श्रीमद्वाल्मीकीय रामायणे अयोध्याकांडम् ।
अथ अष्टपंचाशस्सर्गः ।
प्रत्याश्वस्तो यदा राजा मोहात्प्रत्यागतं पुनः ।
अथाऽजुहाव तं सूतं रामवृत्तांतकारणात् ॥ 1 ॥
अथ सूतो महाराजं कृतांजलिरुपस्थितः ।
राममेवानुशोचंतं दुःखशोकसमन्वितम् ॥ 2 ॥
वृद्धं परमसंतप्तं नवग्रहमिव द्विपम् ।
विनिश्वसंतं ध्यायंतमस्वस्थ मिव कुङञरम् ॥ 3 ॥
राजा तु रजसा सूतं ध्वस्तांगं समुपस्थितम् ।
अश्रुपूर्णमुखं दीनमुवाच परमार्तवत् ॥ 4 ॥
क्वनु वत्स्यति धर्मात्मा वृक्षमूलमुपाश्रितः ।
सोऽत्यंतसुखित स्सूत किमशिष्यति राघवः ॥ 5 ॥
दुःखस्यानुचितो दुःखं सुमंत्र शयनोचितः ।
भूमिपालात्मजो भूमौ शेते कथमनाथवत् ॥ 6 ॥
यं यांतमनुयांति स्म पदातिरथकुंजराः ।
स वत्स्यति कथं रामो विजनं वन माश्रितः ॥ 7 ॥
व्यालैर्मृगैराचरितं कृष्णसर्पनिषेवितम् ।
कथं कुमारौ वैदेह्या सार्धं वन मुपस्थितौ ॥ 8 ॥
सुकुमार्या तपस्विन्या सुमंत्र सह सीतया ।
राजपुत्रौ कथं पादैरवरुह्य रथाद्गतौ ॥ 9 ॥
सिद्धार्थः खलु सूत त्वं येन दृष्टौ ममाऽत्मजौ ।
वनांतं प्रविशंतौ तावश्विनाविवमंदरम् ॥ 10 ॥
किमुवाच वचो रामः किमुवाच च लक्ष्मणः ।
सुमंत्र वनमासाद्य किमुवाच च मैथिली ॥ 11 ॥
आसितं शयितं भुक्तं सूत रामस्य कीर्तय ।
जीविष्यामहमेतेन ययातिरिव साधुषु ॥ 12 ॥
इति सूतो नरेंद्रेण बोधित स्सज्जमानया ।
उवाच वाचा राजानं स बाष्पपरिबद्धया ॥ 13 ॥
अब्रवीन्मां महाराज धर्ममेवानुपालयन् ।
अंजलिं राघवः कृत्वा शिरसाऽभिप्रणम्य च ॥ 14 ॥
सूत मद्वचनात्तस्य तातस्य विदितात्मनः ।
शिरसा वंदनीयस्य वंद्यौ पादौ महात्मनः ॥ 15 ॥
सर्वमंतःपुरं वाच्यं सूत मद्वचनात्त्वया ।
आरोग्यमविशेषेण यथार्हं चाभिवादनम् ॥ 16 ॥
माता च मम कौसल्या कुशलं चाभिवादनम् ।
अप्रमादं च वक्तव्या ब्रूयाश्चैनामिदं वचः ॥ 17 ॥
धर्मनित्या यथाकालमग्न्यगारपरा भव ।
देवि देवस्य पादौ च देववत्परिपालय ॥ 18 ॥
अभिमानं च मानं च त्यक्त्वा वर्तस्व मातृषु ।
अनु राजानमार्यां च कैकेयीमंब कारय ॥ 19 ॥
कुमारे भरते वृत्तिर्वर्तितव्या च राजवत् ।
अर्थज्येष्ठा हि राजानो राजधर्ममनुस्मर ॥ 20 ॥
भरतः कुशलं वाच्यो वाच्यो मद्वचनेन च ।
सर्वास्वेव यथान्यायं वृत्तिं वर्तस्व मातृषु ॥ 21 ॥
वक्तव्यश्च महाबाहुरिक्ष्वाकुकुलनंदनः ।
पितरं यौवराज्यस्थो राज्यस्थमनुपालय ॥ 22 ॥
अतिक्रांतवया राजा मास्मैनं व्यवरोरुधः ।
कुमार राज्ये जीव त्वं तस्यैवाज्ञाप्रवर्तनात् ॥ 23 ॥
अब्रवीच्चापि मां भूयो भृशमश्रूणि वर्तयन् ।
मातेव मम माता ते द्रष्टव्या पुत्रगर्धिनी ॥ 24 ॥
इत्येवं मां महराज ब्रुवन्नेव महायशाः ।
रामो राजीवताम्राक्षो भृशमश्रूण्यवर्तयत् ॥ 25 ॥
लक्ष्मणस्तु सुसंकृद्धो निश्श्वसन्वाक्यमब्रवीत् ।
केनायमपराधेन राजपुत्रो विवासितः ॥ 26 ॥
राज्ञा तु खलु कैकेय्या लघुत्वाश्रित्य शासनम् ।
कृतं कार्यमकार्यं वा वयं येनाभिपीडिताः ॥ 27 ॥
यदि प्रव्राजितो रामो लोभकारणकारितम् ।
वरदाननिमित्तं वा सर्वथा दुष्कृतं कृतम् ॥ 28 ॥
इदं तावद्यथाकाममीश्वरस्य कृते कृतम् ।
रामस्य तु परित्यागे न हेतु मुपलक्षये ॥ 29 ॥
असमीक्षय समारब्धं विरुद्धं बुध्दिलाघवात् ।
जनयिष्यति संक्रोशं राघवस्य विवासनम् ॥ 30 ॥
अहं तावन्महाराजे पितृत्वं नोपलक्ष्ये ।
भ्राता भर्ता च बंधुश्च पिता च मम राघवः ॥ 31 ॥
सर्वर्लोकप्रियं त्यक्त्वा सर्वलोकहिते रतम् ।
सर्वलोकोऽनुरज्येत कथं त्वाऽनेनकर्मणा ॥ 32 ॥
सर्वप्रजाभिरामं हि रामं प्रव्राज्य धार्मिकम् ।
सर्वलोकं विरुध्येमं कथं राजा भविष्यसि ॥ 33 ॥
जानकी तु महाराज निश्श्वसंती मनस्विनी ।
भूतोपहतचित्तेव विष्ठिता विस्मृता स्मिता ॥ 34 ॥
अदृष्टपूर्वव्यसना राज्यपुत्री यशस्विनी ।
तेन दुःखेन रुदती नैव मां किंचिदब्रवीत् ॥ 35 ॥
उद्वीक्षमाणा भर्तारं मुखेन परिशुष्यता ।
मुमोच सहसा बाष्पं मां प्रयांतमुदीक्ष्य सा ॥ 36 ॥
तथैव रामोऽश्रुमुखः कृतांजलिः स्थितोऽभवल्लक्ष्मणबाहुपालितः ।
तथैव सीता रुदती तपस्विनी निरीक्षते राजरथं तथैव माम् ॥ 37 ॥
इत्यार्षे श्रीमद्रामायणे वाल्मीकीय आदिकाव्ये अयोध्याकांडे अष्टपंचाशस्सर्गः ॥
