pañchastavi – 2 charchāstavaḥ >>
saundaryavibhramabhuvō bhuvanādhipatya-
-saṅkalpakalpataravastripurē jayanti ।
ētē kavitvakumadaprakarāvabōdha-
-pūrṇēndavastvayi jagajjanani praṇāmāḥ ॥ 1 ॥
dēvi stutivyatikarē kṛtabuddhayastē
vāchaspati prabhṛtayō'pi jaḍī bhavanti ।
tasmānnisargajaḍimā katamō'hamatra
stōtraṃ tava tripuratāpanapatni kartum ॥ 2 ॥
mātastathāpi bhavatīṃ bhavatīvratāpa-
-vichChittayē stutimahārṇava karṇadhāraḥ ।
stōtuṃ bhavāni sa bhavachcharaṇāravinda-
-bhaktigrahaḥ kimapi māṃ mukharī karōti ॥ 3 ॥
sūtē jaganti bhavatī bhavatī bibharti
jāgarti tatkṣayakṛtē bhavatī bhavāni ।
mōhaṃ bhinatti bhavatī bhavatī ruṇaddhi
līlāyitaṃ jayati chitramidaṃ bhavatyāḥ ॥ 4 ॥
yasminmanāgapi navāmbujapatragaurīṃ
gaurīṃ prasādamadhurāṃ dṛśamādadhāsi ।
tasminnirantaramanaṅgaśarāvakīrṇa-
-sīmantinīnayanasantatayaḥ patanti ॥ 5 ॥
pṛthvībhujō'pyudayanaprabhavasya tasya
vidyādhara praṇati chumbita pādapīṭhaḥ ।
tachchakravartipadavīpraṇayaḥ sa ēṣaḥ
tvatpādapaṅkajarajaḥ kaṇajaḥ prasādaḥ ॥ 6 ॥
tvatpādapaṅkajaraja praṇipātapūrvaiḥ
puṇyairanalpamatibhiḥ kṛtibhiḥ kavīndraiḥ ।
kṣīrakṣapākaradukūlahimāvadātā
kairapyavāpi bhuvanatritayē'pi kīrtiḥ ॥ 7 ॥
kalpadrumaprasavakalpitachitrapūjāṃ
uddīpita priyatamāmadaraktagītim ।
nityaṃ bhavāni bhavatīmupavīṇayanti
vidyādharāḥ kanakaśailaguhāgṛhēṣu ॥ 8 ॥
lakṣmīvaśīkaraṇakarmaṇi kāminīnāṃ
ākarṣaṇavyatikarēṣu cha siddhamantraḥ ।
nīrandhramōhatimirachChidurapradīpō
dēvi tvadaṅghrijanitō jayati prasādaḥ ॥ 9 ॥
dēvi tvadaṅghrinakharatnabhuvō mayūkhāḥ
pratyagramauktikaruchō mudamudvahanti ।
sēvānativyatikarē surasundarīṇāṃ
sīmantasīmni kusumastabakāyitaṃ yaiḥ ॥ 10 ॥
mūrdhni sphurattuhinadīdhitidīptidīptaṃ
madhyē lalāṭamamarāyudharaśmichitram ।
hṛchchakrachumbi hutabhukkaṇikānukāri
jyōtiryadētadidamamba tava svarūpam ॥ 11 ॥
rūpaṃ tava sphuritachandramarīchigauraṃ
ālōkatē śirasi vāgadhidaivataṃ yaḥ ।
niḥsīmasūktirachanāmṛtanirjharasya
tasya prasādamadhurāḥ prasaranti vāchaḥ ॥ 12 ॥
sindūrapāṃsupaṭalachChuritāmiva dyāṃ
tvattējasā jaturasasnapitāmivōrvīm ।
yaḥ paśyati kṣaṇamapi tripurē vihāya
vrīḍāṃ mṛḍāni sudṛśastamanudravanti ॥ 13 ॥
mātarmuhūrtamapi yaḥ smarati svarūpaṃ
lākṣārasaprasaratantunibhaṃ bhavatyāḥ ।
dhyāyantyananyamanasastamanaṅgataptāḥ
pradyumnasīmni subhagatvaguṇaṃ taruṇyaḥ ॥ 14 ॥
yō'yaṃ chakāsti gaganārṇavaratnaminduḥ
yō'yaṃ surāsuraguruḥ puruṣaḥ purāṇaḥ ।
yadvāmamardhamidamandhakasūdanasya
dēvi tvamēva taditi pratipādayanti ॥ 15 ॥
ichChānurūpamanurūpaguṇaprakarṣa
