ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ସପ୍ତଚତ୍ଵାରିଂଶସ୍ସର୍ଗଃ ।
ଦର୍ଶନାର୍ଥଂ ତୁ ଵୈଦେହ୍ୟାସ୍ସର୍ଵତଃ କପିୟୂଧପାଃ ।
ଵ୍ୟାଦିଷ୍ଟାଃ କପିରାଜେନ ୟଥୋକ୍ତଂ ଜଗ୍ମୁରଂଜସା ॥ 1 ॥
ସରାଂସି ସରିତ କାକ୍ଷାନାକାଶଂ ନଗରାଣି ଚ ।
ନଦୀଦୁର୍ଗାଂସ୍ତଥା ଶୈଲାନ୍ଵିଚିନ୍ଵଂତି ସମଂତତଃ ॥ 2 ॥
ସୁଗ୍ରୀଵେଣ ସମାଖ୍ୟାତାସ୍ସର୍ଵେ ଵାନରୟୂଥପାଃ ।
ପ୍ରଦେଶାନ୍ପ୍ରଵିଚିନ୍ଵଂତି ସଶୈଲଵନକାନନାନ୍ ॥ 3 ॥
ଵିଚିତ୍ୟ ଦିଵସଂ ସର୍ଵେ ସୀତାଧିଗମନେ ଧୃତାଃ ।
ସମାୟାଂତି ସ୍ମ ମେଦିନ୍ୟାଂ ନିଶାକାଲେଷୁ ଵାନରାଃ ॥ 4 ॥
ସର୍ଵର୍ତୁକମାନ୍ ଦେଶେଷୁ ଵାନାରାସ୍ସଫଲଦ୍ରୁମାନ୍ ।
ଆସାଦ୍ୟ ରଜନୀଂ ଶୟ୍ୟାଂ ଚକ୍ରୁସ୍ସର୍ଵେଷ୍ଵହସ୍ସୁ ତେ ॥ 5 ॥
ତଦହଃ ପ୍ରଥମଂ କୃତ୍ଵା ମାସେ ପ୍ରଶ୍ରଵଣଂ ଗତାଃ ।
କପିରାଜେନ ସଂଗମ୍ୟ ନିରାଶାଃ କପିୟୂଧପାଃ ॥ 6 ॥
ଵିଚିତ୍ୟ ତୁ ଦିଶଂ ପୂର୍ଵାଂ ୟଥୋକ୍ତାଂ ସଚିଵୈସ୍ସହ ।
ଅଦୃଷ୍ଟ୍ଵା ଵିନତସ୍ସୀତାମାଜଗାମ ମହାବଲଃ ॥ 7 ॥
ଉତ୍ତରାଂ ଚ ଦିଶଂ ସର୍ଵାଂ ଵିଚିତ୍ୟ ସ ମହାକପିଃ ।
ଆଗତସ୍ସହ ସୈନ୍ୟେନ ଵୀରଶ୍ଶତଵଲିସ୍ତଦା ॥ 8 ॥
ସୁଷେଣଃ ପଶ୍ଚିମା ମାଶାଂ ଵିଚିତ୍ୟ ସହ ଵାନରୈଃ ।
ସମେତ୍ୟ ମାସେ ସଂପୂର୍ଣେ ସୁଗ୍ରୀଵମୁପଚକ୍ରମେ ॥ 9 ॥
ତଂ ପ୍ରସ୍ରଵଣପୃଷ୍ଠସ୍ଥଂ ସମାସାଦ୍ୟାଭିଵାଦ୍ୟ ଚ ।
ଆସୀନଂ ସହ ରାମେଣ ସୁଗ୍ରୀଵମିଦମବ୍ରଵୀତ୍ ॥ 10 ॥
ଵିଚିତାଃ ପର୍ଵତାସ୍ସର୍ଵେ ଵନାନି ଗହନାନି ଚ ।
ନିମ୍ନଗାସ୍ସାଗରାଂତାଶ୍ଚ ସର୍ଵେ ଜନପଦାଶ୍ଚ ୟେ ॥ 11 ॥
ଗୁହାଶ୍ଚ ଵିଚିତାସ୍ସର୍ଵାସ୍ତ୍ଵୟା ୟାଃ ପରିକୀର୍ତିତାଃ ।
ଵିଚିତାଶ୍ଚ ମହାଗୁଲ୍ମା ଲତାଵିତତସଂତତାଃ ॥ 12 ॥
ଗହନେଷୁ ଚ ଦେଶେଷୁ ଦୁର୍ଗେଷୁ ଵିଷମେଷୁ ଚ ।
ସତ୍ତ୍ଵାନ୍ୟତିପ୍ରମାଣାନି ଵିଚିତାନି ହତାନି ଚ ॥ 13 ॥
ୟେ ଚୈଵ ଗହନା ଦେଶା ଵିଚିତାସ୍ତେ ପୁନଃ ପୁନଃ ।
ଉଦାରସତ୍ତ୍ଵାଭିଜନୋ ମହାତ୍ମା ସ ମୈଥିଲୀଂ ଦ୍ରକ୍ଷ୍ୟତି ଵାନରେଂଦ୍ରଃ ।
ଦିଶଂ ତୁ ୟାମେଵ ଗତା ତୁ ସୀତା ତାମାସ୍ଥିତୋଵାୟୁସୁତୋ ହନୂମାନ୍ ॥ 14 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ସପ୍ତଚତ୍ଵାରିଂଶସ୍ସର୍ଗଃ ॥
