॥ dviteeyaH sargaH ॥
॥ aklEshakEshavaH ॥
viharati vanE raadhaa saadhaaraNapraNayE harau vigalitanijOtkarshhaadeershhyaavashEna gataanyataH ।
kvachidapi lataakunjE gunjanmadhuvratamaMDalee-mukharashikharE leenaa deenaapyuvaacha rahaH sakheem ॥ 14 ॥
॥ geetam 5 ॥
saMcharadadharasudhaamadhuradhvanimukharitamOhanavaMsham ।
chalitadRRiganchalachanchalamaulikapOlavilOlavataMsam ॥
raasE harimiha vihitavilaasaM smarati manO mama kRRitaparihaasam ॥ 1 ॥
chaMdrakachaarumayoorashikhaMDakamaMDalavalayitakEsham ।
prachurapuraMdaradhanuranuranjitamEduramudirasuvEsham ॥ 2 ॥
gOpakadaMbanitaMbavateemukhachuMbanalaMbhitalObham ।
baMdhujeevamadhuraadharapallavamullasitasmitashObham ॥ 3 ॥
vipulapulakabhujapallavavalayitavallavayuvatisahasram ।
karacharaNOrasi maNigaNabhooshhaNakiraNavibhinnatamisram ॥ 4 ॥
jaladapaTalavaladiMduvinaMdakachaMdanatilakalalaaTam ।
peenapayOdharaparisaramardananirdayahRRidayakavaaTam ॥ 5 ॥
maNimayamakaramanOharakuMDalamaMDitagaMDamudaaram ।
peetavasanamanugatamunimanujasuraasuravaraparivaaram ॥ 6 ॥
vishadakadaMbatalE militaM kalikalushhabhayaM shamayaMtam ।
maamapi kimapi tarangadanangadRRishaa manasaa ramayaMtam ॥ 7 ॥
shreejayadEvabhaNitamatisuMdaramOhanamadhuripuroopam ।
haricharaNasmaraNaM prati saMprati puNyavataamanuroopam ॥ 8 ॥
gaNayati guNagraamaM bhaamaM bhramaadapi nEhatE vahati cha paritOshhaM dOshhaM vimunchati doorataH ।
yuvatishhu valastRRishhNE kRRishhNE vihaariNi maaM vinaa punarapi manO vaamaM kaamaM karOti karOmi kim ॥ 15 ॥
॥ geetam 6 ॥
nibhRRitanikunjagRRihaM gatayaa nishi rahasi nileeya vasaMtam ।
chakitavilOkitasakaladishaa ratirabhasarasEna hasaMtam ॥
sakhi hE kEshimathanamudaaram ramaya mayaa saha madanamanOrathabhaavitayaa savikaaram ॥ 1 ॥
prathamasamaagamalajjitayaa paTuchaaTushatairanukoolam ।
mRRidumadhurasmitabhaashhitayaa shithileekRRitajaghanadukoolam ॥ 2 ॥
kisalayashayananivEshitayaa chiramurasi mamaiva shayaanam ।
kRRitapariraMbhaNachuMbanayaa parirabhya kRRitaadharapaanam ॥ 3 ॥
alasanimeelitalOchanayaa pulakaavalilalitakapOlam ।
shramajalasakalakalEvarayaa varamadanamadaadatilOlam ॥ 4 ॥
kOkilakalaravakoojitayaa jitamanasijataMtravichaaram ।
shlathakusumaakulakuMtalayaa nakhalikhitaghanastanabhaaram ॥ 5 ॥
charaNaraNitamaninoopurayaa paripooritasuratavitaanam ।
mukharavishRRinkhalamEkhalayaa sakachagrahachuMbanadaanam ॥ 6 ॥
ratisukhasamayarasaalasayaa daramukulitanayanasarOjam ।
niHsahanipatitatanulatayaa madhusoodanamuditamanOjam ॥ 7 ॥
shreejayadEvabhaNitamidamatishayamadhuripunidhuvanasheelam ।
sukhamutkaMThitagOpavadhookathitaM vitanOtu saleelam ॥ 8 ॥
hastasrastavilaasavaMshamanRRijubhroovallimadballavee-vRRiMdOtsaaridRRigaMtaveekshhitamatisvEdaardragaMDasthalam ।
maamudveekshhya vilakshhitaM smitasudhaamugdhaananaM kaananE gOviMdaM vrajasuMdareegaNavRRitaM pashyaami hRRishhyaami cha ॥ 16 ॥
duraalOkastOkastabakanavakaashOkalatikaa-vikaasaH kaasaarOpavanapavanO.api vyathayati ।
api bhraamyadbhRRingeeraNitaramaNeeyaa na mukula-prasootishchootaanaaM sakhi shikhariNeeyaM sukhayati ॥ 17 ॥
॥ iti geetagOviMdE aklEshakEshavO naama dviteeyaH sargaH ॥
Browse Related Categories:
