𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌪𑍍𑌰𑌤𑍍𑌯𑌾𑌶𑍍𑌵𑌸𑍍𑌤𑍋 𑌯𑌦𑌾 𑌰𑌾𑌜𑌾 𑌮𑍋𑌹𑌾𑌤𑍍𑌪𑍍𑌰𑌤𑍍𑌯𑌾𑌗𑌤𑌂 𑌪𑍁𑌨𑌃 ।
𑌅𑌥𑌾𑌽𑌜𑍁𑌹𑌾𑌵 𑌤𑌂 𑌸𑍂𑌤𑌂 𑌰𑌾𑌮𑌵𑍃𑌤𑍍𑌤𑌾𑌂𑌤𑌕𑌾𑌰𑌣𑌾𑌤𑍍 ॥ 1 ॥
𑌅𑌥 𑌸𑍂𑌤𑍋 𑌮𑌹𑌾𑌰𑌾𑌜𑌂 𑌕𑍃𑌤𑌾𑌂𑌜𑌲𑌿𑌰𑍁𑌪𑌸𑍍𑌥𑌿𑌤𑌃 ।
𑌰𑌾𑌮𑌮𑍇𑌵𑌾𑌨𑍁𑌶𑍋𑌚𑌂𑌤𑌂 𑌦𑍁𑌃𑌖𑌶𑍋𑌕𑌸𑌮𑌨𑍍𑌵𑌿𑌤𑌮𑍍 ॥ 2 ॥
𑌵𑍃𑌦𑍍𑌧𑌂 𑌪𑌰𑌮𑌸𑌂𑌤𑌪𑍍𑌤𑌂 𑌨𑌵𑌗𑍍𑌰𑌹𑌮𑌿𑌵 𑌦𑍍𑌵𑌿𑌪𑌮𑍍 ।
𑌵𑌿𑌨𑌿𑌶𑍍𑌵𑌸𑌂𑌤𑌂 𑌧𑍍𑌯𑌾𑌯𑌂𑌤𑌮𑌸𑍍𑌵𑌸𑍍𑌥 𑌮𑌿𑌵 𑌕𑍁𑌙𑌞𑌰𑌮𑍍 ॥ 3 ॥
𑌰𑌾𑌜𑌾 𑌤𑍁 𑌰𑌜𑌸𑌾 𑌸𑍂𑌤𑌂 𑌧𑍍𑌵𑌸𑍍𑌤𑌾𑌂𑌗𑌂 𑌸𑌮𑍁𑌪𑌸𑍍𑌥𑌿𑌤𑌮𑍍 ।
𑌅𑌶𑍍𑌰𑍁𑌪𑍂𑌰𑍍𑌣𑌮𑍁𑌖𑌂 𑌦𑍀𑌨𑌮𑍁𑌵𑌾𑌚 𑌪𑌰𑌮𑌾𑌰𑍍𑌤𑌵𑌤𑍍 ॥ 4 ॥
𑌕𑍍𑌵𑌨𑍁 𑌵𑌤𑍍𑌸𑍍𑌯𑌤𑌿 𑌧𑌰𑍍𑌮𑌾𑌤𑍍𑌮𑌾 𑌵𑍃𑌕𑍍𑌷𑌮𑍂𑌲𑌮𑍁𑌪𑌾𑌶𑍍𑌰𑌿𑌤𑌃 ।
𑌸𑍋𑌽𑌤𑍍𑌯𑌂𑌤𑌸𑍁𑌖𑌿𑌤 𑌸𑍍𑌸𑍂𑌤 𑌕𑌿𑌮𑌶𑌿𑌷𑍍𑌯𑌤𑌿 𑌰𑌾𑌘𑌵𑌃 ॥ 5 ॥
