Narayaniyam Dashaka 81 - Grantha

𑌸𑍍𑌨𑌿𑌗𑍍𑌧𑌾𑌂 𑌮𑍁𑌗𑍍𑌧𑌾𑌂 𑌸𑌤𑌤𑌮𑌪𑌿 𑌤𑌾𑌂 𑌲𑌾𑌲𑌯𑌨𑍍 𑌸𑌤𑍍𑌯𑌭𑌾𑌮𑌾𑌂
𑌯𑌾𑌤𑍋 𑌭𑍂𑌯𑌃 𑌸𑌹 𑌖𑌲𑍁 𑌤𑌯𑌾 𑌯𑌾𑌜𑍍𑌞𑌸𑍇𑌨𑍀𑌵𑌿𑌵𑌾𑌹𑌮𑍍 ।
𑌪𑌾𑌰𑍍𑌥𑌪𑍍𑌰𑍀𑌤𑍍𑌯𑍈 𑌪𑍁𑌨𑌰𑌪𑌿 𑌮𑌨𑌾𑌗𑌾𑌸𑍍𑌥𑌿𑌤𑍋 𑌹𑌸𑍍𑌤𑌿𑌪𑍁𑌰𑍍𑌯𑌾𑌂
𑌸𑌶𑌕𑍍𑌰𑌪𑍍𑌰𑌸𑍍𑌥𑌂 𑌪𑍁𑌰𑌮𑌪𑌿 𑌵𑌿𑌭𑍋 𑌸𑌂𑌵𑌿𑌧𑌾𑌯𑌾𑌗𑌤𑍋𑌽𑌭𑍂𑌃 ॥1॥

𑌭𑌦𑍍𑌰𑌾𑌂 𑌭𑌦𑍍𑌰𑌾𑌂 𑌭𑌵𑌦𑌵𑌰𑌜𑌾𑌂 𑌕𑍌𑌰𑌵𑍇𑌣𑌾𑌰𑍍𑌥𑍍𑌯𑌮𑌾𑌨𑌾𑌂
𑌤𑍍𑌵𑌦𑍍𑌵𑌾𑌚𑌾 𑌤𑌾𑌮𑌹𑍃𑌤 𑌕𑍁𑌹𑌨𑌾𑌮𑌸𑍍𑌕𑌰𑍀 𑌶𑌕𑍍𑌰𑌸𑍂𑌨𑍁𑌃 ।
𑌤𑌤𑍍𑌰 𑌕𑍍𑌰𑍁𑌦𑍍𑌧𑌂 𑌬𑌲𑌮𑌨𑍁𑌨𑌯𑌨𑍍 𑌪𑍍𑌰𑌤𑍍𑌯𑌗𑌾𑌸𑍍𑌤𑍇𑌨 𑌸𑌾𑌰𑍍𑌧𑌂
𑌶𑌕𑍍𑌰𑌪𑍍𑌰𑌸𑍍𑌥𑌂 𑌪𑍍𑌰𑌿𑌯𑌸𑌖𑌮𑍁𑌦𑍇 𑌸𑌤𑍍𑌯𑌭𑌾𑌮𑌾𑌸𑌹𑌾𑌯𑌃 ॥2॥

𑌤𑌤𑍍𑌰 𑌕𑍍𑌰𑍀𑌡𑌨𑍍𑌨𑌪𑌿 𑌚 𑌯𑌮𑍁𑌨𑌾𑌕𑍂𑌲𑌦𑍃𑌷𑍍𑌟𑌾𑌂 𑌗𑍃𑌹𑍀𑌤𑍍𑌵𑌾
𑌤𑌾𑌂 𑌕𑌾𑌲𑌿𑌂𑌦𑍀𑌂 𑌨𑌗𑌰𑌮𑌗𑌮𑌃 𑌖𑌾𑌂𑌡𑌵𑌪𑍍𑌰𑍀𑌣𑌿𑌤𑌾𑌗𑍍𑌨𑌿𑌃 ।
𑌭𑍍𑌰𑌾𑌤𑍃𑌤𑍍𑌰𑌸𑍍𑌤𑌾𑌂 𑌪𑍍𑌰𑌣𑌯𑌵𑌿𑌵𑌶𑌾𑌂 𑌦𑍇𑌵 𑌪𑍈𑌤𑍃𑌷𑍍𑌵𑌸𑍇𑌯𑍀𑌂
𑌰𑌾𑌜𑍍𑌞𑌾𑌂 𑌮𑌧𑍍𑌯𑍇 𑌸𑌪𑌦𑌿 𑌜𑌹𑍃𑌷𑍇 𑌮𑌿𑌤𑍍𑌰𑌵𑌿𑌂𑌦𑌾𑌮𑌵𑌂𑌤𑍀𑌮𑍍 ॥3॥

𑌸𑌤𑍍𑌯𑌾𑌂 𑌗𑌤𑍍𑌵𑌾 𑌪𑍁𑌨𑌰𑍁𑌦𑌵𑌹𑍋 𑌨𑌗𑍍𑌨𑌜𑌿𑌨𑍍𑌨𑌂𑌦𑌨𑌾𑌂 𑌤𑌾𑌂
𑌬𑌧𑍍𑌵𑌾 𑌸𑌪𑍍𑌤𑌾𑌪𑌿 𑌚 𑌵𑍃𑌷𑌵𑌰𑌾𑌨𑍍 𑌸𑌪𑍍𑌤𑌮𑍂𑌰𑍍𑌤𑌿𑌰𑍍𑌨𑌿𑌮𑍇𑌷𑌾𑌤𑍍 ।
𑌭𑌦𑍍𑌰𑌾𑌂 𑌨𑌾𑌮 𑌪𑍍𑌰𑌦𑌦𑍁𑌰𑌥 𑌤𑍇 𑌦𑍇𑌵 𑌸𑌂𑌤𑌰𑍍𑌦𑌨𑌾𑌦𑍍𑌯𑌾-
𑌸𑍍𑌤𑌤𑍍𑌸𑍋𑌦𑌰𑍍𑌯𑌾 𑌵𑌰𑌦 𑌭𑌵𑌤𑌃 𑌸𑌾𑌽𑌪𑌿 𑌪𑍈𑌤𑍃𑌷𑍍𑌵𑌸𑍇𑌯𑍀 ॥4॥

𑌪𑌾𑌰𑍍𑌥𑌾𑌦𑍍𑌯𑍈𑌰𑌪𑍍𑌯𑌕𑍃𑌤𑌲𑌵𑌨𑌂 𑌤𑍋𑌯𑌮𑌾𑌤𑍍𑌰𑌾𑌭𑌿𑌲𑌕𑍍𑌷𑍍𑌯𑌂
𑌲𑌕𑍍𑌷𑌂 𑌛𑌿𑌤𑍍𑌵𑌾 𑌶𑌫𑌰𑌮𑌵𑍃𑌥𑌾 𑌲𑌕𑍍𑌷𑍍𑌮𑌣𑌾𑌂 𑌮𑌦𑍍𑌰𑌕𑌨𑍍𑌯𑌾𑌮𑍍 ।
𑌅𑌷𑍍𑌟𑌾𑌵𑍇𑌵𑌂 𑌤𑌵 𑌸𑌮𑌭𑌵𑌨𑍍 𑌵𑌲𑍍𑌲𑌭𑌾𑌸𑍍𑌤𑌤𑍍𑌰 𑌮𑌧𑍍𑌯𑍇
𑌶𑍁𑌶𑍍𑌰𑍋𑌥 𑌤𑍍𑌵𑌂 𑌸𑍁𑌰𑌪𑌤𑌿𑌗𑌿𑌰𑌾 𑌭𑍌𑌮𑌦𑍁𑌶𑍍𑌚𑍇𑌷𑍍𑌟𑌿𑌤𑌾𑌨𑌿 ॥5॥

