શ્રીમદ્વાલ્મીકીય રામાયણે કિષ્કિંધાકાંડમ્ ।
અથ સપ્તચત્વારિંશસ્સર્ગઃ ।
દર્શનાર્થં તુ વૈદેહ્યાસ્સર્વતઃ કપિયૂધપાઃ ।
વ્યાદિષ્ટાઃ કપિરાજેન યથોક્તં જગ્મુરંજસા ॥ 1 ॥
સરાંસિ સરિત કાક્ષાનાકાશં નગરાણિ ચ ।
નદીદુર્ગાંસ્તથા શૈલાન્વિચિન્વંતિ સમંતતઃ ॥ 2 ॥
સુગ્રીવેણ સમાખ્યાતાસ્સર્વે વાનરયૂથપાઃ ।
પ્રદેશાન્પ્રવિચિન્વંતિ સશૈલવનકાનનાન્ ॥ 3 ॥
વિચિત્ય દિવસં સર્વે સીતાધિગમને ધૃતાઃ ।
સમાયાંતિ સ્મ મેદિન્યાં નિશાકાલેષુ વાનરાઃ ॥ 4 ॥
સર્વર્તુકમાન્ દેશેષુ વાનારાસ્સફલદ્રુમાન્ ।
આસાદ્ય રજનીં શય્યાં ચક્રુસ્સર્વેષ્વહસ્સુ તે ॥ 5 ॥
તદહઃ પ્રથમં કૃત્વા માસે પ્રશ્રવણં ગતાઃ ।
કપિરાજેન સંગમ્ય નિરાશાઃ કપિયૂધપાઃ ॥ 6 ॥
વિચિત્ય તુ દિશં પૂર્વાં યથોક્તાં સચિવૈસ્સહ ।
અદૃષ્ટ્વા વિનતસ્સીતામાજગામ મહાબલઃ ॥ 7 ॥
ઉત્તરાં ચ દિશં સર્વાં વિચિત્ય સ મહાકપિઃ ।
આગતસ્સહ સૈન્યેન વીરશ્શતવલિસ્તદા ॥ 8 ॥
સુષેણઃ પશ્ચિમા માશાં વિચિત્ય સહ વાનરૈઃ ।
સમેત્ય માસે સંપૂર્ણે સુગ્રીવમુપચક્રમે ॥ 9 ॥
તં પ્રસ્રવણપૃષ્ઠસ્થં સમાસાદ્યાભિવાદ્ય ચ ।
આસીનં સહ રામેણ સુગ્રીવમિદમબ્રવીત્ ॥ 10 ॥
વિચિતાઃ પર્વતાસ્સર્વે વનાનિ ગહનાનિ ચ ।
નિમ્નગાસ્સાગરાંતાશ્ચ સર્વે જનપદાશ્ચ યે ॥ 11 ॥
ગુહાશ્ચ વિચિતાસ્સર્વાસ્ત્વયા યાઃ પરિકીર્તિતાઃ ।
વિચિતાશ્ચ મહાગુલ્મા લતાવિતતસંતતાઃ ॥ 12 ॥
ગહનેષુ ચ દેશેષુ દુર્ગેષુ વિષમેષુ ચ ।
સત્ત્વાન્યતિપ્રમાણાનિ વિચિતાનિ હતાનિ ચ ॥ 13 ॥
યે ચૈવ ગહના દેશા વિચિતાસ્તે પુનઃ પુનઃ ।
ઉદારસત્ત્વાભિજનો મહાત્મા સ મૈથિલીં દ્રક્ષ્યતિ વાનરેંદ્રઃ ।
દિશં તુ યામેવ ગતા તુ સીતા તામાસ્થિતોવાયુસુતો હનૂમાન્ ॥ 14 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે સપ્તચત્વારિંશસ્સર્ગઃ ॥
