॥ ōṃ śrī gaṇēśāya namaḥ ॥

gaṇapati stutiḥ

hari̍ḥ ōṃ
ga̠ṇānā̎-ntvā ga̠ṇap̍atiṃ havāmahē ka̠vi-ṅk̍avī̠nām̍upa̠maśr̍avastamam ।
jyē̠ṣṭha̠rājaṃ̠ brahm̍aṇā-mbrahmaṇaspata̠ ā na̍-śśa‍ṛ̠ṇvannū̠tibhi̍-ssīda̠ sād̍anam ॥ 2.23.01॥
(ṛṣiḥ gṛtsamadaḥ, dēvatā brahmaṇaspatiḥ, Chandaḥ jagatī, svaraḥ niṣādaḥ)

niṣus̎īda gaṇapatē ga̠ṇēṣu̠ tvām̎āhu̠rvipr̍atama-ṅkavī̠nām ।
na ṛ̠tē tavatkr̍iyatē̠ ki-ñcha̠nārē ma̠hāma̠rka-mm̍aghavañchi̠tram̍archa ॥ 10.112.09॥
(nabhaḥprabhēdanō vairupaḥ, indraḥ, nichṛttriṣṭup, dhaivataḥ)

ā tū n̍a indra kṣu̠manta̎-ñchi̠tra-ṅgrā̠bhaṃ sa-ṅgR̍ubhāya । ma̠hā̠ha̠stī dakṣ̍iṇēna ॥ 08.81.01॥
(kusīdī kāṇvaḥ, indraḥ, gāyatrī, ṣaḍjaḥ)

ōṃ śrī mahāgaṇapatayē̠ nama̍ḥ ॥

atha pañcharudra-mprārambhaḥ

(prathamamaṇḍalē trichatvāriṃśaṃ sūktaṃ 1.43
ṛṣiḥ kaṇvō ghauraḥ ।
dēvatā 1, 2, 4-6 rudraḥ, 3 mitrāvaruṇau; 7-9 sōmaḥ ।
Chandaḥ 1-4, 7, 8 gāyatrī, 5 virāḍgāyatrī, 6 pādanichṛdgāyatrī, 9 anuṣṭup ।
svaraḥ 1-8 ṣaḍjaḥ, 9 gāndhāraḥ ॥)

hari̍ḥ ōṃ
kadru̠drāya̠ prach̎ētasē mī̠ḻhuṣṭ̍amāya̠ tavy̍asē । vō̠chēma̠ śant̍amaṃ hṛ̠dē ॥ 1.043.01॥

yath̎ā nō ad̍itiḥ̠ kara̠tpaśvē̠ nṛbhyō̠ yathā̠ gav̎ē । yath̎ā tō̠kāy̍a ru̠driy̎am ॥ 1.043.02॥

yath̎ā nō mi̠trō var̍uṇō̠ yath̎ā ru̠draśchik̎ētati । yathā̠ viśv̎ē sa̠jōṣ̍asaḥ ॥ 1.043.03॥

gā̠thap̍ati-mmē̠dhap̍atiṃ ru̠dra-ñjal̎āṣabhēṣajam । tachChaṃ̠yō-ssu̠mnam̎īmahē ॥ 1.043.04॥

ya-śśu̠kra ̍iva̠ sūryō̠ hir̎aṇyamiva̠ rōch̍atē । śrēṣṭh̎ō dē̠vānāṃ̠ vasu̍ḥ ॥ 1.043.05॥

śa-nna̍ḥ kara̠tyarv̍atē su̠ga-mmē̠ṣāy̍a mē̠ṣy̎ē । nṛbhyō̠ nār̍ibhyō̠ gav̎ē ॥ 1.043.06॥

a̠smē s̎ōma̠ śriya̠madhi̠ ni dh̎ēhi śa̠tasy̍a nṛ̠ṇām । mahi̠ śrav̍astuvinṛ̠mṇam ॥ 1.043.07॥

mā na̍-ssōmapari̠bādhō̠ mār̎ātayō juhuranta । ā n̍a indō̠ vāj̎ē bhaja ॥ 1.043.08॥

yāst̎ē pra̠jā a̠mṛt̍asya̠ par̍asmi̠ndhām̎annṛ̠tasy̍a ।
mū̠rdhā nābh̎ā sōma vēna ā̠bhūṣ̎antī-ssōma vēdaḥ ॥ 1.043.09॥

