(𑌭𑌾𑌗𑌵𑌤𑌪𑍁𑌰𑌾𑌣𑌾𑌂𑌤𑌰𑍍𑌗𑌤𑌮𑍍)
𑌨𑌮𑌃 𑌪𑌰𑌾𑌯𑌾𑌵𑌿𑌤𑌥𑌾𑌨𑍁𑌭𑍂𑌤𑌯𑍇
𑌗𑍁𑌣𑌤𑍍𑌰𑌯𑌾𑌭𑌾𑌸𑌨𑌿𑌮𑌿𑌤𑍍𑌤𑌬𑌂𑌧𑌵𑍇 ।
𑌅𑌦𑍃𑌷𑍍𑌟𑌧𑌾𑌮𑍍𑌨𑍇 𑌗𑍁𑌣𑌤𑌤𑍍𑌤𑍍𑌵𑌬𑍁𑌦𑍍𑌧𑌿𑌭𑌿𑌃
𑌨𑌿𑌵𑍃𑌤𑍍𑌤𑌮𑌾𑌨𑌾𑌯 𑌦𑌧𑍇 𑌸𑍍𑌵𑌯𑌂𑌭𑍁𑌵𑍇 ॥ 1 ॥
𑌨 𑌯𑌸𑍍𑌯 𑌸𑌖𑍍𑌯𑌂 𑌪𑍁𑌰𑍁𑌷𑍋𑌽𑌵𑍈𑌤𑌿 𑌸𑌖𑍍𑌯𑍁𑌃
𑌸𑌖𑌾 𑌵𑌸𑌨𑍍𑌸𑌂𑌵𑌸𑌤𑌃 𑌪𑍁𑌰𑍇𑌽𑌸𑍍𑌮𑌿𑌨𑍍 ।
𑌗𑍁𑌣𑍋 𑌯𑌥𑌾 𑌗𑍁𑌣𑌿𑌨𑍋 𑌵𑍍𑌯𑌕𑍍𑌤𑌦𑍃𑌷𑍍𑌟𑍇𑌃
𑌤𑌸𑍍𑌮𑍈 𑌮𑌹𑍇𑌶𑌾𑌯 𑌨𑌮𑌸𑍍𑌕𑌰𑍋𑌮𑌿 ॥ 2 ॥
𑌦𑍇𑌹𑍋𑌽𑌸𑌵𑍋𑌽𑌕𑍍𑌷𑌾 𑌮𑌨𑌵𑍋 𑌭𑍂𑌤𑌮𑌾𑌤𑍍𑌰𑌾
𑌨𑌾𑌤𑍍𑌮𑌾𑌨𑌮𑌨𑍍𑌯𑌂 𑌚 𑌵𑌿𑌦𑍁𑌃 𑌪𑌰𑌂 𑌯𑌤𑍍 ।
𑌸𑌰𑍍𑌵𑌂 𑌪𑍁𑌮𑌾𑌨𑍍 𑌵𑍇𑌦 𑌗𑍁𑌣𑌾𑌂𑌶𑍍𑌚 𑌤𑌜𑍍𑌜𑍍𑌞𑍋
𑌨 𑌵𑍇𑌦 𑌸𑌰𑍍𑌵𑌜𑍍𑌞𑌮𑌨𑌂𑌤𑌮𑍀𑌡𑍇 ॥ 3 ॥
𑌯𑌦𑍋𑌪𑌰𑌾𑌮𑍋 𑌮𑌨𑌸𑍋 𑌨𑌾𑌮𑌰𑍂𑌪-
𑌰𑍂𑌪𑌸𑍍𑌯 𑌦𑍃𑌷𑍍𑌟𑌸𑍍𑌮𑍃𑌤𑌿𑌸𑌪𑍍𑌰𑌮𑍋𑌷𑌾𑌤𑍍 ।
𑌯 𑌈𑌯𑌤𑍇 𑌕𑍇𑌵𑌲𑌯𑌾 𑌸𑍍𑌵𑌸𑌂𑌸𑍍𑌥𑌯𑌾
𑌹𑌂𑌸𑌾𑌯 𑌤𑌸𑍍𑌮𑍈 𑌶𑍁𑌚𑌿𑌸𑌦𑍍𑌮𑌨𑍇 𑌨𑌮𑌃 ॥ 4 ॥
