Narayaniyam Dashaka 99 - Grantha

𑌵𑌿𑌷𑍍𑌣𑍋𑌰𑍍𑌵𑍀𑌰𑍍𑌯𑌾𑌣𑌿 𑌕𑍋 𑌵𑌾 𑌕𑌥𑌯𑌤𑍁 𑌧𑌰𑌣𑍇𑌃 𑌕𑌶𑍍𑌚 𑌰𑍇𑌣𑍂𑌨𑍍𑌮𑌿𑌮𑍀𑌤𑍇
𑌯𑌸𑍍𑌯𑍈𑌵𑌾𑌂𑌘𑍍𑌰𑌿𑌤𑍍𑌰𑌯𑍇𑌣 𑌤𑍍𑌰𑌿𑌜𑌗𑌦𑌭𑌿𑌮𑌿𑌤𑌂 𑌮𑍋𑌦𑌤𑍇 𑌪𑍂𑌰𑍍𑌣𑌸𑌂𑌪𑌤𑍍
𑌯𑍋𑌸𑍌 𑌵𑌿𑌶𑍍𑌵𑌾𑌨𑌿 𑌧𑌤𑍍𑌤𑍇 𑌪𑍍𑌰𑌿𑌯𑌮𑌿𑌹 𑌪𑌰𑌮𑌂 𑌧𑌾𑌮 𑌤𑌸𑍍𑌯𑌾𑌭𑌿𑌯𑌾𑌯𑌾𑌂
𑌤𑍍𑌵𑌦𑍍𑌭𑌕𑍍𑌤𑌾 𑌯𑌤𑍍𑌰 𑌮𑌾𑌦𑍍𑌯𑌂𑌤𑍍𑌯𑌮𑍃𑌤𑌰𑌸𑌮𑌰𑌂𑌦𑌸𑍍𑌯 𑌯𑌤𑍍𑌰 𑌪𑍍𑌰𑌵𑌾𑌹𑌃 ॥1॥

𑌆𑌦𑍍𑌯𑌾𑌯𑌾𑌶𑍇𑌷𑌕𑌰𑍍𑌤𑍍𑌰𑍇 𑌪𑍍𑌰𑌤𑌿𑌨𑌿𑌮𑌿𑌷𑌨𑌵𑍀𑌨𑌾𑌯 𑌭𑌰𑍍𑌤𑍍𑌰𑍇 𑌵𑌿𑌭𑍂𑌤𑍇-
𑌰𑍍𑌭𑌕𑍍𑌤𑌾𑌤𑍍𑌮𑌾 𑌵𑌿𑌷𑍍𑌣𑌵𑍇 𑌯𑌃 𑌪𑍍𑌰𑌦𑌿𑌶𑌤𑌿 𑌹𑌵𑌿𑌰𑌾𑌦𑍀𑌨𑌿 𑌯𑌜𑍍𑌞𑌾𑌰𑍍𑌚𑌨𑌾𑌦𑍌 ।
𑌕𑍃𑌷𑍍𑌣𑌾𑌦𑍍𑌯𑌂 𑌜𑌨𑍍𑌮 𑌯𑍋 𑌵𑌾 𑌮𑌹𑌦𑌿𑌹 𑌮𑌹𑌤𑍋 𑌵𑌰𑍍𑌣𑌯𑍇𑌤𑍍𑌸𑍋𑌽𑌯𑌮𑍇𑌵
𑌪𑍍𑌰𑍀𑌤𑌃 𑌪𑍂𑌰𑍍𑌣𑍋 𑌯𑌶𑍋𑌭𑌿𑌸𑍍𑌤𑍍𑌵𑌰𑌿𑌤𑌮𑌭𑌿𑌸𑌰𑍇𑌤𑍍 𑌪𑍍𑌰𑌾𑌪𑍍𑌯𑌮𑌂𑌤𑍇 𑌪𑌦𑌂 𑌤𑍇 ॥2॥

𑌹𑍇 𑌸𑍍𑌤𑍋𑌤𑌾𑌰𑌃 𑌕𑌵𑍀𑌂𑌦𑍍𑌰𑌾𑌸𑍍𑌤𑌮𑌿𑌹 𑌖𑌲𑍁 𑌯𑌥𑌾 𑌚𑍇𑌤𑌯𑌧𑍍𑌵𑍇 𑌤𑌥𑍈𑌵
𑌵𑍍𑌯𑌕𑍍𑌤𑌂 𑌵𑍇𑌦𑌸𑍍𑌯 𑌸𑌾𑌰𑌂 𑌪𑍍𑌰𑌣𑍁𑌵𑌤 𑌜𑌨𑌨𑍋𑌪𑌾𑌤𑍍𑌤𑌲𑍀𑌲𑌾𑌕𑌥𑌾𑌭𑌿𑌃 ।
𑌜𑌾𑌨𑌂𑌤𑌶𑍍𑌚𑌾𑌸𑍍𑌯 𑌨𑌾𑌮𑌾𑌨𑍍𑌯𑌖𑌿𑌲𑌸𑍁𑌖𑌕𑌰𑌾𑌣𑍀𑌤𑌿 𑌸𑌂𑌕𑍀𑌰𑍍𑌤𑌯𑌧𑍍𑌵𑌂
𑌹𑍇 𑌵𑌿𑌷𑍍𑌣𑍋 𑌕𑍀𑌰𑍍𑌤𑌨𑌾𑌦𑍍𑌯𑍈𑌸𑍍𑌤𑌵 𑌖𑌲𑍁 𑌮𑌹𑌤𑌸𑍍𑌤𑌤𑍍𑌤𑍍𑌵𑌬𑍋𑌧𑌂 𑌭𑌜𑍇𑌯𑌮𑍍 ॥3॥

𑌵𑌿𑌷𑍍𑌣𑍋𑌃 𑌕𑌰𑍍𑌮𑌾𑌣𑌿 𑌸𑌂𑌪𑌶𑍍𑌯𑌤 𑌮𑌨𑌸𑌿 𑌸𑌦𑌾 𑌯𑍈𑌃 𑌸 𑌧𑌰𑍍𑌮𑌾𑌨𑌬𑌧𑍍𑌨𑌾𑌦𑍍
𑌯𑌾𑌨𑍀𑌂𑌦𑍍𑌰𑌸𑍍𑌯𑍈𑌷 𑌭𑍃𑌤𑍍𑌯𑌃 𑌪𑍍𑌰𑌿𑌯𑌸𑌖 𑌇𑌵 𑌚 𑌵𑍍𑌯𑌾𑌤𑌨𑍋𑌤𑍍 𑌕𑍍𑌷𑍇𑌮𑌕𑌾𑌰𑍀 ।
𑌵𑍀𑌕𑍍𑌷𑌂𑌤𑍇 𑌯𑍋𑌗𑌸𑌿𑌦𑍍𑌧𑌾𑌃 𑌪𑌰𑌪𑌦𑌮𑌨𑌿𑌶𑌂 𑌯𑌸𑍍𑌯 𑌸𑌮𑍍𑌯𑌕𑍍𑌪𑍍𑌰𑌕𑌾𑌶𑌂
𑌵𑌿𑌪𑍍𑌰𑍇𑌂𑌦𑍍𑌰𑌾 𑌜𑌾𑌗𑌰𑍂𑌕𑌾𑌃 𑌕𑍃𑌤𑌬𑌹𑍁𑌨𑍁𑌤𑌯𑍋 𑌯𑌚𑍍𑌚 𑌨𑌿𑌰𑍍𑌭𑌾𑌸𑌯𑌂𑌤𑍇 ॥4॥

𑌨𑍋 𑌜𑌾𑌤𑍋 𑌜𑌾𑌯𑌮𑌾𑌨𑍋𑌽𑌪𑌿 𑌚 𑌸𑌮𑌧𑌿𑌗𑌤𑌸𑍍𑌤𑍍𑌵𑌨𑍍𑌮𑌹𑌿𑌮𑍍𑌨𑍋𑌽𑌵𑌸𑌾𑌨𑌂
𑌦𑍇𑌵 𑌶𑍍𑌰𑍇𑌯𑌾𑌂𑌸𑌿 𑌵𑌿𑌦𑍍𑌵𑌾𑌨𑍍 𑌪𑍍𑌰𑌤𑌿𑌮𑍁𑌹𑍁𑌰𑌪𑌿 𑌤𑍇 𑌨𑌾𑌮 𑌶𑌂𑌸𑌾𑌮𑌿 𑌵𑌿𑌷𑍍𑌣𑍋 ।
𑌤𑌂 𑌤𑍍𑌵𑌾𑌂 𑌸𑌂𑌸𑍍𑌤𑍌𑌮𑌿 𑌨𑌾𑌨𑌾𑌵𑌿𑌧𑌨𑍁𑌤𑌿𑌵𑌚𑌨𑍈𑌰𑌸𑍍𑌯 𑌲𑍋𑌕𑌤𑍍𑌰𑌯𑌸𑍍𑌯𑌾-
𑌪𑍍𑌯𑍂𑌰𑍍𑌧𑍍𑌵𑌂 𑌵𑌿𑌭𑍍𑌰𑌾𑌜𑌮𑌾𑌨𑍇 𑌵𑌿𑌰𑌚𑌿𑌤𑌵𑌸𑌤𑌿𑌂 𑌤𑌤𑍍𑌰 𑌵𑍈𑌕𑍁𑌂𑌠𑌲𑍋𑌕𑍇 ॥5॥

𑌆𑌪𑌃 𑌸𑍃𑌷𑍍𑌟𑍍𑌯𑌾𑌦𑌿𑌜𑌨𑍍𑌯𑌾𑌃 𑌪𑍍𑌰𑌥𑌮𑌮𑌯𑌿 𑌵𑌿𑌭𑍋 𑌗𑌰𑍍𑌭𑌦𑍇𑌶𑍇 𑌦𑌧𑍁𑌸𑍍𑌤𑍍𑌵𑌾𑌂
𑌯𑌤𑍍𑌰 𑌤𑍍𑌵𑌯𑍍𑌯𑍇𑌵 𑌜𑍀𑌵𑌾 𑌜𑌲𑌶𑌯𑌨 𑌹𑌰𑍇 𑌸𑌂𑌗𑌤𑌾 𑌐𑌕𑍍𑌯𑌮𑌾𑌪𑌨𑍍 ।
𑌤𑌸𑍍𑌯𑌾𑌜𑌸𑍍𑌯 𑌪𑍍𑌰𑌭𑍋 𑌤𑍇 𑌵𑌿𑌨𑌿𑌹𑌿𑌤𑌮𑌭𑌵𑌤𑍍 𑌪𑌦𑍍𑌮𑌮𑍇𑌕𑌂 𑌹𑌿 𑌨𑌾𑌭𑍌
𑌦𑌿𑌕𑍍𑌪𑌤𑍍𑌰𑌂 𑌯𑌤𑍍 𑌕𑌿𑌲𑌾𑌹𑍁𑌃 𑌕𑌨𑌕𑌧𑌰𑌣𑌿𑌭𑍃𑌤𑍍 𑌕𑌰𑍍𑌣𑌿𑌕𑌂 𑌲𑍋𑌕𑌰𑍂𑌪𑌮𑍍 ॥6॥

𑌹𑍇 𑌲𑍋𑌕𑌾 𑌵𑌿𑌷𑍍𑌣𑍁𑌰𑍇𑌤𑌦𑍍𑌭𑍁𑌵𑌨𑌮𑌜𑌨𑌯𑌤𑍍𑌤𑌨𑍍𑌨 𑌜𑌾𑌨𑍀𑌥 𑌯𑍂𑌯𑌂
𑌯𑍁𑌷𑍍𑌮𑌾𑌕𑌂 𑌹𑍍𑌯𑌂𑌤𑌰𑌸𑍍𑌥𑌂 𑌕𑌿𑌮𑌪𑌿 𑌤𑌦𑌪𑌰𑌂 𑌵𑌿𑌦𑍍𑌯𑌤𑍇 𑌵𑌿𑌷𑍍𑌣𑍁𑌰𑍂𑌪𑌮𑍍 ।
𑌨𑍀𑌹𑌾𑌰𑌪𑍍𑌰𑌖𑍍𑌯𑌮𑌾𑌯𑌾𑌪𑌰𑌿𑌵𑍃𑌤𑌮𑌨𑌸𑍋 𑌮𑍋𑌹𑌿𑌤𑌾 𑌨𑌾𑌮𑌰𑍂𑌪𑍈𑌃
𑌪𑍍𑌰𑌾𑌣𑌪𑍍𑌰𑍀𑌤𑍍𑌯𑍇𑌕𑌤𑍃𑌪𑍍𑌤𑌾𑌶𑍍𑌚𑌰𑌥 𑌮𑌖𑌪𑌰𑌾 𑌹𑌂𑌤 𑌨𑍇𑌚𑍍𑌛𑌾 𑌮𑍁𑌕𑍁𑌂𑌦𑍇 ॥𑍭॥

𑌮𑍂𑌰𑍍𑌧𑍍𑌨𑌾𑌮𑌕𑍍𑌷𑍍𑌣𑌾𑌂 𑌪𑌦𑌾𑌨𑌾𑌂 𑌵𑌹𑌸𑌿 𑌖𑌲𑍁 𑌸𑌹𑌸𑍍𑌰𑌾𑌣𑌿 𑌸𑌂𑌪𑍂𑌰𑍍𑌯 𑌵𑌿𑌶𑍍𑌵𑌂
𑌤𑌤𑍍𑌪𑍍𑌰𑍋𑌤𑍍𑌕𑍍𑌰𑌮𑍍𑌯𑌾𑌪𑌿 𑌤𑌿𑌷𑍍𑌠𑌨𑍍 𑌪𑌰𑌿𑌮𑌿𑌤𑌵𑌿𑌵𑌰𑍇 𑌭𑌾𑌸𑌿 𑌚𑌿𑌤𑍍𑌤𑌾𑌂𑌤𑌰𑍇𑌽𑌪𑌿 ।
𑌭𑍂𑌤𑌂 𑌭𑌵𑍍𑌯𑌂 𑌚 𑌸𑌰𑍍𑌵𑌂 𑌪𑌰𑌪𑍁𑌰𑍁𑌷 𑌭𑌵𑌾𑌨𑍍 𑌕𑌿𑌂𑌚 𑌦𑍇𑌹𑍇𑌂𑌦𑍍𑌰𑌿𑌯𑌾𑌦𑌿-
𑌷𑍍𑌵𑌾𑌵𑌿𑌷𑍍𑌟𑍋𑌽𑌪𑍍𑌯𑍁𑌦𑍍𑌗𑌤𑌤𑍍𑌵𑌾𑌦𑌮𑍃𑌤𑌸𑍁𑌖𑌰𑌸𑌂 𑌚𑌾𑌨𑍁𑌭𑍁𑌂𑌕𑍍𑌷𑍇 𑌤𑍍𑌵𑌮𑍇𑌵 ॥𑍮॥

𑌯𑌤𑍍𑌤𑍁 𑌤𑍍𑌰𑍈𑌲𑍋𑌕𑍍𑌯𑌰𑍂𑌪𑌂 𑌦𑌧𑌦𑌪𑌿 𑌚 𑌤𑌤𑍋 𑌨𑌿𑌰𑍍𑌗𑌤𑍋𑌽𑌨𑌂𑌤𑌶𑍁𑌦𑍍𑌧-
𑌜𑍍𑌞𑌾𑌨𑌾𑌤𑍍𑌮𑌾 𑌵𑌰𑍍𑌤𑌸𑍇 𑌤𑍍𑌵𑌂 𑌤𑌵 𑌖𑌲𑍁 𑌮𑌹𑌿𑌮𑌾 𑌸𑍋𑌽𑌪𑌿 𑌤𑌾𑌵𑌾𑌨𑍍 𑌕𑌿𑌮𑌨𑍍𑌯𑌤𑍍 ।
𑌸𑍍𑌤𑍋𑌕𑌸𑍍𑌤𑍇 𑌭𑌾𑌗 𑌏𑌵𑌾𑌖𑌿𑌲𑌭𑍁𑌵𑌨𑌤𑌯𑌾 𑌦𑍃𑌶𑍍𑌯𑌤𑍇 𑌤𑍍𑌰𑍍𑌯𑌂𑌶𑌕𑌲𑍍𑌪𑌂
𑌭𑍂𑌯𑌿𑌷𑍍𑌠𑌂 𑌸𑌾𑌂𑌦𑍍𑌰𑌮𑍋𑌦𑌾𑌤𑍍𑌮𑌕𑌮𑍁𑌪𑌰𑌿 𑌤𑌤𑍋 𑌭𑌾𑌤𑌿 𑌤𑌸𑍍𑌮𑍈 𑌨𑌮𑌸𑍍𑌤𑍇 ॥𑍯॥

𑌅𑌵𑍍𑌯𑌕𑍍𑌤𑌂 𑌤𑍇 𑌸𑍍𑌵𑌰𑍂𑌪𑌂 𑌦𑍁𑌰𑌧𑌿𑌗𑌮𑌤𑌮𑌂 𑌤𑌤𑍍𑌤𑍁 𑌶𑍁𑌦𑍍𑌧𑍈𑌕𑌸𑌤𑍍𑌤𑍍𑌵𑌂
𑌵𑍍𑌯𑌕𑍍𑌤𑌂 𑌚𑌾𑌪𑍍𑌯𑍇𑌤𑌦𑍇𑌵 𑌸𑍍𑌫𑍁𑌟𑌮𑌮𑍃𑌤𑌰𑌸𑌾𑌂𑌭𑍋𑌧𑌿𑌕𑌲𑍍𑌲𑍋𑌲𑌤𑍁𑌲𑍍𑌯𑌮𑍍 ।
𑌸𑌰𑍍𑌵𑍋𑌤𑍍𑌕𑍃𑌷𑍍𑌟𑌾𑌮𑌭𑍀𑌷𑍍𑌟𑌾𑌂 𑌤𑌦𑌿𑌹 𑌗𑍁𑌣𑌰𑌸𑍇𑌨𑍈𑌵 𑌚𑌿𑌤𑍍𑌤𑌂 𑌹𑌰𑌂𑌤𑍀𑌂
𑌮𑍂𑌰𑍍𑌤𑌿𑌂 𑌤𑍇 𑌸𑌂𑌶𑍍𑌰𑌯𑍇𑌽𑌹𑌂 𑌪𑌵𑌨𑌪𑍁𑌰𑌪𑌤𑍇 𑌪𑌾𑌹𑌿 𑌮𑌾𑌂 𑌕𑍃𑌷𑍍𑌣 𑌰𑍋𑌗𑌾𑌤𑍍 ॥10॥

Browse Related Categories: