ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ദ്വിഷഷ്ടിതമസ്സര്ഗഃ ।
ഏവമുക്താ മുനിശ്രേഷ്ഠ മരുദം ദുഃഖിതോ ഭൃശമ് ।
അഥ ധ്യാത്വാ മുഹൂര്തം തു ഭഗവാനിദമബ്രവീത് ॥ 1 ॥
പക്ഷൌ തു തേ പ്രപക്ഷൌ ച പുനരന്യൌഭവിഷ്യതഃ ।
പ്രാണാശ്ച ചക്ഷുഷീ ചൈവ വിക്രമശ്ച ബലം ച തേ ॥ 2 ॥
പുരാണേ സുമഹത്കാര്യം ഭവിഷ്യതി മയാ ശ്രുതമ് ।
ദൃഷ്ടം മേ തപസാ ചൈവ ശ്രുത്വാ ച വിദിതം മമ ॥ 3 ॥
രാജാ ദശരഥോ നാമ കശ്ചിദിക്ഷ്വാകുനംദനഃ ।
തസ്യ പുത്രോ മഹാതേജാ രമോനാമ ഭവിഷ്യതി ॥ 4 ॥
അരണ്യം ച സഹ ര്ഭാത്രാ ലക്ഷ്മണേനഗമിഷ്യതി ।
അസ്മിന്നര്ഥേ നിയുക്ത സ്സന്പിത്രാ സത്യപരാക്രമഃ ॥ 5 ॥
നൈഋതോ രാവണോ നാമ തസ്യ ഭാര്യാം ഹരിഷ്യതി ।
രാക്ഷസേംദ്രോ ജനസ്ഥനാദവധ്യ സ്സുരദാനവൈഃ ॥ 6 ॥
സാ ച കാമൈഃ പ്രലോഭ്യംതീ ഭക്ഷ്യൈഃഭോജ്യൈശ്ച മൈഥിലീ ।
നഭോക്ഷ്യതി മഹാഭാഗാ ദുഃഖേ മഗ്നാ യശസ്വിനീ ॥ 7 ॥
പരമാന്നംതു വൈദേഹ്യാ ജ്ഞാത്വാ ദാസ്യതി വാ സഃ ।
യദന്നമമൃതപ്രഖ്യം സുരാണാമപിദുര്ലഭമ് ॥ 8 ॥
തദന്നം മൈഥിലീപ്രാപ്യ വിജ്ഞായേംദ്രാദിദംത്വിതി ।
അഗ്രമുദൃത്യ രാമായ ഭൂതലേ നിർവപിഷ്യതി ॥ 9 ॥
യദി ജീവതി മേ ഭര്താ ലക്ഷ്മണേന സഹ പ്രഭുഃ ।
ദേവത്വം ഗച്ഛ്തോ ർവാപി തയോ രന്നമിദംത്വിതി ॥ 10 ॥
ഏഷ്യംത്യന്വേഷകാ സ്തസ്യാ രാമദൂതാഃ പ്ലവാംഗമാഃ ।
ആഖ്യേയാ രാമ മഹീഷീ ത്വയാ തേഭ്യോ വിഹംഗമ ॥ 11 ॥
സർവഥാ ഹി നഗംതവ്യമീദൃശഃ ക്വ ഗമിഷ്യസി ।
ദേശകാലൌ പ്രതീക്ഷസ്വ പക്ഷൌ ത്വം പ്രതിപത്സ്യസേ ॥ 12 ॥
നോത്സഹേയമഹംകര്തുമധ്യൈവ ത്വാം സപക്ഷകമ് ।
ഇഹസ്ഥ സ്ത്വം തു ലോകാനാം ഹിതം കാര്യം കരിഷ്യസി ॥ 13 ॥
ത്വയാപി ഖലു തത്കാര്യം തയോശ്ചനൃപപുത്രയോഃ ।
ബ്രാഹ്മണാനാം സുരാണാം ച മുനീനാം വാസവസ്യ ച ॥ 14 ॥
ഇച്ഛാമ്യഹമപിദ്രഷ്ടും ഭ്രാതരൌ രാമലക്ഷ്മണൌ ।
നേച്ഛേചിരം ധാരയുതും പ്രാണാം സ്ത്യക്ഷ്യേ കലേബരമ് ।
മഹര്ഷി സ്ത്വബ്രവീദേവം ദൃഷ്ടതത്വാര്ഥദര്ശനഃ ॥ 15 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ദ്വിഷഷ്ടിതമസ്സര്ഗഃ ॥