𑌸𑍍𑌮𑍃𑌤𑌾𑌯𑌾𑌤𑌂 𑌪𑌕𑍍𑌷𑌿𑌪𑍍𑌰𑌵𑌰𑌮𑌧𑌿𑌰𑍂𑌢𑌸𑍍𑌤𑍍𑌵𑌮𑌗𑌮𑍋
𑌵𑌹𑌨𑍍𑌨𑌂𑌕𑍇 𑌭𑌾𑌮𑌾𑌮𑍁𑌪𑌵𑌨𑌮𑌿𑌵𑌾𑌰𑌾𑌤𑌿𑌭𑌵𑌨𑌮𑍍 ।
𑌵𑌿𑌭𑌿𑌂𑌦𑌨𑍍 𑌦𑍁𑌰𑍍𑌗𑌾𑌣𑌿 𑌤𑍍𑌰𑍁𑌟𑌿𑌤𑌪𑍃𑌤𑌨𑌾𑌶𑍋𑌣𑌿𑌤𑌰𑌸𑍈𑌃
𑌪𑍁𑌰𑌂 𑌤𑌾𑌵𑌤𑍍 𑌪𑍍𑌰𑌾𑌗𑍍𑌜𑍍𑌯𑍋𑌤𑌿𑌷𑌮𑌕𑍁𑌰𑍁𑌥𑌾𑌃 𑌶𑍋𑌣𑌿𑌤𑌪𑍁𑌰𑌮𑍍 ॥6॥

𑌮𑍁𑌰𑌸𑍍𑌤𑍍𑌵𑌾𑌂 𑌪𑌂𑌚𑌾𑌸𑍍𑌯𑍋 𑌜𑌲𑌧𑌿𑌵𑌨𑌮𑌧𑍍𑌯𑌾𑌦𑍁𑌦𑌪𑌤𑌤𑍍
𑌸 𑌚𑌕𑍍𑌰𑍇 𑌚𑌕𑍍𑌰𑍇𑌣 𑌪𑍍𑌰𑌦𑌲𑌿𑌤𑌶𑌿𑌰𑌾 𑌮𑌂𑌕𑍍𑌷𑍁 𑌭𑌵𑌤𑌾 ।
𑌚𑌤𑍁𑌰𑍍𑌦𑌂𑌤𑍈𑌰𑍍𑌦𑌂𑌤𑌾𑌵𑌲𑌪𑌤𑌿𑌭𑌿𑌰𑌿𑌂𑌧𑌾𑌨𑌸𑌮𑌰𑌂
𑌰𑌥𑌾𑌂𑌗𑍇𑌨 𑌛𑌿𑌤𑍍𑌵𑌾 𑌨𑌰𑌕𑌮𑌕𑌰𑍋𑌸𑍍𑌤𑍀𑌰𑍍𑌣𑌨𑌰𑌕𑌮𑍍 ॥𑍭॥

𑌸𑍍𑌤𑍁𑌤𑍋 𑌭𑍂𑌮𑍍𑌯𑌾 𑌰𑌾𑌜𑍍𑌯𑌂 𑌸𑌪𑌦𑌿 𑌭𑌗𑌦𑌤𑍍𑌤𑍇𑌽𑌸𑍍𑌯 𑌤𑌨𑌯𑍇
𑌗𑌜𑌂𑌚𑍈𑌕𑌂 𑌦𑌤𑍍𑌵𑌾 𑌪𑍍𑌰𑌜𑌿𑌘𑌯𑌿𑌥 𑌨𑌾𑌗𑌾𑌨𑍍𑌨𑌿𑌜𑌪𑍁𑌰𑍀𑌮𑍍 ।
𑌖𑌲𑍇𑌨𑌾𑌬𑌦𑍍𑌧𑌾𑌨𑌾𑌂 𑌸𑍍𑌵𑌗𑌤𑌮𑌨𑌸𑌾𑌂 𑌷𑍋𑌡𑌶 𑌪𑍁𑌨𑌃
𑌸𑌹𑌸𑍍𑌰𑌾𑌣𑌿 𑌸𑍍𑌤𑍍𑌰𑍀𑌣𑌾𑌮𑌪𑌿 𑌚 𑌧𑌨𑌰𑌾𑌶𑌿𑌂 𑌚 𑌵𑌿𑌪𑍁𑌲𑌮𑍍 ॥𑍮॥

