ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ സപ്തചത്വാരിംശസ്സര്ഗഃ ।
ദര്ശനാര്ഥം തു വൈദേഹ്യാസ്സർവതഃ കപിയൂധപാഃ ।
വ്യാദിഷ്ടാഃ കപിരാജേന യഥോക്തം ജഗ്മുരംജസാ ॥ 1 ॥
സരാംസി സരിത കാക്ഷാനാകാശം നഗരാണി ച ।
നദീദുര്ഗാംസ്തഥാ ശൈലാന്വിചിന്വംതി സമംതതഃ ॥ 2 ॥
സുഗ്രീവേണ സമാഖ്യാതാസ്സർവേ വാനരയൂഥപാഃ ।
പ്രദേശാന്പ്രവിചിന്വംതി സശൈലവനകാനനാന് ॥ 3 ॥
വിചിത്യ ദിവസം സർവേ സീതാധിഗമനേ ധൃതാഃ ।
സമായാംതി സ്മ മേദിന്യാം നിശാകാലേഷു വാനരാഃ ॥ 4 ॥
സർവര്തുകമാന് ദേശേഷു വാനാരാസ്സഫലദ്രുമാന് ।
ആസാദ്യ രജനീം ശയ്യാം ചക്രുസ്സർവേഷ്വഹസ്സു തേ ॥ 5 ॥
തദഹഃ പ്രഥമം കൃത്വാ മാസേ പ്രശ്രവണം ഗതാഃ ।
കപിരാജേന സംഗമ്യ നിരാശാഃ കപിയൂധപാഃ ॥ 6 ॥
വിചിത്യ തു ദിശം പൂർവാം യഥോക്താം സചിവൈസ്സഹ ।
അദൃഷ്ട്വാ വിനതസ്സീതാമാജഗാമ മഹാബലഃ ॥ 7 ॥
ഉത്തരാം ച ദിശം സർവാം വിചിത്യ സ മഹാകപിഃ ।
ആഗതസ്സഹ സൈന്യേന വീരശ്ശതവലിസ്തദാ ॥ 8 ॥
സുഷേണഃ പശ്ചിമാ മാശാം വിചിത്യ സഹ വാനരൈഃ ।
സമേത്യ മാസേ സംപൂര്ണേ സുഗ്രീവമുപചക്രമേ ॥ 9 ॥
തം പ്രസ്രവണപൃഷ്ഠസ്ഥം സമാസാദ്യാഭിവാദ്യ ച ।
ആസീനം സഹ രാമേണ സുഗ്രീവമിദമബ്രവീത് ॥ 10 ॥
വിചിതാഃ പർവതാസ്സർവേ വനാനി ഗഹനാനി ച ।
നിമ്നഗാസ്സാഗരാംതാശ്ച സർവേ ജനപദാശ്ച യേ ॥ 11 ॥
ഗുഹാശ്ച വിചിതാസ്സർവാസ്ത്വയാ യാഃ പരികീര്തിതാഃ ।
വിചിതാശ്ച മഹാഗുല്മാ ലതാവിതതസംതതാഃ ॥ 12 ॥
ഗഹനേഷു ച ദേശേഷു ദുര്ഗേഷു വിഷമേഷു ച ।
സത്ത്വാന്യതിപ്രമാണാനി വിചിതാനി ഹതാനി ച ॥ 13 ॥
യേ ചൈവ ഗഹനാ ദേശാ വിചിതാസ്തേ പുനഃ പുനഃ ।
ഉദാരസത്ത്വാഭിജനോ മഹാത്മാ സ മൈഥിലീം ദ്രക്ഷ്യതി വാനരേംദ്രഃ ।
ദിശം തു യാമേവ ഗതാ തു സീതാ താമാസ്ഥിതോവായുസുതോ ഹനൂമാന് ॥ 14 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ സപ്തചത്വാരിംശസ്സര്ഗഃ ॥