(prathama maṇḍalē chaturdaśōttaraśatataṃ sūktam
ṛṣiḥ - kutsa āṅgirasaḥ । dēvatā rudraḥ ।
Chandaḥ 1 jagatī, 2, 7 nichṛjjagatī, 3, 6, 8, 9 virāḍjagatī,
4, 5, 11 bhuriktriṣṭup, 10 nichṛttriṣṭup ।
svaraḥ 1-3, 6-9 niṣādaḥ, 4, 5, 10, 11 dhaivataḥ ॥)

i̠mā ru̠drāy̍a ta̠vas̎ē kapa̠rdin̎ē kṣa̠yadv̎īrāya̠ pra bh̍arāmahē ma̠tīḥ ।
yathā̠ śamas̍addvi̠padē̠ chat̍uṣpadē̠ viśva̎-mpu̠ṣṭa-ṅgrām̎ē a̠sminn̍anātu̠ram ॥ 1.114.01॥

mṛ̠ḻā n̎ō rudrō̠ta nō̠ may̍askṛdhi kṣa̠yadv̎īrāya̠ nam̍asā vidhēma tē ।
yachCha-ñcha̠ yōścha̠ man̍urāyē̠jē pi̠tā tad̍aśyāma̠ tav̍a rudra̠ praṇ̎ītiṣu ॥ 1.114.02॥

a̠śyām̍a tē suma̠ti-nd̎ēvaya̠jyay̎ā kṣa̠yadv̎īrasya̠ tav̍a rudra mīḍhvaḥ ।
su̠mnā̠yannidviś̎ō a̠smāka̠mā cha̠rār̍iṣṭavīrā juhavāma tē ha̠viḥ ॥ 1.114.03॥

tvē̠ṣaṃ va̠yaṃ ru̠draṃ y̍ajña̠sādha̎ṃ va̠ṅku-ṅka̠vimav̍asē̠ ni hv̍ayāmahē ।
ā̠rē a̠smaddaivyaṃ̠ hēḻ̎ō asyatu suma̠timidva̠yama̠syā vR̍uṇīmahē ॥ 1.114.04॥

di̠vō v̍arā̠ham̍aru̠ṣa-ṅk̍apa̠rdina̎-ntvē̠ṣaṃ rū̠pa-nnam̍asā̠ ni hv̍ayāmahē ।
hastē̠ bibhr̍adbhēṣa̠jā vāry̎āṇi̠ śarma̠ varm̍a chCha̠rdira̠smabhya̎ṃ yaṃsat ॥ 1.114.05॥

i̠da-mpi̠trē ma̠rut̎āmuchyatē̠ vacha̍-ssvā̠dō-ssvād̎īyō ru̠drāya̠ vardh̍anam ।
rāsv̎ā cha nō amṛta marta̠bhōj̍anaṃ̠ tman̎ē tō̠kāya̠ tan̍ayāya mṛḻa ॥ 1.114.06॥

mān̎ō ma̠hānt̍amu̠ta mān̎ō arbha̠ka-mmā na̠ ukṣ̎antamu̠ta mā n̍a ukṣi̠tam ।
mān̎ō vadhīḥ pi̠taraṃ̠ mōta mā̠taraṃ̠ mā na̍ḥ pri̠yāsta̠nv̎ō rudra rīriṣaḥ ॥ 1.114.07॥

mā n̍astō̠kē tan̍ayē̠ mā n̍a ā̠yau mā nō̠ gōṣu̠ mā nō̠ aśv̎ēṣu rīriṣaḥ ।
vī̠rānmā n̎ō rudra bhāmi̠tō v̍adhīr​ha̠viṣm̎antaḥ̠ sada̠mittv̎ā havāmahē ॥ 1.114.08॥

up̍atē̠ stōm̎ānpaśu̠pā i̠vāk̍araṃ̠ rāsv̎ā pitarmarutāṃ su̠mnama̠smē ।
bha̠drā hit̎ē suma̠tirmR̍uḻa̠yatta̠māth̎ā va̠yamava̠ itt̎ē vṛṇīmahē ॥ 1.114.09॥

