ශ්රීමද්වාල්මීකීය රාමායණේ කිෂ්කිංධාකාංඩම් ।
අථ සප්තචත්වාරිංශස්සර්ගඃ ।
දර්ශනාර්ථං තු වෛදේහ්යාස්සර්වතඃ කපියූධපාඃ ।
ව්යාදිෂ්ටාඃ කපිරාජේන යථෝක්තං ජග්මුරංජසා ॥ 1 ॥
සරාංසි සරිත කාක්ෂානාකාශං නගරාණි ච ।
නදීදුර්ගාංස්තථා ශෛලාන්විචින්වංති සමංතතඃ ॥ 2 ॥
සුග්රීවේණ සමාඛ්යාතාස්සර්වේ වානරයූථපාඃ ।
ප්රදේශාන්ප්රවිචින්වංති සශෛලවනකානනාන් ॥ 3 ॥
විචිත්ය දිවසං සර්වේ සීතාධිගමනේ ධෘතාඃ ।
සමායාංති ස්ම මේදින්යාං නිශාකාලේෂු වානරාඃ ॥ 4 ॥
සර්වර්තුකමාන් දේශේෂු වානාරාස්සඵලද්රුමාන් ।
ආසාද්ය රජනීං ශය්යාං චක්රුස්සර්වේෂ්වහස්සු තේ ॥ 5 ॥
තදහඃ ප්රථමං කෘත්වා මාසේ ප්රශ්රවණං ගතාඃ ।
කපිරාජේන සංගම්ය නිරාශාඃ කපියූධපාඃ ॥ 6 ॥
විචිත්ය තු දිශං පූර්වාං යථෝක්තාං සචිවෛස්සහ ।
අදෘෂ්ට්වා විනතස්සීතාමාජගාම මහාබලඃ ॥ 7 ॥
උත්තරාං ච දිශං සර්වාං විචිත්ය ස මහාකපිඃ ।
ආගතස්සහ සෛන්යේන වීරශ්ශතවලිස්තදා ॥ 8 ॥
සුෂේණඃ පශ්චිමා මාශාං විචිත්ය සහ වානරෛඃ ।
සමේත්ය මාසේ සංපූර්ණේ සුග්රීවමුපචක්රමේ ॥ 9 ॥
තං ප්රස්රවණපෘෂ්ඨස්ථං සමාසාද්යාභිවාද්ය ච ।
ආසීනං සහ රාමේණ සුග්රීවමිදමබ්රවීත් ॥ 10 ॥
විචිතාඃ පර්වතාස්සර්වේ වනානි ගහනානි ච ।
නිම්නගාස්සාගරාංතාශ්ච සර්වේ ජනපදාශ්ච යේ ॥ 11 ॥
ගුහාශ්ච විචිතාස්සර්වාස්ත්වයා යාඃ පරිකීර්තිතාඃ ।
විචිතාශ්ච මහාගුල්මා ලතාවිතතසංතතාඃ ॥ 12 ॥
ගහනේෂු ච දේශේෂු දුර්ගේෂු විෂමේෂු ච ।
සත්ත්වාන්යතිප්රමාණානි විචිතානි හතානි ච ॥ 13 ॥
යේ චෛව ගහනා දේශා විචිතාස්තේ පුනඃ පුනඃ ।
උදාරසත්ත්වාභිජනෝ මහාත්මා ස මෛථිලීං ද්රක්ෂ්යති වානරේංද්රඃ ।
දිශං තු යාමේව ගතා තු සීතා තාමාස්ථිතෝවායුසුතෝ හනූමාන් ॥ 14 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ සප්තචත්වාරිංශස්සර්ගඃ ॥
