॥ EkaadashaH sargaH ॥
॥ saanaMdadaamOdaraH ॥
suchiramanunayanE preeNayitvaa mRRigaakshheeM gatavati kRRitavEshE kEshavE kunjashayyaam ।
rachitaruchirabhooshhaaM dRRishhTimOshhE pradOshhE sphurati niravasaadaaM kaapi raadhaaM jagaada ॥ 59 ॥
॥ geetam 20 ॥
virachitachaaTuvachanarachanaM charaNE rachitapraNipaatam ।
saMprati manjulavanjulaseemani kElishayanamanuyaatam ॥
mugdhE madhumathanamanugatamanusara raadhikE ॥ 1 ॥
ghanajaghanastanabhaarabharE daramaMtharacharaNavihaaram ।
mukharitamaNeemanjeeramupaihi vidhEhi maraalavikaaram ॥ 2 ॥
shRRiNu ramaNeeyataraM taruNeejanamOhanamadhupaviraavam ।
kusumasharaasanashaasanabaMdini pikanikarE bhaja bhaavam ॥ 3 ॥
anilataralakisalayanikarENa karENa lataanikuraMbam ।
prEraNamiva karabhOru karOti gatiM pratimuncha vilaMbam ॥ 4 ॥
sphuritamanangatarangavashaadiva soochitaharipariraMbham ।
pRRichCha manOharahaaravimalajaladhaaramamuM kuchakuMbham ॥ 5 ॥
adhigatamakhilasakheebhiridaM tava vapurapi ratiraNasajjam ।
chaMDi rasitarashanaaravaDiMDimamabhisara sarasamalajjam ॥ 6 ॥
smarasharasubhaganakhEna karENa sakheemavalaMbya saleelam ।
chala valayakvaNeetairavabOdhaya haramapi nijagatisheelam ॥ 7 ॥
shreejayadEvabhaNitamadhareekRRitahaaramudaasitavaamam ।
harivinihitamanasaamadhitishhThatu kaMThataTeemaviraamam ॥ 8 ॥
saa maaM drakshhyati vakshhyati smarakathaaM pratyangamaalinganaiH preetiM yaasyati ramyatE sakhi samaagatyEti chiMtaakulaH ।
sa tvaaM pashyati vEpatE pulakayatyaanaMdati svidyati pratyudgachChati moorchChati sthiratamaHpunjE nikunjE priyaH ॥ 60 ॥
akshhNOrnikshhipadanjanaM shravaNayOstaapichChaguchChaavaleeM moordhni shyaamasarOjadaama kuchayOH kastoorikaapaatrakam ।
dhoortaanaamabhisaarasatvarahRRidaaM vishhvannikunjE sakhi dhvaaMtaM neelanichOlachaaru sadRRishaaM pratyangamaalingati ॥ 61 ॥
kaashmeeragauravapushhaamabhisaarikaaNaam aabaddharEkhamabhitO ruchimanjareebhiH ।
EtattamaaladalaneelatamaM tamishraM tatprEmahEmanikashhOpalataaM tanOti ॥ 62 ॥
haaraavaleetaralakaanchanakaanchidaama-kEyoorakankaNamaNidyutideepitasya ।
dvaarE nikunjanilayasyahariM nireekshhya vreeDaavateematha sakhee nijagaaha raadhaam ॥ 63 ॥
॥ geetam 21 ॥
manjutarakunjatalakElisadanE ।
vilasa ratirabhasahasitavadanE ॥
pravisha raadhE maadhavasameepamiha ॥ 1 ॥
navabhavadashOkadalashayanasaarE ।
vilasa kuchakalashataralahaarE ॥ 2 ॥
kusumachayarachitashuchivaasagEhE ।
vilasa kusumasukumaaradEhE ॥ 3 ॥
chalamalayavanapavanasurabhisheetE ।
vilasa rasavalitalalitageetE ॥ 4 ॥
madhumuditamadhupakulakalitaraavE ।
vilasa madanarasasarasabhaavE ॥ 5 ॥
madhutaralapikanikaraninadamukharE ।
vilasa dashanaruchiruchirashikharE ॥ 6 ॥
vitata bahuvallinavapallavaghanE ।
vilasa chiramalasapeenajaghanE ॥ 7 ॥
vihitapadmaavateesukhasamaajE ।
bhaNati jayadEvakaviraajE ॥ 8 ॥
tvaaM chittEna chiraM vahannayamatishraaMtO bhRRishaM taapitaH kaMdarpENa tu paatumichChati sudhaasaMbaadhabiMbaadharam ।
asyaangaM tadalaMkuru kshhaNamiha bhrookshhEpalakshhmeelava-kreetE daasa ivOpasEvitapadaaMbhOjE kutaH saMbhramaH ॥ 64 ॥
saa sasaadhvasasaanaMdaM gOviMdE lOlalOchanaa ।
sinjaanamanjumanjeeraM pravivEsha nivEshanam ॥ 65 ॥
॥ geetam 22 ॥
raadhaavadanavilOkanavikasitavividhavikaaravibhangam ।
jalanidhimiva vidhumaMDaladarshanataralitatungatarangam ॥
harimEkarasaM chiramabhilashhitavilaasaM saa dadaarsha guruharshhavashaMvadavadanamananganivaasam ॥ 1 ॥
haaramamalatarataaramurasi dadhataM parirabhya vidooram ।
sphuTataraphEnakadaMbakaraMbitamiva yamunaajalapooram ॥ 2 ॥
shyaamalamRRidulakalEvaramaMDalamadhigatagauradukoolam ।
neelanalinamiva peetaparaagapatalabharavalayitamoolam ॥ 3 ॥
taraladRRiganchalachalanamanOharavadanajanitaratiraagam ।
sphuTakamalOdarakhElitakhanjanayugamiva sharadi taDaagam ॥ 4 ॥
vadanakamalaparisheelanamilitamihirasamakuMDalashObham ।
smitaruchiruchirasamullasitaadharapallavakRRitaratilObham ॥ 5 ॥
shashikiraNachChuritOdarajaladharasuMdarasakusumakEsham ।
timirOditavidhumaNdalanirmalamalayajatilakanivEsham ॥ 6 ॥
vipulapulakabharadaMturitaM ratikElikalaabhiradheeram ।
maNigaNakiraNasamoohasamujjvalabhooshhaNasubhagashareeram ॥ 7 ॥
shreejayadEvabhaNitavibhavadviguNeekRRitabhooshhaNabhaaram ।
praNamata hRRidi suchiraM vinidhaaya hariM sukRRitOdayasaaram ॥ 8 ॥
atikramyaapaangaM shravaNapathaparyaMtagamana-prayaasEnEvaakshhNOstaralatarataaraM patitayOH ।
idaaneeM raadhaayaaH priyatamasamaalOkasamayE papaata svEdaaMbuprasara iva harshhaashrunikaraH ॥ 66 ॥
bhavaMtyaastalpaaMtaM kRRitakapaTakaMDootipihita-smitaM yaatE gEhaadbahiravahitaaleeparijanE ।
priyaasyaM pashyaMtyaaH smarasharasamaakoolasubhagaM salajjaa lajjaapi vyagamadiva dooraM mRRigadRRishaH ॥ 67 ॥
॥ iti shreegeetagOviMdE raadhikaamilanE saanaMdadaamOdarO naamaikaadashaH sargaH ॥
Browse Related Categories:
