শ্রীমদ্বাল্মীকীয রামাযণে অরণ্যকাংডম্ ।
অথ পংচত্রিংশস্সর্গঃ ।
ততশ্শূর্পণখাবাক্যং তচ্ছ্রুত্বা রোমহর্ষণম্ ।
সচিবানভ্যনুজ্ঞায কার্যং বুদ্ধ্বা জগাম হ ॥ 1 ॥
তত্কার্যমনুগম্যাথ যথাবদুপলভ্য চ ।
দোষাণাং চ গুণানাং চ সংপ্রধার্য বলাবলম্ ॥ 2 ॥
ইতি কর্তব্যমিত্যেব কৃত্বা নিশ্চযমাত্মনঃ ।
স্থিরবুদ্ধিস্ততো রম্যাং যানশালাং জগাম হ ॥ 3 ॥
যানশালাং ততো গত্বা প্রচ্ছন্নো রাক্ষসাধিপঃ ।
সূতং সংচোদযামাস রথস্সংযোজ্যতামিতি ॥ 4 ॥
এবমুক্তঃ ক্ষেণেনৈব সারথির্লঘুবিক্রমঃ ।
রথং সংযোজযামাস তস্যাভিমতমুত্তমম্ ॥ 5 ॥
কাংচনং রথমাস্থায কামগং রত্নভূষিতম্ ।
পিশাচবদনৈর্যুক্তং খরৈঃ কাংচনভূষণৈঃ ॥ 6 ॥
মেঘপ্রতিমনাদেন স তেন ধনদানুজঃ ।
রাক্ষসাধিপতিশ্শ্রীমান্যযৌ নদনদীপতিম্ ॥ 7 ॥
স শ্বেতবালব্যজনঃ শ্বেতচ্ছত্রো দশাননঃ ।
স্নিগ্ধবৈদূর্যসংকাশ স্তপ্তকাংচনকুংডলঃ ॥ 8 ॥
বিংশদ্ভুজো দশগ্রীবো দর্শনীযপরিচ্ছদঃ ।
ত্রিদশারির্মুনীংদ্রঘ্নো দশশীর্ষ ইবাদ্রিরাট্ ॥ 9 ॥
কামগং রথমাস্থায শুশুভে রাক্ষসেশ্বরঃ ।
বিদ্যুন্মংডলবান্মেঘস্সবলাক ইবাংবরে ॥ 10 ॥
স শৈলং সাগরানূপং বীর্যবানবলোকযন্ ।
নানাপুষ্পফলৈর্বৃক্ষৈরনুকীর্ণং সহস্রশঃ ॥ 11 ॥
শীতমংগলতোযাভিঃ পদ্মিনীভিস্সমংততঃ ।
বিশালৈরাশ্রমপদৈর্বেদিমদ্ভিস্সমাবৃতম্ ॥ 12 ॥
কদল্যাঢকিসংবাধং নারিকেলোপশোভিতম্ ।
সালৈস্তালৈস্তমালৈশ্চ পুষ্পিতৈস্তরুভির্বৃতম্ ॥ 13 ॥
নাগৈস্সুপর্ণৈর্গংধৈর্বৈঃ কিন্নরৈশ্চ সহস্রশঃ ।
অজৈর্বৈখানসৈর্মাষৈর্বালখিল্যৈর্মরীচিপৈঃ ॥ 14 ॥
অত্যংতনিযতাহারৈশ্শোভিতং পরমর্ষিভিঃ ।
জিতকামৈশ্চ সিদ্ধৈশ্চ চারণৈরুপশোভিতম্ ॥ 15 ॥
দিব্যাভরণমাল্যাভির্দিব্যরূপাভিরাবৃতম্ ।
ক্রীডারতিবিধিজ্ঞাভিরপ্সরোভিস্সহস্রশঃ ॥ 16 ॥
সেবিতং দেবপংতীভিশ্শ্রীমতীভিশ্শ্রিযাঽঽবৃতম্ ।
দেবদানবসংঘৈশ্চ চরিতং ত্বমৃতাশিভিঃ ॥ 17 ॥
হংসক্রৌংচপ্লবাকীর্ণং সারসৈস্সংপ্রণাদিতম্ ।
বৈঢূর্যপ্রস্তরং রম্যং স্নিগ্ধং সাগরতেজসা ॥ 18 ॥
পাংডুরাণি বিশালানি দিব্যমাল্যযুতানি চ ।
তূর্যগীতাভিজুষ্টানি বিমানানি সমংততঃ ॥ 19 ॥
তপসা জিতলোকানাং কামগান্যভিসংপতন্ ।
গংধর্বাপ্সরসশ্চৈব দদর্শ ধনদানুজঃ ॥ 20 ॥
নির্যাসরসমূলানাং চংদনানাং সহস্রশঃ ।
বনানি পশ্যন্সৌম্যানি ঘ্রাণতৃপ্তিকরাণি চ ॥ 21 ॥
অগরূণাং চ মুখ্যানাং বনান্যুপবনানি চ ।
তক্কোলানাং চ জাত্যানাং ফলানাং চ সুগংধিনাম্ ॥ 22 ॥
পুষ্পাণি চ তমালস্য গুল্মানি মরিচস্য চ ।
মুক্তানাং চ সমূহানি শুষ্যমাণানি তীরতঃ ॥ 23 ॥
শংখানাং প্রসরং চৈব প্রবালনিচযং তথা ।
কাংচনানি চ শৈলানি রাজতানি চ সর্বশঃ ॥ 24 ॥
প্রস্রবাণি মনোজ্ঞানি প্রসন্নানি হ্রদানি চ ।
ধনধান্যোপপন্নানি স্ত্রীরত্নৈশ্শোভিতানি চ ॥ 25 ॥
হস্ত্যশ্বরথগাঢানি নগরাণ্যবলোকযন্ ।
তং সমং সর্বতস্নিগ্ধং মৃদুসংস্পর্শমারুতম্ ।
অনূপং সিংধুরাজস্য দদর্শ ত্রিদিবোপমম্ ॥ 26 ॥
তত্রাপশ্যত্স মেঘাভং ন্যগ্রোধমৃষিভির্বৃতম্ ॥ 27 ॥
সমংতাদ্যস্য তাশ্শাখাশ্শতযোজনমাযতাঃ ।
যস্য হস্তিনমাদায মহাকাযং চ কচ্ছপম্ ॥ 28 ॥
ভক্ষার্থং গরুডশ্শাখামাজগাম মহাবলঃ ।
তস্য তাং সহসা শাখাং ভারেণ পতগোত্তমঃ ॥ 29 ॥
সুপর্ণঃ পর্ণবহুলাং বভংজ চ মহাবলঃ ।
তত্র বৈখানসা মাষা বালখিল্যা মরীচিপাঃ ॥ 30 ॥
অজা বভূবুর্ধূম্রাশ্চ সংগতাঃ পরমর্ষযঃ ।
তেষাং দযার্থং গরুডস্তাং শাখাং শতযোজনাম্ ॥ 31 ॥
জগামাদায বেগেন তৌ চোভৌ গজকচ্ছপৌ ।
একপাদেন ধর্মাত্মা ভক্ষযিত্বা তদামিষম্ ॥ 32 ॥
নিষাদবিষযং হত্বা শাখযা পতগোত্তমঃ ।
প্রহর্ষমতুলং লেভে মোক্ষযিত্বা মহামুনীন্ ॥ 33 ॥
স তেনৈব প্রহর্ষেণ দ্বিগুণীকৃতবিক্রমঃ ।
অমৃতানযনার্থং বৈ চকার মতিমান্মতিম্ ॥ 34 ॥
অযোজালানি নির্মথ্য ভিত্বা রত্নমযং গৃহম্ ।
মহেংদ্রভবনাদ্গুপ্তমাজহারামৃতং ততঃ ॥ 35 ॥
তং মহর্ষিগণৈর্জুষ্টং সুপর্ণকৃতলক্ষণম্ ।
নাম্না সুভদ্রং ন্যগ্রোধং দদর্শ ধনদানুজঃ ॥ 36 ॥
তং তু গত্বা পরং পারং সমুদ্রস্য নদীপতেঃ ।
দদর্শাশ্রমমেকাংতে রম্যে পুণ্যে বনাংতরে ॥ 37 ॥
তত্র কৃষ্ণাজিনধরং জটাবল্কলধারিণম্ ।
দদর্শ নিযতাহারং মারীচং নাম রাক্ষসাম্ ॥ 38 ॥
স রাবণস্সমাগম্য বিধিবত্তেন রক্ষসা ।
মারীচেনার্চিতো রাজা সর্বকামৈরমানুষৈঃ ॥ 39 ॥
তং স্বযং পূজযিত্বা তু ভোজনেনোদকেন চ ।
অর্থোপহিতযা বাচা মারীচো বাক্যমব্রবীত্ ॥ 40 ॥
কচ্চিত্সুকুশলং রাজন্লংকাযাং রাক্ষসেশ্বর ।
কেনার্থেন পুনস্ত্বং বৈ তূর্ণমেবমিহাগতঃ ॥ 41 ॥
এবমুক্তো মহাতেজা মারীচেন স রাবণঃ ।
ততঃ পশ্চাদিদং বাক্যমব্রবীদ্বাক্যকোবিদঃ ॥ 42 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাংডে পংচত্রিংশস্সর্গঃ ॥
