asya śrī dēvīvaibhavāścharyāṣṭōttaraśatadivyanāma stōtramahāmantrasya ānandabhairava ṛṣiḥ, anuṣṭup Chandaḥ, śrī ānandabhairavī śrīmahātripurasundarī dēvatā, aiṃ bījaṃ, hrīṃ śaktiḥ, śrīṃ kīlakaṃ, mama śrīānandabhairavī śrīmahātripurasundarī prasādasiddhyarthē japē viniyōgaḥ ।
dhyānam
kuṅkumapaṅkasamābhā-
-maṅkuśapāśēkṣukōdaṇḍaśarām ।
paṅkajamadhyaniṣaṇṇāṃ
paṅkēruhalōchanāṃ parāṃ vandē ॥
pañchapūjā
laṃ pṛthivyātmikāyai gandhaṃ samarpayāmi ।
haṃ ākāśātmikāyai puṣpaiḥ pūjayāmi ।
yaṃ vāyvātmikāyai dhūpamāghrāpayāmi ।
raṃ agnyātmikāyai dīpaṃ darśayāmi ।
vaṃ amṛtātmikāyai amṛtaṃ mahānaivēdyaṃ nivēdayāmi ।
saṃ sarvātmikāyai sarvōpachārān samarpayāmi ॥
ōṃ aiṃ hrīṃ śrīm ।
paramānandalaharī parachaitanyadīpikā ।
svayamprakāśakiraṇā nityavaibhavaśālinī ॥ 1 ॥
viśuddhakēvalākhaṇḍasatyakālātmarūpiṇī ।
ādimadhyāntarahitā mahāmāyāvilāsinī ॥ 2 ॥
guṇatrayaparichChētrī sarvatattvaprakāśinī ।
strīpuṃsabhāvarasikā jagatsargādilampaṭā ॥ 3 ॥
aśēṣanāmarūpādibhēdachChēdaraviprabhā ।
anādivāsanārūpā vāsanōdyatprapañchikā ॥ 4 ॥
prapañchōpaśamaprauḍhā charācharajaganmayī ।
samastajagadādhārā sarvasañjīvanōtsukā ॥ 5 ॥
bhaktachētōmayānantasvārthavaibhavavibhramā ।
sarvākarṣaṇavaśyādisarvakarmadhurandharā ॥ 6 ॥
vijñānaparamānandavidyā santānasiddhidā ।
āyurārōgyasaubhāgyabalaśrīkīrtibhāgyadā ॥ 7 ॥
dhanadhānyamaṇīvastrabhūṣālēpanamālyadā ।
gṛhagrāmamahārājyasāmrājyasukhadāyinī ॥ 8 ॥
saptāṅgaśaktisampūrṇasārvabhaumaphalapradā ।
brahmaviṣṇuśivēndrādipadaviśrāṇanakṣamā ॥ 9 ॥
bhuktimuktimahābhaktiviraktyadvaitadāyinī ।
nigrahānugrahādhyakṣā jñānanirdvaitadāyinī ॥ 10 ॥
parakāyapravēśādiyōgasiddhipradāyinī ।
śiṣṭasañjīvanaprauḍhā duṣṭasaṃhārasiddhidā ॥ 11 ॥
līlāvinirmitānēkakōṭibrahmāṇḍamaṇḍalā ।
ēkānēkātmikā nānārūpiṇyardhāṅganēśvarī ॥ 12 ॥
śivaśaktimayī nityaśṛṅgāraikarasapriyā ।
tuṣṭā puṣṭā'parichChinnā nityayauvanamōhinī ॥ 13 ॥
samastadēvatārūpā sarvadēvādhidēvatā ।
dēvarṣipitṛsiddhādiyōginībhairavātmikā ॥ 14 ॥
nidhisiddhimaṇīmudrā śastrāstrāyudhabhāsurā ।
Chatrachāmaravāditrapatākāvyajanāñchitā ॥ 15 ॥
hastyaśvarathapādātāmātyasēnāsusēvitā ।
purōhitakulāchāryaguruśiṣyādisēvitā ॥ 16 ॥
sudhāsamudramadhyōdyatsuradrumanivāsinī ।
maṇidvīpāntaraprōdyatkadambavanavāsinī ॥ 17 ॥
chintāmaṇigṛhāntaḥsthā maṇimaṇṭapamadhyagā ।
ratnasiṃhāsanaprōdyachChivamañchādhiśāyinī ॥ 18 ॥
sadāśivamahāliṅgamūlasaṅghaṭṭayōnikā ।
anyōnyāliṅgasaṅgharṣakaṇḍūsaṅkṣubdhamānasā ॥ 19 ॥
kaḻōdyadbindukāḻinyāturyanādaparamparā ।
nādāntānandasandōhasvayaṃvyaktavachō'mṛtā ॥ 20 ॥
kāmarājamahātantrarahasyāchāradakṣiṇā ।
makārapañchakōdbhūtaprauḍhāntōllāsasundarī ॥ 21 ॥
śrīchakrarājanilayā śrīvidyāmantravigrahā ।
akhaṇḍasachchidānandaśivaśaktyaikyarūpiṇī ॥ 22 ॥
tripurā tripurēśānī mahātripurasundarī ।
tripurāvāsarasikā tripurāśrīsvarūpiṇī ॥ 23 ॥
mahāpadmavanāntasthā śrīmattripuramālinī ।
mahātripurasiddhāmbā śrīmahātripurāmbikā ॥ 24 ॥
navachakrakramādēvī mahātripurabhairavī ।
śrīmātā lalitā bālā rājarājēśvarī śivā ॥ 25 ॥
utpattisthitisaṃhārakramachakranivāsinī ।
ardhamērvātmachakrasthā sarvalōkamahēśvarī ॥ 26 ॥
valmīkapuramadhyasthā jambūvananivāsinī ।
aruṇāchalaśṛṅgasthā vyāghrālayanivāsinī ॥ 27 ॥
śrīkālahastinilayā kāśīpuranivāsinī ।
śrīmatkailāsanilayā dvādaśāntamahēśvarī ॥ 28 ॥
śrīṣōḍaśāntamadhyasthā sarvavēdāntalakṣitā ।
śrutismṛtipurāṇētihāsāgamakalēśvarī ॥ 29 ॥
bhūtabhautikatanmātradēvatāprāṇahṛnmayī ।
jīvēśvarabrahmarūpā śrīguṇāḍhyā guṇātmikā ॥ 30 ॥
avasthātrayanirmuktā vāgramōmāmahīmayī ।
gāyatrībhuvanēśānīdurgākāḻyādirūpiṇī ॥ 31 ॥
matsyakūrmavarāhādinānārūpavilāsinī ।
mahāyōgīśvarārādhyā mahāvīravarapradā ॥ 32 ॥
siddhēśvarakulārādhyā śrīmachcharaṇavaibhavā ॥ 33 ॥
punardhyānam
kuṅkumapaṅkasamābhā-
-maṅkuśapāśēkṣukōdaṇḍaśarām ।
paṅkajamadhyaniṣaṇṇāṃ
paṅkēruhalōchanāṃ parāṃ vandē ॥
iti śrīgarbhakulārṇavatantrē dēvī vaibhavāścharyāṣṭōttaraśatanāma stōtram ।
