Narayaniyam Dashaka 5 - Grantha

𑌵𑍍𑌯𑌕𑍍𑌤𑌾𑌵𑍍𑌯𑌕𑍍𑌤𑌮𑌿𑌦𑌂 𑌨 𑌕𑌿𑌂𑌚𑌿𑌦𑌭𑌵𑌤𑍍𑌪𑍍𑌰𑌾𑌕𑍍𑌪𑍍𑌰𑌾𑌕𑍃𑌤𑌪𑍍𑌰𑌕𑍍𑌷𑌯𑍇
𑌮𑌾𑌯𑌾𑌯𑌾𑌂 𑌗𑍁𑌣𑌸𑌾𑌮𑍍𑌯𑌰𑍁𑌦𑍍𑌧𑌵𑌿𑌕𑍃𑌤𑍌 𑌤𑍍𑌵𑌯𑍍𑌯𑌾𑌗𑌤𑌾𑌯𑌾𑌂 𑌲𑌯𑌮𑍍 ।
𑌨𑍋 𑌮𑍃𑌤𑍍𑌯𑍁𑌶𑍍𑌚 𑌤𑌦𑌾𑌽𑌮𑍃𑌤𑌂 𑌚 𑌸𑌮𑌭𑍂𑌨𑍍𑌨𑌾𑌹𑍍𑌨𑍋 𑌨 𑌰𑌾𑌤𑍍𑌰𑍇𑌃 𑌸𑍍𑌥𑌿𑌤𑌿-
𑌸𑍍𑌤𑌤𑍍𑌰𑍈𑌕𑌸𑍍𑌤𑍍𑌵𑌮𑌶𑌿𑌷𑍍𑌯𑌥𑌾𑌃 𑌕𑌿𑌲 𑌪𑌰𑌾𑌨𑌂𑌦𑌪𑍍𑌰𑌕𑌾𑌶𑌾𑌤𑍍𑌮𑌨𑌾 ॥1॥

𑌕𑌾𑌲𑌃 𑌕𑌰𑍍𑌮 𑌗𑍁𑌣𑌾𑌶𑍍𑌚 𑌜𑍀𑌵𑌨𑌿𑌵𑌹𑌾 𑌵𑌿𑌶𑍍𑌵𑌂 𑌚 𑌕𑌾𑌰𑍍𑌯𑌂 𑌵𑌿𑌭𑍋
𑌚𑌿𑌲𑍍𑌲𑍀𑌲𑌾𑌰𑌤𑌿𑌮𑍇𑌯𑍁𑌷𑌿 𑌤𑍍𑌵𑌯𑌿 𑌤𑌦𑌾 𑌨𑌿𑌰𑍍𑌲𑍀𑌨𑌤𑌾𑌮𑌾𑌯𑌯𑍁𑌃 ।
𑌤𑍇𑌷𑌾𑌂 𑌨𑍈𑌵 𑌵𑌦𑌂𑌤𑍍𑌯𑌸𑌤𑍍𑌤𑍍𑌵𑌮𑌯𑌿 𑌭𑍋𑌃 𑌶𑌕𑍍𑌤𑍍𑌯𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑌾𑌂
𑌨𑍋 𑌚𑍇𑌤𑍍 𑌕𑌿𑌂 𑌗𑌗𑌨𑌪𑍍𑌰𑌸𑍂𑌨𑌸𑌦𑍃𑌶𑌾𑌂 𑌭𑍂𑌯𑍋 𑌭𑌵𑍇𑌤𑍍𑌸𑌂𑌭𑌵𑌃 ॥2॥

𑌏𑌵𑌂 𑌚 𑌦𑍍𑌵𑌿𑌪𑌰𑌾𑌰𑍍𑌧𑌕𑌾𑌲𑌵𑌿𑌗𑌤𑌾𑌵𑍀𑌕𑍍𑌷𑌾𑌂 𑌸𑌿𑌸𑍃𑌕𑍍𑌷𑌾𑌤𑍍𑌮𑌿𑌕𑌾𑌂
𑌬𑌿𑌭𑍍𑌰𑌾𑌣𑍇 𑌤𑍍𑌵𑌯𑌿 𑌚𑍁𑌕𑍍𑌷𑍁𑌭𑍇 𑌤𑍍𑌰𑌿𑌭𑍁𑌵𑌨𑍀𑌭𑌾𑌵𑌾𑌯 𑌮𑌾𑌯𑌾 𑌸𑍍𑌵𑌯𑌮𑍍 ।
𑌮𑌾𑌯𑌾𑌤𑌃 𑌖𑌲𑍁 𑌕𑌾𑌲𑌶𑌕𑍍𑌤𑌿𑌰𑌖𑌿𑌲𑌾𑌦𑍃𑌷𑍍𑌟𑌂 𑌸𑍍𑌵𑌭𑌾𑌵𑍋𑌽𑌪𑌿 𑌚
𑌪𑍍𑌰𑌾𑌦𑍁𑌰𑍍𑌭𑍂𑌯 𑌗𑍁𑌣𑌾𑌨𑍍𑌵𑌿𑌕𑌾𑌸𑍍𑌯 𑌵𑌿𑌦𑌧𑍁𑌸𑍍𑌤𑌸𑍍𑌯𑌾𑌸𑍍𑌸𑌹𑌾𑌯𑌕𑍍𑌰𑌿𑌯𑌾𑌮𑍍 ॥3॥

𑌮𑌾𑌯𑌾𑌸𑌨𑍍𑌨𑌿𑌹𑌿𑌤𑍋𑌽𑌪𑍍𑌰𑌵𑌿𑌷𑍍𑌟𑌵𑌪𑍁𑌷𑌾 𑌸𑌾𑌕𑍍𑌷𑍀𑌤𑌿 𑌗𑍀𑌤𑍋 𑌭𑌵𑌾𑌨𑍍
𑌭𑍇𑌦𑍈𑌸𑍍𑌤𑌾𑌂 𑌪𑍍𑌰𑌤𑌿𑌬𑌿𑌂𑌬𑌤𑍋 𑌵𑌿𑌵𑌿𑌶𑌿𑌵𑌾𑌨𑍍 𑌜𑍀𑌵𑍋𑌽𑌪𑌿 𑌨𑍈𑌵𑌾𑌪𑌰𑌃 ।
𑌕𑌾𑌲𑌾𑌦𑌿𑌪𑍍𑌰𑌤𑌿𑌬𑍋𑌧𑌿𑌤𑌾𑌽𑌥 𑌭𑌵𑌤𑌾 𑌸𑌂𑌚𑍋𑌦𑌿𑌤𑌾 𑌚 𑌸𑍍𑌵𑌯𑌂
𑌮𑌾𑌯𑌾 𑌸𑌾 𑌖𑌲𑍁 𑌬𑍁𑌦𑍍𑌧𑌿𑌤𑌤𑍍𑌤𑍍𑌵𑌮𑌸𑍃𑌜𑌦𑍍𑌯𑍋𑌽𑌸𑍌 𑌮𑌹𑌾𑌨𑍁𑌚𑍍𑌯𑌤𑍇 ॥4॥

𑌤𑌤𑍍𑌰𑌾𑌸𑍌 𑌤𑍍𑌰𑌿𑌗𑍁𑌣𑌾𑌤𑍍𑌮𑌕𑍋𑌽𑌪𑌿 𑌚 𑌮𑌹𑌾𑌨𑍍 𑌸𑌤𑍍𑌤𑍍𑌵𑌪𑍍𑌰𑌧𑌾𑌨𑌃 𑌸𑍍𑌵𑌯𑌂
𑌜𑍀𑌵𑍇𑌽𑌸𑍍𑌮𑌿𑌨𑍍 𑌖𑌲𑍁 𑌨𑌿𑌰𑍍𑌵𑌿𑌕𑌲𑍍𑌪𑌮𑌹𑌮𑌿𑌤𑍍𑌯𑍁𑌦𑍍𑌬𑍋𑌧𑌨𑌿𑌷𑍍𑌪𑌾𑌦𑍍𑌕𑌃 ।
𑌚𑌕𑍍𑌰𑍇𑌽𑌸𑍍𑌮𑌿𑌨𑍍 𑌸𑌵𑌿𑌕𑌲𑍍𑌪𑌬𑍋𑌧𑌕𑌮𑌹𑌂𑌤𑌤𑍍𑌤𑍍𑌵𑌂 𑌮𑌹𑌾𑌨𑍍 𑌖𑌲𑍍𑌵𑌸𑍌
𑌸𑌂𑌪𑍁𑌷𑍍𑌟𑌂 𑌤𑍍𑌰𑌿𑌗𑍁𑌣𑍈𑌸𑍍𑌤𑌮𑍋𑌽𑌤𑌿𑌬𑌹𑍁𑌲𑌂 𑌵𑌿𑌷𑍍𑌣𑍋 𑌭𑌵𑌤𑍍𑌪𑍍𑌰𑍇𑌰𑌣𑌾𑌤𑍍 ॥5॥

