virāṭanagaraṃ ramyaṃ gachChamānō yudhiṣṭhiraḥ ।
astuvanmanasā dēvīṃ durgāṃ tribhuvanēśvarīm ॥ 1 ॥
yaśōdāgarbhasambhūtāṃ nārāyaṇavarapriyām ।
nandagōpakulē jātāṃ maṅgaḻyāṃ kulavardhinīm ॥ 2 ॥
kaṃsavidrāvaṇakarīmasurāṇāṃ kṣayaṅkarīm ।
śilātaṭavinikṣiptāmākāśaṃ prati gāminīm ॥ 3 ॥
vāsudēvasya bhaginīṃ divyamālyavibhūṣitām ।
divyāmbaradharāṃ dēvīṃ khaḍgakhēṭakadhāriṇīm ॥ 4 ॥
bhārāvataraṇē puṇyē yē smaranti sadāśivām ।
tān vai tārayatē pāpāt paṅkē gāmiva durbalām ॥ 5 ॥
stōtuṃ prachakramē bhūyō vividhaiḥ stōtrasambhavaiḥ ।
āmantrya darśanākāṅkṣī rājā dēvīṃ sahānujaḥ ॥ 6 ॥
namō'stu varadē kṛṣṇē kumāri brahmachāriṇi ।
bālārkasadṛśākārē pūrṇachandranibhānanē ॥ 7 ॥
chaturbhujē chaturvaktrē pīnaśrōṇipayōdharē ।
mayūrapichChavalayē kēyūrāṅgadadhāriṇi ॥ 8 ॥
bhāsi dēvi yathā padmā nārāyaṇaparigrahaḥ ।
svarūpaṃ brahmacharyaṃ cha viśadaṃ tava khēchari ॥ 9 ॥
kṛṣṇachChavisamā kṛṣṇā saṅkarṣaṇasamānanā ।
bibhratī vipulau bāhū śakradhvajasamuchChrayau ॥ 10 ॥
pātrī cha paṅkajī ghaṇṭī strīviśuddhā cha yā bhuvi ।
pāśaṃ dhanurmahāchakraṃ vividhānyāyudhāni cha ॥ 11 ॥
kuṇḍalābhyāṃ supūrṇābhyāṃ karṇābhyāṃ cha vibhūṣitā ।
chandravispardhinā dēvi mukhēna tvaṃ virājasē ॥ 12 ॥
mukuṭēna vichitrēṇa kēśabandhēna śōbhinā ।
bhujaṅgābhōgavāsēna śrōṇisūtrēṇa rājatā ॥ 13 ॥
vibhrājasē chābaddhēna bhōgēnēvēha mandaraḥ ।
dhvajēna śikhipichChānāmuchChritēna virājasē ॥ 14 ॥
kaumāraṃ vratamāsthāya tridivaṃ pāvitaṃ tvayā ।
tēna tvaṃ stūyasē dēvi tridaśaiḥ pūjyasē'pi cha ॥ 15 ॥
trailōkyarakṣaṇārthāya mahiṣāsuranāśini ।
prasannā mē suraśrēṣṭhē dayāṃ kuru śivā bhava ॥ 16 ॥
jayā tvaṃ vijayā chaiva saṅgrāmē cha jayapradā ।
mamāpi vijayaṃ dēhi varadā tvaṃ cha sāmpratam ॥ 17 ॥
vindhyē chaiva nagaśrēṣṭhē tava sthānaṃ hi śāśvatam ।
kāḻi kāḻi mahākāḻi śīdhumāṃsapaśupriyē ॥ 18 ॥
kṛtānuyātrā bhūtaistvaṃ varadā kāmachāriṇī ।
bhārāvatārē yē cha tvāṃ saṃsmariṣyanti mānavāḥ ॥ 19 ॥
praṇamanti cha yē tvāṃ hi prabhātē tu narā bhuvi ।
na tēṣāṃ durlabhaṃ kiñchit putratō dhanatō'pi vā ॥ 20 ॥
durgāt tārayasē durgē tat tvaṃ durgā smṛtā janaiḥ ।
kāntārēṣvavasannānāṃ magnānāṃ cha mahārṇavē ।
dasyubhirvā niruddhānāṃ tvaṃ gatiḥ paramā nṛṇām ॥ 21 ॥
jalaprataraṇē chaiva kāntārēṣvaṭavīṣu cha ।
yē smaranti mahādēvi na cha sīdanti tē narāḥ ॥ 22 ॥
tvaṃ kīrtiḥ śrīrdhṛtiḥ siddhirhrīrvidyā santatirmatiḥ ।
sandhyā rātriḥ prabhā nidrā jyōtsnā kāntiḥ kṣamā dayā ॥ 23 ॥
nṛṇāṃ cha bandhanaṃ mōhaṃ putranāśaṃ dhanakṣayam ।
vyādhiṃ mṛtyuṃ bhayaṃ chaiva pūjitā nāśayiṣyasi ॥ 24 ॥
sō'haṃ rājyātparibhraṣṭaḥ śaraṇaṃ tvāṃ prapannavān ।
praṇataścha yathā mūrdhnā tava dēvi surēśvari ॥ 25 ॥
trāhi māṃ padmapatrākṣi satyē satyā bhavasva naḥ ।
śaraṇaṃ bhava mē durgē śaraṇyē bhaktavatsalē ॥ 26 ॥
ēvaṃ stutā hi sā dēvī darśayāmāsa pāṇḍavam ।
upagamya tu rājānāmidaṃ vachanamabravīt ॥ 27 ॥
dēvyuvācha ।
śṛṇu rājan mahābāhō madīyaṃ vachanaṃ prabhō ।
bhaviṣyatyachirādēva saṅgrāmē vijayastava ॥ 28 ॥
mama prasādānnirjitya hatvā kauravavāhinīm ।
rājyaṃ niṣkaṇṭakaṃ kṛtvā bhōkṣyasē mēdinīṃ punaḥ ॥ 29 ॥
bhātrṛbhiḥ sahitō rājan prītiṃ prāpsyasi puṣkalām ।
matprasādāchcha tē saukhyamārōgyaṃ cha bhaviṣyati ॥ 30 ॥
yē cha saṅkīrtayiṣyanti lōkē vigatakalmaṣāḥ ।
tēṣāṃ tuṣṭā pradāsyāmi rājyamāyurvapuḥ sutam ॥ 31 ॥
pravāsē nagarē chāpi saṅgrāmē śatrusaṅkaṭē ।
aṭavyāṃ durgakāntārē sāgarē gahanē girau ॥ 32 ॥
yē smariṣyanti māṃ rājan yathā'haṃ bhavatā smṛtā ।
na tēṣāṃ durlabhaṃ kiñchidasmillōkē bhaviṣyati ॥ 33 ॥
idaṃ stōtravaraṃ bhaktyā śṛṇuyādvā paṭhēta vā ।
tasya sarvāṇi kāryāṇi siddhiṃ yāsyanti pāṇḍavāḥ ॥ 34 ॥
matprasādāchcha vaḥ sarvānvirāṭanagarē sthitān ।
na prajñāsyanti kuravō narā vā tannivāsinaḥ ॥ 35 ॥
ityuktvā varadā dēvī yudhiṣṭhiramarindamam ।
rakṣāṃ kṛtvā cha pāṇḍūnāṃ tatraivāntaradhīyata ॥ 36 ॥
iti śrīmanmahābhāratē virāṭaparvaṇi aṣṭamō'dhyāyē yudhiṣṭhira kṛta śrī durgā stōtram ।
