কৃষ্ণ যজুর্বেদীয় তৈত্তিরীয় আরণ্যকে সপ্তমঃ প্রপাঠকঃ - শীক্ষাবল্লী

ও-ন্নমঃ পরমাত্মনে, শ্রী মহাগণপতয়ে নমঃ,
শ্রী গুরুভ্য়ো নমঃ । হ॒রিঃ॒ ওম্ ॥

অনুবাকং 1
শন্নো॑ মি॒ত্র-শ্শং-বঁরু॑ণঃ । শন্নো॑ ভবত্বর্য়॒মা । শন্ন॒ ইন্দ্রো॒ বৃহ॒স্পতিঃ॑ । শন্নো॒ বিষ্ণু॑-রুরুক্র॒মঃ । নমো॒ ব্রহ্ম॑ণে । নম॑স্তে বায়ো । ত্বমে॒ব প্র॒ত্যক্ষ॒-ম্ব্রহ্মা॑সি । ত্বমে॒ব প্র॒ত্যক্ষ॒-ম্ব্রহ্ম॑ বদিষ্য়ামি । ঋ॒তং-বঁ॑দিষ্য়ামি । স॒ত্য়ং-বঁ॑দিষ্য়ামি । তন্মাম॑বতু । তদ্ব॒ক্তার॑মবতু । অব॑তু॒ মাম্ । অব॑তু ব॒ক্তার᳚ম্ ॥ ওং শান্তি॒-শ্শান্তি॒-শ্শান্তিঃ॑ ॥ 1 ॥
(স॒ত্ত্যম্ ঁব॑দিষ্য়ামি॒ পঞ্চ॑ চ) (অ. 1)

অনুবাকং 2
শীক্ষাং-ব্য়াঁ᳚খ্য়াস্য়া॒মঃ । বর্ণ॒-স্স্বরঃ ।
মাত্রা॒ বলম্ । সাম॑ সন্তা॒নঃ ।
ইত্য়ুক্ত-শ্শী᳚ক্ষাদ্ধ্য়া॒য়ঃ ॥ 2 ॥
(শীক্ষা-ম্পঞ্চ॑) (অ. 2)
অনুবাকং 3
স॒হ নৌ॒ যশঃ । স॒হ নৌ ব্র॑হ্মব॒র্চসম্ ॥
অথাত-স্সগ্​ম্হিতায়া উপনিষদং-ব্য়াঁ᳚খ্য়াস্য়া॒মঃ । পঞ্চস্বধি-ক॑রণে॒ষু । অধিলোকমধি-জ্য়ৌতিষ-মধিবিদ্য়-মধিপ্রজ॑-মদ্ধ্য়া॒ত্মম্ । তা মহাসগ্​ম্হিতা ই॑ত্য়াচ॒ক্ষতে ॥ অথা॑ধি লো॒কম্ । পৃথিবী পূ᳚র্বরূ॒পম্ । দ্য়ৌরুত্ত॑ররূ॒পম্ । আকা॑শ-স্স॒ন্ধিঃ ॥ 3 ॥

বায়ু॑-স্সন্ধা॒নম্ । ইত্য়॑ধি লো॒কম্ ॥
অথা॑ধি জ্য়ৌ॒তিষম্ । অগ্নিঃ পূ᳚র্ব রূ॒পম্ । আদিত্য় উত্ত॑ররূ॒পম্ । আ॑প-স্স॒ন্ধিঃ । বৈদ্য়ুত॑-স্সন্ধা॒নম্ । ইত্য়॑ধি জ্য়ৌ॒তিষম্ ॥ অথা॑ধি বি॒দ্যম্ । আচার্য়ঃ পূ᳚র্ব রূ॒পম্ ॥ 4 ॥

অন্তেবাস্য়ুত্ত॑ররূ॒পম্ । বি॑দ্য়া স॒ন্ধিঃ ।
প্রবচনগ্​ম্॑ সন্ধা॒নম্ । ইত্য়॑ধি বি॒দ্যম্ ॥
অথাধি॒প্রজম্ । মাতা পূ᳚র্বরূ॒পম্ । পিতোত্ত॑ররূ॒পম্ । প্র॑জা স॒ন্ধিঃ । প্রজননগ্​ম্॑ সন্ধা॒নম্ । ইত্যধি॒প্রজম্ ॥ 5 ॥

