শ্রীমদ্বাল্মীকীয় রামাযণে অয়োধ্য়াকাংডম্ ।
অথ অষ্টপংচাশস্সর্গঃ ।
প্রত্য়াশ্বস্তো যদা রাজা মোহাত্প্রত্য়াগতং পুনঃ ।
অথাঽজুহাব তং সূতং রামবৃত্তাংতকারণাত্ ॥ 1 ॥
অথ সূতো মহারাজং কৃতাংজলিরুপস্থিতঃ ।
রামমেবানুশোচংতং দুঃখশোকসমন্বিতম্ ॥ 2 ॥
বৃদ্ধং পরমসংতপ্তং নবগ্রহমিব দ্বিপম্ ।
বিনিশ্বসংতং ধ্য়ায়ংতমস্বস্থ মিব কুঙঞরম্ ॥ 3 ॥
রাজা তু রজসা সূতং ধ্বস্তাংগং সমুপস্থিতম্ ।
অশ্রুপূর্ণমুখং দীনমুবাচ পরমার্তবত্ ॥ 4 ॥
ক্বনু বত্স্যতি ধর্মাত্মা বৃক্ষমূলমুপাশ্রিতঃ ।
সোঽত্য়ংতসুখিত স্সূত কিমশিষ্যতি রাঘবঃ ॥ 5 ॥
দুঃখস্য়ানুচিতো দুঃখং সুমংত্র শযনোচিতঃ ।
ভূমিপালাত্মজো ভূমৌ শেতে কথমনাথবত্ ॥ 6 ॥
যং যাংতমনুয়াংতি স্ম পদাতিরথকুংজরাঃ ।
স বত্স্যতি কথং রামো বিজনং বন মাশ্রিতঃ ॥ 7 ॥
ব্য়ালৈর্মৃগৈরাচরিতং কৃষ্ণসর্পনিষেবিতম্ ।
কথং কুমারৌ বৈদেহ্য়া সার্ধং বন মুপস্থিতৌ ॥ 8 ॥
সুকুমার্য়া তপস্বিন্য়া সুমংত্র সহ সীতয়া ।
রাজপুত্রৌ কথং পাদৈরবরুহ্য় রথাদ্গতৌ ॥ 9 ॥
সিদ্ধার্থঃ খলু সূত ত্বং যেন দৃষ্টৌ মমাঽত্মজৌ ।
বনাংতং প্রবিশংতৌ তাবশ্বিনাবিবমংদরম্ ॥ 10 ॥
কিমুবাচ বচো রামঃ কিমুবাচ চ লক্ষ্মণঃ ।
সুমংত্র বনমাসাদ্য় কিমুবাচ চ মৈথিলী ॥ 11 ॥
আসিতং শয়িতং ভুক্তং সূত রামস্য় কীর্তয় ।
জীবিষ্য়ামহমেতেন যয়াতিরিব সাধুষু ॥ 12 ॥
ইতি সূতো নরেংদ্রেণ বোধিত স্সজ্জমানয়া ।
উবাচ বাচা রাজানং স বাষ্পপরিবদ্ধয়া ॥ 13 ॥
অব্রবীন্মাং মহারাজ ধর্মমেবানুপালযন্ ।
অংজলিং রাঘবঃ কৃত্বা শিরসাঽভিপ্রণম্য় চ ॥ 14 ॥
সূত মদ্বচনাত্তস্য় তাতস্য় বিদিতাত্মনঃ ।
শিরসা বংদনীযস্য় বংদ্য়ৌ পাদৌ মহাত্মনঃ ॥ 15 ॥
সর্বমংতঃপুরং বাচ্য়ং সূত মদ্বচনাত্ত্বয়া ।
আরোগ্যমবিশেষেণ যথার্হং চাভিবাদনম্ ॥ 16 ॥
মাতা চ মম কৌসল্য়া কুশলং চাভিবাদনম্ ।
অপ্রমাদং চ বক্তব্য়া ব্রূয়াশ্চৈনামিদং বচঃ ॥ 17 ॥
ধর্মনিত্য়া যথাকালমগ্ন্যগারপরা ভব ।
দেবি দেবস্য় পাদৌ চ দেববত্পরিপালয় ॥ 18 ॥
অভিমানং চ মানং চ ত্যক্ত্বা বর্তস্ব মাতৃষু ।
অনু রাজানমার্য়াং চ কৈকেয়ীমংব কারয় ॥ 19 ॥
কুমারে ভরতে বৃত্তির্বর্তিতব্য়া চ রাজবত্ ।
অর্থজ্য়েষ্ঠা হি রাজানো রাজধর্মমনুস্মর ॥ 20 ॥
ভরতঃ কুশলং বাচ্য়ো বাচ্য়ো মদ্বচনেন চ ।
সর্বাস্বেব যথান্য়ায়ং বৃত্তিং বর্তস্ব মাতৃষু ॥ 21 ॥
বক্তব্যশ্চ মহাবাহুরিক্ষ্বাকুকুলনংদনঃ ।
পিতরং যৌবরাজ্যস্থো রাজ্যস্থমনুপালয় ॥ 22 ॥
অতিক্রাংতবয়া রাজা মাস্মৈনং ব্যবরোরুধঃ ।
কুমার রাজ্য়ে জীব ত্বং তস্য়ৈবাজ্ঞাপ্রবর্তনাত্ ॥ 23 ॥
অব্রবীচ্চাপি মাং ভূয়ো ভৃশমশ্রূণি বর্তযন্ ।
মাতেব মম মাতা তে দ্রষ্টব্য়া পুত্রগর্ধিনী ॥ 24 ॥
ইত্য়েবং মাং মহরাজ ব্রুবন্নেব মহাযশাঃ ।
রামো রাজীবতাম্রাক্ষো ভৃশমশ্রূণ্যবর্তযত্ ॥ 25 ॥
লক্ষ্মণস্তু সুসংকৃদ্ধো নিশ্শ্বসন্বাক্যমব্রবীত্ ।
কেনাযমপরাধেন রাজপুত্রো বিবাসিতঃ ॥ 26 ॥
রাজ্ঞা তু খলু কৈকেয়্য়া লঘুত্বাশ্রিত্য় শাসনম্ ।
কৃতং কার্যমকার্য়ং বা বয়ং যেনাভিপীডিতাঃ ॥ 27 ॥
যদি প্রব্রাজিতো রামো লোভকারণকারিতম্ ।
বরদাননিমিত্তং বা সর্বথা দুষ্কৃতং কৃতম্ ॥ 28 ॥
ইদং তাবদ্যথাকামমীশ্বরস্য় কৃতে কৃতম্ ।
রামস্য় তু পরিত্য়াগে ন হেতু মুপলক্ষয়ে ॥ 29 ॥
অসমীক্ষয় সমারব্ধং বিরুদ্ধং বুধ্দিলাঘবাত্ ।
জনয়িষ্যতি সংক্রোশং রাঘবস্য় বিবাসনম্ ॥ 30 ॥
অহং তাবন্মহারাজে পিতৃত্বং নোপলক্ষ্য়ে ।
ভ্রাতা ভর্তা চ বংধুশ্চ পিতা চ মম রাঘবঃ ॥ 31 ॥
সর্বর্লোকপ্রিয়ং ত্যক্ত্বা সর্বলোকহিতে রতম্ ।
সর্বলোকোঽনুরজ্য়েত কথং ত্বাঽনেনকর্মণা ॥ 32 ॥
সর্বপ্রজাভিরামং হি রামং প্রব্রাজ্য় ধার্মিকম্ ।
সর্বলোকং বিরুধ্য়েমং কথং রাজা ভবিষ্যসি ॥ 33 ॥
জানকী তু মহারাজ নিশ্শ্বসংতী মনস্বিনী ।
ভূতোপহতচিত্তেব বিষ্ঠিতা বিস্মৃতা স্মিতা ॥ 34 ॥
অদৃষ্টপূর্বব্যসনা রাজ্যপুত্রী যশস্বিনী ।
তেন দুঃখেন রুদতী নৈব মাং কিংচিদব্রবীত্ ॥ 35 ॥
উদ্বীক্ষমাণা ভর্তারং মুখেন পরিশুষ্যতা ।
মুমোচ সহসা বাষ্পং মাং প্রয়াংতমুদীক্ষ্য় সা ॥ 36 ॥
তথৈব রামোঽশ্রুমুখঃ কৃতাংজলিঃ স্থিতোঽভবল্লক্ষ্মণবাহুপালিতঃ ।
তথৈব সীতা রুদতী তপস্বিনী নিরীক্ষতে রাজরথং তথৈব মাম্ ॥ 37 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে অষ্টপংচাশস্সর্গঃ ॥
