Narayaniyam Dashaka 85 - Grantha

𑌯𑌿𑌯𑌾𑌸𑍁𑌰𑌭𑌿𑌮𑌾𑌗𑌧𑌂 𑌤𑌦𑌨𑍁 𑌨𑌾𑌰𑌦𑍋𑌦𑍀𑌰𑌿𑌤𑌾-
𑌦𑍍𑌯𑍁𑌧𑌿𑌷𑍍𑌠𑌿𑌰𑌮𑌖𑍋𑌦𑍍𑌯𑌮𑌾𑌦𑍁𑌭𑌯𑌕𑌾𑌰𑍍𑌯𑌪𑌰𑍍𑌯𑌾𑌕𑍁𑌲𑌃 ।
𑌵𑌿𑌰𑍁𑌦𑍍𑌧𑌜𑌯𑌿𑌨𑍋𑌽𑌧𑍍𑌵𑌰𑌾𑌦𑍁𑌭𑌯𑌸𑌿𑌦𑍍𑌧𑌿𑌰𑌿𑌤𑍍𑌯𑍁𑌦𑍍𑌧𑌵𑍇
𑌶𑌶𑌂𑌸𑍁𑌷𑌿 𑌨𑌿𑌜𑍈𑌃 𑌸𑌮𑌂 𑌪𑍁𑌰𑌮𑌿𑌯𑍇𑌥 𑌯𑍌𑌧𑌿𑌷𑍍𑌠𑌿𑌰𑍀𑌮𑍍 ॥2॥

𑌅𑌶𑍇𑌷𑌦𑌯𑌿𑌤𑌾𑌯𑍁𑌤𑍇 𑌤𑍍𑌵𑌯𑌿 𑌸𑌮𑌾𑌗𑌤𑍇 𑌧𑌰𑍍𑌮𑌜𑍋
𑌵𑌿𑌜𑌿𑌤𑍍𑌯 𑌸𑌹𑌜𑍈𑌰𑍍𑌮𑌹𑍀𑌂 𑌭𑌵𑌦𑌪𑌾𑌂𑌗𑌸𑌂𑌵𑌰𑍍𑌧𑌿𑌤𑍈𑌃 ।
𑌶𑍍𑌰𑌿𑌯𑌂 𑌨𑌿𑌰𑍁𑌪𑌮𑌾𑌂 𑌵𑌹𑌨𑍍𑌨𑌹𑌹 𑌭𑌕𑍍𑌤𑌦𑌾𑌸𑌾𑌯𑌿𑌤𑌂
𑌭𑌵𑌂𑌤𑌮𑌯𑌿 𑌮𑌾𑌗𑌧𑍇 𑌪𑍍𑌰𑌹𑌿𑌤𑌵𑌾𑌨𑍍 𑌸𑌭𑍀𑌮𑌾𑌰𑍍𑌜𑍁𑌨𑌮𑍍 ॥3॥

𑌗𑌿𑌰𑌿𑌵𑍍𑌰𑌜𑌪𑍁𑌰𑌂 𑌗𑌤𑌾𑌸𑍍𑌤𑌦𑌨𑍁 𑌦𑍇𑌵 𑌯𑍂𑌯𑌂 𑌤𑍍𑌰𑌯𑍋
𑌯𑌯𑌾𑌚 𑌸𑌮𑌰𑍋𑌤𑍍𑌸𑌵𑌂 𑌦𑍍𑌵𑌿𑌜𑌮𑌿𑌷𑍇𑌣 𑌤𑌂 𑌮𑌾𑌗𑌧𑌮𑍍 ।
𑌅𑌪𑍂𑌰𑍍𑌣𑌸𑍁𑌕𑍃𑌤𑌂 𑌤𑍍𑌵𑌮𑍁𑌂 𑌪𑌵𑌨𑌜𑍇𑌨 𑌸𑌂𑌗𑍍𑌰𑌾𑌮𑌯𑌨𑍍
𑌨𑌿𑌰𑍀𑌕𑍍𑌷𑍍𑌯 𑌸𑌹 𑌜𑌿𑌷𑍍𑌣𑍁𑌨𑌾 𑌤𑍍𑌵𑌮𑌪𑌿 𑌰𑌾𑌜𑌯𑍁𑌦𑍍𑌧𑍍𑌵𑌾 𑌸𑍍𑌥𑌿𑌤𑌃 ॥4॥

𑌅𑌶𑌾𑌂𑌤𑌸𑌮𑌰𑍋𑌦𑍍𑌧𑌤𑌂 𑌬𑌿𑌟𑌪𑌪𑌾𑌟𑌨𑌾𑌸𑌂𑌜𑍍𑌞𑌯𑌾
𑌨𑌿𑌪𑌾𑌤𑍍𑌯 𑌜𑌰𑌰𑌸𑍍𑌸𑍁𑌤𑌂 𑌪𑌵𑌨𑌜𑍇𑌨 𑌨𑌿𑌷𑍍𑌪𑌾𑌟𑌿𑌤𑌮𑍍 ।
𑌵𑌿𑌮𑍁𑌚𑍍𑌯 𑌨𑍃𑌪𑌤𑍀𑌨𑍍 𑌮𑍁𑌦𑌾 𑌸𑌮𑌨𑍁𑌗𑍃𑌹𑍍𑌯 𑌭𑌕𑍍𑌤𑌿𑌂 𑌪𑌰𑌾𑌂
𑌦𑌿𑌦𑍇𑌶𑌿𑌥 𑌗𑌤𑌸𑍍𑌪𑍃𑌹𑌾𑌨𑌪𑌿 𑌚 𑌧𑌰𑍍𑌮𑌗𑍁𑌪𑍍𑌤𑍍𑌯𑍈 𑌭𑍁𑌵𑌃 ॥5॥

𑌪𑍍𑌰𑌚𑌕𑍍𑌰𑍁𑌷𑌿 𑌯𑍁𑌧𑌿𑌷𑍍𑌠𑌿𑌰𑍇 𑌤𑌦𑌨𑍁 𑌰𑌾𑌜𑌸𑍂𑌯𑌾𑌧𑍍𑌵𑌰𑌂
𑌪𑍍𑌰𑌸𑌨𑍍𑌨𑌭𑍃𑌤𑌕𑍀𑌭𑌵𑌤𑍍𑌸𑌕𑌲𑌰𑌾𑌜𑌕𑌵𑍍𑌯𑌾𑌕𑍁𑌲𑌮𑍍 ।
𑌤𑍍𑌵𑌮𑌪𑍍𑌯𑌯𑌿 𑌜𑌗𑌤𑍍𑌪𑌤𑍇 𑌦𑍍𑌵𑌿𑌜𑌪𑌦𑌾𑌵𑌨𑍇𑌜𑌾𑌦𑌿𑌕𑌂
𑌚𑌕𑌰𑍍𑌥 𑌕𑌿𑌮𑍁 𑌕𑌥𑍍𑌯𑌤𑍇 𑌨𑍃𑌪𑌵𑌰𑌸𑍍𑌯 𑌭𑌾𑌗𑍍𑌯𑍋𑌨𑍍𑌨𑌤𑌿𑌃 ॥6॥

𑌤𑌤𑌃 𑌸𑌵𑌨𑌕𑌰𑍍𑌮𑌣𑌿 𑌪𑍍𑌰𑌵𑌰𑌮𑌗𑍍𑌰𑍍𑌯𑌪𑍂𑌜𑌾𑌵𑌿𑌧𑌿𑌂
𑌵𑌿𑌚𑌾𑌰𑍍𑌯 𑌸𑌹𑌦𑍇𑌵𑌵𑌾𑌗𑌨𑍁𑌗𑌤𑌃 𑌸 𑌧𑌰𑍍𑌮𑌾𑌤𑍍𑌮𑌜𑌃 ।
𑌵𑍍𑌯𑌧𑌤𑍍𑌤 𑌭𑌵𑌤𑍇 𑌮𑍁𑌦𑌾 𑌸𑌦𑌸𑌿 𑌵𑌿𑌶𑍍𑌵𑌭𑍂𑌤𑌾𑌤𑍍𑌮𑌨𑍇
𑌤𑌦𑌾 𑌸𑌸𑍁𑌰𑌮𑌾𑌨𑍁𑌷𑌂 𑌭𑍁𑌵𑌨𑌮𑍇𑌵 𑌤𑍃𑌪𑍍𑌤𑌿𑌂 𑌦𑌧𑍌 ॥𑍭॥

𑌤𑌤𑌃 𑌸𑌪𑌦𑌿 𑌚𑍇𑌦𑌿𑌪𑍋 𑌮𑍁𑌨𑌿𑌨𑍃𑌪𑍇𑌷𑍁 𑌤𑌿𑌷𑍍𑌠𑌤𑍍𑌸𑍍𑌵𑌹𑍋
𑌸𑌭𑌾𑌜𑌯𑌤𑌿 𑌕𑍋 𑌜𑌡𑌃 𑌪𑌶𑍁𑌪𑌦𑍁𑌰𑍍𑌦𑍁𑌰𑍂𑌟𑌂 𑌵𑌟𑍁𑌮𑍍 ।
𑌇𑌤𑌿 𑌤𑍍𑌵𑌯𑌿 𑌸 𑌦𑍁𑌰𑍍𑌵𑌚𑍋𑌵𑌿𑌤𑌤𑌿𑌮𑍁𑌦𑍍𑌵𑌮𑌨𑍍𑌨𑌾𑌸𑌨𑌾-
𑌦𑍁𑌦𑌾𑌪𑌤𑌦𑍁𑌦𑌾𑌯𑍁𑌧𑌃 𑌸𑌮𑌪𑌤𑌨𑍍𑌨𑌮𑍁𑌂 𑌪𑌾𑌂𑌡𑌵𑌾𑌃 ॥𑍮॥

𑌨𑌿𑌵𑌾𑌰𑍍𑌯 𑌨𑌿𑌜𑌪𑌕𑍍𑌷𑌗𑌾𑌨𑌭𑌿𑌮𑍁𑌖𑌸𑍍𑌯𑌵𑌿𑌦𑍍𑌵𑍇𑌷𑌿𑌣-
𑌸𑍍𑌤𑍍𑌵𑌮𑍇𑌵 𑌜𑌹𑍃𑌷𑍇 𑌶𑌿𑌰𑍋 𑌦𑌨𑍁𑌜𑌦𑌾𑌰𑌿𑌣𑌾 𑌸𑍍𑌵𑌾𑌰𑌿𑌣𑌾 ।
𑌜𑌨𑍁𑌸𑍍𑌤𑍍𑌰𑌿𑌤𑌯𑌲𑌬𑍍𑌧𑌯𑌾 𑌸𑌤𑌤𑌚𑌿𑌂𑌤𑌯𑌾 𑌶𑍁𑌦𑍍𑌧𑌧𑍀-
𑌸𑍍𑌤𑍍𑌵𑌯𑌾 𑌸 𑌪𑌰𑌮𑍇𑌕𑌤𑌾𑌮𑌧𑍃𑌤 𑌯𑍋𑌗𑌿𑌨𑌾𑌂 𑌦𑍁𑌰𑍍𑌲𑌭𑌾𑌮𑍍 ॥𑍯॥

𑌤𑌤𑌃 𑌸𑍁𑌮𑌹𑌿𑌤𑍇 𑌤𑍍𑌵𑌯𑌾 𑌕𑍍𑌰𑌤𑍁𑌵𑌰𑍇 𑌨𑌿𑌰𑍂𑌢𑍇 𑌜𑌨𑍋
𑌯𑌯𑍌 𑌜𑌯𑌤𑌿 𑌧𑌰𑍍𑌮𑌜𑍋 𑌜𑌯𑌤𑌿 𑌕𑍃𑌷𑍍𑌣 𑌇𑌤𑍍𑌯𑌾𑌲𑌪𑌨𑍍।
𑌖𑌲𑌃 𑌸 𑌤𑍁 𑌸𑍁𑌯𑍋𑌧𑌨𑍋 𑌧𑍁𑌤𑌮𑌨𑌾𑌸𑍍𑌸𑌪𑌤𑍍𑌨𑌶𑍍𑌰𑌿𑌯𑌾
𑌮𑌯𑌾𑌰𑍍𑌪𑌿𑌤𑌸𑌭𑌾𑌮𑍁𑌖𑍇 𑌸𑍍𑌥𑌲𑌜𑌲𑌭𑍍𑌰𑌮𑌾𑌦𑌭𑍍𑌰𑌮𑍀𑌤𑍍 ॥10॥

𑌤𑌦𑌾 𑌹𑌸𑌿𑌤𑌮𑍁𑌤𑍍𑌥𑌿𑌤𑌂 𑌦𑍍𑌰𑍁𑌪𑌦𑌨𑌂𑌦𑌨𑌾𑌭𑍀𑌮𑌯𑍋-
𑌰𑌪𑌾𑌂𑌗𑌕𑌲𑌯𑌾 𑌵𑌿𑌭𑍋 𑌕𑌿𑌮𑌪𑌿 𑌤𑌾𑌵𑌦𑍁𑌜𑍍𑌜𑍃𑌂𑌭𑌯𑌨𑍍 ।
𑌧𑌰𑌾𑌭𑌰𑌨𑌿𑌰𑌾𑌕𑍃𑌤𑍌 𑌸𑌪𑌦𑌿 𑌨𑌾𑌮 𑌬𑍀𑌜𑌂 𑌵𑌪𑌨𑍍
𑌜𑌨𑌾𑌰𑍍𑌦𑌨 𑌮𑌰𑍁𑌤𑍍𑌪𑍁𑌰𑍀𑌨𑌿𑌲𑌯 𑌪𑌾𑌹𑌿 𑌮𑌾𑌮𑌾𑌮𑌯𑌾𑌤𑍍 ॥11॥

Browse Related Categories: