শ্রীমদ্বাল্মীকীয রামাযণে বালকাংডম্ ।
অথ প্রথমস্সর্গঃ ।
তপস্স্বাধ্যাযনিরতং তপস্বী বাগ্বিদাং বরম্ ।
নারদং পরিপপ্রচ্ছ বাল্মীকির্মুনিপুংগবম্ ॥ 1 ॥
কোন্বস্মিন্সাংপ্রতং লোকে গুণবান্কশ্চ বীর্যবান্ ।
ধর্মজ্ঞশ্চ কৃতজ্ঞশ্চ সত্যবাক্যো দৃঢব্রতঃ ॥ 2 ॥
চারিত্রেণ চ কো যুক্তস্সর্বভূতেষু কো হিতঃ ।
বিদ্বান্কঃ কস্সমর্থশ্চ কশ্চৈকপ্রিযদর্শনঃ ॥ 3 ॥
আত্মবান্কো জিতক্রোধো দ্যুতিমান্কোঽনসূযকঃ ।
কস্য বিভ্যতি দেবাশ্চ জাতরোষস্য সংযুগে ॥ 4 ॥
এতদিচ্ছাম্যহং শ্রোতুং পরং কৌতূহলং হি মে ।
মহর্ষে ত্বং সমর্থোঽসি জ্ঞাতুমেবংবিধং নরম্ ॥ 5 ॥
শ্রুত্বা চৈতত্ত্রিলোকজ্ঞো বাল্মীকের্নারদো বচঃ ।
শ্রূযতামিতি চামংত্র্য প্রহৃষ্টো বাক্যমব্রবীত্ ॥ 6 ॥
বহবো দুর্লভাশ্চৈব যে ত্বযা কীর্তিতা গুণাঃ ।
মুনে বক্ষ্যাম্যহং বুদ্ধ্বা তৈর্যুক্তশ্শ্রূযতান্নরঃ ॥ 7 ॥
ইক্ষ্বাকুবংশপ্রভবো রামো নাম জনৈশ্শ্রুতঃ ।
নিযতাত্মা মহাবীর্যো দ্যুতিমাংধৃতিমান্ বশী ॥ 8 ॥
বুদ্ধিমান্নীতিমান্বাগ্মী শ্রীমান্ শত্রুনিবর্হণঃ ।
বিপুলাংসো মহাবাহুঃ কংবুগ্রীবো মহাহনুঃ ॥ 9 ॥
মহোরস্কো মহেষ্বাসো গূঢজত্রুররিংদমঃ ।
আজানুবাহুস্সুশিরাস্সুললাটস্সুবিক্রমঃ ॥ 10 ॥
সমস্সমবিভক্তাংগস্স্নিগ্ধবর্ণঃ প্রতাপবান্ ।
পীনবক্ষা বিশালাক্ষো লক্ষ্মীবান্ শুভলক্ষণঃ ॥ 11 ॥
ধর্মজ্ঞস্সত্যসংধশ্চ প্রজানাং চ হিতে রতঃ ।
যশস্বী জ্ঞানসংপন্নশ্শুচির্বশ্যস্সমাধিমান্ ॥ 12 ॥
প্রজাপতিসমশ্শ্রীমান্ ধাতা রিপুনিষূদনঃ ।
রক্ষিতা জীবলোকস্য ধর্মস্য পরিরক্ষিতা ॥ 13 ॥
রক্ষিতা স্বস্য ধর্মস্য স্বজনস্য চ রক্ষিতা ।
বেদবেদাংগতত্ত্বজ্ঞো ধনুর্বেদে চ নিষ্ঠিতঃ ॥ 14 ॥
সর্বশাস্ত্রার্থতত্ত্বজ্ঞস্স্মৃতিমান্প্রতিভানবান্ ।
সর্বলোকপ্রিযস্সাধুরদীনাত্মা বিচক্ষণঃ ॥ 15 ॥
সর্বদাভিগতস্সদ্ভিস্সমুদ্র ইব সিংধুভিঃ ।
আর্যস্সর্বসমশ্চৈব সদৈকপ্রিযদর্শনঃ ॥ 16 ॥
স চ সর্বগুণোপেতঃ কৌসল্যানংদবর্ধনঃ ।
সমুদ্র ইব গাংভীর্যে ধৈর্যেণ হিমবানিব ॥ 17 ॥
বিষ্ণুনা সদৃশো বীর্যে সোমবত্প্রিযদর্শনঃ ।
কালাগ্নিসদৃশঃ ক্রোধে ক্ষমযা পৃথিবীসমঃ ॥ 18 ॥
ধনদেন সমস্ত্যাগে সত্যে ধর্ম ইবাপরঃ ।
তমেবং গুণসংপন্নং রামং সত্যপরাক্রমম্ ॥ 19 ॥
জ্যেষ্ঠং শ্রেষ্ঠগুণৈর্যুক্তং প্রিযং দশরথস্সুতম্ ।
প্রকৃতীনাং হিতৈর্যুক্তং প্রকৃতিপ্রিযকাম্যযা ॥ 20 ॥
যৌবরাজ্যেন সংযোক্তুমৈচ্ছত্প্রীত্যা মহীপতিঃ ।
তস্যাভিষেকসংভারাংদৃষ্ট্বা ভার্যাঽথ কৈকযী ॥ 21 ॥
পূর্বং দত্তবরা দেবী বরমেনমযাচত ।
বিবাসনং চ রামস্য ভরতস্যাভিষেচনম্ ॥ 22 ॥
স সত্যবচনাদ্রাজা ধর্মপাশেন সংযতঃ ।
বিবাসযামাস সুতং রামং দশরথঃ প্রিযম্ ॥ 23 ॥
স জগাম বনং বীরঃ প্রতিজ্ঞামনুপালযন্ ।
পিতুর্বচননির্দেশাত্কৈকেয্যাঃ প্রিযকারণাত্ ॥ 24 ॥
তং ব্রজংতং প্রিযো ভ্রাতা লক্ষ্মণোঽনুজগাম হ ।
স্নেহাদ্বিনযসংপন্নস্সুমিত্রানংদবর্ধনঃ ॥ 25 ॥
ভ্রাতরং দযিতো ভ্রাতুস্সৌভ্রাত্রমনুদর্শযন্ ।
রামস্য দযিতা ভার্যা নিত্যং প্রাণসমা হিতা ॥ 26 ॥
জনকস্য কুলে জাতা দেবমাযেব নির্মিতা ।
সর্বলক্ষণসংপন্না নারীণামুত্তমা বধূঃ ॥ 27 ॥
সীতাপ্যনুগতা রামং শশিনং রোহিণী যথা ।
পৌরৈরনুগতো দূরং পিত্রা দশরথেন চ ॥ 28 ॥
শৃংগিবেরপুরে সূতং গংগাকূলে ব্যসর্জযত্ ।
গুহমাসাদ্য ধর্মাত্মা নিষাদাধিপতিং প্রিযম্ ॥ 29 ॥
গুহেন সহিতো রামো লক্ষ্মণেন চ সীতযা ।
তে বনেন বনং গত্বা নদীস্তীর্ত্বা বহূদকাঃ ॥ 30 ॥
চিত্রকূটমনুপ্রাপ্য ভরদ্বাজস্য শাসনাত্ ।
রম্যমাবসথং কৃত্বা রমমাণা বনে ত্রযঃ ॥ 31 ॥
দেবগংধর্বসংকাশাস্তত্র তে ন্যবসন্ সুখম্ ।
তে বনেন বনং গত্বা নদীস্তীর্ত্বা বহূদকাঃ ॥ 32 ॥
চিত্রকূটমনুপ্রাপ্য ভরদ্বাজস্য শাসনাত্ ।
রম্যমাবসথং কৃত্বা রমমাণা বনে ত্রযঃ ॥ 33 ॥
দেবগংধর্বসংকাশাস্তত্র তে ন্যবসন্ সুখম্ ।
চিত্রকূটং গতে রামে পুত্রশোকাতুরস্তথা ॥ 34 ॥
রাজা দশরথস্স্বর্গং জগাম বিলপন্সুতম্ ।
মৃতে তু তস্মিন্ভরতো বসিষ্ঠপ্রমুখৈর্দ্বিজৈঃ ॥ 35 ॥
নিযুজ্যমানো রাজ্যায নৈচ্ছদ্রাজ্যং মহাবলঃ ।
স জগাম বনং বীরো রামপাদপ্রসাদকঃ ॥ 36 ॥
গত্বা তু সুমহাত্মানং রামং সত্যপরাক্রমম্ ।
অযাচদ্ভ্রাতরং রামমার্যভাবপুরস্কৃতঃ ॥ 37 ॥
ত্বমেব রাজা ধর্মজ্ঞ ইতি রামং বচোঽব্রবীত্ ।
রামোঽপি পরমোদারস্সুমুখস্সুমহাযশাঃ ।
ন চৈচ্ছত্পিতুরাদেশাদ্রাজ্যং রামো মহাবলঃ ॥ 38 ॥
পাদুকে চাস্য রাজ্যায ন্যাসং দত্বা পুনঃপুনঃ ।
নিবর্তযামাস ততো ভরতং ভরতাগ্রজঃ ॥ 39 ॥
স কামমনবাপ্যৈব রামপাদাবুপস্পৃশন্ ॥ 40 ॥
নংদিগ্রামেঽকরোদ্রাজ্যং রামাগমনকাংক্ষযা ।
গতে তু ভরতে শ্রীমান্ সত্যসংধো জিতেংদ্রিযঃ ॥ 41 ॥
রামস্তু পুনরালক্ষ্য নাগরস্য জনস্য চ ।
তত্রাগমনমেকাগ্রো দংডকান্প্রবিবেশ হ ॥ 42 ॥
প্রবিশ্য তু মহারণ্যং রামো রাজীবলোচনঃ ।
বিরাধং রাক্ষসং হত্বা শরভংগং দদর্শ হ ॥ 43 ॥
সুতীক্ষ্ণং চাপ্যগস্ত্যং চ অগস্ত্যভ্রাতরং তথা ।
অগস্ত্যবচনাচ্চৈব জগ্রাহৈংদ্রং শরাসনম্ ॥ 44 ॥
খড্গং চ পরমপ্রীতস্তূণী চাক্ষযসাযকৌ ।
বসতস্তস্য রামস্য বনে বনচরৈস্সহ ।
ঋষযোঽভ্যাগমন্সর্বে বধাযাসুররক্ষসাম্ ॥ 45 ॥
স তেষাং প্রতিশুশ্রাব রাক্ষসানাং তথা বনে ॥ 46 ॥
প্রতিজ্ঞাতশ্চ রামেণ বধস্সংযতি রক্ষসাম্ ।
ঋষীণামগ্নিকল্পানাং দংডকারণ্যবাসিনাম্ ॥ 47 ॥
তেন তত্রৈব বসতা জনস্থাননিবাসিনী ।
বিরূপিতা শূর্পণখা রাক্ষসী কামরূপিণী ॥ 48 ॥
ততশ্শূর্পণখাবাক্যাদুদ্যুক্তান্সর্বরাক্ষসান্ ।
খরং ত্রিশিরসং চৈব দূষণং চৈব রাক্ষসম্ ॥ 49 ॥
নিজঘান বনে রামস্তেষাং চৈব পদানুগান্ ।
বনে তস্মিন্নিবসতা জনস্থাননিবাসিনাম্ ॥ 50 ॥
রক্ষসাং নিহতান্যাসন্সহস্রাণি চতুর্দশ ।
ততো জ্ঞাতিবধং শ্রুত্বা রাবণঃ ক্রোধমূর্ছিতঃ ॥ 51 ॥
সহাযং বরযামাস মারীচং নাম রাক্ষসম্ ।
বার্যমাণস্সুবহুশো মারীচেন স রাবণঃ ॥ 52 ॥
ন বিরোধো বলবতা ক্ষমো রাবণ তেন তে ।
অনাদৃত্য তু তদ্বাক্যং রাবণঃ কালচোদিতঃ ॥ 53 ॥
জগাম সহ মারীচস্তস্যাশ্রমপদং তদা ।
তেন মাযাবিনা দূরমপবাহ্য নৃপাত্মজৌ ॥ 54 ॥
জহার ভার্যাং রামস্য গৃধ্রং হত্বা জটাযুষম্ ।
গৃধ্রং চ নিহতং দৃষ্ট্বা হৃতাং শ্রুত্বা চ মৈথিলীম্ ॥ 55 ॥
রাঘবশ্শোকসংতপ্তো বিললাপাকুলেংদ্রিযঃ ।
ততস্তেনৈব শোকেন গৃধ্রং দগ্ধ্বা জটাযুষম্ ॥ 56 ॥
মার্গমাণো বনে সীতাং রাক্ষসং সংদদর্শ হ ।
কবংধন্নাম রূপেণ বিকৃতং ঘোরদর্শনম্ ॥ 57 ॥
তং নিহত্য মহাবাহুর্দদাহ স্বর্গতশ্চ সঃ ।
স চাস্য কথযামাস শবরীং ধর্মচারিণীম্ ॥ 58 ॥
শ্রমণীং ধর্মনিপুণামভিগচ্ছেতি রাঘব ।
1151 সোঽভ্যগচ্ছন্মহাতেজাশ্শবরীং শত্রুসূদনঃ ॥ 59 ॥
শবর্যা পূজিতস্সম্যগ্রামো দশরথাত্মজঃ ।
পংপাতীরে হনুমতা সংগতো বানরেণ হ ॥ 60 ॥
হনুমদ্বচনাচ্চৈব সুগ্রীবেণ সমাগতঃ ।
সুগ্রীবায চ তত্সর্বং শংসদ্রামো মহাবলঃ ॥ 61 ॥
আদিতস্তদ্যথাবৃত্তং সীতাযাশ্চ বিশেষতঃ ।
সুগ্রীবশ্চাপি তত্সর্বং শ্রুত্বা রামস্য বানরঃ ॥ 62 ॥
চকার সখ্যং রামেণ প্রীতশ্চৈবাগ্নিসাক্ষিকম্ ।
ততো বানররাজেন বৈরানুকথনং প্রতি ॥ 63 ॥
রামাযাবেদিতং সর্বং প্রণযাদ্দুঃখিতেন চ ।
প্রতিজ্ঞাতং চ রামেণ তদা বালিবধং প্রতি ॥ 64 ॥
বালিনশ্চ বলং তত্র কথযামাস বানরঃ ।
সুগ্রীবশ্শংকিতশ্চাসীন্নিত্যং বীর্যেণ রাঘবে ॥ 65 ॥
রাঘবপ্রত্যযার্থং তু দুংদুভেঃ কাযমুত্তমম্ ।
দর্শযামাস সুগ্রীবো মহাপর্বতসন্নিভম্ ॥ 66 ॥
উত্স্মযিত্বা মহাবাহুঃ প্রেক্ষ্য চাস্থি মহাবলঃ ।
পাদাংগুষ্ঠেন চিক্ষেপ সংপূর্ণং দশযোজনম্ ॥ 67 ॥
বিভেদ চ পুনস্সালান্সপ্তৈকেন মহেষুণা ।
গিরিং রসাতলং চৈব জনযন্প্রত্যযং তথা ॥ 68 ॥
ততঃ প্রীতমনাস্তেন বিশ্বস্তস্স মহাকপিঃ ।
কিষ্কিংধাং রামসহিতো জগাম চ গুহাং তদা ॥ 69 ॥
ততোঽগর্জদ্ধরিবরঃ সুগ্রীবো হেমপিংগলঃ ।
তেন নাদেন মহতা নির্জগাম হরীশ্বরঃ ॥ 70 ॥
অনুমান্য তদা তারাং সুগ্রীবেণ সমাগতঃ ।
নিজঘান চ তত্রৈনং শরেণৈকেন রাঘবঃ ॥ 71 ॥
ততস্সুগ্রীববচনাদ্ধত্বা বালিনমাহবে ।
সুগ্রীবমেব তদ্রাজ্যে রাঘবঃ প্রত্যপাদযত্ ॥ 72 ॥
স চ সর্বান্সমানীয বানরান্বানরর্ষভঃ ।
দিশঃ প্রস্থাপযামাস দিদৃক্ষুর্জনকাত্মজাম্ ॥ 73 ॥
ততো গৃধ্রস্য বচনাত্সংপাতের্হনুমান্বলী ।
শতযোজনবিস্তীর্ণং পুপ্লুবে লবণার্ণবম্ ॥ 74 ॥
তত্র লংকাং সমাসাদ্য পুরীং রাবণপালিতাম্ ।
দদর্শ সীতাং ধ্যাযংতীমশোকবনিকাং গতাম্ ॥ 75 ॥
নিবেদযিত্বাঽঽভিজ্ঞানং প্রবৃত্তিং চ নিবেদ্য চ ।
সমাশ্বাস্য চ বৈদেহীং মর্দযামাস তোরণম্ ॥ 76 ॥
পংচ সেনাগ্রগান্হত্বা সপ্তমংত্রিসুতানপি ।
শূরমক্ষং চ নিষ্পিষ্য গ্রহণং সমুপাগমত্ ॥ 77 ॥
অস্ত্রেণোন্মুক্তমাত্মানং জ্ঞাত্বা পৈতামহাদ্বরাত্ ।
মর্ষযন্রাক্ষসান্বীরো যংত্রিণস্তান্যদৃচ্ছযা ॥ 78 ॥
ততো দগ্ধ্বা পুরীং লংকামৃতে সীতাং চ মৈথিলীম্ ।
রামায প্রিযমাখ্যাতুং পুনরাযান্মহাকপিঃ ॥ 79 ॥
সোঽধিগম্য মহাত্মানং কৃত্বা রামং প্রদক্ষিণম্ ।
ন্যবেদযদমেযাত্মা দৃষ্টা সীতেতি তত্ত্বতঃ ॥ 80 ॥
ততস্সুগ্রীবসহিতো গত্বা তীরং মহোদধেঃ ।
সমুদ্রং ক্ষোভযামাস শরৈরাদিত্যসন্নিভৈঃ ॥ 81 ॥
দর্শযামাস চাত্মানং সমুদ্রস্সরিতাং পতিঃ ।
সমুদ্রবচনাচ্চৈব নলং সেতুমকারযত্ ॥ 82 ॥
তেন গত্বা পুরীং লংকাং হত্বা রাবণমাহবে ।
রামঃ সীতামনুপ্রাপ্য পরাং ব্রীডামুপাগমত্ ॥ 83 ॥
তামুবাচ ততো রামঃ পরুষং জনসংসদি ।
অমৃষ্যমাণা সা সীতা বিবেশ জ্বলনং সতী ॥ 84 ॥
ততোঽগ্নিবচনাত্সীতাং জ্ঞাত্বা বিগতকল্মষাম্ ।
বভৌ রামস্সংপ্রহৃষ্টঃ পূজিতস্সর্বদৈবতৈঃ ॥ 85 ॥
কর্মণা তেন মহতা ত্রৈলোক্যং সচরাচরম্ ।
সদেবর্ষিগণং তুষ্টং রাঘবস্য মহাত্মনঃ ॥ 86 ॥
অভিষিচ্য চ লংকাযাং রাক্ষসেংদ্রং বিভীষণম্ ।
কৃতকৃত্যস্তদা রামো বিজ্বরঃ প্রমুমোদ হ ॥ 87 ॥
দেবতাভ্যো বরং প্রাপ্য সমুত্থাপ্য চ বানরান্ ।
অযোধ্যাং প্রস্থিতো রামঃ পুষ্পকেণ সুহৃদ্বৃতঃ ॥ 88 ॥
ভরদ্বাজাশ্রমং গত্বা রামস্সত্যপরাক্রমঃ ।
ভরতস্যাংতিকং রামো হনূমংতং ব্যসর্জযত্ ॥ 89 ॥
পুনরাখ্যাযিকাং জল্পন্সুগ্রীবসহিতশ্চ সঃ ।
পুষ্পকং তত্সমারুহ্য নংদিগ্রামং যযৌ তদা ॥ 90 ॥
নংদিগ্রামে জটাং হিত্বা ভ্রাতৃভিস্সহিতোঽনঘঃ ।
রামস্সীতামনুপ্রাপ্য রাজ্যং পুনরবাপ্তবান্ ॥ 91 ॥
প্রহৃষ্টমুদিতো লোকস্তুষ্টঃ পুষ্টস্সুধার্মিকঃ ।
নিরামযো হ্যরোগশ্চ দুর্ভিক্ষভযবর্জিতঃ ॥ 92 ॥
ন পুত্রমরণং কিংচিদ্দ্রক্ষ্যংতি পুরুষাঃ ক্বচিত্ ।
নার্যশ্চাবিধবা নিত্যং ভবিষ্যংতি পতিব্রতাঃ ॥ 93 ॥
ন চাগ্নিজং ভযং কিংচিন্নাপ্সু মজ্জংতি জংতবঃ ।
ন বাতজং ভযং কিংচিন্নাপি জ্বরকৃতং তথা ॥ 94 ॥
ন চাপি ক্ষুদ্ভযং তত্র ন তস্করভযং তথা ।
নগরাণি চ রাষ্ট্রাণি ধনধান্যযুতানি চ ॥ 95 ॥
নিত্যং প্রমুদিতাস্সর্বে যথা কৃতযুগে তথা ।
অশ্বমেধশতৈরিষ্ট্বা তথা বহুসুবর্ণকৈঃ ॥ 96 ॥
গবাং কোট্যযুতং দত্বা ব্রহ্মলোকং প্রযাস্যতি ।
অসংখ্যেযং ধনং দত্বা ব্রাহ্মণেভ্যো মহাযশাঃ ॥ 97 ॥
রাজবংশান্শতগুণান্স্থাপযিষ্যতি রাঘবঃ ।
চাতুর্বর্ণ্যং চ লোকেঽস্মিন্ স্বে স্বে ধর্মে নিযোক্ষ্যতি ॥ 98 ॥
দশবর্ষসহস্রাণি দশবর্ষশতানি চ ।
রামো রাজ্যমুপাসিত্বা ব্রহ্মলোকং প্রযাস্যতি ॥ 99 ॥
ইদং পবিত্রং পাপঘ্নং পুণ্যং বেদৈশ্চ সম্মিতম্ ।
যঃ পঠেদ্রামচরিতং সর্বপাপৈঃ প্রমুচ্যতে ॥ 100 ॥
এতদাখ্যানমাযুষ্যং পঠন্রামাযণং নরঃ ।
সপুত্রপৌত্রস্সগণঃ প্রেত্য স্বর্গে মহীযতে ॥ 101 ॥
পঠংদ্বিজো বাগৃষভত্বমীযাত্ স্যাত্ক্ষত্রিযো ভূমিপতিত্বমীযাত্ ।
বণিগ্জনঃ পণ্যফলত্বমীযাত্ জনশ্চ শূদ্রোঽপি মহত্বমীযাত্ ॥ 102 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে প্রথমস্সর্গঃ ॥