𑌦𑍁𑌃𑌖𑌸𑍍𑌯𑌾𑌨𑍁𑌚𑌿𑌤𑍋 𑌦𑍁𑌃𑌖𑌂 𑌸𑍁𑌮𑌂𑌤𑍍𑌰 𑌶𑌯𑌨𑍋𑌚𑌿𑌤𑌃 ।
𑌭𑍂𑌮𑌿𑌪𑌾𑌲𑌾𑌤𑍍𑌮𑌜𑍋 𑌭𑍂𑌮𑍌 𑌶𑍇𑌤𑍇 𑌕𑌥𑌮𑌨𑌾𑌥𑌵𑌤𑍍 ॥ 6 ॥
𑌯𑌂 𑌯𑌾𑌂𑌤𑌮𑌨𑍁𑌯𑌾𑌂𑌤𑌿 𑌸𑍍𑌮 𑌪𑌦𑌾𑌤𑌿𑌰𑌥𑌕𑍁𑌂𑌜𑌰𑌾𑌃 ।
𑌸 𑌵𑌤𑍍𑌸𑍍𑌯𑌤𑌿 𑌕𑌥𑌂 𑌰𑌾𑌮𑍋 𑌵𑌿𑌜𑌨𑌂 𑌵𑌨 𑌮𑌾𑌶𑍍𑌰𑌿𑌤𑌃 ॥ ॥
𑌵𑍍𑌯𑌾𑌲𑍈𑌰𑍍𑌮𑍃𑌗𑍈𑌰𑌾𑌚𑌰𑌿𑌤𑌂 𑌕𑍃𑌷𑍍𑌣𑌸𑌰𑍍𑌪𑌨𑌿𑌷𑍇𑌵𑌿𑌤𑌮𑍍 ।
𑌕𑌥𑌂 𑌕𑍁𑌮𑌾𑌰𑍌 𑌵𑍈𑌦𑍇𑌹𑍍𑌯𑌾 𑌸𑌾𑌰𑍍𑌧𑌂 𑌵𑌨 𑌮𑍁𑌪𑌸𑍍𑌥𑌿𑌤𑍌 ॥ ॥
𑌸𑍁𑌕𑍁𑌮𑌾𑌰𑍍𑌯𑌾 𑌤𑌪𑌸𑍍𑌵𑌿𑌨𑍍𑌯𑌾 𑌸𑍁𑌮𑌂𑌤𑍍𑌰 𑌸𑌹 𑌸𑍀𑌤𑌯𑌾 ।
𑌰𑌾𑌜𑌪𑍁𑌤𑍍𑌰𑍌 𑌕𑌥𑌂 𑌪𑌾𑌦𑍈𑌰𑌵𑌰𑍁𑌹𑍍𑌯 𑌰𑌥𑌾𑌦𑍍𑌗𑌤𑍌 ॥ ॥
𑌸𑌿𑌦𑍍𑌧𑌾𑌰𑍍𑌥𑌃 𑌖𑌲𑍁 𑌸𑍂𑌤 𑌤𑍍𑌵𑌂 𑌯𑍇𑌨 𑌦𑍃𑌷𑍍𑌟𑍌 𑌮𑌮𑌾𑌽𑌤𑍍𑌮𑌜𑍌 ।
𑌵𑌨𑌾𑌂𑌤𑌂 𑌪𑍍𑌰𑌵𑌿𑌶𑌂𑌤𑍌 𑌤𑌾𑌵𑌶𑍍𑌵𑌿𑌨𑌾𑌵𑌿𑌵𑌮𑌂𑌦𑌰𑌮𑍍 ॥ 10 ॥
𑌕𑌿𑌮𑍁𑌵𑌾𑌚 𑌵𑌚𑍋 𑌰𑌾𑌮𑌃 𑌕𑌿𑌮𑍁𑌵𑌾𑌚 𑌚 𑌲𑌕𑍍𑌷𑍍𑌮𑌣𑌃 ।
𑌸𑍁𑌮𑌂𑌤𑍍𑌰 𑌵𑌨𑌮𑌾𑌸𑌾𑌦𑍍𑌯 𑌕𑌿𑌮𑍁𑌵𑌾𑌚 𑌚 𑌮𑍈𑌥𑌿𑌲𑍀 ॥ 11 ॥
𑌆𑌸𑌿𑌤𑌂 𑌶𑌯𑌿𑌤𑌂 𑌭𑍁𑌕𑍍𑌤𑌂 𑌸𑍂𑌤 𑌰𑌾𑌮𑌸𑍍𑌯 𑌕𑍀𑌰𑍍𑌤𑌯 ।
𑌜𑍀𑌵𑌿𑌷𑍍𑌯𑌾𑌮𑌹𑌮𑍇𑌤𑍇𑌨 𑌯𑌯𑌾𑌤𑌿𑌰𑌿𑌵 𑌸𑌾𑌧𑍁𑌷𑍁 ॥ 12 ॥
𑌇𑌤𑌿 𑌸𑍂𑌤𑍋 𑌨𑌰𑍇𑌂𑌦𑍍𑌰𑍇𑌣 𑌬𑍋𑌧𑌿𑌤 𑌸𑍍𑌸𑌜𑍍𑌜𑌮𑌾𑌨𑌯𑌾 ।
𑌉𑌵𑌾𑌚 𑌵𑌾𑌚𑌾 𑌰𑌾𑌜𑌾𑌨𑌂 𑌸 𑌬𑌾𑌷𑍍𑌪𑌪𑌰𑌿𑌬𑌦𑍍𑌧𑌯𑌾 ॥ 13 ॥
𑌅𑌬𑍍𑌰𑌵𑍀𑌨𑍍𑌮𑌾𑌂 𑌮𑌹𑌾𑌰𑌾𑌜 𑌧𑌰𑍍𑌮𑌮𑍇𑌵𑌾𑌨𑍁𑌪𑌾𑌲𑌯𑌨𑍍 ।
𑌅𑌂𑌜𑌲𑌿𑌂 𑌰𑌾𑌘𑌵𑌃 𑌕𑍃𑌤𑍍𑌵𑌾 𑌶𑌿𑌰𑌸𑌾𑌽𑌭𑌿𑌪𑍍𑌰𑌣𑌮𑍍𑌯 𑌚 ॥ 14 ॥
𑌸𑍂𑌤 𑌮𑌦𑍍𑌵𑌚𑌨𑌾𑌤𑍍𑌤𑌸𑍍𑌯 𑌤𑌾𑌤𑌸𑍍𑌯 𑌵𑌿𑌦𑌿𑌤𑌾𑌤𑍍𑌮𑌨𑌃 ।
𑌶𑌿𑌰𑌸𑌾 𑌵𑌂𑌦𑌨𑍀𑌯𑌸𑍍𑌯 𑌵𑌂𑌦𑍍𑌯𑍌 𑌪𑌾𑌦𑍌 𑌮𑌹𑌾𑌤𑍍𑌮𑌨𑌃 ॥ 15 ॥
𑌸𑌰𑍍𑌵𑌮𑌂𑌤𑌃𑌪𑍁𑌰𑌂 𑌵𑌾𑌚𑍍𑌯𑌂 𑌸𑍂𑌤 𑌮𑌦𑍍𑌵𑌚𑌨𑌾𑌤𑍍𑌤𑍍𑌵𑌯𑌾 ।
𑌆𑌰𑍋𑌗𑍍𑌯𑌮𑌵𑌿𑌶𑍇𑌷𑍇𑌣 𑌯𑌥𑌾𑌰𑍍𑌹𑌂 𑌚𑌾𑌭𑌿𑌵𑌾𑌦𑌨𑌮𑍍 ॥ 16 ॥
𑌮𑌾𑌤𑌾 𑌚 𑌮𑌮 𑌕𑍌𑌸𑌲𑍍𑌯𑌾 𑌕𑍁𑌶𑌲𑌂 𑌚𑌾𑌭𑌿𑌵𑌾𑌦𑌨𑌮𑍍 ।
𑌅𑌪𑍍𑌰𑌮𑌾𑌦𑌂 𑌚 𑌵𑌕𑍍𑌤𑌵𑍍𑌯𑌾 𑌬𑍍𑌰𑍂𑌯𑌾𑌶𑍍𑌚𑍈𑌨𑌾𑌮𑌿𑌦𑌂 𑌵𑌚𑌃 ॥ 1 ॥
