈন॑-ম॒ন্তরে॑তি । বা॒চশ্চ॒ মন॑সশ্চ । প্রা॒ণাচ্চা॑-পা॒নাচ্চ॑ । দি॒বশ্চ॑ পৃথি॒ব্য়াশ্চ॑ ॥ 33 ॥

সর্ব॑স্মা-দ্বি॒ত্তা-দ্বেদ্য়া᳚ত্ ॥ অ॒ভি॒ব॒র্তো ব্র॑হ্মসা॒ম-ম্ভ॑বতি । সু॒ব॒র্গস্য়॑ লো॒কস্য়া॒-ভিবৃ॑ত্ত্য়ৈ ॥ অ॒ভি॒জি-দ্ভ॑বতি । সু॒ব॒র্গস্য়॑ লো॒কস্য়া॒-ভিজি॑ত্য়ৈ । বি॒শ্ব॒জি-দ্ভ॑বতি । বিশ্ব॑স্য়॒ জিত্য়ৈ᳚ ॥ যস্য়॒ ভূয়াগ্​ম্॑সো যজ্ঞক্র॒তব॒ ইত্য়া॑হুঃ । স দে॒বতা॑ বৃঙ্ক্ত॒ ইতি॑ । যদ্য়॑গ্নিষ্টো॒ম-স্সোমঃ॑ প॒রস্তা॒-থ্স্য়াত্ ॥ 34 ॥

উ॒ক্থ্য়॑-ঙ্কুর্বীত । যদ্য়ু॒ক্থ্য়॑-স্স্য়াত্ । অ॒তি॒রা॒ত্র-ঙ্কু॑র্বীত । য॒জ্ঞ॒ক্র॒তুভি॑-রে॒বাস্য়॑ দে॒বতা॑ বৃঙ্ক্তে ॥ যো বৈ ছন্দো॑ভি-রভি॒ভব॑তি । স সগ্​ম্॑ সুন্ব॒তো-র॒ভিভ॑বতি । সং॒​বেঁ॒শায়॑ ত্বোপবে॒শায়॒-ত্বেত্য়া॑হ । ছন্দাগ্​ম্॑সি॒ বৈ সং॑​বেঁ॒শ উ॑পবে॒শঃ । ছন্দো॑ভিরে॒বাস্য়॒ ছন্দাগ্॑স্য়॒-ভিভ॑বতি ॥ ই॒ষ্টর্গো॒ বা ঋ॒ত্বিজা॑-মদ্ধ্ব॒র্য়ুঃ ॥ 35 ॥

ই॒ষ্টর্গঃ॒ খলু॒ বৈ পূর্বো॒-ঽর্​ষ্টুঃ, ক্ষী॑যতে । প্রাণা॑পানৌ মৃ॒ত্য়োর্মা॑ পাত॒মিত্য়া॑হ । প্রা॒ণা॒পা॒নয়ো॑রে॒ব শ্র॑যতে । প্রাণা॑পানৌ॒ মা মা॑ হাসিষ্ট॒মিত্য়া॑হ । নৈন॑-ম্পু॒রা-ঽঽয়ু॑ষঃ প্রাণাপা॒নৌ জ॑হিতঃ ॥ আর্তিং॒-বাঁ এ॒তে নিয়॑ন্তি । যেষা᳚-ন্দীক্ষি॒তানা᳚-ম্প্র॒মীয়॑তে । তং-য়ঁদ॑ব॒বর্জে॑য়ুঃ । ক্রূ॒র॒কৃতা॑মিবৈষাং-লোঁ॒ক-স্স্য়া᳚ত্ । আহ॑র দ॒হেতি॑ ব্রূয়াত্ ॥ 36 ॥

ত-ন্দ॑ক্ষিণ॒তো বেদ্য়ৈ॑ নি॒ধায়॑ । স॒র্প॒রা॒জ্ঞিয়া॑ ঋ॒গ্ভি-স্স্তু॑য়ুঃ । ই॒য়ং-বৈঁ সর্প॑তো॒ রাজ্ঞী᳚ । অ॒স্য়া এ॒বৈন॒-ম্পরি॑দদতি ॥ ব্য়ৃ॑দ্ধ॒-ন্তদিত্য়া॑হুঃ । য-থ্স্তু॒ত-মন॑নুশস্ত॒-মিতি॑ । হোতা᳚ প্রথ॒মঃ প্রা॑চীনাবী॒তী মা᳚র্জা॒লীয়॒-ম্পরী॑য়াত্ । যা॒মীর॑নু-ব্রু॒বন্ন্ । স॒র্প॒রা॒জ্ঞীনা᳚-ঙ্কীর্তয়েত্ । উ॒ভয়ো॑রে॒বৈনং॑-লোঁ॒কয়োঃ॒ পরি॑দদতি ॥ 37 ॥

অথো॑ ধু॒বন্ত্য়ে॒বৈন᳚ম্ । অথো॒ ন্য়ে॑বাস্মৈ᳚ হ্নুবতে ॥ ত্রিঃ পরি॑যন্তি । ত্রয়॑ ই॒মে লো॒কাঃ । এ॒ভ্য় এ॒বৈনং॑-লোঁ॒কেভ্য়ো॑ ধুবতে । ত্রিঃ পুনঃ॒ পরি॑যন্তি । ষট্-থ্সম্প॑দ্যন্তে । ষড্বা ঋ॒তবঃ॑ । ঋ॒তুভি॑রে॒বৈন॑-ন্ধুবতে ॥ অগ্ন॒ আয়ূগ্​ম্॑ষি পবস॒ ইতি॑ প্রতি॒পদ॑-ঙ্কুর্বীরন্ন্ । র॒থ॒ন্ত॒রসা॑মৈষা॒গ্​ম্॒ সোম॑-স্স্য়াত্ । আয়ু॑রে॒বাত্মন্-দ॑ধতে । অথো॑ পা॒প্মান॑মে॒ব বি॒জহ॑তো যন্তি ॥ 38 ॥
(অ॒ভিজি॑ত্য়ৈ - পৃথি॒ব্য়াশ্চ॒ - স্য়া - দ॑দ্ধ্ব॒র্য়ু--র্ ব্রু॑য়াল্ - লো॒কয়োঃ॒ পরি॑দদতি - কুর্বর॒গ্গ্॒ স্ত্রীণি॑ চ) (অ. 6)

অনুবাকং 7 - যূপবিরোহণাদিপ্রাযশ্চিত্তম্
অ॒সু॒র্য়ং॑-বাঁ এ॒তস্মা॒-দ্বর্ণ॑-ঙ্কৃ॒ত্বা । প॒শবো॑ বী॒র্য়॑-মপ॑ক্রামন্তি । যস্য়॒ যূপো॑ বি॒রোহ॑তি । ত্বা॒ষ্ট্র-ম্ব॑হুরূ॒প-মাল॑ভেত । ত্বষ্টা॒ বৈ রূ॒পাণা॑মীশে । য এ॒ব রূ॒পাণা॒মীশে᳚ । সো᳚-ঽস্মি-ন্প॒শূন্. বী॒র্য়ং॑-য়ঁচ্ছতি । নাস্মা᳚ত্-প॒শবো॑ বী॒র্য়॑-মপ॑ক্রামন্তি ॥ আর্তিং॒-বাঁ এ॒তে নিয়॑ন্তি । যেষা᳚-ন্দীক্ষি॒তানা॑-ম॒গ্নি-রু॒দ্বায়॑তি ॥ 39 ॥

যদা॑হব॒নীয়॑ উ॒দ্বায়ে᳚ত্ । যত্ত-ম্মন্থে᳚ত্ । বিচ্ছি॑ন্দ্য়াত্ । ভ্রাতৃ॑ব্যমস্মৈ জনয়েত্ । যদা॑হব॒নীয়॑ উ॒দ্বায়ে᳚ত্ । আগ্নী᳚দ্ধ্রা॒-দুদ্ধ॑রেত্ । যদাগ্নী᳚দ্ধ্র উ॒দ্বায়ে᳚ত্ । গার্​হ॑পত্য়া॒-দুদ্ধ॑রেত্ । য-দ্গার্​হ॑পত্য় উ॒দ্বায়ে᳚ত্ । অত॑ এ॒ব পুন॑-র্মন্থেত্ ॥ 40 ॥

অত্র॒ বাব স নিল॑যতে । যত্র॒ খলু॒ বৈ নিলী॑ন-মুত্ত॒ম-ম্পশ্য়॑ন্তি । তদে॑ন-মিচ্ছন্তি ॥ যস্মা॒-দ্দারো॑রু॒দ্বায়ে᳚ত্ । তস্য়া॒রণী॑ কুর্য়াত্ । ক্রু॒মু॒কমপি॑ কুর্য়াত্ । এ॒ষা বা অ॒গ্নেঃ প্রি॒য়া ত॒নূঃ । যত্-ক্রু॑মু॒কঃ । প্রি॒যয়ৈ॒বৈন॑-ন্ত॒নুবা॒ সম॑র্ধযতি ॥ গার্​হ॑পত্য়-ম্মন্থতি ॥ 41 ॥

গার্​হ॑পত্য়ো॒ বা অ॒গ্নের্য়োনিঃ॑ । স্বাদে॒বৈনং॒-য়োঁনে᳚-র্জনযতি । নাস্মৈ॒ ভ্রাতৃ॑ব্য়-ঞ্জনযতি ॥ যস্য়॒ সোম॑ উপ॒দস্য়ে᳚ত্ । সু॒বর্ণ॒গ্​ম্॒ হির॑ণ্য়-ন্দ্বে॒ধা বি॒চ্ছিদ্য়॑ । ঋ॒জী॒ষে᳚-ঽন্যদা॑ধূনু॒য়াত্ । জু॒হু॒য়াদ॒ন্যত্ । সোম॑মে॒বা-ভি॑ষু॒ণোতি॑ । সোম॑-ঞ্জুহোতি ॥ সোম॑স্য়॒ বা অ॑ভিষূ॒যমা॑ণস্য় প্রি॒য়া ত॒নূ-রুদ॑ক্রামত্ ॥ 42 ॥

ত-থ্সু॒বর্ণ॒গ্​ম্॒ হির॑ণ্য়-মভবত্ । য-থ্সু॒বর্ণ॒গ্​ম্॒ হির॑ণ্য়-ঙ্কু॒র্বন্তি॑ । প্রি॒যয়ৈ॒বৈন॑-ন্ত॒নুবা॒ সম॑র্ধযন্তি ॥ যস্য়াক্রী॑ত॒গ্​ম্॒ সোম॑-মপ॒হরে॑য়ুঃ । ক্রী॒ণী॒য়াদে॒ব । সৈব ততঃ॒ প্রায়॑শ্চিত্তিঃ ॥ যস্য়॑ ক্রী॒তম॑প॒হরে॑য়ুঃ । আ॒দা॒রাগ্​শ্চ॑ ফাল্গু॒নানি॑ চা॒ভিষু॑ণুয়াত্ । গা॒য়॒ত্রী যগ্​ম্ সোম॒মাহ॑রত্ । তস্য়॒ যো-ঽগ্​ম্॑শুঃ প॒রা-ঽপ॑তত্ ॥ 43 ॥

ত আ॑দা॒রা অ॑ভবন্ন্ । ইন্দ্রো॑ বৃ॒ত্রম॑হন্ন্ । তস্য়॑ ব॒ল্কঃ পরা॑-ঽপতত্ । তানি॑ ফাল্গু॒নান্য়॑ভবন্ন্ । প॒শবো॒ বৈ ফা᳚ল্গু॒নানি॑ । প॒শব॒-স্সোমো॒ রাজা᳚ । যদা॑দা॒রাগ্​শ্চ॑ ফাল্গু॒নানি॑ চাভিষু॒ণোতি॑ । সোম॑মে॒ব রাজা॑নম॒ভিষু॑ণোতি ॥ শৃ॒তেন॑ প্রাতস্সব॒নে শ্রী॑ণীয়াত্ । দ॒দ্ধ্না ম॒দ্ধ্যন্দি॑নে ॥ 44 ॥

নী॒ত॒মি॒শ্রেণ॑ তৃতীযসব॒নে । অ॒গি॒ষ্টো॒ম-স্সোম॑-স্স্য়া-দ্রথন্ত॒রসা॑মা । য এ॒বর্ত্বিজো॑ বৃ॒তা-স্স্য়ুঃ । ত এ॑নং-য়াঁজয়েয়ুঃ । একা॒-ঙ্গা-ন্দক্ষি॑ণা-ন্দদ্য়া॒ত্তেভ্য়॑ এ॒ব । পুন॒-স্সোম॑-ঙ্ক্রীণীয়াত্ । য॒জ্ঞেনৈ॒ব ত-দ্য়॒জ্ঞ-মি॑চ্ছতি । সৈব ততঃ॒ প্রায়॑শ্চিত্তিঃ ॥ সর্বা᳚ভ্য়ো॒ বা এ॒ষ দে॒বতা᳚ভ্য়॒-স্সর্বে᳚ভ্য়ঃ পৃ॒ষ্ঠেভ্য়॑ আ॒ত্মান॒-মাগু॑রতে । য-স্স॒ত্রায়া॑গু॒রতে᳚ । এ॒তাবা॒ন্-খলু॒ বৈ পুরু॑ষঃ । যাব॑দস্য় বি॒ত্তম্ । স॒র্ব॒বে॒দ॒সেন॑ যজেত । সর্ব॑পৃষ্ঠো-ঽস্য়॒ সোম॑-স্স্য়াত্ । সর্বা᳚ভ্য় এ॒ব দে॒বতা᳚ভ্য়॒-স্সর্বে᳚ভ্য়ঃ পৃ॒ষ্ঠেভ্য়॑ আ॒ত্মান॒-ন্নিষ্ক্রী॑ণীতে ॥ 45 ॥
(উ॒দ্বায়॑তি - মন্থেন্ - মন্থ - ত্যক্রামত্ - প॒রা-ঽপ॑তন্ - ম॒দ্ধ্যন্দি॑ন - আগু॒রতে॒ পঞ্চ॑ চ) (অ. 7)

অনুবাকং 8 - পাবমানীমন্ত্রাঃ (স্মার্তে শ্ঞানাদৌ মার্জনার্থাশ্চ)
পব॑মান॒-স্সুব॒র্জনঃ॑ । প॒বিত্রে॑ণ॒ বিচ॑র্​ষণিঃ । যঃ পোতা॒ স পু॑নাতু মা ॥ পু॒নন্তু॑ মা দেবজ॒নাঃ । পু॒নন্তু॒ মন॑ বো ধি॒য়া । পু॒নন্তু॒ বিশ্ব॑ আ॒যবঃ॑ ॥ জাত॑বেদঃ প॒বিত্র॑বত্ । প॒বিত্রে॑ণ পুনাহি মা । শু॒ক্রেণ॑ দেব॒ দীদ্য়॑ত্ । অগ্নে॒ ক্রত্বা॒ ক্রতূ॒গ্​ম্॒ রনু॑ ॥ 46 ॥

যত্তে॑ প॒বিত্র॑-ম॒র্চিষি॑ । অগ্নে॒ বিত॑তমন্ত॒রা । ব্রহ্ম॒ তেন॑ পুনীমহে ॥ উ॒ভাভ্য়া᳚-ন্দেব সবিতঃ ।প॒বিত্রে॑ণ স॒বেন॑ চ । ই॒দ-ম্ব্রহ্ম॑ পুনীমহে ॥ বৈ॒শ্ব॒দে॒বী পু॑ন॒তী দে॒ব্য়াগা᳚ত্ । যস্য়ৈ॑ ব॒হ্বী-স্ত॒নুবো॑ বী॒তপৃ॑ষ্ঠাঃ । তয়া॒ মদ॑ন্ত-স্সধ॒মাদ্য়ে॑ষু । ব॒যগ্গ্​ স্য়া॑ম॒ পত॑য়ো রয়ী॒ণাম্ ॥ 47 ॥

বৈ॒শ্বা॒ন॒রো র॒শ্মিভি॑র্মা পুনাতু । বাতঃ॑ প্রা॒ণেনে॑ষি॒রো ম॑য়ো॒ভূঃ । দ্য়াবা॑পৃথি॒বী পয়॑সা॒ পয়ো॑ভিঃ । ঋ॒তাব॑রী য॒জ্ঞিয়ে॑ মা পুনীতাম্ ॥ বৃ॒হদ্ভি॑-স্সবিত॒স্তৃভিঃ॑ । বর্​ষি॑ষ্ঠৈ-র্দেব॒ মন্ম॑ভিঃ । অগ্নে॒ দক্ষৈঃ᳚ পুনাহি মা ॥ যেন॑ দে॒বা অপু॑নত । যেনাপো॑ দি॒ব্য়-ঙ্কশঃ॑ । তেন॑ দি॒ব্য়েন॒ ব্রহ্ম॑ণা ॥ 48 ॥

ই॒দ-ম্ব্রহ্ম॑ পুনীমহে ॥ যঃ পা॑বমা॒নীর॒দ্ধ্য়েতি॑ । ঋষি॑ভি॒-স্সম্ভৃ॑ত॒গ্​ম্॒ রস᳚ম্ । সর্ব॒গ্​ম্॒ স পূ॒তম॑শ্ঞাতি । স্ব॒দি॒ত-ম্মা॑ত॒রিশ্ব॑না ॥ পা॒ব॒মা॒নীর্য়ো অ॒দ্ধ্য়েতি॑ । ঋষি॑ভি॒-স্সম্ভৃ॑ত॒গ্​ম্॒ রস᳚ম্ । তস্মৈ॒ সর॑স্বতী দুহে । ক্ষী॒রগ্​ম্ স॒র্পি-র্মধূ॑দ॒কম্ ॥ পা॒ব॒মা॒নী-স্স্ব॒স্ত্যয়॑নীঃ ॥ 49 ॥

সু॒দুঘা॒ হি পয়॑স্বতীঃ । ঋষি॑ভি॒-স্সম্ভৃ॑তো॒ রসঃ॑ । ব্রা॒হ্ম॒ণেষ্ব॒মৃতগ্​ম্॑ হি॒তম্ ॥ পা॒ব॒মা॒নী-র্দি॑শন্তু নঃ । ই॒মং-লোঁ॒কমথো॑ অ॒মুম্ । কামা॒ন্-থ্সম॑র্ধযন্তু নঃ । দে॒বী-র্দে॒বৈ-স্স॒মাভৃ॑তাঃ ॥ পা॒ব॒মা॒নী-স্স্ব॒স্ত্যয়॑নীঃ । সু॒দুঘা॒হি ঘৃ॑ত॒শ্চুতঃ॑ । ঋষি॑ভি॒-স্সম্ভৃ॑তো॒ রসঃ॑ ॥ 50 ॥

ব্রা॒হ্ম॒ণেষ্ব॒মৃতগ্​ম্॑ হি॒তম্ ॥ যেন॑ দে॒বাঃ প॒বিত্রে॑ণ । আ॒ত্মান॑-ম্পু॒নতে॒ সদা᳚ । তেন॑ স॒হস্র॑ধারেণ । পা॒ব॒মা॒ন্য়ঃ পু॑নন্তু মা ॥ প্রা॒জা॒প॒ত্য়-ম্প॒বিত্র᳚ম্ । শ॒তোদ্য়া॑মগ্​ম্ হির॒ণ্ময়᳚ম্ । তেন॑ ব্রহ্ম॒ বিদো॑ ব॒যম্ । পূ॒ত-ম্ব্রহ্ম॑ পুনীমহে ॥ ইন্দ্র॑-স্সুনী॒তী স॒হ মা॑ পুনাতু । সোম॑-স্স্ব॒স্ত্য়া বরু॑ণ-স্স॒মীচ্য়া᳚ । য॒মো রাজা᳚ প্রমৃ॒ণাভিঃ॑ পুনাতু মা । জা॒তবে॑দা মো॒র্জয়॑ন্ত্য়া পুনাতু ॥ 51 ॥
(অনু॑ - রয়ী॒ণাং - ব্রহ্ম॑ণা - স্ব॒স্ত্যয়॑নীঃ - সু॒দুঘা॒ হি ঘৃ॑ত॒শ্চুত॒ ঋষি॑ভি॒-স্সম্ভৃ॑তো॒ রসঃ॑ - পুনাতু॒ ত্রীণি॑ চ ) (অ. 8)

অনুবাকং 9 - রাজসূযগতচাতুর্মাস্যশেষঃ
প্র॒জা বৈ স॒ত্রমা॑সত॒ তপ॒স্তপ্য়॑মানা॒ অজু॑হ্বতীঃ । দে॒বা অ॑পশ্য়-ঞ্চম॒স-ঙ্ঘৃ॒তস্য়॑ পূ॒র্ণগ্গ্​ স্ব॒ধাম্ । তমুপোদ॑তিষ্ঠ॒ন্ত-ম॑জুহবুঃ । তেনা᳚র্ধমা॒স ঊর্জ॒মবা॑রুন্ধত । তস্মা॑দর্ধমা॒সে দে॒বা ই॑জ্যন্তে ॥ পি॒তরো॑-ঽপশ্য়-ঞ্চম॒স-ঙ্ঘৃ॒তস্য়॑ পূ॒র্ণগ্গ্​ স্ব॒ধাম্ । তমুপোদ॑তিষ্ঠ॒ন্ত- ম॑জুহবুঃ । তেন॑ মা॒স্য়ূর্জ॒মবা॑রুন্ধত । তস্মা᳚-ন্মা॒সি পি॒তৃভ্য়ঃ॑ ক্রিযতে । ম॒নু॒ষ্য়া॑ অপশ্য়-ঞ্চম॒স-ঙ্ঘৃ॒তস্য়॑ পূ॒র্ণগ্গ্​ স্ব॒ধাম্ ॥ 52 ॥

তমুপোদ॑তিষ্ঠ॒ন্ত-ম॑জুহবুঃ । তেন॑-দ্ব॒য়ীমূর্জ॒মবা॑রুন্ধত । তস্মা॒-দ্দ্বিরহ্নো॑-মনু॒ষ্য়ে᳚ভ্য়॒ উপ॑হ্রিযতে । প্রা॒তশ্চ॑ সা॒য়-ঞ্চ॑ । প॒শবো॑-ঽপশ্য়-ঞ্চম॒স-ঙ্ঘৃ॒তস্য়॑ পূ॒র্ণগ্গ্​ স্ব॒ধাম্ । তমুপোদ॑তিষ্ঠ॒ন্ত-ম॑জুহবুঃ । তেন॑-ত্র॒য়ীমূর্জ॒মবা॑-রুন্ধত । তস্মা॒-ত্ত্রিরহ্নঃ॑ প॒শবঃ॒ প্রের॑তে । প্রা॒তস্স॑গং॒বে সা॒যম্ । অসু॑রা অপশ্য়-ঞ্চম॒স-ঙ্ঘৃ॒তস্য়॑ পূ॒র্ণগ্গ্​ স্ব॒ধাম্ ॥ 53 ॥

তমুপোদ॑তিষ্ঠ॒ন্ত-ম॑জুহবুঃ । তেন॑ সং​বঁথ্স॒র ঊর্জ॒মবা॑-রুন্ধত ॥ তে দে॒বা অ॑মন্যন্ত । অ॒মী বা ই॒দম॑ভূবন্ন্ । যদ্ব॒যগ্গ্​স্ম ইতি॑ । ত এ॒তানি॑ চাতুর্মা॒স্য়ান্য়॑পশ্যন্ন্ । তানি॒ নির॑বপন্ন্ । তৈরে॒বৈষা॒-ন্তামূর্জ॑মবৃঞ্জত । ততো॑ দে॒বা অভ॑বন্ন্ । পরা-ঽসু॑রাঃ ॥ 54 ॥

য-দ্যজ॑তে । যামে॒ব দে॒বা ঊর্জ॑ম॒বারু॑ন্ধত । তা-ন্তেনা-ব॑রুন্ধে । য-ত্পি॒তৃভ্য়ঃ॑ ক॒রোতি॑ । যামে॒ব পি॒তর॒ ঊর্জ॑ম॒বা-রু॑ন্ধত । তা-ন্তেনা-ব॑রুন্ধে । যদা॑বস॒থে-ঽন্ন॒গ্​ম্॒ হর॑ন্তি । যামে॒ব ম॑নু॒ষ্য়া॑ ঊর্জ॑ম॒বা-রু॑ন্ধত । তা-ন্তেনা-ব॑রুন্ধে । য-দ্দক্ষি॑ণা॒-ন্দদা॑তি ॥ 55 ॥

যামে॒ব প॒শব॒ ঊর্জ॑ম॒বা-রু॑ন্ধত । তা-ন্তেনা-ব॑রুন্ধে । যচ্চা॑তু-র্মা॒স্য়ৈ-র্যজ॑তে । যামে॒বাসু॑রা॒ ঊর্জ॑ম॒-বারু॑ন্ধত । তা-ন্তেনা-ব॑রুন্ধে । ভব॑ত্য়া॒ত্মনা᳚ । পরা᳚-ঽস্য়॒ ভ্রাতৃ॑ব্য়ো ভবতি ॥ বি॒রাজো॒ বা এ॒ষা বিক্রা᳚ন্তিঃ । যচ্চা॑তু-র্মা॒স্য়ানি॑ । বৈ॒শ্ব॒দে॒বেনা॒স্মিঁল্লো॒কে প্রত্য়॑তিষ্ঠত্ । ব॒রু॒ণ॒ প্র॒ঘা॒সৈ-র॒ন্তরি॑ক্ষে । সা॒ক॒মে॒ধৈ-র॒মুষ্মি॑ঁল্লো॒কে । এ॒ষ হ॒ ত্বাবৈত-থ্সর্ব॑-ম্ভবতি । য এ॒বং-বিঁ॒দ্বাগ্​শ্চা॑তুর্মা॒স্য়ৈ-র্যজ॑তে ॥ 56 ॥
(ম॒নু॒ষ্য়া॑ অপশ্যঞ্চম॒স-ঙ্ঘৃ॒তস্য়॑ পূ॒র্ণগ্গ্​ স্ব॒ধা-মসু॑রা অপশ্যঞ্চম॒স-ঙ্ঘৃ॒তস্য়॑ পূ॒র্ণগ্গ্​ স্ব॒ধা-মসু॑রা॒-দদা᳚-ত্যতিষ্ঠ চ্চ॒ত্বারি॑ চ) (অ. 9)

অনুবাকং 10 - চাতুর্মাস্যপ্রশংসনম্
অ॒গ্নির্বাব সং॑​বঁথ্স॒রঃ । আ॒দি॒ত্য়ঃ প॑রিবথ্স॒রঃ । চ॒ন্দ্রমা॑ ইদাবথ্স॒রঃ । বা॒য়ু-র॑নুবথ্স॒রঃ ॥ য-দ্বৈ᳚শ্বদে॒বেন॒ যজ॑তে । অ॒গ্নিমে॒ব ত-থ্সং॑​বঁথ্স॒র-মা᳚প্নোতি । তস্মা᳚-দ্বৈশ্বদে॒বেন॒ যজ॑মানঃ । সং॒​বঁ॒থ্স॒রীণাগ্॑ স্ব॒স্তি-মাশা᳚স্ত॒ ইত্য়াশা॑সীত ॥ য-দ্ব॑রুণ প্রঘা॒সৈ-র্যজ॑তে । আ॒দি॒ত্যমে॒ব ত-ত্প॑রিবথ্স॒র-মা᳚প্নোতি ॥ 57 ॥

তস্মা᳚-দ্বরুণ-প্রঘা॒সৈ-র্যজ॑মানঃ । প॒রি॒ব॒থ্স॒রীণাগ্॑ স্ব॒স্তি-মাশা᳚স্ত॒ ইত্য়াশা॑সীত । য-থ্সা॑কমে॒ধৈ-র্যজ॑তে । চ॒ন্দ্রম॑সমে॒ব তদি॑দাবথ্স॒র-মা᳚প্নোতি । তস্মা᳚-থ্সাকমে॒ধৈ-র্যজ॑মানঃ । ই॒দা॒ব॒থ্স॒রীণাগ্॑ স্ব॒স্তি-মাশা᳚স্ত॒ ইত্য়াশা॑সীত ॥ য-ত্পি॑তৃ য॒জ্ঞেন॒ যজ॑তে । দে॒বানে॒ব তদ॒ন্বব॑স্যতি ॥ অথ॒ বা অ॑স্য় বা॒য়ুশ্চা॑-নুবথ্স॒রশ্চা প্রী॑তা॒বুচ্ছি॑ষ্য়েতে । যচ্ছু॑নাসী॒রীয়ে॑ণ॒ যজ॑তে ॥ 58 ॥

বা॒য়ুমে॒ব তদ॑নুবথ্স॒র-মা᳚প্নোতি । তস্মা᳚-চ্ছুনাসী॒রীয়ে॑ণ॒ যজ॑মানঃ । অ॒নু॒ব॒থ্স॒রীণাগ্॑ স্ব॒স্তি-মাশা᳚স্ত॒ ইত্য়াশা॑সীত ॥ সং॒​বঁ॒থ্স॒রং-বাঁ এ॒ষ ঈ᳚ফ্স॒তীত্য়া॑হুঃ । যশ্চা॑তু-র্মা॒স্য়ৈ-র্যজ॑ত॒ ইতি॑ । এ॒ষ হ॒ ত্বৈ স॑বন্​থ্স॒র-মা᳚প্নোতি । য এ॒বং-বিঁ॒দ্বাগ্​ শ্চা॑তুর্মা॒স্য়ৈ-র্যজ॑তে ॥ বিশ্বে॑ দে॒বা-স্সম॑যজন্ত । তে᳚-ঽগ্নিমে॒বায়॑জন্ত । ত এ॒তং-লোঁ॒কম॑জযন্ন্ ॥ 59 ॥

যস্মি॑ন্ন॒গ্নিঃ । য-দ্বৈ᳚শ্বদে॒বেন॒ যজ॑তে । এ॒তমে॒ব লো॒ক-ঞ্জ॑যতি । যস্মি॑ন্ন॒গ্নিঃ । অ॒গ্নেরে॒ব সায়ু॑জ্য়॒মুপৈ॑তি ॥ য॒দা বৈ᳚শ্বদে॒বেন॒ যজ॑তে । অথ॑ সং​বঁথ্স॒রস্য়॑ গৃ॒হপ॑তি-মাপ্নোতি । য॒দা সং॑​বঁথ্স॒রস্য়॑ গৃ॒হপ॑তি-মা॒প্নোতি॑ । অথ॑ সহস্রয়া॒জিন॑-মাপ্নোতি । য॒দা স॑হস্রয়া॒জিন॑-মা॒প্নোতি॑ ॥ 60 ॥

অথ॑ গৃহমে॒ধিন॑-মাপ্নোতি । য॒দা গৃ॑হমে॒ধিন॑-মা॒প্নোতি॑ । অথা॒গ্নি-র্ভ॑বতি । য॒দা-ঽগ্নি-র্ভব॑তি । অথ॒ গৌর্ভ॑বতি । এ॒ষা বৈ বৈ᳚শ্বদে॒বস্য়॒ মাত্রা᳚ । এ॒ত-দ্বা এ॒তেষা॑মব॒মম্ । অতো॑-ঽতো॒ বা উত্ত॑রাণি॒ শ্রেয়াগ্​ম্॑সি ভবন্তি । য-দ্বিশ্বে॑ দে॒বা-স্স॒ময়॑জন্ত । ত-দ্বৈ᳚শ্বদে॒বস্য়॑ বৈশ্বদেব॒ত্বম্ ॥ 61 ॥

অথা॑দি॒ত্য়ো বরু॑ণ॒গ্​ম্॒ রাজা॑নং-বঁরুণ প্রঘা॒সৈর॑যজত । স এ॒তং-লোঁ॒কম॑জযত্ । যস্মি॑ন্নাদি॒ত্য়ঃ । য-দ্ব॑রুণ-প্রঘা॒সৈ-র্যজ॑তে । এ॒তমে॒ব লো॒ক-ঞ্জ॑যতি । যস্মি॑ন্নাদি॒ত্য়ঃ । আ॒দি॒ত্যস্য়ৈ॒ব-সায়ু॑জ্য়॒-মুপৈ॑তি । যদা॑দি॒ত্য়ো বরু॑ণ॒গ্​ম্॒ রাজা॑নং-বঁরুণ প্রঘা॒সৈরয়॑জত । ত-দ্ব॑রুণ প্রঘা॒সানাং᳚-বঁরুণ প্রঘাস॒ত্বম্ ॥ অথ॒ সোমো॒ রাজা॒ ছন্দাগ্​ম্॑সি সাকমে॒ধৈর॑যজত ॥ 62 ॥

স এ॒তং-লোঁ॒কম॑জযত্ । যস্মিগ্গ্॑ শ্চ॒ন্দ্রমা॑ বি॒ভাতি॑ । য-থ্সা॑কমে॒ধৈ-র্যজ॑তে । এ॒তমে॒ব লো॒ক-ঞ্জ॑যতি । যস্মিগ্গ্॑ শ্চ॒ন্দ্রমা॑ বি॒ভাতি॑ । চ॒ন্দ্রম॑স এ॒ব সায়ু॑জ্য়॒-মুপৈ॑তি । সোমো॒ বৈ চ॒ন্দ্রমাঃ᳚ । এ॒ষ হ॒ ত্বৈ সা॒ক্ষা-থ্সোম॑-ম্ভক্ষযতি । য এ॒বং-বিঁ॒দ্বান্-থ্সা॑কমে॒ধৈ-র্যজ॑তে । য-থ্সোম॑শ্চ॒ রাজা॒ ছন্দাগ্​ম্॑সি চ স॒মৈধ॑ন্ত ॥ 63 ॥

ত-থ্সা॑কমে॒ধানাগ্​ম্॑ সাকমেধ॒ত্বম্ ॥ অথ॒র্তবঃ॑ পি॒তরঃ॑ প্র॒জাপ॑তি-ম্পি॒তর॑-ম্পিতৃয়॒জ্ঞে-না॑যজন্ত । ত এ॒তং-লোঁ॒কম॑জযন্ন্ । যস্মি॑ন্নৃ॒তবঃ॑ । য-ত্পি॑তৃয়॒জ্ঞেন॒ যজ॑তে । এ॒তমে॒ব লো॒ক-ঞ্জ॑যতি । যস্মি॑ন্নৃ॒তবঃ॑ । ঋ॒তূ॒নামে॒ব সায়ু॑জ্য়॒-মুপৈ॑তি । যদ্-ঋ॒তবঃ॑ পি॒তরঃ॑ প্র॒জাপ॑তি-ম্পি॒তর॑-ম্পিতৃয়॒জ্ঞেনায়॑জন্ত । ত-ত্পি॑তৃয়॒জ্ঞস্য়॑ পিতৃযজ্ঞ॒ত্বম্ ॥ 64 ॥

অথৌষ॑ধয় ই॒ম-ন্দে॒ব-ন্ত্র্য়॑ম্বকৈ-রযজন্ত॒ প্রথে॑ম॒হীতি॑ । ততো॒ বৈ তা অ॑প্রথন্ত । য এ॒বং-বিঁ॒দ্বাগ্​ স্ত্র্য়॑ম্বকৈ॒-র্যজ॑তে । প্রথ॑তে প্র॒জয়া॑ প॒শুভিঃ॑ ॥ অথ॑ বা॒য়ুঃ প॑রমে॒ষ্ঠিনগ্​ম্॑ শুনাসী॒রীয়ে॑ণাযজত । স এ॒তং-লোঁ॒কম॑জযত্ । যস্মি॑ন্-বা॒য়ুঃ । যচ্ছু॑নাসী॒রীয়ে॑ণ॒ যজ॑তে । এ॒তমে॒ব লো॒ক-ঞ্জ॑যতি । যস্মি॑ন্-বা॒য়ুঃ ॥ 65 ॥

বা॒য়োরে॒ব সায়ু॑জ্য়॒-মুপৈ॑তি ॥ ব্র॒হ্ম॒বা॒দিনো॑ বদন্তি । প্র চা॑তুর্মাস্যয়া॒জী-মী॑য়॒তা(3) ন প্রমী॑য়॒তা(3) ইতি॑ । জীব॒ন্বা এ॒ষ ঋ॒তূনপ্য়ে॑তি । যদি॑ ব॒সন্তা᳚ প্র॒মীয়॑তে । ব॒স॒ন্তো ভ॑বতি । যদি॑ গ্রী॒ষ্মে গ্রী॒ষ্মঃ । যদি॑ ব॒র্॒ষাসু॑ ব॒র্॒ষাঃ । যদি॑ শ॒রদি॑ শ॒রত্ । যদি॒ হেম॑ন্. হেম॒ন্তঃ । ঋ॒তুর্ভূ॒ত্বা সং॑​বঁথ্স॒রমপ্য়ে॑তি । সং॒​বঁ॒থ্স॒রঃ প্র॒জাপ॑তিঃ । প্র॒জাপ॑তি॒র্বা বৈষঃ ॥ 66 ॥
(প॒রি॒ব॒থ্স॒রমা᳚প্নোতি - শুনাসী॒রীয়ে॑ণ॒ যজ॑তে - ঽজযন্থ্ - সহস্রয়া॒জিন॑মা॒প্নোতি॑ - বৈশ্বদেব॒ত্বগ্​ম্ - সা॑কমে॒ধৈর॑যজত - স॒মৈধ॑ন্ত - পিতৃযজ্ঞ॒ত্বং - জ॑যতি॒ যস্মি॑ন্ বা॒য়ু--র্ হে॑ম॒ন্ত স্ত্রীণী॑ চ) (অ. 10)

(উ॒ভয়ে॑ - যু॒বগ্​ম্ সু॒রাম॒ - মুদ॑স্থা॒ন্ - নি বৈ - যস্য়॑ প্রাতস্সব॒ন - একৈ॑কো - ঽসু॒র্যম্ - পব॑মানঃ - প্র॒জা বৈ স॒ত্রমা॑স - তা॒গ্নির্বাব সং॑​বঁথ্স॒রো দশ॑ )

(উ॒ভয়ে॒ বা - উদ॑স্থা॒থ্ - সর্বা॑ভি--র্ মদ্ধ্য়॒তো - ঽত্র॒ বাব - ব্রা᳚হ্ম॒ণেষ্ব - থ॑ গৃহমে॒ধিন॒গ্​ম্॒ ষট্-থ্ষ॑ষ্টিঃ)

(উ॒ভয়ে॒ - বাবৈষঃ)

॥ হরিঃ॑ ওম্ ॥

॥ কৃষ্ণ যজুর্বেদীয় তৈত্তিরীয় ব্রাহ্মণে প্রথমাষ্টকে চতুর্থঃ প্রপাঠক-স্সমাপ্তঃ ॥

1 কৃষ্ণ যজুর্বেদীয় তৈত্তিরীয় ব্রাহ্মণে প্রথমাষ্টকং