𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌦𑌰𑍍𑌶𑌨𑌾𑌰𑍍𑌥𑌂 𑌤𑍁 𑌵𑍈𑌦𑍇𑌹𑍍𑌯𑌾𑌸𑍍𑌸𑌰𑍍𑌵𑌤𑌃 𑌕𑌪𑌿𑌯𑍂𑌧𑌪𑌾𑌃 ।
𑌵𑍍𑌯𑌾𑌦𑌿𑌷𑍍𑌟𑌾𑌃 𑌕𑌪𑌿𑌰𑌾𑌜𑍇𑌨 𑌯𑌥𑍋𑌕𑍍𑌤𑌂 𑌜𑌗𑍍𑌮𑍁𑌰𑌂𑌜𑌸𑌾 ॥ 1 ॥
𑌸𑌰𑌾𑌂𑌸𑌿 𑌸𑌰𑌿𑌤 𑌕𑌾𑌕𑍍𑌷𑌾𑌨𑌾𑌕𑌾𑌶𑌂 𑌨𑌗𑌰𑌾𑌣𑌿 𑌚 ।
𑌨𑌦𑍀𑌦𑍁𑌰𑍍𑌗𑌾𑌂𑌸𑍍𑌤𑌥𑌾 𑌶𑍈𑌲𑌾𑌨𑍍𑌵𑌿𑌚𑌿𑌨𑍍𑌵𑌂𑌤𑌿 𑌸𑌮𑌂𑌤𑌤𑌃 ॥ 2 ॥
𑌸𑍁𑌗𑍍𑌰𑍀𑌵𑍇𑌣 𑌸𑌮𑌾𑌖𑍍𑌯𑌾𑌤𑌾𑌸𑍍𑌸𑌰𑍍𑌵𑍇 𑌵𑌾𑌨𑌰𑌯𑍂𑌥𑌪𑌾𑌃 ।
𑌪𑍍𑌰𑌦𑍇𑌶𑌾𑌨𑍍𑌪𑍍𑌰𑌵𑌿𑌚𑌿𑌨𑍍𑌵𑌂𑌤𑌿 𑌸𑌶𑍈𑌲𑌵𑌨𑌕𑌾𑌨𑌨𑌾𑌨𑍍 ॥ 3 ॥
𑌵𑌿𑌚𑌿𑌤𑍍𑌯 𑌦𑌿𑌵𑌸𑌂 𑌸𑌰𑍍𑌵𑍇 𑌸𑍀𑌤𑌾𑌧𑌿𑌗𑌮𑌨𑍇 𑌧𑍃𑌤𑌾𑌃 ।
𑌸𑌮𑌾𑌯𑌾𑌂𑌤𑌿 𑌸𑍍𑌮 𑌮𑍇𑌦𑌿𑌨𑍍𑌯𑌾𑌂 𑌨𑌿𑌶𑌾𑌕𑌾𑌲𑍇𑌷𑍁 𑌵𑌾𑌨𑌰𑌾𑌃 ॥ 4 ॥
𑌸𑌰𑍍𑌵𑌰𑍍𑌤𑍁𑌕𑌮𑌾𑌨𑍍 𑌦𑍇𑌶𑍇𑌷𑍁 𑌵𑌾𑌨𑌾𑌰𑌾𑌸𑍍𑌸𑌫𑌲𑌦𑍍𑌰𑍁𑌮𑌾𑌨𑍍 ।
𑌆𑌸𑌾𑌦𑍍𑌯 𑌰𑌜𑌨𑍀𑌂 𑌶𑌯𑍍𑌯𑌾𑌂 𑌚𑌕𑍍𑌰𑍁𑌸𑍍𑌸𑌰𑍍𑌵𑍇𑌷𑍍𑌵𑌹𑌸𑍍𑌸𑍁 𑌤𑍇 ॥ 5 ॥
𑌤𑌦𑌹𑌃 𑌪𑍍𑌰𑌥𑌮𑌂 𑌕𑍃𑌤𑍍𑌵𑌾 𑌮𑌾𑌸𑍇 𑌪𑍍𑌰𑌶𑍍𑌰𑌵𑌣𑌂 𑌗𑌤𑌾𑌃 ।
𑌕𑌪𑌿𑌰𑌾𑌜𑍇𑌨 𑌸𑌂𑌗𑌮𑍍𑌯 𑌨𑌿𑌰𑌾𑌶𑌾𑌃 𑌕𑌪𑌿𑌯𑍂𑌧𑌪𑌾𑌃 ॥ 6 ॥
𑌵𑌿𑌚𑌿𑌤𑍍𑌯 𑌤𑍁 𑌦𑌿𑌶𑌂 𑌪𑍂𑌰𑍍𑌵𑌾𑌂 𑌯𑌥𑍋𑌕𑍍𑌤𑌾𑌂 𑌸𑌚𑌿𑌵𑍈𑌸𑍍𑌸𑌹 ।
𑌅𑌦𑍃𑌷𑍍𑌟𑍍𑌵𑌾 𑌵𑌿𑌨𑌤𑌸𑍍𑌸𑍀𑌤𑌾𑌮𑌾𑌜𑌗𑌾𑌮 𑌮𑌹𑌾𑌬𑌲𑌃 ॥ ॥
𑌉𑌤𑍍𑌤𑌰𑌾𑌂 𑌚 𑌦𑌿𑌶𑌂 𑌸𑌰𑍍𑌵𑌾𑌂 𑌵𑌿𑌚𑌿𑌤𑍍𑌯 𑌸 𑌮𑌹𑌾𑌕𑌪𑌿𑌃 ।
𑌆𑌗𑌤𑌸𑍍𑌸𑌹 𑌸𑍈𑌨𑍍𑌯𑍇𑌨 𑌵𑍀𑌰𑌶𑍍𑌶𑌤𑌵𑌲𑌿𑌸𑍍𑌤𑌦𑌾 ॥ ॥
