কৃষ্ণ যজুর্বেদীয় তৈত্তিরীয় আরণ্যকে পঞ্চমঃ প্রপাঠকঃ - প্রবর্গ্য় ব্রাহ্মণম্
ও-ন্নমঃ পরমাত্মনে, শ্রী মহাগণপতয়ে নমঃ,
শ্রী গুরুভ্য়ো নমঃ । হ॒রিঃ॒ ওম্ ॥
অনুবাকং 1
দে॒বা বৈ স॒ত্রমা॑সত । ঋদ্ধি॑পরিমিত॒ম্ ঁযশ॑স্কামাঃ । তে᳚-ঽব্রুবন্ন্ । যন্নঃ॑ প্রথ॒মং-য়ঁশ॑ ঋ॒চ্ছাত্ । সর্বে॑ষা-ন্ন॒স্ত-থ্স॒হাস॒দিতি॑ ।
তেষা᳚-ঙ্কুরুক্ষে॒ত্রং-বেঁদি॑রাসীত্ । তস্য়ৈ॑ খাণ্ড॒বো দ॑ক্ষিণা॒র্ধ আ॑সীত্ । তূর্ঘ্ন॑মুত্তরা॒র্ধঃ । প॒রী॒ণজ্জ॑ঘনা॒র্ধঃ । ম॒রব॑ উত্ক॒রঃ ॥ 1 ॥
তেষা᳚-ম্ম॒খং-বৈঁ᳚ষ্ণ॒বং-য়ঁশ॑ আর্চ্ছত্ । তন্ন্য়॑কামযত । তেনাপা᳚ক্রামত্ । ত-ন্দে॒বা অন্বা॑যন্ন্ । যশো॑-ঽব॒রুরু॑থ্সমানাঃ । তস্য়া॒ন্বাগ॑তস্য় ।
স॒ব্য়াদ্ধনু॒রজা॑যত । দক্ষি॑ণা॒দিষ॑বঃ । তস্মা॑দিষুধ॒ন্ব-ম্পুণ্য়॑জন্ম ।
য॒জ্ঞজ॑ন্মা॒ হি ॥ 2 ॥
তমেক॒গ্ম্॒ সন্ত᳚ম্ । ব॒হবো॒ নাভ্য়॑ধৃষ্ণুবন্ন্ । তস্মা॒দেক॑মিষুধ॒ন্বিন᳚ম্ । ব॒হবো॑-ঽনিষুধ॒ন্বা নাভিধৃ॑ষ্ণুবন্তি । সো᳚-ঽস্মযত । এক॑-ম্মা॒ সন্ত॑-ম্ব॒হবো॒ নাভ্য়॑ধর্ষিষু॒রিতি॑ ।
তস্য়॑ সিষ্মিয়া॒ণস্য়॒ তেজো-ঽপা᳚ক্রামত্ । ত-দ্দে॒বা ওষ॑ধীষু॒ ন্য়॑মৃজুঃ । তে শ্য়া॒মাকা॑ অভবন্ন্ । স্ম॒য়াকা॒ বৈ নামৈ॒তে ॥ 3 ॥
ত-থ্স্ম॒য়াকা॑নাগ্ স্ময়াক॒ত্বম্ । তস্মা᳚-দ্দীক্ষি॒তেনা॑পি॒গৃহ্য়॑ স্মেত॒ব্য়᳚ম্ । তেজ॑সো॒ ধৃত্য়ৈ᳚ । স ধনুঃ॑ প্রতি॒ষ্কভ্য়া॑তিষ্ঠত্ । তা উ॑প॒দীকা॑ অব্রুব॒ন্-বর॑ম্ ঁবৃণামহৈ । অথ॑ ব ই॒মগ্ম্ র॑ন্ধয়াম ।
যত্র॒ ক্ব॑ চ॒ খনা॑ম । তদ॒পো॑-ঽভিতৃ॑ণদা॒মেতি॑ ।
তস্মা॑দুপ॒দীকা॒ যত্র॒ ক্ব॑ চ॒ খন॑ন্তি । তদ॒পো॑-ঽভিতৃ॑ন্দন্তি ॥ 4 ॥
বারে॑বৃত॒গ্গ্॒ হ্য়া॑সাম্ । তস্য়॒ জ্য়ামপ্য়া॑দন্ন্ ।
তস্য়॒ ধনু॑র্বি॒প্রব॑মাণ॒গ্ম্॒ শির॒ উদ॑বর্তযত্ ।
ত-দ্দ্য়াবা॑পৃথি॒বী অনু॒প্রাব॑র্তত । য-ত্প্রাব॑র্তত ।
ত-ত্প্র॑ব॒র্গ্য়॑স্য় প্রবর্গ্য়॒ত্বম্ । যদ্ঘ্রাঁ(4) ইত্যপ॑তত্ ।
তদ্ধ॒র্মস্য়॑ ঘর্ম॒ত্বম্ ।
ম॒হ॒তো বী॒র্য়॑মপপ্ত॒দিতি॑ । ত-ন্ম॑হাবী॒রস্য়॑ মহাবীর॒ত্বম্ ॥ 5 ॥
যদ॒স্য়া-স্স॒মভ॑রন্ন্ । ত-থ্স॒ম্রাজ্ঞ॑-স্সম্রা॒ট্ত্বম্ ।
তগ্গ্ স্তৃ॒ত-ন্দে॒বতা᳚স্ত্রে॒ধা ব্য়॑গৃহ্ণত । অ॒গ্নিঃ প্রা॑তস্সব॒নম্ । ইন্দ্রো॒ মাদ্ধ্য়॑ন্দিন॒গ্ম্॒ সব॑নম্ । বিশ্বে॑ দে॒বাস্তৃ॑তীযসব॒নম্ । তেনাপ॑শীর্ষ্ণা য॒জ্ঞেন॒ যজ॑মানাঃ । নাশিষো॒-ঽবারু॑ন্ধত ।
ন সু॑ব॒র্গং-লোঁ॒কম॒ভ্য়॑জযন্ন্ ।
তে দে॒বা অ॒শ্বিনা॑বব্রুবন্ন্ ॥ 6 ॥
ভি॒ষজৌ॒ বৈ স্থঃ॑ । ই॒দং-য়ঁ॒জ্ঞস্য়॒ শিরঃ॒ প্রতি॑ধত্ত॒মিতি॑ । তাব॑ব্রূতাং॒-বঁর॑ম্ ঁবৃণাবহৈ । গ্রহ॑ এ॒ব না॒বত্রাপি॑ গৃহ্যতা॒মিতি॑ ।
তাভ্য়া॑-মে॒তমা᳚শ্বি॒ন-ম॑গৃহ্ণন্ন্ ।
তাবে॒ত-দ্য়॒জ্ঞস্য়॒ শিরঃ॒ প্রত্য়॑ধত্তাম্ ।
য-ত্প্র॑ব॒র্গ্য়ঃ॑ । তেন॒ সশী᳚র্ষ্ণা য॒জ্ঞেন॒ যজ॑মানাঃ । অবা॒শিষো-ঽরু॑ন্ধত ।
অ॒ভি সু॑ব॒র্গং-লোঁ॒কম॑জযন্ন্ । য-ত্প্র॑ব॒র্গ্য়॑-ম্প্রবৃ॒ণক্তি॑ । য॒জ্ঞস্য়ৈ॒ব তচ্ছিরঃ॒ প্রতি॑দধাতি ।
তেন॒ সশী᳚র্ষ্ণা য॒জ্ঞেন॒ যজ॑মানঃ ।
অবা॒শিষো॑ রু॒ন্ধে । অ॒ভি সু॑ব॒র্গং-লোঁ॒ক-ঞ্জ॑যতি ।
তস্মা॑দে॒ষ আ᳚শ্বি॒নপ্র॑বয়া ইব । য-ত্প্র॑ব॒র্গ্য়ঃ॑ ॥ 7 ॥
(উ॒ত্ক॒রো - হ্য়ে॑ - তে - তৃ॑ন্দন্তি - মহাবীর॒ত্ব - ম॑ব্রুবন্ - নজযন্-থ্স॒প্ত চ॑) (অ. 1)
অনুবাকং 2
সা॒বি॒ত্র-ঞ্জু॑হোতি॒ প্রসূ᳚ত্য়ৈ । চ॒তু॒র্গৃ॒হী॒তেন॑ জুহোতি ।
চতু॑ষ্পাদঃ প॒শবঃ॑ । প॒শূনে॒বাব॑রুন্ধে । চত॑স্রো॒ দিশঃ॑ । দি॒ক্ষ্বে॑ব প্রতি॑তিষ্ঠতি ।
ছন্দাগ্ম্॑সি দে॒বেভ্য়ো-ঽপা᳚ক্রামন্ন্ ।
ন বো॑-ঽভা॒গানি॑ হ॒ব্য়ং-বঁ॑ক্ষ্য়াম॒ ইতি॑ ।
তেভ্য়॑ এ॒ত-চ্চ॑তুর্গৃহী॒ত-ম॑ধারযন্ন্ । পু॒রো॒নু॒বা॒ক্য়া॑য়ৈ যা॒জ্য়া॑য়ৈ ॥ 8 ॥
দে॒বতা॑য়ৈ বষট্কা॒রায়॑ । যচ্চ॑তুর্গৃহী॒ত-ঞ্জু॒হোতি॑ ।
ছন্দাগ্॑স্য়ে॒ব ত-ত্প্রী॑ণাতি । তান্য়॑স্য় প্রী॒তানি॑ দে॒বেভ্য়ো॑ হ॒ব্য়ং-বঁ॑হন্তি । ব্র॒হ্ম॒বা॒দিনো॑ বদন্তি । হো॒ত॒ব্য়॑-ন্দীক্ষি॒তস্য়॑ গৃ॒হা(3) ই ন হো॑ত॒ব্য়া(3) মিতি॑ । হ॒বির্বৈ দী᳚ক্ষি॒তঃ । যজ্জু॑হু॒য়াত্ । হ॒বিষ্কৃ॑তং॒-য়ঁজ॑মানম॒গ্নৌ প্রদ॑দ্ধ্য়াত্ ।
যন্ন জু॑হু॒য়াত্ ॥ 9 ॥
য॒জ্ঞ॒প॒রুর॒ন্তরি॑য়াত্ । যজু॑রে॒ব ব॑দেত্ ।
ন হ॒বিষ্কৃ॑তং॒-য়ঁজ॑মানম॒গ্নৌ প্র॒দধা॑তি । ন য॑জ্ঞপ॒রুর॒ন্তরে॑তি । গা॒য়॒ত্রী ছন্দা॒গ্॒স্যত্য়॑মন্যত ।
তস্য়ৈ॑ বষট্কা॒রো᳚-ঽভ্যয়্য়॒ শিরো᳚-ঽচ্ছিনত্ ।
তস্য়ৈ᳚ দ্বে॒ধা রসঃ॒ পরা॑-ঽপতত্ । পৃ॒থি॒বীম॒র্ধঃ প্রাবি॑শত্ । প॒শূন॒র্ধঃ । যঃ পৃ॑থি॒বী-ম্প্রাবি॑শত্ ॥ 10 ॥
স খ॑দি॒রো॑-ঽভবত্ । যঃ প॒শূন্ । সো॑-ঽজাম্ । যত্খা॑দি॒র্যভ্রি॒-র্ভব॑তি । ছন্দ॑সামে॒ব রসে॑ন য॒জ্ঞস্য়॒ শির॒-স্সম্ভ॑রতি । যদৌদু॑ম্বরী ।
ঊর্গ্বা উ॑দু॒ম্বরঃ॑ । ঊ॒র্জৈব য॒জ্ঞস্য়॒ শির॒-স্সম্ভ॑রতি । য-দ্বৈ॑ণ॒বী । তেজো॒ বৈ বেণুঃ॑ ॥ 11 ॥
তেজ॑সৈ॒ব য॒জ্ঞস্য়॒ শির॒-স্সম্ভ॑রতি । য-দ্বৈক॑ঙ্কতী ।
ভা এ॒বাব॑রুন্ধে । দে॒বস্য়॑ ত্বা সবি॒তুঃ প্র॑স॒ব ইত্যভ্রি॒মাদ॑ত্তে॒ প্রসূ᳚ত্য়ৈ । অ॒শ্বিনো᳚-র্বা॒হুভ্য়া॒মিত্য়া॑হ । অ॒শ্বিনৌ॒ হি দে॒বানা॑মদ্ধ্ব॒র্য়ূ আস্তা᳚ম্ ।
পূ॒ষ্ণো হস্তা᳚ভ্য়া॒মিত্য়াহ॒ যত্য়ৈ᳚ । বজ্র॑ ইব॒ বা এ॒ষা । যদভ্রিঃ॑ । অভ্রি॑রসি॒ নারি॑র॒সীত্য়া॑হ॒ শান্ত্য়ৈ᳚ ॥ 12 ॥
অ॒দ্ধ্ব॒র॒কৃ-দ্দে॒বেভ্য়॒ ইত্য়া॑হ । য॒জ্ঞো বা অ॑দ্ধ্ব॒রঃ । য॒জ্ঞ॒কৃ-দ্দে॒বেভ্য়॒ ইতি॒ বাবৈতদা॑হ । উত্তি॑ষ্ঠ ব্রহ্মণস্পত॒ ইত্য়া॑হ ।
ব্রহ্ম॑ণৈ॒ব য॒জ্ঞস্য়॒ শিরো-ঽচ্ছৈ॑তি ।
প্রৈতু॒ ব্রহ্ম॑ণ॒স্পতি॒রিত্য়া॑হ । প্রেত্য়ৈ॒ব য॒জ্ঞস্য়॒ শিরো-ঽচ্ছৈ॑তি । প্র দে॒ব্য়ে॑তু সূ॒নৃতেত্য়া॑হ ।
য॒জ্ঞো বৈ সূ॒নৃতা᳚ । অচ্ছা॑ বী॒রন্নর্য়॑-ম্প॒ঙ্ক্তিরা॑ধস॒মিত্য়া॑হ ॥ 13 ॥
পাঙ্ক্তো॒ হি য॒জ্ঞঃ । দে॒বা য॒জ্ঞন্ন॑যন্তু ন॒ ইত্য়া॑হ ।
দে॒বানে॒ব য॑জ্ঞ॒নিয়ঃ॑ কুরুতে । দেবী᳚ দ্য়াবাপৃথিবী॒ অনু॑ মে মগ্ম্সাথা॒মিত্য়া॑হ । আ॒ভ্য়ামে॒বানু॑মতো য॒জ্ঞস্য়॒ শির॒-স্সম্ভ॑রতি । ঋ॒দ্ধ্য়াস॑ম॒দ্য় ম॒খস্য়॒ শির॒ ইত্য়া॑হ । য॒জ্ঞো বৈ ম॒খঃ ।
ঋ॒দ্ধ্য়াস॑ম॒দ্য় য॒জ্ঞস্য়॒ শির॒ ইতি॒ বাবৈতদা॑হ ।
ম॒খায়॑ ত্বা ম॒খস্য়॑ ত্বা শী॒র্ষ্ণ ইত্য়া॑হ ।
নি॒র্দিশ্য়ৈ॒বৈন॑দ্ধরতি ॥ 14 ॥
ত্রির্হ॑রতি । ত্রয়॑ ই॒মে লো॒কাঃ । এ॒ভ্য় এ॒ব লো॒কেভ্য়ো॑ য॒জ্ঞস্য়॒ শির॒-স্সম্ভ॑রতি । তূ॒ষ্ণী-ঞ্চ॑তু॒র্থগ্ম্ হ॑রতি । অপ॑রিমিতাদে॒ব য॒জ্ঞস্য়॒ শির॒-স্সম্ভ॑রতি ।
মৃ॒ত্খ॒নাদগ্রে॑ হরতি । তস্মা᳚-ন্মৃত্খ॒নঃ ক॑রু॒ণ্য়॑তমঃ । ইয়॒ত্যগ্র॑ আসী॒রিত্য়া॑হ । অ॒স্য়ামে॒বাছ॑ম্বট্কারং-য়ঁ॒জ্ঞস্য়॒ শির॒-স্সম্ভ॑রতি । ঊর্জ॒ম্ ঁবা এ॒তগ্ম্ রস॑-ম্পৃথি॒ব্য়া উ॑প॒দীকা॒ উদ্দি॑হন্তি ॥ 15 ॥
য-দ্ব॒ল্মীক᳚ম্ । য-দ্ব॑ল্মীকব॒পা স॑ম্ভা॒রো ভব॑তি ।
ঊর্জ॑মে॒ব রস॑-ম্পৃথি॒ব্য়া অব॑রুন্ধে । অথো॒ শ্রোত্র॑মে॒ব । শ্রোত্র॒গ্গ্॒ হ্য়ে॑ত-ত্পৃ॑থি॒ব্য়াঃ । য-দ্ব॒ল্মীকঃ॑ । অব॑ধিরো ভবতি । য এ॒বং-বেঁদ॑ । ইন্দ্রো॑ বৃ॒ত্রায়॒ বজ্র॒মুদ॑যচ্ছত্ ।
স যত্র॑যত্র প॒রাক্র॑মত ॥ 16 ॥
তন্নাদ্ধ্রি॑যত । স পূ॑তীকস্ত॒ম্বে পরা᳚ক্রমত । সো᳚-ঽদ্ধ্রিযত । সো᳚-ঽব্রবীত্ । ঊ॒তিং-বৈঁ মে॑ ধা॒ ইতি॑ । তদূ॒তীকা॑না-মূতীক॒ত্বম্ । যদূ॒তীকা॒ ভব॑ন্তি ।
য॒জ্ঞায়ৈ॒বোতি-ন্দ॑ধতি । অ॒গ্নি॒জা অ॑সি প্র॒জাপ॑তে॒ রেত॒ ইত্য়া॑হ । য এ॒ব রসঃ॑ প॒শূ-ন্প্রাবি॑শত্ ॥ 17 ॥
তমে॒বাব॑রুন্ধে । পঞ্চৈ॒তে স॑ম্ভা॒রা ভ॑বন্তি । পাঙ্ক্তো॑ য॒জ্ঞঃ । যাবা॑নে॒ব য॒জ্ঞঃ । তস্য়॒ শির॒-স্সম্ভ॑রতি । যদ্গ্রা॒ম্য়াণা᳚-ম্পশূ॒নাঞ্চর্ম॑ণা স॒ম্ভরে᳚ত্ । গ্রা॒ম্য়া-ন্প॒শূঞ্ছু॒চা-ঽর্প॑য়েত্ । কৃ॒ষ্ণা॒জি॒নেন॒ সম্ভ॑রতি । আ॒র॒ণ্য়ানে॒ব প॒শূঞ্ছু॒চা-ঽর্প॑যতি । তস্মা᳚-থ্স॒মাব॑ত্-পশূ॒না-ম্প্র॒জায়॑মানানাম্ ॥ 18 ॥
আ॒র॒ণ্য়াঃ প॒শবঃ॒ কনী॑য়াগ্ম্সঃ । শু॒চা হ্য়ৃ॑তাঃ ।
লো॒ম॒ত-স্সম্ভ॑রতি । অতো॒ হ্য়॑স্য়॒ মেদ্ধ্য়᳚ম্ । প॒রি॒গৃহ্য়া য॑ন্তি । রক্ষ॑সা॒মপ॑হত্য়ৈ ।
ব॒হবো॑ হরন্তি । অপ॑চিতিমে॒বাস্মি॑-ন্দধতি ।
উদ্ধ॑তে॒ সিক॑তোপোপ্তে॒ পরি॑শ্রিতে॒ নিদ॑ধতি॒ শান্ত্য়ৈ᳚ ।
মদ॑ন্তীভি॒রুপ॑ সৃজতি ॥ 19 ॥
তেজ॑ এ॒বাস্মি॑-ন্দধাতি । মধু॑ ত্বা মধু॒লা ক॑রো॒ত্বিত্য়া॑হ । ব্রহ্ম॑ণৈ॒বাস্মি॒ন্ -তেজো॑ দধাতি ।
যদ্গ্রা॒ম্য়াণা॒-ম্পাত্রা॑ণা-ঙ্ক॒পালৈ᳚-স্সগ্ম্সৃ॒জেত্ ।
গ্রা॒ম্য়াণি॒ পাত্রা॑ণি শু॒চা-ঽর্প॑য়েত্ । অ॒র্ম॒ক॒পা॒লৈ-স্সগ্ম্সৃ॑জতি । এ॒তানি॒ বা অ॑নুপজীবনী॒য়ানি॑ । তান্য়ে॒ব শু॒চা-ঽর্প॑যতি ।
শর্ক॑রাভি॒-স্সগ্ম্সৃ॑জতি॒ ধৃত্য়ৈ᳚ । অথো॑ শ॒ন্ত্বায়॑ । অ॒জ॒লো॒মৈ-স্সগ্ম্সৃ॑জতি । এ॒ষা বা অ॒গ্নেঃ প্রি॒য়া ত॒নূঃ । যদ॒জা । প্রি॒যয়ৈ॒বৈন॑-ন্ত॒নুবা॒ সগ্ম্সৃ॑জতি । অথো॒ তেজ॑সা । কৃ॒ষ্ণা॒জি॒নস্য়॒ লোম॑ভি॒-স্সগ্ম্সৃ॑জতি । য॒জ্ঞো বৈ কৃ॑ষ্ণাজি॒নম্ ।
য॒জ্ঞেনৈ॒ব য॒জ্ঞগ্ম্ সগ্ম্সৃ॑জতি ॥ 20 ॥
(য়া॒জা॑য়ৈ॒ - ন জু॑হু॒য়া - দবি॑শ॒-দ্- বেণঃ॒ - শান্ত্য়ৈ॑ - প॒ঙ্ক্তিরা॑ধস॒মিত্য়া॑হ - হরতি - দিহন্তি - প॒রাক্র॑ম॒ - তাবি॑শত্ - প্র॒জায়॑মানানাগ্ম্ - সৃজতি - শ॒ন্ত্বায়া॒ ষ্টৌ চ॑) (অ. 2)
অনুবাকং 3
পরি॑শ্রিতে করোতি । ব্র॒হ্ম॒ব॒র্চ॒সস্য়॒ পরি॑গৃহীত্য়ৈ । ন কু॒র্বন্ন॒ভি প্রা᳚ণ্য়াত্ । য-ত্কু॒র্বন্ন॑ভি প্রা॒ণ্য়াত্ । প্রা॒ণাঞ্ছু॒চা-ঽর্প॑য়েত্ । অ॒প॒হায়॒ প্রাণি॑তি ।
প্রা॒ণানা᳚-ঙ্গোপী॒থায়॑ । ন প্র॑ব॒র্গ্য়॑ম্-চাদি॒ত্যম্-চা॒ন্তরে॑য়াত্ । যদ॑ন্তরে॒য়াত্ । দু॒শ্চর্মা᳚ স্য়াত্ ॥ 21 ॥
তস্মা॒ন্নান্ত॒রায়্য়᳚ম্ । আ॒ত্মনো॑ গোপী॒থায়॑ । বেণু॑না করোতি । তেজো॒ বৈ বেণুঃ॑ । তেজঃ॑ প্রব॒র্গ্য়ঃ॑ । তেজ॑সৈ॒ব তেজ॒-স্সম॑র্ধযতি । ম॒খস্য়॒ শিরো॒-ঽসীত্য়া॑হ । য॒জ্ঞো বৈ ম॒খঃ । তস্য়ৈ॒তচ্ছিরঃ॑ । য-ত্প্র॑ব॒র্গ্য়ঃ॑ ॥ 22 ॥
তস্মা॑দে॒বমা॑হ । য॒জ্ঞস্য়॑ প॒দে স্থ॒ ইত্য়া॑হ । য॒জ্ঞস্য়॒ হ্য়ে॑তে প॒দে । অথো॒ প্রতি॑ষ্ঠিত্য়ৈ । গা॒য়॒ত্রেণ॑ ত্বা॒ ছন্দ॑সা করো॒মীত্য়া॑হ ।
ছন্দো॑ভিরে॒বৈন॑-ঙ্করোতি । ত্র্য়ু॑দ্ধি-ঙ্করোতি । ত্রয়॑ ই॒মে লো॒কাঃ । এ॒ষাম্ ঁলো॒কানা॒মাপ্ত্য়ৈ᳚ । ছন্দো॑ভিঃ করোতি ॥ 23 ॥
বী॒র্য়॑ম্ ঁবৈ ছন্দাগ্ম্॑সি । বী॒র্য়ে॑ণৈ॒বৈন॑-ঙ্করোতি ।
যজু॑ষা॒ বিল॑-ঙ্করোতি॒ ব্য়াবৃ॑য়ৈ । ইয়॑ন্ত-ঙ্করোতি ।
প্র॒জাপ॑তিনা যজ্ঞমু॒খেন॒ সম্মি॑তম্ । ইয়॑ন্ত-ঙ্করোতি ।
য॒জ্ঞ॒প॒রুষা॒ সম্মি॑তম্ । ইয়॑ন্ত-ঙ্করোতি ।
এ॒তাব॒দ্বৈ পুরু॑ষে বী॒র্য়᳚ম্ । বী॒র্য়॑সম্মিতম্ ॥ 24 ॥
অপ॑রিমিত-ঙ্করোতি । অপ॑রিমিত॒স্য়াব॑রুদ্ধ্য়ৈ । প॒রি॒গ্রী॒ব-ঙ্ক॑রোতি॒ ধৃত্য়ৈ᳚ । সূর্য়॑স্য়॒ হর॑সা শ্রা॒য়েত্য়া॑হ । য॒থা॒য়॒জুরে॒বৈতত্ । অ॒শ্ব॒শ॒কেন॑ ধূপযতি । প্রা॒জা॒প॒ত্য়ো বা অশ্ব॑-স্সয়োনি॒ত্বায়॑ । বৃষ্ণো॒ অশ্ব॑স্য় নি॒ষ্পদ॒সীত্য়া॑হ ।
অ॒সৌ বা আ॑দি॒ত্য়ো বৃষা-ঽশ্বঃ॑ । তস্য়॒ ছন্দাগ্ম্॑সি নি॒ষ্পত্ ॥ 25 ॥
ছন্দো॑ভিরে॒বৈন॑-ন্ধূপযতি । অ॒র্চিষে᳚ ত্বা শো॒চিষে॒ ত্বেত্য়া॑হ । তেজ॑ এ॒বাস্মি॑-ন্দধাতি । বা॒রু॒ণো॑-ঽভীদ্ধঃ॑ । মৈ॒ত্রিয়োপৈ॑তি॒ শান্ত্য়ৈ᳚ । সিদ্ধ্য়ৈ॒ ত্বেত্য়া॑হ । য॒থা॒য়॒জুরে॒বৈতত্ । দে॒বস্ত্বা॑ সবি॒তোদ্ব॑প॒ত্বিত্য়া॑হ ।
স॒বি॒তৃপ্র॑সূত এ॒বৈন॒-ম্ব্রহ্ম॑ণা দে॒বতা॑ভি॒রুদ্ব॑পতি । অপ॑দ্যমানঃ পৃথি॒ব্য়ামাশা॒ দিশ॒ আপৃ॒ণেত্য়া॑হ ॥ 26 ॥
তস্মা॑দ॒গ্নি-স্সর্বা॒ দিশো-ঽনু॒ বিভা॑তি ।
উত্তি॑ষ্ঠ বৃ॒হন্-ভ॑বো॒র্ধ্বস্তি॑ষ্ঠ ধ্রু॒বস্ত্বমিত্য়া॑হ॒ প্রতি॑ষ্ঠিত্য়ৈ ।
ঈ॒শ্ব॒রো বা এ॒ষো᳚-ঽন্ধো ভবি॑তোঃ ।
যঃ প্র॑ব॒র্গ্য়॑ম॒ন্বীক্ষ॑তে । সূর্য়॑স্য় ত্বা॒ চক্ষু॒ষা-ঽন্বী᳚ক্ষ॒ ইত্য়া॑হ ।
চক্ষু॑ষো গোপী॒থায়॑ । ঋ॒জবে᳚ ত্বা সা॒ধবে᳚ ত্বা সুক্ষি॒ত্য়ৈ ত্বা॒ ভূত্য়ৈ॒ ত্বেত্য়া॑হ । ই॒য়ং-বাঁ ঋ॒জুঃ । অ॒ন্তরি॑ক্ষগ্ম্ সা॒ধু । অ॒সৌ সু॑ক্ষি॒তিঃ ॥ 27 ॥
দিশো॒ ভূতিঃ॑ । ই॒মানে॒বাস্মৈ॑ লো॒কান্ ক॑ল্পযতি । অথো॒ প্রতি॑ষ্ঠিত্য়ৈ । ই॒দ-ম॒হ-ম॒মুমা॑মুষ্য়ায়॒ণম্ ঁবি॒শা প॒শুভি॑-র্ব্রহ্মবর্চ॒সেন॒ পর্য়ূ॑হা॒মীত্য়া॑হ ।
বি॒শৈবৈন॑-ম্প॒শুভি॑-র্ব্রহ্মবর্চ॒সেন॒ পর্য়ূ॑হতি ।
বি॒শেতি॑ রাজ॒ন্য়॑স্য় ব্রূয়াত্ । বি॒শৈবৈন॒-ম্পর্য়ূ॑হতি । প॒শুভি॒রিতি॒ বৈশ্য়॑স্য় । প॒শুভি॑রে॒বৈন॒-ম্পর্য়ূ॑হতি । অ॒সু॒র্য়॑-ম্পাত্র॒মনা᳚চ্ছৃণ্ণম্ ॥ 28 ॥
আচ্ছৃ॑ণত্তি । দে॒ব॒ত্রা-ঽকঃ॑ । অ॒জ॒ক্ষী॒রেণাচ্ছৃ॑ণত্তি ।
প॒র॒মং-বাঁ এ॒ত-ত্পয়ঃ॑ । যদ॑জক্ষী॒রম্ । প॒র॒মেণৈ॒বৈন॒-ম্পয়॒সা-ঽঽচ্ছৃ॑ণত্তি ।
যজু॑ষা॒ ব্য়াবৃ॑ত্ত্য়ৈ । ছন্দো॑ভি॒রাচ্ছৃ॑ণত্তি । ছন্দো॑ভি॒র্বা এ॒ষ ক্রি॑যতে । ছন্দো॑ভিরে॒ব ছন্দা॒গ্॒স্য়াচ্ছৃ॑ণত্তি । ছৃ॒ন্ধি বাচ॒মিত্য়া॑হ ।
বাচ॑মে॒বাব॑রুন্ধে । ছৃ॒ন্ধ্য়ূর্জ॒মিত্য়া॑হ । ঊর্জ॑মে॒বাব॑রুন্ধে । ছৃ॒ন্ধি হ॒বিরিত্য়া॑হ । হ॒বিরে॒বাকঃ॑ । দেব॑ পুরশ্চর স॒ঘ্য়াস॒ন্ত্বেত্য়া॑হ ।
য॒থা॒য়॒জুরে॒বৈতত্ ॥ 29 ॥
(স্য়া॒-দ্য়-ত্প্র॑ব॒র্গ্য়ঃ॑ - ছন্দো॑ভিঃ করোতি - বী॒র্য়॑ সম্মিত॒ম্ - ছন্দাগ্ম্॑সি নি॒ষ্পত্ - পৃ॒ণেত্য়া॑হ - সুক্ষি॒তি - রনা᳚চ্ছৃণ্ণ॒ম্ - ছন্দা॒গ্॒স্য়াচ্ছৃ॑ণ ত্ত্য়॒ষ্টৌ চ॑) (অ. 3)
অনুবাকং 4
ব্রহ্ম॒-ন্প্রচ॑রিষ্য়ামো॒ হোত॑-র্ঘ॒র্মম॒ভিষ্টু॒হীত্য়া॑হ ।
এ॒ষ বা এ॒তর্হি॒ বৃহ॒স্পতিঃ॑ । যদ্ব্র॒হ্মা ।
তস্মা॑ এ॒ব প্র॑তি॒প্রোচ্য়॒ প্রচ॑রতি ।
আ॒ত্মনো-ঽনা᳚র্ত্য়ৈ । য॒মায়॑ ত্বা ম॒খায়॒ ত্বেত্য়া॑হ ।
এ॒তা বা এ॒তস্য়॑ দে॒বতাঃ᳚ । তাভি॑রে॒বৈন॒গ্ম্॒ সম॑র্ধযতি । মদ॑ন্তীভিঃ॒ প্রোক্ষ॑তি । তেজ॑ এ॒বাস্মি॑-ন্দধাতি ॥ 30 ॥
অ॒ভি॒পূ॒র্ব-ম্প্রোক্ষ॑তি । অ॒ভি॒পূ॒র্ব-মে॒বাস্মি॒ন্-তেজো॑ দধাতি । ত্রিঃ প্রোক্ষ॑তি । ত্র্য়া॑বৃ॒দ্ধি য॒জ্ঞঃ । অথো॑ মেদ্ধ্য়॒ত্বায়॑ । হোতা-ঽন্বা॑হ । রক্ষ॑সা॒মপ॑হত্য়ৈ । অন॑বানম্ । প্রা॒ণানা॒গ্ম্॒ সন্ত॑ত্য়ৈ ।
ত্রি॒ষ্টুভ॑-স্স॒তী-র্গা॑য়॒ত্রীরি॒বান্বা॑হ ॥ 31 ॥
গা॒য়॒ত্রো হি প্রা॒ণঃ । প্রা॒ণমে॒ব যজ॑মানে দধাতি । সন্ত॑ত॒মন্বা॑হ । প্রা॒ণানা॑ম॒ন্নাদ্য়॑স্য়॒ সন্ত॑ত্য়ৈ । অথো॒ রক্ষ॑সা॒মপ॑হত্য়ৈ । য-ত্পরি॑মিতা অনুব্রূ॒য়াত্ । পরি॑মিত॒মব॑রুন্ধীত । অপ॑রিমিতা॒ অন্বা॑হ ।
অপ॑রিমিত॒স্য়াব॑রুদ্ধ্য়ৈ । শিরো॒ বা এ॒ত-দ্য়॒জ্ঞস্য়॑ ॥ 32 ॥
য-ত্প্র॑ব॒র্গ্য়ঃ॑ । ঊংর্মুঞ্জাঃ᳚ । য-ন্মৌ॒ঞ্জো বে॒দো ভব॑তি । ঊ॒র্জৈব য॒জ্ঞস্য়॒ শির॒-স্সম॑র্ধযতি । প্রা॒ণা॒হু॒তী-র্জু॑হোতি । প্রা॒ণানে॒ব যজ॑মানে দধাতি । স॒প্ত জু॑হোতি । স॒প্ত বৈ শী॑র্ষ॒ণ্য়াঃ᳚ প্রা॒ণাঃ । প্রা॒ণানে॒বাস্মি॑-ন্দধাতি । দে॒বস্ত্বা॑ সবি॒তা মদ্ধ্বা॑-ঽন॒ক্ত্বিত্য়া॑হ ॥ 33 ॥
তেজ॑সৈ॒বৈন॑মনক্তি । পৃ॒থি॒বী-ন্তপ॑সস্ত্রায়॒স্বেতি॒ হির॑ণ্য়॒মুপা᳚স্যতি । অ॒স্য়া অন॑তিদাহায় । শিরো॒ বা এ॒ত-দ্য়॒জ্ঞস্য়॑ । য-ত্প্র॑ব॒র্গ্য়ঃ॑ । অ॒গ্নি-স্সর্বা॑ দে॒বতাঃ᳚ । প্র॒ল॒বানা॒দীপ্য়োপা᳚স্যতি । দে॒বতা᳚স্বে॒ব য॒জ্ঞস্য়॒ শিরঃ॒ প্রতি॑দধাতি । অপ্র॑তিশীর্ণাগ্র-ম্ভবতি ।
এ॒ত-দ্ব॑র্হি॒র্হ্য়ে॑ষঃ ॥ 34 ॥
অ॒র্চির॑সি শো॒চির॒সীত্য়া॑হ । তেজ॑ এ॒বাস্মি॑-ন্ব্রহ্মবর্চ॒স-ন্দ॑ধাতি । সগ্ম্সী॑দস্ব ম॒হাগ্ম্ অ॒সীত্য়া॑হ । ম॒হান্. হ্য়ে॑ষঃ । ব্র॒হ্ম॒বা॒দিনো॑ বদন্তি ।
এ॒তে বাব ত ঋ॒ত্বিজঃ॑ । যে দ॑র্শপূর্ণমা॒সয়োঃ᳚ ।
অথ॑ ক॒থা হোতা॒ যজ॑মানায়া॒শিষো॒ নাশা᳚স্ত॒ ইতি॑ ।
পু॒রস্তা॑দাশীঃ॒ খলু॒ বা অ॒ন্য়ো য॒জ্ঞঃ । উ॒পরি॑ষ্টাদাশীর॒ন্য়ঃ ॥ 35 ॥
অ॒না॒ধৃ॒ষ্য়া পু॒রস্তা॒দিতি॒ যদে॒তানি॒ যজূ॒গ্॒ষ্য়াহ॑ । শী॒র্॒ষ॒ত এ॒ব য॒জ্ঞস্য়॒ যজ॑মান আ॒শিষো-ঽব॑রুন্ধে । আয়ুঃ॑ পু॒রস্তা॑দাহ । প্র॒জা-ন্দ॑ক্ষিণ॒তঃ । প্রা॒ণ-ম্প॒শ্চাত্ ।
শ্রোত্র॑মুত্তর॒তঃ । বিধৃ॑তিমু॒পরি॑ষ্টাত্ । প্রা॒ণানে॒বাস্মৈ॑ স॒মীচো॑ দধাতি ।
ঈ॒শ্ব॒রো বা এ॒ষ দিশো-ঽনূন্ম॑দিতোঃ ।
যন্দিশো-ঽনু॑ ব্য়াস্থা॒পয়॑ন্তি ॥ 36 ॥
মনো॒রশ্বা॑-ঽসি॒ ভূরি॑পু॒ত্রেতী॒মা-ম॒ভিমৃ॑শতি ।
ই॒য়ং-বৈঁ মনো॒রশ্বা॒ ভূরি॑পুত্রা । অ॒স্য়ামে॒ব প্রতি॑তিষ্ঠ॒ত্যনু॑ন্মাদায় । সূ॒প॒সদা॑ মে ভূয়া॒ মা মা॑ হিগ্ম্সী॒রিত্য়া॒হাহিগ্ম্॑সায়ৈ ।
চিত॑-স্স্থ পরি॒চিত॒ ইত্য়া॑হ । অপ॑চিতিমে॒বাস্মি॑-ন্দধাতি । শিরো॒ বা এ॒ত-দ্য়॒জ্ঞস্য়॑ । য-ত্প্র॑ব॒র্গ্য়ঃ॑ ।
অ॒সৌ খলু॒ বা আ॑দি॒ত্য়ঃ প্র॑ব॒র্গ্য়ঃ॑ । তস্য়॑ ম॒রুতো॑ র॒শ্ময়ঃ॑ ॥ 37 ॥
স্বাহা॑ ম॒রুদ্ভিঃ॒ পরি॑শ্রয়॒স্বেত্য়া॑হ । অ॒মুমে॒বাদি॒ত্য়গ্ম্ র॒শ্মিভিঃ॒ পর্য়ূ॑হতি ।
তস্মা॑-দ॒সাবা॑দি॒ত্য়ো॑-ঽমুষ্মি॑ন্ ঁলো॒কে র॒শ্মিভিঃ॒ পর্য়ূ॑ঢঃ । তস্মা॒-দ্রাজা॑ বি॒শা পর্য়ূ॑ঢঃ । তস্মা᳚-দ্গ্রাম॒ণী-স্স॑জা॒তৈঃ পর্য়ূ॑ঢঃ । অ॒গ্নে-স্সৃ॒ষ্টস্য়॑ য॒তঃ । বিক॑ঙ্কত॒-ম্ভা আ᳚র্চ্ছত্ ।
য-দ্বৈক॑ঙ্কতাঃ পরি॒ধয়ো॒ ভব॑ন্তি ।
ভা এ॒বাব॑রুন্ধে । দ্বাদ॑শ ভবন্তি ॥ 38 ॥
দ্বাদ॑শ॒ মাসা᳚-স্সংবঁথ্স॒রঃ । সং॒বঁ॒থ্স॒রমে॒বাব॑রুন্ধে ।
অস্তি॑ ত্রয়োদ॒শো মাস॒ ইত্য়া॑হুঃ । য-ত্ত্র॑য়োদ॒শঃ প॑রি॒ধির্ভব॑তি । তেনৈ॒ব ত্র॑য়োদ॒শ-ম্মাস॒মব॑রুন্ধে । অ॒ন্তরি॑ক্ষস্য়ান্ত॒-র্ধির॒সীত্য়া॑হ॒ ব্য়াবৃ॑ত্ত্য়ৈ । দিব॒-ন্তপ॑সস্ত্রায়॒স্বে-ত্য়ু॒পরি॑ষ্টা॒-দ্ধির॑ণ্য়॒মধি॒ নিদ॑ধাতি । অ॒মুষ্য়া॒ অন॑তিদাহায় । অথো॑ আ॒ভ্য়ামে॒বৈন॑মুভ॒যতঃ॒ পরি॑গৃহ্ণাতি ।
অর্হ॑-ন্বিভর্ষি॒ সায়॑কানি॒ ধন্বেত্য়া॑হ ॥ 39 ॥
স্তৌত্য়ে॒বৈন॑মে॒তত্ । গা॒য়॒ত্রম॑সি॒ ত্রৈষ্টু॑ভমসি॒ জাগ॑তম॒সীতি॑ ধ॒বিত্রা॒ণ্য়াদ॑ত্তে । ছন্দো॑ভিরে॒বৈনা॒ন্য়াদ॑ত্তে । মধু॒ মদ্ধ্বিতি॑ ধূনোতি । প্রা॒ণো বৈ মধু॑ । প্রা॒ণমে॒ব যজ॑মানে দধাতি । ত্রিঃ পরি॑যন্তি । ত্রি॒বৃদ্ধি প্রা॒ণঃ ।
ত্রিঃ পরি॑যন্তি । ত্র্য়া॑বৃ॒দ্ধি য॒জ্ঞঃ ॥ 40 ॥
অথো॒ রক্ষ॑সা॒মপ॑হত্য়ৈ । ত্রিঃ পুনঃ॒ পরি॑যন্তি ।
ষট্-থ্সম্প॑দ্যন্তে । ষড্বা ঋ॒তবঃ॑ । ঋ॒তুষ্বে॒ব প্রতি॑তিষ্ঠন্তি । যো বৈ ঘ॒র্মস্য়॑ প্রি॒য়ান্-ত॒নুব॑মা॒ক্রাম॑তি । দু॒শ্চর্মা॒ বৈ স ভ॑বতি ।
এ॒ষ হ॒ বা অ॑স্য় প্রি॒য়া-ন্ত॒নুব॒মাক্রা॑মতি ।
য স্ত্রিঃ প॒রীত্য়॑ চতু॒র্থ-ম্পর্য়ে॑তি ।
এ॒তাগ্ম্ হ॒ বা অ॑স্য়ো॒গ্রদে॑বো॒ রাজ॑নি॒রাচ॑ক্রাম ॥ 41 ॥
ততো॒ বৈ স দু॒শ্চর্মা॑-ঽভবত্ । তস্মা॒-ত্ত্রিঃ প॒রীত্য়॒ ন চ॑তু॒র্থ-ম্পরী॑য়াত্ । আ॒ত্মনো॑ গোপী॒থায়॑ । প্রা॒ণা বৈ ধ॒বিত্রা॑ণি । অব্য়॑তিষঙ্গ-ন্ধূন্বন্তি ।
প্রা॒ণানা॒-মব্য়॑তিষঙ্গায়॒ ক্লৃপ্ত্য়ৈ᳚ । বি॒নি॒ষদ্য়॑ ধূন্বন্তি । দি॒ক্ষ্বে॑ব প্রতি॑তিষ্ঠন্তি । ঊ॒র্ধ্বন্ধূ᳚ন্বন্তি । সু॒ব॒র্গস্য়॑ লো॒কস্য়॒ সম॑ষ্ট্য়ৈ । স॒র্বতো॑ ধূন্বন্তি ।
তস্মা॑দ॒য়গ্ম্ স॒র্বতঃ॑ পবতে ॥ 42 ॥
(দ॒ধা॒- তী॒বান্বা॑হ - য॒জ্ঞ - স্য়া॑হৈ॒ - ষ - উ॒পরি॑ষ্টাদাশীর॒ন্য়ো - ব্য়া᳚স্থা॒পয়॑ন্তি - র॒শ্ময়ো॑ - ভবন্তি॒ - ধন্বেত্য়া॑হ - য॒জ্ঞ - শ্চ॑ক্রাম॒ - সম॑ষ্ট্য়ৈ॒ দ্বে চ॑) (অ. 4)
অনুবাকং 5
অ॒গ্নিষ্ট্বা॒ বসু॑ভিঃ পু॒রস্তা᳚-দ্রোচযতু গায়॒ত্রেণ॒ ছন্দ॒সেত্য়া॑হ । অ॒গ্নিরে॒বৈনং॒-বঁসু॑ভিঃ পু॒রস্তা᳚-দ্রোচযতি গায়॒ত্রেণ॒ ছন্দ॑সা । স মা॑ রুচি॒তো রো॑চ॒য়েত্য়া॑হ । আ॒শিষ॑মে॒বৈতামাশা᳚স্তে ।
ইন্দ্র॑স্ত্বা রু॒দ্রৈ-র্দ॑ক্ষিণ॒তো রো॑চযতু॒ ত্রৈষ্টু॑ভেন॒
ছন্দ॒সেত্য়া॑হ । ইন্দ্র॑ এ॒বৈনগ্ম্॑ রু॒দ্রৈ-র্দ॑ক্ষিণ॒তো রো॑চযতি॒ ত্রৈষ্টু॑ভেন॒ ছন্দ॑সা । স মা॑ রুচি॒তো রো॑চ॒য়েত্য়া॑হ । আ॒শিষ॑মে॒বৈতামাশা᳚স্তে ।
বরু॑ণস্ত্বা-ঽঽদি॒ত্য়ৈঃ প॒শ্চা-দ্রো॑চযতু॒ জাগ॑তেন॒ ছন্দ॒সেত্য়া॑হ । বরু॑ণ এ॒বৈন॑মাদি॒ত্য়ৈঃ প॒শ্চা-দ্রো॑চযতি॒ জাগ॑তেন॒ ছন্দ॑সা ॥ 43 ॥
স মা॑ রুচি॒তো রো॑চ॒য়েত্য়া॑হ । আ॒শিষ॑মে॒বৈতামাশা᳚স্তে ।
