কৃষ্ণ যজুর্বেদীয় তৈত্তিরীয় ব্রাহ্মণে প্রথমাষ্টকে অষ্টমঃ প্রপাঠকঃ - রাজসূয়ানুব্রাহ্মণং

ও-ন্নমঃ পরমাত্মনে, শ্রী মহাগণপতয়ে নমঃ,
শ্রী গুরুভ্য়ো নমঃ । হ॒রিঃ॒ ওম্ ॥

অনুবাকং 1 - সংসৃপাং হবীংষি দশ
বরু॑ণস্য় সুষুবা॒ণস্য়॑ দশ॒ধেন্দ্রি॒য়ং-বীঁ॒র্য়॑-ম্পরা॑-ঽপতত্ । তথ্স॒গ্​ম্॒ সৃদ্ভি॒রনু॒ সম॑সর্পত্ । তথ্স॒গ্​ম্॒ সৃপাগ্​ম্॑ সগ্​ম্ সৃ॒ত্ত্বম্ । অ॒গ্নিনা॑ দে॒বেন॑ প্রথ॒মে ঽহ॒ন্ননু॒ প্রায়ু॑ঙ্ক্ত । সর॑স্বত্য়া বা॒চা দ্বি॒তীয়ে᳚ । স॒বি॒ত্রা প্র॑স॒বেন॑ তৃ॒তীয়ে᳚ । পূ॒ষ্ণা প॒শুভি॑শ্চতু॒র্থে । বৃহ॒স্পতি॑না॒ ব্রহ্ম॑ণা পঞ্চ॒মে । ইন্দ্রে॑ণ দে॒বেন॑ ষ॒ষ্ঠে । বরু॑ণেন॒ স্বয়া॑ দে॒বত॑য়া সপ্ত॒মে ॥ 1 ॥

সোমে॑ন॒ রাজ্ঞা᳚-ঽষ্ট॒মে । ত্বষ্ট্রা॑ রূ॒পেণ॑ নব॒মে । বিষ্ণু॑না য॒জ্ঞেনা᳚প্নোত্ । যথ্স॒গ্​ম্॒ সৃপো॒ ভব॑ন্তি । ই॒ন্দ্রি॒যমে॒ব ত-দ্বী॒র্য়ং॑-য়ঁজ॑মান আপ্নোতি । পূর্বা॑ পূর্বা॒ বেদি॑র্ভবতি । ই॒ন্দ্রি॒যস্য়॑ বী॒র্য়॑স্য়াব॑রুদ্ধ্য়ৈ । পু॒রস্তা॑-দুপ॒সদাগ্​ম্॑ সৌ॒ম্য়েন॒ প্রচ॑রতি । সোমো॒ বৈ রে॑তো॒ধাঃ । রেত॑ এ॒ব ত-দ্দ॑ধাতি । অ॒ন্ত॒রা ত্বা॒ষ্ট্রেণ॑ । রেত॑ এ॒ব হি॒ত-ন্ত্বষ্টা॑ রূ॒পাণি॒ বিক॑রোতি । উ॒পরি॑ষ্টা-দ্বৈষ্ণ॒বেন॑ । য॒জ্ঞো বৈ বিষ্ণুঃ॑ । য॒জ্ঞ এ॒বান্ত॒তঃ প্রতি॑ তিষ্ঠতি ॥ 2 ॥
(স॒প্ত॒মে - দ॑ধাতি॒ পঞ্চ॑ চ) (অ. 1)

অনুবাকং 2 - দশপেয়ঃ
জা॒মি বা এ॒ত-ত্কু॑র্বন্তি । যথ্স॒দ্য়ো দী॒ক্ষয়॑ন্তি স॒দ্য়-স্সোম॑-ঙ্ক্রী॒ণন্তি॑ । পু॒ণ্ড॒রি॒স্র॒জা-ম্প্রয়॑চ্ছ॒ত্যজা॑মিত্বায় । অঙ্গি॑রস-স্সুব॒র্গং-লোঁ॒কং-য়ঁন্তঃ॑ । অ॒ফ্সু দী᳚ক্ষাত॒পসী॒ প্রাবে॑শযন্ন্ । ত-ত্পু॒ণ্ডরী॑ক-মভবত্ । য-ত্পু॑ণ্ডরিস্র॒জা-ম্প্র॒যচ্ছ॑তি । সা॒ক্ষাদে॒ব দী᳚ক্ষাত॒পসী॒ অব॑রুন্ধে । দ॒শভি॑র্বথ্সত॒রৈ-স্সোম॑-ঙ্ক্রীণাতি । দশা᳚ক্ষরা বি॒রাট্ ॥ 3 ॥

অন্নং॑-বিঁ॒রাট্ । বি॒রাজৈ॒বান্নাদ্য়॒মব॑ রুন্ধে । মু॒ষ্ক॒রা ভ॑বন্তি সেন্দ্র॒ত্বায়॑ । দ॒শ॒পেয়ো॑ ভবতি । অ॒ন্নাদ্য়॒স্য়াব॑রুদ্ধ্য়ৈ । শ॒ত-ম্ব্রা᳚হ্ম॒ণাঃ পি॑বন্তি । শ॒তায়ুঃ॒ পুরু॑ষ-শ্শ॒তেন্দ্রি॑য়ঃ । আয়ু॑ষ্য়ে॒বেন্দ্রি॒য়ে প্রতি॑ তিষ্ঠতি । স॒প্ত॒দ॒শগ্গ্​ স্তো॒ত্র-ম্ভ॑বতি । স॒প্ত॒দ॒শঃ প্র॒জাপ॑তিঃ ॥ 4 ॥

প্র॒জাপ॑তে॒রাপ্ত্য়ৈ᳚ । প্রা॒কা॒শাব॑দ্ধ্ব॒র্যবে॑ দদাতি । প্র॒কা॒শ-মে॒বৈন॑-ঙ্গমযতি । স্রজ॑মু-দ্গা॒ত্রে । ব্য়ে॑বাস্মৈ॑ বাসযতি । রু॒ক্মগ্​ম্ হোত্রে᳚ । আ॒দি॒ত্যমে॒বাস্মা॒ উন্ন॑যতি । অশ্ব॑-ম্প্রস্তোতৃপ্রতিহ॒র্তৃভ্য়া᳚ম্ । প্রা॒জা॒পত্য়ো বা অশ্বঃ॑ । প্র॒জাপ॑তে॒রাপ্ত্য়ৈ᳚ ॥ 5 ॥

দ্বাদ॑শ-পষ্ঠৌ॒হী-র্ব্র॒হ্মণে᳚ । আয়ু॑রে॒বাব॑-রুন্ধে । ব॒শা-ম্মৈ᳚ত্রাবরু॒ণায়॑ । রা॒ষ্ট্রমে॒ব ব॒শ্য়॑কঃ । ঋ॒ষ॒ভ-ম্ব্রা᳚হ্মণাচ্ছ॒গ্​ম্॒সিনে᳚ । রা॒ষ্ট্র-মে॒বেন্দ্রি॑য়া॒ব্য়॑কঃ । বাস॑সী নেষ্টাপো॒তৃভ্য়া᳚ম্ । প॒বিত্রে॑ এ॒বাস্য়ৈ॒তে । স্থূরি॑ যবাচি॒ত-ম॑চ্ছাবা॒কায়॑ । অ॒ন্ত॒ত এ॒ব বরু॑ণ॒মব॑ যজতে ॥ 6 ॥

অ॒ন॒ড্বাহ॑-ম॒গ্নীধে᳚ । বহ্নি॒র্বা অ॑ন॒ড্বান্ । বহ্নি॑র॒গ্নীত্ । বহ্নি॑নৈ॒ব বহ্নি॑ য॒জ্ঞস্য়াব॑রুন্ধে । ইন্দ্র॑স্য় সুষুবা॒ণস্য়॑ ত্রে॒ধেন্দ্রি॒য়ং-বীঁ॒র্য়॑-ম্পরা॑-ঽপতত্ । ভৃগু॒-স্তৃতী॑য়-মভবত্ । শ্রা॒য়॒ন্তীয়॒-ন্তৃতী॑যম্ । সর॑স্বতী॒ তৃতী॑যম্ । ভা॒র্গ॒বো হোতা॑ ভবতি । শ্রা॒য়॒ন্তীয়॑-ম্ব্রহ্মসা॒ম-ম্ভ॑বতি । বা॒র॒ব॒ন্তীয়॑-মগ্নিষ্টোম-সা॒মম্ । সা॒র॒স্ব॒তীর॒পো গৃ॑হ্ণাতি । ই॒ন্দ্রি॒যস্য়॑ বী॒র্য়॑স্য়াব॑-রুদ্ধ্য়ৈ । শ্রা॒য়॒ন্তীয়॑-ম্ব্রহ্মসা॒ম-ম্ভ॑বতি । ই॒ন্দ্রি॒যমে॒বাস্মি॑ন্ বী॒র্য়॒গ্গ্॑ শ্রযতি । বা॒র॒ব॒ন্তীয়॑-মগ্নিষ্টোম-সা॒মম্ । ই॒ন্দ্রি॒যমে॒বাস্মি॑ন্ বী॒র্য়ং॑-বাঁরযতি ॥ 7 ॥
(বি॒রাট্ - প্র॒জাপ॑তি॒ - রশ্বঃ॑ প্র॒জাপ॑তে॒রাপ্ত্য়ৈ॑ - যজতে - ব্রহ্মসা॒ম-ম্ভ॑বতি স॒প্ত চ॑) (অ. 2)

অনুবাকং 3 - দিশামবেষ্টয়ঃ, পশুবন্ধঃ, সাত্যদূতহবীংষি চ
ঈ॒শ্ব॒রো বা এ॒ষ দিশো-ঽনূ-ন্ম॑দিতোঃ । য-ন্দিশো-ঽনু॑ ব্য়াস্থা॒পয়॑ন্তি । দি॒শামবে᳚ষ্টয়ো ভবন্তি । দি॒ক্ষ্বে॑ব প্রতি॑ তিষ্ঠ॒ত্যনু॑ন্মাদায় । পঞ্চ॑ দে॒বতা॑ যজতি । পঞ্চ॒ দিশঃ॑ । দি॒ক্ষ্বে॑ব প্রতি॑ তিষ্ঠতি । হ॒বিষো॑ হবিষ ই॒ষ্ট্বা বা॑র্​হস্প॒ত্য়-ম॒ভিঘা॑রযতি । য॒জ॒মা॒ন॒দে॒ব॒ত্য়ো॑ বৈ বৃহ॒স্পতিঃ॑ । যজ॑মানমে॒ব তেজ॑সা॒ সম॑র্ধযতি ॥ 8 ॥

আ॒দি॒ত্য়া-ম্ম॒ল্॒ঃআ-ঙ্গ॒র্ভিণী॒মা ল॑ভতে । মা॒রু॒তী-ম্পৃশ্ঞি॑-ম্পষ্ঠৌ॒হীম্ । বিশ॑-ঞ্চৈ॒বাস্মৈ॑ রা॒ষ্ট্র-ঞ্চ॑ স॒মীচী॑ দধাতি । আ॒দি॒ত্যয়া॒ পূর্ব॑য়া॒ প্রচ॑রতি । মা॒রু॒ত্য়োত্ত॑রয়া । রা॒ষ্ট্র এ॒ব বিশ॒মনু॑বদ্ধ্নাতি । উ॒চ্চৈরা॑দি॒ত্য়ায়া॒ আশ্রা॑বযতি । উ॒পা॒গ্​ম্॒শু মা॑রু॒ত্য়ৈ । তস্মা᳚-দ্রা॒ষ্ট্রং-বিঁশ॒মতি॑বদতি । গ॒র্ভিণ্য়া॑দি॒ত্য়া ভ॑বতি ॥ 9 ॥

ই॒ন্দ্রি॒য়ং-বৈঁ গর্ভঃ॑ । রা॒ষ্ট্র-মে॒বেন্দ্রি॑য়া॒ব্য়॑কঃ । অ॒গ॒র্ভা মা॑রু॒তী । বিড্বৈ ম॒রুতঃ॑ । বিশ॑মে॒ব নিরি॑ন্দ্রিয়ামকঃ । দে॒বা॒সু॒রা-স্সং​য়ঁ॑ত্তা আসন্ন্ । তে দে॒বা অ॒শ্বিনোঃ᳚ পূ॒ষন্-বা॒চ-স্স॒ত্য়গ্​ম্ স॑নি॒ন্ধায়॑ । অনৃ॑তে॒নাসু॑রা-ন॒ভ্য়॑ভবন্ন্ । তে᳚-ঽশ্বিভ্য়া᳚-ম্পূ॒ষ্ণে পু॑রো॒ডাশ॒-ন্দ্বাদ॑শকপাল॒-ন্নির॑বপন্ন্ । ততো॒ বৈ তে বা॒চ-স্স॒ত্যমবা॑রুন্ধত ॥ 10 ॥

যদ॒শ্বিভ্য়া᳚-ম্পূ॒ষ্ণে পু॑রো॒ডাশ॒-ন্দ্বাদ॑শকপাল-ন্নি॒র্বপ॑তি । অনৃ॑তেনৈ॒ব ভ্রাতৃ॑ব্য়া-নভি॒ভূয়॑ । বা॒চ-স্স॒ত্যমব॑রুন্ধে । সর॑স্বতে সত্য়॒বাচে॑ চ॒রুম্ । পূর্ব॑মে॒বোদি॒তম্ । উত্ত॑রেণা॒ভি গৃ॑ণাতি । স॒বি॒ত্রে স॒ত্যপ্র॑সবায় পুরো॒ডাশ॒-ন্দ্বাদ॑শকপাল॒-ম্প্রসূ᳚ত্য়ৈ । দূ॒তান্-প্রহি॑ণোতি । আ॒বিদ॑ এ॒তা ভ॑বন্তি । আ॒বিদ॑মে॒বৈন॑-ঙ্গমযন্তি । অথো॑ দূ॒তেভ্য়॑ এ॒ব ন ছি॑দ্যতে । তি॒সৃ॒ধ॒ন্বগ্​ম্ শু॑ষ্কদৃ॒তি-র্দক্ষি॑ণা॒ সমৃ॑দ্ধ্য়ৈ ॥ 11 ॥
(অ॒র্ধ॒য়॒তি॒ - ভ॒ব॒ - ত্য়॒রু॒ন্ধ॒ত॒ - গ॒ম॒য়॒ন্তি॒ দ্বে চ॑) (অ. 3)

অনুবাকং 4 - প্রয়ুজাং হবীংষি দ্বাদশ
আ॒গ্নে॒য়-ম॒ষ্টাক॑পাল॒-ন্নির্ব॑পতি । তস্মা॒-চ্ছিশি॑রে কুরুপঞ্চা॒লাঃ প্রাঞ্চো॑ যান্তি । সৌ॒ম্য়-ঞ্চ॒রুম্ । তস্মা᳚-দ্বস॒ন্তং-ব্য়ঁ॑ব॒সায়া॑দযন্তি । সা॒বি॒ত্র-ন্দ্বাদ॑শকপালম্ । তস্মা᳚ত্-পু॒রস্তা॒-দ্যবা॑নাগ্​ম্ সবি॒ত্রা বিরু॑ন্ধতে । বা॒র্॒হ॒স্প॒ত্য়-ঞ্চ॒রুম্ । স॒বি॒ত্রৈব বি॒রুদ্ধ্য়॑ । ব্রহ্ম॑ণা॒ যবা॒নাদ॑ধতে । ত্বা॒ষ্ট্র-ম॒ষ্টাক॑পালম্ ॥ 12 ॥

রূ॒পাণ্য়ে॒ব তেন॑ কুর্বতে । বৈ॒শ্বা॒ন॒র-ন্দ্বাদ॑শকপালম্ । তস্মা᳚জ্জঘ॒ন্য়ে॑ নৈদা॑ঘে প্র॒ত্যঞ্চঃ॑ কুরুপঞ্চা॒লা যা᳚ন্তি । সা॒র॒স্ব॒ত-ঞ্চ॒রু-ন্নির্ব॑পতি । তস্মা᳚ত্-প্রা॒বৃষি॒ সর্বা॒ বাচো॑ বদন্তি । পৌ॒ষ্ণেন॒ ব্যব॑স্যন্তি । মৈ॒ত্রেণ॑ কৃষন্তে । বা॒রু॒ণেন॒ বিধৃ॑তা আসতে । ক্ষৈ॒ত্র॒প॒ত্য়েন॑ পাচযন্তে । আ॒দি॒ত্য়েনাদ॑ধতে ॥ 13 ॥

মা॒সিমা᳚স্য়ে॒তানি॑ হ॒বীগ্​ম্ষি॑ নি॒রুপ্য়া॒ণীত্য়া॑হুঃ । তেনৈ॒বর্তূন্-প্রয়ু॑ঙ্ক্ত॒ ইতি॑ । অথো॒ খল্বা॑হুঃ । ক-স্সং॑​বঁথ্স॒র-ঞ্জী॑বিষ্য়॒তীতি॑ । ষডে॒ব পূ᳚র্বে॒দ্য়ুর্নি॒রুপ্য়া॑ণি । ষডু॑ত্তরে॒দ্য়ুঃ । তেনৈ॒বর্তূন্-প্রয়ু॑ঙ্ক্তে । দক্ষি॑ণো রথবাহনবা॒হঃ পূর্বে॑ষা॒-ন্দক্ষি॑ণা । উত্ত॑র॒ উত্ত॑রেষাম্ । সং॒​বঁ॒থ্স॒রস্য়ৈ॒বান্তৌ॑ যুনক্তি । সু॒ব॒র্গস্য়॑ লো॒কস্য়॒ সম॑ষ্ট্য়ৈ ॥ 14 ॥
(ত্বা॒ষ্ট্রম॒ষ্টাক॑পালং - দধতে - যুন॒ক্ত্য়েকং॑ চ) (অ. 4)

অনুবাকং 5 - সৌত্রামণিঃ, পশবঃ, হবীংষি চ
ইন্দ্র॑স্য় সুষুবা॒ণস্য়॑ দশ॒ধেন্দ্রি॒য়ং-বীঁ॒র্য়॑-ম্পরা॑-ঽপতত্ । স য-ত্প্র॑থ॒ম-ন্নি॒রষ্ঠী॑বত্ । তত্-ক্ব॑লমভবত্ । য-দ্দ্বি॒তীয়᳚ম্ । ত-দ্বদ॑রম্ । যত্-তৃ॒তীয়᳚ম্ । তত্-ক॒র্কন্ধু॑ । যন্ন॒স্তঃ । স সি॒গ্​ম্॒হঃ । যদক্ষ্য়োঃ᳚ ॥ 15 ॥

স শা᳚র্দূ॒লঃ । যত্-কর্ণ॑য়োঃ । স বৃকঃ॑ । য ঊ॒র্ধ্বঃ ।
স সোমঃ॑ । যা ঽবা॑চী । সা সুরা᳚ । ত্র॒য়া-স্সক্ত॑বো ভবন্তি ।
ই॒ন্দ্রি॒যস্য়াব॑-রুদ্ধ্য়ৈ । ত্র॒য়াণি॒ লোমা॑নি ॥ 16 ॥

ত্বিষি॑মে॒বাব॑ রুন্ধে । ত্রয়ো॒ গ্রহাঃ᳚ । বী॒র্য়॑মে॒বাব॑ রুন্ধে । নাম্না॑ দশ॒মী । নব॒ বৈ পুরু॑ষে প্রা॒ণাঃ । নাভি॑র্দশ॒মী । প্রা॒ণা ই॑ন্দ্রি॒য়ং-বীঁ॒র্য়᳚ম্ । প্রা॒ণানে॒বেন্দ্রি॒য়ং-বীঁ॒র্য়ং॑-য়ঁজ॑মান আ॒ত্মন্-ধ॑ত্তে । সীসে॑ন ক্লী॒বাচ্ছষ্পা॑ণি ক্রীণাতি । ন বা এ॒তদয়ো॒ ন হির॑ণ্যম্ ॥ 17 ॥

য-থ্সীস᳚ম্ । ন স্ত্রী ন পুমান্॑ । যত্-ক্লী॒বঃ । ন সোমো॒ ন সুরা᳚ । য-থ্সৌ᳚ত্রাম॒ণী সমৃ॑দ্ধ্য়ৈ । স্বা॒দ্বী-ন্ত্বা᳚ স্বা॒দুনেত্য়া॑হ । সোম॑মে॒বৈনা᳚-ঙ্করোতি । সোমো᳚-ঽস্য়॒শ্বিভ্য়া᳚-ম্পচ্যস্ব॒ সর॑স্বত্য়ৈ পচ্য়॒স্বেন্দ্রা॑য় সু॒ত্রাম্ণে॑ পচ্য়॒স্বেত্য়া॑হ । এ॒তাভ্য়ো॒ হ্য়ে॑ষা দে॒বতা᳚ভ্য়ঃ॒ পচ্য়॑তে । তি॒স্র-স্সগ্​ম্সৃ॑ষ্টা বসতি ॥ 18 ॥

তি॒স্রো হি রাত্রীঃ᳚ ক্রী॒ত-স্সোমো॒ বস॑তি । পু॒নাতু॑ তে পরি॒স্রুত॒মিতি॒ যজু॑ষা পুনাতি॒ ব্য়াবৃ॑ত্ত্য়ৈ । প॒বিত্রে॑ণ পুনাতি । প॒বিত্রে॑ণ॒ হি সোম॑-ম্পু॒নন্তি॑ । বারে॑ণ॒ শশ্ব॑তা॒ তনেত্য়া॑হ । বারে॑ণ॒ হি সোম॑-ম্পু॒নন্তি॑ ।বা॒য়ুঃ পূ॒তঃ প॒বিত্রে॒ণেতি॒ নৈতয়া॑ পুনীয়াত্ । ব্য়ৃ॑দ্ধা॒ হ্য়ে॑ষা । অ॒তি॒প॒বি॒তস্য়ৈ॒তয়া॑ পুনীয়াত্ । কু॒বিদ॒ঙ্গে-ত্যনি॑রুক্তয়া প্রাজাপ॒ত্যয়া॑ গৃহ্ণাতি ॥ 19 ॥

অনি॑রুক্তঃ প্র॒জাপ॑তিঃ । প্র॒জাপ॑তে॒রাপ্ত্য়ৈ᳚ । এক॑য়॒র্চা গৃ॑হ্ণাতি । এ॒ক॒ধৈব যজ॑মানে বী॒র্য়॑-ন্দধাতি । আ॒শ্বি॒ন-ন্ধূ॒ম্রমা ল॑ভতে । অ॒শ্বিনৌ॒ বৈ দে॒বানা᳚-ম্ভি॒ষজৌ᳚ । তাভ্য়া॑মে॒বাস্মৈ॑ ভেষ॒জ-ঙ্ক॑রোতি । সা॒র॒স্ব॒ত-ম্মে॒ষম্ । বাগ্বৈ সর॑স্বতী । বা॒চৈবৈন॑-ম্ভিষজ্যতি । ঐ॒ন্দ্রমৃ॑ষ॒ভগ্​ম্ সে᳚ন্দ্র॒ত্বায়॑ ॥ 20 ॥
(অক্ষ্য়ো॒--র্ লোমা॑নি॒ - হির॑ণ্য়ং - ঁবসতি - গৃহ্ণাতি - ভিষজ্য়॒ত্য়েক॑-ঞ্চ) (অ. 5)

অনুবাকং 6 - সৌত্রামণিঃ, পশবঃ, হবীংষি চ
যত্-ত্রি॒ষু যূপে᳚ষ্বা॒-লভে॑ত । ব॒হি॒র্ধা ঽস্মা॑দিন্দ্রি॒য়ং-বীঁর্য়॑-ন্দধ্য়াত্ । ভ্রাতৃ॑ব্যমস্মৈ জনয়েত্ । এ॒ক॒য়ূ॒প আল॑ভতে । এ॒ক॒ধৈবাস্মি॑-ন্নিন্দ্রি॒য়ং-বীঁ॒র্য়॑-ন্দধাতি । নাস্মৈ॒ ভ্রাতৃ॑ব্য়-ঞ্জনযতি । নৈতেষা᳚-ম্পশূ॒না-ম্পু॑রো॒ডাশা॑ ভবন্তি । গ্রহ॑পুরোডাশা॒ হ্য়ে॑তে । যু॒বগ্​ম্ সু॒রাম॑মশ্বি॒নেতি॑ সর্বদেব॒ত্য়ে॑ যাজ্য়ানুবা॒ক্য়ে॑ ভবতঃ । সর্বা॑ এ॒ব দে॒বতাঃ᳚ প্রীণাতি ॥ 21 ॥

ব্রা॒হ্ম॒ণ-ম্পরি॑ক্রীণীয়া-দু॒চ্ছেষ॑ণস্য় পা॒তার᳚ম্ । ব্রা॒হ্ম॒ণো হ্য়াহু॑ত্য়া উ॒চ্ছেষ॑ণস্য় পা॒তা । যদি॑ ব্রাহ্ম॒ণ-ন্ন বি॒ন্দেত্ । ব॒ল্মী॒ক॒ব॒পায়া॒মব॑ নয়েত্ । সৈব ততঃ॒ প্রায়॑শ্চিত্তিঃ । য-দ্বৈ সৌ᳚ত্রাম॒ণ্য়ৈ ব্য়ৃ॑দ্ধম্ । তদ॑স্য়ৈ॒ সমৃ॑দ্ধম্ । না॒না॒দে॒ব॒ত্য়াঃ᳚ প॒শব॑শ্চ পুরো॒ডাশা᳚শ্চ ভবন্তি॒ সমৃ॑দ্ধ্য়ৈ । ঐ॒ন্দ্রঃ প॑শূ॒নামু॑ত্ত॒মো ভ॑বতি । ঐ॒ন্দ্রঃ পু॑রো॒ডাশা॑না-ম্প্রথ॒মঃ ॥ 22 ॥

ই॒ন্দ্রি॒য়ে এ॒বাস্মৈ॑ স॒মীচী॑ দধাতি । পু॒রস্তা॑-দনূয়া॒জানা᳚-ম্পুরো॒ডাশৈঃ॒ প্রচ॑রতি । প॒শবো॒ বৈ পু॑রো॒ডাশাঃ᳚ । প॒শূনে॒বাব॑ রুন্ধে । ঐ॒ন্দ্র-মেকা॑দশকপাল॒-ন্নির্ব॑পতি । ই॒ন্দ্রি॒যমে॒বাব॑-রুন্ধে । সা॒বি॒ত্র-ন্দ্বাদ॑শকপাল॒-ম্প্রসূ᳚ত্য়ৈ । বা॒রু॒ণ-ন্দশ॑কপালম্ । অ॒ন্ত॒ত এ॒ব বরু॑ণ॒মব॑-যজতে । বড॑বা॒ দক্ষি॑ণা ॥ 23 ॥

উ॒ত বা এ॒ষা-ঽশ্বগ্​ম্॑ সূ॒তে । উ॒তাশ্ব॑ত॒রম্ । উ॒ত সোম॑ উ॒ত সুরা᳚ । য-থ্সৌ᳚ত্রাম॒ণী সমৃ॑দ্ধ্য়ৈ । বা॒র্॒হ॒স্প॒ত্য়-ম্প॒শু-ঞ্চ॑তু॒র্থ-ম॑তিপবি॒তস্য়াল॑ভতে । ব্রহ্ম॒ বৈ দে॒বানা॒-ম্বৃহ॒স্পতিঃ॑ । ব্রহ্ম॑ণৈ॒ব য॒জ্ঞস্য়॒ ব্য়ৃ॑দ্ধ॒মপি॑-বপতি । পু॒রো॒ডাশ॑বানে॒ষ প॒শুর্ভ॑বতি । ন হ্য়ে॑তস্য়॒ গ্রহ॑-ঙ্গৃ॒হ্ণন্তি॑ । সোম॑প্রতীকাঃ পিতর-স্তৃপ্ণু॒তেতি॑ শতাতৃ॒ণ্ণায়াগ্​ম্॑ স॒মব॑নযতি ॥ 24 ॥

শ॒তায়ুঃ॒ পুরু॑ষ-শ্শ॒তেন্দ্রি॑য়ঃ । আয়ু॑ষ্য়ে॒বেন্দ্রি॒য়ে প্রতি॑তিষ্ঠতি । দক্ষি॑ণে॒-ঽগ্নৌ জু॑হোতি । পা॒প॒ব॒স্য়॒সস্য়॒ ব্য়াবৃ॑ত্ত্য়ৈ । হির॑ণ্যমন্ত॒রা ধা॑রযতি । পূ॒তামে॒বৈনা᳚-ঞ্জুহোতি । শ॒তমা॑ন-ম্ভবতি । শ॒তায়ুঃ॒ পুরু॑ষ-শ্শ॒তেন্দ্রি॑য়ঃ । আয়ু॑ষ্য়ে॒বেন্দ্রি॒য়ে প্রতি॑ তিষ্ঠতি । যত্রৈ॒ব শ॑তাতৃ॒ণ্ণা-ন্ধা॒রয়॑তি ॥ 25 ॥

তন্নিদ॑ধাতি॒ প্রতি॑ষ্ঠিত্য়ৈ । পি॒তৄন্. বা এ॒তস্য়ে᳚ন্দ্রি॒য়ং-বীঁ॒র্য়॑-ঙ্গচ্ছতি । যগ্​ম্ সোমো॑-ঽতি॒পব॑তে । পি॒তৃ॒ণাং-য়াঁ᳚জ্য়া-নুবা॒ক্য়া॑ভি॒রুপ॑ তিষ্ঠতে । যদে॒বাস্য়॑ পি॒তৄনি॑ন্দ্রি॒য়ং-বীঁ॒র্য়॑-ঙ্গচ্ছ॑তি । তদে॒বাব॑ রুন্ধে । তি॒সৃভি॒রুপ॑ তিষ্ঠতে । তৃ॒তীয়ে॒ বা ই॒তো লো॒কে পি॒তরঃ॑ । তানে॒ব প্রী॑ণাতি । অথো॒ ত্রীণি॒ বৈ য॒জ্ঞস্য়ে᳚ন্দ্রি॒য়াণি॑ । অ॒দ্ধ্ব॒র্য়ুর্-হোতা᳚ ব্র॒হ্মা । ত উপ॑তিষ্ঠন্তে । যান্য়ে॒ব য॒জ্ঞস্য়ে᳚ন্দ্রি॒য়াণি॑ । তৈরে॒বাস্মৈ॑ ভেষ॒জ-ঙ্ক॑রোতি ॥ 26 ॥
(প্র॒ণা॒তি॒ - প্র॒থ॒মো - দক্ষি॑ণা - স॒মব॑নযতি - ধা॒রয়॑ - তীন্দ্রি॒য়াণি॑ চ॒ত্বারি॑ চ) (অ. 6)

অনুবাকং 7 - রাজসূযস্য়াগ্রে কর্তব্য়-ম্পবিত্রাখ্যমগ্নিষ্টোমমহঃ
অ॒গ্নি॒ষ্টো॒মমগ্র॒ আহ॑রতি । য॒জ্ঞ॒মু॒খং-বাঁ অ॑গ্নিষ্টো॒মঃ । য॒জ্ঞ॒মু॒খমে॒বারভ্য়॑ স॒বমাক্র॑মতে । অথৈ॒ষো॑-ঽভিষেচ॒নীয়॑-শ্চতুস্ত্রি॒গ্​ম্॒শপ॑বমানো ভবতি । ত্রয়॑স্ত্রিগ্​ম্শ॒দ্বৈ দে॒বতাঃ᳚ । তা এ॒বাপ্নো॑তি । প্র॒জাপ॑তি-শ্চতুস্ত্রি॒গ্​ম্॒শঃ । তমে॒বাপ্নো॑তি । স॒গ্​ম্॒শ॒র এ॒ষ স্তোমা॑না॒ময়॑থাপূর্বম্ । য-দ্বিষ॑মা॒-স্স্তোমাঃ᳚ ॥ 27 ॥

এ॒তাবা॒ন্.॒ বৈ য॒জ্ঞঃ । যাবা॒ন্-পব॑মানাঃ । অ॒ন্ত॒-শ্শ্লেষ॑ণ॒-ন্ত্বা অ॒ন্যত্ । য-থ্স॒মাঃ পব॑মানাঃ । তেনাসগ্​ম্॑শরঃ । তেন॑ যথাপূ॒র্বম্ । আ॒ত্মনৈ॒-বাগ্নি॑ষ্টো॒মেন॒র্ধ্নোতি॑ । আ॒ত্মনা॒ পুণ্য়ো॑ ভবতি । প্র॒জা বা উ॒ক্থানি॑ । প॒শব॑ উ॒ক্থানি॑( ) । যদু॒ক্থ্য়ো॑ ভব॒ত্যনু॒ সন্ত॑ত্য়ৈ ॥ 28 ॥
(স্তোমাঃ᳚-প॒শব॑ উ॒ক্থান্য়েক॑-ঞ্চ) (অ. 7)

অনুবাকং 8 - অভিষেচনীয়ে সামমন্ত্রবিশেষঃ
উপ॑ ত্বা জা॒ময়ো॒ গির॒ ইতি॑ প্রতি॒পদ্ভ॑বতি । বাগ্বৈ বা॒য়ুঃ । বা॒চ এ॒বৈষো॑-ঽভিষে॒কঃ । সর্বা॑সামে॒ব প্র॒জানাগ্​ম্॑ সূযতে । সর্বা॑ এন-ম্প্র॒জা রাজেতি॑ বদন্তি । এ॒তমু॒ ত্য়-ন্দশ॒ক্ষিপ॒ ইত্য়া॑হ । আ॒দি॒ত্য়া বৈ প্র॒জাঃ । প্র॒জানা॑মে॒বৈতেন॑ সূযতে । যন্তি॒ বা এ॒তে য॑জ্ঞমু॒খাত্ । যে স॑ম্ভা॒র্য়া॑ অক্রন্ন্॑ ॥ 29 ॥

যদাহ॒ পব॑স্ব বা॒চো অ॑গ্রিয়॒ ইতি॑ । তেনৈ॒ব য॑জ্ঞমু॒খা-ন্নয়॑ন্তি । অ॒নু॒ষ্টুক্-প্র॑থ॒মা ভ॑বতি । অ॒নু॒ষ্টু-গু॑ত্ত॒মা । বাগ্বা অ॑নু॒ষ্টুক্ । বা॒চৈব প্র॒যন্তি॑ । বা॒চোদ্য়॑ন্তি । উদ্ব॑তী-র্ভবন্তি । উদ্ব॒দ্বা অ॑নু॒ষ্টুভো॑ রূ॒পম্ । আনু॑ষ্টুভো রাজ॒ন্য়ঃ॑ ॥ 30 ॥

তস্মা॒দুদ্ব॑তী-র্ভবন্তি । সৌ॒র্য়॑নু॒ষ্টু-গু॑ত্ত॒মা ভ॑বতি । সু॒ব॒র্গস্য়॑ লো॒কস্য়॒ সন্ত॑ত্য়ৈ । যো বৈ স॒বাদেতি॑ । নৈনগ্​ম্॑ স॒ব উপ॑নমতি । য-স্সাম॑ভ্য়॒ এতি॑ । পাপী॑য়ান্-থ্সুষুবা॒ণো ভ॑বতি । এ॒তানি॒ খলু॒ বৈ সামা॑নি । যত্পৃ॒ষ্ঠানি॑ । যত্পৃ॒ষ্ঠানি॒ ভব॑ন্তি ॥ 31 ॥

তৈরে॒ব স॒বান্নৈতি॑ । যানি॑ দেবরা॒জানা॒গ্​ম্॒ সামা॑নি । তৈর॒মুষ্মি॑ন্ ঁলো॒ক ঋ॑দ্ধ্নোতি । যানি॑ মনুষ্যরা॒জানা॒গ্​ম্॒ সামা॑নি । তৈর॒স্মিন্ ঁলো॒ক ঋ॑দ্ধ্নোতি । উ॒ভয়ো॑রে॒ব লো॒কয়োর্॑.-ঋদ্ধ্নোতি । দে॒ব॒লো॒কে চ॑ মনুষ্যলো॒কে চ॑ । এ॒ক॒বি॒গ্​ম্॒শো॑ ঽভিষেচ॒নীয়॑-স্য়োত্ত॒মো ভ॑বতি । এ॒ক॒বি॒গ্​ম্॒শঃ কে॑শবপ॒নীয়॑স্য় প্রথ॒মঃ । স॒প্ত॒দ॒শো দ॑শ॒পেয়ঃ॑ ॥ 32 ॥

বিড্বা এ॑কবি॒গ্​ম্॒শঃ । রা॒ষ্ট্রগ্​ম্ স॑প্তদ॒শঃ । বিশ॑ এ॒বৈত-ন্ম॑দ্ধ্য়॒তো॑-ঽভিষি॑চ্যতে । তস্মা॒দ্বা এ॒ষ বি॒শা-ম্প্রি॒য়ঃ । বি॒শো হি ম॑দ্ধ্য়॒তো॑-ঽভিষি॒চ্যতে᳚ । যদ্বা এ॑নম॒দো দিশো-ঽনু॑ ব্য়াস্থা॒পয়॑ন্তি । ত-থ্সু॑ব॒র্গং-লোঁ॒ক-ম॒ভ্য়ারো॑হতি । যদি॒মং-লোঁ॒ক-ন্ন প্র॑ত্যব॒রোহে᳚ত্ । অ॒তি॒ জ॒নং-বেঁ॒য়াত্ । উদ্বা॑ মাদ্য়েত্ । যদে॒ষ প্র॑তী॒চীন॑-স্তোমো॒ ভব॑তি । ই॒মমে॒ব তেন॑ লো॒ক-ম্প্র॒ত্যব॑রোহতি । অথো॑ অ॒স্মিন্নে॒ব লো॒কে প্রতি॑ তিষ্ঠ॒ত্য়-নু॑ন্মাদায় ॥ 33 ॥
(অক্র॑ন্ - রাজ॒ন্য়ো॑ - ভব॑ন্তি - দশ॒পেয়ো॑ - মাদ্য়ে॒-ত্ত্রীণি॑ চ) (অ. 8)

অনুবাকং 9 - অভিষেচনীযবিষযয়ো রুক্ময়ো-স্স্তুতিঃ
ই॒য়ং-বৈঁ র॑জ॒তা । অ॒সৌ হরি॑ণী । য-দ্রু॒ক্মৌ ভব॑তঃ । আ॒ভ্য়ামে॒বৈন॑-মুভ॒যতঃ॒ পরি॑ গৃহ্ণাতি । বরু॑ণস্য়॒ বা অ॑ভিষি॒চ্যমা॑ন॒স্য়াপঃ॑ । ই॒ন্দ্রি॒য়ং-বীঁ॒র্য়॑-ন্নির॑ঘ্নন্ন্ । ত-থ্সু॒বর্ণ॒গ্​ম্॒ হির॑ণ্য়-মভবত্ । য-দ্রু॒ক্ম-ম॑ন্ত॒-র্দধা॑তি । ই॒ন্দ্রি॒যস্য়॑ বী॒র্য়॑স্য়ানি॑র্ঘাতায় । শ॒তমা॑নো ভবতি শ॒তক্ষ॑রঃ । শ॒তায়ুঃ॒ পুরু॑ষ-শ্শ॒তেন্দ্রি॑য়ঃ । আয়ু॑ষ্য়ে॒বেন্দ্রি॒য়ে প্রতি॑ তিষ্ঠতি । আয়ু॒র্বৈ হির॑ণ্যম্ । আ॒য়ু॒ষ্য়া॑ এ॒বৈন॑-ম॒ভ্যতি॑ ক্ষরন্তি । তেজো॒ বৈ হির॑ণ্যম্ । তে॒জ॒স্য়া॑ এ॒বৈন॑ম॒ভ্যতি॑ ক্ষরন্তি । বর্চো॒ বৈ হির॑ণ্যম্ । ব॒র্চ॒স্য়া॑ এ॒বৈন॑ম॒ভ্যতি॑ ক্ষরন্তি ॥ 34 ॥
(শ॒তক্ষ॑রো॒-ঽষ্টৌ চ॑) (অ. 9)

অনুবাকং 10 - ব্য়ুষ্টিদ্বিরাত্রং রাজসূয়ান্তে কর্তব্যম্
অপ্র॑তিষ্ঠিতো॒ বা এ॒ষ ইত্য়া॑হুঃ । যো রা॑জ॒সূয়ে॑ন॒ যজ॑ত॒ ইতি॑ । য॒দা বা এ॒ষ এ॒তেন॑ দ্বিরা॒ত্রেণ॒ যজ॑তে । অথ॑ প্রতি॒ষ্ঠা । অথ॑ সং​বঁথ্স॒রমা᳚প্নোতি । যাব॑ন্তি সং​বঁথ্স॒রস্য়া॑-হোরা॒ত্রাণি॑ । তাব॑তীরে॒তস্য়॑ স্তো॒ত্রীয়াঃ᳚ । অ॒হো॒রা॒ত্রেষ্বে॒ব প্রতি॑ তিষ্ঠতি । অ॒গ্নি॒ষ্টো॒মঃ পূর্ব॒মহ॑-র্ভবতি । অ॒তি॒রা॒ত্র উত্ত॑রম্ ॥ 35 ॥

নানৈ॒বাহো॑রা॒ত্রয়োঃ॒ প্রতি॑ তিষ্ঠতি । পৌ॒র্ণ॒মা॒স্য়া-ম্পূর্ব॒মহ॑-র্ভবতি । ব্য়॑ষ্টকায়া॒-মুত্ত॑রম্ । নানৈ॒বার্ধ॑ মা॒সয়োঃ॒ প্রতি॑তিষ্ঠতি । অ॒মা॒বা॒স্য়া॑য়া॒-ম্পূর্ব॒মহ॑-র্ভবতি । উদ্দৃ॑ষ্ট॒ উত্ত॑রম্ । নানৈ॒ব মাস॑য়োঃ॒ প্রতি॑ তিষ্ঠতি । অথো॒ খলু॑ । যে এ॒ব স॑মানপ॒ক্ষে পু॑ণ্য়া॒হে স্য়াতা᳚ম্ । তয়োঃ᳚ কা॒র্য়॑-ম্প্রতি॑ষ্ঠিত্য়ৈ ॥ 36 ॥

অ॒প॒শ॒ব্য়ো দ্বি॑রা॒ত্র ইত্য়া॑হুঃ । দ্বে হ্য়ে॑তে ছন্দ॑সী । গা॒য়॒ত্র-ঞ্চ॒ ত্রৈষ্টু॑ভ-ঞ্চ । জগ॑তীম॒ন্তর্য়॑ন্তি । ন তেন॒ জগ॑তী কৃ॒তেত্য়া॑হুঃ । যদে॑না-ন্তৃতীযসব॒নে কু॒র্বন্তীতি॑ । য॒দা বা এ॒ষা-ঽহীন॒স্য়াহ॒-র্ভজ॑তে । সা॒হ্নস্য়॑ বা॒ সব॑নম্ । অথৈ॒ব জগ॑তী কৃ॒তা । অথ॑ পশ॒ব্য়ঃ॑ । ব্য়ু॑ষ্টি॒র্বা এ॒ষ দ্বি॑রা॒ত্রঃ । য এ॒বং-বিঁ॒দ্বা-ন্দ্বি॑রা॒ত্রেণ॒ যজ॑তে । ব্য়ে॑বাস্মা॑ উচ্ছতি । অথো॒ তম॑ এ॒বাপ॑হতে । অ॒গ্নি॒ষ্টো॒ম-ম॑ন্ত॒ত আহ॑রতি । অ॒গ্নি-স্সর্বা॑ দে॒বতাঃ᳚ । দে॒বতা᳚স্বে॒ব প্রতি॑ তিষ্ঠতি ॥ 37 ॥
(উত্ত॑রং॒ - প্রতি॑ষ্ঠিত্য়ৈ - পশ॒ব্য়॑-স্স॒প্ত চ॑) (অ. 10)

(বরু॑ণস্য় - জা॒ - মীশ্ব॒র - আ᳚গ্নে॒য় - মিন্দ্র॑স্য়॒ - য-ত্ত্রি॒ - ষ্ব॑গ্নিষ্টো॒ম - মুপ॑ ত্বে॒ - যং-বৈঁ র॑জ॒তা - ঽপ্র॑তিষ্ঠিতো॒ দশ॑)

(বরু॑ণস্য়॒ - যদ॒শ্বিভ্য়াং॒ - ঁয়-ত্ত্রি॒ষু - তস্মা॒দুদ্ব॑তী-স্স॒প্তত্রিগ্​ম্॑শত্)

বরু॑ণস্য়॒ - প্রতি॑ তিষ্ঠতি ।

॥ হরিঃ॑ ওম্ ॥

॥ কৃষ্ণ যজুর্বেদীয় তৈত্তিরীয় ব্রাহ্মণে প্রথমাষ্টকে অষ্টমঃ প্রপাঠক-স্সমাপ্তঃ ॥

॥ কৃষ্ণ যজুর্বেদীয় তৈত্তিরীয় ব্রাহ্মণে প্রথমাষ্টকং সমাপ্তম্ ॥