manōjavaṃ mārutatulyavēgaṃ
jitēndriyaṃ buddhimatāṃ variṣṭham ।
vātātmajaṃ vānarayūthamukhyaṃ
śrīrāmadūtaṃ śirasā namāmi ॥
añjanānandanaṃ vīraṃ jānakīśōkanāśanam ।
kapīśamakṣahantāraṃ vandē laṅkābhayaṅkaram ॥
gōṣpadīkṛtavārāśiṃ maśakīkṛtarākṣasam ।
rāmāyaṇamahāmālāratnaṃ vandē'nilātmajam ॥
yatra yatra raghunāthakīrtanaṃ tatra tatra kṛtamastakāñjalim ।
bāṣpavāriparipūrṇalōchanaṃ mārutiṃ namata rākṣasāntakam ॥
vandē vānara-nārasiṃha-khagarāṭ-krōḍāśvavaktrāñchitaṃ
nānālaṅkaraṇaṃ tripañchanayanaṃ dēdīpyamānaṃ ruchām ।
hastābhairasikhēṭapustakasudhābhāṇḍaṃ kuśādrīn halaṃ
khaṭvāṅgaṃ phaṇivṛkṣadhṛddaśabhujaṃ sarvārigarvāpaham ॥
sarvāriṣṭanivārakaṃ śubhakaraṃ piṅgākṣamakṣāpahaṃ
sītānvēṣaṇatatparaṃ kapivaraṃ kōṭīndusūryaprabham ।
laṅkādvīpabhayaṅkaraṃ sakaladaṃ sugrīvasammānitaṃ
dēvēndrādi samaktadēvavinutaṃ kākutthadūtaṃ bhajē ॥
buddhirbalaṃ yaśō dhairyaṃ nirbhayatvamarōgatā ।
ajāḍyaṃ vākpaṭutvaṃ cha hanumachCharaṇādbhavēt ॥
namō'sturāmāya salakṣmaṇāya dēvyai cha tasyai janakātmajāyai ।
namō'stu rudrēndrayamānilēbhyō namō'stu chandrārkamarudgaṇēbhyaḥ ॥
jayatyatibalō rāmō lakṣmaṇaścha mahābalaḥ ।
rājā jayati sugrīvō rāghavēṇābhipālitaḥ ॥
dāsō'haṃ kōsalēndrasya rāmasyākliṣṭakarmaṇaḥ ।
hanumān śatrusainyānāṃ nihantā mārutātmajaḥ ॥
na rāvaṇasahasraṃ mē yuddhē pratibalaṃ bhavēt ।
śilābhistu praharataḥ pādapaiścha sahasraśaḥ ॥
ardayitvā purīṃ laṅkāṃ abhivādya cha maithilīm ।
samṛddhārthō gamiṣyāmi miṣatāṃ sarvarakṣasām ॥
dharmātmā satyasandhaścha rāmō dāśarathiryadi ।
pauruṣē chāpratidvandvaḥ śarainaṃ jahi rāvaṇim ॥
sakṛdēva prapannāya tavāsmīti cha yāchatē ।
abhayaṃ sarvabhūtēbhyaḥ dadāmyētadvrataṃ mama ॥
iti sundarakāṇḍa prārthanā ślōkāḥ samāptā ।