দ্য়ু॒তা॒নস্ত্বা॑ মারু॒তো ম॒রুদ্ভি॑রুত্তর॒তো রো॑চয়॒ত্বানু॑ষ্টুভেন॒ ছন্দ॒সেত্য়া॑হ ।
দ্য়ু॒তা॒ন এ॒বৈন॑-ম্মারু॒তো ম॒রুদ্ভি॑রুত্তর॒তো রো॑চয়॒ত্য়ানু॑ষ্টুভেন॒ ছন্দ॑সা ।
স মা॑ রুচি॒তো রো॑চ॒য়েত্য়া॑হ । আ॒শিষ॑মে॒বৈতামাশা᳚স্তে ।
বৃহ॒স্পতি॑স্ত্বা॒ বিশ্বৈ᳚-র্দে॒বৈরু॒পরি॑ষ্টা-দ্রোচযতু॒ পাঙ্ক্তে॑ন॒ ছন্দ॒সেত্য়া॑হ ।
বৃহ॒স্পতি॑রে॒বৈন॒ম্ ঁবিশ্বৈ᳚-র্দে॒বৈরু॒পরি॑ষ্টা-দ্রোচযতি॒ পাঙ্ক্তে॑ন॒ ছন্দ॑সা ।
স মা॑ রুচি॒তো রো॑চ॒য়েত্য়া॑হ । আ॒শিষ॑মে॒বৈতামাশা᳚স্তে ॥ 44 ॥
রো॒চি॒তস্ত্ব-ন্দে॑ব ঘর্ম দে॒বেষ্বসীত্য়া॑হ । রো॒চি॒তো হ্য়ে॑ষ দে॒বেষু॑ । রো॒চি॒ষী॒য়াহ-ম্ম॑নু॒ষ্য়ে᳚ষ্বিত্য়া॑হ । রোচ॑ত এ॒বৈষ ম॑নু॒ষ্য়ে॑ষু । সম্রা᳚ড্ ঘর্ম রুচি॒তস্ত্ব-ন্দে॒বেষ্বায়ু॑ষ্মাগ্ স্তেজ॒স্বী ব্র॑হ্মবর্চ॒স্য়॑সীত্য়া॑হ ।
রু॒চি॒তো হ্য়ে॑ষ দে॒বেষ্বায়ু॑ষ্মাগ্ স্তেজ॒স্বী ব্র॑হ্মবর্চ॒সী ।
রু॒চি॒তো॑-ঽহ-ম্ম॑নু॒ষ্য়ে᳚ষ্বায়ু॑ষ্মাগ্ স্তেজ॒স্বী ব্র॑হ্মবর্চ॒সী ভূ॑য়াস॒মিত্য়া॑হ ।
রু॒চি॒ত এ॒বৈষ ম॑নু॒ষ্য়ে᳚ষ্বায়ু॑ষ্মাগ্ স্তেজ॒স্বী ব্র॑হ্মবর্চ॒সী ভ॑বতি । রুগ॑সি॒ রুচ॒-ম্ময়ি॑ ধেহি॒ ময়ি॒ রুগিত্য়া॑হ । আ॒শিষ॑মে॒বৈতামাশা᳚স্তে ।
তং-য়ঁদে॒তৈ-র্যজু॑র্ভি॒ররো॑চয়িত্বা । রু॒চি॒তো ঘ॒র্ম ইতি॑ প্রব্রূ॒য়াত্ । অরো॑চুকো-ঽদ্ধ্ব॒র্য়ু-স্স্য়াত্ ।
অরো॑চুকো॒ যজ॑মানঃ । অথ॒ যদে॑নমে॒তৈর্যজু॑র্ভী রোচয়ি॒ত্বা । রু॒চি॒তো ঘর্ম॒ ইতি॒ প্রাহ॑ । রোচু॑কো-ঽদ্ধ্ব॒র্য়ু-র্ভব॑তি । রোচু॑কো॒ যজ॑মানঃ ॥ 45 ॥
(প॒শ্চা-দ্রো॑চযতি॒ জগ॑তেন॒ ছন্দ॑সা॒ - পাঙ্ক্তে॑ন॒ ছন্দ॑সা॒ স মা॑ রুচি॒তো রো॑চ॒য়েত্য়া॑হা॒শিষ॑মে॒বৈতামাশা᳚স্তে - শাস্তে॒ ঽষ্টৌ চ॑) (অ. 5)
অনুবাকং 6
শিরো॒ বা এ॒ত-দ্য়॒জ্ঞস্য়॑ । য-ত্প্র॑ব॒র্গ্য়ঃ॑ । গ্রী॒বা উ॑প॒সদঃ॑ । পু॒রস্তা॑দুপ॒সদা᳚-ম্প্রব॒র্গ্য়॑-ম্প্রবৃ॑ণক্তি । গ্রী॒বাস্বে॒ব য॒জ্ঞস্য়॒ শিরঃ॒ প্রতি॑দধাতি । ত্রিঃ প্রবৃ॑ণক্তি । ত্রয়॑ ই॒মে লো॒কাঃ । এ॒ভ্য় এ॒ব লো॒কেভ্য়ো॑ য॒জ্ঞস্য়॒ শিরো-ঽব॑রুন্ধে ।
ষট্-থ্সম্প॑দ্যন্তে । ষড্বা ঋ॒তবঃ॑ ॥ 46 ॥
ঋ॒তুভ্য়॑ এ॒ব য॒জ্ঞস্য়॒ শিরো-ঽব॑রুন্ধে । দ্বাদ॑শ॒ কৃত্বঃ॒ প্রবৃ॑ণক্তি । দ্বাদ॑শ॒ মাসা᳚-স্সংবঁথ্স॒রঃ । সং॒বঁ॒থ্স॒রাদে॒ব য॒জ্ঞস্য়॒ শিরো-ঽব॑রুন্ধে । চতু॑র্বিগ্ম্শতি॒-স্সম্প॑দ্যন্তে । চতু॑র্বিগ্ম্শতিরর্ধমা॒সাঃ ।
অ॒র্ধ॒মা॒সেভ্য়॑ এ॒ব য॒জ্ঞস্য়॒ শিরো-ঽব॑রুন্ধে । অথো॒ খলু॑ । স॒কৃদে॒ব প্র॒বৃজ্য়ঃ॑ । এক॒গ্ম্॒ হি শিরঃ॑ ॥ 47 ॥
অ॒গ্নি॒ষ্টো॒মে প্রবৃ॑ণক্তি । এ॒তাবা॒ন্॒. বৈ য॒জ্ঞঃ । যাবা॑নগ্নিষ্টো॒মঃ । যাবা॑নে॒ব য॒জ্ঞঃ । তস্য়॒ শিরঃ॒ প্রতি॑দধাতি । নোক্থ্য়ে᳚ প্রবৃ॑ঞ্জ্য়াত্ ।
প্র॒জা বৈ প॒শব॑ উ॒ক্থানি॑ । যদু॒ক্থ্য়ে᳚ প্রবৃ॒ঞ্জ্য়াত্ ।
প্র॒জা-ম্প॒শূন॑স্য়॒ নির্দ॑হেত্ । বি॒শ্ব॒জিতি॒ সর্ব॑পৃষ্ঠে॒ প্রবৃ॑ণক্তি ॥ 48 ॥
পৃ॒ষ্ঠানি॒ বা অচ্য়ু॑তঞ্চ্য়াবযন্তি ।
পৃ॒ষ্ঠৈরে॒বাস্মা॒ অচ্য়ু॑তঞ্চ্য়াবয়ি॒ত্বা-ঽব॑রুন্ধে । অপ॑শ্য়-ঙ্গো॒পামিত্য়া॑হ । প্রা॒ণো বৈ গো॒পাঃ । প্রা॒ণমে॒ব প্র॒জাসু॒ বিয়া॑তযতি ।
অপ॑শ্য়-ঙ্গো॒পামিত্য়া॑হ । অ॒সৌ বা আ॑দি॒ত্য়ো গো॒পাঃ । স হীমাঃ প্র॒জা গো॑পা॒যতি॑ । তমে॒ব প্র॒জানা᳚-ঙ্গো॒প্তার॑-ঙ্কুরুতে । অনি॑পদ্যমান॒মিত্য়া॑হ ॥ 49 ॥
ন হ্য়ে॑ষ নি॒পদ্য়॑তে । আ চ॒ পরা॑ চ প॒থিভি॒শ্চর॑ন্ত॒মিত্য়া॑হ । আ চ॒ হ্য়ে॑ষ পরা॑ চ প॒থিভি॒শ্চর॑তি । স স॒দ্ধ্রীচী॒-স্স বিষূ॑চী॒র্বসা॑ন॒ ইত্য়া॑হ । স॒দ্ধ্রীচী᳚শ্চ॒ হ্য়ে॑ষ বিষূ॑চীশ্চ॒ বসা॑নঃ প্র॒জা অ॒ভি বি॒পশ্য়॑তি । আ ব॑রীবর্তি॒ ভুব॑নেষ্ব॒ন্তরিত্য়া॑হ । আ হ্য়ে॑ষ ব॑রী॒বর্তি॒ ভুব॑নেষ্ব॒ন্তঃ । অত্র॑ প্রা॒বীর্মধু॒ মাদ্ধ্বী᳚ভ্য়া॒-ম্মধু॒ মাধূ॑চীভ্য়া॒মিত্য়া॑হ ।
বাস॑ন্তিকাবে॒বাস্মা॑ ঋ॒তূ ক॑ল্পযতি ।
সম॒গ্নির॒গ্নিনা॑ গ॒তেত্য়া॑হ ॥ 50 ॥
গ্রৈষ্মা॑বে॒বাস্মা॑ ঋ॒তূ ক॑ল্পযতি । সম॒গ্নির॒গ্নিনা॑ গ॒তেত্য়া॑হ । অ॒গ্নির্হ্য়ে॑বৈষো᳚-ঽগ্নিনা॑ স॒ঙ্গচ্ছ॑তে । স্বাহা॒ সম॒গ্নিস্তপ॑সা গ॒তেত্য়া॑হ ।
পূর্ব॑মে॒বোদি॒তম্ । উত্ত॑রেণা॒ভিগৃ॑ণাতি ।
ধ॒র্তা দি॒বো বিভা॑সি॒ রজ॑সঃ পৃথি॒ব্য়া ইত্য়া॑হ ।
বার্ষি॑কাবে॒বাস্মা॑ ঋ॒তূ ক॑ল্পযতি ।
হৃ॒দে ত্বা॒ মন॑সে॒ ত্বেত্য়া॑হ । শা॒র॒দাবে॒বাস্মা॑ ঋ॒তূ ক॑ল্পযতি ॥ 51 ॥
দি॒বি দে॒বেষু॒ হোত্রা॑ য॒চ্ছেত্য়া॑হ । হোত্রা॑ভিরে॒বেমান্ ঁলো॒কান্-থ্স-ন্দ॑ধাতি । বিশ্বা॑সা-ম্ভুবা-ম্পত॒ ইত্য়া॑হ । হৈম॑ন্তিকাবে॒বাস্মা॑ ঋ॒তূ ক॑ল্পযতি ।
দে॒ব॒শ্রূস্ত্ব-ন্দে॑ব ঘর্ম দে॒বা-ন্পা॒হীত্য়া॑হ ।
শৈ॒শি॒রাবে॒বাস্মা॑ ঋ॒তূ ক॑ল্পযতি ।
ত॒পো॒জাং-বাঁচ॑ম॒স্মে নিয়॑চ্ছ দেবা॒য়ুব॒মিত্য়া॑হ ।
যা বৈ মেদ্ধ্য়া॒ বাক্ । সা ত॑পো॒জাঃ । তামে॒বাব॑রুন্ধে ॥ 52 ॥
গর্ভো॑ দে॒বানা॒মিত্য়া॑হ । গর্ভো॒ হ্য়ে॑ষ দে॒বানা᳚ম্ । পি॒তা ম॑তী॒নামিত্য়া॑হ । প্র॒জা বৈ ম॒তয়ঃ॑ । তাসা॑মে॒ষ এ॒ব পি॒তা । য-ত্প্র॑ব॒র্গ্য়ঃ॑ ।
তস্মা॑দে॒বমা॑হ । পতিঃ॑ প্র॒জানা॒মিত্য়া॑হ । পতি॒র্হ্য়ে॑ষ প্র॒জানা᳚ম্ । মতিঃ॑ কবী॒নামিত্য়া॑হ ॥ 53 ॥
মতি॒র্হ্য়ে॑ষ ক॑বী॒নাম্ । স-ন্দে॒বো দে॒বেন॑ সবি॒ত্রা ঽয়॑তিষ্ট॒ সগ্ম্ সূর্য়ে॑ণারু॒ক্তেত্য়া॑হ ।
অ॒মুঞ্চৈ॒বাদি॒ত্য়-ম্প্র॑ব॒র্গ্য়॑ঞ্চ॒ সগ্ম্শা᳚স্তি ।
আ॒য়ু॒র্দাস্ত্বম॒স্মভ্য়॑-ঙ্ঘর্ম বর্চো॒দা অ॒সীত্য়া॑হ ।
আ॒শিষ॑মে॒বৈতামাশা᳚স্তে । পি॒তা নো॑-ঽসি পি॒তা নো॑ বো॒ধেত্য়া॑হ । বো॒ধয়॑ত্য়ে॒বৈন᳚ম্ । ন বৈ॒ তে॑-ঽবকা॒শা ভ॑বন্তি । পত্নি॑য়ৈ দশ॒মঃ ।
নব॒ বৈ পুরু॑ষে প্রা॒ণাঃ ॥ 54 ॥
নাভি॑র্দশ॒মী । প্রা॒ণানে॒ব যজ॑মানে দধাতি । অথো॒ দশা᳚ক্ষরা বি॒রাট্ । অন্নং॑-বিঁ॒রাট্ । বি॒রাজৈ॒বান্নাদ্য়॒মব॑রুন্ধে । য॒জ্ঞস্য়॒ শিরো᳚-ঽচ্ছিদ্যত । ত-দ্দে॒বা হোত্রা॑ভিঃ॒ প্রত্য়॑দধুঃ । ঋ॒ত্বিজো-ঽবে᳚ক্ষন্তে । এ॒তা বৈ হোত্রাঃ᳚ । হোত্রা॑ভিরে॒ব য॒জ্ঞস্য়॒ শিরঃ॒ প্রতি॑দধাতি ॥ 55 ॥
রু॒চি॒তমবে᳚ক্ষন্তে । রু॒চি॒তাদ্বৈ প্র॒জাপ॑তিঃ প্র॒জা অ॑সৃজত । প্র॒জানা॒গ্ম্॒ সৃষ্ট্য়ৈ᳚ । রু॒চি॒তমবে᳚ক্ষন্তে । রু॒চি॒তাদ্বৈ প॒র্জন্য়ো॑ বর্ষতি । বর্ষু॑কঃ প॒র্জন্য়ো॑ ভবতি । স-ম্প্র॒জা এ॑ধন্তে । রু॒চি॒তমবে᳚ক্ষন্তে । রু॒চি॒তম্ ঁবৈ ব্র॑হ্মবর্চ॒সম্ । ব্র॒হ্ম॒ব॒র্চ॒সিনো॑ ভবন্তি ॥ 56 ॥
অ॒ধী॒যন্তো-ঽবে᳚ক্ষন্তে । সর্ব॒মায়ু॑র্যন্তি । ন পত্ন্যবে᳚ক্ষেত । য-ত্পন্ত্য়॒বেক্ষে॑ত । প্রজা॑য়েত । প্র॒জান্ত্ব॑স্য়ৈ॒ নির্দ॑হেত্ । যন্নাবেক্ষে॑ত । ন প্রজা॑য়েত ।
নাস্য়ৈ᳚ প্র॒জান্নির্দ॑হেত্ । তি॒র॒স্কৃত্য়॒ যজু॑-র্বাচযতি । প্রজা॑যতে । নাস্য়ৈ᳚ প্র॒জান্নির্দ॑হতি । ত্বষ্টী॑মতী তে সপে॒য়েত্য়া॑হ । সপা॒দ্ধি প্র॒জাঃ প্র॒জায়॑ন্তে ॥ 57 ॥
(ঋ॒তবো॒ - হি শিরঃ॒ - সর্ব॑পৃষ্ঠে॒ প্রবৃ॑ণ॒ - ক্ত্যনি॑পদ্যমান॒মিত্য়া॑হ - গ॒তেত্য়া॑হ - শার॒দাবে॒বাস্মা॑ ঋ॒তূ ক॑ল্পযতি - রুন্ধে - কবি॒নামিত্য়া॑হ - প্রা॒ণাঃ - প্রতি॑দধাতি - ভবন্তি - বাচযতি চ॒ত্বারি॑ চ) (অ. 6)
অনুবাকং 7
দে॒বস্য়॑ ত্বা সবি॒তুঃ প্র॑স॒ব ইতি॑ রশ॒নামাদ॑ত্তে॒ প্রসূ᳚ত্য়ৈ । অ॒শ্বিনো᳚-র্বা॒হুভ্য়া॒মিত্য়া॑হ । অ॒শ্বিনৌ॒ হি দে॒বানা॑মদ্ধ্ব॒র্য়ূ আস্তা᳚ম্ । পূ॒ষ্ণো হস্তা᳚ভ্য়া॒মিত্য়া॑হ॒ যত্য়ৈ᳚ । আদ॒দে-ঽদি॑ত্য়ৈ॒ রাস্না॒-ঽসীত্য়া॑হ॒ যজু॑ষ্কৃত্য়ৈ । ইড॒ এহ্যদি॑ত॒ এহি॒ সর॑স্ব॒ত্য়েহীত্য়া॑হ । এ॒তানি॒ বা অ॑স্য়ৈ দেবনা॒মানি॑ ।
দে॒ব॒না॒মৈরে॒বৈনা॒-মাহ্ব॑যতি । অসা॒বেহ্য়-সা॒বেহ্য়-সা॒বেহীত্য়া॑হ । এ॒তানি॒ বা অ॑স্য়ৈ মনুষ্যনা॒মানি॑ ॥ 58 ॥
ম॒নু॒ষ্য়॒না॒মৈরে॒বৈনা॒মাহ্ব॑যতি ।
ষট্-থ্সম্প॑দ্যন্তে । ষড্বা ঋ॒তবঃ॑ ।
ঋ॒তুভি॑রে॒বৈনা॒মাহ্ব॑যতি । অদি॑ত্য়া উ॒ষ্ণীষ॑ম॒সীত্য়া॑হ । য॒থা॒য়॒জুরে॒বৈতত্ ।
বা॒য়ুর॑স্য়ৈ॒ড ইত্য়া॑হ । বা॒য়ু॒দে॒ব॒ত্য়ো॑ বৈ ব॒থ্সঃ ।
পূ॒ষা ত্বো॒পাব॑সৃজ॒ত্বিত্য়া॑হ । পৌ॒ষ্ণা বৈ দে॒বত॑য়া প॒শবঃ॑ ॥ 59 ॥
স্বয়ৈ॒বৈন॑-ন্দে॒বত॑য়ো॒পাব॑সৃজতি । অ॒শ্বিভ্য়া॒-ম্প্রদা॑প॒য়েত্য়া॑হ । অ॒শ্বিনৌ॒ বৈ দে॒বানা᳚-ম্ভি॒ষজৌ᳚ । তাভ্য়া॑মে॒বাস্মৈ॑ ভেষ॒জ-ঙ্ক॑রোতি । যস্তে॒ স্তন॑-শ্শশ॒য় ইত্য়া॑হ । স্তৌত্য়ে॒বৈনা᳚ম্ । উস্র॑ ঘ॒র্মগ্ম্ শি॒গ্ম্॒ষোস্র॑ ঘ॒র্ম-ম্পা॑হি ঘ॒র্মায়॑ শি॒গ্ম্॒ষেত্য়া॑হ । যথা᳚ ব্রূ॒য়াদ॒মুষ্মৈ॑ দে॒হীতি॑ । তা॒দৃগে॒ব তত্ । বৃহ॒স্পতি॒স্ত্বোপ॑সীদ॒ত্বিত্য়া॑হ ॥ 60 ॥
ব্রহ্ম॒ বৈ দে॒বানা॒-ম্বৃহ॒স্পতিঃ॑ । ব্রহ্ম॑ণৈ॒বৈনা॒মুপ॑সীদতি ।
দান॑ব-স্স্থ॒ পের॑ব॒ ইত্য়া॑হ । মেদ্ধ্য়া॑নে॒বৈনা᳚ন্করোতি ।
বি॒ষ্ব॒গ্বৃতো॒ লোহি॑তে॒নেত্য়া॑হ॒ ব্য়াবৃ॑ত্ত্য়ৈ ।
অ॒শ্বিভ্য়া᳚-ম্পিন্বস্ব॒ সর॑স্বত্য়ৈ পিন্বস্ব পূ॒ষ্ণে পি॑ন্বস্ব॒ বৃহ॒স্পত॑য়ে পিন্ব॒স্বেত্য়া॑হ ।
এ॒তাভ্য়ো॒ হ্য়ে॑ষা দে॒বতা᳚ভ্য়ঃ॒ পিন্ব॑তে ।
ইন্দ্রা॑য় পিন্ব॒স্বেন্দ্রা॑য় পিন্ব॒স্বেত্য়া॑হ ।
ইন্দ্র॑মে॒ব ভা॑গ॒ধেয়ে॑ন॒ সম॑র্ধযতি । দ্বিরিন্দ্রা॒য়েত্য়া॑হ ॥ 61 ॥
তস্মা॒দিন্দ্রো॑ দে॒বতা॑না-ম্ভূয়িষ্ঠ॒ভাক্ত॑মঃ ।
গা॒য়॒ত্রো॑-ঽসি॒ ত্রৈষ্টু॑ভো-ঽসি॒ জাগ॑তম॒সীতি॑ শফোপয়॒মানাদ॑ত্তে ।
ছন্দো॑ভিরে॒বৈনা॒নাদ॑ত্তে । স॒হোর্জো ভা॒গেনোপ॒মেহীত্য়া॑হ ।
ঊ॒র্জ এ॒বৈন॑-ম্ভা॒গম॑কঃ ।
অ॒শ্বিনৌ॒ বা এ॒ত-দ্য়॒জ্ঞস্য়॒ শিরঃ॑ প্রতি॒দধ॑তাবব্রূতাম্ ।
আ॒বাভ্য়া॑মে॒ব পূর্বা᳚ভ্য়াং॒-বঁষ॑ট্ক্রিয়াতা॒ ইতি॑ ।
ইন্দ্রা᳚শ্বিনা॒ মধু॑ন-স্সার॒ঘস্য়েত্য়া॑হ ।
অ॒শ্বিভ্য়া॑মে॒ব পূর্বা᳚ভ্য়াং॒-বঁষ॑ট্করোতি ।
অথো॑ অ॒শ্বিনা॑বে॒ব ভা॑গ॒ধেয়ে॑ন॒ সম॑র্ধযতি ॥ 62 ॥
ঘ॒র্ম-ম্পা॑ত বসবো॒ যজ॑তা॒ বডিত্য়া॑হ ।
বসূ॑নে॒ব ভা॑গ॒ধেয়ে॑ন॒ সম॑র্ধযতি । য-দ্ব॑ষট্কু॒র্য়াত্ । যা॒তয়া॑মা-ঽস্য় বষট্কা॒র-স্স্য়া᳚ত্ ।
যন্ন ব॑ষট্কু॒র্য়াত্ । রক্ষাগ্ম্॑সি য॒জ্ঞগ্ম্ হ॑ন্য়ুঃ । বডিত্য়া॑হ । প॒রোক্ষ॑মে॒ব বষ॑ট্করোতি । নাস্য়॑ যা॒তয়া॑মা বষট্কা॒রো ভব॑তি ।
ন য॒জ্ঞগ্ম্ রক্ষাগ্ম্॑সি ঘ্নন্তি ॥ 63 ॥
স্বাহা᳚ ত্বা॒ সূর্য়॑স্য় র॒শ্ময়ে॑ বৃষ্টি॒বন॑য়ে জুহো॒মীত্য়া॑হ । যো বা অ॑স্য়॒ পুণ্য়ো॑ র॒শ্মিঃ । স বৃ॑ষ্টি॒বনিঃ॑ । তস্মা॑ এ॒বৈন॑-ঞ্জুহোতি ।
মধু॑ হ॒বির॒সীত্য়া॑হ । স্ব॒দয়॑ত্য়ে॒বৈন᳚ম্ । সূর্য়॑স্য়॒ তপ॑স্ত॒পেত্য়া॑হ ।
য॒থা॒য়॒জুরে॒বৈতত্ । দ্য়াবা॑পৃথি॒বীভ্য়া᳚-ন্ত্বা॒ পরি॑গৃহ্ণা॒মীত্য়া॑হ ।
দ্য়াবা॑পৃথি॒বীভ্য়া॑-মে॒বৈন॒-ম্পরি॑গৃহ্ণাতি ॥ 64 ॥
অ॒ন্তরি॑ক্ষেণ॒ ত্বোপ॑যচ্ছা॒মীত্য়া॑হ । অ॒ন্তরি॑ক্ষেণৈ॒বৈন॒-মুপ॑যচ্ছতি ।
ন বা এ॒ত-ম্ম॑নু॒ষ্য়ো॑ ভর্তু॑মর্হতি ।
দে॒বানা᳚-ন্ত্বা পিতৃ॒ণামনু॑মতো॒ ভর্তুগ্ম্॑ শকেয়॒মিত্য়া॑হ । দে॒বৈরে॒বৈন॑-ম্পি॒তৃভি॒রনু॑মত॒ আদ॑ত্তে । বি বা এ॑নমে॒তদ॑র্ধযন্তি । য-ত্প॒শ্চা-ত্প্র॒বৃজ্য়॑ পু॒রো জুহ্ব॑তি । তেজো॑-ঽসি॒ তেজো-ঽনু॒ প্রেহীত্য়া॑হ । তেজ॑ এ॒বাস্মি॑-ন্দধাতি । দি॒বি॒স্পৃম্মা মা॑ হিগ্ম্সী-রন্তরিক্ষ॒স্পৃম্মা মা॑ হিগ্ম্সীঃ
পৃথিবি॒স্পৃম্মা মা॑ হিগ্ম্সী॒রিত্য়া॒হাহিগ্ম্॑সায়ৈ ॥ 65 ॥
সুব॑রসি॒ সুব॑র্মে যচ্ছ॒ দিবং॑-য়ঁচ্ছ দি॒বো মা॑ পা॒হীত্য়া॑হ । আ॒শিষ॑মে॒বৈতামাশা᳚স্তে । শিরো॒ বা এ॒ত-দ্য়॒জ্ঞস্য়॑ । য-ত্প্র॑ব॒র্গ্য়ঃ॑ ।
আ॒ত্মা বা॒য়ুঃ । উ॒দ্যত্য়॑ বাতনা॒মান্য়া॑হ ।
আ॒ত্মন্নে॒ব য॒জ্ঞস্য়॒ শিরঃ॒ প্রতি॑দধাতি ।
অন॑বানম্ । প্রা॒ণানা॒গ্ম্॒ সন্ত॑ত্য়ৈ । পঞ্চা॑হ ॥ 66 ॥
পাঙ্ক্তো॑ য॒জ্ঞঃ । যাবা॑নে॒ব য॒জ্ঞঃ । তস্য়॒ শিরঃ॒ প্রতি॑দধাতি । অ॒গ্নয়ে᳚ ত্বা॒ বসু॑মতে॒ স্বাহেত্য়া॑হ ।
অ॒সৌ বা আ॑দি॒ত্য়ো᳚-ঽগ্নি-র্বসু॑মান্ । তস্মা॑ এ॒বৈন॑ঞ্জুহোতি । সোমা॑য় ত্বা রু॒দ্রব॑তে॒ স্বাহেত্য়া॑হ ।
চ॒ন্দ্রমা॒ বৈ সোমো॑ রু॒দ্রবান্॑ । তস্মা॑ এ॒বৈন॑ঞ্জুহোতি । বরু॑ণায় ত্বা-ঽঽদি॒ত্যব॑তে॒ স্বাহেত্য়া॑হ ॥ 67 ॥
অ॒ফ্সু বৈ বরু॑ণ আদি॒ত্যবান্॑ । তস্মা॑ এ॒বৈন॑ঞ্জুহোতি ।
বৃহ॒স্পত॑য়ে ত্বা বি॒শ্বদে᳚ব্য়াবতে॒ স্বাহেত্য়া॑হ ।
ব্রহ্ম॒ বৈ দে॒বানা॒-ম্বৃহ॒স্পতিঃ॑ ।
ব্রহ্ম॑ণ এ॒বৈন॑ঞ্জুহোতি ।
স॒বি॒ত্রে ত্ব॑র্ভু॒মতে॑ বিভু॒মতে᳚ প্রভু॒মতে॒ বাজ॑বতে॒ স্বাহেত্য়া॑হ । সং॒বঁ॒থ্স॒রো বৈ স॑বি॒তর্ভু॒মান্. বি॑ভু॒মা-ন্প্র॑ভু॒মান্. বাজ॑বান্ । তস্মা॑ এ॒বৈন॑ঞ্জুহোতি । য॒মায়॒ ত্বা-ঽঙ্গি॑রস্বতে পিতৃ॒মতে॒ স্বাহেত্য়া॑হ ।
প্রা॒ণো বৈ য॒মো-ঽঙ্গি॑রস্বা-ন্পিতৃ॒মান্ ॥ 68 ॥
তস্মা॑ এ॒বৈন॑ঞ্জুহোতি । এ॒তাভ্য়॑ এ॒বৈন॑-ন্দে॒বতা᳚ভ্য়ো জুহোতি । দশ॒ সম্প॑দ্যন্তে । দশা᳚ক্ষরা বি॒রাট্ । অন্নং॑-বিঁ॒রাট্ । বি॒রাজৈ॒বান্নাদ্য়॒মব॑রুন্ধে । রৌ॒হি॒ণাভ্য়াং॒-বৈঁ দে॒বা-স্সু॑ব॒র্গং-লোঁ॒কমা॑যন্ন্ । ত-দ্রৌ॑হি॒ণয়ো॑ রৌহিণ॒ত্বম্ । য-দ্রৌ॑হি॒ণৌ ভব॑তঃ । রৌ॒হি॒ণাভ্য়া॑মে॒ব ত-দ্যজ॑মান-স্সুব॒র্গং-লোঁ॒কমে॑তি ।
অহ॒র্জ্য়োতিঃ॑ কে॒তুনা॑ জুষতাগ্ম্ সুজ্য়ো॒তির্জ্য়োতি॑ষা॒গ্॒ স্বাহা॒ রাত্রি॒র্জ্য়োতিঃ॑ কে॒তুনা॑ জুষতাগ্ম্ সুজ্য়ো॒তির্জ্য়োতি॑ষা॒গ্॒ স্বাহেত্য়া॑হ ।
আ॒দি॒ত্যমে॒ব তদ॒মুষ্মি॑ন্ ঁলো॒কে-ঽহ্না॑ প॒রস্তা᳚-দ্দাধার । রাত্রি॑য়া অ॒বস্তা᳚ত্ ।
তস্মা॑দ॒সাবা॑দি॒ত্য়ো॑ ঽমুষ্মি॑ন্ ঁলো॒কে॑-ঽহোরা॒ত্রাভ্য়া᳚-ন্ধৃ॒তঃ ॥ 69 ॥
(ম॒নু॒ষ্য়॒না॒মানি॑ - প॒শবঃ॑ - সীদ॒ত্বিত্য়া॒ - হেন্দ্রা॒য়েত্য়া॑হা - র্ধযতি - ঘ্নন্তি - গৃহ্ণা॒ - ত্যহিগ্ম্॑সায়ৈ॒ - পঞ্চা॑হা - দি॒ত্যব॑তে॒ স্বাহেত্য়া॑হ - পিতৃ॒মা - নে॑তি চ॒ত্বারি॑ চ) (অ. 7)
অনুবাকং 8
বিশ্বা॒ আশা॑ দক্ষিণ॒সদিত্য়া॑হ । বিশ্বা॑নে॒ব দে॒বা-ন্প্রী॑ণাতি । অথো॒ দুরি॑ষ্ট্য়া এ॒বৈন॑-ম্পাতি । বিশ্বা᳚-ন্দে॒বান॑য়াডি॒হেত্য়া॑হ । বিশ্বা॑নে॒ব দে॒বা-ন্ভা॑গ॒ধেয়ে॑ন॒ সম॑র্ধযতি । স্বাহা॑কৃতস্য় ঘ॒র্মস্য়॒ মধোঃ᳚ পিবতমশ্বি॒নেত্য়া॑হ ।
অ॒শ্বিনা॑বে॒ব ভা॑গ॒ধেয়ে॑ন॒ সম॑র্ধযতি ।
স্বাহা॒-ঽগ্নয়ে॑ য॒জ্ঞিয়া॑য়॒ শংয়ঁজু॑র্ভি॒রিত্য়া॑হ । অ॒ভ্য়ে॑বৈন॑-ঙ্ঘারযতি । অথো॑ হ॒বিরে॒বাকঃ॑ ॥ 70 ॥
অশ্বি॑না ঘ॒র্ম-ম্পা॑তগ্ম্ হার্দিবা॒ন-মহ॑র্দি॒বাভি॑-রূ॒তিভি॒রিত্য়া॑হ । অ॒শ্বিনা॑বে॒ব ভা॑গ॒ধেয়ে॑ন॒ সম॑র্ধযতি । অনু॑ বা॒-ন্দ্য়াবা॑পৃথি॒বী মগ্ম্॑সাতা॒মিত্য়া॒হানু॑মত্য়ৈ ।
স্বাহেন্দ্রা॑য়॒ স্বাহেন্দ্রা॒ বডিত্য়া॑হ ।
ইন্দ্রা॑য়॒ হি পু॒রো হূ॒যতে᳚ । আ॒শ্রাব্য়া॑হ ঘ॒র্মস্য়॑ য॒জেতি॑ । বষ॑ট্কৃতে জুহোতি । রক্ষ॑সা॒মপ॑হত্য়ৈ । অনু॑যজতি স্ব॒গাকৃ॑ত্য়ৈ ।
ঘ॒র্মম॑পাতমশ্বি॒নেত্য়া॑হ ॥ 71 ॥
পূর্ব॑মে॒বোদি॒তম্ । উত্ত॑রেণা॒ভিগৃ॑ণাতি ।
অনু॑ বা॒ন্-দ্য়াবা॑পৃথি॒বী অ॑মগ্ম্সাতা॒মিত্য়া॒হানু॑মত্য়ৈ ।
ত-ম্প্রা॒ব্য়॑ম্ ঁযথা॒বণ্ণমো॑ দি॒বে নমঃ॑ পৃথি॒ব্য়া ইত্য়া॑হ । য॒থা॒য়॒জুরে॒বৈতত্ । দি॒বি ধা॑ ই॒মং-য়ঁ॒জ্ঞং-য়ঁ॒জ্ঞমি॒ম-ন্দি॒বি ধা॒ ইত্য়া॑হ ।
সু॒ব॒র্গমে॒বৈন॑ম্ ঁলো॒ক-ঙ্গ॑মযতি ।
দিব॑-ঙ্গচ্ছা॒ন্তরি॑ক্ষ-ঙ্গচ্ছ পৃথি॒বী-ঙ্গ॒চ্ছেত্য়া॑হ ।
এ॒ষ্বে॑বৈন॑ম্ ঁলো॒কেষু॒ প্রতি॑ষ্ঠাপযতি । পঞ্চ॑ প্র॒দিশো॑ গ॒চ্ছেত্য়া॑হ ॥ 72 ॥
দি॒ক্ষ্বে॑বৈন॒-ম্প্রতি॑ষ্ঠাপযতি ।
দে॒বা-ন্ঘ॑র্ম॒পা-ন্গ॑চ্ছ পি॒তৄ-ন্ঘ॑র্ম॒পা-ন্গ॒চ্ছেত্য়া॑হ । উ॒ভয়ে᳚ষ্বে॒বৈন॒-ম্প্রতি॑ষ্ঠাপযতি । য-ত্পিন্ব॑তে । বর্ষু॑কঃ প॒র্জন্য়ো॑ ভবতি । তস্মা॒-ত্পিন্ব॑মানঃ॒ পুণ্য়ঃ॑ । য-ত্প্রাম্পিন্ব॑তে । ত-দ্দে॒বানা᳚ম্ । য-দ্দ॑ক্ষি॒ণা । তত্-পি॑তৃ॒ণাম্ ॥ 73 ॥
য-ত্প্র॒ত্যক্ । ত-ন্ম॑নু॒ষ্য়া॑ণাম্ । যদুদঙ্ঙ্॑ । ত-দ্রু॒দ্রাণা᳚ম্ । প্রাঞ্চ॒মুদ॑ঞ্চ-ম্পিন্বযতি । দে॒ব॒ত্রা-ঽকঃ॑ । অথো॒ খলু॑ । সর্বা॒ অনু॒ দিশঃ॑ পিন্বযতি । সর্বা॒ দিশ॒-স্সমে॑ধন্তে । অ॒ন্তঃ॒প॒রি॒ধি পি॑ন্বযতি ॥ 74 ॥
তেজ॒সো-ঽস্ক॑ন্দায় । ই॒ষে পী॑পিহ্য়ূ॒র্জে পী॑পি॒হীত্য়া॑হ ।
ইষ॑মে॒বোর্জং॒-য়ঁজ॑মানে দধাতি । যজ॑মানায় পীপি॒হীত্য়া॑হ । যজ॑মানায়ৈ॒বৈতা-মা॒শিষ॒মাশা᳚স্তে ।
মহ্য়॒ঞ্জ্য়ৈষ্ঠ্য়া॑য় পীপি॒হীত্য়া॑হ ।
আ॒ত্মন॑ এ॒বৈতামা॒শিষ॒মাশা᳚স্তে ।
ত্বিষ্য়ৈ᳚ ত্বা দ্য়ু॒ম্নায়॑ ত্বেন্দ্রি॒য়ায়॑ ত্বা॒ ভূত্য়ৈ॒ ত্বেত্য়া॑হ । য॒থা॒য়॒জুরে॒বৈতত্ । ধর্মা॑-ঽসি সু॒ধর্মা মে᳚ ন্য়॒স্মে ব্রহ্মা॑ণি ধার॒য়েত্য়া॑হ ॥ 75 ॥
ব্রহ্ম॑ন্নে॒বৈন॒-ম্প্রতি॑ষ্ঠাপযতি । নেত্ত্বা॒ বাত॑-স্স্ক॒ন্দয়া॒দিতি॒ যদ্য়॑ভি॒চরে᳚ত্ । অ॒মুষ্য়॑ ত্বা প্রা॒ণে সা॑দয়াম্য়॒মুনা॑ স॒হ নি॑র॒র্থ-ঙ্গ॒চ্ছেতি॑ ব্রূয়া॒-দ্য়-ন্দ্বি॒ষ্য়াত্ । যমে॒ব দ্বেষ্টি॑ । তেনৈ॑নগ্ম্ স॒হ নি॑র॒র্থ-ঙ্গ॑মযতি । পূ॒ষ্ণে শর॑সে॒ স্বাহেত্য়া॑হ । যা এ॒ব দে॒বতা॑ হু॒তভা॑গাঃ । তাভ্য়॑ এ॒বৈন॑ঞ্জুহোতি । গ্রাব॑ভ্য়॒-স্স্বাহেত্য়া॑হ । যা এ॒বান্তরি॑ক্ষে॒ বাচঃ॑ ॥ 76 ॥
তাভ্য়॑ এ॒বৈন॑ঞ্জুহোতি । প্র॒তি॒রেভ্য়॒-স্স্বাহেত্য়া॑হ । প্রা॒ণা বৈ দে॒বাঃ প্র॑তি॒রাঃ । তেভ্য়॑ এ॒বৈন॑ঞ্জুহোতি । দ্য়াবা॑পৃথি॒বীভ্য়া॒গ্॒ স্বাহেত্য়া॑হ ।
দ্য়াবা॑পৃথি॒বীভ্য়া॑-মে॒বৈন॑ঞ্জুহোতি । পি॒তৃভ্য়ো॑ ঘর্ম॒পেভ্য়॒-স্স্বাহেত্য়া॑হ । যে বৈ যজ্বা॑নঃ । তে পি॒তরো॑ ঘর্ম॒পাঃ । তেভ্য়॑ এ॒বৈন॑ঞ্জুহোতি ॥ 77 ॥
রু॒দ্রায়॑ রু॒দ্রহো᳚ত্রে॒ স্বাহেত্য়া॑হ । রু॒দ্রমে॒ব ভা॑গ॒ধেয়ে॑ন॒ সম॑র্ধযতি । স॒র্বত॒-স্সম॑নক্তি । স॒র্বত॑ এ॒ব রু॒দ্রন্নি॒রব॑দযতে । উদ॑ঞ্চ॒ন্নির॑স্যতি ।
এ॒ষা বৈ রু॒দ্রস্য়॒ দিক্ । স্বায়া॑মে॒ব দি॒শি রু॒দ্রন্নি॒রব॑দযতে । অ॒প উপ॑স্পৃশতি মেদ্ধ্য়॒ত্বায়॑ । নান্বী᳚ক্ষেত । যদ॒ন্বীক্ষে॑ত ॥ 78 ॥
চক্ষু॑রস্য় প্র॒মায়ু॑কগ্গ্ স্য়াত্ । তস্মা॒ন্নান্বীক্ষ্য়ঃ॑ ।
অপী॑পরো॒ মা-ঽহ্নো॒ রাত্রি॑য়ৈ মা পাহ্য়ে॒ষা তে॑ অগ্নে স॒মিত্তয়া॒ সমি॑দ্ধ্য়॒স্বায়ু॑র্মে দা॒ বর্চ॑সা মা-ঽঞ্জী॒রিত্য়া॑হ । আয়ু॑রে॒বাস্মি॒ন্ বর্চো॑ দধাতি ।
অপী॑পরো মা॒ রাত্রি॑য়া॒ অহ্নো॑ মা পাহ্য়ে॒ষা তে॑ অগ্নে স॒মিত্তয়া॒ সমি॑দ্ধ্য়॒স্বায়ু॑র্মে দা॒ বর্চ॑সা মা-ঽঞ্জী॒রিত্য়া॑হ । আয়ু॑রে॒বাস্মি॒ন্ বর্চো॑ দধাতি ।
অ॒গ্নি-র্জ্য়োতি॒-র্জ্য়োতি॑র॒গ্নি-স্স্বাহা॒ সূর্য়ো॒ জ্য়োতি॒র্জ্য়োতি॒-স্সূর্য়॒-স্স্বাহেত্য়া॑হ । য॒থা॒য়॒জুরে॒বৈতত্ । ব্র॒হ্ম॒বা॒দিনো॑ বদন্তি । হো॒ত॒ব্য়॑মগ্নিহো॒ত্রা(3) ন্ন হো॑ত॒ব্য়া(3) মিতি॑ ॥ 79 ॥
য-দ্যজু॑ষা জুহু॒য়াত্ । অয়॑থাপূর্ব॒মাহু॑তী জুহুয়াত্ । যন্ন জু॑হু॒য়াত্ । অ॒গ্নিঃ পরা॑ভবেত্ । ভূ-স্স্বাহেত্য়ে॒ব হো॑ত॒ব্য়᳚ম্ । য॒থা॒পূ॒র্বমাহু॑তী জু॒হোতি॑ । নাগ্নিঃ পরা॑ভবতি । হু॒তগ্ম্ হ॒বির্মধু॑ হ॒বিরিত্য়া॑হ ।
স্ব॒দয়॑ত্য়ে॒বৈন᳚ম্ । ইন্দ্র॑তমে॒-ঽগ্নাবিত্য়া॑হ ॥ 80 ॥
প্রা॒ণো বা ইন্দ্র॑তমো॒-ঽগ্নিঃ ।
প্রা॒ণ এ॒বৈন॒মিন্দ্র॑তমে॒-ঽগ্নৌ জু॑হোতি ।
পি॒তা নো॑-ঽসি॒ মা মা॑ হিগ্ম্সী॒রিত্য়া॒হাহিগ্ম্॑সায়ৈ ।
অ॒শ্য়াম॑ তে দেব ঘর্ম॒ মধু॑মতো॒ বাজ॑বতঃ পিতু॒মত॒ ইত্য়া॑হ । আ॒শিষ॑মে॒বৈতামাশা᳚স্তে ।
স্ব॒ধা॒বিনো॑-ঽশী॒মহি॑ ত্বা॒ মা মা॑ হিগ্ম্সী॒-রিত্য়া॒হাহিগ্ম্॑সায়ৈ । তেজ॑সা॒ বা এ॒তে ব্য়ৃ॑দ্ধ্যন্তে । যে প্র॑ব॒র্গ্য়ে॑ণ॒ চর॑ন্তি । প্রাশ্ঞ॑ন্তি ।
তেজ॑ এ॒বাত্মন্-দ॑ধতে ॥ 81 ॥
সং॒বঁ॒থ্স॒রন্ন মা॒গ্ম্॒সম॑শ্ঞীয়াত্ । ন রা॒মামুপে॑য়াত্ । ন মৃ॒ন্ময়ে॑ন পিবেত্ । নাস্য়॑ রা॒ম উচ্ছি॑ষ্ট-ম্পিবেত্ । তেজ॑ এ॒ব তথ্সগ্ম্শ্য়॑তি ।
দে॒বা॒সু॒রা-স্সংয়ঁ॑ত্তা আসন্ন্ । তে দে॒বা বি॑জ॒যমু॑প॒যন্তঃ॑ । বি॒ভ্রাজি॑ সৌ॒র্য়ে ব্রহ্ম॒ সন্ন্য়॑দধত । য-ত্কিঞ্চ॑ দিবাকী॒র্ত্য়᳚ম্ ।
তদে॒তেনৈ॒ব ব্র॒তেনা॑গোপাযত্ । তস্মা॑দে॒ত-দ্ব্র॒ত-ঞ্চা॒র্য়᳚ম্ । তেজ॑সো গোপী॒থায়॑ । তস্মা॑দে॒তানি॒ যজূগ্ম্॑ষি বি॒ভ্রাজ॑-স্সৌ॒র্যস্য়েত্য়া॑হুঃ ।
স্বাহা᳚ ত্বা॒ সূর্য়॑স্য় র॒শ্মিভ্য়॒ ইতি॑ প্রা॒ত-স্সগ্ম্সা॑দযতি । স্বাহা᳚ ত্বা॒ নক্ষ॑ত্রেভ্য়॒ ইতি॑ সা॒যম্ ।
এ॒তা বা এ॒তস্য়॑ দে॒বতাঃ᳚ । তাভি॑রে॒বৈন॒গ্ম্॒ সম॑র্ধযতি ॥ 82 ॥
(অ॒ক॒ - র॒শ্বি॒নেত্য়া॑হ - প্র॒দিশো॑ গ॒চ্ছেত্য়া॑হ - পিতৃ॒ণা - ম॑ন্তঃ পরি॒ধি পি॑ন্বযতি - ধার॒য়েত্য়া॑হ॒ - বাচো॑ - ধর্ম॒পা স্তেভ্য়॑ এ॒বৈন॑-ঞ্জুহো - ত্য়॒ন্বীক্ষে॑ত - হোত॒ব্য়া (3) মি - ত্য়॒গ্রাবিত্য়া॑হ - দধতে - ঽগোপায়-থ্স॒প্ত চ॑) (অ. 8)
অনুবাকং 9
ঘর্ম॒ যা তে॑ দি॒বি শুগিতি॑ তি॒স্র আহু॑তী-র্জুহোতি ।
ছন্দো॑ভিরে॒বাস্য়ৈ॒ভ্য়ো লো॒কেভ্য়॒-শ্শুচ॒মব॑ যজতে । ইয়॒ত্যগ্রে॑ জুহোতি । অথেয়॒ত্যথেয়॑তি । ত্রয়॑ ই॒মে লো॒কাঃ ।
এ॒ভ্য় এ॒ব লো॒কেভ্য়॒-শ্শুচ॒মব॑ যজতে ।
অনু॑ নো॒-ঽদ্য়ানু॑মতি॒রিত্য়া॒হানু॑মত্য়ৈ । দি॒বস্ত্বা॑ পর॒স্পায়া॒ ইত্য়া॑হ । দি॒ব এ॒বেমান্ ঁলো॒কা-ন্দা॑ধার ।
ব্রহ্ম॑ণস্ত্বা পর॒স্পায়া॒ ইত্য়া॑হ ॥ 83 ॥
এ॒ষ্বে॑ব লো॒কেষু॑ প্র॒জা দা॑ধার । প্রা॒ণস্য়॑ ত্বা পর॒স্পায়া॒ ইত্য়া॑হ । প্র॒জাস্বে॒ব প্রা॒ণা-ন্দা॑ধার । শিরো॒ বা এ॒ত-দ্য়॒জ্ঞস্য়॑ । য-ত্প্র॑ব॒র্গ্য়ঃ॑ । অ॒সৌ খলু॒ বা আ॑দি॒ত্য়ঃ প্র॑ব॒র্গ্য়ঃ॑ । তং-য়ঁ-দ্দ॑ক্ষি॒ণা প্র॒ত্যঞ্চ॒-মুদ॑ঞ্চ-মুদ্বা॒সয়ে᳚ত্ ।
জি॒হ্মং-য়ঁ॒জ্ঞস্য়॒ শিরো॑ হরেত্ ।
প্রাঞ্চ॒মুদ্বা॑সযতি । পু॒রস্তা॑দে॒ব য॒জ্ঞস্য়॒ শিরঃ॒ প্রতি॑দধাতি ॥ 84 ॥
প্রাঞ্চ॒মুদ্বা॑সযতি । তস্মা॑দ॒সাবা॑দি॒ত্য়ঃ পু॒রস্তা॒দুদে॑তি । শ॒ফো॒প॒য়॒মান্ধ॒বিত্রা॑ণি॒ ধৃষ্টী॒ ইত্য়॒ন্বব॑হরন্তি ।
সাত্মা॑নমে॒বৈন॒গ্ম্॒ সত॑নু-ঙ্করোতি । সাত্মা॒-ঽমুষ্মি॑ন্ ঁলো॒কে ভ॑বতি ।
য এ॒বং-বেঁদ॑ । ঔদু॑ম্বরাণি ভবন্তি । ঊর্গ্বা উ॑দু॒ম্বরঃ॑ । ঊর্জ॑মে॒বাব॑রুন্ধে । বর্ত্ম॑না॒ বা অ॒ন্বিত্য়॑ ॥ 85 ॥
য॒জ্ঞগ্ম্ রক্ষাগ্ম্॑সি জিঘাগ্ম্সন্তি । সাম্না᳚ প্রস্তো॒তা-ঽন্ববৈ॑তি । সাম॒ বৈ র॑ক্ষো॒হা । রক্ষ॑সা॒মপ॑হত্য়ৈ । ত্রির্নি॒ধন॒মুপৈ॑তি । ত্রয়॑ ই॒মে লো॒কাঃ । এ॒ভ্য় এ॒ব লো॒কেভ্য়ো॒ রক্ষা॒গ্॒স্যপ॑হন্তি । পুরু॑ষঃপুরুষো নি॒ধন॒মুপৈ॑তি । পুরু॑ষঃপুরুষো॒ হি র॑ক্ষ॒স্বী । রক্ষ॑সা॒মপ॑হত্য়ৈ ॥ 86 ॥
য-ত্পৃ॑থি॒ব্য়ামু॑দ্বা॒সয়ে᳚ত্ । পৃ॒থি॒বীগ্ম্ শু॒চা-ঽর্প॑য়েত্ । যদ॒ফ্সু । অ॒প-শ্শু॒চার্প॑য়েত্ । যদোষ॑ধীষু । ওষ॑ধী-শ্শু॒চা-ঽর্প॑য়েত্ ।
য-দ্বন॒স্পতি॑ষু । বন॒স্পতী᳚ঞ্ছু॒চা-ঽর্প॑য়েত্ । হির॑ণ্যন্নি॒ধায়োদ্বা॑সযতি ।
অ॒মৃতং॒-বৈঁ হির॑ণ্যম্ ॥ 87 ॥
অ॒মৃত॑ এ॒বৈন॒-ম্প্রতি॑ষ্ঠাপযতি ।
ব॒ল্গুর॑সি শং॒-য়ুঁধা॑য়া॒ ইতি॒ ত্রিঃ প॑রিষি॒ঞ্চন্পর্য়ে॑তি । ত্রি॒বৃদ্বা অ॒গ্নিঃ । যাবা॑নে॒বাগ্নিঃ । তস্য়॒ শুচগ্ম্॑ শমযতি । ত্রিঃ পুনঃ॒ পর্য়ে॑তি । ষট্-থ্সম্প॑দ্যন্তে । ষড্বা ঋ॒তবঃ॑ । ঋ॒তুভি॑রে॒বাস্য়॒ শুচগ্ম্॑ শমযতি । চতু॑-স্স্রক্তি॒র্নাভি॑র্-ঋ॒তস্য়েত্য়া॑হ ॥ 88 ॥
ই॒য়ং-বাঁ ঋ॒তম্ । তস্য়া॑ এ॒ষ এ॒ব নাভিঃ॑ । য-ত্প্র॑ব॒র্গ্য়ঃ॑ । তস্মা॑দে॒বমা॑হ । সদো॑ বি॒শ্বায়ু॒রিত্য়া॑হ । সদো॒ হীযম্ । অপ॒ দ্বেষো॒ অপ॒ হ্বর॒ ইত্য়া॑হ॒ ভ্রাতৃ॑ব্য়াপনুত্ত্য়ৈ । ঘর্মৈ॒তত্তে-ঽন্ন॑মে॒ত-ত্পুরী॑ষ॒মিতি॑ দ॒দ্ধ্না ম॑ধুমি॒শ্রেণ॑ পূরযতি ।
ঊর্গ্বা অ॒ন্নাদ্য়॒ন্দধি॑ । ঊ॒র্জৈবৈন॑ম॒ন্নাদ্য়ে॑ন॒ সম॑র্ধযতি ॥ 89 ॥
অন॑শনায়ুকো ভবতি । য এ॒বং-বেঁদ॑ ।
রন্তি॒র্নামা॑সি দি॒ব্য়ো গ॑ন্ধ॒র্ব ইত্য়া॑হ ।
রূ॒পমে॒বাস্য়ৈ॒-ত-ন্ম॑হি॒মান॒গ্ম্॒ রন্তি॑-ম্ব॒ন্ধুতাং॒-ব্য়াঁচ॑ষ্টে । সম॒হমায়ু॑ষা॒ স-ম্প্রা॒ণেনেত্য়া॑হ । আ॒শিষ॑মে॒বৈতামাশা᳚স্তে ।
ব্য়॑সৌ যো᳚-ঽস্মা-ন্দ্বেষ্টি॒ যঞ্চ॑ ব॒য়-ন্দ্বি॒ষ্ম ইত্য়া॑হ । অ॒ভি॒চা॒র এ॒বাস্য়ৈ॒ষঃ । অচি॑ক্রদ॒-দ্বৃষা॒ হরি॒রিত্য়া॑হ । বৃষা॒ হ্য়ে॑ষঃ ॥ 90 ॥
বৃষা॒ হরিঃ॑ । ম॒হা-ন্মি॒ত্রো ন দ॑র্শ॒ত ইত্য়া॑হ । স্তৌত্য়ে॒বৈন॑মে॒তত্ । চিদ॑সি সমু॒দ্রয়ো॑নি॒রিত্য়া॑হ । স্বামে॒বৈনং॒-য়োঁনি॑ঙ্গমযতি ।
নম॑স্তে অস্তু॒ মা মা॑ হিগ্ম্সী॒রিত্য়া॒হাহিগ্ম্॑সায়ৈ ।
বি॒শ্বাব॑সুগ্ম্ সোমগন্ধ॒র্বমিত্য়া॑হ । যদে॒বাস্য়॑ ক্রি॒যমা॑ণস্য়ান্ত॒র্যন্তি॑ । তদে॒বাস্য়ৈ॒তেনা প্য়া॑যযতি ।
বি॒শ্বাব॑সুর॒ভি তন্নো॑ গৃণা॒ত্বিত্য়া॑হ ॥ 91 ॥
পূর্ব॑মে॒বোদি॒তম্ । উত্ত॑রেণা॒ভিগৃ॑ণাতি ।
ধিয়ো॑ হিন্বা॒নো ধিয়॒ ইন্নো॑ অব্য়া॒দিত্য়া॑হ । ঋ॒তূনে॒বাস্মৈ॑ কল্পযতি । প্রাসা᳚-ঙ্গন্ধ॒র্বো অ॒মৃতা॑নি বোচ॒দিত্য়া॑হ । প্রা॒ণা বা অ॒মৃতাঃ᳚ ।
প্রা॒ণানে॒বাস্মৈ॑ কল্পযতি । এ॒তত্ত্বন্দে॑ব ঘর্ম দে॒বো দে॒বানুপা॑গা॒ ইত্য়া॑হ । দে॒বো হ্য়ে॑ষ সন্দে॒বানু॒পৈতি॑ । ই॒দম॒হ-ম্ম॑নু॒ষ্য়ো॑ মনু॒ষ্য়া॑নিত্য়া॑হ ॥ 92 ॥
ম॒নু॒ষ্য়ো॑ হি । এ॒ষ স-ন্ম॑নু॒ষ্য়া॑নু॒পৈতি॑ ।
ঈ॒শ্ব॒রো বৈ প্র॑ব॒র্গ্য়॑মুদ্বা॒সযন্ন্॑ । প্র॒জা-ম্প॒শূন্-থ্সো॑মপী॒থম॑নূ॒দ্বাস॒-স্সোম॑পী॒থানু॒মেহি॑ । স॒হ প্র॒জয়া॑ স॒হ রা॒যস্পোষে॒ণেত্য়া॑হ । প্র॒জামে॒ব প॒শূন্-থ্সো॑মপী॒থমা॒ত্ম-ন্ধ॑ত্তে । সু॒মি॒ত্রা ন॒ আপ॒ ওষ॑ধয়-স্স॒ন্ত্বিত্য়া॑হ । আ॒শিষ॑মে॒বৈতামাশা᳚স্তে ।
দু॒র্মি॒ত্রাস্তস্মৈ॑ ভূয়াসু॒-র্য়ো᳚-ঽস্মান্-দ্বেষ্টি॒ যঞ্চ॑ ব॒য়-ন্দ্বি॒ষ্ম ইত্য়া॑হ । অ॒ভি॒চা॒র এ॒বাস্য়ৈ॒ষঃ । প্র বা এ॒ষো᳚-ঽস্মা-ল্লো॒কাচ্চ্য়॑বতে ।
যঃ প্র॑ব॒র্গ্য়॑মুদ্বা॒সয়॑তি । উদু॒ ত্য়-ঞ্চি॒ত্রমিতি॑ সৌ॒রীভ্য়া॑মৃ॒গ্ভ্য়া-ম্পুন॒রেত্য়॒ গার্হ॑পত্য়ে জুহোতি ।
অ॒যম্ ঁবৈ লো॒কো গার্হ॑পত্য়ঃ । অ॒স্মিন্নে॒ব লো॒কে প্রতি॑তিষ্ঠতি ।
অ॒সৌ খলু॒ বা আ॑দি॒ত্য়-স্সু॑ব॒র্গো লো॒কঃ ।
য-থ্সৌ॒রী ভব॑তঃ । তেনৈ॒ব সু॑ব॒র্গা-ল্লো॒কান্নৈতি॑ ॥ 93 ॥
(ব্রহ্ম॑ণস্ত্বা পর॒স্পায়া॒ ইত্য়া॑হ - দধা - ত্য়॒ন্বিত্য়॑ - রক্ষ॒স্বী রক্ষ॑সা॒মপ॑হত্য়ৈ॒ - বৈ হির॑ণ্য় - মাহা - র্ধযতি॒ - হ্য়ে॑ষ - গৃ॑ণা॒ত্বিত্য়া॑হ - মনু॒ষ্য়া॑নিত্য়া॑হা - স্য়ৈ॒ষো᳚ ঽষ্টৌ চ॑) (অ. 9)
অনুবাকং 10
প্র॒জাপ॑তিং॒-বৈঁ দে॒বা-শ্শু॒ক্র-ম্পয়ো॑-ঽদুহ্রন্ন্ । তদে᳚ভ্য়ো॒ ন ব্য়॑ভবত্ । তদ॒গ্নির্ব্য়॑করোত্ । তানি॒ শুক্রি॑য়াণি॒ সামা᳚ন্যভবন্ন্ । তেষাং॒-য়োঁ রসো॒-ঽত্যক্ষ॑রত্ । তানি॑ শুক্রয়॒জূগ্ষ্য়॑ভবন্ন্ ।
শুক্রি॑য়াণাং॒-বাঁ এ॒তানি॒ শুক্রি॑য়াণি । সা॒ম॒প॒য়॒সংবাঁ এ॒তয়ো॑র॒ন্যত্ ।
দে॒বানা॑ম॒ন্যত্পয়ঃ॑ । যদ্গোঃ পয়ঃ॑ ॥ 94 ॥
ত-থ্সাম্নঃ॒ পয়ঃ॑ । যদ॒জায়ৈ॒ পয়ঃ॑ । ত-দ্দে॒বানা॒-ম্পয়ঃ॑ । তস্মা॒-দ্যত্রৈ॒তৈ-র্যজু॑র্ভি॒শ্চর॑ন্তি । ত-ত্পয়॑সা চরন্তি । প্র॒জাপ॑তিমে॒ব ত-দ্দে॒বান্পয়॑সা॒-ঽন্নাদ্য়ে॑ন॒ সম॑র্ধযন্তি । এ॒ষ হ॒ ত্বৈ সা॒ক্ষা-ত্প্র॑ব॒র্গ্য়॑-ম্ভক্ষযতি । যস্য়ৈ॒বং-বিঁ॒দুষঃ॑ প্রব॒র্গ্য়ঃ॑ প্রবৃ॒জ্যতে᳚ । উ॒ত্ত॒র॒বে॒দ্য়া-মুদ্বা॑সয়ে॒ত্-তেজ॑স্কামস্য় । তেজো॒ বা উ॑ত্তরবে॒দিঃ ॥ 95 ॥
তেজঃ॑ প্রব॒র্গ্য়ঃ॑ । তেজ॑সৈ॒ব তেজ॒-স্সম॑র্ধযতি ।
উ॒ত্ত॒র॒বে॒দ্য়া-মুদ্বা॑সয়ে॒-দন্ন॑কামস্য় । শিরো॒ বা এ॒ত-দ্য়॒জ্ঞস্য়॑ । য-ত্প্র॑ব॒র্গ্য়ঃ॑ । মুখ॑মুত্তরবে॒দিঃ ।
শী॒র্ষ্ণৈব মুখ॒গ্ম্॒ সন্দ॑ধাত্য়॒ন্নাদ্য়া॑য় । অ॒ন্না॒দ এ॒ব ভ॑বতি । যত্র॒ খলু॒ বা এ॒তমুদ্বা॑সিতং॒-বঁয়াগ্ম্॑সি প॒র্য়াস॑তে । পরি॒ বৈ তাগ্ম্ সমা᳚-ম্প্র॒জা বয়াগ্॑স্য়াসতে ॥ 96 ॥
তস্মা॑-দুত্তরবে॒দ্য়া-মে॒বোদ্বা॑সয়েত্ । প্র॒জানা᳚-ঙ্গোপী॒থায়॑ । পু॒রো বা॑ প॒শ্চাদ্বোদ্বা॑সয়েত্ । পু॒রস্তা॒দ্বা এ॒তজ্জ্য়োতি॒রুদে॑তি । ত-ত্প॒শ্চান্নিম্রো॑চতি । স্বামে॒বৈন॒ম্ ঁয়োনি॒মনূদ্বা॑সযতি ।
অ॒পা-ম্মদ্ধ্য়॒ উদ্বা॑সয়েত্ । অ॒পাং-বাঁ এ॒তন্মদ্ধ্য়া॒-জ্জ্য়োতি॑রজাযত । জ্য়োতিঃ॑ প্রব॒র্গ্য়ঃ॑ । স্ব এ॒বৈনং॒-য়োঁনৌ॒ প্রতি॑ষ্ঠাপযতি ॥ 97 ॥
য-ন্দ্বি॒ষ্য়াত্ । যত্র॒ স স্য়াত্ । তস্য়া᳚-ন্দি॒শ্য়ুদ্বা॑সয়েত্ ।
এ॒ষ বা অ॒গ্নি-র্বৈ᳚শ্বান॒রঃ । যত্-প্র॑ব॒র্গ্য়ঃ॑ ।
অ॒গ্নিনৈ॒বৈনং॑-বৈঁশ্বান॒রেণা॒ভি প্রব॑র্তযতি ।
ঔদু॑ম্বর্য়া॒গ্ম্॒ শাখা॑য়া॒মুদ্বা॑সয়েত্ ।
ঊর্গ্বা উ॑দু॒ম্বরঃ॑ । অন্ন॑-ম্প্রা॒ণঃ । শুগ্ঘ॒র্মঃ ॥ 98 ॥
ই॒দম॒হ-ম॒মুষ্য়া॑মুষ্য়ায়॒ণস্য়॑ শু॒চা প্রা॒ণমপি॑ দহা॒মীত্য়া॑হ । শু॒চৈবাস্য়॑ প্রা॒ণমপি॑ দহতি । তা॒জগার্তি॒মার্চ্ছ॑তি । যত্র॑ দ॒র্ভা উ॑প॒দীক॑সন্ততা॒-স্স্য়ুঃ । তদুদ্বা॑সয়ে॒-দ্বৃষ্টি॑কামস্য় । এ॒তা বা অ॒পাম॑নূ॒জ্ঝাব॑র্য়ো॒ নাম॑ ।
য-দ্দ॒র্ভাঃ । অ॒সৌ খলু॒ বা আ॑দি॒ত্য় ই॒তো বৃষ্টি॒মুদী॑রযতি । অ॒সাবে॒বাস্মা॑ আদি॒ত্য়ো বৃষ্টি॒ন্নিয়॑চ্ছতি । তা আপো॒ নিয়॑তা॒ ধন্ব॑না যন্তি ॥ 99 ॥
(গোঃ পয়॑ - উত্তরবে॒দি - রা॑সতে - স্থাপযতি - ঘ॒র্মো - য॑ন্তি) (অ. 10)
অনুবাকং 11
প্র॒জাপ॑তি-স্সম্ভ্রি॒যমা॑ণঃ । স॒ম্রাট্-থ্সম্ভৃ॑তঃ । ঘ॒র্মঃ প্রবৃ॑ক্তঃ । ম॒হা॒বী॒র উদ্বা॑সিতঃ । অ॒সৌ খলু॒ বাবৈষ আ॑দি॒ত্য়ঃ । য-ত্প্র॑ব॒র্গ্য়ঃ॑ ।
স এ॒তানি॒ নামা᳚ন্যকুরুত । য এ॒বং-বেঁদ॑ । বি॒দুরে॑ন॒ন্নাম্না᳚ । ব্র॒হ্ম॒বা॒দিনো॑ বদন্তি ॥ 100 ॥
যো বৈ বসী॑য়াগ্ম্ সংয়ঁথানা॒মমু॑প॒চর॑তি ।
পুণ্য়া᳚র্তিং॒-বৈঁ স তস্মৈ॑ কামযতে । পুণ্য়া᳚র্তিমস্মৈ কামযন্তে । য এ॒বং-বেঁদ॑ । তস্মা॑দে॒বং-বিঁ॒দ্বান্ । ঘ॒র্ম ইতি॒ দিবা-ঽঽচ॑ক্ষীত । স॒ম্রাডিতি॒ নক্ত᳚ম্ । এ॒তে বা এ॒তস্য়॑ প্রি॒য়ে ত॒নুবৌ᳚ । এ॒তে অ॑স্য় প্রি॒য়ে নাম॑নী । প্রি॒যয়ৈ॒বৈন॑-ন্ত॒নুবা᳚ ॥ 101 ॥
প্রি॒য়েণ॒ নাম্না॒ সম॑র্ধযতি । কী॒র্তির॑স্য়॒ পূর্বা গ॑চ্ছতি জ॒নতা॑মায়॒তঃ । গা॒য়॒ত্রী দে॒বেভ্য়ো-ঽপা᳚ক্রামত্ । তান্দে॒বাঃ প্র॑ব॒র্গ্য়ে॑ণৈ॒বানু॒ ব্য়॑ভবন্ন্ ।
প্র॒ব॒র্গ্য়ে॑ণাপ্নুবন্ন্ । যচ্চ॑তুর্বিগ্ম্শতিঃ॒ কৃত্বঃ॑ প্রব॒র্গ্য়॑-ম্প্রবৃ॒ণক্তি॑ । গা॒য়॒ত্রীমে॒ব তদনু॒ বিভ॑বতি । গা॒য়॒ত্রীমা᳚প্নোতি । পূর্বা᳚-ঽস্য়॒ জনং॑-য়ঁ॒তঃ কী॒র্তির্গ॑চ্ছতি । বৈ॒শ্ব॒দে॒ব-স্সগ্ম্স॑ন্নঃ ॥ 102 ॥
বস॑বঃ॒ প্রবৃ॑ক্তঃ । সোমো॑-ঽভিকী॒র্যমা॑ণঃ । আ॒শ্বি॒নঃ পয়॑স্য়ানী॒যমা॑নে ।
মারু॒তঃ ক্বথন্ন্॑ । পৌ॒ষ্ণ উদ॑ন্তঃ । সা॒র॒স্ব॒তো বি॒ষ্যন্দ॑মানঃ । মৈ॒ত্র-শ্শরো॑ গৃহীতঃ । তেজ॒ উদ্য়॑তো বা॒য়ুঃ । হ্রি॒যমা॑ণঃ প্র॒জাপ॑তিঃ ।
হূ॒যমা॑নো॒ বাঘু॒তঃ ॥ 103 ॥
অ॒সৌ খলু॒ বাবৈষ আ॑দি॒ত্য়ঃ । য-ত্প্র॑ব॒র্গ্য়ঃ॑ ।
স এ॒তানি॒ নামা᳚ন্যকুরুত । য এ॒বং-বেঁদ॑ । বি॒দুরে॑ন॒ন্নাম্না᳚ । ব্র॒হ্ম॒বা॒দিনো॑ বদন্তি ।
যন্মৃ॒ন্ময়॒-মাহু॑তি॒ন্নাশ্ঞু॒তে-ঽথ॑ । কস্মা॑দে॒ষো᳚-ঽশ্ঞুত॒ ইতি॑ । বাগে॒ষ ইতি॑ ব্রূয়াত্ । বা॒চ্য়ে॑ব বাচ॑-ন্দধাতি ॥ 104 ॥
তস্মা॑দশ্ঞুতে । প্র॒জাপ॑তি॒র্বা এ॒ষ দ্বা॑দশ॒ধা বিহি॑তঃ । য-ত্প্র॑ব॒র্গ্য়ঃ॑ । য-ত্প্রাগ॑বকা॒শেভ্য়ঃ॑ । তেন॑ প্র॒জা অ॑সৃজত । অ॒ব॒কা॒শৈ-র্দে॑বাসু॒রান॑সৃজত । যদূ॒র্ধ্বম॑বকা॒শেভ্য়ঃ॑ ।
তেনান্ন॑মসৃজত । অন্ন॑-ম্প্র॒জাপ॑তিঃ । প্র॒জাপ॑তি॒র্বাবৈষঃ ॥ 105 ॥
(ব॒দ॒ন্তি॒ - ত॒নুবা॒ - সগ্ম্স॑ন্নো - হূ॒যমা॑নো॒ বাঘু॒তো - দ॑ধা - ত্য়ে॒ষঃ) (অ. 11)
অনুবাকং 12
স॒বি॒তা ভূ॒ত্বা প্র॑থ॒মে-ঽহ॒-ন্প্রবৃ॑জ্যতে । তেন॒ কামাগ্ম্॑ এতি । য-দ্দ্বি॒তীয়ে-ঽহ॑ন্-প্রবৃ॒জ্যতে᳚ । অ॒গ্নি-র্ভূ॒ত্বা দে॒বানে॑তি । যত্-তৃ॒তীয়ে-ঽহ॑ন্-প্রবৃ॒জ্যতে᳚ । বা॒য়ু-র্ভূ॒ত্বা প্রা॒ণানে॑তি ।
যচ্চ॑তু॒র্থে-ঽহ॑ন্-প্রবৃ॒জ্যতে᳚ । আ॒দি॒ত্য়ো ভূ॒ত্বা র॒শ্মীনে॑তি । য-ত্প॑ঞ্চ॒মে-ঽহ॑ন্-প্রবৃ॒জ্যতে᳚ । চ॒ন্দ্রমা॑ ভূ॒ত্বা নক্ষ॑ত্রাণ্য়েতি ॥ 106 ॥
য-থ্ষ॒ষ্ঠে-ঽহ॑ন্-প্রবৃ॒জ্যতে᳚ । ঋ॒তু-র্ভূ॒ত্বা সং॑বঁথ্স॒রমে॑তি । য-থ্স॑প্ত॒মে-ঽহ॑ন্-প্রবৃ॒জ্যতে᳚ । ধা॒তা ভূ॒ত্বা শক্ব॑রীমেতি । যদ॑ষ্ট॒মে-ঽহ॑ন্-প্রবৃ॒জ্যতে᳚ । বৃহ॒স্পতি॑-র্ভূ॒ত্বা গা॑য়॒ত্রীমে॑তি ।
য-ন্ন॑ব॒মে-ঽহ॑ন্-প্রবৃ॒জ্যতে᳚ । মি॒ত্রো ভূ॒ত্বা ত্রি॒বৃত॑ ই॒মান্ ঁলো॒কানে॑তি । য-দ্দ॑শ॒মে-ঽহ॑ন্-প্রবৃ॒জ্যতে᳚ । বরু॑ণো ভূ॒ত্বা বি॒রাজ॑মেতি ॥ 107 ॥
যদে॑কাদ॒শে-ঽহ॑ন্-প্রবৃ॒জ্যতে᳚ । ইন্দ্রো॑ ভূ॒ত্বা ত্রি॒ষ্টুভ॑মেতি । য-দ্দ্বা॑দ॒শে-ঽহ॑ন্-প্রবৃ॒জ্যতে᳚ । সোমো॑ ভূ॒ত্বা সু॒ত্য়ামে॑তি । যত্-পু॒রস্তা॑দুপ॒সদা᳚-ম্প্রবৃ॒জ্যতে᳚ । তস্মা॑দি॒তঃ পরাং॑অ॒মূং-লোঁ॒কাগ্স্তপ॑ন্নেতি । যদু॒পরি॑ষ্টা-দুপ॒সদা᳚-ম্প্রবৃ॒জ্যতে᳚ । তস্মা॑দ॒মুতো॒-ঽর্বাংই॒মাং-লোঁ॒কাগ্স্তপ॑ন্নেতি । য এ॒বং-বেঁদ॑ ।
ঐব ত॑পতি ॥ 108 ॥
(নক্ষ॑ত্রাণ্য়েতি - বি॒রাজ॑মেতি - তপতি) (অ. 12)
দে॒বা বৈ স॒ত্রগ্ম্ - সা॑বি॒ত্রম্ - পরি॑শ্রিতে॒ - ব্রহ্ম॒-ন্প্রচ॑রিষ্য়ামো॒ - ঽগ্নিষ্ট্বা॒ - শিরো᳚ গ্রী॒বা - দে॒বস্য়॑ রশ॒নাং - ঁবিশ্বা॒ আশা॒ - ধর্ম॒ যা ত᳚ - প্র॒জাপ॑তিগ্ম্ শু॒ক্রম্ - প্র॒জাপ॑তি-স্সম্ভ্রি॒যমা॑ণঃ -
সবি॒তা ভূ॒ত্বা দ্বাদ॑শ)
(দে॒বা বৈ স॒ত্রগ্ম্ - স খ॑দি॒রঃ - পরি॑শ্রিতে - ঽভিপূ॒র্ব - মথো॒ রক্ষ॑সা॒ম্ - গ্রৈষ্মা॑বে॒বাস্মৈ॒ - ব্রহ্ম॒ বৈ দে॒বানা॒ - মশ্বি॑না ঘ॒র্ম-ম্পা॑তম্ - প্রা॒ণো বৈ - বৃষা॒ হরি॒--র্ যো বৈ বসী॑য়াগ্ম্ সংয়ঁথানা॒ম
ম॒ষ্টোত্ত॑রশ॒তম্)
(দে॒বা বৈ স॒ত্র - মৈব ত॑পতি)
॥ হরিঃ॑ ওম্ ॥
॥ কৃষ্ণ যজুর্বেদীয় তৈত্তিরীয় আরণ্যকে পঞ্চমঃ প্রপাঠক-স্সমাপ্তঃ ॥
