ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಕಿಷ್ಕಿಂಧಾಕಾಂಡಮ್ ।
ಅಥ ಸಪ್ತಚತ್ವಾರಿಂಶಸ್ಸರ್ಗಃ ।
ದರ್ಶನಾರ್ಥಂ ತು ವೈದೇಹ್ಯಾಸ್ಸರ್ವತಃ ಕಪಿಯೂಧಪಾಃ ।
ವ್ಯಾದಿಷ್ಟಾಃ ಕಪಿರಾಜೇನ ಯಥೋಕ್ತಂ ಜಗ್ಮುರಂಜಸಾ ॥ 1 ॥
ಸರಾಂಸಿ ಸರಿತ ಕಾಕ್ಷಾನಾಕಾಶಂ ನಗರಾಣಿ ಚ ।
ನದೀದುರ್ಗಾಂಸ್ತಥಾ ಶೈಲಾನ್ವಿಚಿನ್ವಂತಿ ಸಮಂತತಃ ॥ 2 ॥
ಸುಗ್ರೀವೇಣ ಸಮಾಖ್ಯಾತಾಸ್ಸರ್ವೇ ವಾನರಯೂಥಪಾಃ ।
ಪ್ರದೇಶಾನ್ಪ್ರವಿಚಿನ್ವಂತಿ ಸಶೈಲವನಕಾನನಾನ್ ॥ 3 ॥
ವಿಚಿತ್ಯ ದಿವಸಂ ಸರ್ವೇ ಸೀತಾಧಿಗಮನೇ ಧೃತಾಃ ।
ಸಮಾಯಾಂತಿ ಸ್ಮ ಮೇದಿನ್ಯಾಂ ನಿಶಾಕಾಲೇಷು ವಾನರಾಃ ॥ 4 ॥
ಸರ್ವರ್ತುಕಮಾನ್ ದೇಶೇಷು ವಾನಾರಾಸ್ಸಫಲದ್ರುಮಾನ್ ।
ಆಸಾದ್ಯ ರಜನೀಂ ಶಯ್ಯಾಂ ಚಕ್ರುಸ್ಸರ್ವೇಷ್ವಹಸ್ಸು ತೇ ॥ 5 ॥
ತದಹಃ ಪ್ರಥಮಂ ಕೃತ್ವಾ ಮಾಸೇ ಪ್ರಶ್ರವಣಂ ಗತಾಃ ।
ಕಪಿರಾಜೇನ ಸಂಗಮ್ಯ ನಿರಾಶಾಃ ಕಪಿಯೂಧಪಾಃ ॥ 6 ॥
ವಿಚಿತ್ಯ ತು ದಿಶಂ ಪೂರ್ವಾಂ ಯಥೋಕ್ತಾಂ ಸಚಿವೈಸ್ಸಹ ।
ಅದೃಷ್ಟ್ವಾ ವಿನತಸ್ಸೀತಾಮಾಜಗಾಮ ಮಹಾಬಲಃ ॥ 7 ॥
ಉತ್ತರಾಂ ಚ ದಿಶಂ ಸರ್ವಾಂ ವಿಚಿತ್ಯ ಸ ಮಹಾಕಪಿಃ ।
ಆಗತಸ್ಸಹ ಸೈನ್ಯೇನ ವೀರಶ್ಶತವಲಿಸ್ತದಾ ॥ 8 ॥
ಸುಷೇಣಃ ಪಶ್ಚಿಮಾ ಮಾಶಾಂ ವಿಚಿತ್ಯ ಸಹ ವಾನರೈಃ ।
ಸಮೇತ್ಯ ಮಾಸೇ ಸಂಪೂರ್ಣೇ ಸುಗ್ರೀವಮುಪಚಕ್ರಮೇ ॥ 9 ॥
ತಂ ಪ್ರಸ್ರವಣಪೃಷ್ಠಸ್ಥಂ ಸಮಾಸಾದ್ಯಾಭಿವಾದ್ಯ ಚ ।
ಆಸೀನಂ ಸಹ ರಾಮೇಣ ಸುಗ್ರೀವಮಿದಮಬ್ರವೀತ್ ॥ 10 ॥
ವಿಚಿತಾಃ ಪರ್ವತಾಸ್ಸರ್ವೇ ವನಾನಿ ಗಹನಾನಿ ಚ ।
ನಿಮ್ನಗಾಸ್ಸಾಗರಾಂತಾಶ್ಚ ಸರ್ವೇ ಜನಪದಾಶ್ಚ ಯೇ ॥ 11 ॥
ಗುಹಾಶ್ಚ ವಿಚಿತಾಸ್ಸರ್ವಾಸ್ತ್ವಯಾ ಯಾಃ ಪರಿಕೀರ್ತಿತಾಃ ।
ವಿಚಿತಾಶ್ಚ ಮಹಾಗುಲ್ಮಾ ಲತಾವಿತತಸಂತತಾಃ ॥ 12 ॥
ಗಹನೇಷು ಚ ದೇಶೇಷು ದುರ್ಗೇಷು ವಿಷಮೇಷು ಚ ।
ಸತ್ತ್ವಾನ್ಯತಿಪ್ರಮಾಣಾನಿ ವಿಚಿತಾನಿ ಹತಾನಿ ಚ ॥ 13 ॥
ಯೇ ಚೈವ ಗಹನಾ ದೇಶಾ ವಿಚಿತಾಸ್ತೇ ಪುನಃ ಪುನಃ ।
ಉದಾರಸತ್ತ್ವಾಭಿಜನೋ ಮಹಾತ್ಮಾ ಸ ಮೈಥಿಲೀಂ ದ್ರಕ್ಷ್ಯತಿ ವಾನರೇಂದ್ರಃ ।
ದಿಶಂ ತು ಯಾಮೇವ ಗತಾ ತು ಸೀತಾ ತಾಮಾಸ್ಥಿತೋವಾಯುಸುತೋ ಹನೂಮಾನ್ ॥ 14 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಕಿಷ್ಕಿಂಧಾಕಾಂಡೇ ಸಪ್ತಚತ್ವಾರಿಂಶಸ್ಸರ್ಗಃ ॥
