ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ଏକାଦଶସ୍ସର୍ଗଃ ।
ସବଭୂଵକୃଶୋରାଜାମୈଥିଲୀକାମମୋହିତଃ ।
ଅସନ୍ମାନାଚ୍ଚସୁହୃଦାଂପାପଂପାପେନକର୍ମଣା ॥ 1 ॥
ଅତୀତସମୟେକାଲେତସ୍ମିନ୍ଵୈୟୁଧିରାଵଣଃ ।
ଅମାତ୍ୟୈଶ୍ଚସୁହୃଦ୍ଭିଶ୍ଚପ୍ରାପ୍ତକାଲମମନ୍ୟତ ॥ 2 ॥
ସହେମଜାଲଵିତତଂମଣିଵିଦ୍ରୁମଭୂଷିତମ୍ ।
ଉପଗମ୍ୟଵିନୀତାଶ୍ଵମାରୁରୋହମହାରଥମ୍ ॥ 3 ॥
ତମାସ୍ଥାୟରଥଶ୍ରେଷ୍ଠଂମହାମେଘସମସ୍ଵନମ୍ ।
ପ୍ରୟୟୌରକ୍ଷସାଂଶ୍ରେଷ୍ଠୋଦଶଗ୍ରୀଵସ୍ସଭାଂପ୍ରତି ॥ 4 ॥
ଅସିଚର୍ମଧରାୟୋଧାସ୍ସର୍ଵାୟୁଧଧରାସ୍ତତଃ ।
ରାକ୍ଷସାରାକ୍ଷସେଂଦ୍ରସ୍ୟପୁରସ୍ତାତ୍ସଂପ୍ରତସ୍ଥିରେ ॥ 5 ॥
ନାନାଵିକୃତଵେଷାଶ୍ଚନାନାଭୂଷଣଭୂଷିତାଃ ।
ପାର୍ଶ୍ଵତସ୍ପୃଷ୍ଠତଶ୍ଚୈନଂପରିଵାର୍ୟୟୟୁସ୍ତତଃ ॥ 6 ॥
ରଥୈଶ୍ଚାତିରଥାଶ୍ଶୀଘ୍ରଂମତ୍ତୈଶ୍ଚଵରଵାରଣୈଃ ।
ଅନୂତ୍ପେତୁର୍ଦଶଗ୍ରୀଵମାକ୍ରୀଡଦ୍ଭିଶ୍ଚଵାଜିଭିଃ ॥ 7 ॥
ଗଦାପରିଘହସ୍ତାଶ୍ଚଶକ୍ତିତୋମରପାଣୟଃ ।
ପରଶ୍ଵଥଧରାଶ୍ଚାନ୍ୟେତଥାଽନ୍ୟେଶୂଲପାଣୟଃ ॥ 8 ॥
ତତସ୍ତୂର୍ୟସହସ୍ରାଣାଂସଂଜଜ୍ଞେନିସ୍ସ୍ଵନୋମହାନ୍ ।
ତୁମୁଲଶ୍ଶଂଖଶବ୍ଦଶ୍ଚସଭାଂଗଚ୍ଛତିରାଵଣେ ॥ 9 ॥
ସନେମିଘୋଷେଣମହାନ୍ସହସାଽଭିନିନାଦୟନ୍ ।
ରାଜମାର୍ଗଂଶ୍ରିୟାଜୁଷ୍ଟଂପ୍ରତିପେଦେମହାରଥଃ ॥ 10 ॥
ଵିମଲଂଚାତପତ୍ରାଣାଂପ୍ରଗୃହୀତମଶୋଭତ ।
ପାଂଡୁରଂରାକ୍ଷସେଂଦ୍ରସ୍ୟପୂର୍ଣସ୍ତାରାଧିପୋୟଥା ॥ 11 ॥
ହେମମଂଜରିଗର୍ଭେଚଶୁଦ୍ଧସ୍ଫଟିକଵିଗ୍ରହେ ।
ଚାମରଵ୍ୟଜନେତସ୍ୟରେଜତୁସ୍ସଵ୍ୟଦକ୍ଷିଣେ ॥ 12 ॥
ତେକୃତାଂଜଲୟସ୍ସର୍ଵେରଥସ୍ଥଂପୃଥିଵୀସ୍ଥିତାଃ ।
ରାକ୍ଷସାରାକ୍ଷସଶ୍ରେଷ୍ଠଂଶିରୋଭିସ୍ତଂଵଵଂଦିରେ ॥ 13 ॥
ରାକ୍ଷସୈସ୍ତ୍ସୂୟମାନସ୍ସଂଜୟାଶୀର୍ଭିରରିଂଦମଃ ।
ଆସସାଦମହାତେଜାସ୍ସଭାଂଵିରଚିତାଂତଦା ॥ 14 ॥
ସୁଵର୍ଣରଜତାସ୍ତୀର୍ଣାଂଵିଶୁଦ୍ଧସ୍ଫଟିକାଂତରାମ୍ ।
ଵିରାଜମାନୋଵପୁଷାରୁକ୍ମପଟ୍ଟୋତ୍ତରଚ୍ଛଦାମ୍ ॥ 15 ॥
ତାଂପିଶାଚଶତୈଃ ଷଙ୍ଭିରଭିଗୁପ୍ତାଂସଦାପ୍ରଭାମ୍ ।
ପ୍ରଵିଵେଶମହାତେଜାସ୍ସୁକୃତାଂଵିଶ୍ଵକର୍ମଣା ॥ 16 ॥
ତସ୍ୟାଂସଵୈଡୂର୍ୟମୟଂପ୍ରିୟକାଜିନସମ୍ଵୃତମ୍ ।
ମହତ୍ସୋପାଶ୍ରୟଂଭେଜେରାଵଣଃପରମାସନମ୍ ॥ 17 ॥
ତତଃ ଶଶାସେଶ୍ଵରଵଦ୍ଦୂତାନ୍ଲଘୁପରାକ୍ରମାନ୍ ।
ସମାନୟତମେକ୍ଷିପ୍ରମିହୈତାନ୍ରାକ୍ଷସାନିତି ।
କୃତ୍ୟମସ୍ତିମହଜ୍ଜାନେକର୍ତଵ୍ୟମିତିଶତ୍ରୁଭିଃ ॥ 18 ॥
ରାକ୍ଷସାସ୍ତଦ୍ଵଚଶ୍ଶ୍ରୁତ୍ଵାଲଂକାୟାଂପରିଚକ୍ରମୁଃ ॥ 19 ॥
ଅନୁଗେହମଵସ୍ଥାୟଵିହାରଶୟନେଷୁଚ ।
ଉଦ୍ୟାନେଷୁଚରକ୍ଷାଂସିଚୋଦୟଂତୋହ୍ୟଭୀତଵତ୍ ॥ 20 ॥
ତେରଥାନ୍ ରୁଚିରାନେକେଦୃପ୍ତାନେକେପୃଥଗ୍ଘୟାନ୍ ।
ନାଗାନେକେଽଧିରୁରୁହୁର୍ଜଗ୍ମୁଶ୍ଚୈକେପଦାତୟଃ ॥ 21 ॥
ସାପୁରୀପରମାକୀର୍ଣାରଥକୁଂଜରଵାଜିଭିଃ ।
ସଂପତଦ୍ଭିର୍ଵିରୁରୁଚେଗରୁତ୍ମଦ୍ଭିରିଵାଂବରମ୍ ॥ 22 ॥
ତେଵାହନାଵ୍ୟଵସ୍ଥାପ୍ୟୟାନାନିଵିଵିଧାନିଚ ।
ସଭାଂପଦ୍ଭିଃପ୍ରଵିଵିଶୁସ୍ସିଂହାଗିରିଗୁହାମିଵ ॥ 23 ॥
ରାଜ୍ଞଃପାଦୌଗୃହୀତ୍ଵାତୁରାଜ୍ଞାତେପ୍ରତିପୂଜିତାଃ ।
ପୀଠେଷ୍ଵନ୍ୟେବୃସୀଷ୍ଵନ୍ୟେଭୂମୌକେଚିଦୁପାଵିଶନ୍ ॥ 24 ॥
ତେସମେତ୍ୟସଭାୟାଂଵୈରାକ୍ଷସାରାଜଶାସନାତ୍ ।
ୟଥାର୍ହମୁପତସ୍ଥୁସ୍ତେରାଵଣଂରାକ୍ଷସାଧିପମ୍ ॥ 25 ॥
ମଂତ୍ରିଣଶ୍ଚୟଥାମୁଖ୍ୟାନିଶ୍ଚୟାର୍ଥେଷୁପଂଡିତାଃ ।
ଅମାତ୍ୟାଶ୍ଚଗୁଣୋପେତାସ୍ସର୍ଵଜ୍ଞାବୁଦ୍ଧିଦର୍ଶନାଃ ॥ 26 ॥
ସମୀୟୁସ୍ତତ୍ରଶତଶଶୂରାଶ୍ଚବହଵସ୍ତଦା ।
ସଭାୟାଂହେମଵର୍ଣାୟାଂସର୍ଵାର୍ଥସ୍ୟସୁଖାୟଵୈ ॥ 27 ॥
ତତୋମହାତ୍ମାଵିପୁଲଂସୁୟୁଗ୍ୟଂରଥମ୍ଵରଂହେମଵିଚିତ୍ରିତାଂଗମ୍ ।
ଶୁଭଂସମାସ୍ଥାୟୟୟୌୟଶସ୍ଵୀଵିଭୀଷଣସ୍ସଂସଦମଗ୍ରଜସ୍ୟ ॥ 28 ॥
ସପୂର୍ଵଜାୟାଵରଜଶ୍ଶଶଂସନାମାଥପଶ୍ଚାଶ୍ଚରଣୌଵଵଂଦେ ।
ଶୁକଃପ୍ରହସ୍ତଶ୍ଚତଥୈଵତେଭ୍ୟୋଦଦୌୟଥାର୍ହଂପୃଥଗାସନାନି ॥ 29 ॥
ସୁଵର୍ଣନାନାମଣିଭୂଷଣାନାଂସୁଵାସସାଂସଂସଦିରାକ୍ଷସାନାମ୍ ।
ତେଷାଂପରାର୍ଘ୍ୟାଗୁରୁଚଂଦନାନାଂସ୍ରଜାଶ୍ଚଗଂଧାଃପ୍ରଵଵୁସ୍ସମଂତାତ୍ ॥ 30 ॥
ନଚୁକ୍ରୁଶୁର୍ନାନୃତମାହକଶ୍ଚିତ୍ସଭାପଦୋନାପିଜଜଲ୍ପୁରୁଚ୍ଚୈଃ ।
ସଂସିଦ୍ଧାର୍ଥାସ୍ସର୍ଵଏଵୋଗ୍ରଵୀର୍ୟାଭର୍ତୁସ୍ସର୍ଵେଦଦୃଶୁଶ୍ଚାନନଂତେ ॥ 31 ॥
ସରାଵଣଶ୍ଶସ୍ତ୍ରଭୃତାଂମନସ୍ଵିନାଂମହାବଲାନାଂସମିତୌମନସ୍ଵୀ ।
ତସ୍ୟାଂସଭାୟାଂପ୍ରଭୟାଚକାଶେମଧ୍ୟେଵସୂନାମିଵଵଜ୍ରହସ୍ତେଃ ॥ 32 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ଏକାଦଶସ୍ସର୍ଗଃ ॥