𑌭𑍌𑌮𑌾𑌪𑌾𑌹𑍃𑌤𑌕𑍁𑌂𑌡𑌲𑌂 𑌤𑌦𑌦𑌿𑌤𑍇𑌰𑍍𑌦𑌾𑌤𑍁𑌂 𑌪𑍍𑌰𑌯𑌾𑌤𑍋 𑌦𑌿𑌵𑌂
𑌶𑌕𑍍𑌰𑌾𑌦𑍍𑌯𑍈𑌰𑍍𑌮𑌹𑌿𑌤𑌃 𑌸𑌮𑌂 𑌦𑌯𑌿𑌤𑌯𑌾 𑌦𑍍𑌯𑍁𑌸𑍍𑌤𑍍𑌰𑍀𑌷𑍁 𑌦𑌤𑍍𑌤𑌹𑍍𑌰𑌿𑌯𑌾 ।
𑌹𑍃𑌤𑍍𑌵𑌾 𑌕𑌲𑍍𑌪𑌤𑌰𑍁𑌂 𑌰𑍁𑌷𑌾𑌭𑌿𑌪𑌤𑌿𑌤𑌂 𑌜𑌿𑌤𑍍𑌵𑍇𑌂𑌦𑍍𑌰𑌮𑌭𑍍𑌯𑌾𑌗𑌮-
𑌸𑍍𑌤𑌤𑍍𑌤𑍁 𑌶𑍍𑌰𑍀𑌮𑌦𑌦𑍋𑌷 𑌈𑌦𑍃𑌶 𑌇𑌤𑌿 𑌵𑍍𑌯𑌾𑌖𑍍𑌯𑌾𑌤𑍁𑌮𑍇𑌵𑌾𑌕𑍃𑌥𑌾𑌃 ॥𑍯॥

𑌕𑌲𑍍𑌪𑌦𑍍𑌰𑍁𑌂 𑌸𑌤𑍍𑌯𑌭𑌾𑌮𑌾𑌭𑌵𑌨𑌭𑍁𑌵𑌿 𑌸𑍃𑌜𑌨𑍍 𑌦𑍍𑌵𑍍𑌯𑌷𑍍𑌟𑌸𑌾𑌹𑌸𑍍𑌰𑌯𑍋𑌷𑌾𑌃
𑌸𑍍𑌵𑍀𑌕𑍃𑌤𑍍𑌯 𑌪𑍍𑌰𑌤𑍍𑌯𑌗𑌾𑌰𑌂 𑌵𑌿𑌹𑌿𑌤𑌬𑌹𑍁𑌵𑌪𑍁𑌰𑍍𑌲𑌾𑌲𑌯𑌨𑍍 𑌕𑍇𑌲𑌿𑌭𑍇𑌦𑍈𑌃 ।
𑌆𑌶𑍍𑌚𑌰𑍍𑌯𑌾𑌨𑍍𑌨𑌾𑌰𑌦𑌾𑌲𑍋𑌕𑌿𑌤𑌵𑌿𑌵𑌿𑌧𑌗𑌤𑌿𑌸𑍍𑌤𑌤𑍍𑌰 𑌤𑌤𑍍𑌰𑌾𑌪𑌿 𑌗𑍇𑌹𑍇
𑌭𑍂𑌯𑌃 𑌸𑌰𑍍𑌵𑌾𑌸𑍁 𑌕𑍁𑌰𑍍𑌵𑌨𑍍 𑌦𑌶 𑌦𑌶 𑌤𑌨𑌯𑌾𑌨𑍍 𑌪𑌾𑌹𑌿 𑌵𑌾𑌤𑌾𑌲𑌯𑍇𑌶 ॥10॥

Browse Related Categories: