śrīmadvālmīkīya rāmāyaṇē kiṣkindhākāṇḍam ।
atha saptachatvāriṃśassargaḥ ।
darśanārthaṃ tu vaidēhyāssarvataḥ kapiyūdhapāḥ ।
vyādiṣṭāḥ kapirājēna yathōktaṃ jagmurañjasā ॥ 1 ॥
sarāṃsi sarita kākṣānākāśaṃ nagarāṇi cha ।
nadīdurgāṃstathā śailānvichinvanti samantataḥ ॥ 2 ॥
sugrīvēṇa samākhyātāssarvē vānarayūthapāḥ ।
pradēśānpravichinvanti saśailavanakānanān ॥ 3 ॥
vichitya divasaṃ sarvē sītādhigamanē dhṛtāḥ ।
samāyānti sma mēdinyāṃ niśākālēṣu vānarāḥ ॥ 4 ॥
sarvartukamān dēśēṣu vānārāssaphaladrumān ।
āsādya rajanīṃ śayyāṃ chakrussarvēṣvahassu tē ॥ 5 ॥
tadahaḥ prathamaṃ kṛtvā māsē praśravaṇaṃ gatāḥ ।
kapirājēna saṅgamya nirāśāḥ kapiyūdhapāḥ ॥ 6 ॥
vichitya tu diśaṃ pūrvāṃ yathōktāṃ sachivaissaha ।
adṛṣṭvā vinatassītāmājagāma mahābalaḥ ॥ 7 ॥
uttarāṃ cha diśaṃ sarvāṃ vichitya sa mahākapiḥ ।
āgatassaha sainyēna vīraśśatavalistadā ॥ 8 ॥
suṣēṇaḥ paśchimā māśāṃ vichitya saha vānaraiḥ ।
samētya māsē sampūrṇē sugrīvamupachakramē ॥ 9 ॥
taṃ prasravaṇapṛṣṭhasthaṃ samāsādyābhivādya cha ।
āsīnaṃ saha rāmēṇa sugrīvamidamabravīt ॥ 10 ॥
vichitāḥ parvatāssarvē vanāni gahanāni cha ।
nimnagāssāgarāntāścha sarvē janapadāścha yē ॥ 11 ॥
guhāścha vichitāssarvāstvayā yāḥ parikīrtitāḥ ।
vichitāścha mahāgulmā latāvitatasantatāḥ ॥ 12 ॥
gahanēṣu cha dēśēṣu durgēṣu viṣamēṣu cha ।
sattvānyatipramāṇāni vichitāni hatāni cha ॥ 13 ॥
yē chaiva gahanā dēśā vichitāstē punaḥ punaḥ ।
udārasattvābhijanō mahātmā sa maithilīṃ drakṣyati vānarēndraḥ ।
diśaṃ tu yāmēva gatā tu sītā tāmāsthitōvāyusutō hanūmān ॥ 14 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē saptachatvāriṃśassargaḥ ॥