𑌸𑍋𑌽𑌹𑌂 𑌚 𑌤𑍍𑌰𑌿𑌗𑍁𑌣𑌕𑍍𑌰𑌮𑌾𑌤𑍍 𑌤𑍍𑌰𑌿𑌵𑌿𑌧𑌤𑌾𑌮𑌾𑌸𑌾𑌦𑍍𑌯 𑌵𑍈𑌕𑌾𑌰𑌿𑌕𑍋
𑌭𑍂𑌯𑌸𑍍𑌤𑍈𑌜𑌸𑌤𑌾𑌮𑌸𑌾𑌵𑌿𑌤𑌿 𑌭𑌵𑌨𑍍𑌨𑌾𑌦𑍍𑌯𑍇𑌨 𑌸𑌤𑍍𑌤𑍍𑌵𑌾𑌤𑍍𑌮𑌨𑌾
𑌦𑍇𑌵𑌾𑌨𑌿𑌂𑌦𑍍𑌰𑌿𑌯𑌮𑌾𑌨𑌿𑌨𑍋𑌽𑌕𑍃𑌤 𑌦𑌿𑌶𑌾𑌵𑌾𑌤𑌾𑌰𑍍𑌕𑌪𑌾𑌶𑍍𑌯𑌶𑍍𑌵𑌿𑌨𑍋
𑌵𑌹𑍍𑌨𑍀𑌂𑌦𑍍𑌰𑌾𑌚𑍍𑌯𑍁𑌤𑌮𑌿𑌤𑍍𑌰𑌕𑌾𑌨𑍍 𑌵𑌿𑌧𑍁𑌵𑌿𑌧𑌿𑌶𑍍𑌰𑍀𑌰𑍁𑌦𑍍𑌰𑌶𑌾𑌰𑍀𑌰𑌕𑌾𑌨𑍍 ॥6॥

𑌭𑍂𑌮𑌨𑍍 𑌮𑌾𑌨𑌸𑌬𑍁𑌦𑍍𑌧𑍍𑌯𑌹𑌂𑌕𑍃𑌤𑌿𑌮𑌿𑌲𑌚𑍍𑌚𑌿𑌤𑍍𑌤𑌾𑌖𑍍𑌯𑌵𑍃𑌤𑍍𑌤𑍍𑌯𑌨𑍍𑌵𑌿𑌤𑌂
𑌤𑌚𑍍𑌚𑌾𑌂𑌤𑌃𑌕𑌰𑌣𑌂 𑌵𑌿𑌭𑍋 𑌤𑌵 𑌬𑌲𑌾𑌤𑍍 𑌸𑌤𑍍𑌤𑍍𑌵𑌾𑌂𑌶 𑌏𑌵𑌾𑌸𑍃𑌜𑌤𑍍 ।
𑌜𑌾𑌤𑌸𑍍𑌤𑍈𑌜𑌸𑌤𑍋 𑌦𑌶𑍇𑌂𑌦𑍍𑌰𑌿𑌯𑌗𑌣𑌸𑍍𑌤𑌤𑍍𑌤𑌾𑌮𑌸𑌾𑌂𑌶𑌾𑌤𑍍𑌪𑍁𑌨-
𑌸𑍍𑌤𑌨𑍍𑌮𑌾𑌤𑍍𑌰𑌂 𑌨𑌭𑌸𑍋 𑌮𑌰𑍁𑌤𑍍𑌪𑍁𑌰𑌪𑌤𑍇 𑌶𑌬𑍍𑌦𑍋𑌽𑌜𑌨𑌿 𑌤𑍍𑌵𑌦𑍍𑌬𑌲𑌾𑌤𑍍 ॥𑍭॥

𑌶𑍍𑌬𑍍𑌦𑌾𑌦𑍍𑌵𑍍𑌯𑍋𑌮 𑌤𑌤𑌃 𑌸𑌸𑌰𑍍𑌜𑌿𑌥 𑌵𑌿𑌭𑍋 𑌸𑍍𑌪𑌰𑍍𑌶𑌂 𑌤𑌤𑍋 𑌮𑌾𑌰𑍁𑌤𑌂
𑌤𑌸𑍍𑌮𑌾𑌦𑍍𑌰𑍂𑌪𑌮𑌤𑍋 𑌮𑌹𑍋𑌽𑌥 𑌚 𑌰𑌸𑌂 𑌤𑍋𑌯𑌂 𑌚 𑌗𑌂𑌧𑌂 𑌮𑌹𑍀𑌮𑍍 ।
𑌏𑌵𑌂 𑌮𑌾𑌧𑌵 𑌪𑍂𑌰𑍍𑌵𑌪𑍂𑌰𑍍𑌵𑌕𑌲𑌨𑌾𑌦𑌾𑌦𑍍𑌯𑌾𑌦𑍍𑌯𑌧𑌰𑍍𑌮𑌾𑌨𑍍𑌵𑌿𑌤𑌂
𑌭𑍂𑌤𑌗𑍍𑌰𑌾𑌮𑌮𑌿𑌮𑌂 𑌤𑍍𑌵𑌮𑍇𑌵 𑌭𑌗𑌵𑌨𑍍 𑌪𑍍𑌰𑌾𑌕𑌾𑌶𑌯𑌸𑍍𑌤𑌾𑌮𑌸𑌾𑌤𑍍 ॥𑍮॥

𑌏𑌤𑍇 𑌭𑍂𑌤𑌗𑌣𑌾𑌸𑍍𑌤𑌥𑍇𑌂𑌦𑍍𑌰𑌿𑌯𑌗𑌣𑌾 𑌦𑍇𑌵𑌾𑌶𑍍𑌚 𑌜𑌾𑌤𑌾𑌃 𑌪𑍃𑌥𑌙𑍍-
𑌨𑍋 𑌶𑍇𑌕𑍁𑌰𑍍𑌭𑍁𑌵𑌨𑌾𑌂𑌡𑌨𑌿𑌰𑍍𑌮𑌿𑌤𑌿𑌵𑌿𑌧𑍌 𑌦𑍇𑌵𑍈𑌰𑌮𑍀𑌭𑌿𑌸𑍍𑌤𑌦𑌾 ।
𑌤𑍍𑌵𑌂 𑌨𑌾𑌨𑌾𑌵𑌿𑌧𑌸𑍂𑌕𑍍𑌤𑌿𑌭𑌿𑌰𑍍𑌨𑍁𑌤𑌗𑍁𑌣𑌸𑍍𑌤𑌤𑍍𑌤𑍍𑌵𑌾𑌨𑍍𑌯𑌮𑍂𑌨𑍍𑌯𑌾𑌵𑌿𑌶𑌂-
𑌶𑍍𑌚𑍇𑌷𑍍𑌟𑌾𑌶𑌕𑍍𑌤𑌿𑌮𑍁𑌦𑍀𑌰𑍍𑌯 𑌤𑌾𑌨𑌿 𑌘𑌟𑌯𑌨𑍍 𑌹𑍈𑌰𑌣𑍍𑌯𑌮𑌂𑌡𑌂 𑌵𑍍𑌯𑌧𑌾𑌃 ॥𑍯॥

𑌅𑌂𑌡𑌂 𑌤𑌤𑍍𑌖𑌲𑍁 𑌪𑍂𑌰𑍍𑌵𑌸𑍃𑌷𑍍𑌟𑌸𑌲𑌿𑌲𑍇𑌽𑌤𑌿𑌷𑍍𑌠𑌤𑍍 𑌸𑌹𑌸𑍍𑌰𑌂 𑌸𑌮𑌾𑌃
𑌨𑌿𑌰𑍍𑌭𑌿𑌂𑌦𑌨𑍍𑌨𑌕𑍃𑌥𑌾𑌶𑍍𑌚𑌤𑍁𑌰𑍍𑌦𑌶𑌜𑌗𑌦𑍍𑌰𑍂𑌪𑌂 𑌵𑌿𑌰𑌾𑌡𑌾𑌹𑍍𑌵𑌯𑌮𑍍 ।
𑌸𑌾𑌹𑌸𑍍𑌰𑍈𑌃 𑌕𑌰𑌪𑌾𑌦𑌮𑍂𑌰𑍍𑌧𑌨𑌿𑌵𑌹𑍈𑌰𑍍𑌨𑌿𑌶𑍍𑌶𑍇𑌷𑌜𑍀𑌵𑌾𑌤𑍍𑌮𑌕𑍋
𑌨𑌿𑌰𑍍𑌭𑌾𑌤𑍋𑌽𑌸𑌿 𑌮𑌰𑍁𑌤𑍍𑌪𑍁𑌰𑌾𑌧𑌿𑌪 𑌸 𑌮𑌾𑌂 𑌤𑍍𑌰𑌾𑌯𑌸𑍍𑌵 𑌸𑌰𑍍𑌵𑌾𑌮𑌯𑌾𑌤𑍍 ॥10॥

Browse Related Categories: