ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଦ୍ଵିଷଷ୍ଟିତମସ୍ସର୍ଗଃ ।
ଏଵମୁକ୍ତା ମୁନିଶ୍ରେଷ୍ଠ ମରୁଦଂ ଦୁଃଖିତୋ ଭୃଶମ୍ ।
ଅଥ ଧ୍ୟାତ୍ଵା ମୁହୂର୍ତଂ ତୁ ଭଗଵାନିଦମବ୍ରଵୀତ୍ ॥ 1 ॥
ପକ୍ଷୌ ତୁ ତେ ପ୍ରପକ୍ଷୌ ଚ ପୁନରନ୍ୟୌଭଵିଷ୍ୟତଃ ।
ପ୍ରାଣାଶ୍ଚ ଚକ୍ଷୁଷୀ ଚୈଵ ଵିକ୍ରମଶ୍ଚ ବଲଂ ଚ ତେ ॥ 2 ॥
ପୁରାଣେ ସୁମହତ୍କାର୍ୟଂ ଭଵିଷ୍ୟତି ମୟା ଶ୍ରୁତମ୍ ।
ଦୃଷ୍ଟଂ ମେ ତପସା ଚୈଵ ଶ୍ରୁତ୍ଵା ଚ ଵିଦିତଂ ମମ ॥ 3 ॥
ରାଜା ଦଶରଥୋ ନାମ କଶ୍ଚିଦିକ୍ଷ୍ଵାକୁନଂଦନଃ ।
ତସ୍ୟ ପୁତ୍ରୋ ମହାତେଜା ରମୋନାମ ଭଵିଷ୍ୟତି ॥ 4 ॥
ଅରଣ୍ୟଂ ଚ ସହ ର୍ଭାତ୍ରା ଲକ୍ଷ୍ମଣେନଗମିଷ୍ୟତି ।
ଅସ୍ମିନ୍ନର୍ଥେ ନିୟୁକ୍ତ ସ୍ସନ୍ପିତ୍ରା ସତ୍ୟପରାକ୍ରମଃ ॥ 5 ॥
ନୈଋତୋ ରାଵଣୋ ନାମ ତସ୍ୟ ଭାର୍ୟାଂ ହରିଷ୍ୟତି ।
ରାକ୍ଷସେଂଦ୍ରୋ ଜନସ୍ଥନାଦଵଧ୍ୟ ସ୍ସୁରଦାନଵୈଃ ॥ 6 ॥
ସା ଚ କାମୈଃ ପ୍ରଲୋଭ୍ୟଂତୀ ଭକ୍ଷ୍ୟୈଃଭୋଜ୍ୟୈଶ୍ଚ ମୈଥିଲୀ ।
ନଭୋକ୍ଷ୍ୟତି ମହାଭାଗା ଦୁଃଖେ ମଗ୍ନା ୟଶସ୍ଵିନୀ ॥ 7 ॥
ପରମାନ୍ନଂତୁ ଵୈଦେହ୍ୟା ଜ୍ଞାତ୍ଵା ଦାସ୍ୟତି ଵା ସଃ ।
ୟଦନ୍ନମମୃତପ୍ରଖ୍ୟଂ ସୁରାଣାମପିଦୁର୍ଲଭମ୍ ॥ 8 ॥
ତଦନ୍ନଂ ମୈଥିଲୀପ୍ରାପ୍ୟ ଵିଜ୍ଞାୟେଂଦ୍ରାଦିଦଂତ୍ଵିତି ।
ଅଗ୍ରମୁଦୃତ୍ୟ ରାମାୟ ଭୂତଲେ ନିର୍ଵପିଷ୍ୟତି ॥ 9 ॥
ୟଦି ଜୀଵତି ମେ ଭର୍ତା ଲକ୍ଷ୍ମଣେନ ସହ ପ୍ରଭୁଃ ।
ଦେଵତ୍ଵଂ ଗଚ୍ଛ୍ତୋ ର୍ଵାପି ତୟୋ ରନ୍ନମିଦଂତ୍ଵିତି ॥ 10 ॥
ଏଷ୍ୟଂତ୍ୟନ୍ଵେଷକା ସ୍ତସ୍ୟା ରାମଦୂତାଃ ପ୍ଲଵାଂଗମାଃ ।
ଆଖ୍ୟେୟା ରାମ ମହୀଷୀ ତ୍ଵୟା ତେଭ୍ୟୋ ଵିହଂଗମ ॥ 11 ॥
ସର୍ଵଥା ହି ନଗଂତଵ୍ୟମୀଦୃଶଃ କ୍ଵ ଗମିଷ୍ୟସି ।
ଦେଶକାଲୌ ପ୍ରତୀକ୍ଷସ୍ଵ ପକ୍ଷୌ ତ୍ଵଂ ପ୍ରତିପତ୍ସ୍ୟସେ ॥ 12 ॥
ନୋତ୍ସହେୟମହଂକର୍ତୁମଧ୍ୟୈଵ ତ୍ଵାଂ ସପକ୍ଷକମ୍ ।
ଇହସ୍ଥ ସ୍ତ୍ଵଂ ତୁ ଲୋକାନାଂ ହିତଂ କାର୍ୟଂ କରିଷ୍ୟସି ॥ 13 ॥
ତ୍ଵୟାପି ଖଲୁ ତତ୍କାର୍ୟଂ ତୟୋଶ୍ଚନୃପପୁତ୍ରୟୋଃ ।
ବ୍ରାହ୍ମଣାନାଂ ସୁରାଣାଂ ଚ ମୁନୀନାଂ ଵାସଵସ୍ୟ ଚ ॥ 14 ॥
ଇଚ୍ଛାମ୍ୟହମପିଦ୍ରଷ୍ଟୁଂ ଭ୍ରାତରୌ ରାମଲକ୍ଷ୍ମଣୌ ।
ନେଚ୍ଛେଚିରଂ ଧାରୟୁତୁଂ ପ୍ରାଣାଂ ସ୍ତ୍ୟକ୍ଷ୍ୟେ କଲେବରମ୍ ।
ମହର୍ଷି ସ୍ତ୍ଵବ୍ରଵୀଦେଵଂ ଦୃଷ୍ଟତତ୍ଵାର୍ଥଦର୍ଶନଃ ॥ 15 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଦ୍ଵିଷଷ୍ଟିତମସ୍ସର୍ଗଃ ॥