saṅkarṣiṇi tvamabhimṛśya yadā bibharṣi ।
jāyēta sa tribhuvanaika gurustadānīṃ
dēvaḥ śivō'pi bhuvanatrayasūtradhāraḥ ॥ 16 ॥
dhyātāsi haimavati yēna himāṃśuraśmi-
-mālāmaladyutirakalmaṣamānasēna ।
tasyāvilambamanavadyamanantakalpaṃ
alpairdinaiḥ sṛjasi sundari vāgvilāsam ॥ 17 ॥
ādhāramārutanirōdhavaśēna yēṣāṃ
sindūrarañjitasarōjaguṇānukāri ।
dīptaṃ hṛdi sphurati dēvi vapustvadīyaṃ
dhyāyanti tāniha samīhitasiddhisārthāḥ ॥ 18 ॥
yē chintayantyaruṇamaṇḍalamadhyavarti
rūpaṃ tavāmba navayāvakapaṅkapiṅgam ।
tēṣāṃ sadaiva kusumāyudhabāṇabhinna-
-vakṣaḥsthalā mṛgadṛśō vaśagā bhavanti ॥ 19 ॥
tvāmaindavīmiva kalāmanuphāladēśaṃ
udbhāsitāmbaratalāmavalōkayantaḥ ।
sadyō bhavāni sudhiyaḥ kavayō bhavanti
tvaṃ bhāvanāhitadhiyāṃ kulakāmadhēnuḥ ॥ 20 ॥
śarvāṇi sarvajanavanditapādapadmē
padmachChadadyutiviḍambitanētralakṣmi ।
niṣpāpamūrtijanamānasarājahaṃsi
haṃsi tvamāpadamanēkavidhāṃ janasya ॥ 21 ॥
uttaptahēmaruchirē tripurē punīhi
chētaśchirantanamaghaughavanaṃ lunīhi ।
kārāgṛhē nigalabandhanayantritasya
tvatsaṃsmṛtau jhaṭiti mē nigalāstruṭanti ॥ 22 ॥
tvāṃ vyāpinīti sumanā iti kuṇḍalīti
tvāṃ kāminīti kamalēti kalāvatīti ।
tvāṃ mālinīti lalitētyaparājitēti
dēvi stuvanti vijayēti jayētyumēti ॥ 23 ॥
uddāmakāmaparamārthasarōjakhaṇḍa-
chaṇḍadyutidyutimapāsitaṣaḍvikārām ।
mōhadvipēndrakadanōdyatabōdhasiṃha-
-līlāguhāṃ bhagavatīṃ tripurāṃ namāmi ॥ 24 ॥
gaṇēśavaṭukastutā ratisahāyakāmānvitā
smarārivaraviṣṭarā kusumabāṇabāṇairyutā ।
anaṅgakusumādibhiḥ parivṛtā cha siddhaistribhiḥ
kadambavanamadhyagā tripurasundarī pātu naḥ ॥ 25 ॥
rudrāṇi vidrumamayīṃ pratimāmiva tvāṃ
yē chintayantyaruṇakāntimananyarūpām ।
tānētya pakṣmaladṛśaḥ prasabhaṃ bhajantē
kaṇṭhāvasaktamṛdubāhulatāstaruṇyaḥ ॥ 26 ॥
tvadrūpaikanirūpaṇapraṇayitābandhō dṛśōstvadguṇa-
-grāmākarṇanarāgitā śravaṇayōstvatsaṃsmṛtiśchētasi ।
tvatpādārchanachāturī karayugē tvatkīrtitaṃ vāchi mē
kutrāpi tvadupāsanavyasanitā mē dēvi mā śāmyatu ॥ 27 ॥
tvadrūpamullasitadāḍimapuṣparaktaṃ
udbhāvayēnmadanadaivatamakṣaraṃ yaḥ ।
taṃ rūpahīnamapi manmathanirviśēṣaṃ
ālōkayantyurunitambataṭāstaruṇyaḥ ॥ 28 ॥
brahmēndrarudraharichandrasahasraraśmi-
-skandadvipānanahutāśanavanditāyai ।
vāgīśvari tribhuvanēśvari viśvamātaḥ
antarbahiścha kṛtasaṃsthitayē namastē ॥ 29 ॥
kastōtramētadanuvāsaramīśvarāyāḥ
śrēyaskaraṃ paṭhati vā yadi vā śṛṇōti ।
tasyēpsitaṃ phalati rājabhirīḍyatē'sau
jāyēta sa priyatamō madirēkṣaṇānām ॥ 30 ॥
iti śrīkāḻidāsa virachita pañchastavyāṃ dvitīyaḥ charchāstavaḥ ।