অথাদ্ধ্য়া॒ত্মম্ । অধরাহনুঃ পূ᳚র্ব রূ॒পম্ । উত্তরাহনু-রুত্ত॑ররূ॒পম্ । বা-খ্স॒ন্ধিঃ । জিহ্বা॑ সন্ধা॒নম্ । ইত্যদ্ধ্য়া॒ত্মম্ ॥ ইতী মাম॑হা স॒গ্​ম্॒হিতাঃ ॥ য এবমেতা মহাসগ্​ম্হিতা ব্য়াখ্য়া॑তা বে॒দ । সন্ধীযতে প্রজ॑য়া প॒শুভিঃ । ব্রহ্মবর্চ-সেনান্নাদ্য়েন সুবর্গ্য়েণ॑ (সুবর্গেণ॑) লোকে॒ন ॥ 6 ॥
(স॒ন্ধি - রাচার্য়ঃ পূ᳚র্বরূ॒প - মিত্যধি॒প্রজম্ - ঁলো॑কে॒ন) (অ. 3)

অনুবাকং 4
য শ্ছন্দ॑সা-মৃষ॒ভো বি॒শ্বরূ॑পঃ । ছন্দো॒ভ্য়ো-ঽদ্ধ্য়॒মৃতা᳚-থ্সম্ব॒ভূব॑ । স মেন্দ্রো॑ মে॒ধয়া᳚ স্পৃণোতু । অ॒মৃত॑স্য় দেব॒ ধার॑ণো ভূয়াসম্ ॥
শরী॑র-ম্মে॒ বিচ॑র্​ষণম্ । জি॒হ্বা মে॒ মধু॑মত্তমা । কর্ণা᳚ভ্য়া॒-ম্ভূরি॒ বিশ্রু॑বম্ । ব্রহ্ম॑ণঃ কো॒শো॑-ঽসি মে॒ধয়া ঽপি॑হিতঃ । শ্রু॒ত-ম্মে॑ গোপায় ॥ আ॒বহ॑ন্তী বিতন্বা॒না ॥ 7 ॥
কু॒র্বা॒ণা চীর॑-মা॒ত্মনঃ॑ । বাসাগ্​ম্॑সি॒ মম॒ গাব॑শ্চ । অ॒ন্ন॒পা॒নে চ॑ সর্ব॒দা । ততো॑ মে॒ শ্রিয়॒-মাব॑হ । লো॒ম॒শা-ম্প॒শুভি॑-স্স॒হ স্বাহা᳚ ॥ আমা॑যন্তু ব্রহ্মচা॒রিণ॒-স্স্বাহা᳚ ।
বিমা॑-ঽঽযন্তু ব্রহ্মচা॒রিণ॒-স্স্বাহা᳚ । প্রমা॑-ঽঽযন্তু ব্রহ্মচা॒রিণ॒-স্স্বাহা᳚ । দমা॑যন্তু ব্রহ্মচা॒রিণ॒-স্স্বাহা᳚ । শমা॑যন্তু ব্রহ্মচা॒রিণ॒-স্স্বাহা᳚ ॥ 8 ॥

যশো॒ জনে॑-ঽসানি॒ স্বাহা᳚ । শ্রেয়া॒ন্॒. বস্য়॑সো-ঽসানি॒ স্বাহা᳚ ॥ ত-ন্ত্বা॑ ভগ॒ প্রবি॑শানি॒ স্বাহা᳚ । স মা॑ ভগ॒ প্রবি॑শ॒ স্বাহা᳚ । তস্মি᳚ন-থ্স॒হস্র॑ শাখে । নিভ॑গা॒হ-ন্ত্বয়ি॑ মৃজে॒ স্বাহা᳚ ॥ যথা-ঽঽপঃ॒ প্রব॑তা॒-ঽঽযন্তি॑ । যথা॒ মাসা॑ অহর্জ॒রম্ ।
এ॒ব-ম্মা-ম্ব্র॑হ্মচা॒রিণঃ॑ ।
ধাত॒রায়॑ন্তু স॒র্বত॒-স্স্বাহা᳚ ॥
প্র॒তি॒বে॒শো॑-ঽসি॒ প্র মা॑ ভাহি॒ প্র মা॑ পদ্যস্ব ॥ 9 ॥
(বি॒ত॒ন্বা॒না - শমা॑যন্তু ব্রহ্মচা॒রিণ॒-স্স্বাহা॒-ধাত॒রায়॑ন্তু স॒র্বত॒-স্স্বাহৈক॑-ঞ্চ) (অ. 4)
অনুবাকং 5
ভূ-র্ভুব॒-স্সুব॒-রিতি॒ বা এ॒তা স্তি॒স্রো ব্য়াহৃ॑তয়ঃ ॥
তাসা॑মুহস্মৈ॒ তা-ঞ্চ॑তু॒র্থীম্ । মাহা॑চমস্য়ঃ॒ প্রবে॑দযতে । মহ॒ ইতি॑ ॥ ত-দ্ব্রহ্ম॑ । স আ॒ত্মা । অঙ্গা᳚ন্য়॒ন্য়া দে॒বতাঃ᳚ ॥ ভূরিতি॒ বা অ॒য়ং-লোঁ॒কঃ । ভুব॒ ইত্য়॒ন্তরি॑ক্ষম্ । সুব॒-রিত্য়॒সৌ লো॒কঃ ॥ 10 ॥

মহ॒ ইত্য়া॑দি॒ত্য়ঃ । আ॒দি॒ত্য়েন॒ বাব সর্বে॑ লো॒কা মহী॑যন্তে ॥ ভূরিতি॒ বা অ॒গ্নিঃ । ভুব॒ ইতি॑ বা॒য়ুঃ । সুব॒রিত্য়া॑দি॒ত্য়ঃ । মহ॒ ইতি॑ চ॒ন্দ্রমাঃ᳚ । চ॒ন্দ্রম॑সা॒ বাব সর্বা॑ণি॒ জ্য়োতীগ্​ম্॑ষি॒ মহী॑যন্তে ॥ ভূ-রিতি॒ বা ঋচঃ॑ । ভুব॒ ইতি॒ সামা॑নি ।
সুব॒ রিতি॒ যজূগ্​ম্॑ষি ॥ 11 ॥

মহ॒ ইতি॒ ব্রহ্ম॑ । ব্রহ্ম॑ণা॒ বাব সর্বে॑ বে॒দা মহী॑যন্তে ॥ ভূরিতি॒ বৈ প্রা॒ণঃ । ভুব॒ ইত্য়॑পা॒নঃ । সুব॒রিতি॑ ব্য়া॒নঃ । মহ॒ ইত্যন্ন᳚ম্ । অন্নে॑ন॒ বাব সর্বে᳚ প্রা॒ণা মহী॑যন্তে ॥ তা বা এ॒তা-শ্চত॑স্র শ্চতু॒র্ধা । চত॑স্র-শ্চতস্রো॒ ব্য়াহৃ॑তয়ঃ । তা যো বেদ॑ ।
স বে॑দ॒ ব্রহ্ম॑ । সর্বে᳚-ঽস্মৈ দে॒বা ব॒লিমাব॑হন্তি ॥ 12 ॥
(অ॒সৌ লো॒কো - যজূগ্​ম্॑ষি॒ - বেদ॒ দ্বে চ॑) (অ. 5)
অনুবাকং 6
স য এ॒ষো᳚-ঽন্তর্-হৃ॑দয় আকা॒শঃ । তস্মি॑ন্ন॒য়-ম্পুরু॑ষো মনো॒ময়ঃ॑ । অমৃ॑তো হির॒ণ্ময়ঃ॑ ॥ অন্ত॑রেণ॒ তালু॑কে । য এ॒ষ স্তন॑ ইবাব॒লম্ব॑তে ।
সে᳚ন্দ্র যো॒নিঃ । যত্রা॒সৌ কে॑শা॒ন্তো বি॒বর্ত॑তে । ব্য়॒পোহ্য়॑ শীর্​ষকপা॒লে ॥ ভূরিত্য়॒গ্নৌ প্রতি॑তিষ্ঠতি । ভুব॒ ইতি॑ বা॒য়ৌ ॥ 13 ॥

সুব॒রিত্য়া॑দি॒ত্য়ে । মহ॒ ইতি॒ ব্রহ্ম॑ণি । আ॒প্নোতি॒ স্বারা᳚জ্যম্ । আ॒প্নোতি॒ মন॑স॒স্পতি᳚ম্ । বাক্প॑তি॒ শ্চক্ষু॑ষ্পতিঃ । শ্রোত্র॑পতি র্বি॒জ্ঞান॑পতিঃ ।
এ॒ত-ত্ততো॑ ভবতি । আ॒কা॒শ শ॑রীর॒-ম্ব্রহ্ম॑ ।
স॒ত্য়াত্ম॑ প্রা॒ণারা॑ম॒-ম্মন॑ আনন্দম্ । শান্তি॑ সমৃদ্ধ-ম॒মৃত᳚ম্ ॥
ইতি॑ প্রাচীন যো॒গ্য়োপা᳚স্ব ॥ 14 ॥
(বা॒য়া-ব॒মৃত॒ মেক॑-ঞ্চ) (অ. 6)

অনুবাকং 7
পৃ॒থি॒ব্য়॑ন্তরি॑ক্ষ॒-ন্দ্য়ৌ-র্দিশো॑-ঽবান্তরদি॒শাঃ । অ॒গ্নি-র্বা॒য়ু-রা॑দি॒ত্য়-শ্চ॒ন্দ্রমা॒ নক্ষ॑ত্রাণি ।
আপ॒ ওষ॑ধয়ো॒ বন॒স্পত॑য় আকা॒শ আ॒ত্মা । ইত্য়॑ধিভূ॒তম্ ॥ অথাদ্ধ্য়া॒ত্মম্ । প্রা॒ণো ব্য়া॒নো॑-ঽপা॒ন উ॑দা॒ন-স্স॑মা॒নঃ । চক্ষু॒-শ্শ্রোত্র॒-ম্মনো॒ বা-ক্ত্বক্ ।
চর্ম॑ মা॒গ্​ম্॒ সগ্গ্​স্নাবাস্থি॑ ম॒জ্জা ॥
এ॒ত দ॑ধিবি॒ধায়॒র্॒ষি॒ রবো॑চত্ ।
পাঙ্ক্তং॒-বাঁ ই॒দগ্​ম্ সর্ব᳚ম্ ।
পাঙ্ক্ত॑নৈ॒ব পাঙ্ক্তগ্গ্॑ স্পৃণো॒তীতি॑ ॥ 15 ॥
(সর্ব॒মেক॑-ঞ্চ) (অ. 7)

অনুবাকং 8
ও-মিতি॒ ব্রহ্ম॑ ॥ ও-মিতী॒দগ্​ম্ সর্ব᳚ম্ ॥
ওমিত্য়ে॒ত-দ॑নুকৃতি হস্ম॒ বা অ॒প্য়ো শ্রা॑ব॒য়েত্য়া-শ্রা॑বযন্তি । ও-মিতি॒ সামা॑নি গাযন্তি । ওগ্​ম্ শোমিতি॑ শ॒স্ত্রাণি॑ শগ্​ম্সন্তি । ওমিত্য়॑দ্ধ্ব॒র্য়ুঃ প্র॑তিগ॒র-ম্প্রতি॑গৃণাতি । ওমিতি॒ ব্রহ্মা॒ প্রসৌ॑তি ।
ওমিত্য়॑গ্নিহো॒ত্র-মনু॑জানাতি । ওমিতি॑ ব্রাহ্ম॒ণঃ প্র॑ব॒ক্ষ্যন্না॑হ॒ ব্রহ্মোপা᳚প্নবা॒নীতি॑ ।
ব্রহ্মৈ॒বো-পা᳚প্নোতি ॥ 16 ॥
(ও-ন্দশ॑) (অ. 8)

অনুবাকং 9
ঋত-ঞ্চ স্বাদ্ধ্য়ায় প্রব॑চনে॒ চ ।
সত্য়-ঞ্চ স্বাদ্ধ্য়ায় প্রব॑চনে॒ চ ।
তপশ্চ স্বাদ্ধ্য়ায় প্রব॑চনে॒ চ ।
দমশ্চ স্বাদ্ধ্য়ায় প্রব॑চনে॒ চ ।
শমশ্চ স্বাদ্ধ্য়ায় প্রব॑চনে॒ চ ।
অগ্নযশ্চ স্বাদ্ধ্য়ায় প্রব॑চনে॒ চ ।
অগ্নিহোত্র-ঞ্চ স্বাদ্ধ্য়ায় প্রব॑চনে॒ চ ।
অতিথযশ্চ স্বাদ্ধ্য়ায় প্রব॑চনে॒ চ ।
মানুষ-ঞ্চ স্বাদ্ধ্য়ায় প্রব॑চনে॒ চ ।
প্রজা চ স্বাদ্ধ্য়ায় প্রব॑চনে॒ চ ।
প্রজনশ্চ স্বাদ্ধ্য়ায় প্রব॑চনে॒ চ ।
প্রজাতিশ্চ স্বাদ্ধ্য়ায় প্রব॑চনে॒ চ ॥
সত্যমিতি সত্যবচা॑ রাথী॒ তরঃ ।
তপ ইতি তপোনিত্য়ঃ পৌ॑রুশি॒ষ্টিঃ ।
স্বাদ্ধ্য়ায় প্রবচনে এবেতি নাকো॑ মৌদ্গ॒ল্য়ঃ ।
তদ্ধি তপ॑স্তদ্ধি॒ তপঃ ॥ 17 ॥
(প্রজা চ স্বাদ্ধ্য়াযপ্রব॑চনে॒ চ ষট্চ॑) (অ. 9)

অনুবাকং 10
অ॒হং-বৃঁ॒ক্ষস্য়॒ রেরি॑বা ।
কী॒র্তিঃ পৃ॒ষ্ঠ-ঙ্গি॒রেরি॑ব ।
ঊ॒র্ধ্ব প॑বিত্রো বা॒জিনী॑ব স্ব॒মৃত॑মস্মি । দ্রবি॑ণ॒গ্​ম্॒ সব॑র্চসম্ । সুমেধা অ॑মৃতো॒ক্ষিতঃ । ইতি ত্রিশঙ্কো-র্বেদা॑নুব॒চনম্ ॥ 18 ॥
(অ॒হগ্​ম্ ষট্) (অ. 10)

অনুবাকং 11
বেদমনূচ্য়া- ঽচার্য়োন্তেবাসিন-ম॑নুশা॒স্তি ॥
সত্য়ং॒-বঁদ । ধর্ম॒-ঞ্চর ॥ স্বাদ্ধ্য়ায়া᳚ন্মা প্র॒মদঃ । আচার্য়ায় প্রিয়-ন্ধনমাহৃত্য় প্রজাতন্তু-ম্মা ব্য়॑বচ্ছে॒থ্সীঃ । সত্য়ান্ন প্রম॑দিত॒ব্যম্ । ধর্মান্ন প্রম॑দিত॒ব্যম্ । কুশলান্ন প্রম॑দিত॒ব্যম্ ।
ভূত্য়ৈ ন প্রম॑দিত॒ব্যম্ । স্বাদ্ধ্য়ায় প্রবচনাভ্য়া-ন্ন প্রম॑দিত॒ব্যম্ ॥ 19 ॥

দেবপিতৃকার্য়াভ্য়া-ন্ন প্রম॑দিত॒ব্যম্ ॥
মাতৃ॑দেবো॒ ভব । পিতৃ॑দেবো॒ ভব ।
আচার্য়॑ দেবো॒ ভব । অতিথি॑দেবো॒ ভব ॥
যান্যনবদ্য়ানি॑ কর্মা॒ণি । তানি সেবি॑তব্য়া॒নি ।
নো ই॑তরা॒ণি ॥ যান্যস্মাকগ্​ম্ সুচ॑রিতা॒নি । তানি ত্বয়ো॑পাস্য়া॒নি ॥ 20 ॥

নো ই॑তরা॒ণি ॥ যে কে চাস্ম-চ্ছ্রেয়াগ্​ম্॑সো ব্রা॒হ্মণাঃ । তেষা-ন্ত্বয়া-ঽঽসনে ন প্রশ্ব॑সিত॒ব্যম্ ॥ শ্রদ্ধ॑য়া দে॒যম্ । অশ্রদ্ধ॑য়া-ঽদে॒যম্ । শ্রি॑য়া দে॒যম্ । হ্রি॑য়া দে॒যম্ । ভি॑য়া দে॒যম্ । সং​বিঁ॑দা দে॒যম্ ॥
অথ যদি তে কর্মবিচিকিথ্সা বা বৃত্ত বিচিকি॑থ্সা বা॒ স্য়াত্ ॥ 21 ॥

যে তত্র ব্রাহ্মণা᳚-স্সম্ম॒র॒.শিনঃ । যুক্তা॑ আয়ু॒ক্তাঃ ।
অলূক্ষা॑ ধর্ম॑কামা॒-স্স্য়ুঃ । যথা তে॑ তত্র॑ বর্তে॒রন্ন্ । তথা তত্র॑ বর্তে॒থাঃ ॥ অথাভ্য়া᳚খ্য়াতে॒ষু । যে তত্র ব্রাহ্মণা᳚-স্সম্ম॒র্॒শিনঃ । যুক্তা॑ আয়ু॒ক্তাঃ ।
অলূক্ষা॑ ধর্ম॑ কামা॒-স্স্য়ুঃ । যথা তে॑ তেষু॑ বর্তে॒রন্ন্ ॥ 22 ॥

তথা তেষু॑ বর্তে॒থাঃ ॥ এষ॑ আদে॒শঃ ।
এষ উ॑পদে॒শঃ । এষা বে॑দোপ॒নিষত্ । এতদ॑নুশা॒সনম্ । এব মুপা॑সিত॒ব্যম্ । এব মুচৈত॑দুপা॒স্যম্ ॥ 23 ॥
(স্বাদ্ধ্য়াযপ্রবচনাভ্য়া-ন্ন প্রম॑দিত॒ব্যম্ - তানিত্বয়ো॑পাস্য়া॒নি - স্য়াত্ - তেষু॑ বর্তে॒রন্থ্ - +স॒প্ত চ॑) (অ. 11)
অনুবাকং 12
শন্নো॑ মি॒ত্র-শ্শং-বঁরু॑ণঃ । শন্নো॑ ভবত্বর্য়॒মা ।
শন্ন॒ ইন্দ্রো॒ বৃহ॒স্পতিঃ॑ । শন্নো॒ বিষ্ণু॑ রুরুক্র॒মঃ । নমো॒ ব্রহ্ম॑ণে । নম॑স্তে বায়ো ।
ত্বমে॒ব প্র॒ত্যক্ষ॒-ম্ব্রহ্মা॑সি ।
ত্বামে॒ব প্র॒ত্যক্ষ॒-ম্ব্রহ্মা বা॑দিষম্ ।
ঋ॒তম॑বাদিষম্ । স॒ত্যম॑বাদিষম্ । তন্মামা॑বীত্ । তদ্ব॒ক্তার॑মাবীত্ । আবী॒ন্মাম্ ।
আবী᳚দ্ব॒ক্তার᳚ম্ ॥ ওং শান্তি॒-শ্শান্তি॒-শ্শান্তিঃ॑ ॥ 24 ॥
(স॒ত্যম॑বাদিষ॒-ম্পঞ্চ॑ চ) (অ. 12)
॥ ইতি শীক্ষাবল্লী সমাপ্তা ॥

॥ হরিঃ॑ ওম্ ॥
॥ কৃষ্ণ যজুর্বেদীয় তৈত্তিরীয় আরণ্যকে সপ্তমঃ প্রপাঠক-স্সমাপ্তঃ ॥