𑌧𑌰𑍍𑌮𑌨𑌿𑌤𑍍𑌯𑌾 𑌯𑌥𑌾𑌕𑌾𑌲𑌮𑌗𑍍𑌨𑍍𑌯𑌗𑌾𑌰𑌪𑌰𑌾 𑌭𑌵 ।
𑌦𑍇𑌵𑌿 𑌦𑍇𑌵𑌸𑍍𑌯 𑌪𑌾𑌦𑍌 𑌚 𑌦𑍇𑌵𑌵𑌤𑍍𑌪𑌰𑌿𑌪𑌾𑌲𑌯 ॥ 1 ॥
𑌅𑌭𑌿𑌮𑌾𑌨𑌂 𑌚 𑌮𑌾𑌨𑌂 𑌚 𑌤𑍍𑌯𑌕𑍍𑌤𑍍𑌵𑌾 𑌵𑌰𑍍𑌤𑌸𑍍𑌵 𑌮𑌾𑌤𑍃𑌷𑍁 ।
𑌅𑌨𑍁 𑌰𑌾𑌜𑌾𑌨𑌮𑌾𑌰𑍍𑌯𑌾𑌂 𑌚 𑌕𑍈𑌕𑍇𑌯𑍀𑌮𑌂𑌬 𑌕𑌾𑌰𑌯 ॥ 1 ॥
𑌕𑍁𑌮𑌾𑌰𑍇 𑌭𑌰𑌤𑍇 𑌵𑍃𑌤𑍍𑌤𑌿𑌰𑍍𑌵𑌰𑍍𑌤𑌿𑌤𑌵𑍍𑌯𑌾 𑌚 𑌰𑌾𑌜𑌵𑌤𑍍 ।
𑌅𑌰𑍍𑌥𑌜𑍍𑌯𑍇𑌷𑍍𑌠𑌾 𑌹𑌿 𑌰𑌾𑌜𑌾𑌨𑍋 𑌰𑌾𑌜𑌧𑌰𑍍𑌮𑌮𑌨𑍁𑌸𑍍𑌮𑌰 ॥ 20 ॥
𑌭𑌰𑌤𑌃 𑌕𑍁𑌶𑌲𑌂 𑌵𑌾𑌚𑍍𑌯𑍋 𑌵𑌾𑌚𑍍𑌯𑍋 𑌮𑌦𑍍𑌵𑌚𑌨𑍇𑌨 𑌚 ।
𑌸𑌰𑍍𑌵𑌾𑌸𑍍𑌵𑍇𑌵 𑌯𑌥𑌾𑌨𑍍𑌯𑌾𑌯𑌂 𑌵𑍃𑌤𑍍𑌤𑌿𑌂 𑌵𑌰𑍍𑌤𑌸𑍍𑌵 𑌮𑌾𑌤𑍃𑌷𑍁 ॥ 21 ॥
𑌵𑌕𑍍𑌤𑌵𑍍𑌯𑌶𑍍𑌚 𑌮𑌹𑌾𑌬𑌾𑌹𑍁𑌰𑌿𑌕𑍍𑌷𑍍𑌵𑌾𑌕𑍁𑌕𑍁𑌲𑌨𑌂𑌦𑌨𑌃 ।
𑌪𑌿𑌤𑌰𑌂 𑌯𑍌𑌵𑌰𑌾𑌜𑍍𑌯𑌸𑍍𑌥𑍋 𑌰𑌾𑌜𑍍𑌯𑌸𑍍𑌥𑌮𑌨𑍁𑌪𑌾𑌲𑌯 ॥ 22 ॥
𑌅𑌤𑌿𑌕𑍍𑌰𑌾𑌂𑌤𑌵𑌯𑌾 𑌰𑌾𑌜𑌾 𑌮𑌾𑌸𑍍𑌮𑍈𑌨𑌂 𑌵𑍍𑌯𑌵𑌰𑍋𑌰𑍁𑌧𑌃 ।
𑌕𑍁𑌮𑌾𑌰 𑌰𑌾𑌜𑍍𑌯𑍇 𑌜𑍀𑌵 𑌤𑍍𑌵𑌂 𑌤𑌸𑍍𑌯𑍈𑌵𑌾𑌜𑍍𑌞𑌾𑌪𑍍𑌰𑌵𑌰𑍍𑌤𑌨𑌾𑌤𑍍 ॥ 23 ॥
𑌅𑌬𑍍𑌰𑌵𑍀𑌚𑍍𑌚𑌾𑌪𑌿 𑌮𑌾𑌂 𑌭𑍂𑌯𑍋 𑌭𑍃𑌶𑌮𑌶𑍍𑌰𑍂𑌣𑌿 𑌵𑌰𑍍𑌤𑌯𑌨𑍍 ।
𑌮𑌾𑌤𑍇𑌵 𑌮𑌮 𑌮𑌾𑌤𑌾 𑌤𑍇 𑌦𑍍𑌰𑌷𑍍𑌟𑌵𑍍𑌯𑌾 𑌪𑍁𑌤𑍍𑌰𑌗𑌰𑍍𑌧𑌿𑌨𑍀 ॥ 24 ॥
𑌇𑌤𑍍𑌯𑍇𑌵𑌂 𑌮𑌾𑌂 𑌮𑌹𑌰𑌾𑌜 𑌬𑍍𑌰𑍁𑌵𑌨𑍍𑌨𑍇𑌵 𑌮𑌹𑌾𑌯𑌶𑌾𑌃 ।
𑌰𑌾𑌮𑍋 𑌰𑌾𑌜𑍀𑌵𑌤𑌾𑌮𑍍𑌰𑌾𑌕𑍍𑌷𑍋 𑌭𑍃𑌶𑌮𑌶𑍍𑌰𑍂𑌣𑍍𑌯𑌵𑌰𑍍𑌤𑌯𑌤𑍍 ॥ 25 ॥
𑌲𑌕𑍍𑌷𑍍𑌮𑌣𑌸𑍍𑌤𑍁 𑌸𑍁𑌸𑌂𑌕𑍃𑌦𑍍𑌧𑍋 𑌨𑌿𑌶𑍍𑌶𑍍𑌵𑌸𑌨𑍍𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌕𑍇𑌨𑌾𑌯𑌮𑌪𑌰𑌾𑌧𑍇𑌨 𑌰𑌾𑌜𑌪𑍁𑌤𑍍𑌰𑍋 𑌵𑌿𑌵𑌾𑌸𑌿𑌤𑌃 ॥ 26 ॥
𑌰𑌾𑌜𑍍𑌞𑌾 𑌤𑍁 𑌖𑌲𑍁 𑌕𑍈𑌕𑍇𑌯𑍍𑌯𑌾 𑌲𑌘𑍁𑌤𑍍𑌵𑌾𑌶𑍍𑌰𑌿𑌤𑍍𑌯 𑌶𑌾𑌸𑌨𑌮𑍍 ।
𑌕𑍃𑌤𑌂 𑌕𑌾𑌰𑍍𑌯𑌮𑌕𑌾𑌰𑍍𑌯𑌂 𑌵𑌾 𑌵𑌯𑌂 𑌯𑍇𑌨𑌾𑌭𑌿𑌪𑍀𑌡𑌿𑌤𑌾𑌃 ॥ 2 ॥
𑌯𑌦𑌿 𑌪𑍍𑌰𑌵𑍍𑌰𑌾𑌜𑌿𑌤𑍋 𑌰𑌾𑌮𑍋 𑌲𑍋𑌭𑌕𑌾𑌰𑌣𑌕𑌾𑌰𑌿𑌤𑌮𑍍 ।
𑌵𑌰𑌦𑌾𑌨𑌨𑌿𑌮𑌿𑌤𑍍𑌤𑌂 𑌵𑌾 𑌸𑌰𑍍𑌵𑌥𑌾 𑌦𑍁𑌷𑍍𑌕𑍃𑌤𑌂 𑌕𑍃𑌤𑌮𑍍 ॥ 2 ॥
𑌇𑌦𑌂 𑌤𑌾𑌵𑌦𑍍𑌯𑌥𑌾𑌕𑌾𑌮𑌮𑍀𑌶𑍍𑌵𑌰𑌸𑍍𑌯 𑌕𑍃𑌤𑍇 𑌕𑍃𑌤𑌮𑍍 ।
𑌰𑌾𑌮𑌸𑍍𑌯 𑌤𑍁 𑌪𑌰𑌿𑌤𑍍𑌯𑌾𑌗𑍇 𑌨 𑌹𑍇𑌤𑍁 𑌮𑍁𑌪𑌲𑌕𑍍𑌷𑌯𑍇 ॥ 2 ॥
𑌅𑌸𑌮𑍀𑌕𑍍𑌷𑌯 𑌸𑌮𑌾𑌰𑌬𑍍𑌧𑌂 𑌵𑌿𑌰𑍁𑌦𑍍𑌧𑌂 𑌬𑍁𑌧𑍍𑌦𑌿𑌲𑌾𑌘𑌵𑌾𑌤𑍍 ।
𑌜𑌨𑌯𑌿𑌷𑍍𑌯𑌤𑌿 𑌸𑌂𑌕𑍍𑌰𑍋𑌶𑌂 𑌰𑌾𑌘𑌵𑌸𑍍𑌯 𑌵𑌿𑌵𑌾𑌸𑌨𑌮𑍍 ॥ 30 ॥
𑌅𑌹𑌂 𑌤𑌾𑌵𑌨𑍍𑌮𑌹𑌾𑌰𑌾𑌜𑍇 𑌪𑌿𑌤𑍃𑌤𑍍𑌵𑌂 𑌨𑍋𑌪𑌲𑌕𑍍𑌷𑍍𑌯𑍇 ।
𑌭𑍍𑌰𑌾𑌤𑌾 𑌭𑌰𑍍𑌤𑌾 𑌚 𑌬𑌂𑌧𑍁𑌶𑍍𑌚 𑌪𑌿𑌤𑌾 𑌚 𑌮𑌮 𑌰𑌾𑌘𑌵𑌃 ॥ 31 ॥
𑌸𑌰𑍍𑌵𑌰𑍍𑌲𑍋𑌕𑌪𑍍𑌰𑌿𑌯𑌂 𑌤𑍍𑌯𑌕𑍍𑌤𑍍𑌵𑌾 𑌸𑌰𑍍𑌵𑌲𑍋𑌕𑌹𑌿𑌤𑍇 𑌰𑌤𑌮𑍍 ।
𑌸𑌰𑍍𑌵𑌲𑍋𑌕𑍋𑌽𑌨𑍁𑌰𑌜𑍍𑌯𑍇𑌤 𑌕𑌥𑌂 𑌤𑍍𑌵𑌾𑌽𑌨𑍇𑌨𑌕𑌰𑍍𑌮𑌣𑌾 ॥ 32 ॥
𑌸𑌰𑍍𑌵𑌪𑍍𑌰𑌜𑌾𑌭𑌿𑌰𑌾𑌮𑌂 𑌹𑌿 𑌰𑌾𑌮𑌂 𑌪𑍍𑌰𑌵𑍍𑌰𑌾𑌜𑍍𑌯 𑌧𑌾𑌰𑍍𑌮𑌿𑌕𑌮𑍍 ।
𑌸𑌰𑍍𑌵𑌲𑍋𑌕𑌂 𑌵𑌿𑌰𑍁𑌧𑍍𑌯𑍇𑌮𑌂 𑌕𑌥𑌂 𑌰𑌾𑌜𑌾 𑌭𑌵𑌿𑌷𑍍𑌯𑌸𑌿 ॥ 33 ॥
𑌜𑌾𑌨𑌕𑍀 𑌤𑍁 𑌮𑌹𑌾𑌰𑌾𑌜 𑌨𑌿𑌶𑍍𑌶𑍍𑌵𑌸𑌂𑌤𑍀 𑌮𑌨𑌸𑍍𑌵𑌿𑌨𑍀 ।
𑌭𑍂𑌤𑍋𑌪𑌹𑌤𑌚𑌿𑌤𑍍𑌤𑍇𑌵 𑌵𑌿𑌷𑍍𑌠𑌿𑌤𑌾 𑌵𑌿𑌸𑍍𑌮𑍃𑌤𑌾 𑌸𑍍𑌮𑌿𑌤𑌾 ॥ 34 ॥
𑌅𑌦𑍃𑌷𑍍𑌟𑌪𑍂𑌰𑍍𑌵𑌵𑍍𑌯𑌸𑌨𑌾 𑌰𑌾𑌜𑍍𑌯𑌪𑍁𑌤𑍍𑌰𑍀 𑌯𑌶𑌸𑍍𑌵𑌿𑌨𑍀 ।
𑌤𑍇𑌨 𑌦𑍁𑌃𑌖𑍇𑌨 𑌰𑍁𑌦𑌤𑍀 𑌨𑍈𑌵 𑌮𑌾𑌂 𑌕𑌿𑌂𑌚𑌿𑌦𑌬𑍍𑌰𑌵𑍀𑌤𑍍 ॥ 35 ॥
𑌉𑌦𑍍𑌵𑍀𑌕𑍍𑌷𑌮𑌾𑌣𑌾 𑌭𑌰𑍍𑌤𑌾𑌰𑌂 𑌮𑍁𑌖𑍇𑌨 𑌪𑌰𑌿𑌶𑍁𑌷𑍍𑌯𑌤𑌾 ।
𑌮𑍁𑌮𑍋𑌚 𑌸𑌹𑌸𑌾 𑌬𑌾𑌷𑍍𑌪𑌂 𑌮𑌾𑌂 𑌪𑍍𑌰𑌯𑌾𑌂𑌤𑌮𑍁𑌦𑍀𑌕𑍍𑌷𑍍𑌯 𑌸𑌾 ॥ 36 ॥
𑌤𑌥𑍈𑌵 𑌰𑌾𑌮𑍋𑌽𑌶𑍍𑌰𑍁𑌮𑍁𑌖𑌃 𑌕𑍃𑌤𑌾𑌂𑌜𑌲𑌿𑌃 𑌸𑍍𑌥𑌿𑌤𑍋𑌽𑌭𑌵𑌲𑍍𑌲𑌕𑍍𑌷𑍍𑌮𑌣𑌬𑌾𑌹𑍁𑌪𑌾𑌲𑌿𑌤𑌃 ।
𑌤𑌥𑍈𑌵 𑌸𑍀𑌤𑌾 𑌰𑍁𑌦𑌤𑍀 𑌤𑌪𑌸𑍍𑌵𑌿𑌨𑍀 𑌨𑌿𑌰𑍀𑌕𑍍𑌷𑌤𑍇 𑌰𑌾𑌜𑌰𑌥𑌂 𑌤𑌥𑍈𑌵 𑌮𑌾𑌮𑍍 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌅𑌷𑍍𑌟𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