𑌸𑍁𑌷𑍇𑌣𑌃 𑌪𑌶𑍍𑌚𑌿𑌮𑌾 𑌮𑌾𑌶𑌾𑌂 𑌵𑌿𑌚𑌿𑌤𑍍𑌯 𑌸𑌹 𑌵𑌾𑌨𑌰𑍈𑌃 ।
𑌸𑌮𑍇𑌤𑍍𑌯 𑌮𑌾𑌸𑍇 𑌸𑌂𑌪𑍂𑌰𑍍𑌣𑍇 𑌸𑍁𑌗𑍍𑌰𑍀𑌵𑌮𑍁𑌪𑌚𑌕𑍍𑌰𑌮𑍇 ॥ ॥
𑌤𑌂 𑌪𑍍𑌰𑌸𑍍𑌰𑌵𑌣𑌪𑍃𑌷𑍍𑌠𑌸𑍍𑌥𑌂 𑌸𑌮𑌾𑌸𑌾𑌦𑍍𑌯𑌾𑌭𑌿𑌵𑌾𑌦𑍍𑌯 𑌚 ।
𑌆𑌸𑍀𑌨𑌂 𑌸𑌹 𑌰𑌾𑌮𑍇𑌣 𑌸𑍁𑌗𑍍𑌰𑍀𑌵𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 10 ॥
𑌵𑌿𑌚𑌿𑌤𑌾𑌃 𑌪𑌰𑍍𑌵𑌤𑌾𑌸𑍍𑌸𑌰𑍍𑌵𑍇 𑌵𑌨𑌾𑌨𑌿 𑌗𑌹𑌨𑌾𑌨𑌿 𑌚 ।
𑌨𑌿𑌮𑍍𑌨𑌗𑌾𑌸𑍍𑌸𑌾𑌗𑌰𑌾𑌂𑌤𑌾𑌶𑍍𑌚 𑌸𑌰𑍍𑌵𑍇 𑌜𑌨𑌪𑌦𑌾𑌶𑍍𑌚 𑌯𑍇 ॥ 11 ॥
𑌗𑍁𑌹𑌾𑌶𑍍𑌚 𑌵𑌿𑌚𑌿𑌤𑌾𑌸𑍍𑌸𑌰𑍍𑌵𑌾𑌸𑍍𑌤𑍍𑌵𑌯𑌾 𑌯𑌾𑌃 𑌪𑌰𑌿𑌕𑍀𑌰𑍍𑌤𑌿𑌤𑌾𑌃 ।
𑌵𑌿𑌚𑌿𑌤𑌾𑌶𑍍𑌚 𑌮𑌹𑌾𑌗𑍁𑌲𑍍𑌮𑌾 𑌲𑌤𑌾𑌵𑌿𑌤𑌤𑌸𑌂𑌤𑌤𑌾𑌃 ॥ 12 ॥
𑌗𑌹𑌨𑍇𑌷𑍁 𑌚 𑌦𑍇𑌶𑍇𑌷𑍁 𑌦𑍁𑌰𑍍𑌗𑍇𑌷𑍁 𑌵𑌿𑌷𑌮𑍇𑌷𑍁 𑌚 ।
𑌸𑌤𑍍𑌤𑍍𑌵𑌾𑌨𑍍𑌯𑌤𑌿𑌪𑍍𑌰𑌮𑌾𑌣𑌾𑌨𑌿 𑌵𑌿𑌚𑌿𑌤𑌾𑌨𑌿 𑌹𑌤𑌾𑌨𑌿 𑌚 ॥ 13 ॥
𑌯𑍇 𑌚𑍈𑌵 𑌗𑌹𑌨𑌾 𑌦𑍇𑌶𑌾 𑌵𑌿𑌚𑌿𑌤𑌾𑌸𑍍𑌤𑍇 𑌪𑍁𑌨𑌃 𑌪𑍁𑌨𑌃 ।
𑌉𑌦𑌾𑌰𑌸𑌤𑍍𑌤𑍍𑌵𑌾𑌭𑌿𑌜𑌨𑍋 𑌮𑌹𑌾𑌤𑍍𑌮𑌾 𑌸 𑌮𑍈𑌥𑌿𑌲𑍀𑌂 𑌦𑍍𑌰𑌕𑍍𑌷𑍍𑌯𑌤𑌿 𑌵𑌾𑌨𑌰𑍇𑌂𑌦𑍍𑌰𑌃 ।
𑌦𑌿𑌶𑌂 𑌤𑍁 𑌯𑌾𑌮𑍇𑌵 𑌗𑌤𑌾 𑌤𑍁 𑌸𑍀𑌤𑌾 𑌤𑌾𑌮𑌾𑌸𑍍𑌥𑌿𑌤𑍋𑌵𑌾𑌯𑍁𑌸𑍁𑌤𑍋 𑌹𑌨𑍂𑌮𑌾𑌨𑍍 ॥ 14 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌸𑌪𑍍𑌤𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
