শ্রীমদ্বাল্মীকীয রামাযণে সুংদরকাংডম্ ।
অথ দ্বিষষ্টিতমস্সর্গঃ ।
তানুবাচ হরিশ্রেষ্ঠো হনুমান্বানরর্ষভঃ ।
অব্যগ্রমনসো যূযং মধু সেবত বানরাঃ ॥ 1 ॥
অহমাবারযিষ্যামি যুষ্মাকং পরিপংথিনঃ ।
শ্রুত্বা হনুমতো বাক্যং হরীণাং প্রবরোঽংগদঃ ॥ 2 ॥
প্রত্যুবাচ প্রসন্নাত্মা পিবংতু হরযো মধু ।
অবশ্যং কৃতকার্যস্য বাক্যং হনুমতো মযা ॥ 3 ॥
অকার্যমপি কর্তব্যং কিমংগ পুনরীদৃশম্ ।
অংগদস্য মুখাচ্ছ্রুত্বাবচনং বানরর্ষভাঃ ॥ 4 ॥
সাধুসাধ্বিতি সংহৃষ্টা বানরাঃ প্রত্যপূজযন্ ।
পূজযিত্বাংগদং সর্বে বানরা বানরর্ষভম্ ॥ 5 ॥
জগ্মুর্মধুবনং যত্র নদীবেগ ইব দ্রুমম্ ।
তে প্রবিষ্টা মধুবনং পালানাক্রম্য বীর্যতঃ ॥ 6 ॥
অতিসর্গাচ্চ পটবো দৃষ্ট্বা শ্রুত্বা চ মৈথিলীম্ ।
পপুস্সর্বে মধু তদা রসবত্ফলমাদদুঃ ॥ 7 ॥
উত্পত্য চ ততস্সর্বে বনপালান্ সমাগতান্ ।
তাডযংতি স্ম শতশ স্সক্তান্মধুবনে তদা ॥ 8 ॥
মধূনি দ্রোণমাত্রাণি বাহুভিঃ পরিগৃহ্য তে ।
পিবংতি সহিতা স্সর্বে নিঘ্নংতি স্ম তথাপরে ॥ 9 ॥
কেচিত্পীত্বা প্রবিধ্যংতি মধূনি মধুপিংগলাঃ ।
মধূচ্ছিষ্টেন কেচিচ্চ জগ্মুরন্যোন্যমুত্কটাঃ ॥ 10 ॥
অপরে বৃক্ষমূলে তু শাখাং গৃহ্য ব্যবস্থিতাঃ ।
অত্যর্থং চ মদগ্লানাঃ পর্ণান্যাস্তীর্য শেরতে ॥ 11 ॥
উন্মত্তভূতাঃ প্লবগা মধুমত্তাশ্চ হৃষ্টবত্ ।
ক্ষিপংতি চ তথান্যোন্যং স্খলংতি চ তথাঽপরে ॥ 12 ॥
কেচিত্ ক্ষ্বেলাং প্রকুর্বংতি কেচিত্ কূজংতি হৃষ্টবত্ ।
হরযোমধুনা মত্তাঃ কেচিত্সুপ্তা মহীতলে ॥ 13 ॥
কৃত্বা কেচিদ্ধসংত্যন্যে কেচিত্কুর্বংতি চেতরত্ ।
কৃত্বা কেচিদ্বদংত্যন্যে কেচিদ্বুধ্যংতি চেতরত্ ॥ 14 ॥
যেঽপ্যত্র মধুপালা স্স্যুঃ প্রেষ্যা দধিমুখস্য তু ।
তেঽপি তৈর্বানরৈর্ভীমৈঃ প্রতিষিদ্ধা দিশো গতাঃ ॥ 15 ॥
জানুভিস্তু প্রকৃষ্টাশ্চ দেবমার্গং প্রদর্শিতাঃ ।
অব্রুবন্ পরমোদ্বিগ্না গত্বা দধিমুখং বচঃ ॥ 16 ॥
হনূমতা দত্তবরৈর্হতং মধুবনং বলাত্ ।
বযং চ জানুভিঃ কৃষ্টা দেবমার্গং চ দর্শিতাঃ ॥ 17 ॥
ততো দধিমুখঃ ক্রুদ্ধো বনপস্তত্র বানরঃ ।
হতং মধুবনং শ্রুত্বা সাংত্বযামাস তান্ হরীন্ ॥ 18 ॥
ইহাগচ্ছত গচ্ছামো বানরান্ বলদর্পিতান্ ।
বলেন বারযিষ্যামো মধু ভক্ষযতো বযম্ ॥ 19 ॥
শ্রুত্বা দধিমুখস্যেদং বচনং বানরর্ষভাঃ ।
পুনর্বীরা মধুবনং তেনৈব সহসা যযুঃ ॥ 20 ॥
মধ্যে চৈষাং দধিমুখঃ প্রগৃহ্য তরসা তরুম্ ।
সমভ্যধাবদ্বেগেন তে চ সর্বে প্লবংগমাঃ ॥ 21 ॥
তে শিলাঃ পাদপাংশ্চাপি পর্বতাংশ্চাপি বানরাঃ ।
গৃহীত্বাঽঽভ্যগমন্ ক্রুদ্ধা যত্র তে কপিকুংজরাঃ ॥ 22 ॥
তে স্বামিবচনং বীরা হৃদযেষ্ববসজ্য তত্ ।
ত্বরযা হ্যভ্যধাবংত সালতালশিলাযুধাঃ ॥ 23 ॥
বৃক্ষস্থাংশ্চ তলস্থাংশ্চ বানরান্ বলদর্পিতান্ ।
অভ্যক্রামংস্ততো বীরাঃ পালাস্তত্র সহস্রশঃ ॥ 24 ॥
অথ দৃষ্ট্বা দধিমুখং ক্রুদ্ধং বানরপুংগবাঃ ।
অভ্যধাবংত বেগেন হনুমত্প্রমুখাস্তদা ॥ 25 ॥
তং সবৃক্ষং মহাবাহুমাপতংতং মহাবলম্ ।
আর্যকং প্রাহরত্তত্র বাহুভ্যাং কুপিতোঽংগদঃ ॥ 26 ॥
মদাংধশ্চ ন বেদৈনমার্যকোঽযং মমেতি সঃ ।
অথৈনং নিষ্পিপেষাশু বেগবদ্বসুধাতলে ॥ 27 ॥
স ভগ্নবাহূরুভুজো বিহ্বলশ্শোণিতোক্ষিতঃ ।
মুমোহ সহসা বীরো মুহূর্তং কপিকুংজরঃ ॥ 28 ॥
স সমাশ্বস্য সহসা সংকৃদ্ধো রাজমাতুলঃ ।
বানরান্বারযামাস দংডেন মধুমোহিতান্ ॥ 29 ॥
স কথংচিদ্বিমুক্তস্স্তৈর্বানরৈর্বানরর্ষভঃ ।
উবাচৈকাংতমাশ্রিত্য ভৃত্যান্ স্বান্ সমুপাগতান্ ॥ 30 ॥
এতে তিষ্ঠংতু গচ্ছামো ভর্তা নো যত্র বানরঃ ।
সুগ্রীবো বিপুলগ্রীবঃ সহ রামেণ তিষ্ঠতি ॥ 31 ॥
সর্বং চৈবাংগদে দোষং শ্রাবযিষ্যামি পার্থিবে ।
অমর্ষী বচনং শ্রুত্বা ঘাতযিষ্যতি বানরান্ ॥ 32 ॥
ইষ্টং মধুবনং হ্যেতত্পার্থিবস্য মহাত্মনঃ ।
পিতৃপৈতামহং দিব্যং দেবৈরপি দুরাসদম্ ॥ 33 ॥
স বানরানিমান্ সর্বান্ মধুলুব্ধান্ গতাযুষঃ ।
ঘাতযিষ্যতি দংডেন সুগ্রীবস্সসুহৃজ্জনান্ ॥ 34 ॥
বধ্যা হ্যেতে দুরাত্মানো নৃপাজ্ঞাপরিভাবিনঃ ।
অমর্ষপ্রভবো রোষস্সফলো নো ভবিষ্যতি ॥ 35 ॥
এবমুক্ত্বা দধিমুখো বনপালান্মহাবলঃ ।
জগাম সহসোত্পত্য বনপালৈস্সমন্বিতঃ ॥ 36 ॥
নিমেষাংতরমাত্রেণ স হি প্রাপ্তো বনালযঃ ।
সহস্রাংশুসুতো ধীমান্ সুগ্রীবো যত্র বানরঃ ॥ 37 ॥
রামং চ লক্ষ্মণং চৈব দৃষ্ট্বা সুগ্রীবমেব চ ।
সমপ্রতিষ্ঠাং জগতীমাকাশান্নিপপাত হ ॥ 38 ॥
সন্নিপত্য মহাবীর্যস্সর্বৈস্তৈঃ পরিবারিতঃ ।
হরির্দধিমুখঃ পালৈঃ পালানাং পরমেশ্বরঃ ॥ 39 ॥
স দীনবদনো ভূত্বা কৃত্বা শিরসি চাংজলিম্ ।
সুগ্রীবস্য শুভৌ মূর্ধ্না চরণৌ পত্যপীডযত্ ॥ 40 ॥
ইত্যার্ষে শ্রীমদ্রামাযণে বাল্মীকীয আদিকাব্যে সুংদরকাংডে দ্বিষষ্টিতমস্সর্গঃ ॥