ā̠rē t̎ē gō̠ghnamu̠ta p̎ūruṣa̠ghna-ṅkṣay̍advīra su̠mnama̠smē t̎ē astu ।
mṛ̠ḻā ch̍a nō̠ adh̍i cha brūhi dē̠vādh̎ā cha naḥ̠ śarm̍a yachCha dvi̠bar​hā̎ḥ ॥ 1.114.10॥

av̎ōchāma̠ nam̎ō asmā ava̠syava̍-śśṛ̠ṇōt̍u nō̠ hava̎ṃ ru̠drō ma̠rutv̎ān ।
tann̎ō mi̠trō var̍uṇō māmahantā̠mad̍itiḥ̠ sindhu̍ḥ pṛthi̠vī u̠ta dyauḥ ॥ 1.114.11॥

(dvitīyamaṇḍalē trayastriṃśaṃ sūktam
ṛṣiḥ gṛtsamadaḥ । dēvatā rudraḥ ।
Chandaḥ 1, 5, 9, 13-15 nichṛttriṣṭup, 3, 6, 10, 11, virāṭtriṣṭup,
4, 8 triṣṭup, 2, 7 paṅktiḥ, 12 bhurikpaṅktiḥ ।
svaraḥ 1, 3-6, 8-11, 13-15 dhaivataḥ, 2, 7, 12 pañchamaḥ ॥)

āt̎ē pitarmarutāṃ su̠mnam̎ētu̠ mā naḥ̠ sūry̍asya sa̠ndṛś̎ō yuyōthāḥ ।
a̠bhi n̎ō vī̠rō arv̍ati kṣamēta̠ pra j̎āyēmahi rudra pra̠jābhi̍ḥ ॥ 2.033.01॥

tvād̍attēbhī rudra̠ śant̍amēbhi-śśa̠taṃ him̎ā aśīya bhēṣa̠jēbhi̍ḥ ।
vya(1)smaddvēṣ̎ō vita̠raṃ vyaṃhō̠ vyam̎īvāśchātayasvā̠ viṣ̎ūchīḥ ॥ 2.033.02॥

śrēṣṭh̎ō jā̠tasy̍a rudra śri̠yās̍i ta̠vast̍amasta̠vasā̎ṃ vajrabāhō ।
par​ṣ̍i ṇaḥ pā̠ramaṃh̍asa-ssva̠sti viśv̎ā a̠bh̎ītī̠ rap̍asō yuyōdhi ॥ 2.033.03॥

mātv̎ā rudra chukrudhāmā̠ nam̎ōbhi̠rmā duṣṭ̍utī vṛṣabha̠ mā sah̎ūtī ।
unn̎ō vī̠rāँ ̍arpaya bhēṣa̠jēbh̍irbhi̠ṣakt̍ama-ntvā bhi̠ṣajā̎ṃ śṛṇōmi ॥ 2.033.04॥

hav̎īmabhi̠r​hav̍atē̠ yō ha̠virbhi̠rava̠ stōm̎ēbhī ru̠dra-nd̍iṣīya ।
ṛ̠dū̠dara̍-ssu̠havō̠ mā n̎ō a̠syai ba̠bhru-ssu̠śipr̎ō rīradhanma̠nāya̎i ॥ 2.033.05॥

unm̎ā mamanda vṛṣa̠bhō ma̠rutvā̠ntvakṣ̎īyasā̠ vay̍asā̠ nādh̍amānam ।
ghṛṇ̎īva chChā̠yām̍ara̠pā ̍aśī̠yā v̍ivāsēyaṃ ru̠drasy̍a su̠mnam ॥ 2.033.06॥

kva(1) sya t̎ē rudra mṛḻa̠yāku̠r​hastō̠ yō ast̍i bhēṣa̠jō jal̎āṣaḥ ।
a̠pa̠bha̠rtā rap̍asō̠ daivy̍asyā̠bhī nu m̎ā vṛṣabha chakṣamīthāḥ ॥ 2.033.07॥

pra ba̠bhrav̎ē vṛṣa̠bhāy̍a śvitī̠chē ma̠hō ma̠hīṃ s̍uṣṭu̠tim̎īrayāmi ।
na̠ma̠syā k̍almalī̠kinaṃ̠ nam̎ōbhirgṛṇī̠mas̍i tvē̠ṣaṃ ru̠drasya̠ nām̍a ॥ 2.033.08॥

sthi̠rēbhi̠raṅgai̎ḥ puru̠rūp̍a u̠grō ba̠bhru-śśu̠krēbhi̍ḥ pipiśē̠ hir̎aṇyaiḥ ।
īś̎ānāda̠sya bhuv̍anasya̠ bhūrē̠rna vā ̍u yōṣadru̠drād̍asu̠ry̎am ॥ 2.033.09॥

