কৃষ্ণ যজুর্বেদীয় তৈত্তিরীয় আরণ্যকে তৃতীয়ঃ প্রপাঠকঃ - চাতুর্হোত্রচযনম্
ও-ন্নমঃ পরমাত্মনে, শ্রী মহাগণপতয়ে নমঃ,
শ্রী গুরুভ্য়ো নমঃ । হ॒রিঃ॒ ওম্ ॥
অনুবাকং 1
চিত্তি॒-স্স্রুক্ । চি॒ত্তমাজ্য়᳚ম্ । বাগ্বেদিঃ॑ । আধী॑ত-ম্ব॒র্॒হিঃ ।
কেতো॑ অ॒গ্নিঃ । বিজ্ঞা॑তম॒গ্নিঃ । বাক্প॑তি॒র্॒হোতা᳚ । মন॑ উপব॒ক্তা । প্রা॒ণো হ॒বিঃ । সামা᳚দ্ধ্ব॒র্য়ুঃ ॥ বাচ॑স্পতে বিধে নামন্ন্ । বি॒ধেম॑ তে॒ নাম॑ । বি॒ধেস্ত্ব-ম॒স্মাক॒-ন্নাম॑ । বা॒চস্পতি॒-স্সোম॑-ম্পিবতু । আ-ঽস্মাসু॑ নৃ॒ম্ণ-ন্ধা॒থ্স্বাহা᳚ ॥ 1 ॥
(অ॒দ্ধ্ব॒র্য়ুঃ পঞ্চ চ) (অ. 1)
অনুবাকং 2
পৃ॒থি॒বী হোতা᳚ । দ্য়ৌর॑দ্ধ্ব॒র্য়ুঃ । রু॒দ্রো᳚-ঽগ্নীত্ । বৃহ॒স্পতি॑রুপব॒ক্তা ॥ বাচ॑স্পতে বা॒চো বী॒র্য়ে॑ণ । সম্ভৃ॑তত-মে॒নায়॑ক্ষ্যসে । যজ॑মানায়॒ বার্য়᳚ম্ ।
আ সুব॒স্কর॑স্মৈ । বা॒চস্পতি॒-স্সোম॑-ম্পিবতি ।
জ॒জন॒দিন্দ্র॑মিন্দ্রি॒য়ায়॒ স্বাহা᳚ ॥ 2 ॥
(পৃ॒থি॒বী হোতা॒ দশ॑) (অ. 2)
অনুবাকং 3
অ॒গ্নির্-হোতা᳚ । অ॒শ্বিনা᳚-ঽদ্ধ্ব॒র্য়ূ । ত্বষ্টা॒-ঽগ্নীত্ । মি॒ত্র উ॑পব॒ক্তা ॥ সোম॒-স্সোম॑স্য় পুরো॒গাঃ । শু॒ক্র-শ্শু॒ক্রস্য়॑ পুরো॒গাঃ । শ্রা॒তাস্ত॑ ইন্দ্র॒ সোমাঃ᳚ । বাতা॑পের্-হবন॒শ্রুত॒-স্স্বাহা᳚ ॥ 3 ॥
(অ॒গ্নির্-হোতা॒-ঽষ্টৌ) (অ. 3)
অনুবাকং 4
সূর্য়॑-ন্তে॒ চক্ষুঃ॑ । বাত॑-ম্প্রা॒ণঃ ।
দ্য়া-ম্পৃ॒ষ্ঠম্ । অ॒ন্তরি॑ক্ষমা॒ত্মা ।
অঙ্গৈ᳚-র্য়॒জ্ঞম্ । পৃ॒থি॒বীগ্ম্ শরী॑রৈঃ ॥ বাচ॑স্প॒তে-ঽচ্ছি॑দ্রয়া বা॒চা । অচ্ছি॑দ্রয়া জু॒হ্বা᳚ । দি॒বি দে॑বা॒বৃধ॒গ্ম্॒ হোত্রা॒ মের॑যস্ব॒ স্বাহা᳚ ॥ 4 ॥
(সূর্য়॑-ন্তে॒ নব॑) (অ. 4)
অনুবাকং 5
ম॒হাহ॑বি॒র্॒ হোতা᳚ । স॒ত্যহ॑বিরদ্ধ্ব॒র্য়ুঃ । অচ্য়ু॑তপাজা অ॒গ্নীত্ । অচ্য়ু॑তমনা উপব॒ক্তা । অ॒না॒ধৃ॒ষ্যশ্চা᳚ প্রতিধৃ॒ষ্যশ্চ॑ য॒জ্ঞস্য়া॑ভিগ॒রৌ । অ॒য়াস্য়॑ উদ্গা॒তা ॥ বাচ॑স্পতে হৃদ্বিধে নামন্ন্ । বি॒ধেম॑ তে॒ নাম॑ ।
বি॒ধেস্ত্বম॒স্মাক॒-ন্নাম॑ । বা॒চস্পতি॒-স্সোম॑মপাত্ । মা দৈব্য়॒স্তন্তু॒-শ্ছেদি॒ মা ম॑নু॒ষ্য়ঃ॑ । নমো॑ দি॒বে । নমঃ॑ পৃথি॒ব্য়ৈ স্বাহা᳚ ॥ 5 ॥
(অ॒পা॒-ত্ত্রীণি॑ চ) (অ. 5)
অনুবাকং 6
বাঘোতা᳚ । দী॒ক্ষা পত্নী᳚ । বাতো᳚-ঽদ্ধ্ব॒র্য়ুঃ । আপো॑-ঽভিগ॒রঃ । মনো॑ হ॒বিঃ । তপ॑সি জুহোমি ॥
ভূর্ভুব॒স্সুবঃ॑ । ব্রহ্ম॑ স্বয়॒ম্ভু ।
ব্রহ্ম॑ণে স্বয়॒ম্ভুবে॒ স্বাহা᳚ ॥ 6 ॥
(বাঘোতা॒ নব॑) (অ. 6)
অনুবাকং 7
ব্রা॒হ্ম॒ণ এক॑হোতা । স য॒জ্ঞঃ । স মে॑ দদাতু প্র॒জা-ম্প॒শূ-ন্পুষ্টিং॒-য়ঁশঃ॑ । য॒জ্ঞশ্চ॑ মে ভূয়াত্ ॥ অ॒গ্নি-র্দ্বিহো॑তা । স ভ॒র্তা । স মে॑ দদাতু প্র॒জা-ম্প॒শূ-ন্পুষ্টিং॒-য়ঁশঃ॑ । ভ॒র্তা চ॑ মে ভূয়াত্ ॥
পৃ॒থি॒বী ত্রিহো॑তা । স প্র॑তি॒ষ্ঠা ॥ 7 ॥
স মে॑ দদাতু প্র॒জা-ম্প॒শূ-ন্পুষ্টিং॒-য়ঁশঃ॑ । প্র॒তি॒ষ্ঠা চ॑ মে ভূয়াত্ ॥ অ॒ন্তরি॑ক্ষ॒-ঞ্চতু॑র্হোতা । স বি॒ষ্ঠাঃ । স মে॑ দদাতু প্র॒জা-ম্প॒শূ-ন্পুষ্টিং॒-য়ঁশঃ॑ । বি॒ষ্ঠাশ্চ॑ মে ভূয়াত্ ॥
বা॒য়ুঃ পঞ্চ॑হোতা । স প্রা॒ণঃ ।
স মে॑ দদাতু প্র॒জা-ম্প॒শূ-ন্পুষ্টিং॒-য়ঁশঃ॑ । প্রা॒ণশ্চ॑ মে ভূয়াত্ ॥ 8 ॥
চ॒ন্দ্রমা॒-ষ্ষড্ঢো॑তা । স ঋ॒তূন্ ক॑ল্পয়াতি ।
স মে॑ দদাতু প্র॒জা-ম্প॒শূ-ন্পুষ্টিং॒-য়ঁশঃ॑ । ঋ॒তব॑শ্চ মে কল্পন্তাম্ ॥ অন্নগ্ম্॑ স॒প্তহো॑তা । স প্রা॒ণস্য়॑ প্রা॒ণঃ । স মে॑ দদাতু প্র॒জা-ম্প॒শূ-ন্পুষ্টিং॒-য়ঁশঃ॑ । প্রা॒ণস্য়॑ চ মে প্রা॒ণো ভূ॑য়াত্ ॥ দ্য়ৌর॒ষ্টহো॑তা । সো॑-ঽনাধৃ॒ষ্য়ঃ ॥ 9 ॥
স মে॑ দদাতু প্র॒জা-ম্প॒শূ-ন্পুষ্টিং॒-য়ঁশঃ॑ । অ॒না॒ধৃ॒ষ্যশ্চ॑ ভূয়াসম্ ॥
আ॒দি॒ত্য়ো নব॑হোতা । স তে॑জ॒স্বী ।
স মে॑ দদাতু প্র॒জা-ম্প॒শূ-ন্পুষ্টিং॒-য়ঁশঃ॑ । তে॒জ॒স্বী চ॑ ভূয়াসম্ ॥ প্র॒জাপ॑তি॒-র্দশ॑হোতা । স ই॒দগ্ম্ সর্ব᳚ম্ । স মে॑ দদাতু প্র॒জা-ম্প॒শূ-ন্পুষ্টিং॒-য়ঁশঃ॑ । সর্ব॑-ঞ্চ মে ভূয়াত্ ॥ 10 ॥
(প্র॒তি॒ষ্ঠা-প্রা॒ণশ্চ॑ মে ভূয়া-দনাধৃ॒ষ্য়ঃ-সর্ব॑-ঞ্চ মে ভূয়াত্) (অ. 7)
(ব্রা॒হ্ম॒ণো য॒জ্ঞো᳚-ঽগ্নির্ভ॒র্তা পৃ॑থি॒বী প্র॑তি॒ষ্ঠা-ঽন্তরি॑ক্ষং-বিঁ॒ষ্ঠা বা॒য়ুঃ
প্রা॒ণশ্চ॒ন্দ্রমা॑ ঋ॒তূনন্ন॒গ্ম্॒ স প্রা॒ণস্য়॑ প্রা॒ণো দ্য়ৌর॑নাধৃ॒ষ্য় আ॑দি॒ত্য়ঃ
স তে॑জ॒স্বী প্র॒জাপ॑তি॒-স্স ই॒দগ্ম্ সর্ব॒গ্ম্॒ সর্ব॑-ঞ্চ মে ভূয়াত্)
অনুবাকং 8
অ॒গ্নি-র্যজু॑র্ভিঃ । স॒বি॒তা স্তোমৈঃ᳚ । ইন্দ্র॑ উক্থাম॒দৈঃ ।
মি॒ত্রাবরু॑ণাবা॒শিষা᳚ । অঙ্গি॑রসো॒ ধিষ্ণি॑য়ৈর॒গ্নিভিঃ॑ । ম॒রুত॑-স্সদোহবির্ধা॒নাভ্য়া᳚ম্ । আপঃ॒ প্রোক্ষ॑ণীভিঃ ।
ওষ॑ধয়ো ব॒র্॒হিষা᳚ । অদি॑তি॒র্বেদ্য়া᳚ । সোমো॑ দী॒ক্ষয়া᳚ ॥ 11 ॥
ত্বষ্টে॒দ্ধ্মেন॑ । বিষ্ণু॑-র্য়॒জ্ঞেন॑ । বস॑ব॒ আজ্য়ে॑ন । আ॒দি॒ত্য়া দক্ষি॑ণাভিঃ । বিশ্বে॑ দে॒বা ঊ॒র্জা ।
পূ॒ষা স্ব॑গাকা॒রেণ॑ । বৃহ॒স্পতিঃ॑ পুরো॒ধয়া᳚ ।
প্র॒জাপ॑তিরুদ্গী॒থেন॑ । অ॒ন্তরি॑ক্ষ-ম্প॒বিত্রে॑ণ । বা॒য়ুঃ পাত্রৈঃ᳚ । অ॒হগ্গ্ শ্র॒দ্ধয়া᳚ ॥ 12 ॥
(দী॒ক্ষয়া॒ - পাত্রৈ॒রেক॑-ঞ্চ) (অ. 8)
অনুবাকং 9
সেনেন্দ্র॑স্য় । ধেনা॒ বৃহ॒স্পতেঃ᳚ । প॒ত্থ্য়া॑ পূ॒ষ্ণঃ । বাগ্বা॒য়োঃ । দী॒ক্ষা সোম॑স্য় । পৃ॒থি॒ব্য়॑গ্নেঃ । বসূ॑না-ঙ্গায়॒ত্রী । রু॒দ্রাণা᳚-ন্ত্রি॒ষ্টুক্ । আ॒দি॒ত্য়ানা॒-ঞ্জগ॑তী । বিষ্ণো॑রনু॒ষ্টুক্ ॥ 13 ॥
বরু॑ণস্য় বি॒রাট্ । য॒জ্ঞস্য়॑ প॒ঙ্ক্তিঃ । প্র॒জাপ॑তে॒রনু॑মতিঃ । মি॒ত্রস্য়॑ শ্র॒দ্ধা । স॒বি॒তুঃ প্রসূ॑তিঃ । সূর্য়॑স্য়॒ মরী॑চিঃ । চ॒ন্দ্রম॑সো রোহি॒ণী । ঋষী॑ণামরুন্ধ॒তী । প॒র্জন্য়॑স্য় বি॒দ্য়ুত্ ।
চত॑স্রো॒ দিশঃ॑ । চত॑স্রো-ঽবান্তরদি॒শাঃ । অহ॑শ্চ॒ রাত্রি॑শ্চ । কৃ॒ষিশ্চ॒ বৃষ্টি॑শ্চ ।
ত্বিষি॒শ্চাপ॑চিতিশ্চ । আপ॒শ্চৌষ॑ধযশ্চ ।
ঊর্ক্চ॑ সূ॒নৃতা॑ চ দে॒বানা॒-ম্পত্ন॑য়ঃ ॥ 14 ॥
(অ॒নু॒ষ্টুগ্ - দিশ॒-ষ্ষট্চ॑) (অ. 9)
অনুবাকং 10
দে॒বস্য়॑ ত্বা সবি॒তুঃ প্র॑স॒বে । অ॒শ্বিনো᳚-র্বা॒হুভ্য়া᳚ম্ ।
পূ॒ষ্ণো হস্তা᳚ভ্য়া॒-ম্প্রতি॑গৃহ্ণামি ।
রাজা᳚ ত্বা॒ বরু॑ণো নযতু দেবি দক্ষিণে॒-ঽগ্নয়ে॒ হির॑ণ্যম্ । তেনা॑মৃত॒ত্বম॑শ্য়াম্ । বয়ো॑ দা॒ত্রে । ময়ো॒ মহ্য়॑মস্তু প্রতিগ্রহী॒ত্রে । ক ই॒দ-ঙ্কস্মা॑ অদাত্ । কামঃ॒ কামা॑য় । কামো॑ দা॒তা ॥ 15 ॥
কামঃ॑ প্রতিগ্রহী॒তা । কামগ্ম্॑ সমু॒দ্রমাবি॑শ । কামে॑ন ত্বা॒ প্রতি॑গৃহ্ণামি ।
কামৈ॒তত্তে᳚ । এ॒ষা তে॑ কাম॒ দক্ষি॑ণা । উ॒ত্তা॒নস্ত্বা᳚-ঽঽঙ্গীর॒সঃ প্রতি॑গৃহ্ণাতু ।
সোমা॑য়॒ বাসঃ॑ । রু॒দ্রায়॒ গাম্ । বরু॑ণা॒য়াশ্ব᳚ম্ ।
প্র॒জাপ॑তয়ে॒ পুরু॑ষম্ ॥ 16 ॥
মন॑বে॒ তল্প᳚ম্ । ত্বষ্ট্রে॒-ঽজাম্ । পূ॒ষ্ণে-ঽবি᳚ম্ । নির্-ঋ॑ত্য়া অশ্বতরগর্দ॒ভৌ । হি॒মব॑তো হ॒স্তিন᳚ম্ । গ॒ন্ধ॒র্বা॒-ফ্স॒রাভ্য়ঃ॑-স্রগলঙ্কর॒ণে ।
বিশ্বে᳚ভ্য়ো দে॒বেভ্য়ো॑ ধা॒ন্যম্ । বা॒চে-ঽন্ন᳚ম্ । ব্রহ্ম॑ণ ওদ॒নম্ । স॒মু॒দ্রায়াপঃ॑ ॥ 17 ॥
উ॒ত্তা॒নায়া᳚ঙ্গীর॒সায়ানঃ॑ । বৈ॒শ্বা॒ন॒রায়॒ রথ᳚ম্ ॥
বৈ॒শ্বা॒ন॒রঃ প্র॒ত্নথা॒ নাক॒মারু॑হত্ ।
দি॒বঃ পৃ॒ষ্ঠ-ম্ভন্দ॑মান-স্সু॒মন্ম॑ভিঃ ।
স পূ᳚র্ব॒বজ্জ॒নয়॑জ্জ॒ন্তবে॒ ধন᳚ম্ । স॒মা॒নম॑জ্মা॒ পরি॑য়াতি॒ জাগৃ॑বিঃ ॥
রাজা᳚ ত্বা॒ বরু॑ণো নযতু দেবি দক্ষিণে বৈশ্বান॒রায়॒ রথ᳚ম্ । তেনা॑মৃত॒ত্বম॑শ্য়াম্ । বয়ো॑ দা॒ত্রে ।
ময়ো॒ মহ্য়॑মস্তু প্রতিগ্রহী॒ত্রে ॥ 18 ॥
ক ই॒দ-ঙ্কস্মা॑ অদাত্ । কামঃ॒ কামা॑য় । কামো॑ দা॒তা ।
কামঃ॑ প্রতিগ্রহী॒তা । কামগ্ম্॑ সমু॒দ্রমাবি॑শ । কামে॑ন ত্বা॒ প্রতি॑গৃহ্ণামি । কামৈ॒তত্তে᳚ । এ॒ষা তে॑ কাম॒ দক্ষি॑ণা । উ॒ত্তা॒নস্ত্বা᳚-ঽঽঙ্গীর॒সঃ প্রতি॑গৃহ্ণাতু ॥ 19 ॥
(দা॒তা - পুরু॑ষ॒ - মাপঃ॑ - প্রতিগ্রহী॒ত্রে - +নব॑ চ) (অ. 10)
অনুবাকং 11
সু॒বর্ণ॑-ঙ্ঘ॒র্ম-ম্পরি॑বেদ বে॒নম্ । ইন্দ্র॑স্য়া॒ত্মান॑-ন্দশ॒ধা চর॑ন্তম্ ।
অ॒ন্ত-স্স॑মু॒দ্রে মন॑সা॒ চর॑ন্তম্ । ব্রহ্মা-ঽন্ব॑বিন্দ॒-দ্দশ॑হোতার॒মর্ণে᳚ ।
অ॒ন্তঃ প্রবি॑ষ্ট-শ্শা॒স্তা জনা॑নাম্ । এক॒-স্সন্ব॑হু॒ধা বি॑চারঃ । শ॒তগ্ম্ শু॒ক্রাণি॒ যত্রৈক॒-ম্ভব॑ন্তি । সর্বে॒ বেদা॒ যত্রৈক॒-ম্ভব॑ন্তি । সর্বে॒ হোতা॑রো॒ যত্রৈক॒-ম্ভব॑ন্তি । স॒ মান॑সীন আ॒ত্মা জনা॑নাম্ ॥ 20 ॥
অ॒ন্তঃ প্রবি॑ষ্ট-শ্শা॒স্তা জনা॑না॒গ্ম্॒ সর্বা᳚ত্মা ।
সর্বাঃ᳚ প্র॒জা যত্রৈক॒-ম্ভব॑ন্তি । চতু॑র্হোতারো॒ যত্র॑ স॒ম্পদ॒-ঙ্গচ্ছ॑ন্তি দে॒বৈঃ । স॒ মান॑সীন আ॒ত্মা জনা॑নাম্ ॥ ব্রহ্মেন্দ্র॑ম॒গ্নি-ঞ্জগ॑তঃ প্রতি॒ষ্ঠাম্ ।
দি॒ব আ॒ত্মানগ্ম্॑ সবি॒তার॒-ম্বৃহ॒স্পতি᳚ম্ ।
চতু॑র্হোতার-ম্প্র॒দিশো-ঽনু॑ ক্ল॒প্তম্ । বা॒চো বী॒র্য়॑-ন্তপ॒সা-ঽন্ব॑বিন্দত্ ॥ অ॒ন্তঃ প্রবি॑ষ্ট-ঙ্ক॒র্তার॑মে॒তম্ ।
ত্বষ্টা॑রগ্ম্ রূ॒পাণি॑ বিকু॒র্বন্তং॑-বিঁপ॒শ্চিম্ ॥ 21 ॥
অ॒মৃত॑স্য় প্রা॒ণং-য়ঁ॒জ্ঞমে॒তম্ ।
চতু॑র্হোতৃণামা॒ত্মান॑-ঙ্ক॒বয়ো॒ নিচি॑ক্য়ুঃ ॥
অ॒ন্তঃ প্রবি॑ষ্ট-ঙ্ক॒র্তার॑মে॒তম্ ।
দে॒বানা॒-ম্বন্ধু॒ নিহি॑ত॒-ঙ্গুহা॑সু ।
অ॒মৃতে॑ন ক্ল॒প্তং-য়ঁ॒জ্ঞমে॒তম্ ।
চতু॑র্হোতৃণামা॒ত্মান॑-ঙ্ক॒বয়ো॒ নিচি॑ক্য়ুঃ ॥
শ॒ত-ন্নি॒য়ুতঃ॒ পরি॑বেদ॒ বিশ্বা॑ বি॒শ্ববা॑রঃ । বিশ্ব॑মি॒দং-বৃঁ॑ণাতি ।
ইন্দ্র॑স্য়া॒ত্মা নিহি॑তঃ॒ পঞ্চ॑হোতা ।
অ॒মৃত॑-ন্দে॒বানা॒মায়ুঃ॑ প্র॒জানা᳚ম্ ॥ 22 ॥
ইন্দ্র॒গ্ম্॒ রাজা॑নগ্ম্ সবি॒তার॑মে॒তম্ । বা॒য়োরা॒ত্মান॑-ঙ্ক॒বয়ো॒ নিচি॑ক্য়ুঃ ।
র॒শ্মিগ্ম্ র॑শ্মী॒না-ম্মদ্ধ্য়ে॒ তপ॑ন্তম্ । ঋ॒তস্য়॑ প॒দে ক॒বয়ো॒ নিপা᳚ন্তি ॥ য আ᳚ণ্ডকো॒শে ভুব॑ন-ম্বি॒ভর্তি॑ । অনি॑র্ভিণ্ণ॒-স্সন্নথ॑ লো॒কান্. বি॒চষ্টে᳚ ।
যস্য়া᳚ণ্ডকো॒শগ্ম্ শুষ্ম॑মা॒হুঃ প্রা॒ণমুল্ব᳚ম্ ।
তেন॑ ক্লৃ॒প্তো॑-ঽমৃতে॑না॒হম॑স্মি ॥ সু॒বর্ণ॒-ঙ্কোশ॒গ্ম্॒ রজ॑সা॒ পরী॑বৃতম্ ।
দে॒বানাং᳚-বঁসু॒ধানীং᳚-বিঁ॒রাজ᳚ম্ ॥ 23 ॥
অ॒মৃত॑স্য় পূ॒র্ণান্তামু॑ ক॒লাং-বিঁচ॑ক্ষতে ।
পাদ॒গ্ম্॒ ষড্ঢো॑তু॒র্ন কিলা॑বি বিথ্সে ॥ যেন॒র্তবঃ॑ পঞ্চ॒ধোত ক্ল॒প্তাঃ । উ॒ত বা॑ ষ॒ড্ধা মন॒সোত ক্লৃ॒প্তাঃ । তগ্ম্ ষড্ঢো॑তারমৃ॒তুভিঃ॒ কল্প॑মানম্ । ঋ॒তস্য়॑ প॒দে ক॒বয়ো॒ নিপা᳚ন্তি ॥ অ॒ন্তঃ প্রবি॑ষ্ট-ঙ্ক॒র্তার॑মে॒তম্ । অ॒ন্তশ্চ॒ন্দ্রম॑সি॒ মন॑সা॒ চর॑ন্তম্ । স॒হৈব সন্ত॒-ন্ন বিজা॑নন্তি দে॒বাঃ ।
ইন্দ্র॑স্য়া॒ত্মানগ্ম্॑ শত॒ধা চর॑ন্তম্ ॥ 24 ॥
ইন্দ্রো॒ রাজা॒ জগ॑তো॒ য ঈশে᳚ । স॒প্তহো॑তা সপ্ত॒ধা বিক্লৃ॑প্তঃ ॥ পরে॑ণ॒ তন্তু॑-ম্পরিষি॒চ্যমা॑নম্ । অ॒ন্তরা॑দি॒ত্য়ে মন॑সা॒ চর॑ন্তম্ । দে॒বানা॒গ্ম্॒ হৃদ॑য়॒-ম্ব্রহ্মা-ঽন্ব॑বিন্দত্ ॥ ব্রহ্মৈ॒তদ্ব্রহ্ম॑ণ॒ উজ্জ॑ভার । অ॒র্কগ্গ্ শ্চোত॑ন্তগ্ম্ সরি॒রস্য়॒ মদ্ধ্য়ে᳚ ॥ আ যস্মিন্᳚-থ্স॒প্ত পের॑বঃ । মেহ॑ন্তি বহু॒লাগ্ শ্রিয়᳚ম্ । ব॒হ্ব॒শ্বামি॑ন্দ্র॒ গোম॑তীম্ ॥ 25 ॥
অচ্য়ু॑তা-ম্বহু॒লাগ্ শ্রিয়᳚ম্ । স হরি॑র্বসু॒বিত্ত॑মঃ ।
পে॒রুরিন্দ্রা॑য় পিন্বতে ॥ ব॒হ্ব॒শ্বামি॑ন্দ্র॒ গোম॑তীম্ । অচ্য়ু॑তা-ম্বহু॒লাগ্ শ্রিয়᳚ম্ । মহ্য়॒মিন্দ্রো॒ নিয়॑চ্ছতু ॥ শ॒তগ্ম্ শ॒তা অ॑স্য় যু॒ক্তা হরী॑ণাম্ ।
অ॒র্বাংআ যা॑তু॒ বসু॑ভী র॒শ্মিরিন্দ্রঃ॑ । প্রমগ্ম্হ॑মাণো বহু॒লাগ্ শ্রিয়᳚ম্ ।
র॒শ্মিরিন্দ্র॑-স্সবি॒তা মে॒ নিয়॑চ্ছতু ॥ 26 ॥
ঘৃ॒ত-ন্তেজো॒ মধু॑মদিন্দ্রি॒যম্ । ময়্য়॒যম॒গ্নির্দ॑ধাতু ॥ হরিঃ॑ পত॒ঙ্গঃ প॑ট॒রী সু॑প॒র্ণঃ । দি॒বি॒ক্ষয়ো॒ নভ॑সা॒ য এতি॑ ।
স ন॒ ইন্দ্রঃ॑ কামব॒র-ন্দ॑দাতু ॥ পঞ্চা॑র-ঞ্চ॒ক্র-ম্পরি॑বর্ততে পৃ॒থু । হির॑ণ্যজ্য়োতি-স্সরি॒রস্য়॒ মদ্ধ্য়ে᳚ । অজ॑স্র॒-ঞ্জ্য়োতি॒র্নভ॑সা॒ সর্প॑দেতি ।
স ন॒ ইন্দ্রঃ॑ কামব॒র-ন্দ॑দাতু ॥
স॒প্ত যু॑ঞ্জন্তি॒ রথ॒মেক॑চক্রম্ ॥ 27 ॥
একো॒ অশ্বো॑ বহতি সপ্তনা॒মা । ত্রি॒নাভি॑ চ॒ক্রম॒জর॒মন॑র্বম্ । যেনে॒মা বিশ্বা॒ ভুব॑নানি তস্থুঃ ॥ ভ॒দ্র-ম্পশ্য়॑ন্ত॒ উপ॑সেদু॒রগ্রে᳚ ।
তপো॑ দী॒ক্ষামৃষ॑য়-স্সুব॒র্বিদঃ॑ । ততঃ॑, ক্ষ॒ত্র-ম্বল॒মোজ॑শ্চ জা॒তম্ । তদ॒স্মৈ দে॒বা অ॒ভি স-ন্ন॑মন্তু ॥ শ্বে॒তগ্ম্ র॒শ্মি-ম্বো॑ভু॒জ্যমা॑নম্ ।
অ॒পা-ন্নে॒তার॒-ম্ভুব॑নস্য় গো॒পাম্ ।
ইন্দ্র॒-ন্নিচি॑ক্য়ুঃ পর॒মে ব্য়ো॑মন্ন্ ॥ 28 ॥
রোহি॑ণীঃ পিঙ্গ॒লা এক॑রূপাঃ । ক্ষর॑ন্তীঃ পিঙ্গ॒লা এক॑রূপাঃ । শ॒তগ্ম্ স॒হস্রা॑ণি প্র॒য়ুতা॑নি॒ নাব্য়া॑নাম্ ॥ অ॒য়ং-য়ঁশ্শ্বে॒তো র॒শ্মিঃ । পরি॒ সর্ব॑মি॒দ-ঞ্জগ॑ত্ । প্র॒জা-ম্প॒শূ-ন্ধনা॑নি । অ॒স্মাক॑-ন্দদাতু ॥
শ্বে॒তো র॒শ্মিঃ পরি॒ সর্ব॑-ম্বভূব । সুব॒ন্মহ্য়॑-ম্প॒শূন্. বি॒শ্বরূ॑পান্ ॥ প॒ত॒ঙ্গম॒ক্তমসু॑রস্য় মা॒যয়া᳚ ॥ 29 ॥
হৃ॒দা প॑শ্যন্তি॒ মন॑সা মনী॒ষিণঃ॑ । স॒মু॒দ্রে অ॒ন্তঃ ক॒বয়ো॒ বিচ॑ক্ষতে । মরী॑চীনা-ম্প॒দমি॑চ্ছন্তি বে॒ধসঃ॑ ॥ প॒ত॒ঙ্গো বাচ॒-ম্মন॑সা বিভর্তি ।
তা-ঙ্গ॑ন্ধ॒র্বো॑-ঽবদ॒-দ্গর্ভে॑ অ॒ন্তঃ । তা-ন্দ্য়োত॑মানাগ্ স্ব॒র্য়॑-ম্মনী॒ষাম্ ।
ঋ॒তস্য়॑ প॒দে ক॒বয়ো॒ নিপা᳚ন্তি ॥ যে গ্রা॒ম্য়াঃ প॒শবো॑ বি॒শ্বরূ॑পাঃ । বিরূ॑পা॒-স্সন্তো॑ বহু॒ধৈক॑রূপাঃ । অ॒গ্নিস্তাগ্ম্ অগ্রে॒ প্রমু॑মোক্তু দে॒বঃ ॥ 30 ॥
প্র॒জাপ॑তিঃ প্র॒জয়া॑ সংবিঁদা॒নঃ ॥ বী॒তগ্গ্ স্তু॑কেস্তুকে । যু॒বম॒স্মাসু॒ নিয়॑চ্ছতম্ । প্রপ্র॑ য॒জ্ঞপ॑তি-ন্তির ॥ যে গ্রা॒ম্য়াঃ প॒শবো॑ বি॒শ্বরূ॑পাঃ । বিরূ॑পা॒-স্সন্তো॑ বহু॒ধৈক॑রূপাঃ ।
তেষাগ্ম্॑ সপ্তা॒নামি॒হ রন্তি॑রস্তু ।
রা॒যস্পোষা॑য় সুপ্রজা॒স্ত্বায়॑ সু॒বীর্য়া॑য় ॥
য আ॑র॒ণ্য়াঃ প॒শবো॑ বি॒শ্বরূ॑পাঃ ।
বিরূ॑পা॒-স্সন্তো॑ বহু॒ধৈক॑রূপাঃ ॥ 31 ॥
বা॒য়ুস্তাগ্ম্ অগ্রে॒ প্রমু॑মোক্তু দে॒বঃ । প্র॒জাপ॑তিঃ প্র॒জয়া॑ সংবিঁদা॒নঃ ॥ ইডা॑য়ৈ সৃ॒প্ত-ঙ্ঘৃ॒তব॑চ্চরাচ॒রম্ । দে॒বা অন্ব॑বিন্দ॒ন্গুহা॑ হি॒তম্ ॥
য আ॑র॒ণ্য়াঃ প॒শবো॑ বি॒শ্বরূ॑পাঃ । বিরূ॑পা॒-স্সন্তো॑ বহু॒ধৈক॑রূপাঃ । তেষাগ্ম্॑ সপ্তা॒নামি॒হ রন্তি॑রস্তু ।
রা॒যস্পোষা॑য় সুপ্রজা॒স্ত্বায়॑ সু॒বীর্য়া॑য় ॥ 32 ॥
(আ॒ত্মা জনা॑নাং - ঁবিকু॒র্বন্তং॑-বিঁপ॒শ্বিং - প্র॒জানাং᳚ - ঁবসু॒ধানীং᳚
ঁবি॒রাজং॒ - চর॑ন্তং॒ - গোম॑তীং - মে॒ নিয়॑চ্ছ॒ - ত্বেক॑চক্রং॒ - ঁব্য়ো॑মন্ - মা॒যয়া॑ - দে॒ব - এক॑রূপা - +অ॒ষ্টৌ চ॑) (অ. 11)
অনুবাকং 12
স॒হস্র॑শীর্ষা॒ পুরু॑ষঃ । স॒হ॒স্রা॒ক্ষ-স্স॒হস্র॑পাত্ । স ভূমিং॑-বিঁ॒শ্বতো॑ বৃ॒ত্বা । অত্য়॑তিষ্ঠ-দ্দশাঙ্গু॒লম্ ॥ পুরু॑ষ এ॒বেদগ্ম্ সর্ব᳚ম্ । য-দ্ভূ॒তং-য়ঁচ্চ॒ ভব্য়᳚ম্ ।
উ॒তামৃ॑ত॒ত্বস্য়েশা॑নঃ । যদন্নে॑নাতি॒রোহ॑তি ॥ এ॒তাবা॑নস্য় মহি॒মা । অতো॒ জ্য়ায়াগ্॑শ্চ॒ পূরু॑ষঃ ॥ 33 ॥
পাদো᳚-ঽস্য়॒ বিশ্বা॑ ভূ॒তানি॑ । ত্রি॒পাদ॑স্য়া॒মৃত॑-ন্দি॒বি ॥
ত্রি॒পাদূ॒র্ধ্ব উদৈ॒ত্পুরু॑ষঃ । পাদো᳚-ঽস্য়ে॒হাভ॑বা॒-ত্পুনঃ॑ । ততো॒ বিষ্বং॒-ব্য়ঁ॑ক্রামত্ । সা॒শ॒না॒ন॒শ॒নে অ॒ভি ॥ তস্মা᳚-দ্বি॒রাড॑জাযত । বি॒রাজো॒ অধি॒ পূরু॑ষঃ ।
স জা॒তো অত্য়॑রিচ্যত । প॒শ্চা-দ্ভূমি॒মথো॑ পু॒রঃ ॥ 34 ॥
যত্পুরু॑ষেণ হ॒বিষা᳚ । দে॒বা য॒জ্ঞমত॑ন্বত । ব॒স॒ন্তো অ॑স্য়াসী॒দাজ্য়᳚ম্ । গ্রী॒ষ্ম ই॒দ্ধ্ম-শ্শ॒রদ্ধ॒বিঃ ॥ স॒প্তাস্য়া॑স-ন্পরি॒ধয়ঃ॑ ।
ত্রি-স্স॒প্ত স॒মিধঃ॑ কৃ॒তাঃ । দে॒বা য-দ্য়॒জ্ঞ-ন্ত॑ন্বা॒নাঃ । অব॑দ্ধ্ন॒-ন্পুরু॑ষ-ম্প॒শুম্ ॥ তং-য়ঁ॒জ্ঞ-ম্ব॒র্॒হিষি॒ প্রৌক্ষন্ন্॑ ।
পুরু॑ষ-ঞ্জা॒তম॑গ্র॒তঃ ॥ 35 ॥
তেন॑ দে॒বা অয়॑জন্ত । সা॒দ্ধ্য়া ঋষ॑যশ্চ॒ যে ॥
তস্মা᳚-দ্য়॒জ্ঞা-থ্স॑র্ব॒হুতঃ॑ । সম্ভৃ॑ত-ম্পৃষদা॒জ্যম্ । প॒শূগ্স্তাগ্শ্চ॑ক্রে বায়॒ব্য়ান্॑ ।
আ॒র॒ণ্য়া-ন্গ্রা॒ম্য়াশ্চ॒ যে ॥ তস্মা᳚-দ্য়॒জ্ঞা-থ্স॑র্ব॒হুতঃ॑ । ঋচ॒-স্সামা॑নি জজ্ঞিরে । ছন্দাগ্ম্॑সি জজ্ঞিরে॒ তস্মা᳚ত্ । যজু॒-স্তস্মা॑দজাযত ॥ 36 ॥
তস্মা॒দশ্বা॑ অজাযন্ত । যে কে চো॑ভ॒য়াদ॑তঃ । গাবো॑ হ জজ্ঞিরে॒ তস্মা᳚ত্ । তস্মা᳚ জ্জা॒তা অ॑জা॒বয়ঃ॑ ॥ য-ত্পুরু॑ষং॒-ব্য়ঁ॑দধুঃ । ক॒তি॒ধা ব্য়॑কল্পযন্ন্ । মুখ॒-ঙ্কিম॑স্য়॒ কৌ বা॒হূ । কাবূ॒রূ পাদা॑বুচ্য়েতে ॥
ব্রা॒হ্ম॒ণো᳚-ঽস্য়॒ মুখ॑মাসীত্ । বা॒হূ রা॑জ॒ন্য়ঃ॑ কৃ॒তঃ ॥ 37 ॥
ঊ॒রূ তদ॑স্য়॒ য-দ্বৈশ্য়ঃ॑ । প॒দ্ভ্য়াগ্ম্ শূ॒দ্রো অ॑জাযত ॥ চ॒ন্দ্রমা॒ মন॑সো জা॒তঃ । চক্ষো॒-স্সূর্য়ো॑ অজাযত ।
মুখা॒দিন্দ্র॑শ্চা॒গ্নিশ্চ॑ । প্রা॒ণা-দ্বা॒য়ুর॑জাযত ॥ নাভ্য়া॑ আসীদ॒ন্তরি॑ক্ষম্ । শী॒র্ষ্ণো দ্য়ৌ-স্সম॑বর্তত । প॒দ্ভ্য়া-ম্ভূমি॒-র্দিশ॒-শ্শ্রোত্রা᳚ত্ ।
তথা॑ লো॒কাগ্ম্ অ॑কল্পযন্ন্ ॥ 38 ॥
বেদা॒হমে॒ত-ম্পুরু॑ষ-ম্ম॒হান্ত᳚ম্ । আ॒দি॒ত্যব॑র্ণ॒-ন্তম॑স॒স্তু পা॒রে । সর্বা॑ণি রূ॒পাণি॑ বি॒চিত্য়॒ ধীরঃ॑ । নামা॑নি কৃ॒ত্বা-ঽভি॒বদ॒ন্॒. যদাস্তে᳚ ॥
ধা॒তা পু॒রস্তা॒দ্যমু॑দাজ॒হার॑ । শ॒ক্রঃ প্রবি॒দ্বা-ন্প্র॒দিশ॒শ্চত॑স্রঃ । তমে॒বং-বিঁ॒দ্বান॒মৃত॑ ই॒হ ভ॑বতি । নান্য়ঃ পন্থা॒ অয়॑নায় বিদ্যতে ॥
য॒জ্ঞেন॑ য॒জ্ঞম॑যজন্ত দে॒বাঃ । তানি॒ ধর্মা॑ণি প্রথ॒মান্য়া॑সন্ন্ । তে হ॒ নাক॑-ম্মহি॒মান॑-স্সচন্তে । যত্র॒ পূর্বে॑ সা॒দ্ধ্য়া-স্সন্তি॑ দে॒বাঃ ॥ 39 ॥
(পুরু॑ষঃ - পু॒রো᳚ - ঽগ্র॒তো॑ - ঽজাযত - কৃ॒তো॑ - ঽকল্পযন্ - নাস॒-ন্দ্বে চ॑) (অ. 12)
(জ্য়ায়া॒নধি॒ পূরু॑ষঃ) (অ॒ন্যত্র॒ পুরু॑ষঃ )
অনুবাকং 13
অ॒দ্ভ্য়-স্সম্ভূ॑তঃ পৃথি॒ব্য়ৈ রসা᳚চ্চ । বি॒শ্বক॑র্মণ॒-স্সম॑বর্ত॒তাধি॑ ।
তস্য়॒ ত্বষ্টা॑ বি॒দধ॑-দ্রূ॒পমে॑তি । ত-ত্পুরু॑ষস্য়॒ বিশ্ব॒মাজা॑ন॒মগ্রে᳚ ॥ বেদা॒হমে॒ত-ম্পুরু॑ষ-ম্ম॒হান্ত᳚ম্ । আ॒দি॒ত্যব॑র্ণ॒-ন্তম॑সঃ॒ পর॑স্তাত্ ।
তমে॒বং-বিঁ॒দ্বান॒মৃত॑ ই॒হ ভ॑বতি । নান্য়ঃ পন্থা॑ বিদ্য়॒তে-ঽয়॑নায় ॥ প্র॒জাপ॑তিশ্চরতি॒ গর্ভে॑ অ॒ন্তঃ । অ॒জায়॑মানো বহু॒ধা বিজা॑যতে ॥ 40 ॥
তস্য়॒ ধীরাঃ॒ পরি॑জানন্তি॒ যোনি᳚ম্ । মরী॑চীনা-ম্প॒দমি॑চ্ছন্তি বে॒ধসঃ॑ ॥ যো দে॒বেভ্য়॒ আত॑পতি । যো দে॒বানা᳚-ম্পু॒রোহি॑তঃ । পূর্বো॒ যো দে॒বেভ্য়ো॑ জা॒তঃ । নমো॑ রু॒চায়॒ ব্রাহ্ম॑য়ে ॥ রুচ॑-ম্ব্রা॒হ্ম-ঞ্জ॒নয়॑ন্তঃ । দে॒বা অগ্রে॒ তদ॑ব্রুবন্ন্ ।
যস্ত্বৈ॒ব-ম্ব্রা᳚হ্ম॒ণো বি॒দ্য়াত্ । তস্য়॑ দে॒বা অস॒ন্বশে᳚ ॥ হ্রীশ্চ॑ তে ল॒ক্ষ্মীশ্চ॒ পত্ন্য়ৌ᳚ । অ॒হো॒রা॒ত্রে পা॒র্শ্বে । নক্ষ॑ত্রাণি রূ॒পম্ । অ॒শ্বিনৌ॒ ব্য়াত্ত᳚ম্ । ই॒ষ্ট-ম্ম॑নিষাণ । অ॒মু-ম্ম॑নিষাণ । সর্ব॑-ম্মনিষাণ ॥ 41 ॥
(জা॒য়॒তে॒ - বশে॑ স॒প্ত চ॑) (অ. 13)
অনুবাকং 14
ভ॒র্তা স-ন্ভ্রি॒যমা॑ণো বিভর্তি । একো॑ দে॒বো ব॑হু॒ধা নিবি॑ষ্টঃ । য॒দা ভা॒র-ন্ত॒ন্দ্রয়॑তে॒ স ভর্তু᳚ম্ । নি॒ধায়॑ ভা॒র-ম্পুন॒রস্ত॑মেতি ॥
তমে॒ব মৃ॒ত্য়ুম॒মৃত॒-ন্তমা॑হুঃ । ত-ম্ভ॒র্তার॒-ন্তমু॑ গো॒প্তার॑মাহুঃ । স ভৃ॒তো ভ্রি॒যমা॑ণো বিভর্তি । য এ॑নং॒-বেঁদ॑ স॒ত্য়েন॒ ভর্তু᳚ম্ ॥ স॒দ্য়ো জা॒তমু॒ত জ॑হাত্য়ে॒ষঃ । উ॒তো জর॑ন্ত॒-ন্ন জ॑হা॒ত্য়েক᳚ম্ ॥ 42 ॥
উ॒তো ব॒হূনেক॒মহ॑র্জহার । অত॑ন্দ্রো দে॒ব-স্সদ॑মে॒ব প্রার্থঃ॑ ॥ যস্তদ্বেদ॒ যত॑ আব॒ভূব॑ । স॒ন্ধা-ঞ্চ॒ যাগ্ম্ স॑ন্দ॒ধে ব্রহ্ম॑ণৈ॒ষঃ ।
রম॑তে॒ তস্মি॑ন্নু॒ত জী॒র্ণে শয়া॑নে । নৈন॑-ঞ্জহা॒ত্যহ॑স্সু পূ॒র্ব্য়েষু॑ ॥ ত্বামাপো॒ অনু॒ সর্বা᳚শ্চরন্তি জান॒তীঃ । ব॒থ্স-ম্পয়॑সা পুনা॒নাঃ ।
ত্বম॒গ্নিগ্ম্ হ॑ব্য়॒বাহ॒গ্ম্॒ সমি᳚ন্থ্সে ।
ত্ব-ম্ভ॒র্তা মা॑ত॒রিশ্বা᳚ প্র॒জানা᳚ম্ ॥ 43 ॥
ত্বং-য়ঁ॒জ্ঞস্ত্বমু॑ বে॒বাসি॒ সোমঃ॑ । তব॑ দে॒বা হব॒মায়॑ন্তি॒ সর্বে᳚ । ত্বমেকো॑-ঽসি ব॒হূননু॒প্রবি॑ষ্টঃ । নম॑স্তে অস্তু সু॒হবো॑ ম এধি ॥
নমো॑ বামস্তু শৃণু॒তগ্ম্ হব॑-ম্মে । প্রাণা॑পানাবজি॒রগ্ম্ স॒চংর॑ন্তৌ ।
হ্বয়া॑মি বা॒-ম্ব্রহ্ম॑ণা তূ॒র্তমেত᳚ম্ । যো মা-ন্দ্বেষ্টি॒ ত-ঞ্জ॑হি তং-য়ুঁবানা ॥
প্রাণা॑পানৌ সংবিঁদা॒নৌ জ॑হিতম্ ।
অ॒মুষ্য়াসু॑না॒ মা সঙ্গ॑সাথাম্ ॥ 44 ॥
ত-ম্মে॑ দেবা॒ ব্রহ্ম॑ণা সংবিঁদা॒নৌ ।
ব॒ধায়॑ দত্ত॒-ন্তম॒হগ্ম্ হ॑নামি ॥ অস॑জ্জজান স॒ত আব॑ভূব । যং-য়ঁ॑-ঞ্জ॒জান॒ স উ॑ গো॒পো অ॑স্য় ।
য॒দা ভা॒র-ন্ত॒ন্দ্রয়॑তে॒ স ভর্তু᳚ম্ । প॒রাস্য়॑ ভা॒র-ম্পুন॒রস্ত॑মেতি ॥
তদ্বৈ ত্ব-ম্প্রা॒ণো অ॑ভবঃ । ম॒হান্ভোগঃ॑ প্র॒জাপ॑তেঃ । ভুজঃ॑ করি॒ষ্যমা॑ণঃ । যদ্দে॒বান্প্রাণ॑য়ো॒ নব॑ ॥ 45 ॥
(একং॑ - প্র॒জানাং᳚ - গসাথাং॒ - নব॑ ) (অ. 14)
অনুবাকং 15
হরি॒গ্ম্॒ হর॑ন্ত॒মনু॑যন্তি দে॒বাঃ । বিশ্ব॒স্য়েশা॑নং-বৃঁষ॒ভ-ম্ম॑তী॒নাম্ । ব্রহ্ম॒ সরূ॑প॒মনু॑ মে॒দমাগা᳚ত্ । অয়॑ন॒-ম্মা বিব॑ধী॒-র্বিক্র॑মস্ব ॥
মাচ্ছি॑দো মৃত্য়ো॒ মা ব॑ধীঃ । মা মে॒ বলং॒-বিঁবৃ॑হো॒ মা প্রমো॑ষীঃ । প্র॒জা-ম্মা মে॑ রীরিষ॒ আয়ু॑রুগ্র । নৃ॒চক্ষ॑স-ন্ত্বা হ॒বিষা॑ বিধেম ॥
স॒দ্যশ্চ॑কমা॒নায়॑ । প্র॒বে॒পা॒নায়॑ মৃ॒ত্যবে᳚ ॥ 46 ॥
প্রাস্মা॒ আশা॑ অশৃণ্বন্ন্ । কামে॑নাজনয়॒-ন্পুনঃ॑ ॥
কামে॑ন মে॒ কাম॒ আগা᳚ত্ । হৃদ॑য়া॒দ্দ্ধৃদ॑য়-ম্মৃ॒ত্য়োঃ । যদ॒মীষা॑ম॒দঃ প্রি॒যম্ । তদৈতূপ॒ মাম॒ভি ॥ পর॑-ম্মৃত্য়ো॒ অনু॒ পরে॑হি॒ পন্থা᳚ম্ । যস্তে॒ স্ব ইত॑রো দেব॒য়ানা᳚ত্ । চক্ষু॑ষ্মতে শৃণ্ব॒তে তে᳚ ব্রবীমি । মা নঃ॑ প্র॒জাগ্ম্ রী॑রিষো॒ মোত বী॒রান্ ॥
প্র পূ॒র্ব্য়-ম্মন॑সা॒ বন্দ॑মানঃ । নাধ॑মানো বৃষ॒ভ-ঞ্চ॑র্ষণী॒নাম্ । যঃ প্র॒জানা॑মেক॒রাণ্মানু॑ষীণাম্ ।
মৃ॒ত্য়ুং-য়ঁ॑জে প্রথম॒জামৃ॒তস্য়॑ ॥ 47 ॥
(মৃ॒ত্যবে॑ - বী॒রাগ্শ্চ॒ত্বারি॑ চ) (অ. 15)
অনুবাকং 16
ত॒রণি॑-র্বি॒শ্বদ॑র্শতো জ্য়োতি॒ষ্কৃদ॑সি সূর্য় । বিশ্ব॒মাভা॑সি রোচ॒নম্ ।
উ॒প॒য়া॒মগৃ॑হীতো-ঽসি॒ সূর্য়া॑য় ত্বা॒ ভ্রাজ॑স্বত এ॒ষ তে॒ যোনি॒-স্সূর্য়া॑য় ত্বা॒ ভ্রাজ॑স্বতে ॥ 48 ॥
অনুবাকং 17
আ প্য়া॑যস্ব মদিন্তম॒ সোম॒ বিশ্বা॑ভিরূ॒তিভিঃ॑ ।
ভবা॑ ন-স্স॒প্রথ॑স্তমঃ ॥ 49 ॥
অনুবাকং 18
ঈ॒য়ুষ্টে যে পূর্ব॑তরা॒মপ॑শ্যন্ ব্য়ু॒চ্ছন্তী॑মু॒ষস॒-ম্মর্ত্য়া॑সঃ ।
অ॒স্মাভি॑রূ॒ নু প্র॑তি॒চক্ষ্য়া॑-ঽভূ॒দো তে য॑ন্তি॒ যে অ॑প॒রীষু॒ পশ্য়ান্॑ ॥ 50 ॥
অনুবাকং 19
জ্য়োতি॑ষ্মতী-ন্ত্বা সাদয়ামি জ্য়োতি॒ষ্কৃত॑-ন্ত্বা সাদয়ামি জ্য়োতি॒র্বিদ॑-ন্ত্বা সাদয়ামি॒ ভাস্ব॑তী-ন্ত্বা সাদয়ামি॒ জ্বল॑ন্তী-ন্ত্বা সাদয়ামি মল্মলা॒ভব॑ন্তী-ন্ত্বা সাদয়ামি॒ দীপ্য়॑মানা-ন্ত্বা সাদয়ামি॒ রোচ॑মানাং
ত্বা সাদয়া॒ম্যজ॑স্রা-ন্ত্বা সাদয়ামি বৃ॒হজ্জ্য়ো॑তিষ-ন্ত্বা সাদয়ামি বো॒ধয়॑ন্তী-ন্ত্বা সাদয়ামি॒ জাগ্র॑তী-ন্ত্বা সাদয়ামি ॥ 51 ॥
অনুবাকং 20
প্র॒য়া॒সায়॒ স্বাহা॑-ঽঽয়া॒সায়॒ স্বাহা॑ বিয়া॒সায়॒ স্বাহা॑ সংয়াঁ॒সায়॒ স্বাহো᳚দ্য়া॒সায়॒ স্বাহা॑-ঽবয়া॒সায়॒ স্বাহা॑ শু॒চে স্বাহা॒ শোকা॑য়॒ স্বাহা॑ তপ্য়॒ত্বৈ স্বাহা॒ তপ॑তে॒ স্বাহা᳚ ব্রহ্মহ॒ত্য়ায়ৈ॒ স্বাহা॒ সর্ব॑স্মৈ॒ স্বাহা᳚ ॥ 52 ॥
অনুবাকং 21
চি॒ত্তগ্ম্ স॑ন্তা॒নেন॑ ভবং-য়ঁ॒ক্না রু॒দ্র-ন্তনি॑ম্না পশু॒পতিগ্গ্॑ স্থূলহৃদ॒য়েনা॒গ্নিগ্ম্ হৃদ॑য়েন রু॒দ্রং-লোঁহি॑তেন শ॒র্ব-ম্মত॑স্নাভ্য়াং
মহাদে॒বম॒ন্তঃ পা᳚র্শ্বেনৌষিষ্ঠ॒হনগ্ম্॑ শিঙ্গীনিকো॒শ্য়া᳚ভ্য়াম্ ॥ 53 ॥
(চিত্তিঃ॑ - পৃথি॒ - ব্য়॑গ্নিঃ॒ - সূর্য়॑-ন্তে॒ চক্ষু॑--র্ ম॒হাহ॑বি॒র্॒ হোতা॒ - বাঘোতা᳚ - ব্রাহ্ম॒ণ এক॑হোতা॒ - ঽগ্নির্যজু॑র্ভিঃ॒ - সেনেন্দ্র॑স্য় - দে॒বস্য়॑ - সু॒বর্ণ॑-ঙ্ঘ॒র্মগ্ম্ - স॒হস্র॑শীর্ষা॒- ঽদ্ভ্য়ো - ভ॒র্তা -
হরিং॑ - ত॒রণি॒ - রাপ্য়া॑য় - স্বে॒য়ুষ্টে যে - জ্য়োতি॑ষ্মতীং - প্রয়া॒সায়॑ - চি॒ত্ত মেক॑বিগ্ম্শতিঃ)
(চিত্তি॑ - র॒গ্নির্যজু॑র্ভি - র॒ন্তঃ প্রবি॑ষ্টঃ - প্র॒জাপ॑তি॒ - স্তস্য়॒ ধীরা॒ - জ্য়োতি॑ষ্মতী॒-ন্ত্রিপ॑ঞ্চা॒শত্ )
( চিত্তিঃ॑ - শিঙ্গীনিকো॒শ্য়া᳚ভ্য়াং )
॥ হরিঃ॑ ওম্ ॥
॥ কৃষ্ণ যজুর্বেদীয় তৈত্তিরীয় আরণ্যকে তৃতীয়ঃ প্রপাঠক-স্সমাপ্তঃ ॥
