ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಕಿಷ್ಕಿಂಧಾಕಾಂಡಮ್ ।
ಅಥ ದ್ವಿಷಷ್ಟಿತಮಸ್ಸರ್ಗಃ ।
ಏವಮುಕ್ತಾ ಮುನಿಶ್ರೇಷ್ಠ ಮರುದಂ ದುಃಖಿತೋ ಭೃಶಮ್ ।
ಅಥ ಧ್ಯಾತ್ವಾ ಮುಹೂರ್ತಂ ತು ಭಗವಾನಿದಮಬ್ರವೀತ್ ॥ 1 ॥
ಪಕ್ಷೌ ತು ತೇ ಪ್ರಪಕ್ಷೌ ಚ ಪುನರನ್ಯೌಭವಿಷ್ಯತಃ ।
ಪ್ರಾಣಾಶ್ಚ ಚಕ್ಷುಷೀ ಚೈವ ವಿಕ್ರಮಶ್ಚ ಬಲಂ ಚ ತೇ ॥ 2 ॥
ಪುರಾಣೇ ಸುಮಹತ್ಕಾರ್ಯಂ ಭವಿಷ್ಯತಿ ಮಯಾ ಶ್ರುತಮ್ ।
ದೃಷ್ಟಂ ಮೇ ತಪಸಾ ಚೈವ ಶ್ರುತ್ವಾ ಚ ವಿದಿತಂ ಮಮ ॥ 3 ॥
ರಾಜಾ ದಶರಥೋ ನಾಮ ಕಶ್ಚಿದಿಕ್ಷ್ವಾಕುನಂದನಃ ।
ತಸ್ಯ ಪುತ್ರೋ ಮಹಾತೇಜಾ ರಮೋನಾಮ ಭವಿಷ್ಯತಿ ॥ 4 ॥
ಅರಣ್ಯಂ ಚ ಸಹ ರ್ಭಾತ್ರಾ ಲಕ್ಷ್ಮಣೇನಗಮಿಷ್ಯತಿ ।
ಅಸ್ಮಿನ್ನರ್ಥೇ ನಿಯುಕ್ತ ಸ್ಸನ್ಪಿತ್ರಾ ಸತ್ಯಪರಾಕ್ರಮಃ ॥ 5 ॥
ನೈಋತೋ ರಾವಣೋ ನಾಮ ತಸ್ಯ ಭಾರ್ಯಾಂ ಹರಿಷ್ಯತಿ ।
ರಾಕ್ಷಸೇಂದ್ರೋ ಜನಸ್ಥನಾದವಧ್ಯ ಸ್ಸುರದಾನವೈಃ ॥ 6 ॥
ಸಾ ಚ ಕಾಮೈಃ ಪ್ರಲೋಭ್ಯಂತೀ ಭಕ್ಷ್ಯೈಃಭೋಜ್ಯೈಶ್ಚ ಮೈಥಿಲೀ ।
ನಭೋಕ್ಷ್ಯತಿ ಮಹಾಭಾಗಾ ದುಃಖೇ ಮಗ್ನಾ ಯಶಸ್ವಿನೀ ॥ 7 ॥
ಪರಮಾನ್ನಂತು ವೈದೇಹ್ಯಾ ಜ್ಞಾತ್ವಾ ದಾಸ್ಯತಿ ವಾ ಸಃ ।
ಯದನ್ನಮಮೃತಪ್ರಖ್ಯಂ ಸುರಾಣಾಮಪಿದುರ್ಲಭಮ್ ॥ 8 ॥
ತದನ್ನಂ ಮೈಥಿಲೀಪ್ರಾಪ್ಯ ವಿಜ್ಞಾಯೇಂದ್ರಾದಿದಂತ್ವಿತಿ ।
ಅಗ್ರಮುದೃತ್ಯ ರಾಮಾಯ ಭೂತಲೇ ನಿರ್ವಪಿಷ್ಯತಿ ॥ 9 ॥
ಯದಿ ಜೀವತಿ ಮೇ ಭರ್ತಾ ಲಕ್ಷ್ಮಣೇನ ಸಹ ಪ್ರಭುಃ ।
ದೇವತ್ವಂ ಗಚ್ಛ್ತೋ ರ್ವಾಪಿ ತಯೋ ರನ್ನಮಿದಂತ್ವಿತಿ ॥ 10 ॥
ಏಷ್ಯಂತ್ಯನ್ವೇಷಕಾ ಸ್ತಸ್ಯಾ ರಾಮದೂತಾಃ ಪ್ಲವಾಂಗಮಾಃ ।
ಆಖ್ಯೇಯಾ ರಾಮ ಮಹೀಷೀ ತ್ವಯಾ ತೇಭ್ಯೋ ವಿಹಂಗಮ ॥ 11 ॥
ಸರ್ವಥಾ ಹಿ ನಗಂತವ್ಯಮೀದೃಶಃ ಕ್ವ ಗಮಿಷ್ಯಸಿ ।
ದೇಶಕಾಲೌ ಪ್ರತೀಕ್ಷಸ್ವ ಪಕ್ಷೌ ತ್ವಂ ಪ್ರತಿಪತ್ಸ್ಯಸೇ ॥ 12 ॥
ನೋತ್ಸಹೇಯಮಹಂಕರ್ತುಮಧ್ಯೈವ ತ್ವಾಂ ಸಪಕ್ಷಕಮ್ ।
ಇಹಸ್ಥ ಸ್ತ್ವಂ ತು ಲೋಕಾನಾಂ ಹಿತಂ ಕಾರ್ಯಂ ಕರಿಷ್ಯಸಿ ॥ 13 ॥
ತ್ವಯಾಪಿ ಖಲು ತತ್ಕಾರ್ಯಂ ತಯೋಶ್ಚನೃಪಪುತ್ರಯೋಃ ।
ಬ್ರಾಹ್ಮಣಾನಾಂ ಸುರಾಣಾಂ ಚ ಮುನೀನಾಂ ವಾಸವಸ್ಯ ಚ ॥ 14 ॥
ಇಚ್ಛಾಮ್ಯಹಮಪಿದ್ರಷ್ಟುಂ ಭ್ರಾತರೌ ರಾಮಲಕ್ಷ್ಮಣೌ ।
ನೇಚ್ಛೇಚಿರಂ ಧಾರಯುತುಂ ಪ್ರಾಣಾಂ ಸ್ತ್ಯಕ್ಷ್ಯೇ ಕಲೇಬರಮ್ ।
ಮಹರ್ಷಿ ಸ್ತ್ವಬ್ರವೀದೇವಂ ದೃಷ್ಟತತ್ವಾರ್ಥದರ್ಶನಃ ॥ 15 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಕಿಷ್ಕಿಂಧಾಕಾಂಡೇ ದ್ವಿಷಷ್ಟಿತಮಸ್ಸರ್ಗಃ ॥