ar​h̎anbibhar​ṣi̠ sāy̍akāni̠ dhanvār​h̎anni̠ṣkaṃ y̍aja̠taṃ vi̠śvar̎ūpam ।
ar​h̎anni̠da-nd̍ayasē̠ viśva̠mabhvaṃ̠ na vā ōj̎īyō rudra̠ tvad̍asti ॥ 2.033.10॥

stu̠hi śru̠ta-ṅg̍arta̠sadaṃ̠ yuv̎āna-mmṛ̠ga-nna bhī̠mam̍upaha̠tnumu̠gram ।
mṛ̠ḻā j̍ari̠trē r̍udra̠ stav̎ānō̠-'nya-nt̎ē a̠smanni v̍apantu̠ sēnā̎ḥ ॥ 2.033.11॥

ku̠mā̠raśch̍itpi̠taraṃ̠ vand̍amānaṃ̠ prat̍i nānāma rudrōpa̠yant̎am ।
bhūr̎ērdā̠tāraṃ̠ satp̍ati-ṅgṛṇīṣē stu̠tastva-mbh̎ēṣa̠jā r̎āsya̠smē ॥ 2.033.12॥

yāv̎ō bhēṣa̠jā m̍arutaḥ̠ śuch̎īni̠ yā śant̍amā vṛṣaṇō̠ yā m̍ayō̠bhu ।
yāni̠ manu̠ravR̍uṇītā pi̠tā na̠stā śa-ñcha̠ yōśch̍a ru̠drasy̍a vaśmi ॥ 2.033.13॥

par̍i ṇō hē̠tī ru̠drasy̍a vṛjyāḥ̠ par̍i tvē̠ṣasy̍a durma̠tirma̠hī g̎āt ।
av̍a sthi̠rā ma̠ghav̍adbhyastanuṣva̠ mīḍhv̍astō̠kāya̠ tan̍ayāya mṛḻa ॥ 2.033.14॥

ē̠vā b̍abhrō vṛṣabha chēkitāna̠ yath̎ā dēva̠ na hR̍uṇī̠ṣē na haṃs̍i ।
ha̠va̠na̠śrunn̎ō rudrē̠ha b̎ōdhi bṛ̠hadv̍adēma vi̠dath̎ē su̠vīrā̎ḥ ॥ 2.033.15॥

(ṣaṣṭhamaṇḍalē chatussaptatitamaṃ sūktam
ṛṣiḥ bharadvājō bār​haspatyaḥ । dēvatā sōmārudrau ।
Chandaḥ 1, 2, 4 triṣṭup, 3 nichṛttriṣṭup, svaraḥ dhaivataḥ ॥)

sōm̎ārudrā dhā̠ray̎ēthāmasu̠ryaṃ(1) pra v̎āmi̠ṣṭayō-'r̍amaśnuvantu ।
dam̎ēdamē sa̠pta ratnā̠ dadh̎ānā̠ śa-nn̎ō bhūta-ndvi̠padē̠ śa-ñchat̍uṣpadē ॥ 6.074.01॥

sōm̎ārudrā̠ vi vR̍uhataṃ̠ viṣ̎ūchī̠mam̎īvā̠ yā nō̠ gay̍amāvi̠vēś̍a ।
ā̠rē b̎ādhēthāṃ̠ nir​R̍uti-mparā̠chaira̠smē bha̠drā sa̎uśrava̠sān̍i santu ॥ 6.074.02॥

sōm̎ārudrā yu̠vamē̠tānya̠smē viśv̎ā ta̠nūṣ̍u bhēṣa̠jān̍i dhattam ।
av̍a syata-mmu̠ñchataṃ̠ yannō̠ ast̍i ta̠nūṣ̍u ba̠ddha-ṅkṛ̠tamēn̎ō a̠smat ॥ 6.074.03॥

ti̠gmāy̍udhau ti̠gmah̎ētī su̠śēvau̠ sōm̎ārudrāvi̠ha su mR̍uḻata-nnaḥ ।
pran̎ō muñchataṃ̠ var̍uṇasya̠ pāś̎ādgōpā̠yata̎-nna-ssumana̠syam̎ānā ॥ 6.074.04॥

(saptamamaṇḍalē ṣaṭchatvāriṃśaṃ sūktam
ṛṣiḥ vasiṣṭhaḥ । dēvatā rudraḥ ।
Chandaḥ 1 virāḍjagatī, 2 nichṛttriṣṭup, 3 nichṛt jagatī, 4 svarāṭpaṅktiḥ ।
svaraḥ 1, 3, niṣadaḥ, 2 dhaivataḥ, 4 pañchamaḥ ॥)

i̠mā ru̠drāy̍a sthi̠radh̎anvanē̠ gira̍ḥ, kṣi̠prēṣ̍avē dē̠vāy̍a sva̠dhāvn̎ē ।
aṣ̎āḻhāya̠ sah̍amānāya vē̠dhas̎ē ti̠gmāy̍udhāya bharatā śṛ̠ṇōt̍u naḥ ॥ 7.046.01॥

sa hi kṣay̎ēṇa̠ kṣamy̍asya̠ janm̍anaḥ̠ sāmr̎ājyēna di̠vyasya̠ chēt̍ati ।
ava̠nnav̎antī̠rup̍a nō̠ dur̍aścharānamī̠vō r̍udra̠ jās̍u nō bhava ॥ 7.046.02॥

yāt̎ē di̠dyudav̍asṛṣṭā di̠vaspar̍i kṣma̠yā char̍ati̠ pari̠ sā vR̍uṇaktu naḥ ।
sa̠hasra̎-ntē svapivāta bhēṣa̠jā mā n̍astō̠kēṣu̠ tan̍ayēṣu rīriṣaḥ ॥ 7.046.03॥

mān̎ō vadhī rudra̠ mā par̎ā dā̠ mā t̎ē bhūma̠ pras̍itau hīḻi̠tasy̍a ।
ān̎ō bhaja ba̠r​hiṣ̍i jīvaśaṃ̠sē yū̠ya-mp̎āta sva̠stibhiḥ̠ sad̎ā naḥ ॥ 7.046.04॥

a̠smē ru̠drā mē̠hanā̠ parv̍atāsō vṛtra̠hatyē̠ bhar̍ahūtau sa̠jōṣā̎ḥ ।
ya-śśaṃs̍atē stuva̠tē dhāy̍i pa̠jra indr̍ajyēṣṭhā a̠smāँ ̍avantu dē̠vāḥ ॥ 8.063.12॥
(pragāthaḥ kāṇvaḥ, dēvāḥ, triṣṭup, gāndhāraḥ)

tvam̍agnē ru̠drō as̍urō ma̠hō di̠vastvaṃ śardhō̠ mār̍uta-mpṛ̠kṣa ̎īśiṣē ।
tvaṃ vāta̎iraru̠ṇairy̎āsi śaṅga̠yastva-mpū̠ṣā v̍idha̠taḥ p̎āsi̠ nu tman̎ā ॥ 2.001.06॥
(āṅgirasa-śśaunahōtrō bhārgavō gṛtsamadaḥ, agniḥ, bhuri-ktriṣṭup, dhaivataḥ)

āvō̠ rāj̎ānamadhva̠rasy̍a ru̠draṃ hōt̎āraṃ satya̠yajaṃ̠ rōd̍asyōḥ ।
a̠gni-mpu̠rā t̍anayi̠tnōra̠chittā̠ddhir̎aṇyarūpa̠mav̍asē kṛṇudhvam ॥ 4.003.01॥
(vāmadēvaḥ, agniḥ, nichṛttriṣṭup, dhaivataḥ)

tav̍a śri̠yē ma̠rut̎ō marjayanta̠ rudra̠ yattē̠ jan̍ima̠ chār̍u chi̠tram ।
pa̠daṃ yadviṣṇ̎ōrupa̠ma-nni̠dhāyi̠ tēn̍a pāsi̠ guhyaṃ̠ nāma̠ gōn̎ām ॥ 5.003.03॥
(vasuśruta ātrēyaḥ, agniḥ, nichṛttriṣṭup, dhaivataḥ)

bhuv̍anasya pi̠tara̎-ṅgī̠rbhirā̠bhī ru̠dra-ndiv̎ā va̠rdhay̎ā ru̠drama̠ktau ।
bṛ̠hant̍amṛ̠ṣvama̠jara̎ṃ suṣu̠mnamṛdh̍agghuvēma ka̠vin̎ēṣi̠tāsa̍ḥ ॥ 6.049.10॥ ṛjiśvāḥ, viśvē dēvāḥ, triṣṭup, dhaivataḥ)

tam̍u ṣṭuhi̠ ya-ssvi̠ṣu-ssu̠dhanvā̠ yō viśv̍asya̠ kṣay̍ati bhēṣa̠jasy̍a ।
yakṣv̎ā ma̠hē sa̎umana̠sāy̍a ru̠dra-nnam̎ōbhirdē̠vamas̍ura-nduvasya ॥ 5.042.11॥
(agniḥ, viśvē dēvāḥ, nichṛttriṣṭup, dhaivataḥ)

a̠ya-mmē̠ hastō̠ bhag̍avāna̠ya-mmē̠ bhag̍avattaraḥ ।
a̠ya-mm̎ē vi̠śvabh̎ēṣajō̠-'yaṃ śi̠vābh̍imar​śanaḥ ॥ 10.060.12॥
(bandhvādayō gaupāyanāḥ, hastaḥ, nichṛdanuṣṭup, gāndhāraḥ)

try̎ambakaṃ yajāmahē su̠gandhi̎-mpuṣṭi̠vardh̍anam ।
u̠rvā̠ru̠kam̍iva̠ bandh̍anānmṛ̠tyōrm̍ukṣīya̠ māmṛt̎āt ॥ 7.059.12॥
(vasiṣṭhaḥ, rudraḥ, anuṣṭup, gāndhāraḥ)

śānti pāṭhamantraḥ

hari̍ḥ ōṃ
tatpur̍uṣāya vi̠dmah̍ē mahādē̠vāy̍a dhīmahi ।
tann̍ō rudraḥ prachō̠day̍āt ॥

īśānassarv̍avidyā̠nā̠mīśvara-ssarv̍abhūtā̠nāṃ̠ ।
brahmādh̍ipati̠rbrahma̠ṇō-'dh̍ipati̠rbahm̍ā śi̠vō m̍ē-'stu sadāśi̠vōm ॥

ōṃ śi̠vō nām̍āsi̠ svadh̍itistē pi̠tā nam̍astē astu̠ mā m̍ā hiꣳsīḥ ।
niv̍artayāmyāy̍uṣē̠-'nnādy̍āya̠ prajan̍anāya rā̠yaspōṣ̍āya suprajā̠stvāy̍a su̠vīry̍āya ॥

ōṃ viśv̍āni dēva savitarduri̠tāni̠ parāsuva ।
yadbha̠dra-ntanna̠ āsuva ॥

ō-ndyau-śśānt̍ira̠ntar̍ikṣa̠ꣳ śānti̍ḥ pṛthi̠vī śānti̠rāpaḥ̠ śānti̠rōṣ̍adhayaḥ̠ śānti̍ḥ ।
vana̠spat̍ayaḥ̠ śānti̠rviśv̍ēdē̠vā-śśānti̠rbrahma̠ śāntiḥ̠ sarva̠ꣳ śāntiḥ̠ śānt̍irē̠va śāntiḥ̠ sā mā̠ śānt̍irēdhi ॥

ōṃ sarvēṣāṃ vā ēṣa vēdānāꣳrasō yatsāmaḥ ।
sarvēṣāmēvainamētad vēdānāꣳ rasēnābhiṣiñchati ॥

ōṃ śambh̍avē̠ nama̍ḥ । nam̍astē astu bhagavanviśvēśva̠rāy̍a mahādē̠vāy̍a tryamba̠kāy̍a tripurānta̠kāy̍a trikāgnikā̠lāy̍a
kālāgniru̠drāy̍a nīlaka̠ṇṭhāy̍a mṛtyuñja̠yāy̍a sarvēśva̠rāy̍a sadāśi̠vāy̍a śrīmanmahādē̠vāya̠ nama̍ḥ ॥

ōṃ
yadakṣarapadabhraṣṭa-mmātrāhīna-ñcha yadbhavēt ।
tatsarva-ṅkṣamyatā-ndēva prasīda paramēśvara ॥

ōṃ śāntiḥ̠ śāntiḥ̠ śānti̍ḥ ॥

anēna śrī rudrābhiṣēkakarmaṇā śrī bhavānīśaṅkara mahārudrāḥ prīyatā-nna mama ।

iti śrīṛgvēdīya pañcharudraṃ samāptā ।
॥ ōṃ śrī sāmba sadāśivārpaṇamastu ॥