𑌮𑌨𑍀𑌷𑌿𑌣𑍋𑌽𑌂𑌤𑌰𑍍𑌹𑌦𑌿 𑌸𑌨𑍍𑌨𑌿𑌵𑍇𑌶𑌿𑌤𑌂
𑌸𑍍𑌵𑌶𑌕𑍍𑌤𑌿𑌭𑌿𑌰𑍍𑌨𑌵𑌭𑌿𑌶𑍍𑌚 𑌤𑍍𑌰𑌿𑌵𑍃𑌦𑍍𑌭𑌿𑌃 ।
𑌵𑌹𑍍𑌨𑌿𑌂 𑌯𑌥𑌾 𑌦𑌾𑌰𑍁𑌣𑌿 𑌪𑌾𑌂𑌚𑌦𑌶𑍍𑌯𑌂
𑌮𑌨𑍀𑌷𑌯𑌾 𑌨𑌿𑌷𑍍𑌕𑌰𑍍𑌷𑌂𑌤𑌿 𑌗𑍂𑌢𑌮𑍍 ॥ 5 ॥
𑌸 𑌵𑍈 𑌮𑌮𑌾𑌶𑍇𑌷𑌵𑌿𑌶𑍇𑌷𑌮𑌾𑌯𑌾
𑌨𑌿𑌷𑍇𑌧𑌨𑌿𑌵𑌾𑌣𑌸𑍁𑌖𑌾𑌨𑍁𑌭𑍂𑌤𑌿𑌃 ।
𑌸 𑌸𑌰𑍍𑌵𑌨𑌾𑌮𑌾 𑌸 𑌚 𑌵𑌿𑌶𑍍𑌵𑌰𑍂𑌪𑌃
𑌪𑍍𑌰𑌸𑍀𑌦𑌤𑌾𑌮𑌨𑌿𑌰𑍁𑌕𑍍𑌤𑌾𑌤𑍍𑌮𑌶𑌕𑍍𑌤𑌿𑌃 ॥ 6 ॥
𑌯𑌦𑍍𑌯𑌨𑍍𑌨𑌿𑌰𑍁𑌕𑍍𑌤𑌂 𑌵𑌚𑌸𑌾 𑌨𑌿𑌰𑍂𑌪𑌿𑌤𑌂
𑌧𑌿𑌯𑌾𑌽𑌕𑍍𑌷𑌭𑌿𑌰𑍍𑌵𑌾 𑌮𑌨𑌸𑌾 𑌵𑍋𑌤 𑌯𑌸𑍍𑌯 ।
𑌮𑌾 𑌭𑍂𑌤𑍍𑌸𑍍𑌵𑌰𑍂𑌪𑌂 𑌗𑍁𑌣𑌰𑍂𑌪𑌂 𑌹𑌿 𑌤𑌤𑍍𑌤𑌤𑍍
𑌸 𑌵𑍈 𑌗𑍁𑌣𑌾𑌪𑌾𑌯𑌵𑌿𑌸𑌰𑍍𑌗𑌲𑌕𑍍𑌷𑌣𑌃 ॥ ॥
𑌯𑌸𑍍𑌮𑌿𑌨𑍍 𑌯𑌤𑍋 𑌯𑍇𑌨 𑌚 𑌯𑌸𑍍𑌯 𑌯𑌸𑍍𑌮𑍈
𑌯𑌦𑍍𑌯𑍋 𑌯𑌥𑌾 𑌕𑍁𑌰𑍂𑌤𑍇 𑌕𑌾𑌰𑍍𑌯𑌤𑍇 𑌚 ।
𑌪𑌰𑌾𑌵𑌰𑍇𑌷𑌾𑌂 𑌪𑌰𑌮𑌂 𑌪𑍍𑌰𑌾𑌕𑍍 𑌪𑍍𑌰𑌸𑌿𑌦𑍍𑌧𑌂
𑌤𑌦𑍍𑌬𑍍𑌰𑌹𑍍𑌮 𑌤𑌦𑍍𑌧𑍇𑌤𑍁𑌰𑌨𑌨𑍍𑌯𑌦𑍇𑌕𑌮𑍍 ॥ ॥
𑌯𑌚𑍍𑌛𑌕𑍍𑌤𑌯𑍋 𑌵𑌦𑌤𑌾𑌂 𑌵𑌾𑌦𑌿𑌤𑌾𑌂 𑌵𑍈
𑌵𑌿𑌵𑌾𑌦𑌸𑌂𑌵𑌾𑌦𑌭𑍁𑌵𑍋 𑌭𑌵𑌂𑌤𑌿 ।
𑌕𑍁𑌰𑍍𑌵𑌂𑌤𑌿 𑌚𑍈𑌷𑌾𑌂 𑌮𑍁𑌹𑍁𑌰𑌾𑌤𑍍𑌮𑌮𑍋𑌹𑌂
𑌤𑌸𑍍𑌮𑍈 𑌨𑌮𑍋𑌽𑌨𑌂𑌤𑌗𑍁𑌣𑌾𑌯 𑌭𑍂𑌮𑍍𑌨𑍇 ॥ ॥
𑌅𑌸𑍍𑌤𑍀𑌤𑌿 𑌨𑌾𑌸𑍍𑌤𑍀𑌤𑌿 𑌚 𑌵𑌸𑍍𑌤𑍁𑌨𑌿𑌷𑍍𑌠𑌯𑍋𑌃
𑌏𑌕𑌸𑍍𑌥𑌯𑍋𑌰𑍍𑌭𑌿𑌨𑍍𑌨𑌵𑌿𑌰𑍁𑌦𑍍𑌧𑌧𑌰𑍍𑌮𑌯𑍋𑌃 ।
𑌅𑌵𑍇𑌕𑍍𑌷𑌿𑌤𑌂 𑌕𑌿𑌂 𑌚 𑌨 𑌯𑍋𑌗𑌸𑌾𑌂𑌖𑍍𑌯𑌯𑍋𑌃
𑌸𑌮𑌂 𑌪𑌰𑌂 𑌹𑍍𑌯𑌨𑍁𑌕𑍂𑌲𑌂 𑌬𑍃𑌹𑌤𑍍𑌤𑌤𑍍 ॥ 10 ॥
𑌯𑍋𑌽𑌨𑍁𑌗𑌹𑌾𑌰𑍍𑌥𑌂 𑌭𑌜𑌤𑌾𑌂 𑌪𑌾𑌦𑌮𑍂𑌲𑌮𑌨𑌾𑌮𑌰𑍂𑌪𑍋 𑌭𑌗𑌵𑌾𑌨𑌨𑌂𑌤𑌃 ।
𑌨𑌾𑌮𑌾𑌨𑌿 𑌰𑍂𑌪𑌾𑌣𑌿 𑌚 𑌜𑌨𑍍𑌮𑌕𑌰𑍍𑌮𑌭𑌿𑌰𑍍𑌭𑍇𑌜𑍇 𑌸 𑌮𑌹𑍍𑌯𑌂 𑌪𑌰𑌮𑌃 𑌪𑍍𑌰𑌸𑍀𑌦𑌤𑍁 ॥ 11 ॥
𑌯𑌃 𑌪𑍍𑌰𑌾𑌕𑍃𑌤𑍈𑌰𑍍𑌜𑍍𑌞𑌾𑌨𑌪𑌥𑍈𑌰𑍍𑌜𑌨𑌾𑌨𑌾𑌂
𑌯𑌥𑌾𑌶𑌯𑌂 𑌦𑍇𑌹𑌗𑌤𑍋 𑌵𑌿𑌭𑌾𑌤𑌿 ।
𑌯𑌥𑌾𑌨𑌿𑌲𑌃 𑌪𑌾𑌰𑍍𑌥𑌿𑌵𑌮𑌾𑌶𑍍𑌰𑌿𑌤𑍋 𑌗𑍁𑌣𑌂
𑌸 𑌈𑌶𑍍𑌵𑌰𑍋 𑌮𑍇 𑌕𑍁𑌰𑍁𑌤𑌾𑌨𑍍𑌮𑌨𑍋𑌰𑌥𑌮𑍍 ॥ 12 ॥
॥ 𑌇𑌤𑌿 𑌹𑌂𑌸𑌗𑍁𑌹𑍍𑌯𑌸𑍍𑌤𑍋𑌤𑍍𑌰𑌂 𑌸𑌂𑌪𑍂𑌰𑍍𑌣𑌮𑍍 ॥
