॥ dashamaH sargaH ॥
॥ chaturachaturbhujaH ॥
atraaMtarE masRRiNarOshhavashaamaseem-niHshvaasaniHsahamukheeM sumukheemupEtya ।
savreeDameekshhitasakheevadanaaM dinaaMtE saanaMdagadgadapadaM harirityuvaacha ॥ 53 ॥
॥ geetam 19 ॥
vadasi yadi kiMchidapi daMtaruchikaumudee harati daratimiramatighOram ।
sphuradadharaseedhavE tava vadanachaMdramaa rOchayatu lOchanachakOram ॥
priyE chaarusheelE muncha mayi maanamanidaanaM sapadi madanaanalO dahati mama maanasaM dEhi mukhakamalamadhupaanam ॥ 1 ॥
satyamEvaasi yadi sudati mayi kOpinee dEhi kharanakhasharaghaatam ।
ghaTaya bhujabaMdhanaM janaya radakhaMDanaM yEna vaa bhavati sukhajaatam ॥ 2 ॥
tvamasi mama bhooshhaNaM tvamasi mama jeevanaM tvamasi bhavajaladhiratnam ।
bhavatu bhavateeha mayi satatamanOrOdhini tatra mama hRRidayamatiratnam ॥ 3 ॥
neelanalinaabhamapi tanvi tava lOchanaM dhaarayati kOkanadaroopam ।
kusumasharabaaNabhaavEna yadi ranjayasi kRRishhNamidamEtadanuroopam ॥ 4 ॥
sphuratu kuchakuMbhayOrupari maNimanjaree ranjayatu tava hRRidayadEsham ।
rasatu rashanaapi tava ghanajaghanamaMDalE ghOshhayatu manmathanidEsham ॥ 5 ॥
sthalakamalaganjanaM mama hRRidayaranjanaM janitaratirangaparabhaagam ।
bhaNa masRRiNavaaNi karavaaNi padapankajaM sarasalasadalaktakaraagam ॥ 6 ॥
smaragaralakhaMDanaM mama shirasi maMDanaM dEhi padapallavamudaaram ।
jvalati mayi daaruNO madanakadanaaruNO haratu tadupaahitavikaaram ॥ 7 ॥
iti chaTulachaaTupaTuchaaru muravairiNO raadhikaamadhi vachanajaatam ।
jayati padmaavateeramaNajayadEvakavi-bhaarateebhaNitamatishaatam ॥ 8 ॥
parihara kRRitaatankE shankaaM tvayaa satataM ghana-stanajaghanayaakraaMtE svaaMtE paraanavakaashini ।
vishati vitanOranyO dhanyO na kO.api mamaaMtaraM stanabharapareeraMbhaaraMbhE vidhEhi vidhEyataam ॥ 54 ॥
mugdhE vidhEhi mayi nirdayadaMtadaMsha-dOrvallibaMdhanibiDastanapeeDanaani ।
chaMDi tvamEva mudamancha na panchabaaNa-chaMDaalakaaMDadalanaadasavaH prayaaMtu ॥ 55 ॥
vyathayati vRRithaa maunaM tanvi prapanchaya panchamaM taruNee madhuraalaapaistaapaM vinOdaya dRRishhTibhiH ।
sumukhi vimukheebhaavaM taavadvimuncha na muncha maaM svayamatishayasnigdhO mugdhE priyi.ahamupasthitaH ॥ 56 ॥
baMdhookadyutibaaMdhavO.ayamadharaH snigdhO madhookachchavi-rgaMDashchaMDi chakaasti neelanalinashreemOchanaM lOchanam ।
naasaabhyEti tilaprasoonapadaveeM kuMdaabhadaaMti priyE praayastvanmukhasEvayaa vijayatE vishvaM sa pushhpaayudhaH ॥ 57 ॥
dRRishau tava madaalasE vadanamiMdusaMdeepakaM gatirjanamanOramaa vidhutaraMbhamoorudvayam ।
ratistava kalaavatee ruchirachitralEkhE bhruvaa-vahO vibudhayauvanaM vahasi tanvee pRRithveegataa ॥ 58 ॥
॥ iti shreegeetagOviMdE maanineevarNanE chaturachaturbhujO naama dashamaH sargaH ॥
Browse Related Categories:
