ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಯುದ್ಧಕಾಂಡಮ್ ।
ಅಥ ಏಕಾದಶಸ್ಸರ್ಗಃ ।
ಸಬಭೂವಕೃಶೋರಾಜಾಮೈಥಿಲೀಕಾಮಮೋಹಿತಃ ।
ಅಸನ್ಮಾನಾಚ್ಚಸುಹೃದಾಂಪಾಪಂಪಾಪೇನಕರ್ಮಣಾ ॥ 1 ॥
ಅತೀತಸಮಯೇಕಾಲೇತಸ್ಮಿನ್ವೈಯುಧಿರಾವಣಃ ।
ಅಮಾತ್ಯೈಶ್ಚಸುಹೃದ್ಭಿಶ್ಚಪ್ರಾಪ್ತಕಾಲಮಮನ್ಯತ ॥ 2 ॥
ಸಹೇಮಜಾಲವಿತತಂಮಣಿವಿದ್ರುಮಭೂಷಿತಮ್ ।
ಉಪಗಮ್ಯವಿನೀತಾಶ್ವಮಾರುರೋಹಮಹಾರಥಮ್ ॥ 3 ॥
ತಮಾಸ್ಥಾಯರಥಶ್ರೇಷ್ಠಂಮಹಾಮೇಘಸಮಸ್ವನಮ್ ।
ಪ್ರಯಯೌರಕ್ಷಸಾಂಶ್ರೇಷ್ಠೋದಶಗ್ರೀವಸ್ಸಭಾಂಪ್ರತಿ ॥ 4 ॥
ಅಸಿಚರ್ಮಧರಾಯೋಧಾಸ್ಸರ್ವಾಯುಧಧರಾಸ್ತತಃ ।
ರಾಕ್ಷಸಾರಾಕ್ಷಸೇಂದ್ರಸ್ಯಪುರಸ್ತಾತ್ಸಂಪ್ರತಸ್ಥಿರೇ ॥ 5 ॥
ನಾನಾವಿಕೃತವೇಷಾಶ್ಚನಾನಾಭೂಷಣಭೂಷಿತಾಃ ।
ಪಾರ್ಶ್ವತಸ್ಪೃಷ್ಠತಶ್ಚೈನಂಪರಿವಾರ್ಯಯಯುಸ್ತತಃ ॥ 6 ॥
ರಥೈಶ್ಚಾತಿರಥಾಶ್ಶೀಘ್ರಂಮತ್ತೈಶ್ಚವರವಾರಣೈಃ ।
ಅನೂತ್ಪೇತುರ್ದಶಗ್ರೀವಮಾಕ್ರೀಡದ್ಭಿಶ್ಚವಾಜಿಭಿಃ ॥ 7 ॥
ಗದಾಪರಿಘಹಸ್ತಾಶ್ಚಶಕ್ತಿತೋಮರಪಾಣಯಃ ।
ಪರಶ್ವಥಧರಾಶ್ಚಾನ್ಯೇತಥಾಽನ್ಯೇಶೂಲಪಾಣಯಃ ॥ 8 ॥
ತತಸ್ತೂರ್ಯಸಹಸ್ರಾಣಾಂಸಂಜಜ್ಞೇನಿಸ್ಸ್ವನೋಮಹಾನ್ ।
ತುಮುಲಶ್ಶಂಖಶಬ್ದಶ್ಚಸಭಾಂಗಚ್ಛತಿರಾವಣೇ ॥ 9 ॥
ಸನೇಮಿಘೋಷೇಣಮಹಾನ್ಸಹಸಾಽಭಿನಿನಾದಯನ್ ।
ರಾಜಮಾರ್ಗಂಶ್ರಿಯಾಜುಷ್ಟಂಪ್ರತಿಪೇದೇಮಹಾರಥಃ ॥ 10 ॥
ವಿಮಲಂಚಾತಪತ್ರಾಣಾಂಪ್ರಗೃಹೀತಮಶೋಭತ ।
ಪಾಂಡುರಂರಾಕ್ಷಸೇಂದ್ರಸ್ಯಪೂರ್ಣಸ್ತಾರಾಧಿಪೋಯಥಾ ॥ 11 ॥
ಹೇಮಮಂಜರಿಗರ್ಭೇಚಶುದ್ಧಸ್ಫಟಿಕವಿಗ್ರಹೇ ।
ಚಾಮರವ್ಯಜನೇತಸ್ಯರೇಜತುಸ್ಸವ್ಯದಕ್ಷಿಣೇ ॥ 12 ॥
ತೇಕೃತಾಂಜಲಯಸ್ಸರ್ವೇರಥಸ್ಥಂಪೃಥಿವೀಸ್ಥಿತಾಃ ।
ರಾಕ್ಷಸಾರಾಕ್ಷಸಶ್ರೇಷ್ಠಂಶಿರೋಭಿಸ್ತಂವವಂದಿರೇ ॥ 13 ॥
ರಾಕ್ಷಸೈಸ್ತ್ಸೂಯಮಾನಸ್ಸಂಜಯಾಶೀರ್ಭಿರರಿಂದಮಃ ।
ಆಸಸಾದಮಹಾತೇಜಾಸ್ಸಭಾಂವಿರಚಿತಾಂತದಾ ॥ 14 ॥
ಸುವರ್ಣರಜತಾಸ್ತೀರ್ಣಾಂವಿಶುದ್ಧಸ್ಫಟಿಕಾಂತರಾಮ್ ।
ವಿರಾಜಮಾನೋವಪುಷಾರುಕ್ಮಪಟ್ಟೋತ್ತರಚ್ಛದಾಮ್ ॥ 15 ॥
ತಾಂಪಿಶಾಚಶತೈಃ ಷಙ್ಭಿರಭಿಗುಪ್ತಾಂಸದಾಪ್ರಭಾಮ್ ।
ಪ್ರವಿವೇಶಮಹಾತೇಜಾಸ್ಸುಕೃತಾಂವಿಶ್ವಕರ್ಮಣಾ ॥ 16 ॥
ತಸ್ಯಾಂಸವೈಡೂರ್ಯಮಯಂಪ್ರಿಯಕಾಜಿನಸಮ್ವೃತಮ್ ।
ಮಹತ್ಸೋಪಾಶ್ರಯಂಭೇಜೇರಾವಣಃಪರಮಾಸನಮ್ ॥ 17 ॥
ತತಃ ಶಶಾಸೇಶ್ವರವದ್ದೂತಾನ್ಲಘುಪರಾಕ್ರಮಾನ್ ।
ಸಮಾನಯತಮೇಕ್ಷಿಪ್ರಮಿಹೈತಾನ್ರಾಕ್ಷಸಾನಿತಿ ।
ಕೃತ್ಯಮಸ್ತಿಮಹಜ್ಜಾನೇಕರ್ತವ್ಯಮಿತಿಶತ್ರುಭಿಃ ॥ 18 ॥
ರಾಕ್ಷಸಾಸ್ತದ್ವಚಶ್ಶ್ರುತ್ವಾಲಂಕಾಯಾಂಪರಿಚಕ್ರಮುಃ ॥ 19 ॥
ಅನುಗೇಹಮವಸ್ಥಾಯವಿಹಾರಶಯನೇಷುಚ ।
ಉದ್ಯಾನೇಷುಚರಕ್ಷಾಂಸಿಚೋದಯಂತೋಹ್ಯಭೀತವತ್ ॥ 20 ॥
ತೇರಥಾನ್ ರುಚಿರಾನೇಕೇದೃಪ್ತಾನೇಕೇಪೃಥಗ್ಘಯಾನ್ ।
ನಾಗಾನೇಕೇಽಧಿರುರುಹುರ್ಜಗ್ಮುಶ್ಚೈಕೇಪದಾತಯಃ ॥ 21 ॥
ಸಾಪುರೀಪರಮಾಕೀರ್ಣಾರಥಕುಂಜರವಾಜಿಭಿಃ ।
ಸಂಪತದ್ಭಿರ್ವಿರುರುಚೇಗರುತ್ಮದ್ಭಿರಿವಾಂಬರಮ್ ॥ 22 ॥
ತೇವಾಹನಾವ್ಯವಸ್ಥಾಪ್ಯಯಾನಾನಿವಿವಿಧಾನಿಚ ।
ಸಭಾಂಪದ್ಭಿಃಪ್ರವಿವಿಶುಸ್ಸಿಂಹಾಗಿರಿಗುಹಾಮಿವ ॥ 23 ॥
ರಾಜ್ಞಃಪಾದೌಗೃಹೀತ್ವಾತುರಾಜ್ಞಾತೇಪ್ರತಿಪೂಜಿತಾಃ ।
ಪೀಠೇಷ್ವನ್ಯೇಬೃಸೀಷ್ವನ್ಯೇಭೂಮೌಕೇಚಿದುಪಾವಿಶನ್ ॥ 24 ॥
ತೇಸಮೇತ್ಯಸಭಾಯಾಂವೈರಾಕ್ಷಸಾರಾಜಶಾಸನಾತ್ ।
ಯಥಾರ್ಹಮುಪತಸ್ಥುಸ್ತೇರಾವಣಂರಾಕ್ಷಸಾಧಿಪಮ್ ॥ 25 ॥
ಮಂತ್ರಿಣಶ್ಚಯಥಾಮುಖ್ಯಾನಿಶ್ಚಯಾರ್ಥೇಷುಪಂಡಿತಾಃ ।
ಅಮಾತ್ಯಾಶ್ಚಗುಣೋಪೇತಾಸ್ಸರ್ವಜ್ಞಾಬುದ್ಧಿದರ್ಶನಾಃ ॥ 26 ॥
ಸಮೀಯುಸ್ತತ್ರಶತಶಶೂರಾಶ್ಚಬಹವಸ್ತದಾ ।
ಸಭಾಯಾಂಹೇಮವರ್ಣಾಯಾಂಸರ್ವಾರ್ಥಸ್ಯಸುಖಾಯವೈ ॥ 27 ॥
ತತೋಮಹಾತ್ಮಾವಿಪುಲಂಸುಯುಗ್ಯಂರಥಮ್ವರಂಹೇಮವಿಚಿತ್ರಿತಾಂಗಮ್ ।
ಶುಭಂಸಮಾಸ್ಥಾಯಯಯೌಯಶಸ್ವೀವಿಭೀಷಣಸ್ಸಂಸದಮಗ್ರಜಸ್ಯ ॥ 28 ॥
ಸಪೂರ್ವಜಾಯಾವರಜಶ್ಶಶಂಸನಾಮಾಥಪಶ್ಚಾಶ್ಚರಣೌವವಂದೇ ।
ಶುಕಃಪ್ರಹಸ್ತಶ್ಚತಥೈವತೇಭ್ಯೋದದೌಯಥಾರ್ಹಂಪೃಥಗಾಸನಾನಿ ॥ 29 ॥
ಸುವರ್ಣನಾನಾಮಣಿಭೂಷಣಾನಾಂಸುವಾಸಸಾಂಸಂಸದಿರಾಕ್ಷಸಾನಾಮ್ ।
ತೇಷಾಂಪರಾರ್ಘ್ಯಾಗುರುಚಂದನಾನಾಂಸ್ರಜಾಶ್ಚಗಂಧಾಃಪ್ರವವುಸ್ಸಮಂತಾತ್ ॥ 30 ॥
ನಚುಕ್ರುಶುರ್ನಾನೃತಮಾಹಕಶ್ಚಿತ್ಸಭಾಪದೋನಾಪಿಜಜಲ್ಪುರುಚ್ಚೈಃ ।
ಸಂಸಿದ್ಧಾರ್ಥಾಸ್ಸರ್ವಏವೋಗ್ರವೀರ್ಯಾಭರ್ತುಸ್ಸರ್ವೇದದೃಶುಶ್ಚಾನನಂತೇ ॥ 31 ॥
ಸರಾವಣಶ್ಶಸ್ತ್ರಭೃತಾಂಮನಸ್ವಿನಾಂಮಹಾಬಲಾನಾಂಸಮಿತೌಮನಸ್ವೀ ।
ತಸ್ಯಾಂಸಭಾಯಾಂಪ್ರಭಯಾಚಕಾಶೇಮಧ್ಯೇವಸೂನಾಮಿವವಜ್ರಹಸ್ತೇಃ ॥ 32 ॥
ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಯುದ್ಧಕಾಂಡೇ ಏಕಾದಶಸ್ಸರ್ಗಃ ॥
